Thursday, January 4, 2018

བྱང་ཤམྦྷ་ལའི་ངོས་འཛིན་བཀྲ་ཤིས་རྟགས་བརྒྱད།



བྱང་ཤམྦྷ་ལའི་ངོས་འཛིན་བཀྲ་ཤིས་རྟགས་བརྒྱད།
  ས་ལ་རིས་མོ་བྲིས་པས། །མཁའ་དབྱིངས་རྒྱུ་སྐར་དཀྱིལ་འཁོར། །མངོན་སུམ་ལམ་དུ་སྟོན་པའི། །དུས་ཀྱི་འཁོར་ལོས་སྐྱོངས་ཤིག། ཅེས་པའི་ཚིག་གི་མདུན་བསུས་ནས། དུས་ཀྱི་འཁོར་ལོ་དང་འབྲེལ་བའི་བྱང་ཤམྦྷ་ལའི་ངོས་འཛིན་གྱི་སྐོར་ཅུང་ཟད་བཤད་པ་ལ། ༡ཤམྦྷ་ལའི་སྐོར་ལ་ཞིབ་འཚོལ་བྱ་དགོས་དོན། ༢གཞུང་ལུགས་གང་ནས་གསུངས་པ། ༣མཁས་པའི་བཞེད་ཚུལ་ཐ་དད། ༤ བཞེད་ཚུལ་དེ་དག་མི་འཐད་པའི་རྒྱུ་མཚན། ༥ སྡུད་རྒྱུད་ཚིགས་བཅད་གཉིས་ཀྱི་འགྲེལ་བཤད་དང་འབྲེལ་བའི་ཤམྦྷ་ལའི་ངོ་སྤྲོད། ༦ ཆུ་བོ་ཤཱི་ཏཱའི་ངོས་འཛིན། ༧ཀ་ལ་པའི་གྲོང་ཁྱེར། ༨ དོགས་དཔྱོད་བཅས་བཀྲ་ཤིས་རྟགས་བརྒྱད་ཀྱི་སྒོ་ནས་ཞུ་རྒྱུ་ཡིན།

Thursday, October 19, 2017

ཚངས་དབྱངས་རྒྱ་མཚོའི་གསུང་མགུར།



རྒྱལ་བ་ཚངས་དབྱངས་རྒྱ་མཚོའི་གསུང་མགུར། 
༼སྐད་ཡིག་དང་རྩོམ་རིག་ལོ་ངོ་གསུམ་པའི་སློབ་ཕྲུག་ཚུ་གི་དོན་ལུ་ཨིན། སློབ་ཕྲུག་ཚུ་གིས་རྩོམ་འདི་ལྷག་ཞིནམ་ལས་འགྲེལ་བཤད་རེ་རྐྱབ་ནི་ཡོདཔ་སྦེ་དགོ།  སྤྱི་ཚེས་༢༤/༡༠/༢༠༡༧འགོ་བཙུགས་སློབ་ཕྲུག་རེ་རེ་ལུ་ཚིགས་བཅད་རེ་འགྲེལ་བཤད་རྐྱབ་བཅུག་ནི་ཨིན། ༽
ཤར་ཕྱོགས་རི་ཡི་རྩེ་ནས། །དཀར་གསལ་ཟླ་བ་ཤར་བྱུང་།།
མ་སྐྱེས་ཨ་མའི་ཞལ་རས། །ཡིད་ལ་འཁོར་འཁོར་བྱས་བྱུང་།།༡
ན་ནིང་བཏབ་པའི་ལྗང་གཞོན། །ད་ལོ་སོག་མའི་ཕོན་ལྕོག།
ཕོ་གཞོན་རྒས་པའི་ལུས་པོ། །རྭ་ཅོའི་གཞུ་ལས་གྱོང་བ།།༢
རང་སེམས་སོང་བའི་མི་དེ། །གཏན་གྱི་མདུན་མར་བྱུང་ན།།
རྒྱ་མཚོའི་གཏིང་ནས་ནོར་བུ། །ལོན་པའི་ཚད་དང་མཉམ་བྱུང།།༣

Sunday, June 4, 2017

གཡུས་སྒོའི་སྨན་བཅོས།


༡༽ ལ་དུག  ༢༽  ཚ་རིམས། ༽ ཚད་ནད། (malaria) ༤༽ བཤལ་ནད།   
གྲང་གཞི། ༽ མིག་ནད། བསེ་ཤིང་། ༩༽ དུག་བཅོས།

