Monday, July 28, 2014

ཆོས་སྐད་སྡེབ་སྦྱོར།



སྤྱི་ཚོགས་རྩོམ་རིག།
༼༢༽༼༡༽༼༢༽༼༡༽༼༢༽        ༼༢༽༼༡༽༼༢༽༼༡༽༼༢༽
ཁྱོད་ལ་ཡང་བྱ་རྒྱུ་ཞིག་མི་འདུག །ང་ལ་ཡང་རེ་བ་འདི་ཟད་དུས།།
གང་ལྟར་ཡང་ང་གཉིས་ཀྱི་མི་ཚེ། །རི་དྭགས་ཀྱི་རྭ་བ་དང་འདྲ་སོང་།།
༈ དེ་ཡང་མི་དམངས་སྤྱི་ཚོགས་ཀྱི་ལག་ལེན་དུ་ཡོད་ཅིང་། བཀའ་དང་བསྟན་བཅོས་ཀྱི་ཁུངས་སུ་མ་འདུས་པའི་རྩོམ་རིག་ཞིག་ལ་སྤྱི་ཚོགས་རྩོམ་རིག་ཅེས་བྱ་བ་ཡིན། རྩོམ་རིག་གི་འགྲོས་ངོ་མ་ཤེས་དགོས་ན་ཧི་མཱ་ལ་ཡའི་མི་བརྒྱུད་རང་གི་སྤྱི་ཚོགས་རྩོམ་རིག་གི་རྩོམ་འགྲོས་གང་འདྲ་ཞིག་ཡོད་མིན་བལྟ་དགོས། རྒྱ་གར་གྱི་བཀའ་བསྟན་དེ་དག་སྐད་རིགས་གཞན་དུ་བརྩམས་པའི་དབང་གིས་རྩོམ་འགྲོས་དེ་ཡང་སྐད་རིགས་གཞན་གྱི་རྩོམ་འགྲོས་སུ་སོང་བ་དང་། བོད་ཀྱི་བསྟན་བཅོས་འདི་དག་ཀྱང་སྐད་རིགས་གཞན་གྱི་ཤན་ཞུགས་འདུག་པའི་དབང་གིས་། དེ་ལ་བརྟེན་ནས་རང་རིགས་ཀྱི་རྩོམ་འགྲོས་གང་འདྲ་ཞིག་ཡོད་པའི་ཚོད་དཔག་བྱེད་མི་ཐུབ། དེར་བརྟེན་ཧི་མཱ་ལ་ཡའི་མི་རྒྱུད་ཀྱི་སྤྱི་ཚོགས་རྩོམ་རིག་གང་འདྲ་ཞིག་ཡིན་མིན་གྱི་ཐད་ལ། རྣམ་རྟོག་སྐྱེ་བའི་ས་བོན་མདོར་བསྡུས་ཙམ་ཞིག་ཞུ་རྒྱུ་ཡིན།

