བརྡ་གསར་རྙིང་གི་རྣམ་གཞག་ལི་ཤིའི་གུར་ཁང་།

 བརྡ་གསར་རྙིང་གི་རྣམ་གཞག་ལི་ཤིའི་གུར་ཁང་།

 རྩོམ་པ་པོ། སྐྱོགས་སྟོན་ལོ་ཙཱ་བ་རིན་ཆེན་བཀྲ་ཤིས།

བརྗོད་བྱ། བརྡ་གསར་རྙིང་གི་རྣམ་གཞག

༈ན་མོ་མཉྫཱུ་ཤྲཱི་ཡེ།དེ་ཡང་འདིར་བརྡ་གསར་རྙིང་གི་ཐ་སྙད་བཤད་པ་ལ། ཐུ་མི་ས་འབོ་༼ལྷོ་གཉལ་གྱི་ཐུ་མི་སྣང་གྲགས་ཀྱི་བུ་ཨ་ནུ་སྟེ།སམྦྷོཊ་དང་།སམྦྷ་དྲ་སོགས་རྒྱ་སྐད་དུ་བཞེད་པ་བྱུང་ཡང་།འདི་གཉལ་ན་ཡོད་པ་ས་འབུར་པོ་ཞིག་འདུག་པས།ས་འབོ་ར་ཡིན་པ་འདྲ།གང་ནའང་བོད་སྐད་དུ་སྣང་༽ར་དང་།བཙད་པོ་ཁྲི་སྲོང་ལྡེ་བཙན་གྱི་དུས་དང་པོར་བྱས་པའི་འགྱུར་རྣམས་ནི། དང་པོའི་བཀས་བཅད་ཀྱིས་བསྒྱུར་བ་སྟེ།སངས་རྒྱས་ཕལ་པོ་ཆེ་དང་།ལུང་སྡེ་བཞི་དང་།མདོ་སྡེ་ཁ་ཅིག་དང་ཤེར་ཕྱིན་གྱི་མདོ་ཁ་ཅིག་སྟེ།སྐད་གསར་བཅད་ཀྱིས་གཏན་ལ་མ་ཕབ་པ་རྣམས་སོ།།

དེ་ལ་ནི། གང་ལ་གག་དང་།ཅི་ཕྱིར་ལ་ཇི་རོབ་དང་།ཇི་སྙམ་ལ་ཇི་ལྟར་དང་།རྩེ་མོ་ལ་སྤྱི་བོ་དང་།ཤིན་ཏུའམ་རབ་ཏུ་ལ་ཏེ་པོར་དང་།ཡང་།ཝཱ་ཌྷཾ་ཞེས་པ་བསྒྱུར་བའི་ཏེ་པོར་ནི།དམ་པ་དང་།སྲ་བ་དང་།དྲག་པ་དང་།ཚབས་ཆེ་བ་རྣམས་ལ་འཇུག་པ་དང་།རྐྱེན་སྨན་ལ་རྐྱེན་རྩི་དང་།ལྟག་པ་ལ་གླག་པ་དང་།སྤོས་དང་སྤོས་ཕོར་ལ་པོག་དང་པོག་ཕོར་དང་།

བསལ་བ་ལ་བསྩལ་བ་དང་།སོགས་པ་ལ་སྩོགས་པ་དང་།བསུ་བ་ལ་བསྩུ་བ་དང་།དྲི་བསུང་ལ་དྲི་བསྩུང་དང་།བསངས་པ་ལ་བསྩངས་པ་དང་།།རྫོཊ་སོ་ལ་རྫོགས་ཤོ།གཡོགས་པ་ལ་ཡོགས་པ་དང་།གོ་ཆ་ལ་གོ་ཅ་དང་།བྲག་ཆ་ལ་བྲག་ཅ་དང་།རིན་པོ་ཆེ་ལ་རིན་པོ་ཅེ་དང་།དཀོན་མཆོག་ལ་དཀོན་ཅོག་དང་།རིན་ཆེན་ལ་རིན་ཅེན་དང་།ཁྱིམ་ལ་སྡུམ་པ་དང་།དབུས་ལ་དབུང་དང་།འགྲོ་བ་ལ་བགོམ་པ་དང་།གྲུབ་པ་ལ་རེད་པ་དང་།འགྲེལ་བ་ལ་འགྲོལ་བར་བསྒྱུར་བ་ལ་སོགས་པ་མང་སྟེ།རྒྱས་པར་ནི་གསུང་རབ་ལས་ཤེས་པར་བྱའོ།།ཡང་།དེ་དག་ཏུ་ད་དྲག་དང་།དཔྱིད་སླ་ར་བ་སོགས་དང་།དེའ་ལའ་ནིའ་ཞེས་པ་ལྟ་བུ་འ་ཡིག་མཐའ་རྟེན་སྦྱར་བ་ནི་སུམ་རྟགས་ཀྱི་དགོངས་པ་ཡིན་ཀྱང་དོན་ལ་ཐོབ་པ་གཞིར་བཅས་ནས་ཡི་གེ་ཉུང་བའི་སླད་དུ་བཞག་པ་དང་།ཡང་།མྱེད།མྱིན་སོགས་ཡ་བཏགས་པ་དང་།རལ་གྱི་སོགས་ནི་ལོ་ཙཱ་བ་ཁ་ཅིག་གིས་ཡུལ་སྐད་ཤོར་བར་གྲགས་པ་ཡིན་ནོ།།

གཉིས་པ་སྐད་གསར་བཅད་ལ་ནི་དེ་དག་གི་ཟླས་དྲངས་པ་ཇི་སྐད་བཤད་པ་རྣམས་དང་།གཞན་ཡང་གསུང་རབ་ལ་གྲགས་པའི་མིང་ཕལ་ཆེ་བ་རྣམས་སོ།།བཀས་བཅད་གཉིས་པོ་དེ་ནི་མངའ་བདག་ཁྲི་རལ་པ་ཅན་ཡན་ཆད་དུ་སྐ་ཅོག་ཞང་གསུམ་ལ་སོགས་པས་མཛད་པ་ཡིན་ནོ།།

བཀས་བཅད་གསུམ་པ་ནི་ལྷ་བླ་མ་ཡེ་ཤེས་འོད་ཀྱི་དུས་ཀྱི་སྒྲ་སྒྱུར་ལོ་ཙཱ་བ་ཆེན་པོ་རིན་ཅེན་བཟང་པོ་ནས་དཔང་ལོ་ཙཱ་བ་ཆེན་པོ་དང་སྙིགས་དུས་ཀྱི་སྐད་གཉིས་སྨྲ་བ་གཅིག་པུ་པ་ལོ་ཆེན་དྷརྨ་པཱ་ལ་བྷ་དྲའི་བར་དུ་བྱོན་པ་རྣམས་ཡིན་ལ།ལོ་ཆེན་གྱིས་ནི།གཉི་ཟླ་ལ་ཉི་ཟླ་དང་།བསྟན་བཅོས་ལ་བསྟན་ཆོས་དང་།སྟུག་པོ་ལ་འཐུག་པོ་དང་།ཉི་ཤུ་དང་སུམ་ཅུ་དང་སུམ་བརྒྱ་རྣམས་ལ།གཉིས་བཅུ་དང་གསུམ་བཅུ་དང་གསུམ་བརྒྱ་དང་།བསམ་གཏན་ལ་བསམ་བཏན་སོགས་འཆོས་པར་མཛད་ཀྱང་།བཀས་བཅད་བར་པ་བཞིན་དུ་གནས་པ་མང་ཞིང་།དེ་དག་གི་བརྡའི་ཁྱད་པར་གསུང་རབ་རྣམས་སུ་འབྱུང་བ་འདི་སྙེད་ཅིག་མཆིས་ཏེ།ཀྭ་དང་གག་ནི་ཀྱེ་དང་གང་།སྐྱོར་སྐྱོར་ནི་ཡང་ཡང་།བླ་འོག་ནི་སྟེང་འོག།བླ་སྐྱལ་བ་ནི་མི་ཟད་པ།རྩ་ལག་ནི་གཉེན།གཉའ་བོ་ནི་དཔང་པོ།རིད་པ་དང་སྦེག་པ་ནི་དངོས་ངན་པ་དང་ཤ་ཆུང་བའམ་སྐེམ་པ།གྱ་བ་ནི་ཉམས་པ།གྱག་པ་ནི་བརླག་པ།ཡེ་འབྱམ་ནི་སྟོང་ཉིད།དབལ་ནི་ཏོག་དང་རྩེ་མོ་དང་ཤ་ཉམས་དང་མེའི་དྲོད།ངོ་ག་ནི་སྣང་ངོ་།གམ་ཡོ་ནི་ཉེ་འཁོར།དམུས་བྱུང་ནི་ཚི་ཆད་དམ་ཡི་ཆད།ཐེན་ཆེར་ནི་ཅ་རེ།ག་ཞན་ནི་བཞད་གད་ཀྱི་སྒྲ།ཡ་ལད་ནི་གོ་ཆ་སྤྱི་དང་སྐབས་ཐོབ་ཀྱི་རྨོག་གི་མིང་ལ་འཇུག་པའང་ཡོད།གནའ་ནི་ཐོག་མའམ་སྔོན།ཡོད་དོ་ཅོག་དང་འགྱུར་རོ་ཅོག་ལྟ་བུའི་ཅོག་ནི་མཐའ་དག་གི་དོན།གྱུར་ཅིག་གུ་ལྟ་བུའི་གུ་ནི་སྨོན་པའི་ཚིག།།སྦྲེབས་པ་ནི་སྐེམ་པ།གསང་ཁུང་ནི་བཤང་ལམ།མདུང་དོར་ནི་རྒྱན་འགྱེད།ཆམ་དུ་ནི་གཏན་དུ།ནོད་པ་ནི་ཐོབ་པའམ་བཞག་པ།ཐ་ཚིག་ནི་ཚིག་གི་དོན།བསྟི་བ་ནི་ངལ་གསོ་བ།བརྣག་པ་ནི་བསམ་པ།སྨྱང་བ་ནི་བརྐྱང་བ།ནམ་ཞར་ནི་ནམ་ཡང་།འོན་ཏང་ནི་འོན་ཀྱང་།བཀྲི་བ་ནི་དྲང་བའམ་འཁྲིད་པ།དབྲག་ནི་བར།གཟགས་པ་ནི་ཟགས་པ།ཕྱམ་ཕྱད་ནི་མཉམ་ཉིད།བགྲོ་བ་ནི་གླེང་བ།རྨ་ག་ཆད་ནི་ཡང་དག་པའམ་ཕལ་པོ་ཆེ་དང་སྙན་གྱི་གོང་རྒྱན།བསྟར་བ་ནི་བྱི་དོར་ལེགས་པ་དང་གཟབས་པ་དང་སྤྲས་པ་དང་།སེམས་ལ་སྒོམ་པ་དང་ཡོད་པ་ལ།གཏིང་ཕྱིན་པ་ནི་དཔྱིས་ཕྱིན་པ།བྲོ་ནི་མནའ།ཆང་ཁྱུ་ནི་ཚོགས་པ།སྤ་ལོ་ནི་སྤོབས་པ།ཐ་རམ་ནི་ངན་པ།བརྙང་བ་ནི་འཁྲུ་བ།དབྱེ་ནི་ཐང་།བསྙིལ་བ་ནི་དོར་བའམ་ཕྱིར་བསྐྲད་པ།ལག་པ་བསྙལ་བ་ནི་ལག་པ་བཀྲུས་པ།མཐོང་ག་ནི་བྲང་།གླམ་པ་ནི་སྣམ་བུ་འཐུག་པོ།ཁྲ་ཁྲོ་ཅན་ནི་སྤྲོ་ཐུང་བ།རུང་ཁུས་ཟ་བ་ནི་གཏུམ་པ།མགོ་ནན་ནི་ཐོག་མ།ཇེ་ནི་དང་པོ་དང་རེ་ཞིག་ཅེས་པ་ལའང་།གཞི་པོ་ནི་གཞི་མ།ཇི་འོས་ནི་འཚམ་པ།གནོང་མི་བཀུར་བ་ནི་ཉེས་པ་ཁས་མི་ལན་པ།བསྒོ་བ་རྣར་གཟོན་པ་ནི་བསྒོ་བ་ལ་མི་ཉན་པ།འཆབ་པ་ནི་གསང་བའམ་སྦེད་པ།འཛན་དཀའ་ནི་སྦྱོར་དཀའ།འཁུ་བ་ནི་ཞེ་སྡང་བ།བཅབས་པ་ནི་སྦས་པ།གྱ་ཙོམ་ནི་མ་བརྟགས་པ།རྣ་བླགས་ནི་རྣ་བ་གཏོད་པ།ཐ་ཆད་པ་ནི་ངན་པ།སྩེལ་བ་ནི་སེལ་བ།འཕྱེ་བ་ནི་འགྲོ་བ།སྨྲེང་ཚིག་ནི་གསང་ཚིག་དང་སྨྲ་བ་ཙམ་ལའང་།སྨྲེང་བ་ནི་སྨྲ་བ།སྨྲེ་བ་ནི་ངན་པར་སྨྲ་བ།སྨྲེ་སྔཊ་ཀྱང་དེ་ཉིད།རྨས་པ་ནི་དྲིས་པ།མི་འཇབ་པ་ནི་རྩུབ་པ།དྲལ་བ་ནི་བཅོམ་པའམ་ཞིག་པ།བླ་མཐང་ནི་སྟོད་སྨད་དམ་ཕྱི་ནང་།བསོད་པ་ནི་བཟང་པོའམ་ལེགས་པ།བསྟབས་པ་ནི་བྲིམས་པའམ་བྱིན་པ།སྟོབ་པ་ནི་འབྲིམ་པའམ་སྟེར་བ།སྟོབ་པ་ནི་མགྲོན་དུ་གཉེར་བ།བྱེར་བ་ནི་སོང་བ།བརྟ་བ་ནི་རྒྱས་པར་བྱ་བ།བརྟས་པ་ནི་རྒྱས་པ།ད་ཀོ་ནི་ད་ནི།འདི་ཀོ་ནི་འདི་ནི།བཀོན་པ་ནི་ཁྲོ་བ།ཇི་ག་ནི་བརྟག་པ།ཁྱོ་ཤུག་ནི་བཟའ་ཚོ།གཞོལ་བ་ནི་འབབ་པ།ཉིས་ན་ནི་རྣམ་པ་གཉིས་སུ་ན་ཞེས་པ་ལྟ་བུའམ།

