ལས་རྩིས་གསལ་བའི་མེ་ལོང་།

༄༅།   །མཁྱེན་རབ་དབང་ཕྱུག་འཇམ་དཔལ་དབྱངས། །བདག་བློ་པདྨོའི་ཟེའུ་འབྲུར་ཞུགས།།

དགོས་མེད་ལོ་འདབ་རྒྱས་ན་ནི། །རལ་གྲི་རྐྱོང་ནས་གཅོད་དུ་གསོལ།།

ཚེས་རབས་ལས་ཀྱི་རྩིས་འདི་ལ། །དགོས་པའི་དོན་རྣམས་འདི་ལྟ་སྟེ།།

སྐར་རྩིས་གཞུང་ལས་བྱུང་བ་ཡི།། ༼༡་༥༽གཟའ་ཚེས་སྐར་སྦྱོར་བྱེད་པའི་འབྲས།།

༼༦༽ ནག་རྩིས་རྡེལ་འགྲེམ་འགྲེལ་བཤད་དང་།། ༼༧་༡༣༽ལོ་ཟླ་ཞག་དུས་སྤར་སྨེ་ཀླུང་།།

༼༡༤་༡༥༽གཉིས་འདྲེས་དུས་སྦྱོར་སྐྱེས་བརྟག་གཉིས།།༼༡༦༽དབྱངས་འཆར་གཟའ་དགུས་སྤྱོད་པའི་རྩིས། །

༼༡༧༽ཆོས་དང་འབྲེལ་བའི་མཁའ་འགྲོའི་མིང་། །དོན་ཚན་བཅུ་བདུན་ཚང་ན་རབ།།

རྩིས་ལ་སྐར་ནག་དབྱངས་གསུམ་ལས། ༡༽ སྐར་རྩིས་ལ་ཡོངས་སུ་གྲགས་པ་ནི་གཟའ། ཚེས། སྐར་མ། སྦྱོར་བ། བྱེད་པ་དང་བཅས་པའི་ལྔ་བསྡུས་ཀྱི་འགྲེལ་བཤད་དགོས་པ་ཡིན་ན་ཡང་། འབྲུག་ཡུལ་འདིའི་རྩིས་པ་རྣམས་ཀྱིས་སྦྱོར་བ་དང་བྱེད་པའི་འགྲེལ་བཤད་བཀོད་སྲོལ་མི་འདུག་པས། གཟའ་ཚེས་སྐར་མ་གསུམ་གྱིས་འཐུས་པར་བྱས། ༢༽ ནག་རྩིས་ལས་བྱུང་བའི་རྡེལ་འགྲེམ་རྣམས་ཀྱི་འགྲེལ་བཤད་དང་། གཞན་ཡང་རྡེལ་འགྲེམ་མི་དགོས་པར་ཐད་ཀར་འགྲེལ་བཤད་རྒྱབ་རྒྱུ་ཡོད་པའི་ལོ། ཟླ་བ། ཞག དུས་ཚོད། སྤར་ཁ། སྨེ་བ་དང་བཅས་པའི་སྟེང་དུ། ༣༽ སྐར་རྩིས་དང་དབྱངས་འཆར་འདྲེས་པའི་དུས་སྦྱོར་དང་། སྐྱེས་བརྟག་འཁོར་ལོ་གཉིས། ༤༽ དབྱངས་འཆར་ལས་བྱུང་བའི་གཟའ་དགུ་སྟོང་ལེན་ནམ། གཟའ་དགུའི་ཚེ་རྩིས་དང་། ༥༽ ཆོས་དང་འབྲེལ་བའི་མཁའ་འགྲོའི་མིང་དང་བཅས་སྟེ་དོན་ཚན་བཅུ་བདུན་ཚང་ན་རབ་དང་། དེ་ལྟར་མིན་ན་ཡང་རང་གིས་གང་ལྕོགས་ཀྱི་འགྲེལ་བཤད་ཙམ་གྱིས་འཐུས་པར་བྱས་ན་ཡང་འགྲིག།

ཐོག་མར་སྐར་རྩིས་ཀྱི་རིམ་པ།

གཟའ་ཚེས་སྐར་མ་གསུམ་པོ་འདི། །ཟླ་ཐོ་ནང་ནས་བླང་བར་བྱ།།

ཐོག་མར་གཟའ་ཚེས་སྐར་མ་གསུམ་པོ་ཟླ་ནས་ཐད་ཀར་ལེན་རྒྱུ་ཡོད་པ་ཡིན་ན་ཡང་། ཚེས་དང་སྐར་མ་གཉིས་པོ་བུ་ཆུང་སྐྱེས་པའི་དུས་ན་འདས་དང་མ་འདས་བརྟག་དགོས། དེ་གཉིས་ཀྱི་སྐོར་ཟླ་ཐོ་ལྡེ་མིག་ལས་ཤེས་པར་བྱ།

གཉིས་པ་ནག་རྩིས་ཀྱི་རིམ་པ་ལས་ཐོག་མར་རྡེལ་འགྲེམ།

༡༽ གཅེས་པའི་རྡེལ་བཞི་ ༢༽ཕན་ཚུན་རྡེལ།། ༣༽མེད་དུ་མི་རུང་ ༤༽དར་གུད་བཅས།།[1]

དེ་ཡང་ཐོག་མར་སྲོག་ལུས་དབང་ཀླུང་གི་གཅེས་པའི་རྡེལ་བཞི་དང་། གཉིས་པ་དེ་དག་ཕན་ཚུན་འཐབ་པའི་རྡེའུ། གསུམ་པ་མེད་དུ་མི་རུང་བའི་རྡེའུ། བཞི་པ་དར་གུད་ཀྱི་རྡེའུ་བཅས་རྡེའུ་སྡེ་ཚན་བཞིའོ།།

དང་པ་གཅེས་པའི་རྡེའུ་བཞི་བོར་ཚུལ།

བརྩི་བྱའི་སྲོག་ལུས་དབང་ཀླུང་གིས། །ལོ་ཟླ་ཞག་དུས་བཞི་པོ་ཡི།།

སྲོག་གིས་སྲོག་དང་ལུས་ཀྱིས་ལུས། །ལ་སོགས་འཐབ་པའི་རྡེ་འུ་བཞི།།

གནམ་ལོ་ཆུ་འབྲུག་ཟླ་བ་གཉིས་པའི་ཚེས་གཉིས། མཚན་མོ་ཆུ་ཚོད་༡༠དང་སྐར་མ་ལྔ།

སྦྱོང་བརྡར་གྱི་ཆེད།

བརྩི་བྱ།		འཐབ་ཟླ་ལོ་ཟླ་ཞག་དུས་བཞིའི་སྲོག་སོགས་ངོས་འཛིན།		རྡེའུ།
སྲོག
ལུས།
དབང་།
ཀླུང་།

