མཛོད་ཀྱི་དྲི་བ་དྲི་ལན།

 ༡༽   ཆོས་མངོན་པའི་དབྱེ་བ། མཚན་ཉིད། ངེས་ཚིག་རྣམས་ལེགས་པར་ཕྱེ་སྟེ་འབྲི་དགོས།

ལན།  ཆོས་མངོན་པའི་དབྱེ་བ་ནི། དོན་དམ་པའི་ཆོས་མངོན་པ་དང་བརྡར་བཏགས་པའི་ཆོས་མངོན་པའོ།

   མཚན་ཉིད་ལ། ༡ དོན་དམ་པའི་ཆོས་མངོན་པའི་མཚན་ཉིད་ནི། ཆོས་ཀྱི་གནས་ལུགས་མངོན་སུམ་དུ་རྟོགས་པའི་ཤེས་རབ་དང་དེའི་འཁོར་དུ་གཏོགས་པའི་སེམས་དང་སེམས་བྱུང་། ༢ བརྡར་བཏགས་པའི་ཆོས་མངོན་པའི་མཚན་ཉིད། དོན་དམ་པའི་ཆོས་མངོན་པའི་རྒྱུར་གྱུར་པའི་ལམ་དང་མངོན་པའི་གཞུང་།    

  ངེས་ཚིག་ནི། མདོ་སྡེ་རྒྱན་ལས། མངོན་དུའི་ཕྱིར་དང་ཡང་ཡང་ཕྱིར། །ཟིལ་མནོན་རྟོགས་ཕྱིར་མངོན་པའི་ཆོས།། ཞེས་གསུངས་པ་ལྟར། ཐར་པ་ལ་མངོན་དུ་ཕྱོགས་པ་དང་། ཡང་ནས་ཡང་དུ་སེམས་པ་དང་། གཞན་ཟིལ་གྱིས་མནོན་པ་དང་། བདག་མེད་པའི་དོན་རྟོགས་པའི་ཕྱིར་ན་ཆོས་མངོན་པ་ཞེས་བརྗོད་པ་ཡིན།

   དོན་དམ་པའི་ཆོས་མངོན་པ་དང་བརྡར་བཏགས་པའི་ཆོས་མངོན་པ་གཉིས་ཀྱི་ཁྱད་པར་ནི། །ངོ་མ་ཡིན་མིན་གྱི་ཁྱད་པར་ཡོད། དེ་ཡང་དོན་དམ་པའི་ཆོས་མངོན་པ་ནི་ ཆོས་མངོན་པ་ངོ་མ་དང་། བརྡར་བཏགས་པའི་ཆོས་མངོན་པ་ནི་ ཆོས་མངོན་པ་ངོ་མ་མིན་ནོ།།

༢༽ སྟོན་པའི་གསུང་རབ་ཐམས་ཅད་སྡེ་སྣོད་གསུམ་དུ་འདུ་ཚུལ་ཇི་ལྟར་ཡིན།

ལན།   སྟོན་པའི་གསུང་རབ་ཐམས་ཅད་སྡེ་སྣོད་གསུམ་དུ་བསྡུ་ཚུལ་ནི། སོ་སོར་ཐར་པའི་བསླབ་བྱ་དང་དེ་དང་འབྲེལ་བའི་གནས་སྟོན་པ་རྣམས་འདུལ་བའི་སྡེ་སྣོད་དང་། བདེན་བཞི་དང་རྟེན་བྲེལ་སོགས་བརྗོད་བྱ་བྱེ་བྲག་པ་སོ་སོ་ལས་བརྩམས་ཏེ་ཡུལ་དུས་ས་གནས་བྱེ་བྲག་པ་ཞིག་ལ་གསུངས་པ་དང་། ཡང་ན་བརྗོད་བྱ་ཏིང་ངེ་འཛིན་གྱི་རིགས་རྣམས་མདོ་སྡེའི་སྡེ་སྣོད་དང་། ཕུང་ཁམས་སྐྱེ་མཆེད་ཀྱི་མཚན་ཉིད་དང་རབ་དབྱེ་ལས་གཙོ་བོར་བརྩམས་ཏེ་སྟོན་པ་རྣམས་མངོན་པའི་སྡེ་སྣོད་དུ་བསྡུ་བ་ཡིན་ནོ།

༣༽  བྱེ་བྲག་སྨྲ་བ་དང་མདོ་སྡེ་པ་གཉིས་ཀྱི་མངོན་པའི་སྡེ་སྡོན་ངོས་འཛིན་ཚུལ་བྲིས།

ལན།  བྱེ་བྲག་སྨྲ་བ་ལྟར་ན་མངོན་པ་སྡེ་བདུན་པོ་མངོན་པའི་སྡེ་སྣོད་དུ་འདོད་པ་དང་། མདོ་སྡེ་པ་ལྟར་ན་སྡེ་བདུན་པོ་སྟོན་པས་གསུངས་པའི་མངོན་པའི་སྡེ་སྣོད་དུ་མི་འདོད་པར། མདོ་སྡེ་དང་འདུལ་བ་གཉིས་ཀྱི་ནང་ན་ཆོས་རྣམས་ཀྱི་རང་སྤྱིའི་མཚན་ཉིད་སྟོན་པའི་གཞུང་ཆ་ཤས་ཤིག་མངོན་པའི་སྡེ་སྣོད་དུ་འདོད་པ་ཡིན།།

 ༤༽  སྟོན་པས་ཆོས་མངོན་པ་གསུངས་པའི་དགོས་པ་བྲིས། 
ལན།   སྟོན་པས་ཆོས་མངོན་པ་གསུངས་པའི་དགོས་པ་ནི། རྩ་བ་ལས། ཆོས་རྣམས་རབ་ཏུ་རྣམ་འབྱེད་མེད་པར་ཉོན་མོངས་རྣམས། །གང་ཞིག་ཉེ་བར་ཞི་བར་བྱ་བྱ་ཐབས་མེད་ལ། །ཉོན་མོངས་པས་ཀྱང་འཇིག་རྟེན་སྲིད་མཚོ་འདིར་འཁྱམས་ཏེ། །དེ་བས་དེ་ཕྱིར་འདི་ནི་སྟོན་པས་གསུངས་སོ་ལོ།། ཞེས་གསུངས་པ་ལྟར། འཁོར་བ་ལས་ཐར་དགོས་ན་ཉོན་མོངས་པ་ཞི་དགོས། ཉོན་མོངས་ཞི་དགོས་ན་ཆོས་རབ་རྣམ་འབྱེད་ཀྱི་ཤེས་རབ་བསྐྱེད་དགོས་པས་ ཆོས་རབ་རྣམ་འབྱེད་ཀྱི་ཤེས་རབ་དེ་བསྐྱེད་པའི་ཆེད་དུ་ཆོས་མངོན་པ་གསུངས་པ་ཡིན། མདོར་ན་དགོས་པ་ངོ་མ་ནི་ ཆོས་རབ་རྣམ་འབྱེད་ཀྱི་ཤེས་རབ་སྐྱེད་པ་དེ་ཡིན་ནོ།།

