༄༅། །ཡུལ་གངས་ཅན་པའི་བརྡ་ཡང་དག་པར་སྦྱོར་བའི་བསྟན་བཅོས་ཀྱི་བྱེ་བྲག་
སུམ་ཅུ་པའི་གཞུང་གི་རྣམ་པར་བཤད་པ་མཁས་པའི་མགུལ་རྒྱན་མུ་ཏིག་ཕྲེང་མཛེས་
ཞེས་བྱ་བ་
བཞུགས་སོ།།
༄༅།།གང་རིའི་ཁྲོད་ཀྱི་མཁས་པ་རྣམས།།སྨྲ་བའི་ངག་སྦྱོར་ལ་བརྟེན་ནས།།
དོན་གྱི་མཚན་ཉིད་རབ་གསལ་སླད།།བརྡའ་སྤྲོད་གཞུང་འདི་དགྲོལ་བར་བྱ།།
དེའང་འདི་སྐད་ཐོས་ཏེ།བདག་ཅག་གི་སྟོན་པས་འཇམ་དཔལ་རྩ་བའི་རྒྱུད་སོགས་སུ་
ཇི་ལྟར་ལུང་བསྟན་པ་བཞིན་ཁ་བ་ཅན་གྱི་ཡུལ་དབུས་སུ་གྱུར་པ་ལྷ་ལྡན་ཉིད་དུ་ལི་ཙ་
བཱིའི་རིགས་ལས་ཆོས་སྐྱོང་བའི་རྒྱལ་པོ་ཚར་དུ་དངར་བ་རིམ་པར་བྱོན་པ་ལས་ཉི་མ་
ལྟ་བུར་གྲགས་པ་རྣམ་པར་གསལ་བ།རྒྱལ་པོ་ཆེན་པོ་མིའི་ལྷའམ་ཡང་ན་སྐྱེ་བོ་མི་
སྲུན་པ་གདུལ་དཀའ་བ་རྣམས་ལུགས་གཉིས་ཀྱི་སྲོལ་བཟང་པོའི་ལམ་དུ་ནན་གྱིས་སྲོང་
ཞིང་།མཛའ་བ་དང་མི་མཛའ་བ་དང་བར་མ་རྣམས་ལ་ཐུགས་རབ་ཏུ་སྙོམས་པའི་ཕྱོགས་སུ་མ་
ལྷུང་བའི་ཕྱིར་ཤིན་ཏུ་དྲང་བའི་བཀའ་ཁྲིམས་བཙན་པོའི་གནས་ལས་མངའ་འོག་པ་རྣམས་
འདའ་བའི་སྐབས་མེད་པ་དང་།ཕྱི་དང་ནང་གི་བྱ་བའི་གནས་ཐམས་ཅད་མ་འཆོལ་ཞིང་འཁྲུགས་ པ་མེད་པར་དཔྱད་པ་གསུམ་གྱིས་གཏན་ལ་འབེབས་ཤིང་མཛངས་པར་གྲགས་པ་རྣམས་ཀྱིས་ཀྱང་
དགོངས་པའི་གཏིང་དཔོག་པ་མེད་པའི་ཕྱིར་སྒམ་པོ་སྟེ་སྲོང་བཙན་སྒམ་པོ་ཞེས་མཚན་
སྙན་པར་གྲགས་པ་ཉིད་སྐྱེ་དགུའི་དཔལ་དུ་ཤར་ཏོ།།དེའི་ཚེ་དེའི་མདུན་ན་འདོན་མཁས་
པར་གྲགས་པ་མང་པོའི་དབུས་སུ་མིང་གི་ཡི་གེ་རབ་ཏུ་བརྗིད་པ་ཐུ་མི་སཾ་བྷོ་ཊས།
ཆོས་ཀྱི་རྒྱལ་པོ་བྱང་ཆུབ་སེམས་དཔའི་བཀའ་དང་རང་ཉིད་བྱང་ཆུབ་མཆོག་གི་སྨོན་ལམ་
ཁྱད་པར་ཅན་གྱི་མཐུས་འཕགས་པའི་ཡུལ་དུ་བརྟོལ་ཏེ།པཎྚི་ཏ་ལྷ་རིག་སེངྒེ་དང་།བྲམ་
ཟེ་ལི་བི་ཀ་ར་སོགས་བསྟེན་ནས་ཕྱི་ནང་གི་རིག་པ་མང་པོར་སྦྱངས་ཤིང་བསྟན་བཅོས་ མང་པོས་མགུལ་བ་བརྒྱན་ནས་སླར་ལྡོག་པའི་ཚེ།སྐུ་མཁར་མ་རུར་ནཱ་ག་རའི་ཡི་གེར་
