རཱ་ཧུ་རྣམ་བརྒྱད་དང་། སྐྱེས་རྩིས་ས་རིས།

རཱ་ཧུ་རྣམ་བརྒྱད།  

༈ ཁྱིམ་གྱི་མཁར་ལས་ཟླ་བའི་ངེས་པ་མེད། །ཟླ་ཕྱེད་ས་བོན་ཕྱོགས་གཟའ་བག་མ་གཏོང༌། །

ཚེས་ཀྱི་རིམ་གྲོ་རྩ་བ་དྲག་པོའི་ལས། །ཐུན་ཕྱེད་ཀུན་ལ་ཡུད་ཙམ་གཏད་ན་དགའ། །

ཕྱོགས་གཟའ། ཉི་མ་ཕུར་ན་དཀར་པོའི་ཟླ། །དམར་པོ་ལྷག་ན་སྤེན་པའི་གདོང༌། །

ཆར་བརྟག  རིམ་པར་སྐྱེས་ཟླ་རྒྱ་མཚོ་ངོགས། །རི་བོ་མཚམས་སྦྱོར་ཞེས་བྱ་བ། །

གཅིག་གཅིག་གཉིས་བཞི་གཉིས་བཞི་ལས། །སྣར་མ་གང་དུ་བྱུང་བར་བརྟག །

སྐྱེས་བརྟག  སྤྱི་ཁ་དཔུང་མགོ་མཁྲིག་མ་ལག །སྙིང་གི་ལྟེ་གསང་པུས་མོ་རྐང༌། །

ཟླ་བའི་རྩེ་ལ་བགྲོད་ཟུང་འཁྲིད། །དབང་པོ་གཅིག་ལ་གཟུགས་གཉིས་སྦྲུལ། །

འབྲི་བྱེད་གནས་སྐབས་བདེ་སྡུག་ཚངས་པར་བྲི། །སྐྱེ་ཕུན་ཟད་སོར་བསྒྲུབ་ངེས་བྱམས་ཕ་ཀུན། །