༥༽ གང་ཞིག་ཀུན་ལ་མུན་པ་གཏན་བཅོམ་ཞིང་། །འཁོར་བའི་འདམ་ལས་འགྲོ་དྲངས་མཛད་པ། །དོན་བཞིན་སྟོན་པ་དེ་ལ་ཕྱག་འཚལ་ནས། །ཞེས་པའི་ཚིག་རྐང་གསུམ་གྱི་འགྲེལ་བཤད་བྲིས།

ལན།   དེའི་དོན་ནི།    གང་ཞིག་གིས་ རང་དོན་དུ་ཤེས་བྱའི་ཆོས་ཀུན་ལ་མུན་པ་གཏན་ནས་བཅོམ་ཞིང་། གཞན་དོན་དུ་འཁོར་བའི་འདམ་ལས་ འགྲོ་བ་སེམས་ཅན་རྣམས་ཐར་པའི་ལམ་དུ་དྲངས་པར་མཛད་པའི་ཕྱིར་དུ་ ཆོས་ཀྱི་དོན་རྣམས་ཇི་མ་ཇི་བཞིན་སྟོན་པར་མཛད་པའི་ སྟོན་པ་དེ་ལ་ཕྱག་འཚལ་ལོ་ཞེས་པའོ།།

༦༽  མཆོད་བརྗོད་ཀྱི་སྐབས་བཤད་པའི་དགོས་དོན། བསྡུས་དོན། ཚིག་དོན་གསུམ་གྱི་སྐོར་བྲིས།

ལན།   དང་པོ་དགོས་དོན་ནི། མཆོད་བརྗོད་དེ་ལ་བརྟེན་ནས་སྟོན་པའི་ཡོན་ཏན་ཤེས་པ་དང་། རང་ལ་བསོད་ནམས་འཕེལ་བ། རང་ཉིད་དམ་པའི་སྤྱོད་པ་དང་མཐུན་པར་འཇུག་པ་དང་། དེ་དག་ལ་བརྟེན་ནས་མཐར་ཐུག་ཐར་པ་ཐོབ་པའོ།།

  གཉིས་པ་བསྡུས་དོན་ནི། ཚིགས་བཅད་འདིས་སྟོན་པ་ལ་ཕུན་སུམ་ཚོགས་པ་གསུམ་མངའ་བའི་སྒོ་ནས་ཕྱག་འཚལ་བ་དང་། བཤད་པར་དམ་བཅའ་བསྟན་པ་ཡིན་ནོ།

   གསུམ་པ་ཚིག་དོན་ནི། གང་ཞིག་སོགས་གོང་དུ་ཞུས་པ་ལྟ་བུ་ཡིན།

༧༽  ཉན་རང་དང་སངས་རྒྱས་གཉིས་ཀྱིས་མུན་པ་གཉིས་སྤངས་ཚུལ་གྱི་ཁྱད་པར་ཇི་ལྟར་ཡོད།

ལན།   ཉན་རང་དང་། སངས་རྒྱས་གཉིས་ཀྱིས་མུན་པ་གཉིས་སྤོང་ཚུལ་གྱི་ཁྱད་པར་ནི།  ཉན་རང་གིས་ཉོན་མོངས་ཅན་གྱི་སྒྲིབ་པ་ཙམ་ཞིག་སྤོང་བ་དང་། སངས་རྒྱས་ཀྱིས་ཉོན་མོངས་ཅན་དང་། ཉོན་མོངས་ཅན་མ་ཡིན་པའི་མུན་པ་གཉིས་ཀ་སྤངས་པས་ཉོན་མོངས་གཉིས་ཀ་སྤངས་དང་མི་སྤངས་ཀྱི་ཁྱད་པར་ཡོད།

༨༽  མི་ཤེས་པའི་རྒྱུ་བཞི་དེ་སུའི་རྒྱུད་ལ་ཡོད། མི་ཤེས་པའི་རྒྱུ་བཞི་ཡོད་པའི་མཚན་གཞི་རེ་བྲིས།

 ལན། མི་ཤེས་པའི་རྒྱུ་བཞི་དེ་ཉན་ཐོས་དང་རང་རྒྱལ་རྣམས་ལ་ཡོད། མི་ཤེས་པའི་རྒྱུ་བཞི་གང་ལ་ཡོད་པའི་མཚན་གཞི་ནི། ༡          སངས་རྒྱས་ཀྱི་ཆོས་ཟབ་ཅིང་ཕྲ་བས་མི་ཤེས་པ་ཤཱ་རིའི་བུ་ལྟ་བུ། ༢          ཡུལ་ཤིན་ཏུ་བསྐལ་བས་མི་ཤེས་པ་ནི། མཽང༌གལ་གྱི་བུས་རང་གི་མ་བྱང་ཕྱོགས་འོད་ཟེར་ཅན་གྱི་འཇིག་རྟེན་དུ་སྐྱེས་པ་མི་ཤེས་པ་འཕགས་པ་མོའུ་རྒྱལ་བུ་ལྟ་བུ། ༣        དུས་ཤིན་ཏུ་བསྐལ་བས་མི་ཤེས་པ་ནི། ཤཱ་རིའི་བུས་ཁྱིམ་བདག་དཔལ་སྐྱེས་ཀྱི་རྒྱུད་ལ་ཐར་པ་ཆ་མཐུན་གྱི་དགེ་རྩ་ཡོད་པ་མི་ཤེས་པ་ལྟ་བུ། ༤       རྣམ་པའི་དབྱེ་བ་མཐའ་ཡས་པས་མི་ཤེས་པ་ནི། ཁམས་དང་འགྲོ་བ་དང་སྐྱེ་གནས་དང་སྐྱེ་བ་ལ་སོགས་པའི་བྱེ་བྲག་རྟོགས་དཀའ་་བ་རྣམས་ཡིན་ནོ།།