༡༽ ལ་དུག
གོ་དོན། ལ་ཁར་འཛེགཔ་ད་ སྲོག་རླུང་མ་ལངས་པའི་དཀའ་ངལ་དང་། སྔོ་སྨན་གྱི་དྲིམ་མ་འཕྲོདཔ་ལས་བརྟེན་ཏེ་ཐོབ་པའི་ན་ཚ་གཅིག་ཨིན། དེ་ཡང་རྒྱ་མཚོའི་ཁོད་སྙོམས་ལས་ཕིཊ་༨༠༠༠བརྒལ་བའི་རི་དང་གངས་ལུ་འཛེགཔ་དང་ཐོབ་དོ་ཡོདཔ་ཨིན་མས།
ཐོབ་མི་གི་མི་ངོམ། སྤྱིར་བཏང་གིས་དམའ་སར་སྡོད་པའི་མི་དང་། ལྷག་པར་དུ་ གཟུགས་ཀྱི་སྟོབས་ཤུགས་མེདཔ། ཁྲག་ཤུགས་ཀྱི་ན་ཚ་ཡོད་མི། མགུ་ཡོམ་འཁོར་ནི་ལ་སོགས་པའི་ན་ཚ་ཡོད་མི་ཚུ་གིས་ཐོབ་དོ་ཡོདཔ་ཨིན་མས།
རྒྱུ་རྐྱེན། ས་ཁ་མཐོ་ས་ལུ་སྲོག་རླུང་ཉུང་ནི་འདི་གིས་ རང་ལུ་དགོ་པའི་སྲོག་རླུང་ལངམ་སྦེ་འཐོབ་མ་ཚུགསཔ་དང་། ཧེ་མ་ཚོར་མྱོང་མེད་པའི་སྔོ་སྨན་གྱི་དྲིམ་ཚུ་རང་ལུ་ཕོག་ནི་འདི་གིས་ཐོབ་དོ་ཡོདཔ་ཨིན་མས།

Thursday, May 5, 2016

རྣམ་འཇོམས་མའི་བྱབ་ཁྲུས།

རྣམ་འཇོམས་མའི་བྱབ་ཁྲུས་ཉེས་པ་ཀུན་སེལ་ཞེས་བྱ་བ་བཞུགས་སོ།།   །།
༈ མཐུ་སྟོབས་རྡོ་རྗེ་དྲན་ཙམ་གྱིས། །གྲིབ་དང་ནད་གདོན་རྣམ་རྟོག་ཀུན། སྐད་ཅིག་ཉིད་ལ་འཇོམས་མཛད་པའི། །རྡོ་རྗེ་ཅན་ཞབས་པད་ལ་འདུད།། ཅེས་ལྷག་པའི་ལྷ་ལ་མཆོད་པར་བརྗོད་ནས། འདིར་གང་ལས་སུ་བྱ་བ་ནི། སྐྱེ་བོ་མཆོག་དམན་ཡོངས་ལ་ཕན་གདགས་པའི་སླད་དུ། རྡོ་རྗེ་རྣམ་པར་འཇོམས་པའི་སྒྲུབ་ཐབས་ཀྱི་སྒོ་ནས་བཀྲུ་བྱབ་བསྲུང་གསུམ་བྱ་བར་ འདོད་པས། ཐོག་མར་བུམ་པ་ཚད་ལྡན་ལ་རྒྱུན་བབ་ཀྱི་ཆུ་གཙང་བླུགས། ལྔ་ཚན་ལྔའི་བུམ་རྫས་བཏབ། རྨ་བྱའི་སྒྲོའི་ཆུན་པོོས་ཁ་བརྒྱན་ཅིང་དར་གྱིས་མགུལ་འཆིང་བཅས་བཀོད། འབུལ་གཏོར་དང་ཆ་གསུམ་བདག་བུམ་གཉིས་ཀྱི་མཆོད་པ་བདུན་ཚར་བཅས་བཤམས། རང་གི་མདུན་དུ་རྡོར་དྲིལ་གུ་ཡུངས་འཐོར་འབྲུ་བཅས་འདུ་བྱས་པའི་མཐར། རང་ཉིད་བདེ་བའི་གདན་ལ་བཞུགས་ནས། སྦྱོར་བ་སྐྱབས་འགྲོ་སེམས་བསྐྱེད་ནི། མ་ནམ་མཁའ་དང་མཉམ་པའི་སེམས་ཅན་ཐམས་ཅད་བླ་མ་སངས་རྒྱས་ཆོས་ཀྱི་སྐུ་ལ་སྐྱབས་སུ་མཆིའོ།། བླ་མ་ལོངས་སྤྱོད་རྫོགས་པའི་སྐུ་ལ་སྐྱབས་སུ་མཆིའོ།། བླ་མ་ཐུགས་རྗེ་སྤྲུལ་པའི་སྐུ་ལ་སྐྱབས་སུ་མཆིའོ།། བླ་མ་སངས་རྒྱས་རིན་པོ་ཆེ་ལ་སྐྱབས་སུ་མཆིའོ།།