 གཉིས་པ་ནང་གསེས་ཕན་ཚུན་གྱི་རྡེའུ་ཉེར་བཞི་བོར་ཚུལ།

སྲོག་ལུས་དབང་ཀླུང་རེ་རེ་ཡིས། །གཞན་གསུམ་འཐབ་རྡེལ་བཅུ་གཉིས་དང་།།

ལྡོག་འཐབ་རྡེ་འུ་བཅུ་གཉིས་སྟེ། །བསྡོམས་ན་ཉི་ཤུ་རྩ་བཞི་བོར།།

ཐོག་མར་སྲོག་གིས་ལུས་དབང་ཀླུང་གསུམ་ལ་འཐབ་པའི་རྡེའུ་གསུམ། དེ་བཞིན་ལུས་དབང་ཀླུང་གིས་ཀྱང་གཞན་གསུམ་ལ་འཐབ་པའི་རྡེའུ་གསུམ་གསུམ་སྟེ་བཅུ་གཉིས་དང་། དེ་ནས་དེ་དག་གསུམ་གསུམ་གྱིས་སྲོག་ལ་ཕར་འཐབ་རྡེའུ་བཅུ་གཉིས་སྟེ་བསྡོམས་ན་ཉི་ཤུ་རྩ་བཞིའོ།།

༼འགྲེལ་བཤད་ཀྱི་སྐབས་སུ་བཅད་པ་ཞེས་པ་ནི་རྡེའུ་ནག་པོ་དང་། བསྐྱེད་པ་ཞེས་པ་ནི་རྡེའུ་དཀར་པོར་གོ་དགོས་ཤིང་། འོག་གི་རེའུ་མིག་དང་པོའི་ནང་ཀླུང་གིས་སྲོག་ལུས་དབང་གསུམ་ལ་འཐབ་པའི་ཚེ་རྡེའུ་གསུམ་ཀ་དཀར་པོ་ཡིན་པས། སྲོག་ལུས་དབང་གྱིས་ཀླུང་རྟ་བསྐྱེད་པ་དང་། དེ་བཞིན་རེའུ་མིག་གཉིས་པའི་ནང་ལུས་དབང་གི་རྡེའུ་ཆ་ཚང་དཀར་པོ་ཡིན་པས། ལུས་ཀྱིས་སྲོག་དབང་ལུས་གསུམ་བསྐྱེད་པ་དང་། དེ་བཞིན་དབང་ཐང་གིས་སྲོག་ལུས་ཀླུང་གསུམ་བསྐྱེད་པ་ཡིན། ལུས་དབང་ཀླུང་གསུམ་གྱིས་སྲོག་ལ་འཐབ་པའི་ཚེ་རྡེའུ་དང་པོ་གཉིས་ནག་པོ་བབས་འདུག་པས། སྲོག་གིས་ལུས་དབང་ལ་བཅད་པ་ཡིན།

ནང་གསེས་ཀྱི་རྡེའུ་དེ་དག་གསུམ་ཚན་བརྒྱད་ཡོད་ལ། གསུམ་ཚན་ནང་གསེས་རྡེའུ་གསུམ་རེ་ཡོད་པའི་གསུམ་ཀ་ནག་ན་བཟང་པོ་མི་འོང་བ་ཡིན།༽

སྦྱོང་བརྡར་གྱི་ཆེད།

རེའུ་མིག་དང་པོ།						རེའུ་མིག་གཉིས་པ།
འཐབ་བྱེད་སྲོག་སོགས་བཞི།		འཐབ་ཟླ་གཞན་གསུམ།		རྡེའུ།		འཐབ་བྱེད་གཞན་གསུམ།		འཐབ་ཟླ་སྲོག་སོགས་བཞི།		རྡེའུ།
སྲོག		ལུས།				ལུས།		སྲོག
		དབང་།				དབང་།
		ཀླུང་།				ཀླུང་།
ལུས།		སྲོག				སྲོག		ལུས།
		དབང་།				དབང་།
		ཀླུང་།				ཀླུང་།
དབང་།		སྲོག				སྲོག		དབང་།
		ལུས།				ལུས།
		ཀླུང་།				ཀླུང་།
ཀླུང་།		སྲོག				སྲོག		ཀླུང་།
		ལུས།				ལུས།
		དབང་།				དབང་།

མེད་དུ་མི་རུང་བའི་རྡེའུ་གཉིས།

ཁ་ཡན་ཁོང་ནོང་རྡེལ་དཀར་དང་། །སེ་ཤིག་འདུན་ཁུར་ནག་པོ་འོ།།

ཁ་རལ་དཀར་ནག་ཕྱེད་མ་དང་། །བརྩི་བའི་དུས་དེར་རྡེལ་དཀར་གཅིག།

ཁ་ཡན། ཁོང་ནོང་། སེ་ཤིག འདུན་ཁུར་དང་། ཁ་རལ་གང་ཡིན་གྱི་རྡེའུ་གཅིག་དང་། རྩིས་པས་སྐྱེས་རྩི་བརྩི་བའི་དུས་ཚོད་གང་ཡིན་གྱི་རྡེའུ་གཅིག་སྟེ་རྡེའུ་གཉིས་བཞག་དགོས། ཁ་ཡན་སོགས་གང་ཡིན་འོག་གི་རེའུ་མིག་ལ་ལྟོས།

ཁ་ཡན	ཆུ་བྱི།	ས་གླང་།	ཤིང་སྟག་ཡོས།	ས་འབྲུག	མེའི་རྟ་སྦྲུལ།	ས་ལུག	ལྕགས་བྱ་སྤྲེལ།	ས་ཁྱི།	ཆུ་ཕག
ཁོང་ནོང་།	ལྕགས་བྱི།	མེ་གླང་།	ཆུ་སྟག་ཡོས།	མེ་འབྲུག	ཤིང་རྟ་སྦྲུལ།	མེ་ལུག	སའི་བྱ་སྤྲེལ།	མེ་ཁྱི།	ལྕགས་ཕག
སེ་ཤིག	ཤིང་བྱི།	ལྕགས་གླང་།	མེའི་སྟག་ཡོས།	ལྕགས་འབྲུག	སའི་རྟ་སྦྲུལ།	ལྕགས་ལུག	ཆུའི་བྱ་སྤྲེལ།	ལྕགས་ཁྱི།	ཤིང་ཕག
ཁ་རལ།	མེ་བྱི།	ཆུ་གླང་།	སའི་སྟག་ཡོས།	ཆུ་འབྲུག	ལྕགས་རྟ་སྦྲུལ།	ཆུ་ལུག	ཤིང་གི་བྱ་སྤྲེལ།	ཆུ་ཁྱི།	མེ་ཕག
འདུན་ཁུར།	ས་བྱི།	ཤིང་གླང་།	ལྕགས་སྟག་ཡོས།	ཤིང་འབྲུག	ཆུའི་རྟ་སྦྲུལ།	ཤིང་ལུག	མེའི་བྱ་སྤྲེལ།	ཤིང་ཁྱི།	ས་ཕག