༩༽   བསྟན་བཅོས་མངོན་པ་མཛོད་ཀྱི་དགོས་སོགས་ཆོས་བཞི་དང་། དགོས་སོགས་ཆོས་བཞི་མེད་པའི་བསྟན་བཅོས་གང་ཡིན་ངོས་འཛིན་གྱིས།

ལན།  བརྗོད་བྱ་ནི།        ཟག་བཅས་དང་ཟག་མེད་ཀྱི་ཆོས། ཡང་ན་བདེན་པ་བཞི།

    དགོས་པ་ནི།       འདུལ་བྱའི་རྒྱུད་ལ་ཆོས་རབ་རྣམ་འབྱེད་ཀྱི་ཤེས་རབ་བསྐྱེད་པ།

    ཉིང་དགོས་ནི། མཐར་ཐུག་མྱང་འདས་ཀྱི་གོ་འཕང་།

   འབྲེལ་བ་ནི།        བརྗོད་བྱ་བདེན་བཞི་རྟོགས་ན་ རང་རྒྱུད་ལ་ཆོས་རབ་རྣམ་འབྱེད་ཀྱི་ཤེས་རབ་སྐྱེས་པ་དང་། དེ་སྐྱེས་ན་མྱ་ངན་ལས་འདས་པ་ཡང་འཐོབ་པར་འགྱུར་བས་ སྔ་མ་ལས་ཕྱི་མ་དེ་ལས་དེ་བྱུང་གི་འབྲེལ་བ་ཡོད་པ་ཡིན་ནོ།།

          དགོས་སོགས་ཆོས་བཞི་མེད་པའི་བསྟན་བཅོས་ནི།

དཔེར་ན། བརྗོད་བྱ་མེད་པའི་བསྟན་བཅོས་ནི། བྱ་རོག་ལ་སོ་ཡོད་མེད་བརྟག་པའི་བསྟན་བཅོས་ལྟ་བུ། དེ་གི་བརྗོད་བྱར་གྱུར་པའི་བྱ་རོག་གི་སོ་དེ་མེད་པའི་ཕྱིར་རོ།

        དགོས་པ་མེད་པའི་བསྟན་བཅོས་ནི། རང་གི་སྐྱེ་བའི་མ་དེ་ རང་གི་བག་མར་ལེན་ནའང་འགྲིག་པར་བཤད་པའི་བསྟན་བཅོས་ལྟ་བུ། མ་བག་མར་ལེན་ཏེ་དགོས་པ་མེད་པའི་ཕྱིར་རོ།

        ཉིང་དགོས་མེད་པའི་བསྟན་བཅོས་ནི། ཀླུ་རྒྱལ་འཇོག་པའི་གཙུག་ནོར་ལེན་པའི་བསྟན་བཅོས་ལྟ་བུ། མཐར་ཐུག་གི་གྲུབ་འགྲས་འགྲུབ་མི་སྲིད་པའི་ཕྱིར་རོ།།

         འབྲེལ་བ་མེད་པའི་བསྟན་བཅོས་ནི།    ཕྱུགས་ཀྱི་མཆོད་སྦྱིན་བྱེད་ན་ཐར་པར་འཐོབ་པར་བཤད་པའི་བསྟན་བཅོས་ལྟ་བུ། མཆོད་སྦྱིན་དེ་དང་ཐར་པ་གཉིས་འབྲེལ་བ་མེད་པའི་ཕྱིར་རོ།།

༡༠༽       ཤེས་རབ་ཀྱི་དབྱེ་བྱ་ལ་ཕུང་ཁམས་སྐྱེ་མཆེད་སོགས་མ་བཞག་པར་ངེས་པར་དུ་ཟག་བཅས་ཟག་མེད་བཞག་པའི་རྒྱུ་མཚན་གང་ཡིན།

ལན། ཤེས་རབ་ཀྱི་དབྱེ་བྱ་ཕུང་ཁམས་སྐྱེ་མཆེད་སོགས་མ་བཞག་པར་ངེས་པར་དུ་ཟག་བཅས་ཟག་མེད་བཞག་པའི་རྒྱུ་མཚན་ནི།

འཁོར་བ་ལས་གྲོལ་བའི་དོན་དུ་ཕུང་ཁམས་སྐྱེ་མཆེད་ཀྱི་རྣམ་གཞག་ལས་ཀྱང་ ཟག་བཅས་ཟག་མེད་ཀྱི་རྣམ་གཞག་དེ་གལ་ཆེ་བའི་རྒྱུ་མཚན་ལ་བརྟེན་ནས་ཡིན་ནོ།

༡༡༽       ཟག་བཅས་དང་ཟག་མེད་ཀྱི་མཚན་ཉིད་ཇི་ལྟར་ཡིན།

ལན།  ཟག་བཅས་ཀྱི་མཚན་ཉིད་ནི། ཟག་པ་ཉོན་མོངས་པ་རྒྱས་པའི་རྟེན་བྱེད་པའི་ཆོས།  ཟག་མེད་ཀྱི་མཚན་ཉིད་ནི།  ཟག་པ་ཉོན་མོངས་པ་རྒྱས་པའི་རྟེན་མི་བྱེད་པའི་ཆོས། ཡང་ན། དམིགས་པ་དང་མཚུངས་ལྡན་གང་རུང་གི་སྒོ་ནས་ཟག་པ་རྒྱས་པའི་ཆོས་ཟག་བཅས་ཀྱི་མཚན་ཉིད་དང་། དམིགས་པ་དང་མཚུངས་ལྡན་གང་རུང་གི་སྒོ་ནས་ཟག་པ་མི་རྒྱས་པའི་ཆོས་ཟག་མེད་ཀྱི་མཚན་ཉིད་ཡིན།

༡༢༽ འདུས་བྱས་ཀྱི་མཚན་ཉིད་ཇི་ལྟར་ཡིན།

 ལན།   འདུས་བྱས་ཀྱི་མཚན་ཉིད་ནི། རྒྱུ་དང་རྐྱེན་ལས་སྐྱེས་པའི་ཆོས་གང་ཞིག་རང་གི་ངོ་བོ་ལ་སྐྱེས་གནས་འགག་པ་གསུམ་ཡོད་པའོ།

༡༣༽ འདུས་བྱས་ཀྱི་མིང་གི་རྣམ་གྲངས། ཟག་བཅས་ཀྱི་མིང་གི་རྣམ་གྲངས་རྣམས་གོ་དོན་དང་བཅས་བྲིས།