སྡེབ་སྦྱོར་གྱི་སྔོན་འགྲོ།

༈ སྤྱི་ཚོགས་རྩོམ་རིག་ཤེས་པ་ལ་ཐོག་མར་ཚིགས་བཅད་སྡེབ་ལུགས་ཀྱི་སྡེབ་སྦྱོར་ཤེས་དགོས། དེ་ཡང་ལེགས་སྦྱར་གྱི་ཚིགས་བཅད་ལ་སྡེབ་སྦྱོར་ཡོད་པ་ལྟར། ཆོས་སྐད་དང་རང་རེའི་རྫོང་ཁའི་ཚིགས་བཅད་ལའང་སྡེབ་སྦྱོར་ལོགས་སུ་ཡོད། སྡེབ་སྦྱོར་ཞེས་པ་དེ། ཡི་གེའི་དག་ཆ་ལ་གོ་རྒྱུ་མིན་པར། ཚིགས་བཅད་སྒྲིག་པའི་ཚེ། ཚིགས་བཅད་ཀྱི་རྐང་པ་གཅིག་ལ་ཚིག་འབྲུ་ཇི་ཙམ་ཡོད་པ་དང་། ཚིག་འབྲུ་དེ་དག་ཆ་དང་ཡ་གང་འདྲ་ཞིག་སྒྲིག་དགོས་པའི་སྐོར་དེ་ཡིན།
༡དེ་ཡང་ཚིགས་བཅད་གཅིག་ལ་ཚིག་རྐང་གསུམ་ནས་དྲུག་གྱི་བར་དུ་སྒྲིག་ཆོག་པ་ཡིན་ན་ཡང་། ཡོངས་གྲགས་ལྟར་ན་ཚིགས་བཅད་གཅིག་ལ་ཚིག་རྐང་བཞི་ཡིན།
༢དེ་ནས་ཚིག་རྐང་གཅིག་ལ་ཚིག་འབྲུ་ཇི་ཙམ་དགོས་པའི་སྐོར་ནི། རང་རང་སོ་སོའི་བློ་ཡི་ནུས་པ་དང་བསྟུན་ནས། ཚིག་འབྲུ་བཞི་ལས་འགོ་བཙུགས་ཏེ། ཚིག་འབྲུ་སུམ་ཅུ་སོ་གྲངས་ཀྱི་བར་དུ་མང་ཉུང་གང་འདྲ་ཞིག་སྒྲིག་ནའང་སྒྲིག་ཆོག ཡིན་ན་ཡང་ཚིག་རྐང་གཅིག་ལ་ཚིག་འབྲུ་ཇི་ཙམ་ཡོད་པ་དེ། ཚིགས་བཅད་གཅིག་གི་ཚིག་རྐང་གཞན་པ་རྣམས་ལ་ཡང་གཅིག་མཚུངས་ཡོད་དགོས།
༣དེ་ནས་ཚིག་འབྲུ་ཆ་དང་ཡ་ཞེས་པ་འདི་ནི། ཚིགས་བཅད་ཀྱི་སྐབས་སུ་ཚིག་འབྲུ་ཡ་གཅིག་བྱེད་ནས་གཅོད་དགོས་པའི་རིགས་གཅིག་དང་། ཚིག་འབྲུ་ཆ་གཅིག་བྱེད་ནས་གཅོད་དགོས་པའི་རིགས་གཉིས་ཡོད་པ་དེ་དག་ཡིན།

