ལེགས་བཤད་ལྗོན་དབང་།

སུམ་ཅུ་པའི་སྙིང་པོ་ལེགས་བཤད་ལྗོན་པའི་དབང་པོའི་འགྲེལ་བ་གསལ་བྱེད་ཉི་མའི་འོད་སྣང་བཞུགས་སོ། །

རྩ་བ། དབྱངས་ཅན་གྲུབ་པའི་རྡོ་རྗེ།  འགྲེལ་པ། ཚེ་རིང་བསམ་གྲུབ།

    མཆོད་བརྗོད་དང་རྩོམ་པར་དམ་བཅའ་བ།

༄༅།   །ཕུལ་བྱུང་མཁྱེན་པའི་ཡེ་ཤེས་ཡོངས་རྫོགས་སྟོན་མཆོག་མཉམ་མེད་ཟླ་ཤེལ་དབང༌།།གཞན་ཕན་བརྩེ་བའི་སྙིང་རྗེའི་བསིལ་ཟེར་མཁའ་ཁྱབ་འགྲོ་ལ་ལེགས་སྙོམས་ཤིང༌། །གང་འདུལ་ཕྲིན་ལས་སྣ་ཚོགས་ཐབས་ཀྱིས་རེ་འབྲས་ཀུ་མུད་ཅིག་ཅར་བཞད། །གསང་གསུམ་ཡོན་ཏན་བྱེ་བའི་མངའ་བདག་གུས་པས་འདུད་དོ་བདག་སྐྱོངས་ཤིག ། རང་སྣང་རིག་པ་གདོད་ནས་ཡོངས་དག་རྒྱལ་ཀུན་ཐུགས་ཀྱི་ཆུ་གཏེར་ཆེ། །ཡོངས་སུ་བསྲུབས་ལས་མཁྱེན་རབ་མཆོག་ཉིད་དམར་སེར་དྷིཿཡིག་ཁམས་སུ་རྩེན། །འཁོར་འདས་ཡེ་དག་ཆོས་དབྱིངས་ཀློང་ན་མཁྱེན་གཉིས་ཡེ་ཤེས་རླབས་ཕྲེང་ངོམ།།

བསྔགས་བརྗོད་སྙན་པའི་སྒྲ་བརྒྱ་ལྡིར་བའི་འཇམ་དཔལ་ལྷ་གཅིག་ཕྱག་གི་ཡུལ། །ཚོགས་གཉིས་རྒྱ་མཚོའི་རྦ་རླབས་ཁྲོད་ནས་དམ་ཆོས་ཉི་མ་མཁའ་རུ་ཤར། །མཁའ་ཁྱབ་འགྲོ་བའི་སྡུག་ཀུན་མུན་པ་ཧུབ་ཀྱིས་གཞིབ་པའི་རྩེ་དགའ་ལས། །རྟེན་འབྱུང་དགེ་བའི་ལམ་བཟང་བརྒྱུད་དེ་ཟླ་མེད་གོ་འཕང་མཆོག་གི་སར། །འདྲེན་པའི་དེད་དཔོན་ཁྱེད་ལས་མི་འདུག་སྙིང་གི་དབུས་སུ་ལན་བརྒྱར་བསྙེན། །གངས་རིའི་མུ་ཁྱུད་འཛུམ་པའི་ཞིང་དུ་གཙུག་ལག་ཉི་ཟླའི་དཀྱིལ་འཁོར་ཆེ། །ལེགས་པར་གསལ་བྱེད་ཡི་གེའི་བྱེད་པོ་དཔལ་ལྡན་ཐུ་མི་སམ་བྷོ་ཊས། །  རྨད་བྱུང་རྒྱལ་བསྟན་གསེར་གྱི་སྒྲོན་མེ་བརྒྱ་ཕྲག་ངལ་བས་ལྗོངས་འདིར་དྲངས། །རྨོངས་མུན་བསལ་བའི་བརྗེད་དཀའི་བཀའ་དྲིན་གདོང་དམར་འགྲོ་བའི་སྙིང་ལ་ལྕི། །སྐ་ཅོག་ཞང་སོགས་སྔོན་བྱོན་ལོ་ཙཱ་བརྒྱས། །རྣམ་དཔྱོད་སྤྲིན་སྔོན་དཀྲིགས་པའི་ཁང་བཟང་ལས། །བརྡ་སྤྲོད་གཙུག་ལག་སྙན་པའི་རྔ་གསང་སྒྲ། །ཆོས་སྲིད་ལྷ་ལམ་རྒྱན་དུ་ལན་དགུར་བསྒྲགས། །དམ་པའི་གཞུང་བཟང་སྐབས་གསུམ་ལྷ་ཡི་ཆབ། །བདག་བློའི་ཁྲོན་པར་ཆུ་ཡི་རླན་ཐིགས་ཙམ། །བྱུང་བ་སྐལ་མཉམ་གཞན་ལ་ཕན་སེམས་ཀྱིས། །སྨྲ་འདོད་རོ་འཛིན་གཡོ་ལ་འགལ་བ་ཅི། །གཞུང་ལུགས་རབ་འབྱམས་སྨྲ་བའི་མཁས་པ་མིན། །ལོངས་སྤྱོད་མཛོད་ལ་དབང་བའི་བདག་པོ་མིན། །གྲྭ་རྐྱང་ང་ལ་མཁས་པའི་གྲགས་སྙན་སྟོངས། །དེ་ཕྱིར་སུ་དང་གང་གིས་ཚད་མར་ལྟ། །རབ་འབྱམས་ཤེས་བྱ་རྒྱ་མཚོའི་ཕ་རོལ་ལ། །བགྲོད་བྱེད་བསྟན་བཅོས་རིག་པའི་གྲུ་གཟིངས་ཆེར། །གང་འདོད་ཁ་ལོ་སྒྱུར་བའི་མཐུ་མེད་ཀྱང༌། །བློ་གསལ་བློ་ཡིས་བསྐུལ་བ་མ་བཟློགས་ཙམ། །མང་མང་མཁས་པ་དགྱེས་པའི་གཞུང་མིན་ཡང༌། །དག་དག་ཁུངས་ལྡན་གཞུང་ལ་འགྲེལ་བ་ཙམ། །གསལ་གསལ་ཚིག་གི་བརྗོད་བྱ་ལ་བརྟེན་ནས། །ལྷོད་ལྷོད་སྨྲ་བའི་འབབ་སྟེགས་ཅུང་ཟད་རྐྱོང༌།།

དེ་ཡང་སྙན་ངག་མེ་ལོང་ལས། ཤིས་བརྗོད་ཕྱག་བྱ་དངོས་པོ་ནི། །ངེས་པར་བསྟན་པའང་དེ་ཡི་སྒོ། །ཞེས་གསུངས་པ་ལྟར་ཚིགས་སུ་བཅད་པ་ཉུང་ངུའི་ངག་གིས་ལམ་ཡངས་པོར་བྱས་ཏེ་གང་ གླེང་བར་བྱ་བ་ནི། འདིར་མཁས་པའི་དབང་པོ་དབྱངས་ཅན་གྲུབ་པའི་རྡོ་རྗེས་མཛད་པའི་བོད་ཀྱི་བརྡ་ སྤྲོད་པའི་བྱེ་བྲག་སུམ་ཅུ་པའི་སྙིང་པོ་ལེགས་བཤད་ལྗོན་པའི་དབང་པོ་དང༌། རྟགས་འཇུག་དཀའ་གནད་གསལ་བའི་མེ་ལོང་འདི་གཉིས་དེང་དུས་མཁས་པ་བྱིངས་ལ་གྲགས་ཆེ་ ཞིང་ཚད་མར་འཛིན་པ་དང༌། བློ་གྲོས་གསར་བུ་བ་དག་གིས་ཀྱང་བློར་འཛིན་བདེ་བ་ཞིག་ཏུ་གྱུར་ཡོད་པ་ཡིན་ལ། དེ་ཕྱིར་གཞུང་འདི་གཉིས་ལས་དང་པོ་སུམ་ཅུ་པའི་སྙིང་པོ་ལེགས་བཤད་ལྗོན་པའི་དབང་ པོ་འདི་ཉིད་འཆད་པར་བྱེད་པ་ལ། ཀླད་དོན། གཞུང་དོན། མཇུག་དོན་གསུམ་ལས། དང་པོ།

ཐུ་མིའི་ལེགས་བཤད་སུམ་ཅུ་པའི་སྙིང་པོ་ལྗོན་པའི་དབང་པོ་བཞུགས་སོ།།

ཞེས་པ་སྟེ། འཕགས་པ་འཇམ་དཔལ་དབྱངས་ཀྱི་རྣམ་རོལ་ཐུ་མིའི་ ཞེས་ཐུ་མི་སཾ་བྷོ་ཊས། བོད་འདིར་བརྡ་སྤྲོད་པའི་བསྟན་བཅོས་ཆེན་པོ་བརྒྱད་མཛད་（སུམ་རྟགས་གཉིས་དང༌། ཡི་གེའི་རྣམ་འགྱུར་གྱི་བཟོ། ཀ་མད་སུམ་ཅུར་བསྒྱུར་བ། སྡེབ་སྦྱོར་སྒྲིག་པའི་གཞི་མ། ཐུ་མིའི་མདོ་རྫིའི་སྒྲ་མདོ། སྔགས་ཀྱི་བཀླག་ཐབས་མུན་པའི་སྒྲོན་མེ། ཀླུ་དབང་མགུལ་རྒྱན་བཅས་བརྒྱད་ཡོད་པར་མངོན།）སོགས་ལེགས་པར་བཤད་པའི་གཞུང་རྣམས་ལས། འདིར་སུམ་ཅུ་པའི་གཞུང་ལས་ཉེ་བར་མཁོ་བའི་སྙིང་པོའི་དོན་རྣམས་ཕྱོགས་གཅིག་ཏུ་དྲིལ་བའི་བསྟན་བཅོས་ལྗོན་པའི་དབང་པོ་ཞེས་བྱ་བ་བཞུགས་སོ།། ཞེས་པས་བསྟན་བཅོས་འདི་ལ་དཔེའི་སྒོ་ནས་མིང་བཏགས་པའོ།།

གཉིས་པ་གཞུང་དོན་ལ། བསྟན་བཅོས་རྩོམ་པ་ལ་འཇུག་པའི་ཡན་ལག   བསྟན་བཅོས་ཀྱི་ལུས་དངོས་བཤད་པ་གཉིས་ལས། དང་པོ་ལ། མཆོད་བརྗོད་དང༌། རྩོམ་པར་དམ་བཅའ་བ། དང་པོ་ལ་བསྟན་བཤད་གཉིས་ལས། དང་པོ།

ན་མོ་གུ་རུ་མཉྫུ་གྷོ་ཥཱ་ཡ།

ཞེས་ གསུངས་པའི་དོན་ནི། བླ་མ་འཇམ་པའི་དབྱངས་ལ་ཕྱག་འཚལ་ལོ། །ཞེས་པའོ།།

གཉིས་པ།

བླ་མ་མཆོག་དང་དབྱེར་མེད་པའི། །འཇམ་པའི་དབྱངས་ལ་གུས་བཏུད་ནས།།

ཞེས་པ་སྟེ། སངས་རྒྱས་ཀུན་འདུས་ཀྱི་ངོ་བོ་རྩ་བའི་བླ་མ་མཆོག་དང་ངོ་བོ་དབྱེར་མེད་པའི། ངག་གི་ཉེས་པའི་རྩུབ་རེག་དང་བྲལ་ཞིང་འཇམ་པའི་ཡོན་ཏན་དང་ལྡན་པའི་རྒྱལ་བ་ཀུན་ ཀྱི་ཐུགས་གཉིས་སུ་མེད་པའི་ཡེ་ཤེས་ཀྱི་ངོ་བོ། གསུང་དབྱངས་ཀྱི་བདག་ཉིད་རྗེ་བཙུན་འཇམ་པའི་དབྱངས་དེ་ཉིད་ལ་སྒོ་གསུམ་གུས་པས་བཏུད་པ་སྔོན་དུ་བཏང་བར་བྱས་པའོ། །ནས་ཞེས་ པ་མཚམས་སྦྱོར་ལྷག་བཅས་ཀྱི་སྒྲའོ།།

གཉིས་པ། རྩོམ་པར་དམ་བཅའ་བ།

ཐུ་མིའི་ལེགས་བཤད་སུམ་ཅུ་པའི། །སྙིང་པོ་མདོར་བསྡུས་བཤད་པར་བྱ།།

ཞེས་པ་སྟེ། ལོ་ཙཱ་བ་ཆེན་པོ་ཐུ་མིའི་ཞེས་ཐུ་མི་སཾ་བྷོ་ཊས་སུམ་ཅུ་པ་དང་རྟགས་ཀྱི་འཇུག་པ་གཙོ་བོར་གྱུར་བའི་བསྟན་བཅོས་བརྒྱད་མཛད་པར་གྲགས་པ་ལས་འདིར་ལེགས་པར་བཤད་པ་སུམ་ཅུ་པའི་གཞུང་གི་སྙིང་པོའི་དོན་ནམ་ཉེར་མཁོའི་ཆ་རྣམས་མདོར་བསྡུས་ཏེ་བཤད་པར་བྱའོ་ ཞེས་སོ།།

གཉིས་པ་གཞུང་དོན་བཤད་པ་ལ། སྦྱར་བྱ་ཡི་གེའི་རྣམ་བཞག་བཤད་པ། སྦྱོར་ཚུལ་ཚིག་ཕྲད་ཀྱི་འཇུག་པ་བཤད་པ་གཉིས་ལས། དང་པོ། བོད་ཡིག་གི་དབྱངས་གསལ་ངོས་བཟུང་བ། ཁྱད་པར་གྱི་དབྱེ་བ་བསྟན་པ་གཉིས་ལས། དང་པོ། བོད་ཡིག་གི་དབྱངས་གསལ་ངོས་བཟུང་བ།

དབྱངས་ཀྱི་བྱ་བ་གསལ་པོ་རུ། །བྱེད་པ་ཨི་ཨུ་ཨེ་ཨོ་བཞི། །གསལ་བྱེད་ཀ་སོགས་སུམ་ཅུ་ཡིན།།

ཞེས་པས་བསྟན་ཏེ། ལེགས་སྦྱར་བརྡ་སྤྲོད་པའི་གཞུང་ལ་དབྱངས་བཅུ་དྲུག་དང་གསལ་བྱེད་སོ་བཞི་སོགས་ ཡོད་མོད་ཀྱང༌། བོད་འདིར་མིང་ཚིག་བརྗོད་པ་མཐའ་དག་གི་གཞིར་གྱུར་བའི་ཡི་གེ་ལ་དབྱངས་གསལ་གཉིས་ ལས། ལེགས་སྦྱར་གྱི་ཨཱ་ལི་སྟེ་དབྱངས་བཅུ་དྲུག་སོགས་དབྱངས་ཀྱི་བྱ་བ་མཐའ་དག་བོད་ཀྱི་སྐད་གདངས་ལ་གསལ་བོ་རུ་མཚོན་པར་བྱེད་ནུས་པའི་ཡི་གེ་ཨི་ཨུ་ཨེ་ཨོ་བཞི་སྟེ། གི་གུ ཞབས་ཀྱུ། འགྲེང་བུ། རྣ་རུ་བཅས་དབྱངས་བཞི་དང༌། ལེགས་སྦྱར་གྱི་ཀཱ་ལི་སྟེ་གསལ་བྱེད་སོ་བཞིའི་བྱ་བ་གསལ་བར་བྱེད་པ་བོད་ཀྱི་སྐད་གདངས་ལ་ཀ་སོགས་གསལ་བྱེད་སུམ་ཅུ་ཡིན་ཏེ། ཀ་ཁ་ག་ང༌། ཅ་ཆ་ཇ་ཉ། ཏ་ཐ་ད་ན། པ་ཕ་བ་མ། ཙ་ཚ་ཛ་ཝ། ཞ་ཟ་འ་ཡ། ར་ལ་ཤ་ས། ཧ་ཨ་སྟེ་ཡིག་འབྲུ་བཞི་བཞི་སྡེ་བ་རེ་བྱས་པས་སྡེ་བ་ཕྱེད་དང་བརྒྱད་དུ་གནས་སོ། །ཕྱེད་དང་བརྒྱད་ནི་སྡེ་བ་ཕྱེད་ལོངས་ཚེ་བརྒྱད་ཡོད་པའི་དོན་ནམ་དོན་དུ་བདུན་ དང་ཕྱེད་ཡོད་པའི་དོན་ནོ།།