ལན།  འདུས་བྱས་ཀྱི་མིང་གི་རྣམ་གྲངས་དང་དེའི་དོན་མཉམ་དུ་སྦྱར་བ་ནི།  ༡         དུས་གསུམ་འབྱུང་སའི་གཞི་ཡིན་པས་ན་གཞི་དང་བཅས་པ། ༢         རྩོད་རྙོག་གི་གཏམ་འབྱུང་སའི་གཞི་ཡིན་པས་ན་གཏམ་གྱི་གཞི།   ༣ མཐའ་མར་འདུས་བྱས་དེ་དག་ལས་སེམས་ངེས་པར་འབྱུང་བའི་གཞི་ཡིན་པས་ན་ངེས་པར་འབྱུང་བའི་གཞི། ༤      རྒྱུ་དང་བཅས་པ་ཡིན་པས་ན་གཞི་དང་བཅས་པའོ།

   ཟག་བཅས་ཉེར་ལེན་གྱི་ཕུང་པོའི་མིང་གི་རྣམ་གྲངས་དང་དེའི་དོན་མཉམ་དུ་སྦྱར་བ་ནི། ༡འཐབ་འཛིང་གི་རྩ་བ་ཡིན་པས་ན་འཐབ་པ་དང་བཅས་པ། ༢ སྡུག་བསྔལ་གྱི་རང་བཞིན་ཡིན་པས་ན་སྡུག་བསྔལ། ༣བདེ་སྡུག་ཀུན་འབྱུང་བའི་རྒྱུ་ཡིན་པས་ན་ཀུན་འབྱུང་། ༤འཁོར་བའི་ཆོས་ཡིན་པས་ན་འཇིག་རྟེན། ༥ལྟ་གྲུབ་ཀྱི་བསམ་བློ་གཏོང་སའི་གཞི་ཡིན་པས་ན་ལྟ་གནས། ༦ཡང་ནས་ཡང་དུ་འཁོར་བས་ན་སྲིད་པའོ།

༡༤༽      འདུས་མ་བྱས་གསུམ་གྱི་མཚན་ཉིད་བྲིས།

ལན།  དང་པོ་འདུས་མ་བྱས་ནམ་མཁའི་མཚན་ཉིད་ནི། ཆོས་གཞན་གྱི་ས་གོ་མི་བཀག་པར་གོ་འབྱེད་པའི་ཆོས།  གཉིས་པ་སོ་སོར་བརྟགས་འགོག་གི་མཚན་ཉིད་ནི། རང་གི་དགག་བྱ་ཟག་བཅས་ཀྱི་ཆོས་ཉོན་མོངས་པ་དང་བྲལ་བའོ། གསུམ་པ་སོ་སོར་བརྟགས་མིན་འགོག་པའི་མཚན་ཉིད་ནི། འདུས་བྱས་ཀྱི་ཆོས་གང་ཞིག་སྐྱེ་བ་ལ་རྐྱེན་མ་ཚང་བའི་དབང་གིས་གཏན་དུ་གེགས་བྱེད་པའོ།།

༡༥༽ བྱེ་བྲག་སྨྲ་བས་འདུས་མ་བྱས་གསུམ་རེ་རེ་ནས་རྗས་སུ་གྲུབ་པར་འདོད་པའི་རྒྱུ་མཚན་བྲིས།

ལན།  བྱེ་བྲག་སྨྲ་བས་ དེ་གསུམ་རེ་རེ་རྫས་སུ་གྲུབ་པའི་རྒྱུ་མཚན་ནི། ནམ་མཁས་ནི་ཆོས་གཞན་སྐྱེ་བའི་གོ་འབྱེད་པར་བྱེད་པའི་ཕྱིར་དང་། བརྟགས་འགོག་གིས་ནི་རང་གི་དགག་བྱ་འགོག་པའི་ཕྱིར་དང་། བརྟགས་མིན་གྱི་འགོག་པས་ནི་རང་གི་དགག་བྱ་སྐྱེ་བ་ལ་གེགས་བྱེད་པའི་ཕྱིར་ན་དེ་དག་རེ་རེ་ནས་ཡོད་པའི་རྫས་སུ་གྲུབ་པ་ཡིན་ནོ།།

༡༦༽ ཕུང་པོའི་མཚན་ཉིད། ཕུང་པོ་ལྔ་པོ་རང་རང་གི་དབྱེ་བ་ཇི་ཙམ་ཡོད་པ་རེ་རེ་བཞིན་བྲིས།

ལན།   ཕུང་པོའི་མཚན་ཉིད། དུ་མ་སྤུངས་པའོ། །ཕུང་པོ་ལ་དབྱེ་ན་ལྔ་ཡོད་དེ། གཟུགས། ཚོར་བ། འདུ་ཤེས། འདུ་བྱེད། རྣམ་པར་ཤེས་པའི་ཕུང་པོའོ། 

༡༧༽       ཕུང་པོ་ལྔའི་གྲངས་ངེས་དང་གོ་རིམ་ངེས་ཚུལ་ཇི་ལྟར་ཡིན།

ལན།  གྲངས་ངེས་ནི། དངོས་པོ་ལ་གཟུགས་དང་གཟུགས་མིན་པ་གཉིས་སུ་ངེས་པ་ཡིན་ལ། གཟུགས་མ་ཡིན་པ་ལ་སེམས་དང་སེམས་མ་ཡིན་པ་གཉིས་སུ་ངེས་པས། དང་པོ་གཟུགས་དེ་གཅིག། དེ་ནས་གཟུགས་མ་ཡིན་པ་ལ་སེམས་དང་སེམས་མ་ཡིན་པ་གཉིས་ཀྱི་སེམས་དེ་བརྩིས་ན་གཉིས། སེམས་མ་ཡིན་པ་ལ་ཚོར་བ་འདུ་ཤེས་འདུ་བྱེད་གསུམ་དུ་ངེས་པས་ན། གོང་གི་གཉིས་ཀྱི་སྟེང་དུ་ཚོར་བ་འདུ་ཤེས་འདུ་བྱེད་རྩིས་པའི་ལྔར་ངེས་པ་ཡིན་ནོ། 

གོ་རིམ་ངེས་ཚུལ་ནི། ཕྲ་རགས་ཀྱི་སྒོ་ནས་བསྟན་པ་དང་། ཀུན་ནས་ཉོན་མོངས་པ་སྐྱེ་བའི་རིམ་པ་དང་མཐུན་པར་བསྟན་པ་ཡིན་པས་ གོ་རིམ་ཡང་དེ་ལྟར་ངེས་པ་ཡིན་ནོ།།