བརྩ་བའི་དུས། ཤིང་རྟ་ཟླ་༧པའི་ཚེས་༡༣ཕྱེད་ཡོལ་ཆུ་ཚོད་༥། ཤིང་རྟ། ཤིང་ཁྱི། ས་སྟག ཆུ་བྱ། 

སྲོག་སོགས་བཞི་ཡིས་སྐྱེས་དུས་ཀྱི། །ལོ་ཟླ་ཞག་དུས་བཞི་པོ་ལ།།

འཐབ་པའི་དར་གུད་རྡེ་འུ་བཞི། །བཟང་དྲུག་རྡེལ་དཀར་ངན་དྲུག་ནག།

བརྩི་བྱའི་སྲོག་ལུས་དབང་ཀླུང་བཞི་པོས་སྐྱེས་པའི་དུས་ཀྱི་ལོ་ཟླ་ཞག་དུས་བཞི་ལ་འཐབ་པའི་དར་གུད་ཀྱི་རྡེའུ་བཞི་ལ་ངན་འབྲས་གང་ཡིན་འོག་གི་རེའུ་མིག་བཀོད་པ་ལྟར་འགོད་རྒྱུ་དང་། བཟང་དྲུག་ངན་དྲུག་གི་རྡེའུ་ཀྱང་བཀོད་པར་བྱའོ།།

བཟང་པོའི་རབ།		བཟང་པོའི་འབྲིང་།		བཟང་པོའི་ཐ།		ངན་པའི་རབ།		ངན་པའི་འབྲིང་།		ངན་པའི་ཐ།
དར་བ།	ལས་བྱེད།	ཁྲུས་བྱེད།	གོས་གྱོན།	ལུས་རྫོགས།	བཙས་པ།	དབུགས་ལེན།	མངལ་གནས།	གུད་པ།	ན་བ།	ཤི་བ།	དུར་ཞུགས།
གཏེར་ཆེན་རྙེད།	རྒྱུན་རིང་བ།	བསམ་གྲུབ།	གསོ་ཐུབ།	བདེ་ལྡན།	ལོངས་སྤྱོད་ཚེ་ཐོབ།	སྐལ་ཟད།	བྱུར་ངན་ལྷུང་།	བྱེ་བྲལ།	ཕུང་གྱོད།	གཡང་ཉམས།	རྒྱུན་ཆད།

སྦྱོང་བརྡར་གྱི་ཆེད།

བརྩི་བྱ་ཆུ་འབྲུག		ལོ་ཟླ་ཞག་དུས།	དར་གུད།	ངན་འབྲས།	རྡེའུ།
སྲོག
ལུས།
དབང་།
ཀླུང་།

འབྱུང་རྩིས་ལོ་ཟླ་ཞག་དུས་དང་། །སྐྱེས་སྤར་སྐྱེས་སྨེ་དང་བཅས་འགོད།།

ལོ་ཟླ་ཞག་དུས་འདི་ཡང་སྐར་རྩིས་ནས་བྱུང་བ་དེ་དག་མིན་པར་གནམ་ལོ་འབྲུག ཟླ་བ་སྦྲུལ། ཞག་བྱ། དུས་ཚོད་ཕག་ཅེས་པ་ལྟ་བུའི་འབྱུང་རྩིས་ཀྱི་ཁམས་དང་སྦྱར་བའི་ལོ་རྟགས་ཀྱི་ལོ་ཟླ་ཞག་དུས་བཀོད་དགོས། དེ་ནས་སྤར་ཁ་སྐྱེས་སྤར་དང་། སྨེ་བ་སྐྱེས་སྨེའམ་གནམ་ལོའི་སྨེ་བ་བཀོད་དགོས།

བཙས་རླུང་རྒྱ་མཚོའི་རྩིས་བཞུགས་སོ།

༈ དེ་ནས་ལྷ་དཔལ་འདྲེ་བདུད་བཤད། །མཐུན་པར་བཙས་པ་ཚེ་ཡི་བུ།།

བུར་གྱུར་བཙས་པ་དཔལ་གྱི་བུ། །མར་འགྱུར་བཙས་པ་ལྷ་ཡི་བུ།།

གྲོགས་འགྱུར་བཙས་པ་འདྲེ་ཡི་བུ། །དགྲ་འགྱུར་བཙས་པ་བདུད་ཀྱི་བུ།།

དེ་ཡང་ལེགས་བཤད་དངུལ་གྱི་མེ་ལོང་ལྟར་བཤད་ན། ཕ་མའི་སྲོག་ཁམས་དང་བུ་ཚའི་སྲོག་ཁམས་བར་གྱི་འབྲེལ་བ་བརྩི་བ་སྟེ། ཕ་མའི་སྲོག་ཤིང་ཁམས་ཡིན་པའི་ལོ་རྟགས་སྟག་ཡོས་གང་རུང་ལ། བུ་ཚ་སྟག་ཡོས་ལོ་པ་གང་རུང་སྐྱེས་ན་སྲོག་ཁམས་མཐུན་པའི་དབང་གིས། མཐུན་པར་བཙས་པ་ཚེའི་བུ་ཞེས་བྱ་བ་དང་། མཐུན་པར་བཙས་པ་འདི་ལ་དཀའ་ངལ་མི་འདུག་མོད། གཞན་རྣམས་ཀྱི་སྐབས་སུ་མ་བུ་དགྲ་གྲོགས་འདི་ ཕ་མས་བུ་ཚ་ལ་བརྩི་རྒྱུ་མིན་པར་བུ་ཚས་ཕ་མ་ལ་བརྩི་དགོས་འདུག དེས་ན་ཕ་མ་སྟག་ཡོས་ལོ་པ་ལ་བུ་ཚ་རྟ་སྦྲུལ་གང་རུང་སྐྱེས་ན། བུ་ཚའི་སྲོག་ཁམས་མེ་ནས་ཕ་མའི་སྲོག་ཁམས་ཤིང་ལ་བརྩི་བའི་ཚེ། མེ་མ་ཤིང་ཡིན་པས། མ་གྱུར་བཙས་པ་ལྷའི་བུ། ཞེས་བྱ་བ་ཡིན།  འདི་ལ་དཀའ་ངལ་ཕྲད་ཀྱི་འདུག་ན་རེའུ་མིག་བཟོས་ནས་བརྩི་ན་ཕན།