གཉིས་པ་ཁྱད་པར་གྱི་དབྱེ་བ་བསྟན་པ་ལ། རྗེས་འཇུག་བཤད་པ། ཡང་འཇུག་བཤད་པ། སྔོན་འཇུག་བཤད་པ། ཞར་བྱུང་མི་འཇུག་པ་བཤད་པ་སྟེ་བཞི་ལས།         དང་པོ། རྗེས་འཇུག་བཤད་པ།

ག་ང་ད་ན་བ་མ་འ། །ར་ལ་ས་རྣམས་རྗེས་འཇུག་བཅུ།།

ཞེས་པ་ལྟར། མིང་གཞིའི་ཡི་གེའི་རྗེས་སུ་འཇུག་པའི་ཡི་གེ་ག་ང་ད་ན་བ་མ་འ་ར་ལ་ས་རྣམས་རྗེས་འཇུག་བཅུའམ་ མཐའ་རྟེན་གྱི་ཡི་གེ་བཅུ་ནི། མིང་གཞིའི་ཡི་གེ་ཐམས་ཅད་ལ་ཁྱབ་མཉམ་དུ་འཇུག་པའོ། །སྦྱོར་ཚུལ་ནི་དཔེར་ན། བདག མཐོང༌། བཀོད། ཡིན། བཏབ། གསུམ། དགའ། སྦྱར། གསལ། དགོས་ལྟ་བུའོ། །         

གཉིས་པ། ཡང་འཇུག་བཤད་པ།          

ད་དང་ས་གཉིས་ཡང་འཇུག་སྟེ། །ད་ནི་ན་ར་ལ་གསུམ་དང༌། །ས་ནི་ག་ང་བ་མར་འཐོབ།།

ཅེས་པ་སྟེ། རྗེས་འཇུག་བཅུ་པོ་དེ་ལས་ད་དང་ས་གཉིས་པོ་ནི་རྗེས་འཇུག་ཡིན་པར་མ་ཟད་རྗེས་འཇུག་གི་རྗེས་སུའང་འཇུག་པས་ཡང་འཇུག་སྟེ།   ཡང་འཇུག་དེ་གཉིས་འཇུག་ཡུལ་གང་ལ་འཇུག་ཅེ་ན། ཡང་འཇུག་ད་ནི་རྗེས་འཇུག་ན་ར་ལ་གསུམ་དང༌། ཡང་འཇུག་ས་ནི་རྗེས་འཇུག་ག་ང་བ་མར་བཅས་ཀྱི་མཐར་འཐོབ་པ་ ཡིན་ནོ། །དཔེར་ན། ཕྱིནད། གྱུརད། རོལད་ལྟ་བུ་དང༌། འཁྲིགས། དགོངས། ཐབས། གདམས་ལྟ་བུ་མང་དུ་སྦྱར་བར་བྱའོ།།

གསུམ་པ། སྔོན་འཇུག་བཤད་པ།

ག་ད་བ་མ་འ་སྔོན་འཇུག།

ཅེས་པ་སྟེ། གོང་གི་རྗེས་འཇུག་བཅུ་པོ་རྣམས་ལས་ག་ད་བ་མ་འ་བཅས་ནི་རྗེས་འཇུག་ཡིན་པར་མ་ཟད། ཡི་གེ་རྣམས་ཀྱི་སྔོན་དུའང་འཇུག་པས་སྔོན་འཇུག་ལྔ་ ཞེས་བརྗོད་དོ། །སྔོན་འཇུག་དེ་དག་གི་འཇུག་ཚུལ་ནི་འོག་ཏུ་རྟགས་འཇུག་དཀའ་གནད་གསལ་མེའི་འགྲེལ་ བའི་གཞུང་ལས་རྒྱས་པར་འཆད་དོ།།

བཞི་པ། ཞར་བྱུང་མི་འཇུག་པ་བཤད་པ། སྔོན་རྗེས་གང་དུའང་མི་འཇུག་པའི་ཡི་གེ་ཉི་ཤུ་སྟེ། ཀ་ཁ་ཅ་ཆ་ཇ་ཉ་ཏ་ཐ་པ་ཕ་ཙ་ཚ་ཛ་ཝ་ཞ་ཟ་ཡ་ཤ་ཧ་ཨ་བཅས་ལ་མི་འཇུག་པ་ཉི་ཤུ་ཞེས་བརྗོད་དོ།། སྤྱིར་མིང་གཞི་ལ་གསུམ་སྟེ། མིང་ཚིག་བརྗོད་པ་ཀུན་ཀྱི་གཞིར་གྱུར་པའི་མིང་གཞི་དབྱངས་གསལ་སོ་བཞི་དང༌། རྗེས་འཇུག་འཇུག་རུང་གི་མིང་གཞི་གསལ་བྱེད་སུམ་ཅུ་དང༌། སྔོན་རྗེས་མིང་གསུམ་ལས་མིང་གཞི་ནི་མི་འཇུག་པ་ཉི་ཤུ་བཅས་དབྱེ་བ་ཡོད་པའང་ རྟོགས་པར་བྱེད་དགོས་སོ།།

གཉིས་པ་སྦྱོར་ཚུལ་ཚིག་ཕྲད་ཀྱི་འཇུག་པ་བཤད་པ་ལ། རྗེས་འཇུག་ལ་ལྟོས་དགོས་པའི་ཕྲད་རྣམ་དབྱེ་དང་བཅས་པ་བཤད་པ་དང༌། ཕྲད་རང་དབང་ཅན་བཤད་པ་གཉིས་ལས། དང་པོ་ལ། སླར་བསྡུ། ལ་དོན། ཨི་ལྡན། རྒྱན་སྡུད། ལྷག་བཅས། འབྱེད་སྡུད། འབྱུང་ཁུངས། བོད་སྒྲ་བཅས་བརྒྱད་ལས། དང་པོ། སླར་བསྡུ་བཤད་པ།

གོ་ངོ་དོ་ནོ་བོ་མོ་འོ། །རོ་ལོ་སོ་ཏོ་སླར་བསྡུ་སྟེ། །རྫོགས་ཚིག་ཟླ་སྡུད་ཅེས་ཀྱང་བྱ།།

དྲག་ཡོད་ཏོ་དང་མཐའ་མེད་འོ། །གཞན་རྣམས་མིང་མཐའི་རྗེས་མཐུན་སྦྱར།།

ཞེས་པས་བསྟན་ཏེ། རྗེས་འཇུག་གི་ཡི་གེ་ག་ང་ད་ན་བ་མ་འ་ར་ལ་ས་སྟེ་བཅུ་པོ་རྣམས་ལ། རྣ་རུ་རེ་སྦྱར་བ་ན་གོ་ངོ་དོ་ནོ་བོ་མོ་འོ་རོ་ལོ་སོ་བཅས་དང༌། ད་དྲག་ཅན་གྱི་མཐར་འཇུག་པའི་ཏོ་བཅས་བཅུ་གཅིག་པོ་མིང་ཚིག་སོགས་ཀྱི་མཐར་སྦྱར་ཚེ་དེ་ལ་སླར་བསྡུ་ཞེས་བྱ་སྟེ། མིང་ཚིག་བརྗོད་པ་གང་གི་མཐར་སྦྱར་ཡང་སླར་རང་གི་ཚིག་གྲོགས་འབྱུང་བ་བསྡུ་བའམ་ མི་འབྱུང་བར་བྱས་པས་དེ་སྐད་ཅེས་བརྗོད་པ་དང༌། སྐབས་བབ་ཀྱི་དོན་དེ་རྫོགས་པར་སྟོན་པས་ན་རྫོགས་ཚིག་ཏུ་གྲགས་པ་དང༌། རང་གི་མཇུག་ཐོགས་ཀྱི་ཚིག་གི་ཟླ་བོ་གཞན་མི་འབྱུང་བར་བྱས་པས་ན་སྨྲ་སྒོ་ལས་ཟླ་སྡུད་ཅེས་ཀྱང་བྱའོ། །འདི་རྗེས་འཇུག་ལ་ལྟོས་པའི་ཕྲད་ཡིན་ལ་རྣམ་དབྱེ་མ་ཡིན་པ་ཡིན་ནོ། །ཕྲད་འདིའི་སྒྲ་སྦྱོར་ནི་ད་དྲག་ཡོད་པའི་མཐར་ཏོ་འཐོབ་པ་དང༌། མཐའ་རྟེན་མེད་པ་དག་གི་རྗེས་སུ་འོ་ཉིད་སྦྱར་བར་བྱ་ཞིང༌། ཕྲད་གཞན་རྣམས་ནི་མིང་ཚིག་གང་ཡང་རུང་བའི་མཐའི་རྗེས་འཇུག་གི་ཡི་གེ་གང་ཡིན་པ་དེ་དང་མཐུན་པར་སྦྱར་དགོས་ པ་ཡིན་ནོ།།

དཔེར་ན། སྙན་པའི་ངག་གོ ། ཤིན་ཏུ་བཟང་ངོ་། །དེ་རུ་ཡོད་དོ། །བདེན་པ་ཡིན་ནོ། །བགོ་སྐལ་འཐོབ་བོ། །ཡང་དག་པའི་ལམ་མོ། །འདི་ནི་བླ་རུང་ཆོས་གྲྭའོ། །ལྷ་སྐུ་འདི་ནི་གསེར་རོ། །སྐྱིད་པའི་ཞིང་ས་ནི་བདག་གི་ཕ་ཡུལ་ལོ། །ཞིབ་ཏུ་བརྟགས་སོ། །བཀའ་བསྩལད་ཏོ་ལྟ་བུའོ། །སྐབས་འདིར་སླར་བསྡུ་ཞེས་པ་ནི་གཙོ་བོ་མིང་ཚིག་བརྗོད་པ་གང་རུང་གི་མཐའི་རྗེས་ འཇུག་རང་དང་འདྲ་བའི་མཐར་སྦྱར་བ་ཡིན་ན་རྫོགས་ཚིག་ཏུ་འགྱུར་བ་ལས་གོ་སོགས་ཡིག་འབྲུ་བཅུ་གཅིག་པོ་ཡིན་ན་སླར་བསྡུའི་ཕྲད་ཡིན་པས་ཁྱབ་བམ་ཞེ་ན་མ་ཁྱབ་སྟེ། དཔེར་ན་བྱ་ཚིག་ལ་འཇུག་པ། དོན་རྟོགས་པའི་གོ་དང༌། མིང་ལ་འཇུག་པ། གདོང་གི་ངོ༌། གྲངས་ལ་འཇུག་པ་དོ། ཕོ་མོ་གཉིས་ཀྱི་མོ། ཤི་ཟིན་པའི་རོ། ལོ་གྲངས་ཀྱི་ལོ། ཁའི་སོ་སོགས་སླར་བསྡུའི་ཕྲད་མ་ཡིན་པ་དང༌། བྱེད་པ་པོ། ཚོར་བ་པོ། བཙུན་མོ། བུ་མོ་སོགས་ཀྱང་སླར་བསྡུའི་ཕྲད་མིན་པ་ཤེས་དགོས། སླར་བསྡུའི་ཕྲད་རྣམས་དོན་ཅི་འདྲ་ཞིག་སྟོན་བྱེད་དུ་འཇུག་ཅེ་ན། སྤྱིར་བོད་ཀྱི་བརྗོད་པ་ཇི་སྙེད་པ་ནི་ཆོས་ཆོས་ཅན་བརྗོད་ཀྱི་མིང་དང༌། བྱ་ཚིག་ཕྲད་རྣམ་དབྱེ་བཅས་གྲུབ་ཆ་གསུམ་ལས་གྲུབ་པ་ཞིག་ཡིན་ལ། དེ་གསུམ་གྱི་མཐར་སླར་བསྡུའི་ཕྲད་འཇུག་པ་ཡིན་ནོ།།

སྤྱིར་སླར་བསྡུ་ལ་དངོས་དང་ཙམ་པོ་བའི་ཁྱད་པར་དང་རྣམ་དབྱེ་དང་པོའི་དོན་དུ་ བཤད་པ་དག་ཀྱང་འཐད་པར་མ་མཐོང་སྟེ། འོན་ཀྱང་འདིར་བློ་གྲོས་གསར་བུ་བ་དག་འཇུག་བདེ་བའི་ཕྱིར་ཚིག་འགྲེལ་ཙམ་ལས། གཞན་གྱི་འདོད་པ་སོགས་བཀོད་དེ་དགག་བཞག་གི་སྤྲོས་པ་ཆེར་མི་བྱའོ།།

འདིར་ཞར་བྱུང་དུ་རྣམ་དབྱེ་དང་པོ་ཤེས་དགོས་ཏེ། དེ་ནི་ཆོས་རང་རང་གི་ངོ་བོ་དེ་གཞན་དང་མ་འདྲེས་པར་རྣམ་པར་དབྱེ་ཞིང་དོན་གྱི་ ངོ་བོ་ཙམ་སྟོན་པ་ཞིག་ལ་རྣམ་དབྱེ་དང་པོ་ཞེས་བྱ་སྟེ། དཔེར་ན། ས་གཞི། ནམ་མཁའ། རི་བོ། ལྗོན་ཤིང༌། རྒྱལ་ཁབ། གཞུང་ལམ། བོད་ལྗོངས་སོགས་མིང་ཙམ་ལས་ལོགས་སུ་མེད། དཔེར་ན་བུམ་པ་ཞེས་བརྗོད་པའི་སྒྲ་དེ་ལས་གཞན་ས་ཆུ་མེ་རླུང་ལྗོན་ཤིང་སོགས་ཀྱི་ མིང་གང་ལའང་མ་འདྲེས་པར་སོ་སོར་འབྱེད་པའི་ནུས་པ་ཞིག་ཡོད་པ་དེ་ལ་རྣམ་དབྱེ་དང་ པོ་མིང་ཙམ་བརྗོད་པ་ཞེས་བྱའོ།།

གཉིས་པ་ལ་དོན་བཤད་པ་ལ། ངོ་བོ་ངོས་བཟུང་བ། དོན་གྱི་འཇུག་ཚུལ། སྒྲ་ཡི་འཇུག་ཚུལ་བཤད་པ་གསུམ་ལས། དང་པོ།

སུ་ར་རུ་དུ་ན་ལ་ཏུ། །ལ་དོན་རྣམ་པ་བདུན་ཡིན་ཏེ།།

ཞེས་པ་སྟེ། རྗེས་འཇུག་ལ་ལྟོས་དགོས་པའི་ཕྲད་དང་རྣམ་དབྱེ་གཉིས་ཀ་ཡིན་པའི། སུ་ར་རུ་དུ་ན་ལ་ཏུ་བཅས་ལ་དོན་གྱི་རྐྱེན་ལ་རྣམ་པ་བདུན་དུ་གྲངས་ངེས་པ་ཡིན་ཏེ།  དེ་ལ་ལ་དོན་ཞེས་བརྗོད་དོན་ནི། ལ་སྒྲ་དེ་ལས་སུ་བྱ་བ་སོགས་དོན་ལྔ་བོ་ཕལ་ཆེར་ལ་སུ་སོགས་ལ་དོན་གཞན་དྲུག་པོ་ དང་འཇུག་པ་མཚུངས་པ་དང༌། དངོས་བསྟན་དུ་ལ་སོགས་པ་དྲུག་པོའི་ཐ་མ་ལ་ཡིག་ཡིན་པས། དེ་བཟུང་ནས་ཐམས་ཅད་ལ་ལ་སྒྲ་ཞེས་པའི་མིང་གིས་བཏགས་པ་ཡིན་ཏེ། དཔེར་ན་གསལ་བྱེད་སུམ་ཅུའི་ཐོག་མ་ཀ་ཡིན་པས་ཀ་མད་སུམ་ཅུ་ཞེས་བཏགས་པ་ལྟ་བུའོ།། དེ་ལའང་ལ་དོན་བདུན་པོ་ནང་ཕན་ཚུན་སྦྱོར་བདེ་མིན་གྱི་ཁྱད་པར་མང་དུ་ཡོད་དེ། དཔེར་ན། རྣམ་དབྱེ་གཉིས་པའི། གཟུགས་ལ་ལྟ། དྲི་ལ་སྣོམ། ལྷ་ལ་ཕྱག་འཚལ། ཁྱོད་ལ་སྟེར་སོགས་ལ་ལ་ཡིག་སྦྱོར་རུང་བ་ལས། གཟུགས་སུ་ལྟ། དྲི་ན་སྣོམ། ལྷ་ན་ཕྱག་འཚལ། ཁྱོད་དུ་སྟེར་སོགས་སྦྱོར་མི་བདེ། དེ་བཞིན་བཞི་བར་ཤིང་གཅོད་དུ་སྟ་རེ་ཉོ། ལྟོ་འགྲངས་སུ་ཟས་ཟ་ལྟ་བུ་ལ་ན་ཡིག་སྦྱོར་མི་བདེ། བདུན་པར་ཤར་ན་ཤིང་ཡོད་དང༌། ལྷོ་ན་ཆུ་ཡོད་ལྟ་བུ་ལ་ལ་ཡིག་སྦྱོར་མི་བདེ། དེ་ཉིད་ལ་ཤིན་ཏུ་བཟང༌། ལྷག་པར་མཛེས་སོགས་ལ་ལ་ཡིག་སྦྱོར་མི་བདེ། ཚེ་སྐབས་ལ་རྟག་ཏུ་བརྩོན། ཉི་མ་ཤར་བ་ན་འགྲོ་སོགས་ལ་ལ་ཡིག་སྦྱོར་མི་བདེ་བ་སོགས་ཀྱི་ཁྱད་པར་མང་དུ་ཡོད་ པ་དག་ཀྱང་གསལ་བོར་ཤེས་པར་བྱའོ།།