དབྱར་ཁའི་གུང་སེང་གི་ཚོར་བ།




དབྱར་ཁའི་གུང་སེང་གི་ཚོར་བ།

༈ དེ་རིང་ནི་སྤྱི་ཟླ་༥པའི་སྤྱི་ཚེས་༢༢གཉིས་ཡིན། ཞོག་པའི་ཉིན་ཤར་གྱི་དུས་ཉིད་ནས་སྤྲིན་དང་སྨུག་པ་སོགས་ཀྱི་སྒྲིབ་གཡོག་དང་བྲལ་བའི་ཉི་འོད་ཤིན་ཏུ་ཚ་ཞིང་། བྱ་བྱིའུ་རྣམས་ཀྱང་ཤིང་སྡོང་ཨཱ་མྲའི་ཡལ་གའི་གྲིབ་ངོས་སུ་ཁས་བླངས་མེད་པའི་སྨྲ་བཅད་ཀྱི་སྨྱུང་གནས་ལ་བརྩོན་ཞིང་གནས་ལ། བྲེལ་ཟིང་ཆེ་བའི་རྒྱ་གར་བ་རྣམས་ཀྱང་ལྕགས་བསྲེགས་ཀྱི་ས་གཞི་ལྟར་འབར་བའི་དཔྱིད་ཀའི་ཁྲོམ་ར་འདིར་ཡོང་སྙིང་མི་འདོད་པས་ཡིན་ནམ། ཡང་ན་སོ་སོའི་ལས་ལས་བརྩོན་པས་ཡིན། གང་ལྟར་ཡང་དེ་དག་རེ་ཟུང་ཙམ་ལས་གཞན་མིག་ལམ་དུ་མཐོང་རྒྱུ་དཀོན། གོང་སྨོས་དེ་དག་ལས་ལྡོག་སྟེ་རང་རེའི་ཝཱ་ར་ཎ་སཱི་བོད་ཀྱི་མཐོ་སློབ་ཁང་འདིར་ནི། ཁ་སིང་སྤྱི་ཚེས་༢༡ཉིན་མོའི་ཚོུད་༢པ་ནས་ཐ་མའི་མིང་ཐོ་བཀླགས་ཏེ་དབྱར་ཁའི་གུང་སེང་བཏང་ཟིན་པར་བརྟེན། སློབ་ཕྲུག་རྣམ་པ་སྦྲང་ཚང་དུ་རྡོ་འཕོགས་པ་ལྟར་འགྲིམ་འགྲུལ་གྱི་བྱ་བས་འཁྲུག་ཆ་ཤིན་ཏུ་ནས་དོད། ཕ་མ་སྤུན་འཁོར་ཐུག་འདོད་ཀྱི་དགའ་ཚོར་གྱིས་ཁེངས་པའི་སློབ་ཕྲུག་མེད་ཅེས་ཐག་གཅོད་མི་ཐུབ་ཀྱང་། སྙིང་གྲོགས་ཉེ་བ་ན་གནས་པའི་ན་གཞོན་བུ་དང་བུ་མོ་རྣམས་ཕན་ཚུན་བྲལ་བའི་སྡུག་བསྔལ་གྱིས་གནོན་ནས་གུང་སེང་འགྲོ་མི་འདོད་པ་ནི་མང་།
རང་ཉིད་ནི་ཁ་སིང་ནས་ཉོས་པའི་ཕ་མ་ཉེ་དུ་ལ་འབུལ་རྒྱུའི་བརྔན་པ་ཡུལ་ཀཱ་ཤི་ཀའི་རས་གོས་འགའ་དང་ང་རང་གི་གྱོན་ཆས། དེ་ནས་ཀློག་དེབ་ཁ་ཤས་བཅས་སྦེག་གཅིག་ནང་བརྫངས་ནས་འགྲོ་ཆས་སྒྲིག་བཞིན་ཡོད། འོན་ཀྱང་དེ་བས་ཀྱང་གལ་ཆེ་བ་ཞིག་ནི། ལོ་ཤས་རིང་སེམས་ཀྱི་གཏིང་ནས་འབྲེལ་བའི་ན་གཞོན་མ་ཞིག་ཡོད་པ་དེ་དང་སཱར་ནཱ་ཐ་ལ་ཐུག་རྒྱུའི་དུས་བཏབ་པ་དེ་རེད། ངས་དད་པ་མོས་གུས་ཆེས་མདོག་ཁ་པོའི་ངང་ནས། དགེ་བསྙེན་ཆོས་སྐྱོང་གིས་བཞེངས་པའི་སཱར་ནཱ་ཐའི་དྲི་གཙང་ཁང་དེར་དུས་མ་ཡིན་པ་ཉིན་གུང་ཆུ་ཚོད་༡༢ཙམ་ལ་བསྐོར་ར་ཞིག་རྒྱབ་ནས། འཁོར་ལྔ་སྡེ་བཟང་པོའི་སྐུ་བརྙན་བཞུགས་སའི་རྒྱབ་ངོས་ཤིང་སྡོང་ཞིག་གི་འོག་ཏུ་སྐར་ཆ་ཁ་ཤས་རིང་ངང་སྒུག་བྱས་ནས་བསྡད།
མི་མཐུན་མི་དང་ཕྲད་པའི་སྐབས་དང་ནི། །སྙིང་མཐུན་འདོད་པའི་དུས་ནི་ཡུད་ཙམ་ཡང་།།
ཞག་ཟླ་ལོ་ལས་ལྷག་པའི་ཚོར་སྣང་ཞིག །བྱུང་བ་སེམས་ཅན་ཀུན་གྱི་ཆོས་ཉིད་ཡིན།།

ནང་སྲོལ་རྩོམ་གཞུང་།



༄༅། །ནང་སྲོལ་རྩོམ་གཞུང་འཇིག་རྟེན་ཀུན་ཏུ་དགའ་བའི་ཟློས་གར་ཞེས་བྱ་བ་བཞུགས།།


༄༅། །ཇི་ལྟའི་གནས་ལུགས་མངོན་སུམ་གཟིགས་པས་ཇི་སྙེད་ཆོས་ཀུན་དཔེ་རུ་ཤར།།
ངག་གི་མདུད་པ་རང་སར་གྲོལ་བས་ཟབ་དོན་གདམས་པའི་གླུ་རུ་ལེན།།
དཎྜིའི་མེ་ལོང་སྦྱངས་མྱོང་མེད་ཀྱང་སྙན་ངག་རྒྱལ་པོར་གྱུར་པ་ཡི།།
རྣལ་འབྱོར་དབང་ཕྱུག་མི་ལ་མཆོག་ལ་སྒོ་གསུམ་དད་པས་ཕྱག་བགྱི་འོ།།

བཀའ་དང་བསྟན་བཅོས་ལ་སོགས་རྩོམ་རིག་རྣམས།།
རྩོམ་ལུས་གང་འདྲ་ཞིག་ཏུ་གནས་པའི་ཚུལ།།
ཞིབ་ཕྲའི་སྒོ་ནས་བརྗོད་པར་མི་ནུས་ཀྱང་།།
རགས་པ་ཙམ་ཞིག་འབྲི་བ་བདག་གི་ལས།།


