སྐྱེས་རྩིས་ཀྱི་དཔེ། ༼བུ་མོ་སངས་རྒྱས་ཆོས་འཛོམས་ཀྱི་སྐྱེས་རྩིས།༽

༄༅།   །ཀུན་རྫོབ་བསླུ་མེད་རྟེན་འབྱུང་འབྲས། །སྣ་ཚོགས་ལམ་ནས་གསལ་མཛད་པ།།

ས་བཅུའི་དབང་ཕྱུག་འཇམ་པའི་དཔལ། །ལུང་བསྟན་འཆད་ལ་གཤིས་པ་སྩོལ།།

འཕེན་བྱེད་རྣམ་དག་ཚུལ་ཁྲིམས་གཙང་མ་ཡིས། །བདེ་འགྲོ་མི་ཡི་ལུས་རྟེན་འདིར་འཕངས་པ།།

སངས་རྒྱས་ཆོས་འཛོམས་ཁྱོད་ལ་རྫོགས་བྱེད་གང་། །སྐྱེས་པའི་རྟེན་འབྲེལ་ལས་ནི་བརྟག་པར་བྱ།།

༼༡༽ རེས་གཟའ་མིག་དམར་ལ་སྐྱེས་པས། །ཤེས་རྒྱུད་རྩུབ་ཅིང་ང་རྒྱལ་ཆེ། །དབྱེན་དང་སྡིག་ལ་དགའ་བ་དང་། །ཟས་ནོར་དམར་པོའི་རིགས་རྣམས་འཕྲོད།། ༼༢༽ ཡར་ངོ་རྫོགས་པ་དང་པོའི་འབྲས། །ཆོས་ལ་དགའ་ཞིང་འཆི་བའི་ཉན།། ༼༣༽ རྒྱུ་སྐར་ལྷ་མཚམས་ལ་སྐྱེས་པས། །དཀར་པོའི་ཆོས་ལ་སྤྱོད་པ་དང༌།། ནོར་ལྡན་ཚིག་འཇམ་བྱེས་འགྲོ་བཟང༌། །ཁྲིམས་གཙང་ཤེས་ལྡན་གཟུགས་བཟང་ཞིང༌། །ཉེར་བརྒྱད་ལས་བརྒལ་ཡུན་དུ་གནས།། ༼༤༽ ཉི་ཟླ་བསྲེས་པའི་རྣམ་སེལ་གྱིས། །གཞན་ལ་ཕན་པའི་བྱ་བར་བརྩོན།། ༼༥༽ ཕྱི་ཆའི་བྱེད་པ་བྱིས་པ་ཡིས། །རྒན་ལ་བསྙེན་བཀུར་ཞབས་ཏོག་བཟང་།།

༈  ད་ནི་ལོ་ཟླ་ཞག་སོགས་ཀྱི། །འབྱུང་རྩིས་འགྲེལ་བཤད་མདོར་ཙམ་འཆད།། ༼༡༽ རྟ་ཡི་ལོ་ལ་སྐྱེས་པས་ན། །རྫུ་འཕྲུལ་ཤུགས་ལྡན་བརྩོན་འགྲུས་ཆེ། །གཞན་གྱི་དབང་དུ་མི་འགྲོ་ནའང་། །རང་དོན་བཞག་ནས་གཞན་དོན་གཉེར། །ནད་གཞི་རླུང་དང་བད་ཀན་ལྡང་། །ཚེ་སྨད་ཤིན་ཏུ་སྐྱིད་པ་འོང་།། ༼༢༽ དགུན་ར་ཕག་ལ་སྐྱེས་པས་ན། །གཉིད་ཆེ་ཁ་ཟས་ཕྲན་ལ་དགའ། །སྨྲ་ཚིག་གྱོང་ལ་བཞིན་འཛུམ་ནག །ཁ་གསག་ཆེ་ལ་བཟོད་བསྲན་ཆུང་།། ༼༣༽ ཕག་གི་ཞག་སྐྱེས་དྲིན་ལན་ཆུང་། །ངོ་ནག་ཁོག་གྱོང་ཚིག་མི་བཙན།། ༼༤༽ ལུག་གི་དུས་སྐྱེས་ཁ་སྨྲས་མང་། །གཞན་དང་འཐབ་རྩོད་མང་བ་ཡིན།། ༼༥༽ སྐྱེས་སྤར་ཁམ་སྐྱེས་ཞེ་འཁོན་བྱུང་། །ཕ་མར་མཐུན་དཀའ་ན་ཚ་མོད།། ༼༦༽ བཞི་ལྗང་སྐྱེས་པ་ཚེ་སྔོན་ཀླུ། །གདོང་དང་ལག་གཡོན་སྨེ་ཞག་ཡོད། །བྱོལ་སོང་སྐྱེ་དོགས་ཕྱག་རྡོར་བཞེངས། །ས་ཚྪ་བཏབ་ན་ཕྱུག་པོར་སྐྱེ། །མི་གཙང་ཟས་གོས་འཛེམ་པ་དང་། །ཀླུ་ལ་མཆོད་ན་དངོས་གྲུབ་འབྱུང་།།