ཡང་ན་ཐ་བ་ནི་རེངས་པ།མཐར་གྱིས་ནི་རིམ་གྱིས།གཞར་ཡང་ནི་སླར་ཡང་ངམ་ནམ་ཡང་།མནོས་པ་ནི་བསམས་པ།གྱ་ནོམ་ནི་ཕུན་སུམ་ཚོགས་པ།གྱ་ནོམ་སྣང་བ་ནི་ཡོད་པ་དང་ལེགས་པའི་དོན་ཡང་ཡིན།ཕྱད་པར་ནི་རྒྱུན་པར།བསྣམས་པ་ནི་ཐོགས་པ།ཤ་དག་ནི་ཤ་སྟག།འཇུད་པ་ནི་འཇུག་པ།རྔུབ་པ་ནི་འདུས་པའམ་འཇུག་པ།ཚམ་ངམ་ནི་འཇིགས་སྟངས།བབ་བབ་བམ་བབ་ཅོལ་ནི་མ་བསམ་པར་སྨྲ་བའམ་འཕྲལ་མ།ཕྱང་ཡར་ནི་འཕྲིན་ལས།སྣམ་ལོགས་ནི་ཟུར་དང་རྒྱབ།སྣྲེལ་ཞི་ནི་ལོགས་སམ་འཕྲེད་དམ་འཆོལ་པ་གོ་རིམས་སུ་མི་གནས་པ།ཉོད་པ་ནི་ཟས།རོད་པ་ནི་གོས།ཡོང་ཡེ་ནི་ངེས་པར་རམ་རྣམ་པ་ཀུན་ཏུའམ་རྣམ་པ་ཐམས་ཅད་ཀྱི་ཐམས་ཅད་དུ་ཞེས་པ་ལྟ་བུ།བསྟིར་མེད་ནི་མནར་མེད་དམ་ངལ་གསོ་མེད་པ།སྤྲིབས་པ་ནི་ལྟོགས་པ།བྲུ་བ་ཚ་བ་ནི་བཀྲེས་པ།བས་པ་ནི་ཟད་པའམ་མཐའ་དག་པ།བརྣན་པ་ནི་ངེས་བཟུང་།རམ་ཤག་ནི་འབྱོར་བ།མནངས་ནི་ནོམ་པའམ་སྲིད།མཐའ་གྲུ་དང་ཐག་གྲུ་ནི་རྒྱ་ཁྱོན།མནབ་རྩལ་ནི་ཁ་ཟས།གཡེར་པོ་ནི་མཁས་པའམ་གྲིམས་པ།ཁོས་རང་ཆབ་མི་འཚལ་བ་ནི་མདུན་མ་ཆུད་མི་ཟའོ།བསྐྱུད་པ་ནི་བརྗེད་པ།ཁད་ཀྱི་ནི་དལ་བུ།བྱུར་ནི་མྱ་ངན།ཡོལ་གོ་ནི་སྣོད།བསྙེངས་པ་ནི་འཇིགས་པ།བསྙེམས་པ་ནི་ང་རྒྱལ།ཡུག་པ་དང་ཡོབ་ཡོབ་ནི་རྐང་པ།སུག་པ་ནི་ལག་པ།ནེམ་ནུར་ནི་ཡིད་གཉིས།རྒྱ་ཅང་ནི་སྐ་རགས།གུར་བུ་ནི་གྲུ་བཞི།གྱི་ན་དང་གྱིན་འདར་ནི་དམན་པའམ་དོན་མེད་དམ་རང་བཞིན་པ།བརྟད་པ་ནི་གློ་བུར་བ།མི་ཡོགས་པ་ནི་མི་ཁེབས་པ།འུབས་པ་ནི་འདུས་པ།ཁུད་པ་ནི་སྐྱེས་སམ་རྫོངས།སླགས་པ་ནི་བཀོད་པ།ཕྱང་ཆད་ནི་ཐག་བཅད།ལ་གོར་ནི་མགྱོགས་པའམ་སྐྱེན་པ།མུར་འདུག་ནི་མུ་སྟེགས།ཅོ་འདྲི་ནི་མཐོ་འཚམ།གཞེར་བ་ནི་བསྟེན་པ།ཡེལ་འཕྱོས་ནི་ཟུང་འཇུག།འཆོས་པ་ནི་ཟོས་པ།འདུ་འཕྲོད་ནི་ཚོགས་པ།ཕྱ་ལེ་བ་ནི་མཉམ་པ།ཆིབ་པ་ནི་ཁྱབ་པ།ཁོས་པ་ནི་འདུན་པ།ངོ་མཐོན་ནི་ནན་གྱི།མོལ་པ་ནི་གཏམ་མམ་གྲོས།ཚུད་མོ་མཁན་ནི་རྐོས་མཁན།གོ་འདུན་ནི་ཚོགས་ཤིང་འདུ་བ།གཞུར་བརྟག་ནི་ཟུར་ཟ་བ།ཉེར་བསྡོགས་ནི་སྟ་གོན།མྱག་ཕྲན་ནི་མདའ།གོར་མ་ཆག་པ་ནི་ཐེ་ཚོམ་མེད་པ།གོར་མ་བཀུམ་པའང་དེ་ཉིད།གནམ་རུ་ནི་གཞུ།སྤྲུག་པ་ནི་ཟད་པ།བཀར་བཏགས་ནི་ཁྲིམས་བསྒྲགས་པ།ཕུང་ཀྲོལ་ནི་དོན་མེད་པ།ལྷཊ་པ་ནི་གཏད་པ།ཕྱར་གཡེང་ནི་རྣམ་གཡེང་དང་རང་ཉིད་འདོད་པའི་ཆོས་གཞན་ལ་ངོམ་ཞིང་སྒེག་པའི་དོན་ཡང་ཡིན།སྒམ་པ་ནི་ཟབ་པ།བགམ་པ་ནི་ཉམས་སད་པ།མནབས་པ་ནི་གྱོན་པ།རྩེག་ལོག་ནི་ཕྲན་ཚེགས་སམ་སྲེད་ཞེན་ཆེ་བ།ཚར་ཕྱིན་ནི་མཐར་ཕྱིན།དབབ་པ་ནི་འབེབས་པའམ་བཞག་པ།གཟས་པ་ནི་བརྡེག་པར་བརྩམས་པ།ཕོན་པོ་ནི་ཚོགས་པ།འཛེར་བ་ནི་སྨྲས་པའམ་ཟེར་བ།འཆེལ་བ་ནི་ཞེན་པའམ་འཆད་པ།ཐ་རམས་ནི་གཏམས་པ།ཕྱིས་བུ་ནི་སྣོད།རྩེར་ཕྱིབས་ནི་མཐར་ཕྱིན།གླལ་བ་ནི་ཁ་གདངས་སམ་རྣམ་པར་བསྒྱིངས་པ།ཀླུབས་པ་ནི་ཕུབ་པའམ་གྱོན་པ།གཡེམ་པ་ནི་འདོད་པ།མུ་ཅོར་ནི་ཁ་ཟེར་བ་དང་ཁ་དྲག།གནམ་པོ་ནི་དྲང་པོ།འཇུག་པར།ཀྱེ་མ་གཞན་གྱི་གནམ་པོ་ཉིད།ཅེས་པ་ལྟ་བུའོ།ཁོར་ཟུག་ནི་ཁོར་ཡུག།ཆབས་ཅིག་པ་ནི་ལྷན་ཅིག་པ།ཆུབ་པ་ནི་རྟོགས་པ།གོ་འདུན་ནི་སྣ་ཚོགས་སམ་གང་མོས།མོང་དུ་ཆུད་པ་ནི་ཁོང་དུ་ཆུད་པ།རླིབས་པ་ནི་རྒྱ་ཆེ་བ།མཆིལ་པ་ནི་ལྕགས་ཀྱུ།ལྕགས་ཀྱོ་ཞེས་པའང་དེ་ཉིད།འགྱེད་པ་ནི་འགྱོད་པ།ཟང་ཟིང་ནི་ཤའམ་ཟས།ཟང་ཟིང་སྦྱིན་པའང་གཙོ་བོར་ཤ་སྟེར་བའི་དོན་དུ་བཤད།འགྱེར་བ་ནི་སྤོང་བ།གེར་མ་ནི་རག་མ།རུམ་ནི་ལྟོ་བའམ་ཕག།ཕོམ་པ་ནི་བུམ་པ།རྟོན་པ་ནི་འདོད་པའམ་རྗེས་སུ་འབྲང་བ།དོན་ལ་ནི་མི་རྟོན་ཚིག་ལ་རྟོན།འཕྱོ་བ་ནི་ལྡིང་བ།འགེམས་པ་ནི་འཇོམས་པ།སྙུགས་སུ་ནི་ཡུན་དུ།དབྲོག་པ་ནི་འཕྲོག་པ།གླེབས་པ་ནི་མནན་པ།རྗེན་པ་ནི་གཅེར་བུའམ་རྐྱང་པ།གལ་གྱིས་ནི་ནན་གྱིས་སམ་རྒྱལ་གྱིས།འཇེན་པ་ནི་ལེན་པ་དང་བཅགས་པ་དང་དངོས་པོ་ཡིད་དང་རྣ་བར་འཐད་པ་ལྟ་བུ་ལའང་ཡོད།རླུགས་པ་ནི་ལུག་པ་སྟེ་ཟས་མ་ཞུ་བ་ཕྱིར་བྱུང་བ།ནོངས་པ་ནི་ཉེས་པ།འཕྱེ་བོ་ནི་གོང་པོའམ་ཡན་ལག་མེད་པར་ལྟོ་བས་འགྲོ་བ།ཚུར་ཤེག་ནི་ཚུར་ཤོག།ལྕེ་རྟེན་ནི་བརྗོད་པའམ་སྙད་འདོགས་པ།སྲིབས་པ་ནི་བསྒྲིབས་པའམ་གྲིབ་རི་དང་མཚན་མོ།སླག་པ་ནི་པགས་པའི་གོས།སྡོད་པ་ནི་འཕེན་པ།ཁོལ་མའམ་གླང་མིག་ནི་སྐར་ཁུང་།འདི་དཀར་གསལ་དང་མུན་དཀར་ཟེར་བ་དང་བསྟུན་ན་དས་འཕུལ་ཐོབ་པར་སྣང་ཡང་།འདུལ་བ་ལ་སྐར་ཚོད་བལྟ་བའི་རི་མིག་བཞག་པ་ལས་བཏགས་པའི་བརྡ་བཙན་པར་བྱས་པའོ།འགྲེམས་པ་ནི་འགྱེད་པ།གསེག་ཤང་དང་གསིལ་བྱེད་ནི་འཁར་གསིལ།སྤྱི་ཏོར་ཅན་ནི་གཙུག་ཏོར་ཅན།གསོང་པོར་སྨྲ་བ་ནི་སྔར་སྨྲ་བའམ་དྲང་པོར་སྨྲ་བ།དོ་ཀེར་ཅན་ནི་ཐོར་ཅོག་ཅན།དཔེ་མཁྱུད་ནི་ཆོས་སྟོན་འོས་པ་ལའང་སྦ་བ།འབེལ་བའི་གཏམ་དང་བཀའ་མཆིད་ནི་ཡང་དག་པའི་གཏམ།མཁྱུད་སྤྱད་ནི་མན་ངག་ཕྲན་བུ་སྦས་ཏེ་འཆད་པ།མྱུར་ཐུག་ནི་མཐར་ཐུག།ཕོལ་བ་ནི་རྟོགས་པ།ལ་ཟླས་པ་ནི་ཐག་བཅད་པ།ལ་ཟློ་བ་ནི་མཐའ་འགེགས་པའམ་ཐག་གཅོད་པ།མི་ཆ་བ་ནི་མི་ཤེས་པ།ཆ་མེད་ནི་རྒྱུས་མེད།གཏོལ་མེད་པ་ནི་ཐབས་མེད་པའམ་རྒྱུས་མེད་པ།ཅི་གར་ནི་ཇི་ལྟར།ཅི་ཆིབ་ནི་མཐར་ཕྱིན།གར་ཅིག་ནི་གང་ཞིག།སྨྱན་ཀ་ནི་གཉེན་ཀའབགས་པ་ནི་ཉམས་པ།དམུན་པ་ནི་བླུན་པོ།ཤོ་བེ་ནི་རྫུན།ཤོབ་ཀྱང་དེ་ཉིད།ཤིད་ཟན་ནི་རོ་ཟན་ནམ་གཤིན་ཟས་སམ་དད་ཟས།ཤིད་ནི་གཤིན་པོ་ལ་དམིགས་པའི་དགེ་བ་བསྒྲུབས་པ།ཕྲུ་མ་ནི་ཕོ་བྲང་ངམ་དམག་སྒར།སྤོང་བ་ནི་རྩེ་བ།བརྟུན་པ་ནི་བརྩོན་པ།སྒོ་འཕར་ནི་སྒོ་གླེགས།སྤྱོས་པ་ནི་སྡིགས་པའམ་ཁྲོས་པ།སྙེམ་པ་ནི་གཡེལ་བའམ་སྙོམས་ལས།དབྱེ་ཚོང་ནི་ཚོང་ཁང་།ཐང་ལ་ནི་བཀྲམ་པ།བསླན་པ་ནི་བསྡུས་པའམ་ཕྱོགས་གཏོགས།ཚོག་ཕོར་ནི་རྫོགས་པར།བདར་བ་ནི་བཅད་པའམ་གཞོགས་པ།གཟེངས་པ་ནི་བརྐྱང་པའམ་གཟི་བྱིན།འཆེག་པ་ནི་འཇིག་པ།གློས་པ་ནི་རྨོངས་པ།རྨེག་མེད་ནི་གཏན་མེད།གཡེན་སྤྱོ་བ་ནི་ཅོ་དྲིའམ་སྡང་བར་བྱེད་པ།གཡམ་ནི་ཞར།རྨེད་པ་ནི་གསོལ་བ།སློང་ཕོར་ནི་ལྷུང་བཟེད།བྱ་མ་རྟ་ནི་ཉན་རྣའམ་བང་ཆེན།བྲོ་འཚལ་བ་ནི་ནད་པ།ད་བུར་ནི་སྲེག་གནས།བསེལ་བ་ནི་སྐྱེལ་མའམ་འཇིགས་པ་ལས་སྐྱོབ་པ།གཙུག་ལག་ནི་སྡེ་སྣོད།བསོད་ཉམས་ནི་འདོད་པ་ལ་ལྷག་པར་ལོངས་སྤྱོད་པའི་མིང་།བསྙད་པ་ནི་བཤད་པ།གོ་རེ་ནི་རྫོགས་པ།བརླང་པོ་ནི་རྩུབ་མོ།གཞོགས་སྟེགས་ནི་ཟུར་མིག་གམ་སྐེག་ཆོས།ཤུར་བུ་ནི་སྐ་རགས།འཛན་མོ་ནི་བགྲོད་བྱ་སྟེ་བུད་མེད།འཇུད་མཐུན་དང་འདོད་འགྲོ་དང་གཟུགས་འཚོང་ནི་སྨད་འཚོང་།ལག་གི་བླ་ནི་ལས་དེ་དང་དེ་ལ་བསྐོས་པ།འཛན་ཕོ་ནི་བགྲོད་བྱེད་དེ་སྐྱེས་པ།སྐ་རགས་ཕོག་གུ་ཅན་ནི་སྐ་རགས་རྒྱན་ཅན།འཐབ་ཀྲོལ་ནི་གནོད་རྒྱུ།འགྲེ་བ་ནི་གཡོ་བ།དོ་ཟན་ནི་མཆིང་བུ།ལྕགས་ཕོད་ནི་སྐ་རགས་ཀྱི་རྒྱན།ཁོད་སྙོམ་པ་ནི་ཡིད་མི་དགའ་བའམ་སྒྱིད་ལུག་པ།དཀྱུས་མོ་ནི་མགྱོགས་པའམ་རྒྱུག་པ།དང་ལ་ནི་རྫིང་བུ།ཀླབ་པ་ནི་ལ་བ།དམ་རྒྱ་ནི་ཁྲིམས།ཞ་སྒྲེ་ནི་རྣ་མེད།ལྟག་སྒྲེ་ནི་ལྟག་ཐེར།གོར་མོ་ནི་སྡང་སེམས།རྣ་བྲང་ནི་མདེའུ།བཤུག་པ་ནི་བསླང་བ།པུས་མཁྱུད་ནི་སྒོམ་ཐག།གཡར་ནི་ཁའམ་གདོང་ངམ་མདུན།ཧྭགས་ནི་བུ་རམ་གྱི་དྭངས་མའི་ཤ་ཁ་ར་སྟེ་འགྲེལ་པ་ཟླ་ཟེར་དུ་གལ་ལ་ཞེས་ཀྱང་གྲགས་པ།ཐགས་རན་ནི་བཏགས་པ།རྨས་པ་ནི་ཉམས་པ།མངན་ནི་མཐུ།དངར་ནི་གྲལ་ལམ་ཕྲེང་བ།གསུག་པ་ནི་རྔན་པ།བརྔན་ཞེས་པ་ནི་མཆོད་པ།རྣམ་འདལ་ནི་རྣམ་འདུད།འགྱེད་པ་ནི་གཏོང་བ།དབྲེས་པ་ནི་བརྗེས་པ།བསེན་ཁུས་པ་ནི་གཉེན་བསླུས་པ།བརྒྱད་བཀག་ནི་ཁ་སྨྲས་སམ་བཀྱོན་པ།འོ་ནི་ནི་འདི།བཟླུགས་པ་ནི་ཞུས་པའམ་དྲིས་པ།པོ་ཟོས་ཀྱང་ནི་ཇི་ལྟར་ཐོགས་ཀྱང་ཞེས་པ་སྟེ་ཡུལ་སྐད་ལ་པོ་མཐོ་ཡང་ཟེར།སྤྱོན་པ་ནི་འབོད་པའི་བརྡ་ཚུར་ཤོག་ཅེས་པ་ལྟ་བུའོ།།བྱོན་ཅེས་པ་སླེབ་ཟིན་པའི་དོན་ཏེ་དིང་སང་བརྡ་ནོར་མང་།འབྲོངས་པ་ནི་ཉེ་བར་བསྟེན་པ།བཤེས་སྤྲིང་དུ་མཐོ་རིས་བུ་མོས་འབྲོངས་ཤིང་ཞེས་པ་ལྟ་བུའོ།།མི་སློན་ནི་མི་ཟློགས།སྨག་ནི་མུན་པ།གོ་ར་ནི་བཙོན་ར།ཡ་མ་བརླ་ནི་སྙིང་པོ་མེད་པའམ་མི་བདེན་པ།ཀླད་རོལ་ནི་ཕྱི་རོལ།ཆང་ཐུབ་ནི་གང་ཟག།དོག་མ་ནི་མདུན།གེལ་པ་ནི་ཡལ་ག།འཕག་པའམ་ཆ་བ་ནི་འཇུག་པ།རན་པ་ནི་ལྕུག་ཕྲན།རེང་བུ་ནི་འབྲེལ་མེད་དམ་རྐྱང་པ།མི་འགོང་ནི་མི་ཞུམ།ཐན་ཀོར་ནི་ཉེ་འཁོར།བོག་རེ་ནི་བ་གམ།མ་སྟེས་པ་ནི་མ་ལེགས་པ།སྟེས་དབང་ནི་སྟོབས་ཤུགས།གནའ་བོ་ནི་སྔོན།སྣ་བོ་ནི་གཙོ་བོ།མི་གུ་ནི་མི་ཞུམ།ཉེའུ་གྱི་ནི་བཅུད་ཚོར།ཉེན་ནི་རྨང་།བེ་ནོ་ནི་འཛིན་པ།སྲོ་གང་ནི་ཁྲུས།དཀུ་མཉེ།དྲིལ་ཕྱི།མེ།སྟན་རྣམས་ཀྱི་མིང་།འདི་ལ་བསྲོ་ཁང་ཞེས་པའང་སྣང་།ཇེང་ནི་རྒྱུད་མངས་སམ་དབྱངས།རྨང་ལམ་ནི་རྨི་ལམ།གྱ་ཐོ་ནི་རྣ་རྒྱན།ལན་བོན་ནི་ལན་སློན།མདོང་མོ་ནི་མཇུག་དོའི་ནང་།རྣིལ་ནད་ནི་སོ་རྙིལ་གྱི་ནད།རྔུབ་རེ་ནི་ཧུབ་རེ།ཆུ་བྲུབ་པ་ནི་ཁོལ་བའམ་རྦ་ཀློང་།ཉུག་རུམ་ནི་རླིག་ཕྱུང་སྟེ་བཙུན་མོའི་འཁོར་དུ་འབྱུང་བ།ཞོགས་མ་ནི་སྟེང་གཡོགས།གཞའ་བ་ནི་མགུ་བ།གཞའ་ཚོན་ནི་འཇའ་ཚོན།བསྐྱད་པ་ནི་བསད་པའམ་འགྲན་པ།ཕྱི་བི་ནི་ཕྱི་རོལ།ཕ་བི་ནི་ཕ་རོལ།དགོན་དུང་ནི་ཆུ་མེད་པ།ཚ་སྒོ་ཅན་ནི་བ་ཚྭ་ཅན།མོང་བརྟུལ་ནི་བླུན་པོ།ལུང་བོང་དང་བན་ཀླང་ནི་བ་གླང་།ཕོལ་མིག་ནི་འཁོར་ལོ།མཚུན་ནི་ལྷའམ་ཕ་མེས།འཆེས་པ་ནི་ཁས་ལེན་པ།འཕེའུ་ནི་གསོལ་བ།གཞའ་གསང་ནི་གཡུང་དྲུང་ངམ་འཕྲིན་ལས།དམ་དེམ་ནི་དམ་བཅའ།ཕྱང་སྤྲུལ་ནི་རྒྱན་ནམ་སྤུད་པ།དབུ་རྨོག་ནི་དབུ་འཕང་།ཡིད་སྨོ་ནི་ཡིད་དགའ།གཉི་ཟེར་ནི་ཉི་ཟེར།སྦོན་པ་ནི་ཟ་བ།རྙོང་བ་ནི་བརྐྱང་བ།འབྱེར་བ་ནི་འགྲོ་བ།འདྲིད་པ་ནི་སླུ་བ།གཟོད་མ་ནི་དང་པོ།རིལ་ནི་ཐམས་ཅད།གཟེབ་ནི་གུར།ཀློང་དུ་གྱུར་པ་ནི་དབང་དུ་གྱུར་པ།བཅིབས་པ་ནི་ཞོན་པ།མི་བཟད་པ་ནི་དྲག་པོ།དྲག་ཤུལ་ནི་མི་སྡུག་པ།གཅམ་བུ་ནི་བཅོས་མ།བརྐམ་པ་ནི་འདོད་ཞེན།བརྐམ་ཆགས་ནི་འདོད་ཆགས་ཆེ་བ།འཆོབས་ཤིག་ནི་གསོངས་ཤིག།གཉོད་ཀ་ནི་འཁོས་ཀགཡུང་བ་ནི་ཞན་པ།བརྟུན་ངེས་པ་ནི་གཟུ་ལམ་དང་རང་བཟོ།གཞིབ་པ་ནི་འཇིབ་པ།གླགས་པ་ནི་འཇུག་པའམ་འགྲོ་འཚམས།དོང་སྟེ་ནི་སོང་སྟེ།འདོང་བ་ནི་འགྲོ་བ།དཔེན་པ་ནི་མཁོ་བའམ་འཕངས་པའམ་ཡིད་དུ་འོང་བ།བཙོག་པོ་ནི་ཕོ་བཙོག།རྙོང་ནི་གལ།ཇིས་ན་ནི་ཅིས་ན།ཏ་ལ་ལ་ནི་སྒྲོན་མེ།བསྙུངས་པ་ནི་ཉུང་ངུར་བྱས་པ།བསྙེན་སྲིང་ནི་ཉེ་རིང་།སྤང་བྱེད་ནི་རྡོ་བ།ཀོས་ཐག་ནི་ཉམ་ཐག།སྔ་མཁོ་ནི་སྔར་བཞིན།སྨྱུར་ཏེ་ནི་མྱུར་དུ།འོན་ཅིག་ནི་བྱོན་ཅིག།ལྡེམ་པོ་ནི་དྲད་པོ་མིན་པ།ཉིང་ཏོར་ནི་ངེས་པར།བྱོས་ཤིག་ནི་གྱིས་ཤིག།རངས་པ་ནི་དགའ་བ་དང་རིལ་པོ།ཁོང་འཁྱིད་ནི་ཁོང་འབྱིན།གཏུ་ལུམ་ནི་བཟི་བ།གྱུ་བ་ནི་བཀུར་བ།ཕོ་ཐེག་ཆེ་བ་ནི་ཁེངས་པ་སྟེ་ལྟ་བ་མཐོ་བའི་དོན།ཕོག་སྙ་ཆེ་བ་ནི་སྲན་ཆེ་བ།རྨེ་བ་ནི་སྨྲ་བ།རྨུན་པོ་ནི་བླུན་པོ།འཕན་པ་ནི་ཆག་པའམ་ཉམས་པ།ཆུའི་དངོ་ནི་ཆུ་ངོགས།གྲིའི་དངོ་ནི་གྲིའི་སོ།ཡོན་ཁར་བ་ནི་ཡང་དག་མིན་པ།འོར་འགའ་ནི་རེས་འགའ།འབྲུས་འགོགས་ནི་བརྩོན་འགྲུས།འབོགས་པ་ནི་བརྒལ་བ།འབོག་པ་ནི་བརྒྱལ་བ།བྱ་རྐོན་ནི་བྱ་རྒྱ།གཉིག་ཏུ་ནི་གཅིག་ཏུ།བློང་བ་ནི་རྨུགས་ཤིང་སོང་བ།བློ་བློང་ནི་ཡི་མུག་གམ་རིག་པ་མི་གསལ་བ།བློང་བློང་ཡང་ཟེར།གཞེན་འདེབས་དང་གཞན་བསྐུལ་ནི་དྲན་བསྐུལ།ཆད་པའམ་བང་སོ་ནི་དུར་གྱི་གནས།ཕོལ་ཏེ་ནི་ཕན་ཏེ།འུང་ནས་ནི་འདི་ནས།ཉིད་གྲུལ་ནི་རིགས་ངན།རྔད་མོ་ནི་དམོད་མོ།རང་ཉམས་ནི་རང་བཞིན།འགྲན་དོ་ནི་འགྲན་ཟླ།ཡིབས་སུ་ནི་དབྱིབས་སུ།བླ་ཁྱད་ནི་དྲེགས་པ།འུང་ཏེང་ནི་འོན་ཀྱང་།འོར་པ་ནི་བོར་བ།ཕ་ལོགས་ནི་ཕ་རོལ།གྱིམ་ཤིང་ནི་རོལ་མོ།ཆོ་ལོ་ནི་རྒྱན་པོ།ཟུས་ནས་ནི་ཟུག་ནས།བློན་འདེབས་ནི་ཆོས་སྟོན་ནམ་ཟུར་ནས་གྲོས་འདེབས།གདས་པ་ནི་སྨྲ་བའམ་ཞུས་པའམ་ཞུ་བ།སྣ་རུ་ནི་ན་རོ།འགྲོངས་ནི་རྨའི་སྒོ།མཆིས་འབྲང་ནི་ཆུང་མ།མ་དྲངས་པ་ནི་མ་དུལ་བ།གཞོངས་ནི་ལྗོངས།བུས་པ་ནི་བྱིས་པ།འཇེབས་པ་ནི་འགྲོགས་པའམ་ལེགས་པའམ་སྙན་པ།ནན་ཏུར་ནི་ཆད་ལས།ཡུས་ཏེ་ནི་བདེན་ཏེ།ཞ་འབྲིང་དང་ཞམ་འབྲིང་ནི་ཞབས་འབྲིང་།རྨེན་ངན་ནི་ལྟས་ངན།གཏི་བ་ནི་སྨྲ་བ།སླད་བཞིན་ནི་ཕྱི་བཞིན།གཤོར་བ་ནི་རྩུབ་པ།འཕྱན་པ་ནི་འཁྱམ་པ།གཤོར་བ་ནི་སྣོད།ཀླག་ཅོར་ནི་ཅ་ཅོ།ཤེན་པ་ནི་བཤེན་པ།རྙིས་པ་ནི་རྙིངས་པ།སྨྱེ་བ་ནི་ཞན་པ།ལེའུ་གློན་པ་ནི་ལན་ལྡོན་པ།འདྲག་མཐིལ་ནི་ལག་མཐིལ།བུམ་བུ་ནི་བུམ་ཆུང་།རྩིག་གུ་ནི་རྩིག་པ།བྲུངས་ཀྱང་ནི་ཀུན་ཀྱང་།རེ་རྨ་ནི་བུད་མེད།ནན་ཐུར་ནི་ནན་ཏན།གཡུར་དང་ཡུར་ནི་གཉིད།སྒྲེའུ་ཆུང་ནི་འཛག་སྣོད།པར་ཏང་དང་དྲེའུ་རྔོག་ནི་སྟན་ཁྲ་བོ།སྨྱུགས་ནས་ནི་བཅུག་ནས།དཀུ་སྟེ་ནི་ལྷག་སྟེ།མ་ལ་ནི་ཀྱེ་མའམ་ཀྱི་འུད།ངོག་གོ་ནི་ནོན་ནོ།མདུན་བདར་བ་ནི་མདུན་ནས་བསྟོད་པའམ་མདུན་དུ་བགྱིས་པ།ཐོང་ཁོར་ནི་གར་བུ།ལག་ཏུབ་ནི་སྒྱོགས།ལྡོངས་པ་ནི་ལོང་བ།དམིགས་བུ་ནི་ལོང་ཁྲིད།ངོག་ན་ནི་སོང་ན།མོད་མི་དམའ་བ་ནི་དཔངས་མཐོ་བའམ་ཕྲ་མོ་མ་ཡིན་པ།རྙོང་ངམ་བྱུག་པའམ་སྐྱང་ནུལ་ནི་ཞལ་བ།ཞལ་ཞལ་ཀྱང་དེ་ཉིད།ཐན་སྐོར་ནི་ཉེ་སྐོར།ཡུགས་ཤིག་ནི་བྱུགས་ཤིག།ཟ་ཕོད་པ་ནི་ལྟོ་ཆེ་བ།ལྟུང་རུས་ནི་ལྟུང་འབྲས།འཛེར་ཏོ་ནི་ཟེར་ཏོ།དུགས་ཁང་ནི་ཁྲུས་ཁང་།དཔྱ་བ་ནི་འཕྱ་བ།སྔ་ཟ་ནི་སྔ་བ།ཚང་མང་ནི་ནགས་ཚང་ངམ་མེ་ཁང་།ཁུ་ཤ་ནི་ཤ་ཁུ།ཐམ་ལག་ནི་མན་ངག།།ལས་ཀན་ནི་ཁ་ཁྱེར་རམ་སྟེགས་བུ།གཞགས་པ་ནི་བརྒྱན་པ།འདྲུབ་པ་ནི་འཚེམ་པ།དྲུབས་པ་ནི་བཙེམས་པ།དེ་མོ་ནི་དགོས་པ།རྣམ་ཕྱིས་ནི་ཕྱི་ས་ཁང་པ།སྐུན་བུ་ནི་གཞོང་བུ།ཡ་གད་ནི་རྐང་རྟེན་ནམ་སྐས་ཀཅི་ཆོག་ནི་ཅི་ཡོད།ཐ་གི་ནི་ཞི་བ།རྒྱུ་ཁུ་ཅན་ནི་གཅེར་བུ་པ།གཟར་ཐག་ནི་དཔྱང་ཐག།སླས་ནི་བཙུན་མོའི་འཁོར།གྱོང་རལ་ནི་ས་ཞག།།བཤུལ་ནི་ལམ།མད་པ་ནི་བདེན་པ།སྤྱན་པ་ནི་བྱ་ར་བ།ཆེམས་པ་ནི་འཕྲིན་པ།མདུན་ཁང་ངམ་བཀད་ས་ནི་འདུག་ས།འདུག་པ་ནི་ཚོགས་པ།ཚིག་གུ་ནི་འབྲས་བུའི་སྙིང་པོ།སྐྱེས་ཕྲན་ནི་དར་ལ་བབ་པ།ལྕེ་རྟེན་ནི་བརྗོད་པའམ་སྙད་འདོགས་པ།རེགས་པ་ནི་བྲེགས་པ།སྐྱོས་པ་ནི་ཉམས་པ།ཆུ་འདལ་བ་ནི་དལ་པོར་འདུག་པའི་ཆུ།ཉུལ་བ་ནི་བུལ་བའམ་འགོར་བ།གཞར་བ་ནི་མཐུན་པ།ཆན་པ་ནི་ཁྱེ་བོའམ་གྲི་གུག།ལྡང་སྐོ་སྐ་དང་བསེ་ཁ་སྒོ་ནི་སེང་གེ་ཤ་ར་བྷ་སྟེ་སེང་གེ་རྐང་པ་བརྒྱད་པའི་མིང་།ཆེད་འགའ་ནི་རེས་འགའ།སྐྱོ་སྔོགས་ནི་འཁྲུག་པ།བགས་ཀྱི་ནི་རིམ་གྱི།ནོད་པ་ནི་ལེན་པའམ་ཐོབ་པ།བརླ་བརྙན་ནི་སྣོན་པ།ཚང་ཐུར་ནི་གོས་ཤུབས།བརྙན་པ་ནི་གཡར་བ།བརྙས་པ་ནི་གཡས་པ།སྐབས་ཐོབ་ཉོས་པ་ལའང་།ཡུ་བུ་ནི་རང་རེའམ་བདག་ཅག།ཁོམ་པ་ནི་དལ་བ།ཕོ་ལོང་ནི་གྲུ་གུ།ཕྱག་ལས་ཁོམ་ནི་ར་རོ་བ།དགུམ་པ་ནི་གསོད་པ།འགུམ་པ་ནི་འཆི་བ།བཀུམ་པ་དང་གུམ་པ་ནི་བསད་པའམ་ཤི་བ།རྨེད་དུ་ནི་གསོལ་དུ།འཁོབ་པ་ནི་ངན་པའམ་མཐའ།ཛི་ནི་རླུང་།འཁྲུན་རིང་ནི་མཆུ་རིང་ངམ་དཀྱུས་རིང་།བརྣོགས་པ་ནི་བསྡམས་པའམ་སྦས་པ།མནགས་པ་ནི་བཟོད་པའམ་བསྲན་པ།དྲལ་པོ་ནི་མིང་པོ།ཆེ་ཞེ་ནི་ཨ་ཆེའམ་སྲིང་མོ།འབྱེས་པ་ནི་མཛེས་པའམ་མཚམས་ཕྱེད་པ།སྤུ་ལ་བབ་པ་ནི་རུང་བ།མི་ཆོག་ནི་མི་ཕོད།ཤིང་ཐགས་ནི་ཅོག།རྩང་ནན་ནི་བཏུང་བ།འཐམས་པ་ནི་བྱམས་པ།འཁམས་པ་ནི་བརྒྱལ་བ།སྡུམ་མཚེས་ནི་ཁྱིམ་མཚེས།དབང་ཐང་ཆེ་བ་ནི་སྐལ་བ་ཆེ་བའམ་དཔལ་ཆེ་བའམ་སྐལ་བ་བཟང་བ།མ་ནངས་པ་ནི་མ་ལངས་པ།ནངས་ཀྱི་ནི་སྔོན་གྱི།གཡེར་བག་ནི་སྣང་གཡེལ་ཅན།བརླམས་པ་ནི་བསྐྱོད་པ།སྒྲེ་བོ་ནི་ས་རྗེན།འོད་པ་ནི་ཡོད་པ།མིག་གི་རྔུ་མ་ནི་མིག་གི་དྲི་མའམ་སྐྱོ་མ།སྦལ་དུ་ནི་དོང་དུ།ཕྱུགས་ཕྱུང་ནི་གཞོན་ནུ་མ།སྣོག་གཟན་ནི་འཁུར་བ།བྱ་མོ་ཟབ་ནི་མཆོད་རྫས།ལན་ཀན་ནི་པུ་ཤུ།རྒྱུན་ལུགས་ནི་རྒྱུ་འགྲུལ།གཡར་འདྲེན་ནི་སྤྱན་འདྲེན།གཡར་ལེན་ནི་ཁས་ལེན།གཡར་དམ་ནི་དམ་བཅའ།གཡར་ལམ་ནི་མདུན།གཡར་ཁྲལ་ནི་ཁ་ཁྲལ་ལམ་ངོ་ཁྲལ།གཡར་ཚ་ནི་ངོ་ཚ།གཡར་ཁམས་ནི་སྐུ་ཁམས།གཡར་ངོ་ནི་གདོང་།སྒེའུ་ཆུང་ནི་འགྲོ་བ།སྒེའུ་གཤེར་ནི་ཁ་འདམ་སྟེ་བཅའ་སྒ་དང་རོ་ནུས་ཆ་མཐུན་ཞིག་གི་མིང་།དྲུང་ནི་རྩ་བ།འགྱུར་བྱེད་ནི་པྲ་ཆལ།མི་ངས་ནི་མི་ནད་དམ་རིམས་ནད།ཞལ་ཚུས་ནི་ཞལ་ཟས།ལོང་བུ་ནི་ཤིང་ཏོག།འོས་པ་ནི་གཅེར་བུ་པ།རྩེན་པ་ནི་རྩེ་བའམ་རོལ་བ།བླ་གབ་ནི་སྟེང་གཡོགས།ཐོམས་ཤིག་ནི་སོམས་ཤིག།མཐོལ་བ་ནི་སྨྲ་བའམ་མི་སྦེད་པ།བཤོས་པ་ནི་འཁྲིག་པ།གཏམ་འདྲེས་པ་ནི་ཕེབས་པར་སྨྲ་བ།སྨོན་འདྲིན་ནི་གྲོགས་པོ།ལྟག་འོག་ནི་སྔ་ཕྱིའམ་གོང་འོག།སྤུན་པ་ནི་བསྟུན་པ།ཐོག་ཐོག་ནི་དང་པོ།རེག་ཟིག་ནི་ཟིན་བྲིས།བོན་པ་ནི་ཟླས་པ།ནེའུ་ལྡང་ནི་ན་ཟླ།སྒོག་པ་ནི་སྒོག་སྐྱ་སྟེ་ར་སུ་ནའམ་ལ་ཤུ་ན།ཀུན་དོང་ནི་བཙོང་སྟེ་པ་ལཱ་ཎུ།ཀེའུ་ནི་རི་སྒོག།ཧབ་ཤང་མཚེའུ་ནི་དབང་ལག།ལིག་ཤི་ཝེར་ནི་ཛཱ་ཏི་སྟེ་སྣ་མའི་མེ་ཏོག།ཀྲུ་ཀྲུ་ཏྲེས་ནི་ཙི་ཏྲ་ཀཇ་ཧོང་ནི་བཙོད་མདོག།སླད་ཚ་ནི་མི་གཙང་བའམ་བཤང་བ།ཐོབ་ཀྱིས་འཇལ་བ་ནི་ཐབས་ཀྱིས་གཞན་ནོར་འགུགས་པ།ཤ་ཆགས་པ་ནི་བློ་ལ་ཡོད་པའམ་བབ་ཐོབ་ཡོད་བ་དང་འཐུག་པའམ་བརླིང་བ།ངག་འཁྱལ་ནི་འབྲེལ་མེད་དུ་སྨྲ་བ།ཀྱལ་ག་ནི་ཀུ་རེའི་ཚིག།བསྟང་བ་ནི་མགོན་ནམ་གྲོགས།བསྟིངས་ཚིག་ནི་སུན་འབྱིན་པའི་ཚིག་སྟེ་མི་ངན་པ་ལ་མི་ཡ་མཚན་ཅན་ཅེས་བརྗོད་པ་ལྟ་བུ།དུས་པོ་ཆེ་ནི་འཛིན་པ་ཆེ་བ།སྟོངས་པ་ནི་ཕན་པའམ་གྲོགས།དཀོར་དང་ཀ་ཅ་ནི་ནོར་གྱི་སྤྱིའི་མིང་།དཀྱེལ་ཆེ་བ་ནི་ཁོང་ཡངས་པ།ཆུ་གང་ནི་སྙིང་སྟོབས།བཀྲབས་པ་ནི་མང་པོའི་ནང་ནས་འདམས་པ།བསྐྲུན་པ་ནི་བསྐྱེད་པའམ་བཙུགས་པ།སྐྲུས་པ་ནི་གཅོད་པ།སྒྲུན་པ་ནི་འགྲན་པ།བསྐྲུ་བ་ནི་གཞན་ལ་ཐབས་ཀྱིས་འབྲིད་པ།བསྐ་བ་ནི་གར་བའམ་རོའི་ཁྱད་པར།སྐྱིན་གོར་ནི་གངས་སྦལ་ལམ་རྩངས་པ།མི་འགོང་བ་ནི་མི་སྐྲག་པ།དབོས་པ་ནི་སྦོས་པ།དངན་འཐེན་ནི་གཞན་གྱི་ནོར་ཁྱེར་བ་ཕྱིར་མི་གཏོད་པ།ཟིལ་དངར་ནི་བདུད་རྩི།བཅོམ་བསྐྱུངས་ནི་འཇིགས་ནས་སྐད་ཆུང་ངུར་སྨྲས་པའམ་ཁ་རོག་འདུག་པ།མན་ནི་ཚོད་དང་དུས།འཇུངས་པ་ནི་ཞེན་ཆགས་ཆེ་བ།ཉིང་ཤ་ནི་རང་གི་ཤ།ཇུ་བོ་ནི་རྡོ་ལག་ཉ་ནི་བྱིན་ལེན་མ་བྱས་པར་ལེན་པ།ཉེ་རེག་ནི་ཁྲུས།མཆིག་དང་མཆིག་གུ་ནི་མས་གཏུན་དང་ཡས་གཏུན།ཤ་ཀོན་ཞུགས་པ་ནི་ཁོན་ཡོད་པ།མཉེལ་བ་ནི་ངལ་བ།ཕྱག་བརྙན་ནི་འཁོར་གཡོག།སྤྱོ་བ་དང་བརྒྱད་པ་ནི་འཐབ་པའམ་སྨད་པ།སྐྲ་བརྙན་ནི་སྐྲ་ཚབ།སྒྲ་བརྙན་ནི་བྲག་ཆ།གཏམས་པ་ནི་ཁེངས་པའམ་བཅོལ་བ།བལྟམས་པ་ནི་སྐྱེས་པའམ་འཁྲུངས་པ།རྟུལ་ཕོད་ནི་སྙིང་སྟོབས་ཆེ་བ།བརྟུལ་ནི་བསྡུས་པའམ་འཇམ་པ།དགུང་ནི་གནམ།མཚན་མོ།དགུང་ལོ་སོགས།གདུགས་ནི་ཉི་མའམ་ཉིན་པར།འཁྲུན་ནི་འཕང་ངམ་སྲིད།ཁོ་ལག་ནི་ཞེང་ངམ་སྦོམས་བདའ་བ་ནི་ཞིམ་པ།འདྲེན་མ་ནི་སྣ་ཚོགས་འདྲེས་མའམ་ཁྲ་བོ།བླ་བརྡོལ་ནི་བླ་ཅོལ།མནག་དཀའ་དང་མནོག་ཆུང་ནི་སྲན་དཀའ་དང་ཁེ་ཆུང་བ།འཕྲལ་བ་ནི་དཔྲལ་བ།ཕྱང་ངེ་བ་ནི་འཇོལ་ལེ་བ།བྱུག་རིས་ནི་གྲལ།རྩེ་རྒོད་ནི་ལྷ་འབངས།ནང་བྱན་ནི་གཡོག།མཚག་བཟང་བ་ནི་ཉམ་རྒྱས་པའམ་ཡན་ལག་ང་ཉིང་ལག་རྒྱས་པ།མཚལ་ལུ་ནི་རྟིང་དཀར།འཚལ་མ་ནི་ས་སམ་ལྟོ།འཚལ་ནི་ཤེས་པའམ་ཆོག་པའམ་འདོད་པ།འཁུམས་པ་ནི་ཐོས་པའམ་ཤེས་པ།ནུ་རྫི་ནི་ཉིང་ཁུ།ཞེས་པ་ནི་སྡོད་པའམ་བཞུགས་པ།བསྐལ་བ་ནི་བར་ཆོད་པའམ་རྒྱང་རིང་བ།གཞིབ་པ་ནི་འཇིབ་པ།མ་རྟབས་པ་ནི་མི་རིངས་པ།རླམ་ཁྱེར་ནི་ཧམ་ཁྱེར།བརྟགས་པ་ནི་གུས་པའམ་སྒྲིན་པ།གསུད་པ་ནི་སྒྲེགས་པ།གཤུང་བ་ནི་ངོས་ཀྱིས་སྐྱོན་བརྗོད་པའམ་ཤུབ་བུས་སྨོད་པ།སྐྱེལ་བདར་ནི་སྐྱེལ་གླ།དྲི་དཀུ་བ་ནི་དྲི་མི་ཞིམ་པའམ་དྲི་ཚ་བ།འགོང་བ་ནི་སྨད་པ།མངག་གཞུག་དང་ཅི་བགྱི་ནི་གཡོག་པོ།ཤིན་ཏེ་མ་མེད་པ་ནི་སྙིགས་མ་མེད་པའམ་ཆུད་ཟ་བའམ་ཉམ་ཆུང་བ་མེད་པ།སག་རྩ་སྐྱེལ་བ་ནི་སྦུངས་སྐྱེད་པའམ་དམ་བཅའ་བརྟན་པ།སྐྱོ་མ་ནི་ཕྲ་མ་དང་ཕྱེ་བ།སྲིལ་ནི་སྲོག་ཆགས་མུག་པ།སྐྱུ་རུམ་ནི་ཚོད་མ།བྱ་ན་ནི་ཚོད་མའམ་སྤགས་མ།སྤུན་པ་ནི་བསྲེས་པ།སྤེན་ཏོག་ནི་རྒྱན།སྤ་བ་ནི་མཛེས་པའམ་བྱིན་ཆགས་པ།སྤྱོམས་པ་ནི་ངོམ་པའམ་བདག་བསྟོད།ལ་གཅན་པ་ནི་ལའི་ཚུགས་པ།ཤོ་གམ་པ་ནི་ཡུལ་གྱི་ཚུགས་པ།གྲུ་བཙས་པ་ནི་གྲུ་ཚུགས་པ།དོན་མཐུན་ནི་ཚོང་པ།འགྲོན་པོའང་དེ་ཉིད།སྟ་ཟུར་ནི་དཔྱི་མགོ།སྤོན་པ་ནི་གཏོང་བ།སྤུན་པ་ནི་རྫུན་པ།རྗེ་བཙན་ནི་རྗེ་བཙུན།དངགས་ནི་ངག།བླ་ནི་རུང་ངམ་བཟོད་དམ་ཆོག།ཀླད་ནི་གོང་ངམ་སྟེང་།དབྱིག་ནི་ནོར།སོ་སྟོ་ནི་སོ་ཟིང་།སྤྱི་ཅེར་ནི་སྤྱི་ཐེར།བཟླུམས་པ་ནི་བསྡུས་པ།བརྗེད་པ་དང་རིམ་གྲོ་དང་བཙུན་པར་བྱ་བ་ནི་བཀུར་སྟི་དང་མཆོད་པའི་མིང་གི་རྣམ་གྲངས།བཀུས་ཏེ་བོར་བ་ནི་ཁུ་བ་བཏོན་པའི་སྙིགས་ལྟ་བུ།ཆབ་མི་འཚལ་བ་ནི་ཆུད་མི་ཟ་བ།ཕྱིད་ནི་དར་ཡོལ་བའམ་རྒན་པོ།སླེ་འདམས་པ་ནི་མཚན་མ་ཆད་པ།མཚན་བར་རྡོལ་བ་ནི་མོ་མཚན་གྱི་ནད།སྤྱི་བརྟོལ་ཆེ་བ་ནི་དཔྲལ་ཀོ་འཐུག་པ།དམུས་པ་ནི་ཚི་ཆད་པ།སྨེག་པ་ནི་ཉམས་དང་འཁོས་ཀ་ཁ་ཅིག་ཏུ་རྩ་བའམ་ལྷག་མ།སྨྲིག་ནི་གོས་ཚོས་མ།ངུར་སྨྲིག་ནི་གོས་དམར་སེར་ལ་གྲགས་ཀྱང་ཚོས་སྙིགས་མས་བཙོས་པའི་དོན་ཡིན།ག་གོན་དང་ཚོན་མོ་སྟེང་ནི་ཞ་ཉེ།རོ་ཉེ་ནི་ཞ་ཉེ་ནག་པོར་ཡན་ལག་བརྒྱད་པའི་འགྲེལ་པ་ཟླ་ཟེར་ལས་བཤད།སྤྲབས་པ་ནི་ཟས།བཏོགས་པ་ནི་ཕྲོགས་པ།གོ་རེ་ལོང་ནི་གད་བྱེད་པ།སྨྲེ་ཞེས་པ་ནི་སྡུག་བསྔལ།ཡན་ལག་སྐྱེས་ནི་ཕོ་མཚན།རྨྱ་བ་ནི་ཉམས་པ།གཏམས་པ་ནི་བཤད་པའམ་བསྟན་པ།ཁུད་དུ་བྱས་པ་མང་པོའི་ཡིན་པ་བདག་ཉིད་གཅིག་པུས་དབང་དུ་བྱས་པ།དགའ་འདུན་ནི་སྐྱེས་པའམ་བུད་མེད་རྐྱང་པ་དགའ་སྤྲོ་ལ་ཚོགས་པ།ཚོགས་ཅན་མ་ནི་སྨད་འཚོང་མའི་ཚོགས་ལ་ཟེར་བའང་སྣང་།མཉེས་པ་ནི་ལེགས་པའམ་གྲོས་མཐུན་པ།མི་བཀྱིག་པ་ནི་མི་བརྒྱང་བའམ་མྱུར་བ།སྤུ་བསྙལ་བ་ནི་ཉེས་པ་བཤགས་པའམ་ཞེ་སྡང་ཞི་བ།སྤུ་སྙོལ་བ་ནི་ལུས་ངག་ཡིད་ཀྱི་ཞེ་སྡང་ཞི་བར་བྱེད་པ།ཆགས་རྒྱ་ནི་བུ་ལོན་བདའ་བའི་དཔང་རྒྱ་སྟེ་ཡི་གེ་བཅུག་པ།ཁ་ཕྱིན་པ་ནི་གྲོས་མཐུན་པ།བྲུ་བ་ནི་ལྟོགས་པའམ་བཀྲེས་པ།སྨན་བཏགས་པ་ནི་ཕན་བཏགས་པ།རྣལ་དུ་ཕབ་སྟེ་ནི་གཞན་གྱི་འཚེ་བ་མེད་པར་རང་དབང་དུ་གནས་པ།བཟེ་རེ་ཅན་ནི་སྲན་ཆུང་བའམ་གཞོན་ཤ་ཅན།ཆུམས་པ་ནི་ཆགས་པ།འཚལ་མ་འཚལ་ནི་ཟན་ཟ་བ།བརྙན་པ་ནི་གཡར་བ།བླ་ན་ནི་སྨྲ་བའམ་ཟེར།ཁ་དུམ་པ་ནི་འཆམས་པའམ་མཐུན་པ།ཆེ་བཞི་ནི་བདེན་དཔང་།སྐུགས་སུ་བཙུགས་པ་ནི་རྒྱལ་བཙུགས་པ།སྤྱོས་པ་ནི་འཐབ་པའམ་ཁ་སྨྲས།གཞོངས་སྤྱོད་པ་ནི་ལྗོངས་རྒྱུ་བ།ཆུང་པ་ནི་ཞིང་པ།དུས་ཀྱིས་འཆུ་བ་ནི་དབང་གིས་འཆུ་བ།བཟང་མཁན་ནི་གོས་བཟོ་བ།སྤང་བ་ནི་མི་འཇིགས་པ།འགྲོང་གིས་འགྲོང་ལ་སྦྱར་བ་ནི་ཕོ་མཚན་གྱིས་ཕོ་མཚན་ལ་སྦྱར་བ།སྨྱུགས་པ་ནི་བཅུག་པ།དཀྲེ་ནི་ཕོ་མཚན་གྱི་ཏོག།སྤོགས་འགྱིད་པ་ནི་ཚོང་ཁེ་བ་ན་རྒྱག་ཅིང་མཉམ་པ་དང་གྱོང་བྱུང་བ་ན་མི་རྒྱག་པ་དང་མོད་ཉོ་དཀོན་ཚོང་ལའང་།ཀོག་རྩེ་ནི་རྒྱའམ་རྙི་རྙོང་ངོ་།ཐོར་ཏོ་ནི་རྩེ་མོ།བཏུངས་པ་ནི་བསད་པ།སྐྲི་ཤིག་ནི་ཐོང་ཤིག།བཤེས་གཉེན་ནི་ཡོན་ཏན།དཔུང་ཚོགས་ཡན་ལག་བཞི་རྨོངས་བཏབ་བམ།ནམ་སྲོས་ཀྱི་བར་དུ་བྲོངས་ཤིག།ཆུ་ལོན་ནི་རགས།མ་རེག་ཙམ་དུ་དྲུང་དུ་བསྙེན་ཏེ་ནི་ཉེ་བ།གནས་ནས་སྤེད་པ་ནི་གནས་ནས་ཕྱུང་བ།ཉེ་ཞོ་མེད་པ་ནི་ལེགས་པའམ་སྐྱོན་མེད་པའམ་བཀྲ་ཤིས་པ་ལ་སོགས་པ་སྟེ་རྒྱས་པར་ན་སྔ་འགྱུར་གྱི་གསུང་རབ་རྣམས་རྒྱ་ཆེར་བཀླགས་པ་ལས་ཤེས་པར་འགྱུར་གྱི་མཐའ་དག་པ་ནི་ཡི་གེའི་ལས་སུ་ཆེ་ལ།འོན་ཀྱང་ཅུང་ཟད་བརྗོད་པས་བློ་གྲོས་ཀྱི་འཇུག་པ་འཕེལ་བའི་ཐབས་སུ་མཐོང་ནས།བཅོམ་ལྡན་རིག་རལ་དང་།དབུས་པ་བློ་གསལ་ལ་སོགས་པས་མཛད་པའི་ཡེ་གེ་ལས་ཀྱང་ཇི་ལྟར་རིགས་པར་བཏུས་ཤིང་།དཔལ་ལྡན་བླ་མ་ལོ་ཆེན་གྱི་གསུང་ལས་འབྱུང་བའང་བསྣན་ཏེ་བྲིས་པའོ།།