དཔེ་བྱས་ཏེ་བོད་ཡིག་གི་གཟུགས་བརྩམས་ཏེ་ཡིག་ཕུད་དུ།རྒྱལ་པོར་བྱ་དཀའི་ལམ་ནས་
དྲངས་པའི་བསྟོད་པས་ཆེད་དུ་བརྗོད་པས་དགེས་ཤིང་།རིམ་པར་བསྟན་བཅོས་འདི་ལ་སོགས་
པ་བོད་ཀྱི་བརྡ་ཡང་དག་པར་སྦྱར་བའི་བསྟན་བཅོས་བརྒྱད་ལ་སོགས་པ་མཛད་པས་སྨག་ལ་
སྒྲོན་མེ་བཏེག་པ་བཞིན་དུ་ཤཱཀྱའི་བསྟན་པ་བྱང་ཕྱོགས་སུ་རྒྱས་པའི་ལམ་གྱི་ཐོག་
མ་སྣང་བར་གྱུར་ཏོ།།ཞེས་གྲགས་སོ།།
དེ་ལས་སུམ་ཅུ་བ་དང་རྟགས་ཀྱི་འཇུག་པ་གཉིས་ཁོ་ན་དེང་སང་གི་བར་དུ་ཡོད་ཅིང་།
མཁས་བླུན་མང་པོས་འགྲེལ་བཤད་ཀྱི་ཁུར་བླངས་པས་དོན་གཞན་དང་གཞན་དུ་འདོན་པའི་
གླེགས་བམ་གྱི་ཕྲེང་བར་གྱུར་མོད།འོན་ཏང་རྣམ་དཔྱོད་དང་ལྡན་པ་ཁ་ཅིག་གིས་རིགས་
པའི་མདའ་རྣོན་གྱིས་ཕུག་པས་གཞུང་དོན་མང་པོ་ཞིག་དཔྱིས་ཕྱིན་པར་གྱུར་ཅིང་།ཕལ་
ཆེར་ནི་བྱང་ཕྱོགས་འདིར་གཙུག་ལག་གཉིས་ཀ་བར་དུ་ཉམས་པའི་དབང་ལས་བཤད་རྒྱུན་དང་
བསྟན་བཅོས་ཀྱི་ཡན་ལག་གཞན་མ་ཚང་བའི་ཕྱིར་མི་གསལ་བ་རྣམས་ཁ་ཁྲལ་འཇལ་བ་ཙམ་ལས་
དོན་དུ་གནས་པར་མ་མངོན་པས།བདག་ལྟ་བུས་མཐའ་གཅིག་ཏུ་བཤད་པར་སླ་བ་མ་ཡིན་ཀྱང་
བློ་གྲོས་ཀྱི་ནོར་དང་ལྡན་པ་གཞན་དག་གིས་ཀྱང་ཆེད་དུ་བསྐུལ་བ་དང་།རང་ཉིད་གཞུང་
ཁྱད་པར་དུ་འཕགས་པ་འདི་དག་ལ་འཇུག་པར་འདོད་པའི་སྤྲོ་བ་བརྟས་པས་རྗེས་དཔག་གསུམ་ གྱིས་ཇི་ལྟར་དཔག་པ་དགྲོལ་བར་བྱའོ།།
དེ་ལས་ཐོག་མར་སུམ་ཅུ་པའི་གཞུང་འཆད་པ་ལ།བསྟན་བཅོས་རྩོམ་པ་ལ་འཇུག་པའི་ཡན་
ལག་དང་།བསྟན་བཅོས་དངོས་སོ།།དང་པོ་ལ།མཚན་སྨོས་པ་དང་འགྱུར་ཕྱག་གོ།དང་པོ་ལ་
དངོས་དང་།མཚན་དོན་བཤད་པ།དོགས་གནས་དཔྱད་པ་གསུམ་ལས།དང་པོ་ནི།
རྒྱ་གར་སྐད་དུ། བྱཱ་ཀ་ར་ཎ་མཱུ་ལ་ཏྲིཾ་ཤད་ནཱ་མ།
བོད་སྐད་དུ། ལུང་སྟོན་པ་རྩ་བ་སུམ་ཅུ་བ་ཞེས་བྱ་བ།
ཞེས་འབྱུང་བ་སྟེ།བྱཱ་ཀ་ར་ཎ་ལུང་སྟོན་པ།མཱུ་ལ་རྩ་བ།ཏྲིཾ་ཤད་སུམ་ཅུ་པ།ནཱ་མ་ཞེས་བྱ་བའོ།།
གཉིས་པ་ནི།