༈ དེ་ཡང་འཛམ་བུའི་གླིང་གི་དངོས་པོ་ཇི་འདྲ་ཞིག་ཡིན་ནའང་ཐོག་མ་ཉིད་ནས་ཡར་ཐོན་ཅན་ཞིག་མིན་པར་འགྲོ་བ་མིའི་སྤྱི་ཚོགས་ཡར་རྒྱས་ཕྱིན་པ་དང་དུས་མཉམ་དུ་རིམ་གྱིས་ཡར་རྒྱས་འགྲོ་བ་ཡིན་ལ། དེ་དང་མཐུན་པར་རྩོམ་རིག་ལ་ཡང་ངག་ཐོག་གི་རྩོམ་རིག་དང་ཡིག་ཐོག་གི་རྩོམ་རིག་གཉིས་ཡོད་པ་ལས། ཡི་གེ་མི་ཤེས་པའི་མི་དམངས་ཀྱི་ཁྲོད་ན་ཡོད་པའི་གླུ་གཞས་ལ་སོགས་པ་ནི་ངག་ཐོག་གི་རྩོམ་རིག་ཡིན་པ་དང་། རྩོམ་རིག་འདི་ནི་དང་པོ་ནས་མཁས་པ་ཞིག་གིས་མཛད་ནས་བཞག་པ་མིན་པར། འགྲོ་བ་མིའི་སྐད་རིགས་ཡར་རྒྱས་འགྲོ་བཞིན་པ་དང་དུས་མཉམ་དུ་བྱུང་བའི་ལུང་པ་རང་རང་སོ་སོའི་ཁྱད་ཆོས་ཤིག་ཡིན།།
སྐད་རིགས་ཡར་རྒྱས་གང་མཚམས་ཕྱིན་པ་ན་ཡི་གེ་བྱུང་བ་དང་། དེ་ནས་བརྡ་སྤྲོད་རིག་པ་བྱུང་བ་ཡིན། དེའང་དཔེར་ན། ནམ་དུས་དབྱར་ཁའི་གཙང་པོ་ནི་སྐབས་རེ་བྲི་བ་དང་སྐབས་རེ་བྲུབ་ནས་འགྱུར་བ་འགྲོ་བའི་དབང་གིས་ཆེ་ཆུང་མཉམ་པར་འབབ་པའི་གོ་སྐབས་ནམ་ཡང་མེད། གཙང་པོ་དེ་དག་ཆུ་རགས་ཀྱིས་བཀག་ཅིང་ཚད་འཛིན་བྱས་ནས་གཏོང་ན། ཆེ་ཆུང་མཉམ་པར་འབབ་ནུས་པ་དང་། ཞིང་པའི་གསོས་སུ་གང་ལ་གང་འདོད་དུ་འདྲེན་ཆོག་པ་ལྟར། མིའི་སྐད་དང་ཡི་གེ་བྱུང་ཟིན་ན་ཡང་ད་དུང་འགྱུར་བ་སྣ་ཚོགས་སུ་འགྱུར་ངེས་ཡིན་པས། གལ་ཏེ་དེ་ལ་བཏང་འཛིན་མ་བྱེད་ན། ཕ་མེས་ཀྱིས་བྲིས་པ་དེ་དག་མི་ཐོག་གཉིས་གསུམ་གྱི་རྗེས་ལ་ཚ་བོ་དག་གིས་གོ་བའི་ངེས་པ་མེད། དེས་ན་སྐད་ཡིག་དེ་དག་གཅིག་མཐུན་དང་འགྱུར་བ་མེད་པར་གནས་པའི་ཆེད་དུ་བརྡ་སྤྲོད་རིག་པའི་ཆུ་རགས་ཀྱིས་བཀག་ནས་ཚོད་འཛིན་གཅིག་བྱེད་ན། ཆོས་དང་རིག་གཞུང་གང་གི་ཞིང་དུ་འདྲེན་ན་ཡང་དེ་དག་རྒྱས་པའི་གསོས་སུ་འགྱུར་ཐུབ་ངེས་ཡིན།།
བརྡ་སྤྲོད་རིག་པ་བྱུང་ཟིན་པ་ནས་བཟུང་སྟེ། དེས་སྟངས་འཛིན་བྱེད་པའི་འཛམ་གླིང་འགྲོ་བ་མིའི་རྣམ་དཔྱོད་ལས་བརྟེན་ནས་བྱུང་བའི་རིག་པའི་གནས་གང་འདྲ་ཞིག་ཡིན་ན་ཡང་རུང་། དེ་དག་ལ་ཡིག་ཐོག་གི་རྩོམ་རིག་ཅེས་བྱ་བ་ཡིན།།

ནང་པའི་རྩོམ་གཞུང་དངོས།
༈ རྩོམ་རིག་ལ་རྒྱ་ཆུང་ས་ནས་བལྟ་ན་སྙན་རྩོམ་དང་འབྲེལ་བ་ཡོད་པ་གཅིག་པུ་ལ་རྩོམ་རིག་ཅེས་བརྗོད་པའི་སྐབས་གཅིག་དང་། རྒྱ་ཆེ་ས་ནས་བལྟ་ན་ཆོས་དང་རིག་གཞུང་གི་རྩོམ་ཡོངས་རྫོགས་ལ་རྩོམ་རིག་ཅེས་བརྗོད་པའི་སྐབས་གཉིས་ཡོད། དེས་ན་ང་ཚོས་རྒྱ་ཆེ་བའི་གོ་བ་དེ་ལེན་ནས་ཆོས་དང་རིག་གཞུང་གི་རྩོམ་ཡོངས་རྫོགས་ལ་རྩོམ་རིག་ཅེས་བཞག་རྒྱུ་དང་། དེ་ལ་ཡང་ལུང་པ་རང་རང་སོ་སོའི་རྩོམ་རིག་ཐ་དད་ཡོད་ཀྱང་། དེ་དག་ནི་རང་ཅག་རྣམས་དང་འབྲེལ་བ་མེད་ལ། རང་ཅག་རྣམས་དང་འབྲེལ་བ་དམ་ཟབ་ཡོད་པ་ནི་ནང་པའི་རྩོམ་རིག་དེ་དག་ཡིན་པས་ན། ནང་པའི་རྩོམ་རིག་དེ་དག་རྩོམ་གྱི་ལུས་གང་འདྲ་ཞིག་ཏུ་གནས་པའི་ཚུལ་ལ་སློབ་སྦྱོང་བྱ་རྒྱུ་ཡིན། ནང་པའི་རྩོམ་གཞུང་དེ་ཡང་རྒྱལ་བའི་བཀའ་དང་། རྗེས་འཇུག་མཁས་པའི་བསྟན་བཅོས། གྲུབ་ཐོབ་རྣམས་ཀྱི་མགུར་མ། སྤྱི་ཚོགས་ཀྱི་རྩོམ་རིག་བཅས་རྣམ་པ་བཞིའི་སྒོ་ནས་ཞུ་རྒྱུ་ཡིན།།