བུ་ཚ་སྟག	ཕ་མ་བྱི་བ།	གྲུབ་འབྲས།
ཤིང་།	ཆུ། ༼ ཤིང་མ་ཆུ།༽	ཕ་མ་ལྷ།

༼རྩིས་པ་རྣམས་ཀྱིས་བཙས་ཀླུང་འདིའི་ནང་དོན་མ་གོ་བར་འགྲེལ་བཤད་རྫུན་པ་ཇི་ཙམ་རྒྱབ་ཡོད་པ་ནི་ངས་མི་ཤེས།[1]  འདི་ནི་ཕ་མའི་ལོ་རྟགས་དང་། བུ་ཚའི་ལོ་རྟགས་ལ་བལྟ་རྒྱུ་མིན་པར་ བུ་ཚའི་སྲོག་ལུས་དབང་ཀླུང་དང་། མའི་བབས་སྤར་རམ་བུ་ཚའི་སྐྱེས་སྤར་བར་གྱི་འབྲེལ་བ་ཞིག་ཡིན་འདུག དེའང་བཻ་དཀར་ནང་། བུ་ཚའི་སྲོག་ལུས་དབང་ཀླུང་དང་སྤར་ཁ་སྦྱར་བའི་འགྲེལ་བཤད་དང་། སྨེ་བ་དང་སྦྱར་བའི་འགྲེལ་བཤད་གསུངས་འདུག་པ་མ་ཟད།[2] འབྱུང་རྩིས་ཟླ་ཟེར་ནང་འདི་འདྲ་གསུངས་འདུག

བུ་ཚའི་སྲོག་ལུས་དབང་ཀླུང་བཞིས། །རང་སྐྱེས་སྤར་སྨེ་གཉིས་ལ་འཐབ། །རྡེལ་རྩར་མ་འདྲེས་སོ་སོར་སྒྲིགས། །མ་དང་འཕྲད་ན་ཕ་མ་ལྷ། །བུ་དང་འཕྲད་ན་བུ་ཚ་དཔལ། །གྲོགས་དང་འཕྲད་ན་ཐུབ་པ་འདྲེ། །དགྲ་དང་འཕྲད་ན་མི་ཐུབ་བདུད། །རང་ནང་འཕྲད་པ་མཐུན་པ་ཚེ།།[3] ཞེས་གསུངས་པའི་ནང་དོན་རྡེའུ་བོར་ཚུལ་བཤད་ན།༽

༼མ་ལོ་༢༦ས་ཡོས་ལོ་པ་དང་། ༢༠༡༢ལོར་སྐྱེས་པའི་བུ་ཆུ་འབྲུག་ལོ་པ་གཉིས་ཀྱི་རྡེལ་འགྲེམ།༽

བརྩི་བྱ་ཆུ་འབྲུག		སྐྱེས་སྤར་ཁེན་གནམ།	སྤར་ཁའི་འབྲས་བུ།	རང་སྨེ་༦དཀར།	སྨེ་བའི་འབྲས་བུ།
སྲོག	ས།	ས།	མཐུན་པ་ཚེ།	ལྕགས།	བུ་ཚ་དཔལ།
ལུས།	ཆུ།	ས།	མི་ཐུབ་བདུད།	ལྕགས།	ཕ་མ་ལྷ།
དབང་།	ཆུ།	ས།	མི་ཐུབ་བདུད།	ལྕགས།	ཕ་མ་ལྷ།
ཀླུང་།	ཤིང་།	ས།	ཐུབ་པ་འདྲེ།	ལྕགས།	མི་ཐུབ་བདུད།

༼དེས་ན་ལེགས་བཤད་དངུལ་གྱི་མེ་ལོང་ནང་ཡོད་པ་འདི་ ལེགས་ཚོ་བདེ་སྐྱིད་དཔལ་སྟེར་ནང་དུའང་འདྲ་བཤུས་རྒྱབ་ནས་ནོར་བ་རྒྱུན་འབྱམས་སོང་བ་རྣམས་ རང་གིས་དག་བཅོས་གྱིས།༽

---

[1] ལེགས་བཤད་དངུལ་གྱི་མེ་ལོང་།  ཅིཏྟའི་མིང་ཅན། ༼ཉེར་མཁོའི་རྩི་དཔེ་ཕྱོགས་བསྡུས། ཤོག་གྲངས། ༡༢༦༽ ཀེ་ཨེམ་ཊི། རྟ་སྦྲུལ་བྱུང་ན་དཔལ་གྱི་བུ་ཡིན། ཟེར་བ་དེ་ ཕ་མ་རྟ་སྦྲུལ་དང་བུ་ཚ་རྟ་སྦྲུལ་ཁམས་མཐུན་ཡིན་པས་ ཚེའི་བུ་ཡིན་རྒྱུ་ལ་དཔལ་གྱི་བུ་ཟེར་ཡིག་ནོར་མིན་ནམ་སྙམ། དེ་བཞིན་གླང་ལུག་བྱི་ཕག་བྱུང་ན་དཔལ་གྱི་བུ་སོགས་ཀྱང་དཔྱད་གཞི་ཆེ།   

[2] བཻ་དཀར་སྟོད་ཆ།  ཤོག་གྲངས། ༢༩༤ ། སྡེ་སྲིད་སངས་རྒྱས་རྒྱ་མཚོ།  ཀྲུང་གི་བོད་ཀྱི་ཤེས་རིག་དཔེ་སྐྲུན་ཁང་།

[3] འབྱུང་རྩིས་ཟླ་ཟེར།  ལོ་ཆེན་དྷརྨ་ཤྲཱི། ༼རྣམ་རིག་སྐར་རྩིས། ཤོག་གྲངས། ༢༥༡༽ མི་རིགས་དཔེ་སྐྲུན་ཁང་། ༢༠༠༤

སྐར་རྩིས་དང་དབྱངས་འཆར་འདྲེས་པའི་སྐར་ཁྱིམ་དང་དུས་སྦྱོར་འབྲས་བུ།

ཟླ་འདིའི་ཁྱིམ་བསླེབས་བརྟག་ནས་ནི། །ཁྱིམ་འདིའི་འགྲེལ་བཤད་བྱེད་དང་གཅིག།

སྐར་ཁྱིམ་དང་དུས་སྦྱོར་གྱི་སྐབས་སུ་ཤེས་དགོས་པ་ཞིག་ནི། རྒྱུ་སྐར་ཉི་ཤུ་རྩ་བརྒྱད་ཀྱི་རྒྱ་ཁྱོན་ཇི་ཙམ་ཡོད་པ་དེ་དག་དུམ་བུ་བཅུ་གཉིས་ལ་བགོས་པའི་དུམ་བུ་རེ་ལ་སྐར་ཁྱིམ་རེ་རེ་བརྩི་བ་ཡིན། སྐར་ཁྱིམ་འདི་དག་གི་མིང་ལ་ལུག་གླང་འཁྲིག་པ་ལ་སོགས་པ་བཏགས་པ་ནི། སྐར་མ་རང་གི་ངོས་ནས་ལུག་དང་འདྲ་བ་ཡོད་པ་མིན་ན་ཡང་རྟོག་བཟོའི་སྒོ་ནས་སྐར་མ་ལ་ཐིག་འཐེན་ནས་ལུག་དང་གླང་ལ་སོགས་པ་དང་འདྲ་བར་བཟོས་ནས་མིང་དེ་ལྟར་བཏགས་པ་ཙམ་ཞིག་ཡིན།