སྒྲའི་མཚན་ཉིད་ལུང་དུ་སྟོན་ཅིང་ལེའུ་ཕྱི་མ་རྣམས་ཀྱི་རྟེན་གཞིར་གྱུར་པ་གང་ཞིག་གཞུང་ཚད་ཤླཽ་ཀ་སུམ་ཅུར་གནས་པས་དེ་སྐད་ཅེས་བྱའོ།།
གསུམ་པ་ནི།
འགའ་ཞིག་འདི་སྐད་དུ།འདི་ལྟར་ལེགས་པར་སྦྱར་བའི་བརྡའི་མིང་བསྟན་པ་ན་རྒྱ་
གར་སྐད་དུ་ཞེས་སྨོས་རིགས་པ་མ་ཡིན་ཏེ།དེ་ལྟ་ན་ལེགས་པར་སྦྱར་བ་དང་བྲལ་བའི་
རྒྱ་གར་གྱི་སྐད་ཡུལ་འཁོར་ཆེན་པོ་ལ་བརྟེན་པ་རྣམས་སུ་འཁྲུལ་བས་འདི་ལྷའི་སྐད་
དུ་རྟོགས་མི་ནུས་པའི་སྐྱོན་འཇུག་གོ།ཞེ་ན་ཞིབ་མོར་དཔྱད་པའི་ལུགས་སུ་དོགས་པ་
སྐྱེ་བ་བདེན་མོད།འོན་ཀྱང་ལེགས་པར་སྦྱར་བ་ཉིད་འཕགས་ཡུལ་གྱི་མཁས་པ་རྣམས་ལ་རབ་
ཏུ་གསལ་ཞིང་གཞན་དང་གཞན་དུ་དེ་ལྟར་མིན་པས་སྐྱེ་བོ་ཕལ་མོ་ཆེའི་ངོར་གྲགས་པ་ཙམ་
གཙོ་བོར་བྱས་པ་དང་།བྱང་ཕྱོགས་འདིར་སངས་རྒྱས་ཀྱི་བསྟན་པ་ཇི་སྙེད་ཅིག་སྣང་བ་
ཕལ་ཆེར་འཕགས་པའི་ཡུལ་ནས་འོངས་པ་ཤས་ཆེ་བས་ཡུལ་ཁུངས་སུ་བྱས་ཏེ།མཁན་པོ་ཉིད་དང་
ཕྱི་ནས་ལོ་ཙཱ་བ་རྣམས་ཀྱིས་ཀྱང་བརྗོད་པ་ཡིན་ཞིང་།མཁན་པོས་འདིར་ནི་ཡི་གེ་དང་
སྡེབ་ཏུ་སྦྱོར་བ་རྣམས་འཕགས་ཡུལ་བ་དཔེར་མཛད་པ་ཉིད་ཀྱི་ཁུངས་སྟོན་པའི་ཆེད་
དུའང་ཡིན་པས་སྐྱོན་མེད་དོ།།ཡང་རྩ་བ་སུམ་ཅུ་བ་ཞེས་པའི་སྐབས་སུ།ཕལ་ཆེར་གྱིས་
ཀཱ་ལི་སུམ་ཅུ་བརྗོད་བྱའི་གཙོ་བོར་སྟོན་པའི་དོན་དུ་བཀྲལ་ཅིང་།འགའ་ཞིག་གིས་ན་
ཡམ་དུ་ཤླཽ་ཀ་སུམ་ཅུ་ཙམ་ཞིག་ཡོད་པའི་དོན་དུའང་བཀོད་དེ།སྔ་མ་ལྟར་ན་རྟགས་འཇུག་
ལའང་སུམ་ཅུ་པའི་མིང་འཇུག་པར་ཐལ་ཏེ་སུམ་ཅུ་པར་ཀཱ་ལི་སུམ་ཅུའི་ཚིག་ཕྲད་རྣམ་
དབྱེ་སོགས་བསྟན་ལ།རྟགས་འཇུག་ཏུ་དེའི་རྟགས་ཀྱི་དབྱེ་བ་སོགས་བསྟན་པས་གཉིས་ཀར་
ཀཱ་ལི་སུམ་ཅུའི་བྱ་བ་སྟོན་པར་མཉམ་པའི་ཕྱིར།གཞན་ཡང་བོད་ཀྱི་བརྡ་སྦྱོར་བའི་
བསྟན་བཅོས་རྩོམ་ན་ཀཱ་ལི་སུམ་ཅུ་བརྗོད་བྱའི་གཙོ་བོར་མེད་པ་ནི་ཆེས་མི་རིགས་
པས་རྩ་བ་བརྒྱད་པོ་ཐམས་ཅད་ཀྱང་མིང་དེས་ཁྱབ་པར་བཞེད་ན་ནི་འདིར་དམིགས་ཀྱིས་