གཉིས་པ་དོན་གྱི་འཇུག་ཚུལ།        

རྣམ་དབྱེ་གཉིས་བཞི་བདུན་པ་དང༌། །དེ་ཉིད་ཚེ་སྐབས་རྣམས་ལ་འཇུག།

ཅེས་པ་སྟེ། ལ་དོན་རྣམས་དོན་ལྔ་ལ་འཇུག་པར་བཤད་པ་སྟེ། རྣམ་དབྱེ་གཉིས་པ་ལས་སུ་བྱ་བ་དང༌། བཞི་པ་དགོས་ཆེད། བདུན་པ་གནས་གཞིའམ་རྟེན་གནས་དང་དེ་ཉིད། ཚེ་སྐབས་རྣམས་ལ་འཇུག་གོ ། དང་པོ། གཉིས་པ་ལས་སུ་བྱ་བ་ནི། སྐབས་འདིར་སྤྱིར་རྣམ་དབྱེ་ཞེས་པའི་གོ་དོན་ངེས་དགོས་ཏེ། ཆོས་གང་ཡང་རུང་བ་ཞིག་གི་མིང་ཚིག་དེ་གཞན་དང་མ་འདྲེས་པར་སོ་སོར་དབྱེ་ཞིང་ འབྱེད་ནུས་པའི་སྒྲའི་ཆ་ཤས་སུ་གྱུར་པའི་ཚིག་ཕྲད་ཅིག་ལ་རྣམ་དབྱེ་ཞེས་བྱའོ།།

དེ་ལས་རྣམ་དབྱེ་གཉིས་པ་ནི་བྱེད་པ་པོ་གང་གིས་བྱ་བའི་ཡུལ་ཞིག་ལ་བྱ་བ་བྱས་པ་ཙམ་སྟོན་པ་དང༌། བྱ་བའི་ཡུལ་གཙོ་བོར་སྟོན་པ་ཞིག་དགོས་ལ། འདི་ལ། བྱ་ཡུལ་དང༌། བྱེད་པོ། དེས་བྱས་པའི་བྱ་བ་སྟེ་གསུམ་ཚང་དགོས་པ་ཡིན། དེ་ཡང་བྱེད་པོ་དངོས་ཤུགས་གང་རུང་དུ་བསྟན་པ་ཞིག་སྟེ། དཔེར་ན། བྲམ་ཟེ་དབེན་གནས་སུ་གཤེགས། ལྷ་ལྡན་དུ་བཏང༌། ལྟ་བུའི་བྱེད་པོ་དངོས་བསྟན་དང་ཤུགས་བསྟན་གཉིས་འབྱུང༌། བྱ་ཡུལ་དབེན་རི་དང་ལྷ་ལྡན། བྱེད་པོ་བྲམ་ཟེ་དངོས་བསྟན་དང་གཞན་ཤུགས་བསྟན། བྱ་བ་གཤེགས་པ་དང་བཏང་བ་སྟེ་གསུམ་ག་ཚང་བ་ཡིན་ནོ།།

གཉིས་པ། བཞི་བ་དགོས་ཆེད། བྱེད་པ་པོ་གང་གིས་བྱ་བ་བྱེད་པའི་ཚེ།  བྱ་བ་དེ་བྱ་བའི་ཡུལ་དེའམ་དེ་དང་འབྲེལ་བའི་ལས་ལ་ཕན་པའམ། གཙོ་བོ་བྱ་བའི་དོན་གྱི་ཡུལ་ལ་ཕན་འདོགས་པར་སྟོན་པ་ཞིག་དགོས་ཏེ། དཔེར་ན། ལྟད་མོ་ལྟ་བར་ཕེབས་སྐབས་སྐུ་ལ་ངལ་བ་མ་བྱུང་ངམ། མཛེས་པའི་ཕྱིར་དུ་རྒྱན་གྱིས་བརྒྱན། ཁྱེད་ལ་ན་བཟའ་ཉོས། ལྟ་བུར་མཚོན་ན་ལྟད་མོ་ལྟ་བ་དང་མཛེས་པའི་ཕྱིར་དང་ཁྱེད་གསུམ་པོ་དེ་བྱ་བའི་ དོན་གྱི་ཡུལ་དང༌། ར་དུ་ལ་གསུམ་རྣམ་དབྱེ་བཞི་པའི་རྐྱེན། ཕེབས་དང་རྒྱན་ཉོས་གསུམ་བྱ་བ་ཡིན་པ་ལྟ་བུའི་བྱ་བའི་ཡུལ་ལ་ཕན་ཐོགས་པ་དང༌། གཞན་ལ་ཕན་ཐབས་སུ་ཧུར་བརྩོན་བྱེད་དགོས། ཤིང་གཅོད་དུ་སྟ་རེ་བརྡར། རི་དྭགས་བདའ་རུ་རི་མགོར་སོང༌། ལྟ་བུར་མཚོན་ན་གོང་དང་མི་འདྲ་བར། ཕན་པ་སྒྲུབ་པ་དང་གཅོད་པ་བདའ་བ་གསུམ་ནི་བྱ་བའི་དོན་གྱི་ཡུལ་ཡིན་པ་ལས། གཞན་ཤིང་རི་དྭགས་རྣམས་དོན་གྱི་ཡུལ་མིན་པས་འདི་རིགས་ལ་ཡུལ་དེ་དང་འབྲེལ་བའི་ ལས་ལ་ཕན་འདོགས་པར་དངོས་སུ་བསྟན་པ་ལྟ་བུའོ། །གཞན་ཆེད་ཕྱིར་སླད་དོན་སོགས་དགོས་པ་གསལ་བྱེད་ཀྱི་སྒྲ་དངོས་སུ་ཡོད་པ་རྣམས་ ལྷག་པར་བཞི་བ་ཡིན་པར་གསལ། རྣམ་དབྱེ་གཉིས་པ་དང་བཞི་བའི་ཁྱད་པར་བྱ་བ་བྱས་པ་ཙམ་འདྲ་ན་ཡང༌། བྱ་བའི་དོན་གྱི་ཡུལ་ཚིག་ཟིན་དུ་དངོས་སུ་ཡོད་མེད་ཇི་ལྟར་ཡང་ཡུལ་དང་དེ་འབྲེལ་ ལས་ལ་ཕན་དངོས་སུ་འདོགས་པར་དངོས་ཤུགས་གང་རུང་དུ་བསྟན་པ་ལྟ་བུ་བཞི་པ་དང༌། བྱ་ཡུལ་གསལ་བར་བསྟན་ནས་དེ་ལ་ཕར་བྱ་བ་བྱས་ཙམ་ལས་གཞན་མི་སྟོན་པ་གཉིས་པའོ། །གཉིས་པ་དང་བཞི་བ་ཡིན་མིན་གཙོ་བོ་དགོས་པ་གསལ་མི་གསལ་གྱི་ཆ་ནས་གསལ་བ་དགོས་ ཆེད་དང༌། མི་གསལ་བ་གཉིས་པ་ཡིན། དཔེར་ན། རྟ་ལ་དུག་སྦྱིན་དང་ལམ་དུ་འགྲོ་ལྟ་བུ་གཉིས་ནི་ཅིག་ཤོས་གསོད་པའི་ཆེད་ཡིན་པ་ གསལ་བ་དང༌། ཅིག་ཤོས་གང་དུ་འགྲོ་བ་དང་དོན་ཅི་ཡིན་པ་མི་གསལ་བ་ལྟ་བུའོ།། འདི་ལྟར་ཁྱད་པར་བྱས་ན་ཚིག་དོན་གཉིས་ཕན་ཚུན་མི་འཆོལ་ཞིང་དོན་གྱི་གོ་བ་ལེན་ ཕྱོགས་ལའང་འཐད་པར་སྣང་ངོ༌།། ཡང་བྱ་བའི་དོན་གྱི་ཡུལ་དངོས་སུ་ཚིག་ཟིན་ལ་མི་གསལ་བ། ཞིང་ལ་ཆུ་འདྲེན་ལྟ་བུའི་བྱ་བའི་དོན་གྱི་ཡུལ་ལོ་ཏོག་རྒྱས་པ་ཡིན་ཡང་དངོས་སུ་མི་གསལ་བ་ལྟ་བུ་ནི། དེ་འབྲེལ་ལས་ལ་ཕན་ཐོགས་པའོ། །རྣམ་དབྱེ་བཞི་པའི་རྐྱེན་ཡིན་ན་བྱ་ཚིག་གཉིས་ཀྱི་བར་དུ་སྦྱོར་དགོས་ཞེས་བཤད་ པ་ཡོད་ཀྱང་དེར་ངེས་པ་མེད་དེ། སྐབས་འགར་སློང་མོ་བ་ལ་ཟས་སྦྱིན་ལྟ་བུ་མིང་གི་མཐར་སྦྱར་བའང་མང་དུ་འབྱུང་བ་ཡིན་ནོ།། གསུམ་པ། རྣམ་དབྱེ་བདུན་པ། གང་ཞིག་གང་ལ་བརྟེན་པའམ་ཡོད་པའི་དོན་ཅན་དུ་འཇུག་པ་ལས་གཙོ་ཆེར་བྱ་བ་བྱས་པ་མི་ སྟོན་པ་ཞིག་དགོས། དཔེར་ན། སྟེང་ཕྱོགས་སུ་ཉམས་དགའ་བའི་ལྷ་གནས་ཤིག་ཡོད། འཛམ་གླིང་ན་རྙེད་པར་དཀའ་བའི་རྟེན་གྱི་གཙོ་བོ་ཇོ་ཤཱཀྱ་རྣམ་གཉིས་ཕོ་བྲང་པོ་ ཏཱ་ལ་རུ་གཟི་འོད་འབར་བཞིན་ཡོད། ང་ཚོའི་ཕ་ཡུལ་ཡངས་ཤིང་རྒྱ་ཆེ་བའི་རྩྭ་ཐང་དུ་ཕྱུགས་རིགས་དཀར་ནག་གི་ཁྱུ་སྐར་ ཚོགས་ལྟར་བཀྲ་བ།  ལྟ་བུའི་རྟེན་གང་ཞིག་ལ་བརྟེན་པ་གང་ཞིག་ཡོད་པའམ་གནས་པར་སྟོན་ལ། ཡང་ལ་དོན་གྱི་འོག་ཏུ་བརྟེན་པར་བྱ་བའི་རང་བཞིན་ཅན་དེ་ལ་བྱ་ཚིག་ཙམ་ཡང་ཡོད་མི་འོས་པ་མིན་ཏེ། མཁས་དབང་སི་ཏུ་དང་པྲ་ཏི་སོགས་ཀྱིས་ཀྱང༌། གཡུལ་དུ་གོ་བགོས། རབ་གསལ་དུ་དཔོན་པོ་བཞུགས། སོགས་བྱ་ཚིག་ཅི་རིགས་བཀོད་ཀྱང་སྐབས་ཐོབ་ཀྱི་གོ་བའི་དབང་གིས་ལས་སུ་བྱ་བ་དང་ དགོས་ཆེད་ལ་འཁྲུལ་གཞི་མེད་ཅིང་བདུན་པ་གནས་གཞི་ལས་མ་འདས་པ་སོགས་ཤེས་པར་བྱའོ། །བཞི་པ། དེ་ཉིད། རྣམ་དབྱེ་གཉིས་པའི་ནང་གསེས་དེ་ཉིད་ཀྱི་དོན་ནི། ཡུལ་གང་ཞིག་ལ་བྱ་བ་གང་ཞིག་བྱེད་པའི་ཚེ་ལས་དང་བྱ་བ་གཉིས་ངོ་བོ་གཅིག་ཅིང་དོན་ གྱི་དབྱེ་བ་སོ་སོར་འབྱེད་རྒྱུ་མེད་པར་སྟོན་པ་ཞིག་དགོས་ཏེ། དཔེར་ན། ཤར་རིའི་ཕྲག་པའི་རྩེ་ནས་ཉི་མའི་དཀྱིལ་འཁོར་འོད་དུ་འཚེར། དམར་སེར་འདུས་པའི་ཆོས་སྡེ་ཆེན་པོ་མངོན་པར་མཛེས། མཚུངས་མེད་བླ་མ་འགྲོ་བ་ཀུན་ཀྱི་མགོན་དུ་གྱུར། ལྟ་བུའོ། །འོད་དུ་འཚེར་ལྟ་བུར་མཚོན་ན། འོད་ལས་དང༌། དུ་དེ་ཉིད་སྟོན་པའི་ལ་དོན། འཚེར་བྱ་བ་ཡིན་ཞིང༌། སྤྱིར་འོད་དང་འཚེར་གཉིས་མིང་ཙམ་ལ་ཐ་དད་པར་སྣང་མོད། ངོ་བོའི་སྟེང་ནས་འཚེར་རྒྱུའི་བྱ་བ་ནི་འོད་ཁོ་ན་དང༌། འོད་ལས་གཞན་པའི་འཚེར་རྒྱུའི་ལས་ཤིག་མེད་པས་བྱ་ལས་ངོ་བོ་གཅིག་པ་ཡིན་ནོ། །སྤྱིར་གཞི་གང་ལ་བྱ་བ་བྱས་པར་སྟོན་པས་གཉིས་པ་ཡིན་པ་ལ། བྱ་ལས་ངོ་བོ་གཅིག་པའི་རིགས་འདི་འདྲ་ལ་དེ་ཉིད་ཅེས་བརྗོད་པའོ།།

ལྔ་པ། ཚེ་སྐབས། རྣམ་དབྱེ་བདུན་པའི་ནང་གསེས་ཚེ་སྐབས་ནི། ལ་དོན་བདུན་པོ་གང་རུང་ཞིག་གིས་ཚེ་དང་སྐབས་ཀྱི་དོན་སྟོན་པ་ཞིག་དགོས་ཏེ། དཔེར་ན། ཚེས་གཅིག་ཏུ་ས་སྙིང་ཆོས་ཚོགས་འཚོགས་རྒྱུ་རེད། སློབ་གྲོགས་ཚོ་འུ་ཅག་རྗེས་སུ་མཇལ་ཡོང༌། དམ་ཆོས་ལ་རྟག་ཏུ་འབད་བརྩོན་བྱེད་དགོས། ནམ་ཞིག་ན་འཆི་ངེས་རེད། ལྟ་བུ་གནས་སྐབས་དེ་དང་དེར་བརྟེན་ནས་དེ་འདྲ་འབྱུང་བས་བདུན་པ་ཉིད་དུས་བརྗོད་ པ་ལ་ལ་དོན་སྦྱར་ན་ཚེ་སྐབས་ཀྱི་སྒྲར་འགྱུར་བའི་ཕྱིར་རོ། །ཡང་སྐབས་འདིར་ལས་སུ་བྱ་བ་སོགས་ཀྱི་དོན་དགག་སྒྲ་དང་འབྲེལ་བས། ལས་སོགས་སོ་སོའི་མཚན་ཉིད་དང་མི་ལྡན་པར་གྱུར་པ། ཤར་ཕྱོགས་སུ་མི་འགྲོ། ལྟད་མོ་ལྟ་བར་མི་འགྲོ། འཇིག་རྟེན་ན་བདེ་བ་མེད། ལྟ་བུ་རྣམས་ཀྱི་ལ་དོན་དེ་དག་ལས་སུ་བྱ་བ་སོགས་སུ་འགྱུར་རམ་སྙམ་ན། དངོས་སུ་མི་འགྱུར་ཡང་དགག་བྱའི་ཚིག་དེ་རྣམས་ལ་དོན་དག་དང་འབྲེལ་བའི་ཕྱིར་རྣམ་ དབྱེ་རྗེས་མཐུན་པ་ཙམ་དུ་ཤེས་པར་བྱའོ། །ཞེས་གསུངས་སོ།།