༈ གཞུ་ཁྱིམ་ལ་སྐྱེས་ལོ་ཟླ་ཞག །བཅོ་བརྒྱད་གྲངས་ལ་ཆག་ཐལ་ན། །བདུན་ཅུ་འཚོ་ཞིང་དབྱར་འབྲིང་ངམ། །དགུན་རའི་བཅོ་ལྔ་སྐར་བར་ཆད་འོང་། །དེ་མིན་ཚུལ་ཁྲིམས་ལྡན་པ་དང་། །ལོངས་སྤྱོད་ཆེ་ཞིང་གཏོང་ལ་དགའ།།  

༈ དུར་སར་ཕུར་བུ་ཤར་བ་ན། །དུར་སྒོ་ལངས་པས་བསང་བསུར་གཏོང། །རྙེད་དང་སྟོར་བའི་ས་ལ་ནི། །ཞི་དྲག་འདྲེས་པས་གང་སྟོང་མེད། །གྲོགས་སར་དུས་མེ་གནས་པ་དང་། །དྲག་གཟའ་གཉིས་ཀྱིས་དེ་ལ་མཐོང་། །གཞན་ལ་ཕན་པ་ཅི་བྱས་ཀྱང་། །དགྲ་བོའི་གནོད་པ་རྒྱུན་མི་ཆད། །ལས་སར་སྡིག་ཅན་དྲག་པོས་འཁྱུད། །གློ་བུར་དགྲ་འོང་དོན་མི་འགྲུབ། གཏོར་བཟློག་དྲག་པོ་བྱ་བ་དང་། །ཕྱྭ་འགུག་གཡང་འགུག་བྱ་བར་གཅེས།། སྐྱེས་རྟགས་དཔུང་པར་གནས་པ་ན། །ཁུར་པོར་འགྱུར་ཞེས་གསུངས་ན་ཡང། །བྱ་བ་ལྷོད་ཡངས་མི་ཤོར་བར། །གང་བརྩམ་མཐར་འཁྱོལ་འོང་བར་འགྱུར།།

 ༈  ད་ནི་ཀུན་གཟིགས་དབྱངས་འཆར་ལས། །སྐྱེས་བུའི་ཚེ་ལོ་བརྒྱ་ཉི་ཤུ། །འཆད་ཚུལ་རྒྱ་བོད་ལུགས་གཉིས་ལས། །འདིར་ནི་འཕགས་ཡུལ་ལུགས་ལྟར་འཆད། །གཟའ་དགུས་རང་རང་དབང་བའི་དུས། །མཆན་བཀོད་ལྟར་དུ་ཡིན་པ་དང་། །སོ་སོས་དབང་བའི་དུས་དེ་ལ། །དགེ་སྡིག་གང་འབྱུང་མདོ་ཙམ་འཆད།།

