༈ རང་ལུ་ཁྲུས་ཀྱི་བདུད་རྩི་བབས་ཏེ་གིས།
།སྒོ་གསུམ་སྒྲིབ་པ་སྦྱངས་པའི་དགའ་སྟོན་ལུ།།
གཞན་གྱི་ཤ་ལས་གྲུབ་པའི་དམར་ཟས་ཚུ།
།ལོངས་སུ་སྤྱོད་དེ་སྡིག་པ་བསགས་མ་ད།།
༈ འགྲོ་བ་མི་འདི་ཤ་ཟའི་རིགས་མེན་པར།
།དཀར་ཟས་ཅན་གཅིག་ཨིན་པའི་རྒྱུ་མཚན་ཡོད།།
ཁ་ལུ་མཆེཝ་དང་ལག་པར་སྡེར་མོ་མེད། །ཟས་བཞུའི་སྐྱུར་རྩི་ཉུང་ཞིང་རྒྱུ་མ་རིང་།།
ཤ་ཟན་དེ་ཚུ་འདི་ལས་ལྡོག་སྟེ་གིས།
།སྡེར་ཞགས་རྐྱབ་སྟེ་མཆེཝ་གིས་རྨུག་ནི་དང་།།
རྒྱུ་མ་མཐུང་རུང་ཟས་བཞུའི་སྐྱུར་རྩི་གིས།
།ཡུདཔ་ཐེངས་གཅིག་ནང་ཞུ་སྟེ་གཏངམ་ཨིན་མས།།
༈ དཀར་ཟས་ཅན་རྣམས་ཚེ་རིང་ན་ཚ་ཉུང་།
།རྒྱ་གར་བྲམ་ཟེ་ལོ་བརྒྱ་ལྷག་ནས་བཞུགས།།
དམར་ཟས་ཅན་ཚུ་ཚེ་མཐུང་ན་ཚ་མང་། །ཕྱི་གླིངཔ་མགྱོགས་པར་རྒས་མི་དེ་མེན་ན།།
༈ ཤ་ཡི་དོན་ལུ་གསོ་བའི་སེམས་ཅན་ཚུ།
།སྦོམ་ནིའི་དོན་ལུ་སྨན་རིགས་སྣ་ཚོགས་སྦྱིན།།
སྡོད་ས་འཆམ་ས་མེད་པའི་ཁང་མིག་ནང་། །ལུས་ཀྱི་ལྗིད་ཚད་རྐངམ་གྱིས་འབག་མ་ཐེག།
དམྱལ་བའི་སྡུག་བསྔལ་གསོན་པོར་མྱོང་སྟེ་གིས། །སེམས་ཀྱི་ན་ཚ་ལུས་ཀྱི་ཤ་ལུ་ཐིམ།།
འཇིགས་སྐྲག་ངང་ལུ་བསད་པའི་ཤ་ལུ་ཡང་།
།མི་རུལ་ཆེད་དུ་རུལ་འགོག་སྨན་རྫས་བླུགས།།
དེ་ཚུ་རང་གི་ཁ་ནང་འཛུལ་བའི་ཚེ།
།བྲོ་བ་ལྕེ་ཡི་ལྟག་ལུ་ཡུད་ཐེངས་གཅིག།
ཁོག་པར་གཅིག་ཤུལ་གཉིས་ཤུལ་བརྩེགས་པའི་ཚེ། །ཕན་པ་ཉུང་བའི་གནོད་པ་དོས་ཁུར་གཅིག།
ན་ཚ་ལུས་ལུ་ཡོད་པར་མི་ཤེས་པར། །ཕྱི་ཡི་གདོན་དང་བགེགས་ཀྱིས་གནོད་ནུག་ཟེར།།
རིམ་གྲོའི་དོན་ལུ་དངུལ་ཀྲམ་ཁྲི་ཕྲག་ལྷག
།བསྒོམ་ཆེན་སྐྱུར་དྲི་ཅན་གྱི་ཞལ་ལུ་བཏབ།།
༈ ཤ་ལ་དགའ་བས་རང་གི་སྙིང་རྗེ་ཟད། །རགས་པའི་ཟས་ཀྱིས་ནང་ན་ང་རྒྱལ་སྐྱེས།།
གཞན་གྱི་སྲོག་དེ་ཡང་ཡང་ཤོར་བའི་ཚེ།
།སྡིག་པའི་བགས་ཆགས་སེམས་ཀྱི་སྟེང་ལུ་ལུས།།
སྐྱེ་བ་ཕྱི་མར་ཉམ་ཐག་ལུས་ལུ་སྐྱེས།
།དོན་དག་མེད་པར་གཞན་གྱིས་རང་ལུ་སྡང་།།
ཐ་ན་རང་གི་སྲོག་ཡང་ཤོར་དགོ་པའི། །གནས་ཚུལ་འབྱུང་ན་འདྲོགས་ནི་མིན་འདུག་ག།
No comments:
Post a Comment