༡༨༽       ཕུང་ཁམས་སྐྱེ་མཆེད་གསུམ་སོ་སོར་བསྟན་པའི་དགོས་པ་གང་ཡིན།

ལན། སྟོན་པ་སངས་རྒྱས་ཉིད་ཀྱིས་གདུལ་བྱ་ལ་ཕུང་ཁམས་སྐྱེ་མཆེད་གསུམ་པོ་སོ་སོར་བསྟན་པའི་དགོས་པ་ནི།          རྨོངས་དབང་འདོད་རྣམས་གསུམ་གྱི་ཕྱིར། །ཕུང་པོ་ལ་སོགས་གསུམ་བསྟན་ཏོ།། ཞེས་པ་ལྟར། དགོས་པའི་དབང་གིས་རྣམ་པ་གསུམ་པོ་སོ་སོར་བསྟན་པ་ཡིན་ཏེ། གདུལ་བྱ་ཁ་ཅིག་སེམས་བྱུང་ལ་རིལ་པོ་གཅིག་ཏུ་བཟུང་ནས་བདག་ཏུ་རྨོངས་པ་དང་། ཁ་ཅིག་གཟུགས་ལ་རིལ་པོ་གཅིག་ཏུ་བཟུང་བ་དང་། ཁ་ཅིག་གཟུགས་དེ་ཡང་གཅིག་དང་། སེམས་དེ་ཡང་གཅིག་ལས་མེད་དོ་སྙམ་དུ་རྨོངས་པ་སྟེ། རྨོངས་པ་མི་འདྲ་བ་གསུམ་པོ་བསལ་བའི་ཆེད་དུ་ཕུང་ཁམས་སྐྱེ་མཆེད་གསུམ་པོ་སོ་སོར་བསྟན་པ་དང་། ཡང་། གདུལ་བྱ་དབང་པོ་རྣོན་པོ་མགོ་སྨོས་པས་གོ་བ་དང་། འབྲིང་པོ་ཅུང་ཟད་སྤྲོས་པས་གོ་བ་དང་། རྟུལ་པོ་རྒྱས་པར་སྤྲོས་པས་གོ་བའི་དབང་པོ་མི་འདྲ་བའི་རིམ་པ་གསུམ་ལ་བརྟེན་ནས་དེ་གསུམ་སོ་སོར་གསུངས་པ་དང་། ཡང་། ཁ་གཅིག་བསྡུས་པ་ལ་དགའ་བ་དང་། ཁ་གཅིག་འབྲིང་ཙམ་ལ་དགའ་བ་དང་། ཁ་གཅིག་རྒྱས་པ་ལ་དགའ་བའི་འདོད་པ་མི་འདྲ་བ་གསུམ་གྱི་དོན་དུ་དེ་དག་སོ་སོར་བཤད་པ་ཡིན་ནོ།།

༡༩༽       རྣམ་པར་རིག་བྱེད་མིན་པའི་གཟུགས་ཀྱི་མཚན་ཉིད་དང་། མཚན་གཞི། དཔེ་གང་ལ་འཇོག  དེ་ལ་ཁྱད་པར་གྱི་ཆོས་ཇི་ཙམ་ཚང་དགོས།

ལན། རྣམ་པར་རིག་བྱེད་མིན་པའི་གཟུགས་ཀྱི་མཚན་ཉིད་ནི། །དེ་ལ་བརྟེན་ནས་ནང་གི་ཀུན་སློང་གང་ཡིན་རིག་མི་ནུས་པའི་གཟུགས།          

    མཚན་གཞི་ནི། དཔེར་ན།         མཚན་གཞི་ནི། དཔེར་ན། སོ་ཐར་གྱི་སྡོམ་པ་དང་། བསམ་གཏན་གྱི་སྡོམ་པ་དང། ཟག་མེད་ཀྱི་སྡོམ་པ་དང་། སྡོམ་མིན་དང་། བར་མའི་དགེ་བ་ལུས་ངག་གི་སྡོམ་པ་ལྟ་བུའོ།

  རྣམ་པ་རིག་བྱེད་མིན་པའི་གཟུགས་དེ་ལ་ཁྱད་ཆོས་ཇི་ཙམ་ཚང་དགོས་ཞེ་ན།  དེ་ལ་ཁྱད་པར་ལྔ་དང་ལྡན་དགོས་ཏེ།   དེ་ཡང་ རྩ་བ་ལས། གཡེངས་དང་སེམས་མེད་པ་ཡི་ཡང་། །དགེ་དང་མི་དགེ་རྗེས་འབྲེལ་གང་། །འབྱུང་བ་ཆེ་རྣམས་རྒྱུར་བྱས་པ། །དེ་ནི་རྣམ་རིག་བྱེད་མིན་བརྗོད།། ཅེས་པ་ལྟར། གནས་སྐབས་ཀྱི་ཁྱད་པར་སེམས་གཡེངས་པ་དང་། སེམས་མེད་པའི་སྙོམས་འཇུག་གཉིས་ཀྱི་གནས་སྐབས་ན་ཡང་ཡོད་པ་དང་། ངོ་བོའི་ཁྱད་པར་དགེ་བ་དང་མི་དགེ་བ་གང་རུང་ཡིན་པ། དུས་ཀྱི་ཁྱད་པར་རྒྱུན་མཆོག་ཏུ་རྗེས་སུ་འབྲེལ་བ། རྒྱུའི་ཁྱད་པར་འབྱུང་བ་ཆེན་པོ་བཞི་རྣམས་རྒྱུར་བྱས་པ་ཡིན་ནོ།།

༢༠༽       ཁམས་ཀྱི་མཚན་ཉིད། དབྱེ་བ་གོ་རིམ། དབང་པོ་དྲུག་གི་གོ་རིམ་ངེས་ཚུལ་ཇི་ལྟར་ཡིན།

ལན།   ཁམས་ཀྱི་མཚན་ཉིད་ནི། ས་བོན་འཛིན་པ་འམ་ རང་གི་མཚན་ཉིན་འཛིན་པའམ་ ཉེར་སྤྱོད་འཛིན་པ་ཁམས་ཀྱི་མཚན་ཉིད་དོ།

  དེ་ལ་དབྱེ་ན་ཁམས་བཅོ་བརྒྱད་ཡོད་དེ། དམིགས་པ་ཡུལ་གྱི་ཁམས་དྲུག  རྟེན་དབང་པོའི་ཁམས་དྲུག་ བརྟེན་པ་རྣམ་ཤེས་ཀྱི་ཁམས་དྲུག་སྟེ་བསྡོམས་པས་བཅོ་བརྒྱད་དོ།།