ལམ་ཞུགས་སྦྲུལ་དེ་ཐ་སྐར་ནས། །སྟེང་རིམ་བ་གླང་གཅིན་ལྟར་བཀོད། །

ཟླ་གནས་རྩ་བརྒྱུད་གཟའ་རྣམས་ནི། །དཔག་ཚད་སོགས་ལ་བགོད་བསྒྱུར་འཐོབ། །

བྱེས་སོང་པད་མ་འགྲོ་ཉིན་ཟླ། །ཤར་ནས་ནང་བཞི་ཕྱི་ལ་གསུམ། །

གཅིག་གཉིས་ལྔ་ལ་དོན་གྲུབ་ཅིང༌། །ཕྱོགས་རྩ་མཚམས་དཀྱིལ་དགྲ་མེད་དགེ། །

ཡུལ་བཟུང་སྤེན་པ་རང་ཉིད་ལས། །མགོ་གསུམ་མིག་གཉིས་སྙིང་ལྔར་བཟང༌། །

ནད་པའི་ཀླུ་འཁོར་ཟླ་སྐར་ནས། །ཁ་དང་ལྟེ་བ་དཔུང་པ་དགེ། །

སེ་བའི་འཁོར་ལོ་བསྟེན་བྱ་ནས། །མགོ་རྒྱབ་སྙིང་དང་རྐང་པར་རོ། །

བག་མར་འཁོར་བའི་ཤ་ལ་ཀ །བདུན་བཞིས་བསྒྱུར་བའི་ཉི་ཤུ་བརྒྱད། །

སྤྱི་བོའི་མིག་དེ་ཁ་ལ་བལྟ། །མགྲིན་པར་ལག་གཉིས་ཐལ་མོ་སྦྱོ། །

རྐང་པའི་གསང་བ་སྙིང་ལ་བསམ། །དཀར་པོ་ནས་བརྩམས་གསུམ་གསུམ་བཀོད།།

ཁ་སངས་སྤྱི་མེ་དཔྲལ་བར་ཟླ། །མིག་ཆུ་སྣ་གཅིག་རྣ་བར་ཟུང༌། །

སྙིང་དབང་ལག་ཟུང་རྒྱབ་ཀྱི་སྡེ། །གསང་བའི་རྩེ་མོར་རྐང་པ་གཉིས། །

བུ་མོར་སངས་ཀྱིས་འཁྱུད་པ་དང༌། །བདག་ཉིད་སྙིང་ལ་ཞུགས་པ་བཟང༌། །

བག་རྩིས་ཉིམའི་སྐར་མ་དེ། །མགོ་ནས་སྤེལ་མའི་ཚུལ་དུ་བཀོད། །

བུ་ཚ་མང་ན་ལྷག་པ་ནས། །དམག་དཔོན་བཞི་པོར་རེ་རེར་བྱིན། །

ཡུག་ས་སྤྱེ་ཅང་ཟླ་སྐར་དང༌། །ནད་བརྟག་སྦྲུལ་འཁོར་པ་སངས་ནས། །

བག་མར་དར་འཁོར་ཉི་སྐར་སྟེ། །ཤར་བྱང་སྲིན་དབང་བཟང་བ་ཡྀན། །

ཁྱོ་ཤུག་གཉེན་གྲོགས་རིགས་གསུམ་འཁོར། །བུ་བཙའ་བྲེ་ཡི་ཅ་ཀྲས་རྫོགས། །

༈ ནམ་ལངས་ནས་ནི་བཙས་བར་གྱི། །འདས་པའི་ཆུ་ཚོད་གནས་གཉིས་བཀོད།།

གཅིག་ལ་མིག་བསྒྱུར་མཁའ་རོ་ཡིས། །འཐོབ་པ་ཆུ་ཚོད་ལྷག་མ་སྲང༌།།

དེ་ནི་གཅིག་ཤོས་ལས་ཕྲི་ནས། །སྐྱེས་ཉིན་ཟླ་སྐར་སྟེང་དུ་བསྣན།།

འཁོར་ལོ་ལོངས་ན་བསྒྲིལ་བའི་ཚོགས། །བཙས་པའི་ཁྱིའུ་ཡི་སྐྱེས་སྐར་ཡིན།།

༈ སྐྱེས་སྐར་ཆུ་ཚོད་མཁའ་རོས་བསྒྱུར། །ཆུ་སྲང་ཡར་བསྲེས་དུས་ཀྱིས་བསྒྱུར།།

དབུགས་བསྲེས་མཁའ་སྐར་གྱིས་ཐོབ་པ། །ལོ་ཡི་ཚོགས་སོ་ལྷག་མ་རྣམས།།

ཁྱིམ་གྱིས་བསྒྱུར་ཐོབ་ཟླ་བ་དང༌། །མཁའ་མེས་ཞག་དང་མཁའ་རོས་དབྱུག།

༈ ལོ་ཟླ་ཞག་དང་ཆུ་ཚོད་རྣམས། །གནས་གཉིས་གཅིག་གིས་བརྒྱ་ལས་སྦྱངས།།

ལྷག་མ་སྐྱེས་བུའི་ཚེ་ཚད་དང༌། །གཅིག་ཤོས་འདས་ཐོབ་འཆི་བསླུའི་ལོ།།

༈ སྐྱེས་བུའི་ཚེ་ལོ་མཁའ་ཉིས་བགོས། །ལྷག་རྣམས་ཟླ་ཞག་དབྱུག་སྲང་བར།།

བསིལ་བསྣན་རིམ་པར་བགོས་པའི་ནོར། །གཟའ་དགུ་ཀུན་གྱི་སྤྱི་དྲུ་ཡིན།།

༈ ཉི་མཚམས་ཟླ་ཕྱོགས་དམར་པོའི་གཟའ། །གདོང་སྐྱོན་བླ་མ་མི་བདག་དེ།།

དལ་བའི་རྩ་གཟུགས་ལྷག་ལ་གནས། །འཇུག་གི་རི་བོ་སངས་ཉི་ཤུ།།

༈ སྐར་མའི་རེའུ་མིག་བལྟས་ནས་ནི། །སྐྱེས་སྐར་བདག་གཟའ་ཐོག་མར་བཟུང༌།།

དེ་ནས་རང་རང་བསྒྱུར་བྱེད་ཀྱིས། །སྤྱི་དྲུ་རྣམས་ནི་རིམ་བཞིན་བསྒྱུར།།

གོང་དུ་བསྒྲིལ་བའི་ཚོགས་དེ་ནི། །གཟའ་དགུ་རང་རང་སྤྱོད་ཚད་དང༌།།

དེ་ཀུན་བསྡོམས་པའི་ཚོགས་དེ་ནི། །སྐྱེ་བོ་དེ་ཡི་ཚེ་ཚད་ཡིན།།

༈ ཕྲ་བ་གྱ་གཅིག་བྱ་འདོད་ན། །མཁའ་ཉིའི་བགོ་གཞི་ཚེ་ལོའི་ཚབ། །

གཟའ་རང་དབང་ཚད་ལོ་བཞག་ནས། །སྤྱི་དྲུ་བཟོས་མཐར་སྒྱུར་སོགས་མཚུངས། །

ཆུ་ཚོད་ཚེས་ནས་ལྡབ་འགྱུར་འཕེལ། །ཞག་གཅིག་ལོན་ནས་སོ་གསུམ་བར།།

རིམ་པར་དགོས་ཀྱང་དམིགས་གསལ་ནི། །ལྔ་ནས་ལྔ་ལྔ་དེ་ཉིད་བར།།

མཁའ་རོ་རྩ་ཕྱེད་ཕྱེད་གསུམ་ཕྱེད། །རྒྱལ་གཉིས་ཕྱེད་ཕྱེད་ཞག་གཉིས་ཕྱེད།།

དབང་གཉིས་ཟུང་ནས་ཟླ་བ་གསུམ། །བཅུ་དྲུག་ནས་བཟུང་ཞག་ནས་མེད།།

ཞག་ཟླ་ལོ་ཚོགས་མས་ནས་ཡར། །གཅིག་གཉིས་གསུམ་འདྲ་དེ་སྟེང་རིམ།།

དབང་ཕྱོགས་ཚེས་དང་ཞིམ་པའི་རོ། །བཞི་ནས་གཉིས་རེ་གོང་དུ་འཕེལ།།

12/9/2008 5:40 PM