གསུམ་པ། སྒྲ་ཡི་འཇུག་ཚུལ་ནི།

ས་སུ་ག་བ་དྲག་མཐར་ཏུ། །ང་ད་ན་མ་ར་ལ་དུ། །འ་དང་མཐའ་མེད་ར་དང་རུ། །

ཞེས་པ་སྟེ། སུ་སོགས་ལ་དོན་ཀྱི་རྐྱེན་རྣམས་རྗེས་འཇུག་གང་དང་གང་གི་རྗེས་སུ་འཐོབ་ཅེ་ན། དེ་ཡང་ས་མཐར་སུ་དང༌། ག་དང་བ་ད་དྲག་བཅས་ཀྱི་མཐར་ཏུ། ང་ད་ན་མ་ར་ལ་དྲུག་གི་མཐར་དུ་འཐོབ་ སྟེ། དཔེར་ན། དབེན་གནས་སུ་གཤེགས། རྟག་ཏུ་དྲན་ཤེས་བསྟེན། དམ་ཆོས་ཀུན་ཁྱབ་ཏུ་སྤེལ། ལྔ་རིག་སློབ་གྲྭ་འདི་ཤིནད་ཏུ་སྐྱིད། སོགས་རྒྱ་ཆེར་སྦྱར་ནས་ཤེས་པར་བྱའོ། །འ་ཡིག་རྗེས་འཇུག་ཅན་དང་མཐའ་མེད་དག་གི་རྗེས་སུ། ར་དང་རུ་འཐོབ་ པ་ཡིན་ཏེ། དཔེར་ན། མཐའ་རུ་ཕྱིན། ཕྱོགས་བཅུར་བཞུགས།  རྐང་པ་སྐོང་ཚེ་རུ་སྦྱོར་བ། དཔེར་ན། ངོ་མཚར་ཤེས་བྱའི་གཟིགས་མོ་རུ་ཕེབས་དང༌།། ལྟ་བུའོ།།

གསུམ་པ། ཨི་ལྡན་གྱི་རྣམ་དབྱེ་བཤད་པ་ལ། འབྲེལ་སྒྲ་བཤད་པ། བྱེད་སྒྲ་བཤད་པ། སྒྲའི་འཇུག་ཚུལ་བཤད་པ་གསུམ་ལས། དང་པོ།

གི་ཀྱི་གྱི་འི་ཡི་ལྔ་པོ། །རྣམ་དབྱེ་དྲུག་པ་འབྲེལ་སྒྲ་དང༌།།

ཞེས་པ་སྟེ། གི་དང་ཀྱི་གྱི་འི་ཡི་བཅས་ལྔ་པོ་འདི་རྣམས་ནི་རྣམ་དབྱེ་དྲུག་པ་འབྲེལ་སྒྲ་ཞེས། མིང་དོན་ཕན་ཚུན་འབྲེལ་བ་སྟོན་པའི་དོན་ལ་འཇུག་ཅིང༌། དང་ནི་ སྡུད་པའི་སྒྲའོ། །ཆོས་དང་ཆོས་ཅན་གྱི་མིང་དོན་ཕན་ཚུན་འབྲེལ་བར་སྟོན་མི་ནུས་པ་ལ། རྣམ་དབྱེ་དྲུག་པའི་རྐྱེན་སྦྱར་ནས་ཕན་ཚུན་འབྲེལ་བ་བརྗོད་པའི་དོན་ཅན་ནམ་ འབྲེལ་བ་ཡོད་པར་གོ་བ་ཞིག་དགོས་ཏེ། དེའང་འབྲེལ་སྒྲ་མེད་ཀྱང༌། དཔེར་ན། ཆུ་ཆེན་པོ། མེ་དམར་པོ། ཤིང་སྐམ་པོ། མེ་ཏོག་མཛེས། རི་མཐོན་པོ། ཆུ་དྭངས་མོ། མེ་ཏོག་དམར་པོ། ཤོག་བུ་དཀར་པོ། སོགས་ཆོས་ཆོས་ཅན་ཕན་ཚུན་བར་འབྲེལ་སྒྲའི་ཕྲད་མེད་ཀྱང་འབྲེལ་བར་གོ་བ་དག་ལ་ རྣམ་དབྱེའི་རྐྱེན་སྦྱོར་མི་དགོས་པའང་ཡོད་པ་ཤེས་པར་བྱ་དགོས། དེ་དག་ཀྱང་སྐབས་འགར་ཆོས་དང་ཆོས་ཅན་དུ་སྦྱོར་བ་ལྟ་བུའི་ཚིག་སྦྱོར་གྱི་དབང་ གིས་འབྲེལ་སྒྲའི་ཕྲད་འཇུག་པ་ཡོད་ལ། དཔེར་ན། ཆེན་པོའི་ཆུ། དམར་པོའི་མེ། སྐམ་པོའི་ཤིང༌། མཛེས་པའི་མེ་ཏོག  མཐོན་པོའི་རི་སོགས་མང་དུ་ཡོད། དེས་ན་འབྲེལ་བ་ལ། དཔེར་ན། བྲག་དཀར་གྱི་རི་བོ་ལྟ་བུ་ངོ་བོ་བདག་གཅིག་གི་འབྲེལ་བ་དང༌། ལྗོན་ཤིང་གི་མེ་ཏོག་ཚར་དུ་དངར་ལྟ་བུ་ཡན་ལག་དང་ཡན་ལག་ཅན་གྱི་འབྲེལ་བ། རྣམ་ཐོས་སྲས་ཀྱི་བང་མཛོད་ལྟ་བུ་བདག་པོ་དང་ཡུལ་གྱི་འབྲེལ་བ་དང༌། དེ་བཞིན་མཛེས་པའི་མེ་ཏོག་ལྟ་བུའི་ཆོས་དང་ཆོས་ཅན། ཁབ་ཀྱི་རྩེ་དང་ཁང་བའི་ཤར་ལྟ་བུའི་ཆ་ཤས་དང་ཆ་ཤས་ཅན་སོགས་ཀྱི་དབྱེ་བའང་ཡོད་ དོ། །གི་ལ་སོགས་པ་དེ་རྣམས་རྣམ་དབྱེའི་དོན་མ་ཡིན་པ་གཞན་ལའང་འཇུག་པ་ཡོད་པར་གསུངས་ ཏེ། དཔེར་ན། དགེ་སྦྱོང་འདི་ནི་བདེན་གྱི་གཞན་དག་ཆ་མ་མཆིས། རང་ཅག་ནང་པ་སངས་རྒྱས་པ་ཡིན་གྱི་མུ་སྟེགས་པ་མ་ཡིན་ནོ། །ལྟ་བུ་ཕྱི་ཚིག་འགལ་བའམ་མི་མཐུན་པར་སྟོན་པའི་ཚིག་རྒྱན་ལའང་འཇུག་པའི་ཕྱིར་ རོ།།

གཉིས་པ་བྱེད་སྒྲ་བཤད་པ།  

དེ་རྣམས་ས་མཐའ་ཅན་ལྔ་ནི། །རྣམ་དབྱེ་གསུམ་པ་བྱེད་སྒྲ་སྟེ།།

ཞེས་པས་བསྟན་ཏེ། སྔར་བཤད་པའི་འབྲེལ་སྒྲའི་སྐབས་ཀྱི་གི་ལ་སོགས་པ་ཡིག་འབྲུ་ལྔ་པོ་དེ་རྣམས་སོ་སོར་ས་ཡིག་རེ་སྦྱར་བས། གིས་ཀྱིས་གྱིས་འིས་ཡིས་སོགས་མཐའ་རྟེན་ཅན་ལྔ་པོ་འདི་རྣམས་ནི། རྣམ་དབྱེ་གསུམ་པ་བྱེད་པའི་སྒྲ་སྟེ་ བྱེད་པ་པོ་ཞིག་གིས་བྱ་བ་བྱས་པར་སྟོན་པའི་དོན་ཅན་ལ་འཇུག་སྟེ། དེ་ཡང་རྣམ་དབྱེ་གསུམ་པའི་རྐྱེན་སྦྱར་ཡུལ་ལ་བྱེད་པོ་དང་བྱེད་པ་གང་རུང་ཞིག་ ཡིན་ཚེ། ཉེ་འགྱང་གང་རུང་དུ་བྱ་བ་བྱས་པར་སྟོན་པ་ཞིག་ཡིན་ཏེ། དཔེར་ན། མཚུངས་མེད་བླ་མ་མཆོག་གིས་དམ་ཆོས་གནང་ལྟ་བུ་ཉེ་བ་དང༌། ཐུ་མི་སཾ་བྷོ་ཊས་ཆོས་ཀྱི་རྒྱལ་པོ་སྲོང་བཙན་སྒམ་པོའི་བཀའ་དང་རང་ཉིད་བྱང་ཆུབ་ མཆོག་གི་སྨོན་ལམ་ཁྱད་པར་ཅན་གྱི་མཐུས་འཕགས་པའི་ཡུལ་དུ་བརྟོལ། ལྟ་བུ་ཅུང་འགྱང་སར་བྱ་བ་བྱས་པ་ཞིག་གོ ། ཡང་ལྕགས་བཟོ་བས་ལག་པས་ཐོ་བ་ཆེན་པོས་ལྕགས་བརྡུངས་ལྟ་བུ་བྱེད་སྒྲ་སུམ་བརྩེགས་དང༌། ཉི་མ་ཤར་བས་མུན་པ་བསལ་ལྟ་བུ་རྒྱུ་མཚན་སྟོན་པའི་བྱེད་སྒྲའོ། །ཡང་སྐབས་འགར་བཀྲ་ཤིས་ཀྱི་ལག་པས་རི་མོ་འབྲི་ལྟ་བུ་ལ་བྱེད་སྒྲ་གཉིས་མ་སྦྱར་ཡང་བྱེད་པོ་སུ་ཡིན་འཁྲུལ་གཞི་མི་འབྱུང་བ་དང༌། བཀྲ་ཤིས་ཀྱིས་སྟ་རེས་ཤིང་གཅོད་ལྟ་བུ་ལ་བྱེད་སྒྲ་ཉིས་བརྩེགས་མ་སྦྱར་ན་བྱེད་པོ་སུ་ཡིན་འཁྲུལ་གཞི་འབྱུང་སྲིད་པའང་ཡོད། གཞན་ཡང་ཀྱིས་སོགས་དཔེར་ན། བསམ་གྱིས་མི་ཁྱབ། བརྗོད་ཀྱིས་མི་ལང༌། ལྷུན་གྱིས་གྲུབ། ང་ལས་ཁྱེད་ལོ་གསུམ་གྱིས་རྒན་ལྟ་བུ་སོགས་ཀྱང་བྱེད་སྒྲ་རྗེས་མཐུན་པའམ་ཁོངས་ གཏོགས་སུ་འདོད་པར་མངོན་ནོ།།

གསུམ་པ། སྒྲའི་འཇུག་ཚུལ་བཤད་པ།

སྦྱོར་ཚུལ་ན་མ་ར་ལ་གྱི། །ད་བ་ས་ཀྱི་ག་ང་གི །འ་དང་མཐའ་མེད་འི་དང་ཡི།།

ཞེས་པ་ལྟར། གོང་གི་ཨི་ལྡན་གྱི་རྣམ་དབྱེ་ཀྱི་ཀྱིས་སོགས་ཀྱི་སྒྲ་ཡི་སྦྱོར་ཚུལ་ནི། རྗེས་འཇུག་ན་མ་ར་ལ་དག་གི་རྗེས་སུ་གྱི་དང༌། ད་བ་ས་གསུམ་གྱི་རྗེས་སུ་ཀྱི། ག་ང་གཉིས་ཀྱི་རྗེས་སུ་གི  རྗེས་འཇུག་འ་དང་མཐའ་མེད་མཐར་རྐང་པ་ཁ་སྐོང་མི་དགོས་ཚེ་འི་དང༌། ཁ་སྐོང་དགོས་ཚེ་ཡི་བཅས་ འཇུག་པ་ཡིན་ཏེ། དཔེར་ན། གསེར་གྱི་ཏོག ཁྱེད་ཀྱི་བྱ་བ། བདག་གིས་དཔྱད། སློབ་ཕྲུག་ཡོངས་ཀྱིས་བལྟས། ནམ་མཁའི་སྤྲིན། ལྟ་བུ་དང༌། དྭངས་གསལ་ནམ་མཁའ་ཡི་སྤྲིན་པ། །དཔའ་བོ་དེ་ཡིས༷་རྒྱལ་ཁ་བླངས། །ལྟ་བུ་ཁ་སྐོང་དགོས་ཚེ་ཡི་དང་ཡིས་སྦྱར་དགོས་པ་སོགས་རྒྱ་ཆེར་ཤེས་པར་བྱའོ། །

བཞི་པ། རྒྱན་སྡུད་བཤད་པ།

ཀྱང་ཡང་འང་གསུམ་རྒྱན་སྡུད་དེ། །ག་ད་བ་ས་དྲག་མཐར་ཀྱང༌།།

ང་ན་མ་ར་ལ་མཐར་ཡང༌། །འ་དང་མཐའ་མེད་འང་དང་ཡང༌།།

ཞེས་པས་དོན་དང་སྒྲ་ཡི་སྦྱོར་ཚུལ་བསྟན་པ་ལྟར། ཀྱང་དང་ཡང་འང་གསུམ་ནི་མཐུན་པའི་ཚིག་རྒྱན་དང༌། མི་མཐུན་པའི་ཚིག་རྒྱན། སྡུད་པའི་དོན་བཅས་ལ་འཇུག་ཅིང༌། དེ་ནི་ལྷག་བཅས་ཀྱི་སྒྲའོ། །སྒྲའི་སྦྱོར་ཚུལ་རྗེས་འཇུག་ག་ད་བ་ས་བཞི་དང་ད་དྲག་ཅན་མཐར་ཀྱང༌། ང་ན་མ་ར་ལ་བཅས་ཀྱི་མཐར་ཡང༌། རྗེས་འཇུག་འ་དང་མཐའ་མེད་བཅས་ཀྱི་མཐར་རྐང་པ་ཁ་སྐོང་མི་དགོས་ཚེ་འང་དང་དགོས་ཚེ་ཡང་ཉིད་ འཇུག་པ་ཡིན། མཐུན་པའི་ཚིག་རྒྱན་ཞེས་ཚིག་སྔ་ཕྱི་མཐུན་པའི་བར་དུ་འཇུག་པ། དཔེར་ན། མདོ་སྨད་གསེར་ལྗོངས་མཛེས་ཀྱང་མཛེས། བླ་རུང་ཆོས་གྲྭ་སྐྱིད་ཀྱང་སྐྱིད། སློབ་མ་ང་རང་དགའ་ཡང་དགའ། ལྟ་བུ་དང༌། ཚིག་སྔ་ཕྱི་གཉིས་མི་མཐུན་པ་ཞིག་གི་བར་དུ་འཇུག་པ་མི་མཐུན་པའི་ཚིག་རྒྱན་ཏེ། དཔེར་ན། རྒྱལ་ཁྲིམས་བཙན་ཡང་སྙིང་སྟོབས་ཆེ། སྲིད་དབང་ཆུང་ཡང་ཤེས་རྒྱ་ཆེ། ལོ་ན་མཉམ་ཡང་སྟོབས་མི་འདྲ། ལྟ་བུའོ། །ཚིག་དང་དོན་གཞན་ཞིག་གོ་རྒྱུ་ཡོད་པ་ཞིག་ལ་འཇུག་པའི་སྡུད་སྒྲ་ནི། དཔེར་ན། གུར་ཀུམ་ཡང་ཡིན་ལ་སེར་པོའང་ཡིན། སློབ་མས་མ་ཟད་བླ་མས་ཀྱང་བཀུར་རོ། །གནས་འདིར་སྐྱོ་བ་ཙམ་ཡང་སྐྱེ་མི་འགྱུར། ལོ་ཙཱ་བ་ཡང་གནས་འདིར་བཞུགས། །ལྟ་བུ་རྐང་པ་ཁ་སྐོང་དགོས་ཚེ་ཡང་ཉིད་སྦྱར་བར་བྱའོ།།

ལྔ་པ། ལྷག་བཅས་བཤད་པ།

ཏེ་དེ་སྟེ་གསུམ་ལྷག་བཅས་ཏེ། །ན་ར་ལ་ས་དྲག་མཐར་ཏེ།།

ད་དེ་ག་ང་བ་མ་འ། །མཐའ་མེད་རྣམས་ལ་ས་སྟེ་འཐོབ།།

ཅེས་པས་བསྟན་ཏེ། ཏེ་དེ་སྟེ་གསུམ་ནི་མིང་ཚིག་གང་ཡང་རུང་བའི་མཐར་སྦྱར་ཚེ། བརྗོད་པ་སྔ་མས་མིང་ཚིག་གཞན་འདྲེན་པར་བྱེད་པའམ་འདྲེན་རྒྱུ་ཡོད་པ་ཞིག་སྟོན་པས་ན་ལྷག་བཅས་ཞེས་ཟེར་ཏེ། དེ་དག་གི་སྦྱོར་ཚུལ་ནི། རྗེས་འཇུག་ན་ར་ལ་ས་བཞི་དང་ད་དྲག་མཐར་ཏེ་འཐོབ། རྗེས་འཇུག་ད་ཡིག་གི་རྗེས་སུ་དེ་ག་ང་བ་མ་འ་དང་མཐའ་རྟེན་མེད་པ་རྣམས་ལ་ས་ཡིག་དང་ལྡན་པའི་སྟེ་སྒྲ་ཉིད་འཐོབ་བོ། །དེ་དག་ལྷག་མ་འདྲེན་ཚུལ་གྱི་སྒོ་ནས་དབྱེ་ན། མཚམས་སྦྱོར་ལྷག་བཅས་དང༌། དམ་བཅའ་ལྷག་བཅས། གཞན་འདྲེན་ལྷག་བཅས་ཏེ་གསུམ་ལས། དང་པོ། འདྲེན་བྱ་འདྲེན་བྱེད་ཀྱི་ཚིག་སྔ་ཕྱི་མཚམས་སྦྱོར་བ་ཞིག་སྟེ། དེ་ལ་རིམ་དང་ཅིག་ཅར་གཉིས་ལས། དང་པོ། དཔེར་ན། གུས་འདུད་དང་བཅས་ཏེ་ཆོས་ཞུ། བརྩོན་འགྲུས་བསྐྱེད་དེ་མཁས་པར་བྱ། བློ་སྔོན་དུ་བཏང་སྟེ་བྱ་བ་བསྒྲུབ་ལྟ་བུའོ། །གཉིས་པ། རིག་པ་བསྒྲིམས་ཏེ་དཔེ་ཀློག་བྱེད་ཀྱིན་འདུག  ཡིད་དགའ་སྤྲོ་དང་བཅས་ཏེ་ཉམས་རྒྱས། ལྟ་བུའོ། །  གཉིས་པ། ཚིག་སྔ་མས་དམ་བཅས་པ་ལ་དེ་གསལ་བྱེད་དམ་སྒྲུབ་བྱེད་དུ་ཚིག་ཕྱི་མ་འདྲེན་པ་ཞིག་ སྟེ། དེ་ལ་དབྱེ་བ་འདྲེན་པ། གཏན་ཚིག་འདྲེན་པ། ངེས་ཚིག་འདྲེན་པ། རྒྱས་བཤད་འདྲེན་པ་ལས། དཔེར་ན། ཆོས་མཆོག་ནི་ལྔ་སྟེ། དད་པ། བརྩོན་འགྲུས། དྲན་པ། ཏིང་འཛིན། ཤེས་རབ་རྣམས་སོ། །མཛེས་ལྗོངས་འདི་ཤིན་ཏུ་སྐྱིད་དེ་དཀར་དམར་མེ་ཏོག་གིས་ཕྱོགས་ཀུན་བཀྲ་བའི་ ཕྱིར། འདི་ལ་གསར་བྱོན་ཞེས་བྱ་སྟེ་གསར་དུ་ཕེབས་པའི་གང་ཟག་ཡིན་པའི་ཕྱིར། བསླབ་པ་ཀུན་ཀྱི་གཞི་འཛིན་ཅིང༌། །སོགས་གསུངས་ཏེ། དེའང་ལྷག་པ་ཚུལ་ཁྲིམས་དང་སེམས་དང་ཤེས་རབ་སོགས་རིམ་པར་སྦྱར་བ་ལྟ་བུའི་ཕྱི་མ་ གྲངས་འབོར་ལ་ངེས་གཏན་མེད་པ་ཞིག་གོ ། གསུམ་པ། བརྗོད་བྱ་ལྷག་མ་ཡོད་པ་ཙམ་སྟོན་པ་ཞིག་སྟེ། དཔེར་ན། དཔེ་ཆ་དེ་མཐོང་སྟེ་ཀློག་མ་མྱོང༌། དོན་གསལ་ཏེ་བློར་མ་ངེས། རྣ་བ་གཏད་དེ་མཉན་པར་བྱ་ལྟ་བུའོ།།

དྲུག་པ། འབྱེད་སྡུད་བཤད་པ།

གམ་ངམ་དམ་ནམ་བམ་མམ་འམ། །རམ་ལམ་སམ་ཏམ་འབྱེད་སྡུད་དེ།།

སྦྱོར་ཚུལ་སླར་བསྡུའི་སྐབས་དང་མཚུངས། །ར་རུ་འི་ཡི་འང་ཡང་རྣམས།།

རྐང་པ་མི་སྐོང་སྐོང་བའི་ཁྱད། །འོ་འུ་འམ་གྱི་གོང་དུ་ཚེག།

མེད་དང་ཡོད་པའང་དེ་བཞིན་ཡིན།།

ཞེས་པ་ལྟར། རྗེས་འཇུག་གི་ཡི་གེ་བཅུ་ལ་རྗེས་འཇུག་དྲུག་པ་མ་ཡིག་སྦྱར་བས་གམ་ངམ་དམ་ནམ་བམ་མམ་འམ་རམ་ལམ་སམ་ཏམ་བཅས་བཅུ་གཅིག་པོ་རྣམས་ནི། ཚིག་དོན་སོ་སོར་འབྱེད་པ་དང་ཕྱོགས་གཅིག་ཏུ་སྡུད་པའི་སྒྲར་འཇུག་པར་བཤད་དེ། འབྱེད་པ་ཞེས་དབྱེ་གཞི་གཅིག་ཐོག་མར་བཀོད་དེ་བྱེ་བྲག་གཉིས་སམ་མང་པོར་འབྱེད་པ་ ནི། དཔེར་ན། སློབ་མའི་ཆོས་བཞི་སྟེ། མི་ཕྱེད་པའི་དད་པའམ། མི་ལྡོག་པའི་བརྩོན་འགྲུས་སམ། གཞན་དྲིང་མི་འཇོག་པའི་ཤེས་རབ་བམ། བཤེས་གཉེན་ལ་གུས་པ་བཅས་སོ། །སྡུད་པ་ཞེས་ཚིག་དོན་མང་པོའི་བསྡུ་གཞི་ཞིག་མཐར་བཀོད་དེ་བསྡུ་བྱའི་དོན་རྣམས་ སྡུད་པ། དཔེར་ན། མཁན་པོ་འམ། སློབ་དཔོན་ནམ། ཆོས་རྒྱལ་ཁྲི་སྲོང་ལྡེ་བཙན་བཅས་མཁན་སློབ་ཆོས་གསུམ་མོ་ལྟ་བུ་དང༌། གཞན་ས་བོན་སྐྱེ་ཐུབ་བམ་མི་ཐུབ་ལྟ་བུའི་ཐེ་ཚོམ་དང༌། ཁྱེད་སྐུ་ཁམས་བདེ་འམ་ལྟ་བུའི་འདྲི་བ། རྩེད་མོར་གཡེང་ངམ་སློབ་སྦྱོང་བྱེད་ལྟ་བུའི་འདམ་ང་ཅན་བཅས་ལ་འཇུག་པའང་ཤེས་པར་ བྱ། དེ་དག་གི་སྒྲའི་སྦྱོར་ཚུལ་ནི་སླར་བསྡུའི་སྐབས་དང་མཚུངས་པར། རྗེས་འཇུག་རང་འདྲའི་མཐར་དང་དྲག་མཐར་ཏམ་བཅས་འཇུག་པ་ཡིན་ནོ། །གོང་གི་ལ་དོན་དག་ལས་ར་དང་རུ། འབྲེལ་སྒྲའི་འི་དང་ཡི། རྒྱན་སྡུད་ཀྱི་འང་དང་ཡང་རྣམས་སྐབས་གང་དང་གང་ལ་སྦྱོར་ཚུལ་ཅི་འདྲའང་ཤེས་དགོས་ཏེ། ཚིག་ལྷུག་སོགས་རྐང་པ་ཁ་མི་སྐོང་བ་དང༌། ཚིགས་བཅད་སོགས་རྐང་པ་ཁ་སྐོང་བའི་ཁྱད་པར་ ལས་ཁ་སྐོང་དགོས་ཚེ་རུ་དང་ཡི་ཡིས་ཡང་རྣམས་སྦྱོར་ཞིང༌། མི་དགོས་ཚེ་ར་འི་འིས་འང་རྣམས་ཚེག་བར་མེད་པར་སྦྱོར་དགོས་ཏེ། དཔེར་ན། གནས་དང་ཕྱོགས་རྣམས་གང་དུ་འགྲོ་ཡང་རུང༌། །  གཞན་དང་བསྟུན་པ་དེ་ཡང་རྩ་བ་ཡིན། །ལས་དང་བྱ་བ་ཇི་ལྟ་བུ་ཞིག་བྱེད་ནའང་མཛད་སྤྱོད་མི་དང་མཐུན་ན་ལེགས། ལྟ་བུའི་མཚོན་ནས་ཤེས་པར་བྱའོ། །ཡི་གེ་འདི་སུས་བྲིས། ལྟ་བུ། འིས་ཞེས་པའང་ས་ཁོ་ནས་གོ་ཐུབ་པ་ཡིག་ཟོར་ཡང་བའི་ཆེད་ལས། ཐོབ་ཐང་མེད་པ་མ་ཡིན་པ་ཤེས་དགོས། དེ་བཞིན་དུ། འོ་འུ་འམ་གྱི་གོང་དུ་ཚེག་མེད་པ་དང་ཡོད་པའི་ཁྱད་པར་དེའང༌། ཚིག་གི་རྐང་པ་ཁ་སྐོང་དགོས་མིན་གྱི་ཁྱད་པར་དེ་བཞིན་དུ་སྦྱར་བར་བྱེད་པ་ཡིན་པའང་ ཤེས་པར་བྱའོ།།

བདུན་པ། འབྱུང་ཁུངས་བཤད་པ།           

ནས་ལས་འབྱུང་ཁུངས་དགར་སྡུད་དེ། ། འབྱུང་ཁུངས་དངོས་ལ་གང་སྦྱར་འཐུས།།

རིགས་མཐུན་དགར་ནས་མི་མཐུན་ལས། ། སྡུད་ལ་ནས་སྒྲ་ཁོ་ན་འཇུག།

ཅེས་པས་བསྟན་པ་ལྟར་ནས་དང་ལས་གཉིས་ནི་འབྱུང་ཁུངས་དང༌། དགར་བ་དང༌། སྡུད་པ་བཅས་ལ་འཇུག་པར་བཤད་དེ། དགར་སྡུད་སོགས་མ་ཡིན་པའི་འབྱུང་ཁུངས་དངོས་ལ་ནི་ནས་ལས་གཉིས་གང་སྦྱར་ཡང་འཐུས་པའམ་ ཆོག་པ་ཡིན་ལ། དེ་ལ་དངོས་དང་ཆ་འདྲ་གཉིས་སུ་དབྱེ་བའི། དང་པོ་དངོས་ནི། གང་ཞིག་གང་ལས་བྱུང་བ་དང་བྲལ་བར་སྟོན་པ་ཞིག་དགོས་ཏེ། དཔེར་ན། གང་འདབས་ནས་ཆུ་མིག་རྡོལ། གནས་རི་ནས་གཏེར་ཁ་གྲངས་མེད་བླངས། འདོད་འཇོའི་བ་ལས་འོ་མ་བཞོས། འོ་མ་ལས་མར་བྱུང་ལྟ་བུ་དང༌། འབྱུང་ཁུངས་དང་འདྲ་བ། ཤིང་རྩེ་ནས་སྤྲེའུ་ལྷུང་། ནགས་ཚལ་དེ་ལས་ཁུ་བྱུག་ལྷོ་ལ་འཕུར། མི་དབང་གནམ་གྱི་སྐས་ལས་བབས་ལྟ་བུ་དངོས་ཀྱི་མཚན་ཉིད་གང་ཞིག་གང་ལས་བྱུང་བ་དང་ བྲལ་བ་གཉིས་ཀ་མི་ཚང་བས་ཆ་འདྲ་ཞེས་བརྗོད་པ་ཡིན། དགར་བ་ལ་གཉིས་ཏེ་རིགས་མཐུན་དགར་བ་ལ་ནས་སྒྲ་དང༌། རིགས་མི་མཐུན་དགར་བ་ལ་ལས་སྒྲ་ སྦྱར་ན་འཚམ་ཞིང༌། དེ་དག་དཔེར་བརྗོད་ན། དགར་གཞི་དང་དགར་ཆོས་གཉིས་རིགས་མཐུན་པར་དགར་བ། རྐང་གཉིས་རྣམས་ཀྱི་ནང་ནས་ཤཱཀྱ་སེངྒེ་སྐྱབས། བྱ་རྣམས་ཀྱི་ནང་ནས་ལྤགས་བྱེའུ་མཁས། དགར་གཞི་དང་དགར་ཆོས་རིགས་མི་མཐུན་པར་དགར་བ། མི་ལས་ལྷ་བདེ་སྐྱིད་ཕུན་སུམ་ཚོགས། ཆུ་ཚན་ལས་འོ་ཇ་ཞིམ་མངར་ཆེ། ལྟ་བུ་དང༌། བྱ་བ་དང་ཡོན་ཏན་གྱི་ཁྱད་པར་ལས་དགར་བའང་ཡོད་དེ། རྒྱུན་དུ་རྣམ་གཡེང་ངང་སྡོད་པ་ལས་སྐོར་བ་རེ་གཉིས་བྱེད་པ་མཆོག  མི་འགའ་ཞིག་ལས་ཝ་མོ་ཁོ་གཡོ་སྒྱུ་ཆེ། ལྟ་བུའོ། །སྡུད་པ། གང་ཞིག་གང་ལས་མགོ་བརྩམས་པ་དེ་ནས་བསྡུ་བྱ་རྫོགས་པར་སྟོན་པ་ཞིག་སྟེ། དེ་འདྲའི་སྡུད་པ་ལ་ནི་ནས་སྒྲ་ཁོ་ན་འཇུག་པ་ ལས་ཅིག་ཤོས་མི་འཇུག་པ་ཡིན། དཔེར་ན། བླ་རུང་ནས་རྒྱ་གར་བར་ལྟ་བུ་ཡུལ་སྡུད་པ། ན་ནིང་ནས་ད་ལོའི་བར་ལྟ་བུ་དུས་སྡུད་པ། གཅིག་ནས་གྲངས་མེད་བར་ལྟ་བུ་གྲངས་སྡུད་པ་སོགས་ཡོད།དགར་བ་ནི་དགར་གཞི་དེ་ལས་ དགར་ཆོས་བྱུང་བ་ལྟར་སྣང་བ་དང༌། སྡུད་པ་ནི་ཐོག་མར་གང་ནས་མགོ་བརྩམས་པ་དེ་ལས་བསྡུ་རྒྱུའི་གནས་སྐབས་ཐམས་ཅད་ བྱུང་བ་ལྟར་སྣང་བས་ལྔ་བའི་ཡན་ལག་ཏུ་རྟོགས་པར་བྱའོ། །