ཡང་འདིར།ལེགས་སྦྱར་གྱི་སྐད་ཟུར་ཆག་པས་བརྡ་རྙིང་པར་འཁྲུལ་པའང་འགའ་ཞིག་སྣང་སྟེ།ཨབ་ཅེས་པ་ཆུའི་སྐད་དོད་ཡིན་པ་དང་།མར་ཆུང་ངུ་ལ་སྟོ་ཀ་ཞེས་པའང་ཆུང་ངུའི་སྐད་དོད་ཉིད་ཡིན་པ་དང་།ཀོལ་མ་ཞེས་པ་གཟན་དྲོན་གྱི་མིང་དུ་ཡོད་པའང་།ཀུལྨཱ་ཥ་ཟུར་ཆག་པ་དང་།སྨན་དཔྱད་ལས་ནི།མོན་སྲན་སྡེའུ་སྲན་ཆུང་ལ་སོགས་པ་བཙོས་ནས་ཤིང་ཀུན་ལ་སོགས་པ་སྤོད་དུ་བཏབ་པའི་ཐུག་པ་ལ་འདོད་དོ།ཨ་ཎུ་ཞེས་པ་ཆུང་ངུའམ་ཕྲ་མོའི་སྐད་དོད་ཡིན་པ་ལ།ཨ་ནུ་ཞེས་གྲགས་པ་དང་།མི་ཁེངས་པ་ཆེ་བ་ལ་མི་འགར་པོ་ཞེས་ཟེར་བའང་།གརྦ་ཞེས་པ་ང་རྒྱལ་གྱི་སྐད་དོད་ཟུར་ཆག་པ་དང་།མི་སྒྲོབ་ཆེ་བ་ཞེས་པའང་།ཨཱ་ཊོ་པ་ཞེས་པ་བརྗིད་པའམ་བསྒྱིངས་པ་ཟུར་ཆག་པ་དང་།ཀིངྐ་ར་ཞེས་པ་ཅི་བགྱི་སྟེ།ལས་བྱེད་དམ་ཕོ་ཉའམ་གཡོག་གི་སྐད་དོད་ཟུར་ཆག་པས་གིང་པ་དང་།གིང་ཕོ་གིང་མོ་ཞེས་གྲགས་པ་དང་།སྠུ་ལ་ཞེས་པ་སྦོམ་པོ་དང་རགས་པ་དང་རྒྱ་ཆེ་བའི་སྐད་དོད་ཟུར་ཆག་པས་ཐུལ་ཆེ་བ་ཞེས་པ་དང་།དྷཱུ་ལི་ཞེས་པ་ཟུར་ཆག་པས་རྡུལ་ཞེས་པ་དང་།བྷཱུ་ཀ་ཟུར་ཆག་པས་བུག་པ་ཞེས་པ་དང་།བྲཱ་ཧྨ་ཎ་ཞེས་པ་ཚངས་པ་ལས་བྱུང་བ་སྟེ་ཟུར་ཆག་པས་བྲམ་ཟེ་དང་།ཕལྐ་ཞེས་པ་རི་མོའི་སྐད་དོད་ཟུར་ཆག་པས་འཕལ་ཀ་དང་།ཀལྦའང་བསྐལ་པ་ཞེས་པ་བོད་ཀྱི་བརྡར་མཛད་པ་དང་།ལཀྵྨཱི་ཀ་ར་ཞེས་པ་དཔའ་མཛད་དེ།ཟུར་ཆག་པས་ལེགས་སྨིན་ཀ་ར་དང་།པིཎྜ་པ་བསོད་སྙོམས་པ་ཞེས་པ་སྟེ།ཟུར་ཆག་པས་པེ་ཉ་བ་དང་།པེན་ད་བར་འདོན་པ་དང་།བི་ཧཱ་ར་ཞེས་པ་གཙུག་ལག་ཁང་པ་ཞེས་པ་སྟེ་ཟུར་ཆག་པས་དཔེ་ཧར་དང་དཔེ་དཀར་དུ་བོད་པ་དང་།ཨནྡྲ་ནཱི་ལ་ཞེས་པ་དབང་སྔོན་ཏེ།ཟུར་ཆག་པས་ཨནྡ་རྙིལ་ཞེས་པ་དང་།ཨ་མི་ཏཱ་བྷ་ཞེས་པ་འོད་དཔག་མེད་དེ་ཟུར་ཆག་པས་ཨ་མི་དེ་ཝ་དང་།ཨཱཪྻཱ་ཝ་ལོ་ཀི་ཏ་འཕགས་པ་སྤྱན་རས་གཟིགས་ཞེས་པ་ཟུར་ཆག་པས་ཨཱཪྻ་པ་ལོ་དང་།པུསྟ་ཀ་གླེགས་བམ་གྱི་སྐད་དོད་ཟུར་ཆག་པས་པོ་ཏི་ཞེས་པ་དང་།སུ་ཏྲ་ཛཱི་ཝ་བུའི་འཚོ་བ་ཞེས་པ་ཟུར་ཆག་པས་འབོ་དེ་ཙི་དང་།རུ་དྲཱ་ཀྵ་ཞེས་པ་དྲག་པོའི་མིག་ཅེས་པ་ཟུར་ཆག་པས་རག་ཤ་དང་།སིནྡྷཱུ་ར་ཞེས་པ་ལི་ཁྲིའི་སྐད་དོད་ཟུར་ཆག་པས།སེ་འདུར་ར་དང་།ཀུངྐུ་མ་ཟུར་ཆག་པས་གུར་གུམ་དང་།གུགྒུ་ལ་ཟུར་ཆག་པས་གུ་གུལ་དང་།བིམྤ་ཞེས་པ་སྐུ་གཟུགས་ཀྱི་སྐད་དོད་ཟུར་ཆག་པས་འབུམ་པ་དང་།འབི་འབི་ཞེས་པ་དང་།གཉྫི་ར་མཛོད་ལྡན་ཏེ་ཟུར་ཆག་པས་འགན་འཇི་ར་དང་།ན་ཀུ་ལ་རིགས་མེད་དེ་ཟུར་ཆག་པས་ནེའུ་ལེ་དང་།པ་ཏཱ་ཀ་ཟུར་ཆག་པས་བ་དན་དང་།སཱ་ཙྪ་དམ་པའི་གཟུགས་བརྙན་ཏེ་ཟུར་ཆག་པས་ཚ་ཚ་ཞེས་པ་དང་།མུཀྟི་ཀ་གྲོལ་བ་ཅན་ཏེ།ཟུར་ཆག་པས་མུ་ཏིག་དང་།ཀེ་ས་ར་ཞེས་པ་རལ་པ་ཡིན་པ་ཟུར་ཆག་པས་གེ་སར་དང་།བྱཉྫ་ན་ཞེས་པ་ཚོད་མའམ་ཟེས་སྤགས་མ་ལ་འཇུག་པ་ཟུར་ཆག་པས་བྱ་ན་དང་།བྷེ་ཀ་སྦལ་པ་ལ་འཇུག་པ་ལ་མི་གཅེར་བུར་འཛིངས་པ་ལ་སྦེ་ཀ་ཞེས་པའང་ཟུར་ཆག་པ་དང་།དྷིཀ་ཅེས་པ་ངན་པའི་སྐད་དོད་ཟུར་ཆག་པས་མི་གླན་པ་ལ་དིག་པ་དང་།ས་ཧོ་ར་ཞེས་པ་རྒྱ་གར་གྱི་རྒྱལ་རིགས་ཡ་གར་བ་ཞིག་གི་མིང་ཟུར་ཆག་པས་ཟ་ཧོར་ཞེས་པ་དང་།ཀ་ཊོ་ར་ཞེས་པ་སྣོད་ཀྱི་སྐད་དོད་ཟུར་ཆག་པས་ཀ་ཏོ་ར་དང་།ལ་ཧུ་ཞེས་པ་ཡང་བའམ་མྱུར་བའི་སྐད་དོད་ཟུར་ཆག་པས་ལ་མོ་དང་ལ་གོར།མ་ཧཱི་ཪྵ་སར་ཉལ་གྱི་སྐད་དོད་ཟུར་ཆག་པས་མ་ཧེ་དང་།བཟླས་པའི་སྐད་དོད་ཛ་པ་དང་།ཛ་བྷི་ཟུར་ཆག་པས་འཛབ་ཅེས་སྔགས་ཀྱི་མིང་དུ་འཁྲུལ་པ་དང་།ཏྲི་ཀ་ཞེས་པ་རི་མོ་ཉིས་རིམ་དང་ཁྲོན་པའི་མུ་ཁྱུད་ཀྱི་སྐད་ཟུར་ཆག་པས།པྲི་ཀ་དང་།དགོག་༼འདི་ལ་ལྐོག་ཟེར་བའང་ཡོད་༽ཏུ་ཕྱིན་པ་ནི་རྒས་པ།གོ་ལ་ཟླུམ་པོའི་སྐད་དོད།གོ་ར་ཞེས་པ་དང་།རིན་པོ་ཆེ་དུ་མ་ཕྱོགས་གཅིག་ཏུ་བཞུ་བ་གསེར་དམར་པོར་གྲགས་པ།ཛྷེ་ཀྵ་མ་ཞེས་པ་ལ་ཟི་ཁྱིམ་དང་།མགྲིན་བའི་སྐད་དོད་གྲྭི་བ་ཟུར་ཆག་པས་གྲེ་བ་དང་།སྒྲོན་མེའི་སྐད་དོད་ཏ་ལ་ལ་ཟུར་ཆག་པས་ཏལ་ཙམ་དང་།ཏལ་སྦྱིན་སོགས་མཐའ་ཡས་པར་སྣང་ཞིང་།