གསེར་སྐྱེམས།


༈ ཐོག་མར་སྐྱབས་གནས་མ་ནམ་བཞི་སྐོར་ནི། མ་ནམ་མཁའ་དང་མཉམ་པའི་སེམས་ཅན་ཐམས་ཅད་བླ་མ་སངས་རྒྱས་ཆོས་ཀྱི་སྐུ་ལ་སྐྱབས་སུ་མཆིའོ།། བླ་མ་ལོངས་སྤྱོད་རྫོགས་པའི་སྐུ་ལ་སྐྱབས་སུ་མཆིའོ།། བླ་མ་ཐུགས་རྗེ་སྤྲུལ་པའི་སྐུ་ལ་སྐྱབས་སུ་མཆིའོ།། བླ་མ་སངས་རྒྱས་རིན་པོ་ཆེ་ལ་སྐྱབས་སུ་མཆིའོ།།

Monday, April 4, 2016

ནང་ཆོས་ཀྱི་གཟེངས་བསྟོད་གསོལ་རས།

ནང་པའི་ཆོས་འདི་ འཛམ་གླིང་ནང་གི་ཆོས་ལུགས་དྲག་ཤོས་གཅིག་ཨིན་པའི་ངོས་འཛིན་དང་གསོལ་རས་ཐོབ་ཡོད་པའི་སྐོར། ཁ་བརྡའི་དྲྭ་བ་ལས་བཤུས། http://www.khabdha.org/?p=54900

 ཉེ་ཆར། འཇི་ནེ་ཝའི་གླེང་སྟེགས་ཞེས་པའི་གསར་ཤོག་ཏུ་འཁོད་པའི་གསར་འགྱུར་ལྟར་ན། མཉམ་འབྲེལ་རྒྱལ་ཚོགས་ཆོས་ལུགས་ཚོགས་འདུའི་ཐོག ནང་བ་སངས་རྒྱས་པའི་ཆོས་ལ། འཛམ་གླིང་གི་ཆོས་ལུགས་ཡག་ཤོས་ཀྱི་གཟེངས་བསྟོད་བྱ་དགའ་ཐོབ་འདུག

