༄༅།
།གཟའ་རྣམས་སྟོང་པར་འཇུག་ཚུལ་བཤད་པ།
༈ གཟའ་རྣམས་རང་འཁོར་རྫོགས་པ་ལས། །ངེས་པ་དག་ཚུལ་བརྗོད་པར་བྱ། །དཔལ་ལྡན་རྒྱུད་ལས་གཟའ་ཐམས་ཅད། །མི་ལོ་ས་ཡ་ཕྲག་བཞི་དང༌། །སུམ་འབུ་ཉི་ཁྲིའི་ཚོགས་ལ་ལྔས༌། །ཐོབ་པ་གནས་བཞིར་བཀོད་པ་ཡི། །སྟེང་ནས་ཆུ་དང་མེ་དང་མིག། །གཟུགས་ཀྱིས་བསྒྱུར་བས་རིམ་པ་བཞིན། །རྫོགས་ལྡན་གསུམ་ལྡན་གཉིས་ལྡན་དང༌།།
རྩོད་དུས་ཚད་ཡིན་བསྡོམས་པའི་མཐར།།དག་པའི་སྟོང་རྩིས་གསུངས་པ་ནི།། དགོས་པའི་དབང་གིས་མ་དག་པ༌། །བྱེད་པ་བརྗོད་པའི་རྩིས་སུ་སྣང༌། ། འདིར་ནི་གྲུབ་མཐའ་ལས་བརྩམས་ཏེ། །དུས་མེ་མ་གཏོགས་གཟའ་ཀུན་གྱི། །ངེས་པའི་ཚོགས་རྣམས་ཟད་བྱེད་ལོའི།དབོ་ཟླའི་སྟོང་ལ་ཉ་ཁྱིམ་མཐར། །ལྷན་ཅིག་རྣམ་པར་དག་ཚུལ་བཤད། །དེ་ལ་ཐོག་མར་སྟོང་རྩིས་ལ། །འཇུག་པའི་སྒོ་ནི་ཞག་གསུམ་པོ། །ལོ་ཡི་མཚམས་སུ་སྣ་མཉམ་ཞིང༌། །དེ་སྟེང་རང་རང་འཁོར་ཚད་དང༌། །དེ་ཡང་ཟད་བྱེད་ལོ་ཡི་མཐར༌། །ལྷན་ཅིག་འགྲིག་པ་ཞིག་དགོས་ཏེ། །སྟོང་ཆེན་དཀྱིལ་འཁོར་ཞེས་བཤད་པ། །ངེས་པའི་ཚོགས་རྣམས་ལྷན་ཅིག་ཏུ། །སྟོང་པར་ཞུགས་ལ་འཇོགས་དགོས་ཕྱིར།།
༈ དེ་ལྟར་ངེས་པས་བྱེད་པ་ཡི། །ལོ་མཚམས་དང་བསྟུན་བརྩི་ཚུལ་ནི། །ཉི་མའི་ཚེས་དྷུ་ཟླ་བཤོལ་བཅས། །དྲུག་ཅུ་རྩ་ལྔའི་ལོ་མཐར་དག། ཚུལ་དེ་བཅུ་གཉིས་ཟློས་པ་ཡིས། །མཁའ་ཀླུ་རི་བོའི་ལོ་ཡི་མཐར། ། དྲུག་ཅུ་སྐོར་དང་མཐུན་པར་འཁོར།།
།།
༈ ཟླ་རྐང་དག་ཚུལ་ཀླུ་ལག་ནི། །དུས་ཉིས་བསྒྱུར་བའི་ཚེས་ཟླའི་ཚོགས། །མདའ་རོས་བསྒྱུར་ལ་ཉི་མ་ཡིས། །ཐོབ་པ་མཁའ་དྲག་བུག་གཟུགས་ཀྱི། །ལོ་མཐར་ཆ་རིལ་འཁོར་བ་ཡིན། །ལོ་དེ་མིག་གིས་བསྒྱུར་བའམ། །མཁའ་ཀླུ་རི་བོ་ཞེ་དགུས་བསྒྱུར། །ཐིག་ཟུང་མིག་སྦྲུལ་རྩེ་མོའི་མཐར། །ཟླ་བཤོལ་ཉི་མ་ཟླ་རྐང་བཅས། །དྲུག་ཅུ་སྐོར་དང་མཐུན་པར་འཁོར།།
།།