ཡང་།ཁ་ཅིག་གིས་ལེགས་པར་སྦྱར་བའི་སྐད་དང་།བོད་སྐད་ཤན་མ་ཕྱེད་པར་བོད་སྐད་ཀྱི་འབྲུ་བསྣན་པ་མཐོང་སྟེ།དེ་ཡང་།སཻནྡྷ་པ་ཞེས་པ་རྒྱ་མཚོ་ལས་བྱུང་བ་སྟེ།ཚྭ་དང་རལ་གྲི་དང་རྟ་སོགས་ལ་འཇུག་པས་སྒྲ་དོན་སྐབས་སྟོབས་ཀྱིས་ཤེས་དགོས་པ་ལ།སེན་མོའི་བརྡ་སེ་གོལ་དུ་འཆད་པ་དང་།ཨ་ག་རུའི་མིང་གི་རྣམ་གྲངས་ཤིམ་ཤ་པ་ཞེས་པའི་ཤིམ་གྱི་ཀླད་ཀོར་ང་ཡིག་ཏུ་ཀློག་པ།བོད་སྐད་ཀྱི་ཤིང་དུ་འཁྲུལ་ནས་ཤ་པའི་ཤིང་ཟེར་བ་དང་།རི་པོ་ཏ་ལའི་༼པོ་ཊ་ལའང་ཟེར།བོད་སྐད་གྲུ་འཛིན་༽པ་ཡིག་ཁ་བསུམ་སྟེ།རི་བོ་ཏ་ལར་འདོན་པ་དང་།སིིཧླ་ལ་ཚིམ་བྱེད་དེ།ཏུ་རུ་ཀ་དང་མིང་གཅིག་པ་ལ།བསིལ་ལ་ཞེས་བསིལ་སྨན་དུ་འདོན་པ་དང་།པི་སྦ་ལི་ཞེས་པ་གྲོ་མ་ལ་འཇུག་ཅིང་དེ་དང་འདྲ་བའི་སྨན་ནག་པོ་ལ་གྲོག་སྨན་པི་པི་ལིང་ཞེས་པ་ལའང་།དྲོད་སྨན་པི་པི་ལིང་དུ་འདོན་པ་དང་།ཤ་རཱི་རཾ་ཞེས་པ་གདུང་དང་སྐུ་ལ་འཇུག་པ་ལ།ཤ་ཞེས་པ་བོད་སྐད་དང་།རཱི་རཾ་ཞེས་པ་རིང་བསྲེལ་གྱི་དོན་དུ་བཟུང་ནས།གདུང་ཉ་རཱི་རཾ་དང་།ཆུ་རཱི་རཾ་དང་།མི་རཱི་རཾ་དང་།བི་མ་ལ་མི་ཏྲ་དྲི་མེད་བཤེས་གཉེན་ཞེས་པ་ལ་བྱེ་མའི་ནང་ནས་མིག་བཀྲ་བའི་གཏམ་རྒྱུད་དང་།ཏུ་རུ་ཥྐ་ཞེས་པ་གར་ལོག་གི་སྐད་དོད་ཡིན་པ་མ་ཤེས་པར།ངན་པ་ཙམ་གྱི་དོན་དུ་བསམས་ཏེ་བསྐལ་པ་དུ་རུ་ཀ་དང་།མེ་དུ་རུ་ཀ་དང་།ཆུ་དུ་རུ་ཀ་དང་།ས་དུ་རུ་ཀ་སོགས་ཟེར་བ་དང་།ཨ་ཏི་ཡེ་ག་ཤིན་རྣལ་འབྱོར་ཡིན་པའི་ཨ་ཏི་ཉིད་ཟབ་མོའམ་ཉིང་ཁུ་ལྟ་བུའི་དོན་དུ་རློམ་པས་ཟབ་ཏིག་དང་ཡང་ཏིག་སོགས་དང་།དོ་ཧ་ཞེས་པ་མི་ཟད་པའི་སྐད་ལ་གཉིས་ལ་རྒོད་པ་དང་།ནཱ་རོ་པ་ཞེས་པ་རྩ་བཤད་པ་ཅེས་པའི་སྐད་དོད་ལ།ཨ་ན་ན་དང་རོ་རུ་སོང་ཞེས་པ་དང་།ཏཻ་ལོ་པ་ཏིལ་བརྡུང་ལ།ཏེ་ན་ཏེ་ཟེར་ལོ་ཞེས་མང་དུ་འཆད་སྣང་བ་ནི་བརྗོད་པའི་ལམ་ལས་འདས་པ་ལྟ་བུར་སྣང་མོད།ཤིན་ཏུ་མི་མཁས་པས་སྨྲས་པ་ནི་དགག་པར་ཡང་མི་ལྡང་ངོ་།ཞེས་མཁས་པ་དག་གསུང་ཞིང་ཕལ་ཆེར་ནི་མཁས་པ་སྔ་མ་དག་གིས་བཀག་པ་ལྟར་རོ།།