Monday, March 7, 2016

ཁྲུས་གསོལ། བྱབས་ཁྲུས། བཀའ་བསྒོ།


ཁྲུས་གསོལ་འབད་ནི་འདི་ ཧིནྡུའི་ལུགས་ལུ་ཡོདཔ་མ་ཚད། གསང་སྔགས་གཞུང་ལས་འབད་བ་ཅིན། ཡིད་དམ་ལྷའི་བསྒོམ་སྒྲུབ་འབད་བའི་སྐབས་ཀྱི་མཇུག་པའི་སྒོ་བཟུམ་ཅིག་དང་། མི་གཙང་བཙོག་གྲིབ་སྡིག་སྒྲིབ་བསལ་བའི་ཐབས་ལམ་བཟུམ་ཅིག་ཨིན།
ཧིནྡུའི་བྲམ་ཟེ་འདི་ཚུ་ དྲོ་པ་ལོངམ་ཅིག་གཟུགས་འཁྱུ་དགོཔ་དང་། གངྒཱ་ཡ་མ་ན་ལ་སོགས་པའི་ཆུ་ཆེན་ཚུ་གི་ཉེ་འགྲམ་ལུ་ཨིན་པ་ཅིན། གནམ་དགུན་ཨིན་རུང་ དྲོ་བ་ཚར་ཅིག་གཙང་ཆུ་ནང་འཛུལ་ཏེ་ཁྲུས་གསོལ་འབད་ནི་འདུག སྔགས་ཀྱི་ལུགས་ལས་འབད་བ་ཅིན། ཁྲུས་གསོལ་འབད་བའི་སྐབས་ལུ་དང་པ་ བུམ་ཆུ་བསྒྲུབ་དགོཔ་ཨིན། དེ་ཡང་དང་པ་བདག་བསྐྱེད་ཟེར་ རང་ཡིད་དམ་གྱི་ལྷ་ལུ་བསྒོམས་ཞིནམ་ལས་ གཟུངས་སྔགས་བགྱང་། དེ་ལས་བུམ་བསྐྱེད་ཟེར་ ཡིད་དམ་གྱི་ལྷ་བུམ་པའི་ནང་ལུ་བསྒོམས་ཞིནམ་ དེ་གི་ཐུགས་ཁར་གཟུངས་སྔགས་བཀོད་དེ་བགྱང་ནི་དང་། ཐ་མ་བུམ་བསྐྱེད་ཀྱི་ལྷ་དང་ཡིག་འབྲུ་འོད་ཀྱི་རང་བཞིན་སྦེ་ཞུ་ཞིནམ་ལས་ དག་བྱེད་ཀྱི་ནུས་པ་དང་ལྡན་པའི་ཆུ་ལུ་འགྱུར་བའི་དམིགས་པ་བསྐྱེད། དེ་ལས་རྐྱངམ་ཅིག་བུམ་པ་འཐུ་ཞིནམ་ལས་ དཀར་ཕྱོགས་སྐྱོང་བའི་ལྷ་དང་། རྒྱལ་བའི་སྐུ་གསུང་ཐུགས་རྟེན། ཡུལ་འཁོར་ཁང་ཁྱིམ། རང་གི་ལུས་ངག་ཡིད་གསུམ་དང་བཅས་པ་ལུ་ཁྲུས་གསོལ་ཕུལ་ཏེ། བཙོག་གྲིབ་སྡིག་དག་པའི་དམིགས་པ་བསྐྱེད་དགོཔ་ཨིན།
༼འདི་བཟུམ་གྱི་རྣམ་གཞག་མ་ཤེས་རུང་། བུམ་པ་ནང་གཙང་མའི་ཆུ་དང་ག་པུར་དྲི་བཟང་ལ་སོགས་པ་བླུགས་ཏེ་མཆོད་གཤམ་གུར་བཞག དེ་ལས། བུམ་པ་སྔགས་ཀྱི་ཡིག་འབྲུས་གང་བར་འགྱུར། ཟེར་བའི་ཚིག་ཁ་ལས་ཐོན། དོན་ཡིད་ལུ་བསམ་ཞིནམ་ལས། རྟེན་འབྲེལ་སྙིང་པོའི་གཟུངས་སྔགས་གང་མང་བསགས། དེ་ལས། ཡིག་འབྲུ་འོད་དུ་ཞུ་ནས་བུམ་པའི་ཆུར་གྱུར། ཁ་འདོན་དང་མནོ་བསམ་གཏང་། དེ་ལས་ཁྲུས་གསོལ་འབད་བའི་སྐབས་ལུ། རྒྱལ་བའི་སྐུ་གསུང་ཐུགས་ལ་ཉེས་པ་མི་མངའ་ཡང་། །སེམས་ཅན་ལུས་ངག་ཡིད་གསུམ་སྒྲིབ་པ་སྦྱངས་སླད་དུ། །རྒྱལ་བའི་སྐུ་གསུང་ཐུགས་ལ་ཁྲུས་ཆབ་འདི་གསོལ་བས། །སེམས་ཅན་ལུས་ངག་ཡིད་གསུམ་སྒྲིབ་པ་དག་གྱུར་ཅིག། ཟེར་ཁྲུས་གསོལ་འབད་བ་ཅིན་བཏུབ།༽
༼བྱབས་ཁྲུས།༽ བྱབས་ཁྲུས་སྐབས་ཀྱི་ཁྲུས་ཟེར་མི་འདི་ གོང་ལུ་ཞུ་མི་ཁྲུས་གསོལ་འདི་རང་ཨིནམ་དང་། བྱབས་ཟེར་མི་འདི་བཙོག་གྲིབ་སྡིག་གྲིབ་ལ་སོགས་པ་འཕྱག་ཏེ་གཏང་ནི་གཅིག་ལུ་གོཝ་ཨིན། བྱབས་འབད་བའི་སྐབས་ལུ་ཁྲུས་གསོལ་ཡང་འབད་དགོཔ་ལས་ བདག་བསྐྱེད་བུམ་བསྐྱེད་བསྒོམས། དེ་ལས་དག་བྱེད་ཀྱི་སྔགས་བགྱང་ཞིནམ་ལས་ ལག་པར་རྨ་བྱ་སྒྲོ་གཅིག་འབག་ཞིནམ་ལས་ བསྲུང་བྱ་འདི་གི་ བཙོག་གྲིབ་སྡིག་སྒྲིབ་ལ་སོགས་པ་མགོ་ལས་རྐང་མཐིལ་གྱི་བར་ལུ་འཕྱག་ནི་དང་། དེ་ལས་ཁྲུས་གསོལ་འབད་ནི་ཨིན།
༼བཀའ་བསྒོ།༽ བགེགས་དང་འབྱུང་པོ་ཚུ་གིས་གནོད་པ་བཀལ་ཏེ་ཡོད་པའི་བསྲུང་བྱ་འདི་ཚུ་ ཡིད་དམ་ལྷའི་ངོ་བོ་ལུ་བསྒོམས་བཅུག་ཞིནམ་ལས་ བགེགས་དང་འབྱུང་པོ་ལུ་ བསྲུང་བྱ་གང་ཟག་འདི་ལུ་གནོད་པ་བཀལ་ནི་མེད་པའི་བཀའ་གནང་ནི་འདི་ཨིན། འདི་གི་སྐབས་ལུ་བཀའ་བསྒོ་གནང་མི་རང་ཡང་ ཡིད་དམ་ལྷ་ལུ་བསྒོམས་པའི་ཏིང་ངེ་འཛིན་དང་ནུས་པ་ཆུང་ཀུ་ཅིག་དགོཔ་ཨིན། དེ་མེད་པ་ཅིན་བཀའ་འདི་ བགེགས་དང་འབྱུང་པོ་ཚུ་གིས་ཉན་མི་བཏུབ།
འདི་བཟུམ་གྱི་བཀའ་བསྒོ་འདི་ བླ་མ་དང་ཡིད་དམ་དྲག་པོ་ག་ཅི་གི་སྒོ་ལས་འབད་རུང་བཏུབ་ཨིན་རུང་། ཁྲུས་གསོལ་དང་། བྱབས་ཁྲུས་འདི་ འབད་བ་ཅིན། རྡོ་རྗེ་རྣམ་འཇོམས་མའི་སྒོ་ལས་འབད་ནི་འདི་ དྲག་ཤོས་བཟུམ་ཅིག་ཡོདཔ་མ་ཚད། རྣམ་འཇོམས་མའི་སྒོ་ལས་ བཀའ་བསྒོ་ཡང་འབད་ནི་ཡོདཔ་ཨིན།

