ཀེག་རྩིས་གསལ་བའི་སྒྲོན་མེ།

༄༅།  །ཀེག་རྩིས་གསལ་བའི་སྒྲོན་མེ་ཞེས་བྱ་བ་བཞུགས།།

༄༅།   །བཅོམ་ལྡན་ནུས་པའི་ཚུལ་བཟུང་བ། །མཐུ་སྟོབས་བདག་པོ་ཁྱེད་ཀྱིས་ནི།།

ལས་ཀྱིས་འཁོར་བའི་སེམས་ཅན་ལ། །མི་མཐུན་རྐྱེན་ངན་བསྲུང་དུ་གསོལ།།

ཅེས་བཅོམ་ལྡན་མཐུ་སྟོབས་བདག་པོ་ལ་གསོལ་བ་འདེབས་ནས་ལས་དང་པོ་པ་ལ་ཉེ་བར་མཁོ་བའི་ལོ་གཅིག་འཁྱུད་སྐོར་ཀེག་རྩིས་མདོར་བསྡུས་སུ་བཀོད་པའི་ལས་ལ་འཇུག་པར་བྱའོ།།

ལོ་འཁོར་གཅིག་གི་ཀེག་རྩིས་ལ། །མི་འགྱུར་རྩ་བའི་རྡེའུ་དྲུག།

གཅོད་འདྲེལ་ཉེར་བཞི་ཁ་དམར་བཞི། །རྩུབ་རྡེལ་བདུན་དང་སྨེ་བའི་བཞི།།

དགུ་མིག་དུར་མིག་རྣམ་པ་གཉིས། །ཡོངས་བསྡོམས་རྡེ་འུ་ཞེ་བདུན་ཡིན།།

འདི་ལ་དང་པོ་མི་འགྱུར་རྩ་བའི་རྡེའུ་དྲུག གཉིས་པ་འདིའི་གཅོད་འདྲེལ་ཉེར་བཞི་དང་ཁ་དམར་བཞི་དང་བཅས་རྡེའུ་ཉེར་བརྒྱད།  གསུམ་པ་རྩུབ་རྡེལ་བདུན། བཞི་པ་སྨེ་བའི་ཀེག་ཕྲན་རྣམ་པ་བཞི། ལྔ་པ་དགུ་མིག་དང་། དྲུག་པ་དུར་མིག་བཅས་ཏེ་རྡེའུ་ཡོངས་བསྡོམས་ཞེ་བདུན་ནོ།།

དང་པོ་མི་འགྱུར་ཀླུང་གི་རྡེའུ་དྲུག་ནི།

གནམ་ལོ་ལོག་མེན་བབས་སྨེ་དང་། བབས་སྤར་དར་གུད་དུས་ཚོད་དྲུག།

བརྩི་བྱ་སྐྱེས་བུ་རང་གི་འཐབ་ཟླར་གྱུར་པའི་ཡུལ་དྲུག་སྟེ། དེ་ཡང་དང་པ་ད་ལོའི་གནམ་ལོ། གཉིས་པ་བརྩི་བྱ་སྐྱེས་བུའི་ལོག་མེན། གསུམ་པ་བརྩི་བྱ་སྐྱེས་བུའི་བབས་སྨེ་བཅས་གསུམ་ནི་ཕྱིའི་དབང་དུ་བྱས་པ་ཡིན། དེ་ནས་བཞི་པ་བབས་སྤར། ལྔ་པ་དར་གུད་བརྩི་སའི་གཞིར་གྱུར་པའི་ བརྩི་དུས་ཀྱི་ལོ་ཟླ་ཞག་དུས། དྲུག་པ་བརྩི་དུས་ཀྱི་ལོ་རྟགས་བཅས་ངོས་བཟུང་དགོས་པ་བཅས་ཀྱི་དོན་ཚན་དྲུག་ལ་མི་འགྱུར་རྩ་བའི་རྡེའུ་དྲུག་ཅེས་བྱ་བ་ཡིན། འདི་དག་གི་བརྩི་ཚུལ་གཅོད་འདྲེལ་གྱི་སྐབས་སུ་འཆར་པར་འགྱུར།།

