གཤིན་གྱི་ཕྱོགས་འདོན་རྡེའུ་བཅུ་བདུན་མ་བཞུགས་སོ།།
དེ་ཡང་ ༡༽ ཐོག་མར་ལོ་ཟླ་ཞག་དུས་བཞིའི་རྡེའུ་བཞི། ༢༽ དེ་བཞིན་ཧལ་ཁྱིའི་རྡེའུ་བཞི། ༣༽ བླ་མཁྱེན་གྱི་རྡེའུ་བཞི། ༤༽ ཟིན་ཕུང་དྲུག་འགྲས་ཀྱི་རྡེའུ་གཅིག། ༥༽ ས་བདག་འཕར་བ་མགོ་དགུའི་རྡེའུ་གཅིག། ༦༽ གཤིན་ལོའི་ཐོག་རྡེའུ་གཅིག། གསོན་ལོའི་ཐོག་རྡེའུ་གཅིག། གཤིན་ལོའི་སྲོག་གི་དགྲ་ཕྱོགས་སུ་རྡེའུ་གཅིག་བཅས་བཅུ་བདུན་ནོ།།
ཀེག་རྩིས་ལོ་མོའི་འགྲེལ་བཤད་རྒྱས་པ། ༼ཀེག་རིགས་དང་རྡེལ་འབྲས།༽
ཕྱོགས་བསྒྲིགས།
༈ རང་ལོ་གནམ་ལོ་ཤར་བའི་སྐབས། །རང་ཀེག་དག་གི་རྩུབ་པ་སྟེ། །མྱ་ངན་མི་བསང་ནད་པ་ཡི། །སྔས་མི་འགྲོ་ཞིང་མཁར་ལས་དང་། །གཡེང་སྤང་དགེ་སྦྱོར་ས་འབད་ཅིང་། །ཚེ་དབང་ཞུ་ཞིང་ཚེ་གཡང་འགུགས། །དགེ་འདུན་འདུས་སྡེར་བསྙེན་བཀུར་ཞིང་། །འབུམ་དང་ཉེ་ཁྲི་གཙུག་ཏོར་དང་། །གདུགས་དཀར་ཏོག་གཟུངས་ལ་སོགས་འདོན། །བརྒྱ་བཞི་དང་ནི་ཀེག་བཟློག་བྱ།། ༈ བྱེ་བྲག་བཅུ་གསུམ་བུ་ཐོག་ཀེག །འབྱོར་པ་དགྲ་ལྡང་ལུས་དབང་གཙོ། །སྣང་བརྒྱད་བཟུང་ཆེན་གྲྭ་ལྔ་འདོན། །དཔལ་བསྐྱེད་དགྲ་བཟློག་དགྲ་མནན་བྱ།། ༈ ཉེར་ལྔ་གྲོགས་ཐོག་དབུགས་གསོའི་ཀེག །ཕོ་སྲོག་བུད་མེད་དབང་ཐང་གཙོ། །ཏོག་གཟུངས་རྣམ་འཇོམས་ཚེ་མདོ་བཀླག། ༈ སོ་བདུན་དགྲ་ཐོག་བདུད་གཅོད་ཀེག། །འདྲེ་ངན་ཀེག་ཡིན་དབང་ཐང་གཙོ། །ཤེར་ཕྱིན་ཏོག་གཟུངས་ཚེ་གཟུངས་འདོན། །སྲོག་བསླུ་འཆི་བསླུ་གོད་མནན་བྱ།། ༈ ཞེ་དགུ་མ་ལ་དཔལ་བབས་ཀེག །ཚོང་གྲོགས་ཁ་རྗེ་ཆེ་བ་ཡིན། །ཀླུང་གཙོ་རིམ་གྲོ་གཞན་དང་བསྟུན།། ༈ རེ་གཅིག་རང་ཐོག་བྱེ་བྲལ་དང་། །ན་ཚ་འབྱུང་ཤིང་སྲོག་ཁམས་གཙོ། །བྱེ་བྲལ་གཏོ་དང་སཱཙྪ་གདབ། །འབུམ་འདོན་ནད་བཟློག་བྱུར་འབུད་བྱ།། ༈ དོན་སུམ་གོང་གི་བཅུ་གསུམ་མཚུངས། །ཕོ་ལ་བདུན་བསུ་མོར་ཕྱིར་བསྐྱལ། །རང་ཐོག་ཀུན་ལའང་གཅེས་པར་བཟུང།།
འབྱུང་རྩིས་ཟླ་ཟེར།
ལེའུ་དང་པོ། སྐོར་འགོ་སྤྱིའི་རྣམ་གཞག།