བརྒྱད་པ། བོད་སྒྲ་བཤད་པ།

ཀྱེ་དང་ཀྭ་ཡེ་བོད་སྒྲ་སྟེ། །ཕལ་ཆེར་མིང་གི་ཐོག་མར་སྦྱོར།།

ཞེས་པ་སྟེ། གང་ཡང་རུང་བའི་མིང་གི་ཐོག་མར་ཀྱེ་དང་ཀྭ་ཡེ་ཞེས་སྦྱར་བ་ནི་བོད་པ་གསལ་བྱེད་ཀྱི་སྒྲ་སྟེ། དེའང་ཕལ་ཆེར་མིང་གི་ཐོག་མར་སྦྱོར་བ་ ལས་ཚིགས་བཅད་སོགས་ཀྱི་སྐབས་སུ་མིང་གི་མཐའ་དང་བར་དུ་སྦྱར་བའང་ཡོད། དེ་དག་དཔེར་ན། ཀྱེ་སློབ་དཔོན་ཆེན་པོ། ཀྭ་ཡེ་བརྩེ་ལྡན་གྲོགས་པོ་དམ་པ། ལྷ་མཆོག་ཀྱེ་བདག་ལ་དངོས་གྲུབ་སྩོལ། ལེགས་པར་གསོན་དང་སྤུན་ཟླ་ཀྱེ། ཝ་ཡེ་ང་དང་མཉམ་དུ་འགྲོའམ། ཀྭའི་ཚུར་ཤོག་ལྟ་བུ་དག་ཀྱང་བོད་པ་གསལ་བྱེད་ཀྱི་སྒྲའོ། །ཀྱེ་སོགས་བོད་པ་གསལ་བྱེད་ཀྱི་སྒྲ་ལས་རྣམ་དབྱེ་མཚན་ཉིད་པ་མིན་པ་སི་འགྲེལ་ ལས་གསུངས་པ་ལྟར་ཤེས་དགོས་སོ།།

གཉིས་པ། རྗེས་འཇུག་ལ་ལྟོས་མི་དགོས་པའི་ཕྲད་རང་དབང་ཅན་བཤད་པ་ལ། ནི་སྒྲ། དང་སྒྲ། དེ་སྒྲ། གང་སྒྲ། བདག་སྒྲ། དགག་སྒྲ་བཅས་དྲུག་ལས། དང་པོ། ནི་སྒྲ་བཤད་པ།

ནི་ནི་དགར་དང་བརྣན་པའི་སྒྲ། །

ཞེས་གསུངས། དེས་ན་ཐོག་མར་ཚིག་ཕྲད་ཅེས་པ་ངེས་དགོས་ཏེ། ཕྲད་རང་རྐྱང་གིས་བརྗོད་བྱ་སྤྱི་བམ་ཞིག་ལས་དོན་གསལ་བོ་གང་ཡང་མི་སྟོན་པར་མིང་ ཚིག་གཅིག་གམ་དུ་མའི་ཐོག་མཐའ་བར་གསུམ་གྱི་ཚིག་སྔ་ཕྱི་ཕྲད་པར་བྱེད་པའི་ནུས་པ་ བཏོན་ཏེ་དོན་གསལ་བར་སྟོན་པའི་སྒྲའི་ཆ་ཤས་ཤིག་ལ་ཚིག་ཕྲད་ཅེས་ཟེར་བ་ཡིན། ཕྲད་དང་རྣམ་དབྱེ་ལ་མུ་བཞི་ཡོད། རྣམ་དབྱེ་ཡིན་ལ་ཚིག་ཕྲད་མ་ཡིན་པ། མིང་རྐྱང་རྣམས་དང༌། ཚིག་ཕྲད་ཡིན་ལ་རྣམ་དབྱེ་མ་ཡིན་པ། སླར་བསྡུ། ལྷག་བཅས། འབྱེད་སྡུད། རྒྱན་སྡུད། ནི་སྒྲ། དང་སྒྲ། དེ་སྒྲ། སྤྱི་སྒྲ། བདག་སྒྲ། དགག་སྒྲ། ཞིང་སོགས་མང་དུ་ཡོད། གཉིས་ཀ་ཡིན་པ། ལ་དོན། ཨི་ལྡན། འབྱུང་ཁུངས། འབོད་སྒྲ། གཉིས་ཀ་མིན་པ། དབྱངས་གསལ་སོ་བཞི་ལྟ་བུའོ།།

དེས་ན་ནི་ཞེས་པ་དེ་ནི་དགར་དང་བརྣན་པའི་དོན་གཉིས་ལ་འཇུག་པའི་སྒྲ་སྟེ། དགར་བ་ལ་ནང་གསེས་གསུམ་ལས། དཔེར་ན། ཡོན་ཏན་ཕུན་སུམ་ཚོགས་པ་ནི་མི་རྣམས་ཀྱི་མཆོག་གོ་ལྟ་བུ་དགར་བྱ་ཡོན་ཏན་ཅན་དང༌། དགར་གཞི་མི་རྣམས། དགར་བྱེད་ཕུན་སུམ་ཚོགས་པའི་ཡོན་ཏན་གྱི་ཁྱད་པར་ལས་མཆོག་ཏུ་དགར་བ་དང༌། གདོལ་བ་ནི་རིགས་ཀུན་ཀྱི་ཐ་མ་ཞིག་གོ་ལྟ་བུའི་དམན་པར་དགར་བ་དང༌། ཙན་དན་ནི་ཤིང་གཞན་ཞིག་དང་མི་འདྲའོ་ལྟ་བུའི་ཐ་དད་ཙམ་དུ་དགར་བ་སྟེ་གསུམ་མོ། །བརྣན་པ་ནི་དོན་གང་ཡིན་པ་དེ་ནན་ཏན་བྱས་པའི་དོན་ཏེ། དཔེར་ན། སློབ་མ་ང་རང་ཚོ་ནི་། རྙེད་པར་དཀའ་བའི་མི་ལུས་ནི་ཐོབ། རང་དབང་ནི་ཡོད། ན་ཚོད་ནི་གཞོན། བློ་རིག་ནི་བཀྲ། འཚོ་བའི་ཆ་རྐྱེན་ནི་ཕུན་སུམ་ཚོགས། སློབ་དཔོན་ནི་མང་དུ་འཛོམས། སློབ་ཅི་འདོད་ནི་དཔེ་ཁྲིད་བྱེད། དེས་ན་ཤིན་ཏུ་རྙེད་པར་དཀའ་བའི་གོ་སྐབས་བཟང་པོ་དེ་ཆུད་ཟོས་སུ་གཏོང་མི་རུང་ ལྟ་བུའོ།།

གཉིས་པ། དང་སྒྲ་བཤད་པ།

དང་ནི་སྡུད་འབྱེད་རྒྱུ་མཚན་དང༌། །ཚེ་སྐབས་གདམས་ངག་ལྔ་ལ་འཇུག།

ཅེས་པ་སྟེ། དང་སྒྲ་ནི་སྡུད་པ་དང༌། འབྱེད་པ། རྒྱུ་མཚན་དང་ཚེ་སྐབས་གདམས་ངག་སྟེ་དོན་ལྔ་ལ་འཇུག་པར་ བསྟན་པ་སྟེ། དཔེར་ན། དོན་དམ་པའི་དགེ་བ་དང་། ངོ་བོ་ཉིད་ཀྱི་དགེ་བ་དང་ མཚུངས་ལྡན་གྱི་དགེ་བ་དང་། ཀུན་སློང་གི་དགེ་བ་རྣམས་དགེ་བ་བཞིའོ་ལྟ་བུའི་བསྡུ་བྱའི་རིམ་པ་རྣམས་ཐོག་མར་ བགྲངས་ཏེ་སྡུད་གཞི་མཇུག་ཏུ་བཀོད་པས་སྡུད་པ་དང༌། མེས་དབོན་རྣམ་གསུམ་སྟེ། སྲོང་བཙན་སྒམ་པོ་དང་། ཁྲི་སྲོང་ལྡེ་བཙན་དང་། མངའ་བདག་ཁྲི་རལ་བ་ཅན་རྣམས་སོ་ལྟ་བུའི་དབྱེ་གཞི་ཐོག་མར་བཀོད་དེ་དབྱེ་ཆོས་ རྣམས་རིམ་བཞིན་བགྲངས་པས་འབྱེད་པ་དང༌། ཕན་སེམས་ཅན་གྱི་དགེ་རྒན་མཐོང་བ་དང་དགའ་སྤྲོ་ཚད་ལས་འདས་ལྟ་བུའི་རྒྱུ་མཚན་ལ་ འཇུག་པ། ང་ཚོ་ནམ་ལངས་པ་དང་ལྷ་ལྡན་དུ་འགྲོ་ལྟ་བུའི་དུས་གཙོ་བོར་བརྗོད་པའི་ཚེ་སྐབས་ དང༌། ལེགས་པར་སློབ་དང་མཁས་པར་འགྱུར་ལྟ་བུའི་སྐུལ་ཚིག་དང་འབྲེལ་བའི་གདམས་ངག་ལ་ འཇུག་པ་སོགས་མང་དུ་ཡོད་པ་ཤེས་པར་བྱའོ།།

གསུམ་པ། དེ་སྒྲ་བཤད་པ།

མིང་གི་ཐོག་མའི་དེ་སྒྲ་ནི། །ཐ་སྙད་འདས་མ་ཐག་པ་དང༌། །རྣམ་གྲངས་གཞན་ཅན་གཉིས་ལ་འཇུག།

ཅེས་པ་སྟེ། མིང་ཚིག་གང་གི་ཐོག་མའི་དེ་སྒྲ་དེ་ནི་གཞུང་རྣམས་སུ་དོན་མང་དུ་འཇུག་པར་བཤད་པ་ལས། མདོར་བསྡུས་ན་ཐ་སྙད་འདས་མ་ཐག་པ་དང༌། རྣམ་གྲངས་གཞན་ཅན་གྱི་དེ་སྒྲ་སྟེ་གཉིས་ལ་འཇུག་པའམ་ འཇུག་ཡུལ་མཐའ་དག་དེ་གཉིས་སུ་འདུ་བ་ཡིན་ལ། དེའང་དབྱེ་ན་དོན་དགུ་ལ་འཇུག་ཚུལ་བཤད་དེ། ཐ་སྙད་དབང་དུ་གསུམ། དངོས་པོའི་དབང་དུ་བཞི། དུས་ཀྱི་དབང་གི་གཉིས་ལས། དང་པོ་སྒྲའི་བརྗོད་པ་ཙམ་གྱི་དབང་དུ་བྱས་པའི་ཐ་སྙད་དུ་འཇུག་པ་གསུམ་ལས། དཔེར་ན། ཕ་གི་རྫ་རི་དེ་ཤིན་ཏུ་མཐོ། དེའི་རྩེ་མོ་སྤྲིན་གྱིས་གཡོགས། དེའི་སྐེད་པར་ནགས་ཚལ་རྒྱས། དེའི་གཤམ་དུ་རི་དྭགས་སྣ་ཚོགས་འཁོར། དེའི་འདབས་སུ་མཚོ་དང་མཚེ་འུས་བརྒྱན། དེ་ང་ཚོའི་རྒྱབ་རི་ཡིན་ལྟ་བུའི་བརྗོད་བྱ་སྤྱིའི་དོན་ལ་མ་དཔྱད་པར་བརྗོད་ཚུལ་ དེ་ཉིད་ལ་ཐད་ཀར་བཏགས་པའི་དུས་འདས་པ་ལ་འཇུག་པ་ཐ་སྙད་འདས་མ་ཐག་པ་དང༌། དེ་ལ་དཔྱད་པ་བྱེད་དགོས། དེ་ནི་ཤིན་ཏུ་ལེགས། དེ་བཞིན་མཁས་པ་ཡིན། དེ་ལས་ཀྱང་ཁྱད་དུ་འཕགས་ལྟ་བུའི་ཚིག་ཟིན་དུ་དངོས་སུ་གསལ་མི་གསལ་ཇི་ལྟར་ཡང་ དོན་གྱི་རྣམ་གྲངས་གཞན་ཞིག་སྦྱར་ཞིང་དྲང་དུ་ཡོད་པའི་རྣམ་གྲངས་གཞན་ལ་འཇུག་ པའོ། །དེ་ཕྱིར་ལྷག་བཅས་མ་གཏོགས་དེ་སྒྲའི་འཇུག་པ་ཐམས་ཅད་ཀྱི་འཇུག་ཡུལ། ཁག་གཉིས་སུ་གྲངས་ངེས་པར་མཛད་པ་ནི་རྟོགས་པར་བྱ་བའི་གནད་ཅིག་གོ ། གཞུང་ལམ་བརྒྱུད་དེ་རང་ཡུལ་དུ་འགྲོ། འདིར་གཏམ་བཤད་དེ་ཅི་བྱེད། ཚེ་སྔ་ཕྱི་ཡོད་དེ་དྲན་མཁན་མང་བའི་ཕྱིར་ལྟ་བུའི་དེ་སྒྲའི་ཤུལ་དུ་བརྗོད་བྱ་ ལྷག་མ་འདྲེན་པ་ཙམ་ལས་དོན་གཞན་མི་སྟོན་པའི་ལྷག་བཅས་ལ་འཇུག་པ། དངོས་པོའི་དབང་དུ་བཞི་སྟེ། དཔེར་ན། དེ་མཛེས་ཤིང་ཡིད་དུ་འོང༌། གདུང་འདེགས་པའི་དོན་བྱེད་པ་དེ་ཀ་བའོ་ལྟ་བུ་བདེན་པ་ལ་འཇུག་པ་དང༌། ཁ་སང་གི་དེ་སུ་ལའང་མ་སྟོན་ལྟ་བུ་གསང་བ་ལ་འཇུག་པ། རང་ཉིད་ཀྱི་དཔེ་ཆ་དེ་ལྟ་བུ་བདག་གི་བའི་དངོས་པོ་ལ་འཇུག་པ། ཉིད་ཀྱི་བུམ་པ་དེ། ཁྱོད་ཀྱི་སྡོད་ཁང་དེ་ལྟ་བུ་ཕ་རོལ་བོའི་དངོས་པོ་ལ་འཇུག་པ་བཅས་བཞིའོ། །དུས་རྐྱང་བའི་དབང་གིས་གཉིས་ལ་འཇུག་སྟེ། དཔེར་ན། དུས་རབས་སྔོན་མ་དེ་ལ། སྔར་གྱི་དོན་དེ་མ་བརྗེད་ལྟ་བུ་འདས་པ་དང༌། དེའི་དུས་ན་བྱམས་པའི་ཆོས་འཁོར་སྐོར། སང་ཉི་མ་ཤར་བའི་དུས་དེར་ཆོས་ཞུ་རུ་འགྲོ་ལྟ་བུ་མ་འོངས་པ་ལ་འཇུག་པའོ། །དུས་རྐྱང་བའི་ད་ལྟ་བ་ལ་མི་འཇུག་སྟེ། ད་ལྟའི་ལོ་འདི་ཟེར་བ་ལས་ལོ་དེ་སོགས་མི་སྦྱོར་བ་མངོན་སུམ་གྱིས་གྲུབ་བོ། །སྤྱིར་དངོས་པོ་གཙོ་ཆེ་བའི་སྒོ་ནས་ཕྱེས་པས་དུས་གསུམ་ལ་འཇུག་པ་ཡོད་དེ། སི་འགྲེལ་ལས། སྔོན་ཚེ་འཕགས་ཡུལ་དེ་ན། རྡོ་བ་དེ་ཁྱོད་ཀྱིས་འདེགས་ནུས་སམ། འཚང་རྒྱ་བར་འགྱུར་བ་དེ་སོགས་དུས་གསུམ་ག་ལ་འཇུག་པ་ཡོད་པར་ཤེས་པར་བྱའོ།།