གདགས་པ་དོན་མེད་དོ།།ཕྱི་མས་ཕྱོགས་ཙམ་མངོན་པར་སྣང་ཡང་།འདིར་མཆོད་བརྗོད་སོགས་
ཐམས་ཅད་བགྲངས་པའི་གཞུང་ཚད་ཤླཽ་ཀ་སུམ་ཅུ་སོ་གསུམ་འབྱུང་བའི་སུམ་ཅུ་ཁོ་ནར་མ་
འགྲིག་སྟེ་སུམ་ཅུ་ཙམ་ཞེས་ལམ་སྟོར་བའི་འགྲོན་པོ་ལྟར་ཚམ་ཚོམ་བྱེད་དགོས་པ་མ་
ཡིན་ཏེ།མཆོད་བརྗོད་དང་རྩོམ་པར་དམ་བཅའ་བ་ནི།སྐབས་གཞན་གྱི་ཐུན་མོང་བ་ཡིན་པ་
རྟགས་འཇུག་ལ་དེ་མེད་པས་གསལ་ཞིང་།སུམ་ཅུ་བ་ནི།ཡི་གེ་ཨཱ་ལི་ཀཱ་ལི་གཉིས།།སོགས་
སྐབས་དང་པོ་ཉིད་ཀྱི་ཐུན་མོང་མིན་པའི་བརྗོད་བྱ་ཚིགས་བཅད་སུམ་ཅུ་ཉིད་ཀྱིས་
རྫོགས་པས་གྲངས་ངེས་པའི་སྒོ་ནས་བཏགས་པའི་ཕྱིར་རོ།།དེ་ལྟ་བས་ན་སྔོན་ཆད་འགྲེལ་
བྱེད་རྣམས་ཀྱི་བློ་གྲོས་སུ་མ་ཆུད་པའི་ལེགས་བཤད་གསར་པ་འདིས་དཔྱོད་ལྡན་རྣམས་
བག་ཡངས་སུ་རྩེན་པར་མཛོད་ཅིག།
གཉིས་པ་འགྱུར་ཕྱག་ལ་དངོས་དང་།མཐའ་དཔྱད་དོ།།དང་པོ་ནི།
ངག་གི་དབང་ཕྱུག་འཇམ་པའི་དབྱངས་ལ་ཕྱག་འཚལ་ལོ།།
ཞེས་སྨོས་ཏེ་བསྟན་བཅོས་འདི་དཔྱད་པ་གསུམ་གྱིས་རྣམ་པར་དག་པས་རྗེས་འཇུག་
རྣམས་ཀྱིས་འཕགས་ཡུལ་ནས་བསྒྱུར་པའི་བསྟན་བཅོས་ཁྱད་པར་འཕགས་པ་རྣམས་དང་མཚུངས་
པར་ལྟ་ཞིང་དོན་དུ་གཉེར་རིགས་སོ་ཞེས་འདོམས་པའི་དོན་དུ་ཐུ་མི་ཉིད་ཀྱིས་
བསྒྱུར་བའི་མདོ་རྒྱུད་རྣམས་ཀྱི་འགྱུར་ཕྱག་དང་མཐུན་པར་འཕགས་པ་འཇམ་དཔལ་ལ་ཕྱག་ མཛད་པའོ།།
གཉིས་པ་ནི།
འདིར་ལ་ལ་ཞིག་གིས་བསྟན་བཅོས་བསྒྱུར་བ་སོགས་ལ་བར་ཆད་མི་འབྱུང་བའི་ཆེད་དུ་
ལོ་ཙཱ་བ་རྣམས་ཀྱིས་ཕྱག་མཛད་པ་དང་རྗེས་སུ་མཐུན་པར་ཞེས་སྦྲེལ་མོད།བློ་རྣལ་དུ་
གནས་པས་སྨྲས་པ་མ་ཡིན་ཏེ།དེ་ལྟ་ན་བསྟན་བཅོས་འདི་རྩོམ་པ་དེའི་ཚེའམ་དེ་ལས་
སྔོན་ནུ་དཔེར་བྱ་འོས་པའི་ལོ་ཙཱ་བ་དུ་མ་ཞིག་ཡོད་པར་འདོད་དགོས་ཤིང་།དེ་འདོད་
ན་བོད་ཡིག་སྡེབ་སྦྱོར་དང་བཅས་པའང་ཐུ་མིས་བརྩམས་པ་ལས་གཞན་དུ་ཡོད་པར་ཤུགས་
ཀྱིས་ཁས་བླངས་པར་སོང་བས་བོད་ཀྱི་དེབ་ཐེར་རྙིང་མ་རྣམས་དང་།ཁྱེད་རང་གིས་དྲིན་