༈ གཟའ་ཚེས་ངེས་པ་དག་ཚུལ་ནི། །ནམ་མཁའ་མིག་ཀླུ་མེ་སྐྱོན་ལོར། །ཉིན་ཚེས་འགྲིགས་སྟེ་ཉི་མ་ཡི། །ཉིན་ཞག་ངེས་པའང་ལོ་མཚམས་སུ། །རྣམ་པར་དག་མོད་གཟའ་འཁོར་ནི། །མ་དག་དག་ཕྱིར་རི་ཡི་བསྒྱུར། །སྟོང་མཚོ་ཐུབ་དུས་སྦྲུལ་ཉིའི་ལོར། །གཟའ་དྷུ་དག་ཅིང་ལོ་དེ་ལ། །མིག་གིས་བགོས་ཐབ་ལོ་དེའི་ཕྱེད། །མཁའ་རི་མེ་མེ་ཆུ་རོ་ཡི། །ལོར་ཡང་དག་སྟེ་འདྲ་བ་ཡིན། །ལོ་ཚོགས་སྔ་མ་མེས་བསྒྱུར་རམ། །ཕྱི་མ་རོ་ཡིས་བསྒྱུར་ཡང་རུང༌། །མཁའ་མིག་མིག་མཁའའའ་དུས་ཀླུ་མེའི། །ལོ་མཐར་གཟའ་ཚེས་ངེས་པ་ནི། །དྲུག་ཅུ་སྐོར་གྱི་མཚམས་སུ་དག། ༈ སྔ་མ་རྣམས་དང་སྒྲིག་པའི་ཕྱིར། །ཐིག་ཟུང་མིག་སྦྲུལ་རྩེ་མོའི་ལོ། །གཟུགས་མཁའ་གཟུགས་ཀྱིས་བསྒྱུར་བྱས་པས། །སྔར་ལྟར་མཁའ་མིག་མིག་མཁའ་སོགས། །འཆར་ཏེ་འདི་ལ་ལྔ་བསྡུས་རྣམས།། དྲུག་ཅུ་སྐོར་དང་མཐུན་པར་འཁོར།།
།།
༈ སྒྲ་གཅན་ཆེད་དུ་མཁའ་མེ་ལག །མིག་མཁའ་ཆུ་བོས་བསྒྱུར་བ་ལ།། ཟླ་བཤོལ་འཁོར་གྲངས་བརྒྱད་བརྒྱ་བཞིས། །བགོས་པས་ལོར་འདྲི་འབྱུང་བ་དྲག །ལོ་དེ་མདའ་རོས་བསྒྱུར་བ་ཡིས། །ལྔ་རི་མཚོ་བདུན་ལོ་ཡི་མཐར། ། སྒྲ་གཅན་ཚེས་ཀྱི་ངེས་པ་དག །ལོ་དེ་ཉི་མས་བསྒྱུར་བ་ཡིས། །སྟོང་མཁའི་རི་གཏེར་བཀྲ་ཤིས་མཐར། །སྒྲ་གཅན་ཟད་བྱེད་ལོ་མཐར་འཁོར། །སྔ་མ་རྣམས་དང་སྒྲིག་པའི་ཕྱིར། །ལྔ་བསྡུས་འཁོར་བའི་ལོ་ཚོགས་དེ། །ཚེས་ཀྱི་ཟླས་བསྒྱུར་མཁའ་སྟོང་གསུམ། །དེ་ཉིད་རྩ་གསུམ་རིག་བྱེད་མཚོའི། །ལོ་མཐར་ལྔ་སྒྲ་ལྷན་གཅིག་ཏུ། །དྲུག་སྐོར་དང་མཐུན་པར་འཁོར།།
།།
༈ བཀྲ་ཤིས་ཆེད་དུ་རི་ཀླུ་རོ།།འབྱུང་འདོད་དྲག་བསྒྱུར་ཉིན་ཞག་གྲངས།། འབྱུང་མཁའ་ཕྱོགས་ཀྱིས་བསྒྱུར་བ་ལ། །དེ་ཉིད་མཁའ་མིག་རི་དབང་རྩེར།། མེ་ཡིས་ཐོབ་པ་བུག་མིག་ལག །ཉིན་ཚེས་འགྲིགས་པའི་ལོ་དེ་ཉིད། །ཕྱོགས་བུག་གཟུགས་བུག་གིས་བསྒྱུར་བས། །མཁའ་བུག་མེ་རི་མཚོ་ཕྱོགས་གཉིས།།