བཞི་པ། སྤྱི་སྒྲ་བཤད་པ།

ཅི་ཇི་སུ་གང་སྤྱི་སྒྲ་སྟེ། །ཞིག་སྟེ་སླད་འདྲ་ཕྱིར་ལ་ཅི།།

སྙེད་སྲིད་ལྟར་བཞིན་སྐད་ལ་ཇི། །སུ་ནི་གང་ཟག་གང་ཀུན་ལའོ།།

ཞེས་པས་བསྟན་ཏེ། ཅི་ཇི་སུ་གང་བཞི་པོ་དེ་གཙོ་བོ་དོན་གྱི་བྱེ་བྲག་དམིགས་སུ་མི་འཛིན་པར་སྤྱི་ལ་ཁྱབ་པའི་དོན་ཅན་གྱི་སྒྲ་སྟེ། འདི་སྐབས་སྤྱི་ཞེས་པ་ནི་དངོས་པོ་ཀུན་ལ་འཇུག་རུང་གི་ཆ་ནས་སྤྱི་སྒྲ་ཞེས་བཏགས་ པ་ལས་བྱེ་བྲག་ལ་མི་འཇུག་པར་བསྟན་པ་མིན་ནོ། །སྤྱིར་གང་ནི་སེམས་ཅན་དང་སེམས་མེད་ཀྱི་དངོས་པོ་ཀུན་ལ་འཇུག་པ་དང༌། སུ་ནི་མི་ཁོ་ན་ལ་འཇུག  ཅི་ནི་རྒྱུ་མཚན་དང་བྱ་བ་དགོས་པ་སོགས་དང༌། ཇི་ནི་དཔེ་དང་ཚད་གཞལ་བ་སོགས་ལ་འཇུག་གོ ། དེ་དག་ཚིག་ཏུ་བསྡེབས་ནས་སྦྱོར་སྐབས། དཔེར་ན། ཅི་ཞིག་དགོས། ཅི་སྟེ་མི་བཤད། ཅི་སླད་འགྲོ། ཅི་འདྲ་བྱུང་ཡང༌། ཅི་ཕྱིར་མི་སློབ་ལྟ་བུ་དག་ལ་སྔོན་དུ་ཅི་འཇུག་པ་དང༌། བྱ་བ་ཇི་སྙེད་ཅིག་ཡོད་ནའང༌། ད་ནས་བཟུང་ཇི་སྲིད་བྱང་ཆུབ་མ་ཐོབ་བར། ད་ནི་ཇི་ལྟར་བྱས་ཀྱང་བདེ་ནས་བདེ་བར་འགྲོ། དོན་ཇི་བཞིན་ཤེས་པར་དཀའ་ནའང༌། སྦྱིན་བདག་གི་མིང་ལ་ཇི་སྐད་ཟེར་ལྟ་བུ་དག་ལ་ཇི་འཐོབ་པ་ཡིན་ནོ། །སུ་ནི་གང་ཟག་སྟེ་ཕལ་ཆེར་མི་ཞིག་ལ་འཇུག་སྟེ། དཔེར་ན། བདག་པོ་སུ་རེད། རིན་པོ་ཆེ་འདི་འདྲ་སུ་ལ་ཡོད། སུ་འགྲོ་རྒྱུ་རེད། ལྟ་བུའོ། །གང་ནི་དབྱེ་བ་མེད་པར་ཀུན་ལ་ཁྱབ་པར་འཇུག་པའོ། །དཔེར་ན། གང་གིས་རྒྱུན་དུ་བསླབས་ན། གང་ཡང་འགྲུབ་པར་འགྱུར། སློབ་དཔོན་གང་གིས་བདག་ལ་གནང༌། དངོས་པོ་འདི་གང་ནའང་ཡོད་ལྟ་བུའི་སྤྱི་དང་བྱེ་བྲག་དག་ལའང་འཇུག་པ་ཡོད་དོ།།

ལྔ་པ། བདག་སྒྲ་བཤད་པ།

ན་རོ་ཡོད་མེད་པ་བ་མ། །བདག་པོའི་སྒྲ་སྟེ་ག་ད་ན།།

བ་མ་ས་དང་དྲག་མཐར་པ། །ང་འ་ར་ལ་མཐའ་མེད་ལ།།

བདག་སྒྲ་ཡར་གྱུར་བ་དང་ནི། །ཆ་ལ་པ་ཉིད་སྦྱོར་བ་ལེགས།།

མིང་མཐའི་པ་བའང་ཕལ་ཆེར་འདྲ། །མ་ནི་ངེས་མེད་སྐབས་དང་སྦྱར།།

ཞེས་པ་ལྟར་ན་རོ་སྟེ་དབྱངས་ཨོ་སྦྱར་བ་ཡོད་མེད་གང་རུང་ཡང་པ་དང་བ་མ་གསུམ་ནི། མིང་གི་ཆ་ཤས་སུ་སྔར་མེད་པ་ལ་གསར་དུ་སྦྱར་བས། གང་ཡང་རུང་བའི་དངོས་པོ་རྣམས་གང་ལ་ཡོད་པའི་གང་ཟག་གམ་བདག་པོ་སྟོན་པའི་སྒྲ་སྟེ། དེའང་རྗེས་འཇུག་ག་ད་ན་བ་མ་ས་བཅས་དྲུག་དང་ད་དྲག་ཅན་གྱི་མཐར་བདག་སྒྲ་པ་དང་ པོ་གཉིས་འཇུག་སྟེ། དཔེར་ན། མཁས་པ། བླུན་པོ། འབྲོག་པ། ལྟ་བུའི་བདག་སྒྲ་ལ་འཇུག་པ་དང༌། ཡང་དཔེར་ན། བུམ་པ། ཀ་བ། ལྷུན་པོ། སྙིང་བོ། ར་མ། ལྟད་མོ་ལྟ་བུ་དག་ནི་སྔར་མེད་གསར་དུ་སྦྱར་བ་མིན་པས་དེ་དག་བདག་སྒྲ་མིན་པར་ མིང་གི་ཆ་ཤས་ཡིན། རྗེས་འཇུག་ང་འ་ར་ལ་བཞི་དང་མཐའ་མེད་དག་གི་རྗེས་ལ་བ་འཇུག་པ་ཡིན་ཏེ། དཔེར་ན། ལས་གཉེར་བ། གྲོང་མཐའ་བ། དོན་གཉེར་བ། ལྟད་མོ་བ། གཏོང་བ་བོ། སོགས་མང་དུ་སྦྱར་བར་བྱ། དེའང་བདག་སྒྲ་ཡར་གྱུར་བ་ཞེས། དཔེར་ན། ལྷ་ས་བ། སེ་ར་བ་ལྟ་བུའི་ཚེག་ཁྱིམ་གསུམ་ལྡན་གྱི་ཚིག་ཡ་ཉིད་དུ་གྱུར་བའི་བདག་སྒྲ་ལ་བ་ཡིག་སྦྱར་བར་བྱེད་པ་དང་ནི། མཁས་པ། བོད་པ་ལྟ་བུའི་ཚེག་ཁྱིམ་གཉིས་ལྡན་གྱི་ཚིག་ཆ་ཉིད་དུ་གྱུར་བའི་བདག་སྒྲ་ལ་པ་ཉིད་སྦྱོར་བ་ལེགས་པར་ གསུངས་སོ། །སྤྱིར་འདི་ཙམ་མ་ཟད་མ་དང་མོ་ཅན་ལྡན་དག་ཀྱང་གང་ཞིག་གང་ལ་ཡོད་པའམ་ལྡན་པ་སྟོན་ པའི་ཆ་ནས་བདག་སྒྲ་དང་མཚུངས་པར་འཇུག་སྟེ། དཔེར་ན། གཞོན་ནུ་མ། དཔའ་མོ། རིག་གནས་ཅན། སྟོབས་ལྡན་སོགས་ཡོད་པ་ཞར་བྱུང་དུ་ཤེས་པར་བྱ་དགོས་སོ། །སྤྱིར་མིང་སོ་སོའི་རྗེས་འཇུག་གི་མཐའི་པ་བ་སོགས་འཐོབ་པའང་ཕལ་ཆེར་སྔ་མ་རྣམས་དང་འཇུག་པ་འདྲ་བ་ཡིན། མ་དང་མོ་ནི་བདག་སྒྲ་ལ་འཇུག་ཚུལ་ཇི་ལྟ་བུ་ཞེ་ན། ངེས་པ་མེད་པར་སྐབས་ཐོབ་དང་བསྟུན་ནས་གང་བདེར་སྦྱར་ཆོག་ པར་གསུངས་སོ། །སྤྱིར་དངུལ་ཆུ་ཡབ་སྲས་ནི། སི་ཏུ་པཎ་ཆེན་གྱི་རྗེས་འབྲངས་ཡིན་ལ། འོན་ཀྱང་བདག་སྒྲའི་སྐབས་བཤད་ཚུལ་ཙམ་ལ་མི་མཐུན་པར་སྣང་ཡང༌། དེ་ནི་དངུལ་ཆུ་ཆོས་བཟང་རང་ཉིད་ཀྱིས། སི་ཏུའི་ཞལ་ལུང་གི་དགག་ལན་ཚངས་པའི་ཐིག་ཅེས་པར། ཁོང་གིས་བདག་སྒྲའི་སྐབས་འདིར་སི་ཏུའི་འགྲེལ་ཆེན་དཔེ་མི་གསལ་བ་ཞིག་ལས་མ་ རྙེད་པས། སི་ཏུའི་དགོངས་པར་སོང་མིན་མི་ཤེས་ཀྱང༌། ཁོང་བཀྲ་ཤིས་ལྷུན་པོར་བཞུགས་སྐབས། ཀརྨ་ཞྭ་དམར་པཎྜི་ཏས་འགྲེལ་ཚུལ་ཞིག་མཐོང་བ་དེ་བཞིན་བྱས་པས། བདག་སྒྲའི་སྐབས་འདིར་གཞན་ལུགས་ཡིན་ཞེས་གསལ་བར་གསུངས་ཡོད་ཀྱང༌། འདིར་མཁས་པ་ལ་ལས་སི་ཏུའི་རང་ལུགས་འཛིན་པ་དངུལ་ཆུ་ཡབ་སྲས་ཀྱིས་བདག་སྒྲའི་ སྐབས་སི་ཏུའི་རྗེས་སུ་མ་འབྲངས་བ་ལ་དགོས་པ་ཆེ་ཞེས་རྩལ་བཏོན་ཆེས་ཆེར་བྱས་ ནའང༌། དགག་ལན་ཚངས་ཐིག་ཏུ་དངུལ་ཆུ་དྷརྨ་བྷ་དྲ་རང་གི་དགོངས་པ་མིན་པར་གསལ་བར་གསུངས་ ཡོད་པས། ཞེ་འདོད་ཀྱི་བསྒྲུབ་བྱ་འགྲུབ་པར་མི་འགྱུར་རོ།།

དྲུག་པ། དགག་སྒྲ་བཤད་པ།

མ་མི་མེད་མིན་དགག་སྒྲ་སྟེ། །མ་མི་ཐོག་མ་མེད་མིན་མཇུག།

མ་ནི་བར་གྱི་གསལ་བྱེད་ལའང༌།།

ཞེས་པ་ལྟར་མ་མི་མེད་མིན་བཞི་ནི་མིང་ཚིག་གང་ཞིག་ལ་སྦྱར་རུང་སྦྱར་ཡུལ་གྱི་དོན་དེ་མ་ཡིན་པའམ་མེད་པར་སྟོན་པས་དགག་པའི་སྒྲ་ཞིག་སྟེ། དེའང་མ་དང་དེ་དང་འབྲེལ་བའི་མི་གཉིས་མིང་གི་ཐོག་མ་རུ་ འཇུག་པ། དཔེར་ན། མ་མཐོང་ནའང་མེད་ངེས་མིན། །མ་ལུས་རྟོགས་པ་ཤིན་ཏུ་དཀའ། །མི་འགྱུར་དམ་བཅའ་བརྟན་པ་ན། །མི་འགྲུབ་བྱ་བ་ཡོད་དམ་ཅི། །ལྟ་བུ་དང༌། མ་ཡིག་དང་འབྲེལ་བའི་མེད་མིན་གཉིས་མིང་གི་མཇུག་ཏུ་འཇུག་པ། དཔེར་ན། དམན་ལ་སྤྱོད་པ་བཟང་ཡང་བཅོས་མིན་མེད། རྟག་ཏུ་ཁྲོ་བ་དམ་པ་མིན། ལྟ་བུའོ། །མ་ཡིག་ནི་བར་གྱི་གསལ་བྱེད་ལའང་འཇུག་ པར་བཤད་དེ། མིང་ཚིག་གང་ཡང་རུང་བའི་བར་དུ་སྦྱར་ཚེ་མིང་གོང་འོག་གཉིས་ཀ་དགག་པའི་ཕྲད་ཡིན་ པར་གསུངས་ཏེ། དཔེར་ན། ཆ་ལུགས་ཡ་མ་ཟུང་མིག་ལ་མི་མཛེས། རྒྱ་མ་བོད་ཀྱི་སྐད་རྣ་བར་མི་འགྲོ། ཕྱི་མ་ནང་གི་མི་ལ་བློ་མི་གཏོད་ལྟ་བུ་སོགས་རྒྱ་ཆེར་སྦྱར་བར་བྱའོ། །སྤྱིར་གཙོ་ཆེར་བཤད་ན་མ་ནི་བྱུང་ཟིན་དགག་པའི་དགག་སྒྲ་སྟེ། དཔེར་ན། མ་བྱས། མ་རིག་མ་བལྟས། མ་བཞག་ལྟ་བུ་དང༌། མ་འགྲོ། མ་འདུག མ་འབྲི་ལྟ་བུའི་བྱེད་འགྱུར་དགག་པའང་ཡོད། མི་ནི་འབྱུང་འགྱུར་དགག་པའི་དགག་སྒྲ་སྟེ། མི་འཛིན། མི་འགྲོ། མི་འདུག མི་འབྲི། མི་བཤད། མི་ཉན། མི་ཟ། མི་བྱེད་ལྟ་བུ་མང་དུ་ཡོད་དོ།།

གསུམ་པ། ཚིག་ཕྲད་གཞན་བཤད་པ། འ་མཐའ་འདོར་ལེན་བྱེད་ཚུལ་བཤད་པ། ཚེག་ཤད་སྦྱོར་ཚུལ་བཤད་པ་གསུམ་ལས། དང་པོ། ཚིག་ཕྲད་སྦྱོར་ཚུལ་བཤད་པ།