སྐར་རྩིས་ཀྱི་ལོ་འགོ་ཟླ་བ་གསུམ་པ་ནས་ཡིན་ལ། ཟླ་བ་གསུམ་པ་ལུག་གི་ཁྱིམ་ནས་འགོ་བཙུགས་ཏེ་ཟླ་བ་གཉིས་པའི་བར་དུ་ཟླ་གྲངས་དང་ཁྱིམ་གྲངས་རིམ་པ་བཞིན་དུ་བཞག་པ་གཤམ་གསལ་རེའུ་མིག་ལྟར་ཡིན།

ཟླ་བ།

༣

༤

༥

༦

༧

༨

༩

༡༠

༡༡

༡༢

༡

༢

སྐར་ཁྱིམ།

ལུག

གླང་།

མཁྲིག་པ།

ཀརྐ་ཊ།

སེངྒེ།

བུ་མོ།

སྲང་།

སྡིག

གཞུ།

ཆུ་སྲིན།

བུམ་པ།

ཉ།

འདི་ནི་རགས་པའི་ཆ་ནས་ཟླ་བ་གསུམ་པའི་ནང་ཉི་མ་ལུག་གི་ཁྱིམ་དུ་ཡོད་དགོས་པའི་དོན་ཡིན། ཡིན་ན་ཡང་ཉི་མ་ལུག་ཁྱིམ་དུ་ཟླ་བ་གསུམ་པའི་ཚེ་གྲངས་ཇི་ཙམ་ན་འབྱོར་བ་དེ། ཟླ་ཐོ་ནང་གི་ཟླ་བ་གང་ཡིན་འདིའི་འགྲེལ་བཤད་ཀྱི་སྐབས་སུ་ཟླ་འདིའི་ཁྱིམ་བསླེབས་ཀྱི་ཚེས་གྲངས་བཀོད་པ་དེར་བལྟ་དགོས། དཔེར་ན་ཟླ་བ་གསུམ་པའི་ཁྱིམ་བསླེབས་ཚེས་བདུན་ནས་ཡིན་པ་དང་། སྐྱེས་དུས་ཚེས་ལྔ་ལྟ་བུ་ཡིན་ན་ཉི་མ་ཉ་ཁྱིམ་ནང་ཡོད་དགོས་པ་དང་ཉ་ཁྱིམ་དེའི་འགྲེལ་བཤད་རྒྱབ་དགོས། ཡང་ཟླ་བ་འདིའི་ཚེས་༢༨ལྟ་བུ་ཞིག་ལ་ཉི་མ་གླང་ཁྱིམ་དུ་བསླེབས་ཟིན་པ་དང་། ༢༩ལ་ཕྲུ་གུ་བཙས་ན་ཟླ་བ་གསུམ་པ་ཡིན་ཀྱང་གླང་ཁྱིམ་གྱི་འགྲེལ་བཤད་རྒྱབ་དགོས་པ་དེ་དག་སྤྱིར་བཏང་སྐར་ཁྱིམ་གང་ཡིན་གྱི་འགྲེལ་བཤད་ཙམ་ཞིག་ཡིན།

ཏཏྐཱལ་དུས་སྦྱོར་བཅུ་གཉིས། ༼ཏཏྐཱལ། Tatkaal ཞེས་པ་འདིའི་དུས་ཞེས་པའི་དོན་ཡིན།༽

དུས་སྦྱོར་གྱི་རྩི་འདི་རྙོག་དྲག་ཆེ་ཤོས་ཅིག་ཡིན། འདི་ཡང་རབ་བྱུང་ན་སྐར་རྩིས་ནས་བྱུང་བའི་དུས་སྦྱོར་གྱི་རི་མོ་ལྟར་དུ་རྒྱབ་དགོས། དེ་ལྟར་མ་བྱུང་ན་ཐབས་ཤེས་གཞན་གཅིག་ཡོད་པ་ནི་གཤམ་དུ་འཆད་པར་འགྱུར་ལ། སྔོན་ལ་ཤེས་དགོས་པ་ནི་འདི་ཉིད་ཡིན། ཉིན་ཞག་གཅིག་ལ་ལག་འཁོར་ཆུ་ཚོད་ཉེར་བཞི་དང་། དུས་ཡུན་འདི་ཙམ་ལ་སྐར་ཁྱིམ་གྱི་དུས་སྦྱོར་བཅུ་གཉིས་ཐེངས་གཅིག་འཁོར་བ་ཡིན་པས། ཆུ་ཚོད་ཀྱི་དབང་དུ་བྱས་ན་རགས་པ་དུས་སྦྱོར་རེ་ལ་ལག་འཁོར་ཆུ་ཚོད་གཉིས་༼ཡང་ན་སྐར་ཆ་༡༢༠༽རེ་ཡོད་པ་ཡིན། འདི་ཡང་ཉི་མ་ལུག་ཁྱིམ་དུ་བསླེབས་པའི་ཚེས་གྲངས་འདིའི་སྔ་དྲོ་ནམ་ལངས་ཀྱི་དུས་སུ་ལུག་གི་དུས་སྦྱོར་ཤར་བ་ཡིན་ན་ཡང་། འདིའི་སང་ཉིན་ནམ་ལངས་ཀྱི་དུས་སུ་ལུག་གི་དུས་སྦྱོར་ཤར་ནས་སྐར་ཆ་བཞི་ཙམ་འགྲོ་ཟིན་པ་ཡིན། དེ་བཞིན་ཉི་མ་རེ་ལ་སྐར་ཆ་བཞི་རེ་སྔ་བར་ཤར་ནས། ཉིན་ཞག་སུམ་ཅུ་ཟིན་པ་ན་སྐར་ཆ་བཞི་པོ་སུམ་ཅུས་བསྒྱུར་བའི་སྐར་ཆ་བརྒྱ་དང་ཉི་ཤུ་སྟེ་ལག་འཁོར་ཆུ་ཚོད་གཉིས་འགྲོ་ཟིན་ནས་ལུག་གི་དུས་སྦྱོར་རྫོགས་པ་དང་། ཉིན་ཞག་སུམ་ཅུའི་རྗེས་ཀྱི་སྔ་དྲོའི་ནམ་ལངས་ཀྱི་སྐབས་སུ་གླང་གི་དུས་སྦྱོར་འཆར་བ་ཡིན།