རྒྱ་གར་ནང་པའི་གནས་ཆེན་བརྒྱད།



རྒྱ་གར་ནང་པའི་གནས་ཆེན་བརྒྱད།

སྐད་ཡིག  རྫོང་ཁ།
གནས་ཆེན་དེ་ཚུ་གི་སྐོར་ལས་སངས་རྒྱས་ཀྱི་མཛད་པ་བཅུ་གཉིས་ཀྱི་སྐབས་ལུ་བཤད་ཚརཝ་ལས་ ན་ལས་མར་ངོ་སྤྲོད་ཙམ་རེ་ཞུ་གེ།
གནས་ཆེན་བརྒྱད་ཟེར་མི་འདི་ཡང་། སྐུ་འཁྲུངས་པའི་གནས་ལུམྦི་ནི། སངས་རྒྱས་པའི་གནས་རྡོ་རྗེ་གདན། ཆོས་འཁོར་བསྐོར་བའི་གནས་ཝཱ་རཱ་ཎཱ་སི། མྱ་ངན་ལས་འདས་པའི་གནས་རྩྭ་མཆོག་གྲོང་དང་བཅས་ཏེ་བཞི་ལུ། སྐུ་ཚེ་བྱིན་གྱིས་བརླབས་པའི་ཡངས་པ་ཅན། མུ་སྟེགས་སྟོན་པ་སྡེ་དྲུག་བཏུལ་བའི་གནས་མཉན་ཡོད། དགེ་འདུན་དབྱེན་ཟླུམ་པའི་གནས་རྒྱལ་པོའི་ཁབ། ལྷ་ལས་བབས་པའི་གནས་ལྷ་བབས་དང་བཅས་ཏེ་བརྒྱད་ཨིན།
ལུམྦི་ནི།

གནས་ཆེན་འདི་ནང་ལུ་བདག་ཅག་གི་སྟོན་པ་ཤཱཀྱ་ཐུབ་པ་མཆོག ཡབ་རྒྱལཔོ་ཟས་གཙང་དང་། ཡུམ་སྒྱུ་མ་ལྷ་མཛེས་གཉིས་ཀྱི་སྲས་སྦེ། ས་ག་ཟླ་བའི་ཚེས་བཅོ་ལྔ་ལུ་སྐུ་འཁྲུངས་ནུག།
གནས་འདི་རྒྱ་གར་དང་བལ་ཡུལ་གཉིས་ཀྱི་ས་མཚམས་སོ་ན་ལི་ལས་ཀི་ལོ་མི་ཀྲར་༢༧་གྱི་ས་ཁར་ཡོད། ད་རེས་ནངས་པ་ལུམྦི་ནིའི་ས་ཁོངས་འདི་ལུ་རུ་མེནྡྲི་ཟེར་སླབ་ཨིན་པས། གནས་འདི་གི་མཚན་ལུ་ལུམྦི་ནི་ཟེར་ཞུ་དགོ་མི་འདི་ཡང་སྐྱེད་ཚལ་ལྡུམ་ར་འདི་སྟོན་པ་མཆོག་གི་ཨ་ཞེམོ་ལུམྦི་ནི་ཟེར་མི་འདི་གི་དོན་ལུ་བཟོ་བསྐྲུན་འབད་ཡོདཔ་ལས་བརྟེན་ཏེ། ས་གནས་དེ་གི་མིང་ལུ་ཡང་ལུམྦི་ནི་ཟེར་བཏགས་གནང་ནུག།