ཚིག་ཕྲད་ཞིང་སོགས་ང་ན་མ། །འ་དང་ར་ལ་མཐའ་མེད་མཐར།།

ཞིང་ཞེས་ཞེ་འོ་ཞེ་ན་ཞིག ། ག་ད་བ་དང་ད་དྲག་མཐར།།

ཅིང་ཅེས་ཅེ་འོ་ཅེ་ན་ཅིག ། ས་མཐར་དམིགས་བསལ་ཞེས་མ་གཏོགས།།

ཤིང་ཤིག་ཤེ་འོ་ཤེ་ན་འཐོབ། །འོན་ཀྱང་ཁ་ཅིག་ལྷན་ཅིག་སོགས།།

མིང་གི་ཆ་དང་མ་ནོར་གཅེས།།

ཞེས་པ་ལྟར་རྗེས་འཇུག་ལ་ལྟོས་དགོས་པའི་ཚིག་ཕྲད་ཞིང་སོགས་ལྔ་པོ་དག་གི་སྒྲའི་སྦྱོར་ཚུལ་ནི། རྗེས་འཇུག་ང་ན་མ་འ་དང་ར་ལ་མཐའ་མེད་བཅས་ཀྱི་མཐར། ཞིང་ཞེས་ཞེའོ་ཞེ་ན་ཞིག་རྣམས་འཐོབ་པ་དང༌། རྗེས་འཇུག་ག་ད་བ་དང་ད་དྲག་ཅན་བཅས་ཀྱི་མཐར། ཅིང་ཅེས་ཅེའོ་ཅེ་ན་ཅིག་རྣམས་འཐོབ་པ་དང༌། རྗེས་འཇུག་ས་ཡི་མཐར་དམིགས་བསལ་ཤེས་ཀྱི་ཚབ་ཏུ་ཞེས་སྦྱོར་དགོས་པ་མ་གཏོགས་གཞན་ཤིང་ཤིག་ཤེའོ་ཤེ་ན་རྣམས་འཐོབ་པ་ ཡིན། ཕྲད་འདི་དག་གི་སྒྲ་སྦྱོར་གྱི་དཔེར་བརྗོད་ལོགས་སུ་འགོད་པ་དགོས་གལ་མི་ཆེ་བས། དོན་སྦྱོར་གྱི་དཔེར་བརྗོད་དང་ཆབས་ཅིག་ཏུ་རྟོགས་པར་བྱ་སྟེ། དཔེར་ན། སྣོད་གསེར་གྱིས་བཀང་ཞིང་གཏེར་དུ་སྦས། བློ་སྟོབས་ཆེ་ཞེས་བཤད་ནའང༌། དོན་དེ་གལ་ཆེན་ཡིན་ཞེའོ། །ཆོས་རྣམ་དག་གསུང་ཞེ་ན་མཉན་པར་བྱ། འཆི་སོས་སྨན་ཞིག་ཁྱོད་ལ་ཡོད་དམ། ལྟ་བུས་མཚོན་ནས་གཞན་དག་ཀྱང་རིགས་བསྒྲེ་བར་བྱའོ། །རྒྱུག་ཆུ་བཀག་ཅིང་ཁྲུས་བྱས། ཡོན་ཏན་སློབ་ཅེས་ཡང་ཡང་བཤད། དབེན་པའི་གནས་འདིར་འདུག་ཅེའོ། །བྱ་བ་མཐར་ཕྱིན་པར་བྱེད་ཅེ་ན་དེ་ལྟར་གྱིས། བཀའ་ལན་སྐུརད་ཅིག  ལྟ་བུ་དང༌། དེ་ལྟར། གསུངས་ཤིང༌། ཁོ་ལ་དགོས་ཤེའོ། །བྱ་བ་ལེགས་ཤེ་ན། མིག་གིས་ལྟོས་ཤིག་ལྟ་བུ་དང༌། དམིགས་བསལ་ས་མཐར། དཔེར་ན། ཡོན་ཏན་ཆུང་རྣམས་ང་རྒྱལ་ཆེ། །མཁས་པར་གྱུར་ན་དུལ་བར་གནས། །ཞེས་དང༌། ཆུ་ཕྲན་རྟག་ཏུ་ཀུ་ཅོ་ཆེ། །རྒྱ་མཚོས་ཅ་ཅོ་ག་ལ་སྒྲོགས། །ཞེས་གསུངས་པ་ལེགས་བཤད་དོ། །ལྟ་བུ་སོགས་ལ་ཞེས་སྦྱར་བ་བདེའོ། །འོན་ཀྱང་སྐབས་འགར། ཁ་ཅིག་དང༌། ལྷན་ཅིག ཆབས་ཅིག་སོགས་ཀྱི་ཅིག་གི་སྒྲ་རྣམས་ནི་མིང་གི་ཆ་ཤས་ཙམ་ཡིན་པ་ལས། ཕྲད་མིན་པས་དེ་རྣམས་དང་མ་ནོར་བར་འཛིན་པ་ནི་ཤིན་ཏུ་གཅེས་སོ།།

གཉིས་པ། འ་མཐའ་འདོར་ལེན་བྱེད་ཚུལ།

རྐྱང་པ་འཕུལ་ལ་འ་མཐའ་དགོས། །གུག་ཀྱེད་བརྩེགས་འདོགས་ཅན་ལ་སྤང༌།།

ཞེས་པས་བསྟན་པ་ལྟར། དབྱངས་བཞི་དང༌། མགོ་འདོགས་སོགས་མེད་པའི་མིང་གཞི་རྐྱང་པ་ལ། སྔོན་འཇུག་གང་རུང་གི་འཕུལ་ཅན་རྗེས་འཇུག་གཞན་མེད་པ་རྣམས་ལ་ངེས་པར་འ་མཐའ་སྦྱོར་དགོས་ཏེ། དཔེར་ན། དགའ། གདའ། མངའ། མདའ་ལྟ་བུ་དག་ལ་འ་མཐའ་མ་སྦྱར་ན་མིང་གཞི་རྗེས་འཇུག་ཏུ་འཁྲུལ་ནས་དག་དང་གད་ལྟ་ བུ་འབྱུང་སྲིད་པས་འ་མཐའ་སྦྱར་བར་བྱའོ། །ཡང་གུག་ཅེས་པས་གི་གུ་ཞབས་ཀྱུ་ཅན་གཉིས་དང༌། ཀྱེད་ཅེས་པས་འགྲེང་བུ་རྣ་རུ་ཅན་གཉིས་དང༌། བརྩེགས་ཞེས་པས་ར་ལ་ས་གསུམ་གྱི་མགོ་ཅན། འདོགས་ཞེས་པས་ཡ་ར་ལ་ཝའི་འདོགས་ཅན་བཅས་ལ་འ་མཐའ་སྤང་དགོས་ པ་ཤེས་པར་བྱ་སྟེ། དཔེར་ན། མི། ཀྱེ། མགོ མགུ། སྒོ། རྔ། རྒྱ། དགྲ། ཉྭ་ལྟ་བུ་རྣམས་ལ་དོན་དུ་འ་མཐའ་ཡོད་ཀྱང་སྐད་གསར་བཅད་ཀྱི་སྐབས་སུ་འཁྲུལ་གཞི་ མེད་པ་དང༌། ཡིག་ཟོར་ཡང་པའི་ཆེད་དུ་འ་མཐའ་བསྡུས་ཏེ་དངོས་སུ་སྦྱོར་མི་དགོས་པར་བྱས་པའོ།།

གསུམ་པ། ཚེག་དང་ཤད་སྦྱོར་ཚུལ།

ལྷུག་པའི་དོན་མང་མིང་མཚམས་དང༌། །དོན་འབྲིང་འབྱེད་དང་དོན་ཉུང་རྫོགས།།

ཚིགས་བཅད་ག་མཐར་ཆིག་ཤད་བྱ། །རྫོགས་ཚིག་མཐའ་ཅན་ལྷུག་པ་དང༌།།

ཚིགས་བཅད་རྐང་མཐར་ཉིས་ཤད་འཐོབ། །  དོན་ཚན་ཆེན་མོ་རྫོགས་པ་དང༌།།

ལེ་འུའི་མཚམས་སུ་བཞི་ཤད་དགོས། །ང་ཡིག་མ་གཏོགས་ཡིག་ཤད་བར།།

ཚེག་མེད་དེ་སོགས་ཞིབ་ཏུ་འབད།།

ཅེས་པ་ལྟར་ཚིག་ལྷུག་པའི་སྐབས་སུ་བརྗོད་བྱའི་དོན་མང་པོའི་མིང་གི་མཚམས་རྣམས་སུ་ཤད་རེ་འཐོབ་པ་དང༌། དོན་འབྲིང་སོ་སོར་འབྱེད་པའི་མཚམས་དང་དོན་ཉུང་རྫོགས་མཚམས་དང༌། ཚིགས་བཅད་ཀྱི་རྐང་པའི་ག་ཀ་ཤ་དག་མཐར་བྱུང་ཚེ་ཆིག་ཤད་རེ་སྦྱར་བར་བྱ་ཞིང༌། དེ་དག་དཔེར་ན། དོན་མང་མཐར། མིག རྣ། སྣ། ལྕེ། ལུས། ཡིད་ལྟ་བུའོ། །དོན་ཉུང་མཐར། མིག་གིས་མཐོང༌། རྣ་བས་མཉན་བྱ། སྣ་ཡིས་དྲི་སྣོམ། ལྟ་བུའོ། །ཚིགས་བཅད་ག་སོགས་མཐར། ཀྱེ་མ་འདུས་བྱས་ཆོས་མི་རྟག ། རྟག་པར་འདོད་པ་ལོག་རྟོག་གོ ། ལྟ་བུའོ། །རྫོགས་ཚིག་གི་མཐའ་ཅན་གྱི་ཚིག་ལྷུག་པ་དང་ཚིགས་བཅད་ཀྱི་རྐང་མཐར་ཉིས་ཤད་རེ་འཐོབ་སྟེ། དཔེར་ན། ཚིག་ལྷུག་སྐབས། སུམ་རྟགས་དག་གསུམ་བོད་རང་གི་བརྡ་སྤྲོད་པ་ཡིན་པས་ལེགས་པར་སློབ་དགོས་སོ། །ཚིགས་བཅད་སྐབས། དེ་དག་བདག་གིས་བསླབ་པར་བྱ། །ལྟ་བུའོ། །གཞུང་སོགས་ཀྱིས་དོན་ཚན་ཆེན་མོ་རྣམས་རྫོགས་པ་དང༌། རབ་བྱེད་དང་སརྒ་ལེའུའིམཚམས་རྣམས་སུ་བཞི་ཤད་རེ་སྦྱར་དགོས་ཏེ། དཔེར་ན། སུམ་ཅུ་པའི་གཞུང་དོན་བཤད་ཟིན་ཏོ།། །།རྟགས་འཇུག་གི་བརྗོད་བྱ་ཡོངས་སུ་རྫོགས་སོ།། །།ལྟ་བུ་དང༌། ལེའུ་སྟེ་བརྒྱད་པའོ།། །། ལྟ་བུ། གཙོ་ཆེར་ལག་ལེན་སྐབས་དབུ་ཅན་སོགས་སྐབས་འགར་ང་ཡིག་ལ་ཤད་ཀྱི་བར་དུ་ཚེག་ཡོད་པ་མ་གཏོགས། གཞན་པའི་ཡིག་ཤད་ཀྱི་བར་ན་ཚེག་མེད་པར་བྱ་སྟེ། དཔེར་ན། བསླབ་པ་ཀུན་ཀྱི་གཞི་འཛིན་ཅིང༌། །རིག་བྱེད་སྨྲ་བ་རྣམས་ཀྱི་རྒྱུ། །ཞེས་སོགས་ཚེག་ཡོད་མེད་ཀྱི་ཁྱད་པར་དེ་ལྟ་བུ་ཡོད་པ་སོགས་ཞིབ་ཏུ་འབད་ནས་ རྟོགས་པར་བྱའོ། །ཡིག་ཕྲེང་སོ་སོའི་མགོ་རྣམས་སུ་ཚིག་གྲོགས་མེད་པའི་ཚེག་བར་གཅིག་ཅན་གྱི་ཡི་ གེ་བྱུང་བ་རྣམས་ལ། ༑ ཚུགས་ཐུབ་པའི་ཕྱིར་རིན་ཆེན་སྤུངས་ཤད་སྦྱར་བ་དང༌། སྐབས་དོན་གཞན་དག་གི་མགོ་འཛིན་པའི་ཚེ་ཤད་ཀྱི་བར་སོགས་ལ། ༈ སྦྲུལ་ཤད་སྦྱར་དགོས་པ་རྣམས་ཀྱང་ཞར་ལས་རྟོགས་པར་བྱ་དགོས་སོ།།

གསུམ་པ་མཇུག་གི་དོན།

ཚིག་གི་ལོ་མས་མ་བསྒྲིབས་ཤིང༌། །དོན་གྱི་འབྲས་བུ་གཡུར་ཟ་བའི།།

ལེགས་བཤད་ལྗོན་པའི་དབང་པོ་འདི། །དབྱངས་ཅན་གྲུབ་པའི་རྡོ་རྗེས་སྤེལ།།

ཞེས་པ་སྟེ་རྟོགས་པར་དཀའ་བ་སོགས་རྗོད་བྱེད་རབ་རིབ་ཀྱི་ཚིག་གི་ལོ་མས་མ་བསྒྲིབས་ཤིང༌། བརྗོད་བྱ་དོན་གྱི་འབྲས་བུ་ཡང་དག་པ་རྣམས་གཡུར་དུ་ཟ་བའི་ལེགས་པར་བཤད་པའི་བསྟན་བཅོས་ལྗོན་པའི་དབང་པོ་ཞེས་བྱ་བ་འདི་ཉིད། ཀུན་བཤད་ཀྱི་མིང་དུ་དབྱངས་ཅན་གྲུབ་པའི་རྡོ་རྗེ་ཞེས་མཚན་དོན་དང་ལྡན་པ་གང་གིས་གཞན་ལ་ཕན་པའི་ལྷག་བསམ་དཀར་པོས་སྤེལ་བའོ། །སུམ་ཅུ་པའི་བསྟན་བཅོས་ཀྱི་སྙིང་པོ་ལེགས་བཤད་ལྗོན་པའི་དབང་པོའི་ཚིག་འགྲེལ་ ཙམ་རེ་ཞིག་བཤད་ཟིན་ཏོ།། །།

སྨྲས་པ།

སྡེབ་སྦྱོར་ཚིག་གི་སྤྲས་པས་འདི་མ་བཅིངས། །དེ་ཕྱིར་རྟོགས་དཀའི་བསྟན་བཅོས་འདི་ཉིད་མིན།།

སྙན་ཚིག་སྒྲ་ཡི་རྒྱུད་དུ་འདི་མ་བཀུག ། དེ་ཕྱིར་གྲགས་པའི་རིན་ཐང་འདི་ལ་མེད།།

དགག་སྒྲུབ་བམ་བཤད་ཚིག་གི་ན་བུན་ཁྲོད། །རང་ལུགས་གསར་དུ་འཇོག་པའི་ལས་མ་བརྩམས།།

ཟླ་མེད་མཁས་པའི་གསུང་གི་རྗེས་འབྲངས་ནས། །བློ་ལྡན་དག་ལ་ཕན་ཕྱིར་ངས་འདི་བྲིས།།

འོན་ཀྱང་རྣམ་དཔྱོད་བྱེའུ་ཆུང་གཤོག་རྩལ་གྱིས། །བརྡ་སྤྲོད་རིག་པའི་མཁའ་ལམ་མི་ཆོད་པས།།

ཇི་བཞིན་མ་རྟོགས་འོལ་ཚོད་བྲིས་པ་ཡི། །ནོངས་པ་ཀུན་ཀྱང་གཟུར་གནས་སྤྱན་སྔར་བཤགས།།

ཞེས་སུམ་ཅུ་པའི་སྙིང་པོ་ལེགས་བཤད་ལྗོན་པའི་དབང་པོའི་འགྲེལ་བ་ལེགས་བཤད་ཉི་ མའི་འོད་སྣང༌། འདི་ཉིད་བླ་རུང་ལྔ་རིག་སློབ་གླིང་རིག་གནས་འཛིན་གྲྭའི་རང་དང་སྐལ་བ་མཉམ་པའི་ གསར་སློབ་འགའ་ཞིག་ལ་དཔེ་ཁྲིད་བྱེད་སྐབས། དེ་དག་འགས་བསྐུལ་ངོར་མ་བཟློགས་ཙམ་དུ་གངས་ལྗོངས་མཁས་དབང་འདུས་པའི་གྲོང་ཁྱེར། བླ་རུང་ལྔ་རིག་ཆོས་ཀྱི་ཞིང་ཁམས་ཀྱི་འདོད་དགུ་ཀུན་འབྱུང་གླིང་གི་བྱ་འདབ་རང་ གནས་སྐྱིད་པའི་ལྡིང་ཁང་དུ་ཐ་ཤལ་བ། རྨེ་གྲྭ་ཚེ་རིང་བསམ་འགྲུབ་ཏུ་འབོད་པས་རབ་བྱུང་བཅུ་བདུན་པའི་ཤིང་བྱ་ལོའི་ཆུ་ སྟོད་ཟླ་བའི་དཀར་ཕྱོགས་ལ་ས་སྙིང་དུང་སྒྲུབ་ཆེན་མོའི་སྐབས། མཚན་མོའི་ཀུན་འབྱུང་གློག་གི་འོད་ལ་བརྟེན་ནས། གློག་རྡུལ་རྩིས་འཕྲུལ་དུ་སོར་རྩེའི་འདབ་མ་གར་དུ་བསྒྱུར་ནས་གྲུབ་པར་བྱས་པ་འདིས་ཀྱང་གཞན་ལ་ཕན་པར་གྱུར་ཅིག ། དགེའོ།། །།