སྤེན་པས་ལོ་བདག་བྱེད་པའི་རིང༌།། (29-09-2014           To      17-01-2023) བློ་གྲོས་མི་གསལ་ལེ་ལོ་ཆེ། །མི་མཐུན་ཕྱོགས་ཀྱིས་འཚེ་བ་དང༌།། ཡམས་རིམས་ཀླུ་ནད་གཞོག་ཕྱེད་ན། །དེར་དམིགས་ལམ་བཅོས་ཚ་ཚ་འདབ།། ལན་ཆགས་གཏོར་མ་བརྒྱ་རྩ་དང༌། །ཀླུ་བསངས་ཀླུ་གཏོར་ཡང་ཡང་གཏོང༌། །རྒྱལ་བའི་གསུངས་རབས་ཀློག་པ་དང༌། །འདུས་པའི་སྡེ་ལ་བསྙེན་བཀུར་ཕུལ། །ལྷོ་ཕྱོགས་ཆུ་ཡི་འགྲམ་ཉིད་དུ། །ཟངས་ཀྱི་སྣོད་ལ་ཆུས་བཀང་ཞིང༌། །ཤ་སྣ་ཁྲག་སྣ་སྦྱར་ནས་ནི། །བྱ་རོག་རྣམས་ལ་སྦྱིན་པ་གཏོང༌།།

ལྷག་པས་ལོ་བདག་བྱེད་པའི་རིང༌།། (17-01-2023 To 17-01-2040) ལུས་ལ་རླུང་ཁྲག་རིམས་ཀྱིས་གནོད།  །འོན་ཀྱང་གནོད་སྐྱོན་མི་ཆེ་ཞིང༌། །ཤེས་རབ་འཕེལ་ཞིང་གཞན་མགོ་ནོན། །ལོངས་སྤྱོད་འཕེལ་ཁ་རྒྱས་པ་དང༌།། སྐལ་བཟང་ཕུན་སུམ་ཚོགས་པར་འགྱུར།།

ཀེ་ཏུས་ལོ་བདག་བྱེད་པའི་རིང༌།། (17-01-2040   To      17-01-2047) ནོར་རྣམས་ཟད་ཅིང་དགྲ་དང་ཕྲད། །ལས་དང་བྱ་བ་འགྲུབ་དཀའ་ཞིང༌། །དོན་མེད་སྡུག་བསྔལ་འབྱུང་ངོ་ཡོད། །ངན་འབྲས་ཞི་ཐབས་གདུགས་དཀར་དང༌། །རྒྱལ་མཚན་རྩེ་མོའི་དཔུང་རྒྱན་འདོན། །འདུས་སྡེར་བསྙེན་བཀུར་འབུལ་བ་དང༌། །རང་ལུས་གོས་ཀྱི་སྤོང་ཐག་འབུལ། །རི་མགོར་དར་འཛུགས་ཀླུང་རྟ་བསགས། །སྲུང་མའི་བསྐང་གསོ་དྲག་ཏུ་བྱ།།

པ་སངས་ལོ་བདག་བྱེད་པའི་རིང༌།། (17-01-2047           To      17-01-2067) དཀར་པོའི་ཆོས་དང་བུད་མེད་འཐོབ། །བསམ་པའི་དོན་འགྲུབ་དགེ་བ་འཕེལ། །དབྱིག་སོགས་ནོར་འཐོབ་གྲགས་པ་རྒྱས། །ཕུན་སུམ་ཐམས་ཅད་འབྱུང་བ་དང༌། །ཁྱད་པར་དགའ་བའི་གྲོགས་ཀྱིས་བརྩེ།།

ཉི་མས་ལོ་བདག་བྱེད་པའི་རིང༌།། (17-01-2067   To      17-01-2073) གོང་མ་སོགས་ནས་རྙེད་པ་འབྱུང༌།། ལུས་ལ་དམར་ཁྲག་ཆམ་རིམས་དང༌། །ཚད་མཁྲིས་ནད་ཀྱི་ངོ་ཡང་ཆེ། །འདོད་དོན་སྒྲུབ་དཀའ་བསྒྲུབས་ན་ཡང༌། །ཕན་ཐོགས་ཆེ་བར་མི་འབྱུང་ངོ༌། །དེར་དམིགས་སྦྱིན་བསྲེག་བྱ་བ་དང༌། །ཕྱོགས་བཅུ་མུན་སེལ་སྒྲོལ་མ་འདོན། །རབ་བྱུང་སྡེའམ་སྔགས་འཆང་ལ། །བསྙེན་བཀུར་ཟངས་དང་དར་དམར་འབུལ། །ཁང་སྟེང་ཉི་ཁྱིམ་བཅུ་གཉིས་ཀྱི། །བྱད་གཟུགས་བཟོས་ནས་དར་དམར་བརྒྱན།།