གཉིས་པ་གཅོད་འདྲེལ་ཉེར་བཞི་དང་ཁ་དམར་བཞི།

བརྩི་བྱའི་སྐྱེས་བུ་གང་ཡིན་དེའི། །སྲོག་ལུས་དབང་ཀླུང་བཞི་པོ་འདིས།།

རྩ་རྡེལ་དྲུག་ལ་འཐབ་པ་ཡི། །རྡེ་འུ་ཉེར་བཞི་ཁ་དམར་བཞི།།

དང་པ་བརྩི་བྱ་སྐྱེས་བུ་ལོ་རྟགས་ངོས་བཟུང་ནས་འདིའི་སྲོག་ལུས་དབང་ཀླུང་བཞི་པོ་ཐུར་དུ་རིམ་བཞིན་བཀོད། དེ་ནས་གོང་དུ་རྩུབ་རྡེལ་གྱི་སྐབས་སུ་བཤད་པའི་འཐབ་ཡུལ་དྲུག་པོ་ཐད་ཀར་རིམ་བཞིན་བཀོད་ཅིང་། དེ་ནས་འཐབ་ཡུལ་གྱི་གནམ་ལོ་ལོག་མེན་བརྩི་དུས་བཅས་ཀྱི་སྲོག་ལུས་དབང་ཀླུང་བཞི་པོ་རེའུ་མིག་ལྟར་དུ་ཐུར་དུ་བཀོད། སྤར་ཁ་སྨེ་བ་གཉིས་ལ་སྲོག་ལུས་དབང་ཀླུང་བརྩི་རྒྱུ་མེད་པས་དེའི་ཚབ་ཏུ་རང་གི་ཁམས་གང་ཡིན་པ་དེ་རང་བཀོད། དེ་ནས་དར་གུད་ཀྱི་ས་ཁོངས་དེར་ བརྩི་དུས་ཀྱི་ལོ་ཟླ་ཞག་དུས་བཀོད་དགོས། དེ་ནས་རྡེའུ་འཐབ་པའི་ཚེ་ གཞན་རྣམས་མ་བུ་དགྲ་གྲོགས་ཀྱི་ཚུལ་དུ་འཐབ་རྒྱུ་ཡིན་ཀྱང་། དར་གུད་ནི་དེ་ལྟར་མིན་པར་དར་གུད་ཁོ་རང་གི་འཐབ་ཚུལ་ལྟར་འཐབ་པ་ན་རྡེའུ་ཉེར་བཞི་འོང་བ་དང་། དེའི་སྟེང་དུ་སྲོག་ལུས་དབང་ཀླུང་བཞིའི་ཁ་དམར་གྱི་རྡེའུ་བཞི་བཅས་ཡོངས་བསྡོམས་རྡེའུ་ཉེར་བརྒྱད་ཡིན།

 

 

སྦྱོང་བརྡར་གྱི་ཆེད།

བརྩི་བྱ།

གནམ་ལོ།

ལོག་མེན།

སྨེ་བ།

སྤར་ཁ།

དར་གུད།

བརྩི་དུས།

སྟངས་ གཅོད།

སྲོག

ལུས།

དབང་།

ཀླུང་།

རྡེའུ་བོར་ཚུལ།

༼མ་དང་འཕྲད་ན་དཀར་པོ་གསུམ། །གྲོགས་དང་འཕྲད་ན་དཀར་པོ་གཉིས། །བུ་དང་འཕྲད་ན་དཀར་ནག་ཟུང་། །དགྲ་དང་འཕྲད་ན་ནག་པོ་གཉིས། །ས་ཆུ་ནང་འཕྲད་དཀར་པོ་རེ། །ཤིང་ལྕགས་མེ་ནང་ནག་རེ་བོར། །དར་གུད་བཟང་དྲུག་གོ་རིམ་བཞིན། །རྡེའུ་དཀར་པོ་གསུམ་གཉིས་གཅིག །ངན་དྲུག་རབ་འབྲིང་ཐ་མ་གསུམ། །ཕྱེ་མ་ནག་གཅིག་ནག་གཉིས་སོ།། ༈ ཁ་དམར་རྡེའུ་བཞག་པའི་ཚུལ། །རྡེའུའི་ངོ་གྲངས་མི་འགྲིམ་པར། །གནས་སམ་སྐོར་འགོའི་ངོ་གྲངས་བགྲངས། ༽