མདོས་དང་གླུད་ཀྱི་ཆོ་ག



༼གོ་དོན།༽ མདོས་དང་གླུད་ཀྱི་དོན་འདི་ ཚིག་མཛོད་འདི་ཚུ་ནང་ལེ་ཤ་ཡོདཔ་ཨིན་རུང་། ཁུངས་དག་ཤོས་འདི་ གླུད་ཀྱི་ཆོ་གའི་ཚིག་འདི་ཚུ་ལུ་བལྟ་ནི་འདི་ཨིན། འདི་ཡང་གླུད་ཀྱི་ཆོ་གའི་ནང་། སྐྱིན།[1] ཡོན།[2] རིན་བབས། ཚབ།[3] རྟེན།[4] བླུ་ཡོན།[5] སྦྱིན།[6] ལ་སོགས་པ་ལེ་ཤ་ཐོན་ནི་འདུག དེ་འབདཝ་ལས་མདོས་གླུད་ཀྱི་དོན་འདི་ཡང་ བླ་སྲོག་འཕྱོག་སྟེ་འབག་མི་འདི་ ལེན་ནི་གི་དོན་ལུ་ སྦྱིན་བདག་གི་སྐུ་ཚབ་སྦེ་སྣོད་བཅུད་ཀྱི་བཀོད་པ་བཟོ་སྟེ་གཏང་མི་འདི་ལུ་ མདོས་དང་གླུད་ཟེར་གོ་ནི་ཨིན་མས། ཨིན་རུང་མདོས་དང་གླུད་གཉིས་སོ་སོར་ཕྱེ་བ་ཅིན། གླུད་ཟེར་མི་འདི་སྦྱིན་བདག་ཁོ་རའི་ངོ་ཚབ་བཟོ་མི་འདི་དང་། མདོས་ཟེར་མི་འདི་ སྣོད་བཅུད་ཀྱི་བཀོད་པ་ཆ་ཚང་ཡོད་མི་འདི་ལུ་གོ་ནི་ཨིན་མས།