ཁྱིམ་བསླེབས་ཉིན་ནས་སྐྱེས་བར་གྱི། །ཉིན་གྲངས་ཇི་སོང་བརྩིས་ནས་ནི།།

ཉིན་གྲངས་སྐར་ཆ་བཞི་ཡིས་བསྒྱུར། །བརྒྱ་དང་ཉི་ཤུ་ལས་ཕབས་ལྷག

ཁྱིམ་འདི་ནམ་ལངས་བརྩམས་ཏེ། །ཇི་ཙམ་ལྷག་ལུས་སྐར་ཆ་ཡིན།།

དེ་ནས་ཁྱིམ་རེར་ཆུ་ཚོད་གཉིས། །བརྩིས་ནས་སྐྱེས་བར་ཇི་སོང་བརྟག།

ཉི་མ་ཁྱིམ་གང་དུ་བསླེབས་པའི་ཉིན་དེ་ནས་བྱིས་པ་བཙས་ཀྱི་བར་དུ་ཉིན་གྲངས་ཇི་ཙམ་སོང་བ་བརྩིས་ནས། ཉིན་གྲངས་འདི་ཉིད་བཞིས་བསྒྱུར་བ་འདི་ནི་སྐྱེས་པའི་སྔ་དྲོ་ནམ་ལངས་ཀྱི་དུས་སུ་དུས་སྦྱོར་འདིའི་སྐར་ཆ་༡༢༠ལས་ཇི་ཙམ་འདས་ཟིན་པ་བལྟ་བ་དང་། སྒྱུར་གྲངས་འདི་བརྒྱ་དང་ཉི་ཤུ་ལས་ཕབ་པ་ནི། དུས་སྦྱོར་འདི་རྫོགས་པ་ལ་ད་དུང་སྐར་ཆ་ཇི་ཙམ་ལྷག་ལུས་ཡོད་པ་བལྟ་བ་ཡིན།

དེས་ན་ལྷག་ལུས་ཀྱི་སྐར་ཆ་འདི་ནམ་ལངས་ཆུ་ཚོད་ལྔ་པའི་སྟེང་དུ་བསྡོམས་ནས་ཆུ་ཚོད་ལྔ་དང་སྐར་ཆ་ཇི་ཙམ་སོང་བ་ངོས་འཛིན་བྱས་ནས། དུས་ཚོད་འདི་ཙམ་ལ་ནམ་ལངས་ཀྱི་དུས་སྦྱོར་འདི་རྫོགས་པ་ཡིན། དེ་ནས་ཆུ་ཚོད་གཉིས་གཉིས་ལ་དུས་སྦྱོར་རེ་བགྲང་ནས་བྱིས་པ་བཙས་པའི་དུས་ཚོད་ཀྱི་བར་དུ་བགྲང་ན་སྐྱེས་དུས་ཀྱི་དུས་སྦྱོར་གང་ཡིན་ཤེས་ནུས།།

དཔེར་ན། ཉི་མ་ལུག་ཁྱིམ་དུ་ཟླ་བ་གསུམ་པའི་ཚེས་ལྔ་ལ་བསླེབས། བྱིས་པ་སྐྱེས་པའི་དུས་ཚོད་འདི་ཚེས་༢༩ཕྱེད་ཡོལ་ཆུ་ཚོད་༣དང་ཕྱེད་ཡིན་པའི་དབང་དུ་བཏང་ན། ཁྱིམ་བསླེབས་ནས་སྐྱེས་པའི་བར་དུ་ཉིན་གྲངས་༢༥སོང་། ཉེར་ལྔ་བཞིས་བསྒྱུར་བ་ན། ༼༢༥x༤=༡༠༠༽ སྐར་ཆ་༡༠༠བརྒྱ། དེ་ཉིད་༡༢༠ལས་ཕྲི་ན་ལྷག་ལུས་སྐར་ཆ་༢༠པོ་དེ་ནམ་ལངས་ཆུ་ཚོད་ལྔ་པའི་སྟེང་དུ་བསྡོམས་ན། ཆུ་ཚོད་ལྔ་དང་སྐར་མ་ཉི་ཤུ་ཟིན་པ་ཡིན་པས། དུས་ཚོད་འདི་ལ་ལུག་གི་དུས་སྦྱོར་རྫོགས།  དེ་ནས་ཆུ་ཚོད་གཉིས་གཉིས་ལ་དུས་སྦྱོར་རེ་རྫོགས་པའི་དབང་དུ་བཏང་ནས། ༧་༢༠འི་བར་གླང་། ༩་དང་༢༠འི་བར་འཁྲིག་པ། ༡༡དང་༢༠འི་བར་ཀརྐ་ཊ། གཅིག་དང་༢༠འི་བར་སེང་གེ། ༣དང་༢༠འི་བར་བུ་མོའི་དུས་སྦྱོར་རྫོགས། ཆུ་ཚོད་༣དང་ཕྱེད་པ་འདིར་སྲང་གི་དུས་སྦྱོར་ཡིན་པ་ལྟ་བུའོ།།

༼དོགས་དཔྱོད། ལུག་གླང་འཁྲིག་པ་ལ་སོགས་པའི་དུས་སྦྱོར་བརྩི་ན་ཡང་འདྲ། ནམ་ལངས་ཡོས་ལ་སོགས་པའི་ལོ་རྟགས་བརྩི་ན་ཡང་འདྲ། ག་དེ་སྦེ་ཨིན་རུང་དུས་ཚོད་རེ་རེ་ལུ་སྐར་ཆ་༡༢༠ཡོད་པའི་ཆུ་ཚོད་གཉིས་རེ་བཞག་དགོཔ་ཡོད། དེ་ལས་འབྲུག་ཡུལ་འདི་ནང་གི་རྩིས་པ་ཚུ་གིས་ ནང་ནམ་ལངས་ཡོས་ཀྱི་དུས་ཚོད་འདི་ཆུ་ཚོད་ལྔ་དང་དྲུག ཟེར་བཞག་པའི་ཚེ་ཡོས་ཀྱི་ཆུ་ཚོད་གཉིསཔ་འདི་ ཆུ་ཚོད་བཞི་དང་སྐར་མ་གཅིག་ལས་དྲུག་ཚུན་ཚོད་བཞག་དོ་ཡོདཔ་ཨིན་མས། དེ་འབདཝ་ད་གནམ་བྱཱ་གི་དུས་ལུ་མ་བཏུབ་མེད་རུང་། གནམ་དགུན་གྱི་སྐབས་ལུ་ཆུ་ཚོད་བདུན་དེ་ཅིག་ཁར་ནམ་ལངས་པའི་ཚེ་ ཁྱོད་ཆ་ཁྱབ་ཀྱི་རྩིས་དང་འཁྲིལ་བ་ཅིན། ནམ་ལངས་ཡོས་ཀྱི་དུས་ཚོད་རྫོགས་ཞིནམ་ལས་ཉི་ཤར་འབྲུག་གི་དུས་ཚོད་ལས་ཕྱེད་ཀ་སོང་ཡོདཔ་ཨིན་རུ་། ཕྱི་ཁའི་དུས་ཚོད་འདི་ནམ་ལངས་ཚརཝ་ཅིག་ཨིན་ནི་དེ་གིས་མ་བཏུབ་སྦོམ་ཅིག་མཐོངམ་མས།

