ཀ་རྩོམ།

འཁོར་བའི་བུ་ཆུང་གི་ཀ་རྩོམ།

ཀ་ལ་རྫམ་ནང་བླུགས་ཏེ་འཐུང་རུང་ར།།ཁ་ལུ་ཚིམ་ནི་མེད་པའི་ཨ་རག་འདི།།

ག་དེ་འབད་རུང་སྤང་ར་སྤང་དགོ་པས། །ང་ལུ་སྤང་ནིའི་ཐམས་ལམ་སྟོན་གནང་མས།།

ཅ༌ཅོ་ཟང་ཟིང་ཆེ་བའི་ཆང་ཁང་ནང་།།ཆ་རོགས་གཞན་ཚུ་གསོལ་ཇ་འཐུང་པའི་སྐབས།།
ཇ་ལས་ཆང་རང་གདམ་ཁ་རྐྱབ་མི་ང་།།ཉ་སྐམ་བཟུམ་སྦེ་གཟུགས་ཡང་བསྐམ་ཚར་དོ།།

ཏ་བག་འདྲ་བའི་བུ་ངིའི་ཕོ་བའི་ནང་།།ཐ་གྲུ་མེད་པར་སྨྱོ་ཆང་འདེགས་བཞག་སྟེ།།
ད་ཆའི་མི་ཚེ་སྟོང་ལོག་གཏང་མི་ང་།།ན་འཐན་དཔྱད་ན་ང་ལས་སྐྱོཝ་ཅིག་མེད།།

པ་ལང་ནང་གི་ཆང་ལུ་སེམས་ཆགས་ཏེ།།ཕ་མ་སྤུན་ཆ་སེམས་ཁར་མ་དྲན་པའི།།
བ་གླང་འདྲ་བའི་འཁོར་བའི་བུ་ཆུང་ང་།།མ་བཟང་བུ་བརྒྱུད་ཨིན་རུང་དོན་མིན་འདུག།

ཙ་ཀ་ཙི་ཀི་ཐོབ་མིའི་དངུལ་བཀྲམ་ཚུ།།ཚ་གྱང་མེད་པར་ཆང་རིན་སྤྲོད་ཚརཝ་ད།།
ཛ་རག་འདྲ་བའི་ཕོཝ་ནང་ལྟོ་མེད་པར།།ཝ་མོ་བཟུམ་སྦེ་བཟའ་འཐུང་འཚོལ་དགོ་པས།།

ཞྭ་གོས་ཉོ་ནིའི་དངུལ་ཡང་ཆང་རིན་སྤྲོད།།ཟ་ནིའི་རིགས་ལས་འཐུང་ནི་དེ་རང་འཚོལ།།
འ་རི་འུ་རི་ཚབ་ཚུབ་ཐབ་ཐོབ་སྦེ།།ཡ་མཚན་ཆེ་བས་བུ་ངེའི་འབད་གཞག་འདི།།

ར་བཟི་སེམས་ཁམས་དཀྲུགས་པའི་རྫད་ངན་ཚུ།།ལ་ལུང་རྒྱབ་ལུ་ཡོད་རུང་འཚོལ་ཐབས་སྟོན།།
ཤ་ཞེན་མེད་པའི་མི་ངན་ང་བཟུམ་ཅིག།ས་སྟེང་འདི་ནང་གཞན་ཡང་ཡོད་ག་སྨོ།།

ཧ་བེ་ཧོབ་བེ་བུ་ངེའི་འབད་གཞག་འདི།།ཧ་ཧ་མི་རྣམས་དགོད་བྲོའི་གཞི་ཅིག་མས།།
ཨ་ཁའི་ང་བཟུམ་མི་ངན་བཀྲ་ངན་འདི།།ཨ་ཧོ་ཤི་རུང་སྡོད་རུང་དོན་མིན་འདུག།

སྤྲང་འཁྱམས་པོ་འཁོར་བའི་བུ་ཆུང་གིས་དགོད་བྲོའི་ཚུལ་དུ་ ༢༣/༡༢/༢༠༡༤ ལ་བྲིས་པ་དགེ།