ཆེན་གྱི་བློན་པོ་ཐུ་མི་ང་།།སོགས་དྲངས་པའི་རྣམ་གཞག་ཐམས་ཅད་བཤིག་པར་ཐལ་ལོ།།
རྒྱུ་མཚན་འདིས།མཁན་པོས་ཐོག་མར་ཡི་གེ་བརྩམས་པའི་རྗེས་སུ་བརྡ་སྤྲོད་པའི་གཞུང་
ལུགས་རྣམས་བརྩམས་པ་དང་།མདོ་ལ་སོགས་པ་བསྒྱུར་ཅིང་སློབ་མར་བཤད་པས་ལོ་ཙཱ་བ་
རྣམས་བྱུང་བའི་གོ་རིམ་འདི་བྱང་བར་གྱིས་ཤིག།
གཉིས་པ་བསྟན་བཅོས་དངོས་ལ།གཞུང་སྤྱིའི་ཡན་ལག་ཏུ་མཆོད་པར་བརྗོད་ཅིང་བཤད་
པར་དམ་བཅའ་བ།སྐབས་དོན་དངོས་སུམ་ཅུ་བ་ཉིད་རྒྱས་པར་བསྟན་པའོ།།དང་པོ་ལ་མཆོད་
བརྗོད་དང་།བཤད་པར་དམ་བཅའ་བ་གཉིས།དང་པོ་ལའང་།དཀོན་མཆོག་གསུམ་ལ་སྤྱིར་ཕྱག་
འཚལ་བ།བྱེ་བྲག་ཏུ་འཇམ་པའི་དབྱངས་ལ་ཕྱག་འཚལ་བ།དགོས་པའི་དབང་གིས་རྟག་ཞི་བ་ལ་
ཕྱག་འཚལ་བ།དྲིན་གཟོ་བའི་ཕྱིར་མཁས་པ་སྤྱི་དང་བྱེ་བྲག་ལ་ཕྱག་འཚལ་བའོ།།དང་པོ་
ལ་དངོས་དང་མཐའ་དཔྱད་གཉིས་ལས།དང་པོ་ནི།
གང་ལ་ཡོན་ཏན་མཆོག་མངའ་བའི།།དཀོན་ཅོག་དེ་ལ་ཕྱག་འཚལ་ལོ།།
ཞེས་པ་སྟེ།གང་ཞིག་གང་ལ་ནོར་བུ་རིན་པོ་ཆེ་དང་ཆོས་མཚུངས་པའི་ཡོན་ཏན་ཕུན་
སུམ་ཚོགས་པ་མངའ་བ་ནི་དཀོན་ཅོག་ཅེས་བྱ་ཞིང་།མཚུངས་ཆོས་ཀྱི་ཡོན་ཏན་ཡང་བསོད་
ནམས་མ་བསགས་པ་ལ་སྣང་བ་མིན་པས་འབྱུང་བ་དཀོན་པ་དང་།རང་བཞིན་གྱིས་རྙོག་པའི་
ཆོས་ཅན་མ་ཡིན་པས་དྲི་མ་བྲལ་བ་དང་།རང་བཞིན་གྱི་དོན་སྒྲུབ་པའི་མཐུ་དང་ལྡན་པ་
དང་།འགྲོ་བ་རྣམས་ཀྱི་བསམ་པ་དགེ་བའི་རྒྱུ་ཡིན་པས་འཇིག་རྟེན་གྱི་རྒྱན་དང་།
འཇིག་རྟེན་ལས་མཆོག་ཏུ་གྱུར་པ་དང་།རྣམ་པར་འགྱུར་བའི་རང་བཞིན་ཅན་མ་ཡིན་པ་
རྣམས་ཏེ།འབྱུང་བ་དཀོན་ཕྱིར་དྲི་མེད་ཕྱིར།།མཐུ་ལྡན་ཕྱིར་དང་འཇིག་རྟེན་གྱི།།
རྒྱན་གྱུར་ཕྱིར་དང་མཆོག་ཉིད་ཕྱིར།།འགྱུར་བ་མེད་ཕྱིར་དཀོན་ཅོག་ཉིད།།ཅེས་
འབྱུང་བས་སོ།།དེ་ལ་དབྱེ་ན་སངས་རྒྱས་དང་ཆོས་དང་དགེ་འདུན་ཏེ་དཀོན་ཅོག་རྣམ་པ་
གསུམ་ཡིན་ཞིང་།དེའང་སྐྱབས་ཡུལ་དངོས་ཀྱི་དབང་དུ་བྱས་ན་མཐར་ཐུག་གི་སྐྱབས་
རྫོགས་པའི་སངས་རྒྱས་སྐུ་གསུམ་གྱི་བདག་ཉིད་ཅན་དང་།གནས་སྐབས་ཀྱི་སྐྱབས་འགོག་