༼ཡང་ན་ཉིན་ཞག་རི་ཀླུ་རོ། །ཉི་མ་འདོད་ཟླས་བསྒྱུར་བ་ཡིས། །མཚོ་ཆུ་འདོད་ཐུབ་ས་འཛིན་གླིང༌། །འཆར་བ་ཚེས་ཞག་གྲངས་ཡིན་ཏེ།། ལྔས་བསྒྱུར་མཁའ་མེས་ཐོབ་པའི་ཚོགས༌། །གཟུགས་ཟད་མིག་གིས་བསྒྱུར་བ་ལ།། མཚོ་ཟད་ཀླུས་ཐོབ་ཚོགས་མདའ་རོས།། བསྒྱུར་བས་མཁའ་བུག་མེ་རི་སོགས། ། སྔར་ལྟར་འཆར་ཏེ་ལོ་འདིའི་མཐར།༽ །བཀྲ་ཤིས་ངེས་པ་རྣམ་པར་དག།
༈ ལོ་དེ་རོས་བསྒྱུར་མཁའ་ཆུའི་རྩེར།། ཆུ་སྦྲུལ་འཁྲིག་དུས་ཉི་མའི་ལོར། །དྲུག་ཅུ་སྐོར་གྱི་མཚམས་སུ་དག། ༈ སྔར་དང་སྒྲིག་ཕྱིར་ལྔ་སྒྲ་རྣམས། །འཁོར་གྲངས་མཁའ་སྟོང་གསུམ་སོགས་ལོ། །བུག་མིག་ལག་པས་བསྒྱུར་བ་ཡིས། །ཐིག་ཟད་རི་གསུམ་གཏེར་དབྱིག་བརྒྱད། ། དབང་རྒྱལ་ཕྱོགས་ཀྱི་ལོ་ཡི་ཐར༌། །བཀྲ་ཤིས་དང་བཅས་ལྔ་སྒྲ་རྣམས༌།། ཟད་པའི་ལོ་མཐར་སྟོང་པར་འཇུག།
།།
༈ ཕུར་བུ་སོ་ཡོན་རིག་བྱེད་ནི། །འབྱུང་འདོད་དྲག་བསྒྱུར་ཉིན་ཞག་གྲངས། །འབྱུང་མཁའ་ཕྱོགས་ཀྱིས་བསྒྱུར་བ་ལ། །དེ་ཉིད་མཁའ་མིག་རི་སོགས་ཀྱིས། །ཐོབ་པ་རིག་བྱེད་རྒྱ་མཚོ་ཡིད། །ཕྱོགས་བུ་ག་གཟུགས་བུ་གིས་བསྒྱུར་ལོ། །མཁའ་བཞི་ཟད་སྐྱོན་འཁོར་ལོ་འདོད། ། འདིའི་མཐར་ཕུར་བུའི་ངེས་པ་དག། ༈ ལོ་དེ་མེས་བསྒྱུར་སྟོང་ཁྱིམ་བཞི། །ཚེས་བརྒྱད་རྩ་གསུམ་ལོ་ཡི་མཐར། །ཟད་བྱེད་མཐའ་རུ་རྣམ་པར་དག།
༈ སྔར་དང་སྒྲིག་ཕྱིར་ལྔ་སྒྲ་དམར། །འཁོར་བའི་ཐིག་ཟད་རི་གསུམ་སོགས། །ལག་མིག་ཐུབ་པས་བསྒྱུར་བ་ཡིས། །སྟོང་པ་མཁའ་ཡི་དེ་ཉིད་གཟུགས། །མིག་རི་རི་བུག་མེ་མེ་རིའི། །ལོ་མཐར་ལྔ་སྒྲ་མིག་ཕུར་དག། །།
༈ སྤེན་པ་རོ་དུས་ཐུབ་ཕྱོགས་ནི། །འབྱུང་འདོད་དྲག་བསྒྱུར་ཉིན་ཞག་གྲངས། །ཚེས་མཁའ་མེ་ཡིས་བསྒྱུར་བ་ལ། །དེ་ཉིད་མཁའ་མིག་རི་སོགས་ཀྱིས། །ཐོབ་པ་རོ་དུས་ཐུབ་ཕྱོགས་སོ། །ཕྱོགས་བུག་གཟུགས་བུག་གིས་བསྒྱུར་བས། །སྟོང་དུས་སྟོང་གསུམ་མཁའི་དབང་པོ། །གདེང་ཅན་དགུ་མཐར་སྤེན་པ་དག། ༈ ཚོགས་དེ་མེས་བསྒྱུར་ནམ་མཁའི་སྐྱོན། །གཏེར་མཁའ་འབྱུང་བཤུལ་ལྷ་རོ་དགུ། །བརྩེགས་མཐར་ཟད་བྱེད་ལོ་མཐར་འཁོར།།