  

གསུམ་པ་རྩུབ་རྡེལ་བདུན།

རང་ཀེག་དགྲ་གཤེད་ཁྱིམ་ཚེས་དང་། མཐུན་གསུམ་སྲི་སྐྱམ་གསང་ཀེག་བདུན།།

དང་པ་རང་ཀེག་རྩུབ་པ་ནི།  རང་གི་ལོ་རྟགས་དང་ད་ལོའི་གནམ་ལོ་གཅིག་པར་ཤར་བ་སྟེ་དཔེར་ན་བྱི་བ་ལོ་པ་ལ་གནམ་ལོ་བྱི་བ་ཤར་བའི་ཚེ་ལྟ་བུའོ།།                  གཉིས་པ་དགྲ་གཤེད་རྩུབ་པ་ནི། གནམ་ལོ་དང་རང་ལོ་གཉིས་བདུན་ཟུར་བབས་པའི་ཚེ་སྟེ། དཔེར་ན་བྱི་བ་ལོ་པ་ལ་གནམ་ལོ་རྟ་ཤར་བ་ལྟ་བུའོ།། ༼དེ་ཡང་ལོ་གྲངས་ཀྱི་དབང་དུ་བཏང་ན། ༧  ༡༩ ༣༡  ༤༣  ༥༥  ༦༧  ༧༩  ༩༡  ༡༠༣༽         གསུམ་པ་ཁྱིམ་ཚེས་རྩུབ་པ་ནི། དབང་ཁམས་མཐུན་པའི་ལོ་རྟགས་ཕོ་མོ་གཉིས་རེ་ཡོད་པའི་ནང་ནས། རང་གི་གྲོགས་དེ་གནམ་ལོར་ཤར་བའི་ཚེ་སྟེ། བརྩི་བྱ་བྱི་བ་ལ་གནམ་ལོ་གླང་ཤར་བ་ལྟ་བུ་དང་། ལྷག་པར་དུ་ཕོ་ལོ་ཡིན་ན་ལོ་གྲངས་གཉིས་དང་དྲུག་ཅུ་རེ་གཉིས། མོ་ལོ་ཡིན་ན་དྲུག་ཅུ་ཟིན་པའི་སྐབས་དེར་རང་དང་དབང་ཐང་གཅིག་པའི་ཁྱིམ་ཚེས་འདི་གནམ་ལོར་ཤར་ནས་འོང་བས་ཤིན་ཏུ་གཟབ་དགོས།             བཞི་པ་མཐུན་གསུམ་རྩུབ་པ་ནི། བརྩི་བྱའི་ཀླུང་རྟ་དང་གནམ་ལོའི་ཀླུང་རྟའི་ཁམས་མཐུན་པར་ཤར་བའི་ཚེ་སྟེ། གནམ་ལོ་རྟ་ཤར་ན་དེ་དང་ཀླུང་ཁམས་མཐུན་པའི་སྟག་དང་ཁྱི་ཀ་ལ་རྩུབ་པ་ལྟ་བུའོ།།               ལྔ་པ་སྲི་ངན་རྩུབ་པ་ནི། རང་ལ་དྲིན་ཆེ་བའི་ཕ་མེས་ཤི་བའི་སྐབས་ཀྱི་ལོ་རྟགས་དེ་གནམ་ལོར་ཤར་བའི་ཚེ་སྟེ། ཕ་མེས་ཤི་བའི་དུར་ནས་རང་གཡབ་མོ་འདེབས་པའི་དུས་ཡིན་པས་སོ།།        དྲུག་པ་སྐྱམ་ཟླ་ཞེས་པའི་རྩུབ་པ་ནི། བཟའ་ཚང་ཕོ་མི་གཉིས་པོ་བབས་སྤར་གཅིག་གི་སྟེང་དུ་བབས་པ་སྟེ། ཕོ་མོ་གཉིས་ཀ་ལོ་གྲངས་ཉེར་གསུམ་གྱི་བབས་སྤར་ཟིན་ཤིང་ལ་བབས་པ་ལྟ་བུའོ།།                        བདུན་པ་གསང་ཀེག་རྐུན་པོས་རྩུབ་པ་ནི། རང་གི་སྐྱེས་སྤར་དང་བབས་སྤར་གཉིས་གཅིག་པར་བབས་པའི་སྐབས་སུ་སྟེ། དཔེར་ན། མ་ལོ་ཉི་ཤུ་རྩ་གསུམ་ལ་རང་ཉིད་སྐྱེས་ན་སྐྱེས་སྤར་ཟིན་ཤིང་། རང་ལོ་ཉེར་གསུམ་ལ་བསླེབས་པའི་ཚེ་བབས་སྤར་ཟིན་ཤིང་ལ་བབས་པ་ལྟ་བུའོ།།

རང་ལོ།	གནམ་ལོ།					སྤར་ཁ།
བརྩི་བྱ།	རང་ཀེག	དགྲ་གཤེད།	ཁྱིམ་ཚེས།	མཐུན་གསུམ།	སྲི་ངན།	སྐྱམ་ཟླ།	གསང་ཀེག
བྱི་བ།
རྡེའུ་དཀར་ནག

བཞི་པ་སྨེ་བའི་ཀེག་ཕྲན་རྣམ་བཞི་ནི།

མལ་ཁང་ཡུལ་དང་ཁམས་ཀྱི་སྒོ། །སྐྱེས་སྨེ་བབས་སྨེ་གཅིག་བབས་མལ།།

བབས་སྨེ་གནམ་སྨེ་གཅིག་སོང་ཁང་། །བབས་སྨེ་གཉིས་ནག་ཡུལ་གྱི་ཀེག།

སྐྱེས་སྨེའི་དགྲ་སྟེང་བབས་སྨེ་བབས། །ཁམས་ཀྱི་རྒྱལ་སྒོ་འགག་པ་འོ།།

སྨེ་བའི་ཀེག་ཕྲེང་།	མལ་ཀེག		ཁང་ཀེག		ཡུལ་ཀེག	ཁམས་ཀྱི་རྒྱལ་སྒོ་འགག་པ།
དེ་དག་གི་ངོས་འཛིན།	སྐྱེས་སྨེ་དང་བབས་སྨེ་གཅིག་ཏུ་སོང་བ།		བརྩི་བྱའི་བབས་སྨེ་དང་གནམ་ལོའི་སྨེ་གཅིག་ཏུ་སོང་བ།		བབས་སྨེ་གཉིས་ནག་ལ་བབས་པ།	སྐྱེས་པའི་སྨེ་བའི་དགྲ་སྟེང་དུ་བབས་སྨེ་སོང་བའོ།།
སྨེ་བ་བཀོད་ས།	སྐྱེས་སྨེ།	བབས་སྨེ།	བབས་སྨེ།	གནམ་ལོའི་སྨེ་བ།	བབས་སྨེ།	སྐྱེས་སྨེ།	དེའི་དགྲ།
རྡེའུ།

ལྔ་པ་དགུ་མིག་ནི།

དགུ་མིག་རྐྱང་པ་སྦྲགས་མ་དང་། །སྤར་ཁ་སྨེ་བའི་དགུ་མིག་བཞི།།

རྐྱང་པ་སྐྱེས་པ་བྱི་བ་དང་། །བུད་མེད་བྱ་ནས་འགོ་བཟུང་སྟེ།།

གཡོན་སྐོར་བགྲང་པའི་དགུ་པ་རྣམས། །དགུ་མིག་ནང་དུ་ཚུད་པ་ཡིན།།

དེ་ཡང་ལོ་གྲངས་ཀྱི་དགུ་དགུ་བརྩི་བ་དང་། འབབ་ས་གཤེད་བཞི་གང་རུང་ལ་བབས་པའི་ཚེའོ།།༼དགུ་མིག་བབ་པའི་ལོ་གྲངས།༽ ༩ ༡༨ ༢༧ ༣༦ ༤༥ ༥༤ ༦༣ ༧༢ ༨༡༽