༄༅། །འབྱུང་རྩིས་མན་ངག་ཟླ་བའི་འོད་ཟེར་ཞེས་བྱ་བ།
བླ་མ་དང་རྗེ་བཙུན་འཇམ་པའི་དབྱངས་ལ་ཕྱག་འཚལ་ལོ། །ཇི་ལྟའི་གནས་ལུགས་མངོན་གཟིགས་ནས། །ཇི་སྙེད་ཐུགས་རྗེའི་གཞན་དབང་གིས། །འགྲོ་ལ་ཕན་བདེའི་འཕྲིན་ལས་ཅན། །གཏེར་ཆེན་བླ་མ་ལ་ཕྱག་འཚལ། །མཁྱེན་བརྩེའི་ཆུ་སྐྱེས་ཀེ་ས་རར། །རབ་སྙན་ལེགས་བཤད་བུང་བའི་དབྱངས། །བསྒྱུར་མཁས་རྒྱལ་སྲས་གཞོན་ནུའི་སྐུ། །འཇམ་པའི་དབྱངས་ལ་ཕྱག་འཚལ་ལོ། །ཞུ་འཕྲུལ་ལེན་འཆང་སྐྱེས་བུ་ནི། །བཞི་ཚན་བཞི་དང་དུ་ཧ་ར། །ལོ་པཎ་དམར་ནག་ཁྲ་གསུམ་དང་། །ཁྱུང་ཕུག་བརྒྱུད་པར་བཅས་ཀུན་རྒྱལ། །བདག་བློའི་ཡོལ་གོ་དཀར་ནག་གི །རྩིས་རིག་བདུད་རྩིས་འགེངས་མཛད་པ། །རྒྱལ་སྲས་མཆོག་དང་ཟླུམ་ཆེན་རྗེ། །རྒྱ་སྟོན་རྣམས་ལའང་དྲིན་ཕྱག་འབུལ། །མང་ཐོས་ཉི་མ་དང༌བྲལ་བའི། །འགྲོ་བློའི་མཚན་མུན་བསལ་བའི་ཆེད། །འབྱུང་བ་རྩིས་ཀྱི་མན་ངག༌གནད། །གཅེས་བཏུས་ཟླ་བའི་འོད་ཟེར་སྤྲོ།།
སྐབས་འདིར་ལོ་འགོ་འཛིན་ཚུལ་དང་འབྲེལ་བའི་རང་ལུགས་འབྲུག་པའི་ལོ་གསར་གྱི་སྐོར་མདོར་བསྡུས་ཙམ་ཞིག་ཞུ་ན།
༡ ལོ་གསར་གྱི་ནང་ནས་དང་ཤོས་ནི། བྱག་འོག་སྐར་མ་ཉ་རུབ་གྱི་ལོ་གསར་བརྩི་སྲོལ་འདི་ཡིན་ལ། འདིའི་སྐར་མ་ཉ་རུབ་ཀྱི་དོན་ནི། སྐར་མ་ཞེས་པ་སྐར་མ་སྨིན་དྲུག་དང་། ཉ་ཞེས་པ་ཚེས་པ་བཅོ་ལྔའི་ཟླ་བ། རུབ་ཅེས་པ་མཉམ་དུ་འཛོམས་པའི་དོན་ཡིན། དེ་ཡང་ཟླ་བ་བཅུ་པའི་ཚེས་པ་བཅོ་ལྔའི་མཚན་མོ་སྐར་མ་སྨིན་དྲུག་དང་ཟླ་བ་གཉིས་མཉམ་དུ་འཛོམས་པས་དེའི་ཉིན་མོ་ནས་ལོ་གསར་བརྩི་བ་ཡིན། ཡིན་ན་ཡང་དོན་ངོ་མ་ནི་དམ་ཆོས་འདུལ་བ་དང་། རྒྱ་གར་གྱི་ལུགས་ལྟར་ཟླ་བ་བཅུ་པའི་ཚེས་པ་བཅོ་ལྔ་དེ་ནས་ལོ་རྫོགས་པ་དང་། དེའི་ཕྱིས་ཉིན་ཚེས་པ་བཅུ་དྲུག་སྟེ། སྨིན་དྲུག་ཟླ་བའི་མར་ངོའི་ཚེས་པ་གཅིག་ནས་ལོ་འགོ་བཙུགས་པ་ཡིན་པས་དེའི་ཤུགས་རྐྱེན་གྱིས་སྐར་མ་ཉ་རུབ་ཀྱི་ལོ་གསར་འདི་བྱུང་བ་ཡིན།