དུས་སྦྱོར་གྱི་སྲང་ཚད་ཆུ་ཚོད་འདི་ལུ་རིང་མཐུང་མ་འདྲཝ་ཡོད་མི་འདི་ཁྱོད་ཆ་ཁྱབ་ཀྱིས་མཐོང་མཐོངམ་འོང་། དེ་སྦེ་ཡོད་དགོ་མི་འདི་ནམ་ལངས་དུས་ཚོད་ལུ་འགྱུར་བ་ཡོད་མི་འདི་དང་། ཉིན་ཚད་རིང་མཐུང་ཡོད་ནི་འདི་གིས་ཨིན་མས། འདི་འབདཝ་ལས་ངོ་མ་འབད་བ་ཅིན། གནམ་བྱཱ་གི་ནམ་ལངས་འདི་ཆུ་ཚོད་ལྔ་དེ་ཅིག་ལས་བཞག་ཞིནམ་ལས། ཉི་མའི་དུས་སྦྱོར་དྲུག་གི་དུས་ཡུན་ཆུ་ཚོད་གཉིས་ལས་ལྷགཔ་བཏང་དགོཔ་དང་། ཕྱི་རུའི་དུས་སྦྱོར་དྲུག་གི་དུས་ཚོད་ཆུ་ཚོད་གཉིས་ལས་ཉུངམ་བཏང་དགོ། དེ་བཟུམ་སྦེ་དགུན་གྱི་དུས་ལུ་ནམ་ལངས་ཆུ་ཚོད་དྲུག་དང་ཕྱེད་དེ་ཅིག་འབད་བའི་སྐབས་ལུ་ ཉི་མའི་དུས་སྦྱོར་ཆུ་ཚོད་མཐུང་ཀུ་བཟོ་ནི་དང་། ཕྱི་རུའི་དུས་སྦྱོར་ཆུ་ཚོད་རིངམ་བཏང་དགོཔ་དེ་ཚུ་རྣ་བ་གིས་མ་གོཝ་འདྲཝ་བས་མེན་ན། ཚར་གཅིག་སྐར་རྩིས་རིག་པའི་གཞུང་ལུགས་འདི་ཚུ་ལུ་གཟིགས་ཤིག ནམ་ལངས་ཀྱི་དུས་ཚོད་འདི་ཆུ་ཚོད་བཞི་དང་སྐར་མ་གཅིག་ལས་མེན་པར་ཆུ་ཚོད་ལྔ་པ་ལས་བཞག་རུང་ ཧ་དྲག་པའི་སྐྱོན་མ་གཏོགས་ཕྱི་དྲག་པའི་སྐྱོན་མི་འདུག ག་ཅི་སྦེ་ཟེར་བ་ཅིན་ཉིནམ་རིང་ཤོ་གནམ་བྱཱ་གི་ཉིན་ལོག་སྐབས་ལུ་ཨིནམ་དང་། དེ་གི་སྐབས་ལུ་དྲོ་པ་ཆུ་ཚོད་ལྔ་བྱིདཔ་དང་རྐྱངམ་ཅིག་ནམ་ལངསམ་ཨིན་མས། དགུན་གྱི་འདི་ལོ་རྒྱུ་རང་སླབ་མི་དགོ།

རྒྱུ་མཚན་དེ་ཚུ་ལུ་བརྟེན་ཏེ་ བྱཱ་དང་དགུན་གྱི་མཚམས་བཟུམ་ཅིག་སྦེ་ནམ་ལངས་ཆུ་ཚོད་འདི་ལྔ་དང་དྲུག་ཟེརཝ་ད། ཆུ་ཚོད་ལྔ་ལས་འགོ་བཙུགས་ཏེ་ཆུ་ཚོད་དྲུག་དང་སྐར་ཆ་ང་དགུ་ཚུན་ཚོད་བཞག་པ་ཅིན་ལེགས་ཤོམ་འོང་ནི་མས།༽

སྐྱེས་བརྟག་འཁོར་ལོ་བཤད་པ།

སྐྱེས་ཉིན་ཉི་སྐར་ནས་བརྩམ་སྟེ། །རེའུ་མིག་གྲངས་དང་མཐུན་པར་བཀོད།།

སྐྱེས་དུས་སྐར་མ་གར་གནས་བརྟག །གནས་དེ་སྐྱེས་བརྟག་འཁོར་ལོ་ཡིན།།

གནས།	སྤྱི་བོ།	ཁ	དཔུང་མགོ།	མཁྲིག་མ།	ལག་པ།	སྙིང་ག	ལྟེ་བ།	གསང་བ།	པུས་མོ།	རྐང་པ།
སྐར་གྲངས།	༡	༣	༢	༢	༢	༥	༡	༡	༢	༨
ཉི་སྐར།	༢༣	༢༤་༢༥་༢༦	༠་༡	༢་༣	༤་༥	༦-༡༠	༡༡	༡༢	༡༣་༡༤	༡༥-༢༢
སྦྱོང་བརྡར།

སྐྱེས་བརྟག་འཁོར་ལོ་ངོས་འཛིན་བྱེད་པ་ལ་བྱིས་པ་སྐྱེས་པའི་གནམ་ལོ་འདིའི་ཟླ་ཐོ་དགོས། ཟླ་ཐོ་དེ་ནས་བྱིས་པ་སྐྱེས་པའི་སྐབས་ཀྱི་ཟླ་བ་དང་ཚེས་གང་ཡིན་པ་དེ་ངོས་འཛིན་བྱས་ནས། ཚེས་འདིའི་གཤམ་དུ་གྲངས་གནས་རིམ་པ་དྲུག་ཡོད་པའི་ནང་ནས། དང་པ་གཟའ། གཉིས་པ་སྐར་མ། གསུམ་པ་ཉི་སྐར་ཡིན། ཉི་སྐར་འདི་ངོས་འཛིན་བྱས་ནས་གོང་གི་རེའུ་མིག་ནང་ སྤྱི་བོ་ཞེས་པའི་འོག་དང་། ཉི་སྐར་ཞེས་པ་འདིའི་ཐད་དུ་བྲིས། ད་ལྟ་ཉི་སྐར་༢༣ཡིན་པའི་དབང་དུ་བཏང་ནས་བཀོད་ཡོད། དེ་ནས་ཁ་ལ་གཉིས་དང་དཔུང་མགོར་གསུམ་སོགས་གོང་དུ་བཀོད་པའི་གྲངས་དང་མཐུན་པར་རིམ་པ་བཞིན་དུ་བཀོད། དེ་ནས་གོང་དུ་གཟའ་སྐར་བཤད་པའི་སྐབས་སུ། བྱིས་པའི་སྐྱེས་སྐར་གང་ཡིན་ངོས་འཛིན་བྱས་པ་འདི་གང་དུ་ཡོད་པ་བལྟས་ནས། སྐྱེས་སྐར་གནས་ས་འདི་སྐྱེས་བརྟག་འཁོར་ལོ་ཡིན། དཔེར་ན་སྐྱེས་སྐར་༡༢ཡིན་པའི་དབང་དུ་བཏང་ན། སྐྱེས་བརྟག་འཁོར་ལོ་གསང་བར་གནས་འདུག་པ་ལྟ་བུ་ཡིན།།[2]