ཤ་ཀུནྟ་ལ།



བྱ་ལེན་མ་མངོན་པར་ཤེས་པའི་ཟློས་གར་ཞེས་བྱ་བ།།


༄༅།  །རྒྱ་གར་སྐད་དུ།   ཨ་བྷི་ཛྙ་ན་ཤཱ་ཀུནྟ་ལཱ་ན་ཊ་ཀ་ནཱ་མཱ།།
བོད་སྐད་དུ།   བྱ་ལེན་[1]མངོན་པར་ཤེས་པའི་ཟློས་གར་ཞེས་བྱ་བ།།
སངས་རྒྱས་ལ་ཕྱག་འཚལ་ལོ།།

བྱེད་པོས་བྱས་པ་དང་པོ་གང་ཡིན་ཆོ་གས་ཕུལ་བའི་སྦྱིན་སྲེག་སྦྱིན་དང་ལེ་པོ་སུ།།
གང་ལ་ཐོས་པའི་ཡུལ་གྱི་དཔལ་ལྡན་གང་གིས་ཀུན་ཁྱབ་གཉིས་པོ་གང་གིས་དུས་རྣམས་བྱས།།
གང་ལ་ཀུན་གྱི་ས་བོན་ཞེས་བྱ་གང་གིས་མ་ལུས་སྐྱེ་རྒུ་གསོན་ཅིང་འཚོ་བྱེད་པའི།།
མངོན་སུམ་ཉིད་ཀྱི་སྐུ་བརྒྱད་མངའ་བའི་དབང་ཕྱུག་དེ་ཡིས་ཁྱེད་ཅག་ཀུན་ཏུ་བསྲུང་གྱུར་ཅིག།།

དགའ་ལྡན་གྱི་མཐའ་ལ།[2] 
མདོ་འཛིན་པས།[3]         ཡོལ་བ་ལ་གདོང་ཕྱོགས་ཏེ།        འཕགས་མ[4] གལ་ཏེ་ཆས་བསྒྱུར་བའི་བྱ་བ་རྣམས་གྲུབ་ན་ཚུར་བྱོན་ཅིག།
གར་མ།                    ནང་དུ་ཞུགས་ནས། རྗེའི་སྲས།     བདག་འདི་ཡིན་ནོ།། གང་བགྱི་བར་འོས་པ་བཀའ་སྩོལ་ཅིག།
མདོ་འཛིན་པས།          འཕགས་མ༑ དེ་རིང་ཚོགས་འདི་དག་ནི་ཀུན་ནས་ཡིད་དུ་འོང་བ་ཉིད་ཡིན་ན། བདག་ཅག་གིས་དངོས་པོ་གང་ཞིག་ནག་མོའི་འཁོལ་[5] གྱིས་མེ་ཏོག་གི་ཕྲེང་རྒྱུད་དུ་བྱས་པ།    བྱ་ལེན་མ་མངོན་པར་ཤེས་པ་ཞེས་བྱ་བའི་ཟློས་གར་གསར་པའི་སྐྱེས་ཀྱིས་བསྟབ་པར་བྱའོ།  དེའི་སླད་དུ་སྣོད་[6]སོ་སོ་ནས་བརྩོན་པ་སྦྱིན་པར་རིགས་སོ།། 
གར་མས།                  འཕགས་པ༑ ཁྱོད་ནི་མཁས་པའི་ཐབས་ཀྱིས་རབ་ཏུ་སྦྱོར་བ་བྱེད་པར་འགྱུར་བས།          སུ་ཞིག་གིས་ཀྱང་འཕྱ་བའི་གནས་སུ་འགོད་པར་མི་བྱེད་དོ།།