ཁ་ཅིག་ཏུ་རྒྱ་ནག་གི་སྐད་བརྡ་རྙིང་དུ་འཁྲུལ་བ་སྣང་སྟེ།བློན་པོ་ལ་ཕྱིང་སང་ཞེས་པ་དང་།དངུལ་རྫུས་མ་ལ་ཧ་ཡང་ཧ་ཞེས་པ་དང་།རྒྱ་ལ་ཧུང་ལ་དང་།གཞན་ཡང་གྲུམ་རྩེ་དང་།ཅོག་རྩེ་དང་།ལུགས་རྒྱུ་མཚན་བསྙད་པ་ལ་གཡང་རྩེ་ཞེས་པ་དང་།ཕིང་ཆང་དང་གཟན་གྱི་མིང་ལ་ཟིན་གཟན་དང་།ཅིང་ཕིང་དང་།ཨས་མན་གུར་གུམ་སོགས་མང་དུ་སྣང་ལ།རྒྱལ་པོའི་ཞལ་ལ་གསེར་ཞལ་དང་།བང་ཆེན་ལ་གསེར་ཡིག་པ་དང་།གསེར་སྐྱེམས་སོགས་ཀྱང་རྒྱ་ནག་གི་བརྡར་སྣང་ཞིང་།

ལ་ལ་ཧོར་གྱི་བརྡ་ཡང་སྣང་སྟེ།བཙུན་པ་ལ་པག་ཤི་དང་།དབང་ཆེ་བ་ལ་དར་ཁ་ཆེ་དང་།དར་རྒན་བྱིན་སོགས་མང་ལ།