ལམ་གྱིས་བསྡུས་པའི་ཆོས་དང་།སློབ་པ་འཕགས་པའི་དགེ་འདུན་རྣམས་དང་།དེར་མ་ཟད་གང་
ལ་བརྟེན་ནས་དཀོན་ཅོག་དངོས་ལ་གུས་པ་འཕེལ་ཞིང་མོས་པས་འཇུག་པར་འགྱུར་བའི་
རྐྱེན་ཁྱད་པར་དུ་འཕགས་པ་སངས་རྒྱས་ཀྱི་སྐུ་བརྙན་སོགས་དང་མིང་ཚིག་ཡི་གེའི་
ཚོགས་སུ་སྣང་བའི་ལུང་གི་ཆོས་དང་སོ་སོ་སྐྱེ་བོའི་དགེ་འདུན་རྣམས་ལའང་མཁན་པོས་
གཞུང་དགོད་པའི་ཐོག་མ་ཉིད་དུ་ལུས་ངག་ཡིད་གསུམ་འདུད་པའི་ཕྱག་མཛད་པ་ཡིན་ནོ།།
དེ་ལྟར་ཐོག་མ་ཁོ་ནར་དཀོན་ཅོག་གསུམ་ལ་བསྟོད་ཕྱག་མཛད་པ་འདིས་དེའི་ཚེ་བོད་ཡུལ་
དུ་བོན་ལས་གཞན་པའི་གྲུབ་མཐའ་སྨྲ་བ་ཕལ་གྱིས་ཡོད་པར་མ་འཚལ་ཅིང་།འཕགས་ཡུལ་
དུའང་ཕྱི་ནང་གཉིས་ཀ་ཡོད་པས་རྗེས་འཇུག་གི་སྐྱེ་བོ་རྣམས་རྗེས་སུ་གཟུང་བའི་
སླད་དུ་གང་ཞིག་དཀོན་ཅོག་གསུམ་ལ་འདུད་ཅིང་སྐྱབས་སུ་འགྲོ་བར་བྱེད་པའི་ལམ་དེ་ ནི་ནོར་བ་མེད་ཅིང་ཡང་དག་པའོ་ཞེས་འདོམས་པའང་ཡིན་ནོ།།
གཉིས་པ་ནི།
ཁ་ཅིག་གིས།སྐབས་འདིར་གང་ལ་ཞེས་པའི་ལ་ཡིག་ལོགས་སུ་བཀར་ནས་ངོས་གཟུང་བའི་
དོན་དང་དེ་ལ་ཞེས་པའི་ལ་ཡིག་ཆེད་དུ་བྱ་བའི་དོན་དུ་བཤད་མོད།སྔ་མ་ནི་གཞུང་ འདིའི་ལ་དོན་འཆད་པའི་སྐབས་སུ་དེ་འདྲ་ལ་འཇུག་པར་མ་བཤད་པར་མ་ཟད་དོན་གྱིས་ཀྱང་
དེ་འདྲར་འཇུག་མི་སྲིད་པས་མི་འཐད་ཅིང་།གང་ཞིག་ལ་ཡོན་ཏན་མཆོག་མངའ་བའམ་ལྡན་པ་
ཞེས་སྦྲེལ་དགོས་པས་རྣམ་དབྱེ་བདུན་པ་གནས་གཞིའི་དོན་ཉིད་དོ།།ཕྱི་མ་ནི་ལེགས་
སྦྱར་ཤེས་རློམ་གྱིས་ཞྭ་དཔེ་ལྷམ་ལ་བཀབ་པར་ཟད་དེ།ཅིའི་ཕྱིར་ན།ཀ་ལཱ་པར།ན་མསྲ།
སྭསྟི།སྭ་ཧཱ།སྭ་དྷཱ།ཨ་ལཾ།བ་ཥ་ཊ།སྦྱོར་བ་ལ་བཞི་བའོ་ཞེས་འབྱུང་བར་ན་མསྲ་ཀྱི་
ཡུལ་ལ་སྤྱིར་བཏང་དོན་འཐོབ་ཀྱི་སྒོ་ནས་གཉིས་པ་འཇུག་ཀྱང་གྲགས་པ་དམིགས་བསལ་
གྱི་སྒོ་ནས་བཞི་བ་སྦྱོར་བར་མཁས་པ་རྣམས་ཀྱིས་བཀྲལ་མོད་ཀྱི།དེ་འདྲའི་བྱེ་བྲག་
མ་ཕྱེད་པར།ན་མསྲ་ཀྱི་ཡུལ་ལ་བཞི་བ་འཇུག་པར་བཤད་དོ་སྙམ་ནས་ཕྱག་འཚལ་བའི་དོན་