སྙན་ངག་ལེའུ་དང་པོའི་འགྲེལ་པ།

རིག་གནས་སྤྱི་དོན།

མདོ་སྡེ་རྒྱན་ལས། རིག་པའི་གནས་ལྔ་དག་ལ་བརྩོན་པར་མ་བྱས་ན། །འཕགས་མཆོག་གིས་ཀྱང་ཐམས་ཅད་མཁྱེན་ཉིད་ཐོབ་མི་འགྱུར། །དེ་ལྟ་བས་ན་གཞན་དག་ཚར་བཅད་རྗེས་བཟུང་དང་། །བདག་ཉིད་ཀུན་ཤེས་བྱ་ཕྱིར་དེ་ལ་དེར་བརྩོན་བྱ།། ཞེས་གསུངས་པ་ལྟར་ སྒྲ་དང་ཚད་མ། གཟོ་དང་གསོ་བ། ནང་དོན་རིག་པ་སྟེ་ རིག་པའི་གནས་ལྔ་པོ་དག་ལ་ བརྩོན་ཏེ་སྦྱངས་པར་མ་བྱས་ན། ཉན་ཐོས་འཕགས་པ་ མཆོག་ཏུ་གྱུར་པ་རྣམས་ཀྱིས་ཀྱང་ རྣམ་པ་ཐམས་ཅད་མཁྱེན་པའི་ གོ་འཕང་འཐོབ་པར་མི་འགྱུར་བ་ དེ་ལྟ་བས་ན་ ཚིག་གི་འཁྲུལ་པ་ཚར་གཅོད་པའི་ སྒྲ་རིག་པ་དང་། དོན་གྱི་འཁྲུལ་པ་ཚར་གཅོད་པའི་ ཚད་མ་རིག་པ་སྟེ་ ཚར་གཅོད་ཀྱི་རིག་གནས་གཉིས་དང་། འགྲོ་བ་སེམས་ཅན་རྣམས་ཀྱི་ འགལ་རྐྱེན་ནད་རིགས་བསལ་བའི་ གསོ་བ་རིག་པ་དང་། མཐུན་རྐྱེན་འདོད་དོན་བསྒྲུབ་པའི་ བཟོ་རིག་པ་སྟེ་ གདུལ་བྱ་རྗེས་སུ་བཟུང་བའི་ རིག་ནགས་གཉིས། རང་ཉིད་ ཐམས་བཅད་མཁྱེན་པའི་ གོ་འཕང་འཐོབ་པའི་དོན་དུ་ ཀུན་རྫོབ་དང་ དོན་དམ་པའི་གནས་ལུགས་ ཀུན་ཤེས་པར་བྱ་བའི་ཕྱིར་ ནང་དོན་རིག་པ་སྟེ་ རིག་གནས་ཆེ་བ་ལྔ་པོ་ཀུན་ལ་བརྩོན་པར་བྱ་དགོས་པ་མ་ཟད། སྒྲ་རིག་པའི་ནང་གསེས་སུ་གྱུར་པའི་ རིག་གནས་ཆུང་བ་ལྔ་སྟེ། ཚིག་རྒྱན་ལ་ མི་རྨོངས་པའི་ཆེད་དུ་ སྙན་ངག མིང་གི་རྣམ་གྲངས་ལ་ མི་རྨོངས་པའི་ཆེད་དུ་ མངོན་བརྗོད། སྐད་རིགས་ལ་ མི་རྨོངས་པའི་ཆེད་དུ་ ཟློས་གར། ཚིགས་བཅད་བསྒྲིག་པ་ལ་ མི་རྨོངས་པའི་ཆེད་དུ་ སྡེབ་སྦྱོར། གྲངས་ཀྱི་གནས་ལ་ མི་རྨོངས་པའི་ཆེད་དུ་ སྐར་རྩིས་རིག་པ་རྣམས་ལ་ཡང་། སྦྱངས་བརྩོན་བྱ་དགོས་པ་ཡིན་ནོ།།