  དབང་པོ་དྲུག་གི་གོ་རིམ་ངེས་ཚུལ་ནི། ཁམས་བཅོ་བརྒྱད་ལས་མིག་སོགས་ཁམས་དྲུག་གི་རིམ་པ་བསྟན་པས་གཞན་ཤུགས་ལ་རྟོགས་པའི་ཕྱིར་མིག་སོགས་ཁམས་དྲུག་དང་པོར་སྟོན་པར་མཛད་དོ། དབང་པོ་དྲུག་ལས་ ད་ལྟ་བའི་དོན་ཡུལ་དུ་བྱེད་པའི་བྱེད་པའི་ཕྱིར་ན་ དབང་པོ་དྲུག་ལས་མིག་སོགས་ལྔ་དང་པོར་བཞག་པ་དང་། དུས་གསུམ་ཀའི་དོན་ཡུལ་དུ་བྱེད་པའི་རྒྱུ་མཚན་གྱིས་ཡིད་ཀྱི་དབང་པོ་རྗེས་སུ་བཞག་པ་ཡིན། དེ་ནས་འབྱུང་བ་ཙམ་ཞིག་ཡུལ་དུ་བྱེད་པའི་རྒྱུ་མཚན་གྱིས་ མིག་སོགས་བཞི་དང་པོར་བཞག་ལ། འབྱུང་བ་དང་འབྱུང་འགྱུར་གཉིས་ཀ་ཡུལ་དུ་བྱེད་པའི་ཕྱིར་ན་ལུས་ཀྱི་དབང་པོ་རྗེས་སུ་བཞག་པ་ཡིན། དེ་ལས་རྒྱང་ཐག་རིང་བར་འཇུག་པའི་རྒྱུ་མཚན་གྱི་མིག་དང་རྣ་བ་དང་པོར་བཞག། རྒྱང་ཐག་མཐུང་བར་འཇུག་པའི་རྒྱུ་མཚན་གྱིས་སྣ་ལྕེ་གཉིས་རྗེས་སུ་བཞག་པ་ཡིན། དེ་ལས་སྣ་ཡིས་མྱུར་བར་འཇུག་པའི་རྒྱུ་མཚན་གྱིས་སྔོན་མ་དང་། ལྕེ་ཡིས་དལ་པོར་འཇུག་པའི་རྒྱུ་མཚན་གྱིས་རྗེས་སུ་བཞག་པ་ཡིན།

  ཡང་ན། དབང་པོ་དྲུག་གི་གོ་རིམ་ནི། ལུས་ལ་ཇི་ལྟར་གནས་པ་ལྟར་དུ་བཞག་པ་ཡིན་ནོ།།

༢༡༽ དབང་པོ་ལྔ་རེ་རེའི་མཚན་ཉིད་དང་མཚན་གཞི་བྲིས།

ལན།   དབང་པོ་ལྔ་རེ་རེའི་མཚན་ཉིད་དང་མཚན་གཞི།  དོན་ལྔའི་མཚན་ཉིད་དང་དེ་དག་རེ་རེའི་དབྱེ་བ་ ཐིག་ཁྲར་བཀོད་པར་ནི།

	དབང་པོ་ལྔའི་མཚན་ཉིད།	མཚན་གཞི
མིག་དབང་།	མིག་ཤེས་སྐྱེ་བའི་རྟེན་དུ་གྱུར་པའི་དབངཔོ་གཟུགས་ཅན་དྭང་བ།	ཟར་མའི་མེ་ཏོག་ལྟ་བུ།
རྣ་དབང་།	རྣ་ཤེས་སྐྱེ་བའི་རྟེན་དུ་གྱུར་པའི་དབང་པོ་གཟུགས་ཅན་དྭང་བ།	གྲོ་གའི་གཟེར་བུ་དཀྱུས་པ་ལྟ་བུ། སྟག་པའི་ཤིང་ནི་ གྲོ་གའོ།
སྣ་དབང་།	སྣ་ཤེས་སྐྱེ་བའི་རྟེན་དུ་གྱུར་པའི་དབང་པོ་གཟུགས་ཅན་དྭང་བ།	ཟངས་ཀྱི་མོ་ཁབ་གཤིབས་པ་ལྟ་བུ།
ལྕེ་དབང་།	ལྕེ་ཤེས་སྐྱེ་བའི་རྟེན་དུ་གྱུར་པའི་དབང་པོ་གཟུགས་ཅན་དྭང་བ།	ཟླ་བ་ཁ་བུབས་པ་ལྟ་བུ།
ལུས་དབང་།	ལུས་ཤེས་སྐྱེ་བའི་རྟེན་དུ་གྱུར་པའི་དབང་པོ་གཟུགས་ཅན་དྭང་བ།	བྱ་རེག་ན་འཇམ་པའི་སྤུ་ལྟ་བུ།

༢༢༽ དོན་ལྔའི་མཚན་ཉིད་དང་དེ་དག་རེ་རེའི་དབྱེ་བ་ཇི་ཙམ་ཡོད་ཁ་གསལ་བྲིས།

དོན་ལྔའི་མཚན་ཉིད།		དབྱེ་བ།
གཟུགས	མིག་ཤེས་ཀྱི་གཟུང་བྱར་གྱུར་པ།	དབྱིབས་དང་ཁ་དོག་གཉིས། དབྱིབས་ལ་བརྒྱད། རིང་བ། ཐུང་བ། མཐོ་བ། དམའ་བ། ལྷམ་པ། ཟླུམ་པོ། ཕྱ་ལེ་བ། ཕྱ་ལེ་བ་མ་ཡིན་པའོ།། ཁ་དོག་ལ་དབྱེ་བཅུ་གཉིས། རྩ་བའི་ཁ་དོག་བཞི་སྟེ། སྔོན་པོ། སེར་པོ། དཀར་པོ། དམར་པོ་བཞིའོ།། ཡན་ལག་གི་ཁ་དོག་བརྒྱད་དེ། གྲིབ་མ། ཉི་མ། སྣང་བ། མུན་པ། སྤྲིན། དུ་བ། རྡུལ། ཁུག་རྣ་སྟེ་བརྒྱད་དོ།།
སྒྲ།	རྣ་ཤེས་ཀྱི་མཉན་བྱར་གྱུར་པ། ཟིན་པ་ཞེས་པ་ནི་ ཤེས་རྒྱུད་ཀྱིས་ཟིན་པ།  སེམས་ཅན་དུ་སྟོན་པ་ཞེས་པ་དང་ལུང་དུ་བསྟན་པ་གཉིས་དོན་གཅིག། འདི་ཡང་ ཁ་ནས་འདོན་པའི་སྒྲའམ་ ངག་སྒྲ་ལ་གོ་དགོས།	སྒྲ་ལ་དབྱེ་ན་བརྒྱད། ཟིན་པའི་འབྱུང་བ་ལས་གྱུར་པའི་སྒྲ། སེམས་ཅན་དུ་སྟོན་པ་ལ་སྙན་པ་དང་མི་སྙན་པ༢།   སྙན་པ་ཆོས་སྟོན་པའི་སྒྲ་ལྟ་བུ། མི་སྙན་པ་ཚིག་རྩུབ་ལྟ་བུ། སེམས་ཅན་དུ་མི་སྟོན་པ་ལ་སྙན་པ་དང་མི་སྙན་པ་༢། སྙན་པ་ཕེབ་རྡོབ་པའི་སྒྲ་ལྟ་བུ། མི་སྙན་པ་ཁུ་ཚུར་རྡེག་པའི་སྒྲ་ལྟ་བུ། མ་ཟིན་པའི་འབྱུང་བ་ལས་གྱུར་པའི་སྒྲ། སེམས་ཅན་དུ་སྟོན་པ་ལ་སྙན་པ་མི་སྙན་པ་༢། སྙན་པ་སྤྲུལ་པའི་གང་ཟག་གི་ཆོས་སྟོན་པའི་སྒྲ་ལྟ་བུ། མི་སྙན་པ་སྤྲུལ་པའི་གང་ཟག་གིས་ཚིག་རྩུབ་སྨྲ་བའི་སྒྲ་ལྟ་བུ། སེམས་ཅན་དུ་མི་སྟོན་པ་ལ་སྙན་པ་དང་མི་སྙན་པ་༢། སྙན་པ་འཁར་རྔའི་སྒྲ་ལྟ་བུ། མི་སྙན་པ་བྲག་རལ་བའི་སྒྲ་ལྟ་བུ།
དྲི།	སྣ་ཤེས་ཀྱི་བསྣམ་བྱར་གྱུར་པ།	དེ་ལ་དབྱེ་ན་བཞི་ཡོད་དེ། དྲི་ཞིམ་པ། མི་ཞིམ་པ། མཉམ་པ། མི་མཉམ་པ་བཞིའོ།
རོ་།	ལྕེ་ཤེས་ཀྱི་མྱོང་བྱར་གྱུར་པ།	རོ་ལ་དྲུག་ཡོད་དེ། མངར་བ། སྐྱུར་བ། ཚ་བ། ལན་ཚྭ། སྐ་བ། ཁ་བ་སྟེ་དྲུག་གོ།
རེག་བྱ།	ལུས་ཤེས་ཀྱི་རེག་བྱར་གྱུར་པ།	རེག་བྱ་ལ་བཅུ་གཅིག་སྟེ། རྒྱུའི་རེག་བྱ་འབྱུང་བ་བཞི། འབྲས་བུའི་རེག་བྱ་འཇམ་རྩུབ་གཉིས། ལྕི་ཡང་གཉིས། གྲང་བ་དང་བཀྲེས་སྐོམ་ཏེ་བསྡོམས་པས་བཅུ་གཅིག་གོ།

 སྒྲ་ཡི་དབེྱ་བ་བརྒྱད་པོ་གོ་བདེ་བའི་ཕྱིར་དུ་རེའུ་མིག་ཏུ་བཀོད་པ། 

༢༣༽ ཁམས་གཟུགས་ཅན་བཅུ་པོ་གཟུགས་ཡིན་ན། ཐམས་ཅད་ལ་གཟུགས་ཞེས་མ་སྨོས་པར་མིག་ཡུལ་དུ་གྱུར་པ་ལ་གཟུགས་ཞེས་འཇོག་པའི་རྒྱུ་མཚན། ཐམས་ཅད་ཆོས་ཡིན་ན་གཞན་ལ་ཆོས་ཞེསམི་སྨོས་པར་ཡིད་ཀྱི་ཡུལ་ཆོས་བདུན་པོ་ཁོ་ན་ལ་ཆོས་ཞེས་སྨོས་པའི་་རྒྱུ་མཚན་གང་ཡིན།

ལན།     དབང་པོ་ལྔ་དང་དོན་ལྔའི་གཟུཊ་ཅན་བཅུ་པོ་ཆ་ཚང་གཟུཊ་ཡིན་ན་ཡང་ དེ་དག་ལ་གཟུཊ་ཞེས་མ་སྨོས་པར། མིག་གི་ཡུལ་དུ་གྱུར་པའི་གཟུགས་ཀྱི་སྐྱེ་མཆེད་གཅིག་པུ་ལ་གཟུགས་ཞེས་སྨོས་པའི་རྒྱུ་མཚན་ནི། རྩ་བ་ལས། བྱེ་བྲག་དོན་དང་གཙོ་བའི་ཕྱིར། །གཅིག་ནི་གཟུགས་ཀྱི་སྐྱེ་མཆེད་དང་།། ཞེས་གསུངས་པ་ལྟར། སྤྱི་མིང་གཟུགས་ཞེས་པ་དེ་བྱེ་བྲག་ལ་འཇུག་པར་སྟོན་པའི་ཕྱིར་དང་། གཟུགས་ཅན་བཅུའི་ནང་ནས་མིག་གི་ཡུལ་གཟུགས་ཀྱི་སྐྱེ་མཆེད་དེ་གཙོ་བོ་ཡིན་པའི་རྒྱུ་མཚན་ལ་བརྟེན་ནས་ཡིན་པ་དང་།

དེ་བཞིན་དུ། ཁམས་བཅོ་བརྒྱད་པོ་ཐམས་ཅད་ཆོས་ཡིན་ན་ཡང་ གཞན་ལ་ཆོས་ཞེས་མི་སྨོས་པར་ཡིད་ཀྱི་ཡུལ་ཆོས་ཀྱི་སྐྱེ་མཆེད་གཅིག་ཁོ་ན་ལ་ཆོས་་ཞེས་སྨོས་པའི་རྒྱུ་མཚན་ནི།། རྩ་བ་ལས། ཆོས་མང་བ་དང་མཆོག་སྡུད་ཕྱིར། །གཅིག་ནི་ཆོས་ཞེས་བྱ་བར་བརྗོད།། ཅེས་གསུངས་པ་ལྟར། ཆོས་ཀྱི་སྐྱེ་མཆེད་དེ་ནང་ཆོས་མང་པོ་བསྡུས་པར་སྟོན་པ་དང་། མཆོག་ཏུ་གྱུར་པའི་མྱ་ངན་ལས་འདས་པ་ཡང་དེ་ནང་བསྡུས་པའི་རྒྱུ་མཚན་ལ་བརྟེན་ནས་ ཆོས་ཀྱི་སྐྱེ་མཆེད་གཅིག་ཁོ་ན་ལ་ ཆོས་ཞེས་སྨོས་པ་ཡིན།