ཅན་གྱི་སྒྲའི་ཡུལ་ཐམས་ཅད་ལ་བཞི་བ་འཇུག་པར་བསམ་ཞིང་སྨྲ་བའི་ཕྱིར་རོ།།དེས་ན་
སྤྱིར་བཏང་གི་སྒྲུབ་པའི་དབང་གིས།པྲ་ཎ་མྱཾ་སོགས་ཀྲྀཏྲ་རྐྱེན་གཞན་གྱིས་
བསྒྲུབས་པ་དང་།ན་མཱ་མི་སོགས་ཏིང་མཐའ་རྣམས་དང་།བྱིངས་གཞན་ལས་བྱུང་བའི་བནྡེ།
བནྡ་ནཾ་ལྟ་བུ་རྣམས་ཀྱང་འདུད་ཅིང་ཕྱག་འཚལ་བའི་དོན་ཅན་དུ་མཚུངས་ཀྱང་དེ་དག་གི་
ཡུལ་ལ་ནམ་དུའང་གཉིས་པ་ལས་གཞན་པའི་རྣམ་དབྱེ་འཇུག་པ་མ་ཡིན་པ་འདི་ཀུན་གྱིས་
ཤེས་བར་བྱའོ།།རྒྱུ་མཚན་དེས་ན་བོད་དུ་དེ་ལྟའི་གྲགས་པ་དམིགས་བསལ་མེད་པའི་
ཕྱིར་དོན་ཐོབ་གཙོ་བས།བཞི་བའི་སྤྱིར་བཏང་གི་དོན་སྦྱིན་པའི་སྣོད་ལ་སོགས་པ་བྱ་
བ་གང་ཡིན་ཡང་བྱ་ཡུལ་དེའམ་དེ་དང་འབྲེལ་བའི་དོན་དུ་སོང་བ་ཞིག་དགོས་པ་ལས།ཡུལ་
ཁྱད་པར་ཅན་ལ་ཕྱག་བྱེད་པ་ནི་ཕྱག་བྱེད་པོ་ཉིད་དམ་དེ་དང་འབྲེལ་བའི་དོན་ལས་ཕྱལ་
ཡུལ་དེའི་ཆེད་དུ་མིན་པ་ནི་གནག་རྫིས་ཀྱང་རྟོགས་པར་སླ་བའི་ཕྱིར་ཕྱག་གི་ཡུལ་ལ་
རྣམ་དབྱེ་གཉིས་པ་འཇུག་པ་ལས་འོས་མེད་དོ།།འོ་ན་གནས་བརྒྱད་འགྲེལ་བ་ལས།བཞི་བ་
སྦྱིན་པ་དང་ཕྱག་འཚལ་བ་ཞེས་བྱ་བ།ཤིང་གི་ཕྱིར་ཆུ་འདྲེན་པའང་ཤིང་ཉིད་རྒྱས་པ་
དང་།སྨིན་པའི་ཕྱིར་སྦྱོར་ཡང་།དོན་གྱིས་ཆུ་འདྲེན་པའི་བྱེད་པ་པོའི་ཆེད་ཡིན་
པར་འགྱུར་བ་དང་།མཆོད་རྟེན་ལ་ཕྱག་འཚལ་བའང་།མཆོད་རྟེན་ཉིད་ཕྱག་གི་ཡུལ་ལམ་གནས་
སུ་སྦྱར་ཡང་དོན་གྱིས་ཕྱག་འཚལ་བའི་ཆེད་ཡིན་པར་འགྱུར་བས་བཞི་བ་བྱ་བའི་ཆེད་
ཀྱི་དོན་དུ་དྲང་ངོ་།།ཞེས་བསྟན་པ་མ་ཡིན་ནམ་ཞེ་ན།གནས་བརྒྱད་རྩ་འགྲེལ་གྱི་དོན་
འགའ་ཞིག་བསྒྲུབ་བྱ་ལས་སྒྲུབ་བྱེད་དུ་མི་འགྲོ་བ་ཡོད་ཅིང་རྣམ་དབྱེ་བཞི་བ་ འཇུག་ཚུལ་འདིའང་བརྟག་དགོས་ཏེ།ཆུ་འདྲེན་པའི་བྱེད་པ་པོའི་ཆེད་ཡིན་པའི་རྒྱུ་
མཚན་གྱིས་ཤིང་ལ་བཞི་བ་འཇུག་པ་དང་།ཕྱག་འཚལ་བའི་བྱ་བའི་ཆེད་ཡིན་པའི་རྒྱུ་མཚན་