ཁ་ཅིག་བོན་པོའི་བརྡར་ཡོད་དེ།ལེགས་པ་ལ་གནམ་མཆོད་པ་དང་།མི་ཤི་བ་ལ་གནམ་དུ་གཤེགས་པ་དང་།བསོད་ནམས་ཆེ་བ་ལ་གནམ་གྱིས་བསྐོས་པ་ཞེས་པ་དང་།དབང་ཆེ་བ་ལ་གནམ་སའི་བདག་ཅེས་པ་སོགས་ཤིན་ཏུ་མང་ཞིང་།

ཁ་ཅིག་ནི་བོད་སྐད་ཉིད་མ་དག་པས་བརྡ་རྙིང་དུ་འཁྲུལ་པའང་ཡོད་དེ།ཀུནྜ་ལིའི་བོད་སྐད་བདུད་རྩི་ཐབ་སྦྱོར་ལ།བདུད་རྩི་ཐལ་སྦྱོར་དང་།ཨཙྪུ་ཥྨའི་བོད་སྐད།ཁོལ་བ་ལ་ཆོལ་པ་དང་།གཡར་དམ་ལ་ཡལ་གམ་དང་།རྨ་བྱའི་མིང་མདོངས་མཐའ་ཅན་ལ་མདོངས་ཐལ་ཅན་ཞེས་པ་དང་།གཏའ་མ་ལ་གཏེ་པ།སྦྱོན་ཞེས་པ་ལ་བྱོན་ཞེས་པ་དང་།ཞག་གི་སོར་རིས་ཞེས་སོར་མོ་གསུམ་གྱི་རི་མོ་ལ་ཞག་གི་ཟོ་རིས་ཞེས་པ་དང་།དྲིང་ཞེས་པ་ནི་ནེ་ལེ་དང་།པྲ་ཏྱ་ཡ་བསྒྱུར་པ་གཞན་གྱིས་འདྲེན་པའམ་རྐྱེན་གྱི་དོན་ཡིན་པ་དང་།བཀའ་དྲིན་ཞེས་པ།པྲ་སཱ་ད་བསྒྱུར་བའང་མ་ཕྱེད་པ་དང་།མི་བློ་བསྲལ་ཅན་ལ།བློ་རལ་ཞེས་པ་མཐའ་ཡས་ལ།

ཁ་ཅིག་ནི་བོད་སྐད་ཉིད་ལ་ཞེས་སར་སྦྱར་བ་མ་གོ་བར་བརྡ་རྙིང་དུ་འཁྲུལ་བའང་སྣང་སྟེ།ཆུ་ལ་ཆབ་དང་།མེ་ལ་ཞུགས་དང་།རླུང་ལ་བསེར་བུ་དང་།ས་ལ་དོག་མ་དང་།རྡོ་ལ་གོར་མོ་དང་།གནམ་ལ་དགུང་དང་།གནམ་ལོ་ལ་དགུང་ལོ་དང་།བདེན་པ་ལ་མད་པ་དང་།བཞུགས་པ་ལ་གཞེས་པ་དང་།ལྟོ་བ་ལ་ཕྱལ་དང་།ཆབ་ཤོག།ཆབ་སྲིད།ཆབ་འབངས།ཆབ་སྒོ་སོགས་ཀྱང་ཞེ་སའི་ཚིག་གོ།ཡང་རྒྱ་རྣ་རུ་ཅན་སོགས་༼དབུས་པ་བློ་གསལ་༽བརྡ་རྙིང་དུ་བཤད་སྣང་ཡང་།དེ་དག་ནི་གབ་ཚིག་ཏུ་མཛད་པ་ཡིན་གྱི་བརྡ་རྙིང་མིན་ནོ།།

ཡང་ལ་ལ་ནི་ཞང་ཞུང་གི་སྐད་དུ་སྣང་སྟེ།སླེ་ཏྲེས་དང་ཕྱེ་མ་ལ་ཏྲེས་སམ་དང་།ཞིབ་མོ་ལ་ཅུར་ནིས་སོགས་སྨན་དཔྱད་ཀྱི་སྐབས་སུ་མཐའ་ཡས་པ་སྣང་བ་དང་།དེར་ནི་ལེགས་སྦྱར་ཟུར་ཆག་པའང་མང་སྟེ།སཱུ་ཀྵྨཻ་ལ་ཞེས་པ་ཨེ་ལ་ཕྲ་མོའི་སྐད་དོད་ལ།སུག་མེལ་དུ་གྲགས་པ་སོགས་མཐའ་ཡས་མོད་ཀྱང་ཡི་གེ་མང་བའི་འཇིགས་པས་སྤྲོས་པ་བསྡུའོ།།

འོན་ཀྱང་འདི་ཙམ་ཞིག་བརྗོད་པ་མིན་ན་ཚིག་མ་གོ་བས་དོན་ལ་འཁྲུལ་པ་ཤིན་ཏུ་མང་པོ་མཐོང་བ་དེ་དག་སླར་ཡང་གྱ་ཚོམས་སུ་གྱུར་ཏེ།གསུང་རབ་ཀྱི་ཚིག་དོན་ཕྱིན་ཅི་ལོག་ཏུ་འཆད་པར་འགྱུར་རོ།།དེས་ན་འཆད་པ་དང་རྩོམ་པ་དང་ཞུ་ཆེན་གྱི་གྲྭར་མཆི་བ་དག་གིས།གསར་རྙིང་གི་བརྡའི་ཁྱད་པར་འདི་ཙམ་ཞིག་མི་ཤེས་སུ་མི་རུང་བར་བྱས་ཏེ་གསུང་རབ་དགོངས་འགྲེལ་དང་བཅས་པ་ཆུད་མི་གསོན་པ་ལ་བསླབ་པར་བྱའོ།།ཞེས་འདོམས་པར་བྱེད་དོ།།

གངས་རིའི་ལྗོངས་འདིར་མཉམ་མེད་རྒྱལ་བའི་བཀའ།།དགོངས་འགྲེལ་བཅས་པ་འགྱུར་རོ་ཅོག་རྣམས་ཀྱི།།གསར་རྙིང་བརྡ་ཡི་ཁྱད་པར་མཐའ་ཡས་པ།།ཆོས་སྤྱན་མངའ་བའི་འཇིག་རྟེན་མིག་རྣམས་ཀྱིས།།སྤྱོད་ཡུལ་མིན་ན་བདག་ལྟས་ཅི་ཞིག་རྟོགས།།དེ་སླད་འཁྲུལ་པའི་ཆ་རྣམས་ཚིག་དང་དོན།།ཇི་བཞིན་མཁྱེན་པའི་མཁས་པས་བཟོད་མཛད་དེ།།ལེགས་པར་བཤད་པའི་བདུད་རྩིས་མཉེས་པར་མཛོད།།ལྷག་བསམ་དག་པའི་དགེ་ལེགས་ནི།།ཟླ་ཟེར་འཐུངས་པའི་ཀུནྡས་ཀྱང་།།མཚོན་པ་མིན་དེས་རྒྱལ་བའི་བསྟན།།འཁྲུལ་མེད་ཡུན་དུ་གནས་གྱུར་ཅིག།ཅེས་བྱ་བ་འདི་ཡང་གདོང་ངན་ཞེས་བྱ་བའི་ལོ།དགེ་བའི་བཤེས་གཉེན་འགའ་ཞིག་གིས་ཞལ་ཏ་ཕེབས་པ་དང་། ཤྲཱི་མནྨ་ཎི་ཀས་འཕྲལ་དུ་བསྐུལ་ཞིང་ཡི་གེའི་རྐྱེན་སྦྱར་བ་ལ་བརྟེན་ནས།སྐྱོགས་སྟོན་གྱིས་རེག་ཟིག་ཏུ་བཀོད་པའོ།།