༈ དལ་བ་སྟོང་པ་མཁའ་ཡིད་སོགས། །སྲིན་པོ་རོ་བདུན་གྱིས་བསྒྱུར་བས། །མཁའ་ཟུང་རོ་ཟུང་སོ་མིག་བཞི། །རོ་གླིང་ཆུ་སྦྲུལ་འཁྲིག་སྡེའི་མཚོ། །དུས་སུ་འབྱུང་ཚེ་གོང་བཅས་དག།
།།
༈
པ་བ་སངས་ལ་རི་རྒྱལ་མིག །འབྱུང་འདོད་དྲག་བསྒྱུར་ཉིན་ཞག་གྲངས། །འབྱུང་མཁའ་ཕྱོགས་ཀྱིས་བསྒྱུར་བ་ལ། །དེ་ཉིད་མཁའ་མིག་རི་སོགས་ཀྱིས། །ཐོབ་པ་སྲིན་པོ་ཆུ་རིར་གནས། །ཕྱོགས་བུག་གཟུགས་བུག་གིས་བསྒྱུར་བས། །མཁའ་གཏེར་ལྔ་ཟད་ཆུ་སྦྲུལ་བརྒྱད། །དྲོ་བའི་ལོ་མཐར་དཀར་པོ་དག། ༈ ཚོགས་དེ་རོས་བསྒྱུར་ཟད་མཐར་དག།
༈ སངས་སྔོན་རི་བོ་ཕྱོགས་ཀྱིས་བསྒྱུར། །སྟོང་ཟུང་འཁྲིག་དུས་ཆུ་རྩ་བརྒྱད། །བགྲོད་རྟ་རི་རྩའི་མཚམས་བཞི་ནོར། །དཀོན་མཆོག་རྩ་གསུམ་ཟད་དུས་དག།
།།
༈ ལྷག་པའི་རི་བུག་རི་ཀླུ་ནི།།འབྱུང་འདོད་དྲག་བསྒྱུར་ཉིན་ཞག་གྲངས།། ཚེས་མཁའ་མེ་ཡིས་བསྒྱུར་བ་ལ། །དེ་ཉིད་མཁའ་མིག་རི་སོགས་ཀྱིས། །ཐོབ་པ་རི་བུག་རོ་ཀླུ་དེ། །ཕྱོགས་བུག་གཟུགས་བུག་གིས་བསྒྱུར་བས། །ནམ་མཁའི་འཁོར་ལོ་སོ་དབང་བརྒྱད། །ཟད་པའི་ནོར་འཆར་ལྷག་པ་ཡི། །མྱུར་བ་ལོ་མཚམས་རྣམ་པར་དག། ༈ ལྷག་པ་དྲན་པས་བསྒྱུར་བ་ན། །མཁའ་བགྲོད་དུས་གསུམ་སྐྱེ་རྒུའི་ཟླ། །རང་དབང་ནོར་བཞིའི་མཐའ་མར་དག། ༈ ལྷག་སྔོན་མེ་རོ་ཆུ་ཡིས་བསྒྱུར།། མཁའ་སྟོང་དུས་མེད་གཏེར་ཟད་ཐབས། །སྟོང་འབྱུང་ལྷ་སྡེའི་མཁའ་དབང་དྲག །དབང་གསུམ་འཁྲིག་དུས་རྩ་དབང་ཉམས། །ཡོངས་རྫོགས་ཟད་བྱེད་ལོ་མཐར་འཁོར།།
།།
༈
དེ་ལས་འཁོར་ཚུལ་གཞན་མེད་པས། །སླར་ཡང་སྔར་བཞིན་འཁོར་བ་ཡིན། །དེ་ལྟར་རང་རང་ཟད་བྱེད་མཐར། །སྟོང་པར་འཇུག་ཐེངས་རེའི་ཡུན་ལ། །ལོ་མཚམས་དག་ཐེངས་འདི་ལྟ་སྟེ། །ཉི་མ་སྒྲ་གཅན་ལན་བཅུ་གཉིས། །རིལ་པོ་ཆ་ཤས་ལན་གཉིས་ཏེ། །ཚེས་གཟའི་དྷུ་བ་མིག་དམར་དང། །ལྷག་པ་པ་སངས་ལན་དྲུག་རེ། །ཕུར་བུ་སྤེན་པ་ལན་གསུམ་མོ། །ཉི་མ་དག་པས་ཟླ་བ་དང༌། །དུ་བ་ཞི་གཉིས་བཅས་པ་ཡི།། རྩ་བའི་ལོངས་སྤྱོད་དག་འགྱུར་ཞིང༌། །དུས་མེ་དེ་ཚེ་ནག་པ་ཡི།། ཕྱེད་ན་གནས་པས་དག་པ་མེད། །དེ་ཕྱིར་རྩ་བའི་ལོངས་སྤྱོད་ལ། །བརྟེན་ནས་སྟོང་རྩིས་ལ་འཇུག་ན། །ལྔ་སྒྲ་དྲག་གསུམ་ལྷན་ཅིག་ཏུ། །དག་པའི་ལོ་གནས་བཅུ་བདུན་པས། །ཆོག་མོད་འོན་ཀྱང་རྩིས་འཕྲོ་ཡི། །ངེས་པ་རྟེོགས་ཕྱིར་ཞི་གཉིས་ཀྱི། །རྐང་པ་དང་བཅས་ལྷན་ཅིག་ཏུ། །འཁོར་བའི་ལོ་གནས་ཉེར་གཉིས་བཀོད། །འདི་ལས་ད་ལྟའི་ཤིང་རྟ་ཡན། །འདས་ལོ་ཇི་ཙམ་སོང་བའི་གྲངས། །ལེའུ་བཞི་པར་སྔར་བཤད་དོ། །དེ་དག་སྟེང་དུ་འདས་ལོའི་གྲངས། །བསྣན་ཏེ་རྩིས་འཕྲོའི་ངས་པ་འཚོལ། །དེ་ཡིས་སྟོང་ཆེན་ལོ་ཚོགས་ལ། །ཕྲ་བས་ད་ནས་ཇི་ཙམ་ན། །།སྟོང་པར་འཇུག་པའི་དུས་ངེས་འགྱུར།།
༈ རྩིས་ཀྱི་མན་ངག་ཉིན་བྱེད་སྣང་བ་ལས། རང་རང་གི་འཁོར་ལོས་སྟོང་པས་ངེས་པ་སྡུད་པའི་ཚུལ་བཤད་པའི་སྐབས་ཏེ་བཅོ་བརྒྱད་པའོ།། །།
༈ སླར་ཡང་ངེས་པ་སྐྱེ་བའི་ཚུལ་བཤད་པ།
༈ དེ་ལྟར་ཟད་པ་མེ་སྟག་ལོའི། །དབོ་ཟླའི་སྟོང་ལ་ཉ་ཁྱིམ་མཐར།། གཟའ་རྣམས་ངེས་པ་དག་པ་ལས། །སླར་ཡང་རབ་བྱུང་ལོའི་ནག་ཟླའི།། ཚེས་གཅིག་ནས་གཟུང་བརྩི་བ་ན། །དྷུ་བ་སྟོང་པའི་གནས་རྣམས་སུ། ། རང་རང་རྟག་ལོངས་གནམ་སྟོང་བར། །བརྩེགས་ལ་རྐང་རྩིས་ཚུལ་བཞིན་དུ། །བྱས་པས་ནག་པ་ཟླ་བ་ཡི། །ཚེས་གཅིག་རི་ཐུར་གཟའ་གཅིག་དང༌། །ཆུ་ཚོད་བཅོ་ལྔ་ཉི་དག་ལ། །སྐར་མ་ནམ་མཁའ་ཆུ་ཚོད་ཚེས། །རེས་འགྲོགས་ཟླ་བར་སྐར་མ་ཐིག །ཆུ་ཚོད་མཚོ་དབང་སྦྱོར་བ་གཅིག །ཚུ་ཚོད་དགུ་ལ་སོགས་པ་དང༌། །བྱེད་པར་གཅིག་ཡིག་རྣམས་འཆར་ཞིང༌། །ནག་ཟླ་རྫོགས་ནས་ཟླ་བ་ཡིས། །ངེས་པ་སྐྱེས་བས་བྱ་སླར་ཟད། །དེ་ཕྱིར་རྒྱུད་ལས་ལོ་རབ་བྱུང༌། །ནག་ཟླ་དཀར་པོའི་ཚེས་གཅིག་དང༌། །རེས་གཟའ་ཉི་མ་སྦྱོར་སེལ། །བྱེད་པ་བ་བཾ་སོགས་ཐམས་ཅད།། དང་པོ་ཁོ་ནང་འཆར་བ་རུ། །གསུངས་པ་ཇི་བཞིན་འགྲིག་པ་ཡིན།།
༈
རྩིས་ཀྱི་མན་ངག་ཉིན་བྱེད་སྣང་བ་ལས། །སླར་ཡང་ངེས་པ་སྐྱེ་ཚུལ་བཤད་པའི་སྐབས་ཏེ་བཅུ་དགུ་པའོ།།
།།
No comments:
Post a Comment