ཟླ་བས་ལོ་བདག་བྱེད་པའི་དུས།། (17-01-2073 To         17-01-2083) གཉིད་ཆེ་མཛའ་གྲོགས་གོས་རྒྱན་འཐོབ།། དྲག་ལས་མི་དགེ་ཕྱི་ཐལ་ཆེ།། གཞན་གང་སྒྲུབ་ཀྱང་འགྲུབ་པར་འགྱུར། །དགྲ་ལས་རྒྱལ་ཞིང་བདེ་ཞིང་སྐྱིད། །མངལ་ཆགས་བུ་མོ་སྐྱེ་བར་འགྱུར།།

མིག་དམར་ལོ་བདག་བྱེད་པའི་རིང༌།། (17-01-2083        To 17-01-2090) དགྲ་དང་གྱོད་ཁའི་མེ་ལྕེ་མཆེད།། ལོངས་སྤྱོད་ཉམས་ཞིང་དོན་མི་འགྲུབ། །གཞན་གྱི་བུད་མེད་རྣམས་དང་འགྲོགས། །ལུས་ལ་ཁྲག་མཁྲིས་དམར་ངོ་ཆེ། །ཁྱིམ་ལའང་མེ་ཡིས་འཇིག་ཉེན་ཡོད། །དེ་ཚེ་ཏོག་གཟུངས་གདུགས་དཀར་དང༌། །ཤེར་ཕྱིན་དཀོན་མཆོག་བརྩེགས་པ་འདོན།། གསེར་སྦྱང་ལ་ནི་རང་གི་མིང༌། །བྲིས་ཏེ་ཤར་ལྷོའི་ཕྱོགས་སུ་འཛུགས།།

སྒྲ་གཅན་ལོ་བདག་བྱེད་པའི་དུས།། (17-01-2090 To 17-01-2108) ནོར་ཟད་གཉེན་བྲལ་སྡུག་བསྔལ་འབྱུང༌། །དེ་ཚེ་འདུས་སྡེར་བསྙེན་བཀུར་དང༌། །ལྕགས་དང་རགས་གན་དག་ཀྱང་འབུལ། །བཅོས་ཀ་སྐྱེས་པར་ཆང་སྦྱིན་ཞིང༌། །རྒྱལ་མཚན་རྩེ་ལ་གོས་རྒྱན་བཏགས། །དེ་ལྟར་བྱེད་ན་ཚེ་སྲིངས་ཞིང༌། །འདོད་དོན་ངང་གིས་འགྲུབ་པར་འགྱུར།།

ཕུར་བུས་ལོ་བདག་བྱེད་པའི་རིང༌།། (17-01-2108           To      17-01-2124) ཆོས་ནོར་གོས་འཕེལ་འདོད་དོན་འགྲུབ། །རིགས་སྔགས་འགྲུབ་ཅིང་མཁས་པ་དང༌། །ཉམས་དང་རྟོགས་པའི་ཡོན་ཏན་རྒྱས།།

ལུས་ལ་ལོག་འཚོ་མེད་པའི་བཀྲ་ཤིས་ཤོག །ངག་ལ་རྫུན་མེད་དྲང་པོའི་བཀྲ་ཤིས་ཤོག།

སེམས་ལ་གཡོ་སྒྱུ་མེད་པའི་བཀྲ་ཤིས་ཤོག །ཀུན་ལ་དམ་ཚིག་གཙང་བའི་བཀྲ་ཤིས་ཤོག།

དེ་ལྟར་འབད་པའི་དགེ་བ་ཡིས། །བུ་མོར་ཚེ་རིང་ནད་མེད་ཅིང་།།

ལོངས་སྤྱོད་ཕུན་སུམ་ཚོགས་པ་དང་། །བསམ་དོན་ཡིད་བཞིན་འགྲུབ་པར་ཤོག།

ཅེས་པ་འདི་ཡང་དུས་རབས་ཉེར་གཅིག་པའི་རྩིས་པ་བསམ་གཏན་བྱ་བས་རབ་བྱུང་བཅུ་བདུན་པའི་ཤིང་རྟ་མགོ་ཟླ་ཡར་ངོ་བཟང་པོ་གཉིས་པའི་ཉིན་བྲིས་པའོ།།      །།