སྦྲགས་མའི་དགུ་མིག་ཅེས་པ་ནི། །ས་ཆུ་ལོ་དྲུག་བྱི་ནས་དང་།།

ཕྱོགས་གསུམ་རང་གི་འོག་མ་ནས། །གཡོན་སྐོར་བགྲང་པའི་དགུ་པ་འོ།།

ས་བཞི་དང་ཆུ་གཉིས་ཀྱི་ལོ་རྟགས་ཡིན་ན་བྱི་བ་ནས་འགོ་བཙུགས་ནས་བགྲང་དགོས་པ་དང་། ཕྱོགས་གཞན་ཤར་ལྷོ་ནུབ་གསུམ་གྱི་ལོ་རྟགས་དྲུག་པོ་གང་རུང་ཡིན་ན། ལོ་རྟགས་གཉིས་གཉིས་ཡོད་པའི་ནང་ནས་རང་གི་འོག་མ་དེ་ལས་འགོ་བཙུགས་ཏེ་བགྲང་པའི་ཚེ་དགུ་པ་དེ་མཚམས་གྱི་གཤེད་བཞི་ལོ་པ་གླང་ལུག་ཁྱི་འབྲུག་གང་རུང་ལ་བསླེབས་པ་ཡིན་པས་དེ་ལ་སྦྲགས་མའི་དགུ་མིག་ཅེས་བྱ་བ་ཡིན། སྦྲགས་མའི་དགུ་མིག་བབས་པའི་ལོ་གྲངས། ༩ ༢༡ ༣༣ ༤༥ ༥༧ ༦༩ ༨༡

རྐྱང་པ་དང་སྦྲགས་མ་གཉིས་ཀྱི་ཁྱད་པར་ནི། དེ་གཉིས་ལ་སྐོར་འགོ་མི་འདྲ་བ་དང་འབབ་ས་མི་འདྲ་བའི་ཁྱད་པར་ཡོད། དང་པ་སྐོར་འགོ་ནི་རྐྱང་པའི་སྐབས་སུ་ཕོ་ལོ་དྲུག་པ་བྱི་བ་ནས་དང་མོ་ལོ་དྲུག་པ་བྱ་ནས་སྟེ་སྐོར་འགོ་གཉིས་ལས་མེད་པ་དང་། སྦྲགས་མའི་སྐབས་སུ་བྱི་རྟ་བྱ་ཡོས་ཀྱི་སྐོར་འགོ་མི་འདྲ་བ་བཞི་ཡོད། གཉིས་པ་འབབ་ས་དེ་ཡང་རྐྱང་པའི་སྐབས་སུ་ལོ་གྲངས་དགུ་དགུ་བགྲང་པའི་དགུ་པ་དེ་གཤེད་བཞིའི་ལོ་གླང་ལུག་ཁྱི་འབྲུག་གང་ལ་བབས་ཀྱང་དགུ་མིག་ཏུ་བརྩི་ན་ཡང་། སྦྲགས་མའི་སྐབས་སུ་ཐེངས་དང་པ་བགྲང་པའི་ཚེ་དགུ་པ་བབས་སའི་གཤེད་བཞིའི་ལོ་གང་རུང་གཅིག་པུ་དེ་ཉིད་དགུ་མིག་ཏུ་ངོས་བཟུང་ནས། དེའི་ཕྱིས་ནས་དགུ་དགུ་བགྲང་རྒྱུ་མིན་པར་བཅུ་གསུམ་བགྲང་ནས་དང་པོ་གང་དུ་བབས་པའི་དགུ་མིག་དེ་རང་ལ་བརྩི་དགོས་པའི་ཁྱད་པར་ཡོད་དོ།།

༈ སྤར་ཁ་ཕོ་ལི་མོ་ཁམ་དང་།། ༈སྨེ་བ་སྐྱེས་སྨེར་བབས་པ་འོ།།

༼སྤར་ཁའི་དུར་མིག་བབས་པའི་ལོ་གྲངས། ༩ ༡༧ ༢༥ ༣༣ ༤༡ ༤༩ ༥༧ ༦༤ ༧༣ ༨༡༽ ༼སྨེ་བའི་དགུ་མིག་བབས་པའི་ལོ་གྲངས། ༡ ༡༠ ༡༩ ༢༨ ༣༧ ༤༦ ༥༥ ༦༤ ༧༣ ༨༢ ༩༡༽