སེམས་ལ་བཞག་དགོས་པ་ནི། སྐར་༢༦གི་རྗེས་ནས་༠་༡་༢ཞེས་བཀོད་དགོས།

མཁའ་འགྲོའི་མཚན།

རྡོ་རྗེ་རིན་ཆེན་པདྨ་དང་། །ལས་དང་སངས་རྒྱས་མཁའ་འགྲོ་ལྔ།།

ཉི་མ་རེ་རེར་དབང་བྱས་པས། །དེ་དང་མཐུན་པའི་མཚན་ཞིག་གསོལ།།

མཁའ་འགྲོ་ལྔ་ནི། རྡོ་རྗེ་མཁའ་འགྲོ། རིན་ཆེན་མཁའ་འགྲོ། པདྨ་མཁའ་འགྲོ། ལས་ཀྱི་མཁའ་འགྲོ། སངས་རྒྱས་མཁའ་འགྲོ་དང་བཅས་ཏེ་ལྔ་ཡིན་ལ། དེ་དག་ཚེས་གྲངས་རེ་རེ་བཞིན་འཁོར་བ་ཡིན་པས། ཚེས་གཅིག་ནས་ལྔའི་བར་དང་། ཡང་དྲུག་ནས་བཅུའི་བར་སོགས་རིམ་པ་བཞིན་དུ་ཟླ་བ་གཅིག་ལ་ལན་དྲུག་འཁོར་བ་ཡིན་པས་དེ་དང་མཐུན་པའི་མིང་ཞིག་བཏགས་དགོས།།

དཔེར་ན་ཚེས་༡་༦་༡༡་༡༦་༢༡་༢༦རྣམས་ལ་སྐྱེས་ན། རྡོ་རྗེ་རྒྱལ་མཚན་དང་། རྡོ་རྗེ་དཔལ་མོ་ལ་སོགས་པ་བཏགས་ན་འགྲིག ཡིན་ན་ཡང་ཚེས་༤་༩་༡༤་༡༩་༢༤་༢༩འི་ལས་ཀྱི་མཁའ་འགྲོའི་ཚེས་ལ་སྐྱེས་ན། ལས་སྐྱིད་རྡོ་རྗེ་ལ་སོགས་པ་མིང་འགའ་ཞིག་ལས་མེད་པས་དེའི་ཚབ་ཏུ་ལས་དང་དོན་གཅིག་པའི་ཚིག ཀརྨ་དང་འབྲེལ་ནས་བཏང་ནའང་རུང་བ་ཡིན་ནོ།།

སྐྱེས་རྩིས་བསྡུས་པའི་དབང་བྱས་ན། །འདི་ཙམ་ཞིག་གིས་འཐུས་པ་ཡིན།།

རྒྱས་ན་དུས་སྦྱོར་གནས་མལ་ལ། །གཟའ་འགྲེམ་འགྲེལ་བཤད་མ་ནོར་གཅེས།།

འགྲེལ་བཤད་གཞུང་ནས་ཕབས་པའི་སྐབས། །ཕབས་བཤུས་རྐྱང་པ་མ་ཡིན་པར།།

དོན་ཚན་སྙིང་པོ་འགྲིལ་ནས་ནི། །བཅུད་དོན་ཙམ་ཞིག་ཕབས་ན་ལེགས།།

ཉི་མ་མཐོང་དཀའི་སྟག་རྩེ་འདིར། །ཚ་བོའི་མི་མཐུན་ཕྱོགས་ལོངས་ཀྱང་།།

གཅེན་པོ་ཤེས་རབ་ཀྱིས་སྐུལ་ནས། །ནུ་བོ་རང་གིས་བྲིས་པ་ཡིན།།

---

[1]    དེ་ཡང་འབྱུང་རྩིས་ཟླ་ཟེར་ནང་། ནམ་ཞག་གཏན་གྱི་མཐའ་རཙིས་ལ། །གཅེས་པའི་རྡེལ་བཞི་སྒོས་རྡེལ་གཅིག །མེད་དུ་མི་རུང་རྡེ་འུ་གཉིས། །མི་འགྱུར་ཀླུང་གི་རྡེ་འུ་ ལྔ།།

      བརྒྱ་འདྲེའི་རྡེ་འུ་བརྒྱ་ཕྲག་གཅིག །སྟངས་གཅོད་རྡེ་འུ་ཉི་ཤུ་བཞི། །སྤྱི་བསྡུས་བརྒྱ་དང་སུམ་ཅུ་དྲུག[1] ཅེས་གསུངས་ཡོད་ན་ཡང་། སྒོས་རྡེལ་གཅིག་དེ་རུས་ཁམས་དང་སྦྱར་བའི་རྩིས་ཡིན་པས་སྒོས་མཁོ་མེད་པ་དང་། མི་འགྱུར་ཀླུང་ལྔ་དང་། དེ་དང་འབྲེལ་བའི་བརྒྱ་འདྲེའི་རྡེའུ། དེའི་སྟངས་གཅོད་བཅས་ཀྱི་རྡེའུ་དང་བཅས་པ་རྣམས་ནི་ཕན་ཐོགས་ཅན་དུ་མ་མཐོང་བས་རེ་ཞིག་བཏང་སྙོམས་སུ་བཞག་པ་དང་སྦས་པ་མཛུབ་ཚུགས་ནས་བཤད་པའི་སྲོག་སོགས་ཕན་ཚུན་འཐབ་པའི་རྡེའུ་དེ་ཁ་སྐོང་རྒྱབ་ནས་རྡེལ་གྲངས་སྡེ་ཚན་བཞི་ཙམ་ཞིག་བཞག་ཡོད།

[2] མི་ཕམ་རིན་པོ་ཆེ། དབྱངས་འཆར་ཤེལ་གྱི་མེ་ལོང་། ཤོག་གྲངས། ༢༥༠ བོད་གཞུང་སྨན་རྩིས་ཁང་། ༡༩༩༠