༢༤༽      སེམས་བྱུང་གཞན་རྣམས་འདུ་བྱེད་ཀྱི་ཕུང་པོར་འདུས་ལ། ཚོར་བ་དང་འདུ་ཤེས་གཉིས་མ་འདུས་པར་ཕུང་པོ་ལོགས་སུ་འཇོག་པའི་རྒྱུ་མཚན་གང་ཡིན།

ལན།   སེམས་བྱུང་གཞན་རྣམས་འདུ་བྱེད་ཀྱི་ཕུང་པོར་འདུས་ལ། ཚོར་འདུ་གཉིས་དེར་མ་འདུས་པར་ ཁོང་གཉིས་པོ་ཚོར་བའི་ཕུང་པོ་དང་། འདུ་ཤེས་ཀྱི་ཕུང་པོ་ཞེས་ ཕུང་པོ་ལོགས་སུ་འཇོག་པའི་རྒྱུ་མཚན་ནི། རྩ་བ་ལས། རྩོད་པའི་རྩ་བར་གྱུར་པ་དང་། །འཁོར་བའི་རྒྱུ་ཕྱིར་རིམ་རྒྱུའི་ཕྱིར། །སེམས་བྱུང་རྣམས་ལས་ཚོར་བ་དང་། །འདུ་ཤེས་ལོགས་ཤིག་ཕུང་པོར་བཞག། ཅེས་པ་ལྟར། འཇིག་རྟེན་པ་རྣམས་བདེ་སྡུག་གི་ཚོར་བའི་ཐོག་ནས་རྩོད་པ་འབྱུང་བ་དང་། ཆོས་པ་རྣམས་གྲུབ་མཐའ་བཟང་ངན་གྱི་འདུ་ཤེས་ཀྱི་ཐོག་ནས་རྩོད་པ་འབྱུང་བས་རྩོད་པ་འབྱུང་སའི་རྩ་བར་གྱུར་པ་དང་། དེ་གཉིས་པོ་འཁོར་བར་སྐྱེ་བའི་རྒྱུ་རྣམས་ཀྱི་ནང་ནས་གཙོ་བོ་ཞིག་ཡིན་པ་དང་། ཕུང་པོ་ལྔའི་གོ་རིམ་བཤད་པའི་སྐབས་སུ་ཡང་ དེ་གཉིས་གལ་ཆེན་དུ་གསུངས་པ་ལ་བརྟེན་ནས་ ཚོར་བ་དང་འདུ་ཤེས་གཉིས་པོ་ འདུ་བྱེད་ཀྱི་ཕུང་པོའི་གྲངས་སུ་མ་བཞག་པར་ ཕུང་པོ་ལོགས་སུ་བཤད་པ་ཡིན་ནོ།།

༢༥༽       འདུམ་མ་བྱས་གསུམ་པོ་ཁམས་དང་སྐྱེ་མཆེད་ཀྱི་ནང་བཤད་ལ། ཕུང་པོའི་སྐབས་སུ་མ་བཤད་པའི་རྒྱུ་གང་ཡིན།

ལན།   འདུས་མ་བྱས་གསུམ་པོ་ཁམས་དང་སྐྱེ་མཆེད་ནང་བཤད་ཡོད་ཀྱང་། ཕུང་པོའི་སྐབས་སུ་མ་བཤད་པའི་རྒྱུ་མཚན་ནི།  རྩ་བ་ལས། ཕུང་པོ་དག་ཏུ་འདུས་མ་བྱས། །དོན་དུ་མི་རུང་ཕྱིར་མ་བཤད།། ཅེས་པ་ལྟར། ཕུང་པོ་དོན་དེ་དུ་མ་གཅིག་ཏུ་སྤུངས་པ་ཞིག་ལ་གོ་དགོས་ལ། འདུས་མ་བྱས་ལ་ དུ་མ་སྤུངས་པའི་དོན་དེ་མི་རུང་བའི་རྒྱུ་མཚན་ལ་བརྟེན་ནས་ དེ་གསུམ་པོ་ཕུང་པོའི་སྐབས་སུ་མ་བཤད་པ་ཡིན།

༢༦༽      བསྟན་བཅོས་ཆོས་མངོན་པ་མཛོད་ལ་བརྟེན་ནས་ཆོས་སྲིད་གཉིས་ལ་ཕན་གནོད་ཀྱི་ཁྱད་པར་ཇི་ལྟར་ཡོད་ཚུལ་སོ་སོའི་ཐུགས་འཆར་ཤོད།

ལན།  མངོན་པའི་གཞུང་ལ་ཐོས་བསམ་བྱས་ན་ཆོས་ཀྱི་ཐོག་ལ་ཕན་ཐོགས་ཡོད་པ་ནི་ལབ་མི་དགོས།  སྲིད་ཀྱི་ཐོག་ལའང་ཕན་ཐོགས་ཡོངས་ངེས་ཡིན། དེའང་མངོན་པའི་གཞུང་གིས་ རྣམ་དཔྱོད་ཀྱི་ཤེས་རབ་འཕེལ་ཞིང་། འདོད་ཆུང་ཆོག་ཤེས་ཀྱི་བློ་གྲོས་སྐྱེས་བས། གོང་མ་དཔོན་ཞིག་ཡིན་ན། རྒྱལ་ཁམས་ཆོས་བཞིན་སྐྱོང་བའི་ནུས་པ་དང་ལྡན་པར་འགྱུར་བ་དང་། འོག་མ་གཡོག་པོ་གཡོག་མོ་ཞིག་ཡིན་ནའང་ ལྷག་བསམ་རྣམ་དག་གི་སྒོ་ནས་ཕྱག་ཕྱིད་ཞུ་ནུས་པའི་བློ་གྲོས་དང་ལྡན་པར་འགྱུར་བའི་ཁེ་ཕན་བླ་ན་མེད་པ་ཡོད་དོ་ལགས།།