དྲུག་པ་དུར་མིག

དུར་མིག་སྐོར་འགོ་བབས་ས་གཉིས། །སྦྲགས་མའི་དགུ་མིག་འདྲ་ན་ཡང་།།

སྐོར་འགོ་འབྲིང་པོ་བཞི་ཡི་ཁམས། །བརྩི་བྱའི་དབང་ཁམས་མཐུན་པ་དགོས།།

དབང་མཐུན་དུར་དེ་རང་དུར་ཆེ། །དུར་དེའི་བདུན་ཟུར་རང་དུར་ཆུང་།།

དབང་ཐང་དགྲ་དུར་གཤེད་དུར་ཆེ། །དེ་མཐུན་བདུན་ཟུར་གཤེད་དུར་ཆུང་།།

དཔེ་ན་ལོ་གྲངས་ཉེར་གཅིག་དང་། །ལྔ་གཅིག་ཞེ་ལྔ་བཅོ་ལྔའི་སྟེང་།།

སླེབས་པ་རང་དུར་ཆེ་ཆུང་དང་། །གཤེད་དུར་ཆེ་ཆུང་རིམ་པར་སྦྱར།།

༼དཔེར་ན་ལོ་གྲངས་མེ་རྟ་ལྟ་བུ་ཞིག་ལ་མཚོན་ན། ལོ་གྲངས་༢༡གི་སྟེང་དུ་མེ་དུར་ཁྱི་ལ་བབ་ཅིང་། དེའི་ཁམས་མེ་ཡིན་པའི་དབང་གིས། མེ་རྟ་ནི་རང་དང་ཁམས་མཐུན་པ་ཡིན་པས་རང་དུར་ཆེ་བ་བཞག ལོ་གྲངས་༥༡ལ་བསླེབས་ཚེ་མེ་དུར་དེ་ཉིད་ ཁྱིའི་བདུན་ཟུར་འབྲུག་ལ་བབ་ཅིང་ འབྲུག་དེའི་ཁམས་མེ་ཡིན་པས་མེ་རྟ་ང་དང་ཁམས་མཐུན་སོང་བའི་དབང་གིས་ ང་དུར་ཆུང་བ་ཞེས་བྱ། ༤༥ལ་སླེབ་ཚེ་སླར་ཡང་མེ་དུར་ཁྱི་ལ་བབ་ཅིང་། དེའི་ཁམས་ཆུ་ཡིན་པས་མེ་རྟ་རང་གི་དགྲ་ལ་སོང་བའི་དབང་གིས་གཤེད་དུར་ཆེ་བ་ཞེས་བྱ། ལོ་གྲངས་༡༥ལ་སླེབ་ཚེ་མེ་དུར་དེ་ ཁྱིའི་བདུན་ཟུ་འབྲུག་ལ་བབ་ཅིང་། དེའི་ཁམས་ཆུ་ཡིན་པས་མེའི་དགྲ་ཁམས་ལ་སོང་བའི་དབང་གིས་གཤེད་དུར་ཆུང་བར་བཞག་པ་ཡིན་ནོ།། སྐབས་འདིར་དུར་མིག་གི་དབང་ཁམས་འཚོལ་ཐངས་ནི། བུད་མེད་ཀྱི་ལོག་མེན་འཚོལ་ཐངས་ལྟར་འཚོལ་དགོས།༽

དེ་ལྟར་འབད་བའི་རྣམ་དཀར་དགེ་བའི་མཐུས། །དོན་གཉེར་མེད་ཀྱང་དབང་མེད་སྦྱངས་པ་ཡི།།

ཕ་འོག་ག་ལ་པ་དང་འདྲ་བ་རྣམས། །ཇ་བཙགས་ནང་ནས་ལྷུང་བ་མ་གྱུར་ཅིག།

ཅེས་པ་འདིའང་རིག་གཞུང་སློབ་གྲྭའི་སློབ་མ་རྣམས་ཀྱི་ངོར་དྷྱ་ན་མིང་པས་རབ་བྱུང་བཅུ་བདུན་པའི་ཤིང་ཕོ་རྟ་ལོ་གྲོ་བཞིན་ཟླ་བའི་ཡར་ངོ་དགའ་བ་དང་བཟང་པོ་གཉིས་པའི་མཚན་མོ་གཉིས་ཀྱི་རིང་ལ་གྲུབ་པར་སྦྱར་བའོ།།