གསུར་མཆོད་ཀྱི་སྐོར།



༼གོ་དོན།༽ གསུར་ཟེར་མི་འདི་ ལྷ་ཀླུ་གཉན་གསུམ་དང་། འབྱུང་པོ་ཡི་དྭགས། དྲི་ཟ་དང་བར་སྲིད་ཚུ་ལུ་ དཀར་གསུམ་མངར་གསུམ་ འབྲུ་རིགས་ཀྱི་ཕྱེ་དང་། །ཤ་ཆང་ཚུ་མེ་བཏང་པའི་གསུར་གྱིས་མཆོད་མི་འདི་ལུ་གོ་ནི་ཨིན།
༼གསུར་གྱི་དབྱེ་བ།༽ དཀར་གསུར་དང་དམར་གསུར་ཟེར་གསུར་གྱི་དབྱེ་བ་ཁག་གཉིས་འདུག དཀར་གསུར་གྱི་རྒྱུ་ངོ་མ་དཀར་ཕྱེ་དང་། དེ་ནང་ཞོ་དང་ཨོམ་མར། བུ་རམ་སྦྲང་རྩི་ཤེལ་ཀ་ར་ཚུ་བླུགས་ཏེ་བཟོ་དོ་ཡོདཔ་དང་། དེ་ལུ་ཚ་གསུར་ཟེར་ཡང་སླབ་ནི་འདུག ཚ་གསུར་ཕྱི་རུ་ཨ་རྟག་རང་གཏང་སྲོལ་ཡོདཔ་དང་། ལྷག་པར་དུ་མི་ཤི་བའི་སྐབས་ལུ་གཏང་དོ་ཡོདཔ་ཨིན་མས། དེ་གཏང་པའི་སྐབས་ལུ་ མ་ཎི་བགྱང་ནི་དང་། བྱུང་པ་ཅིན་གསུར་བསྔོ་དེ་ཚུ་ཡང་གཏང་དགོཔ་ཨིན།

ཀླུང་རྟའི་བྱུང་རིམ་དང་བརྡ་མཚོན།



༼གོ་དོན།༽ སྲོག་ལུས་དབང་ཀླུང་མི་མཐུན་ཉེས་པའི་ཕྱོགས་ལུ་སོང་མི་འདི་ཚུ་ མཐུན་པ་ལེགས་པའི་ཕྱོགས་ལུ་ རྟ་མཆོག་བཟུམ་སྦེ་མགྱོགས་པར་ལྷོད་ཚུགས་པའི་བརྡ་མཚོན་གཅིག་ལུ་ཀླུང་རྟ་ཟེར་གོ་ནི་ཨིན།
ཀླུང་རྟའི་དག་ཆ་འབྲི་སྲོལ་མ་འདྲཝ་གཉིས་ཡོད་རུང་། དག་ཆ་ངོ་མ་འདི་ཀ་ཀླུང་འདི་ཨིན། ག་ཅི་སྦེ་ཟེར་བ་ཅིན། སྲོག་ལུས་དབང་ཀླུང་ཟེར་བའི་སྐབས་ལུ་དག་ཆ་ཀ་ཀླུང་འདི་འབྲི་དོ་ཡོདཔ་དང་། ཀླུང་རྟའི་འབྱུང་ཁུངས་ཡང་འདི་ཨིན་ནི་འདི་གིས་ཨིན། ཚིག་འདི་རྒྱ་ནག་ཁ་སྐད་ནང་ཡོད་པའི་ལུང་མཱ་ཟེར་མི་འདི་ལས་བྱུང་བྱུངམ་ཨིན་ཟེར། མཁས་དབང་ཝེ་དལ་དང་མཁར་རྨེ་བསམ་གཏན་གྱི་བཤད་ནུག