གྱིས་མཆོད་རྟེན་ལ་བཞི་བ་འཇུག་པར་འདོད་པ་དེ་ལྟ་ན།ཤན་པས་ཕྱུགས་གསོད།ཚོང་བས་
ནོར་སྒྲུབ།ཁ་ཟས་ལ་ལོངས་སྤྱོད།ལྟ་བུ་རྣམས་ལའང་རིམ་པར་གསོད་པ་པོ་དང་སྒྲུབ་པ་
པོའི་ཆོད་ཡིན་པས་ཕྱུགས་དང་ནོར་ལ་བཞི་བ་འཇུག་པར་ཐལ་བ་དང་།ལོངས་སྤྱོད་པའི་བྱ་
བའི་ཆེད་ཡིན་པས་ཁ་ཟས་ལ་བཞི་པ་འཇུག་པར་ཐལ་བ་སོགས་དང་།སྤྲང་པོ་ལ་ཟན་སྦྱིན་ལྟ་
བུར་སྦྱིན་བྱའམ་སྦྱིན་བྱེད་ཀྱི་ཆེད་དུ་མ་ཡིན་པས་སྦྱིན་ཡུལ་ལ་བཞི་པ་མི་འཇུག་
པར་ཐལ་བ་སོགས་སྐྱོན་མཐའ་ཡས་ཤིང་།བརྡ་སྤྲོད་པའི་བསྟན་བཅོས་ཚད་ལྡན་གང་དུའང་
དེ་འདྲའི་རྣམ་གཞག་བཤད་པ་མ་མཐོང་བས་སོ།།ཡང་གང་ལ་དང་དེ་ལ་ཞེས་པའི་ལ་དོན་གཉིས་
མཐའ་གཅིག་ཏུ་མི་མཚུངས་པར་འཆད་དགོས་པའང་མ་ཡིན་ཏེ།ལེགས་སྦྱར་གྱི་རྣམ་དབྱེ་
སྦྱོར་ཚུལ་དང་བསྟུན་ན།གང་ཞེས་པ་སྤྱིའི་སྒྲ།དེ་ཞེས་པ་བྱེ་བྲག་ངེས་གཟུང་གི་
སྒྲ་ཡིན་པས།སྤྱིའི་བྱ་བ་བྱེ་བྲག་ལ་ངེས་གཟུང་གིས་སྦྱོར་བ་འདི་འདྲའི་རིགས་ལ་
གཉིས་ཀར་རྣམ་དབྱེ་མཚུངས་པར་སྦྱོར་བ་ཡིན་པའི་ཕྱིར་དེ་གཉིས་ཀ་རྣམ་དབྱེ་གཉིས་
པའི་དོན་དུ་བྱས་ནའང་རུང་སྟེ།ཕྱག་འཚལ་ལོ།།གང་ལ་ན་ཡོན་ཏན་མཆོག་མངའ་བའི་དཀོན་
ཅོག་དེ་ལའོ།།ཞེས་འཆད་པའི་ལུགས་སོ།།
གཉིས་པ་ལ་དངོས་དང་ལོག་རྟོག་སེལ་བ་གཉིས།དང་པོ་ནི།
གང་གིས་སྒྲ་དབྱངས་ཀུན་གསུངས་པའི།།འཇམ་པའི་དབྱངས་ལ་ཕྱག་འཚལ་ལོ།།
ཞེས་པ་སྟེ།གང་ཞིག་གང་གིས་སྒྲ་དབྱངས་བརྗོད་པ་ཐམས་ཅད་མ་ལུས་པར་སྟོན་ཅིང་
གསུངས་པས་གསུང་གི་དབང་ཕྱུག་ཆེན་པོར་གྱུར་པ།ཉེས་པའི་རྩུབ་རེག་ཐམས་ཅད་ཡོངས་
སུ་སྤངས་པས་འཇམ་པའི་ཡོན་ཏན་དང་ལྡན་པའི་ཕྱིར་འགྲོ་བ་ཐམས་ཅད་ཀྱི་ཁམས་དབང་བསམ་
པ་རྣམས་དང་མཐུན་པར་རྗེས་སུ་འཇུག་པའི་དབྱངས་ཀྱི་བདག་ཉིད་དེ་ལ་ཕྱག་འཚལ་ལོ།།
ཞེས་པའོ།།སྒྲ་དབྱངས་ཇི་ལྟར་གསུངས་པའི་ཚུལ་ཡང་།འཇམ་པའི་དབྱངས་ཞེས་བྱ་བ་ནི་
བསྐལ་པ་དཔག་ཏུ་མེད་པའི་གོང་ནས་མངོན་པར་རྫོགས་པའི་བྱང་ཆུབ་བརྙེས་སུ་ཟིན་
ཀྱང་།ས་བཅུའི་བྱང་ཆུབ་སེམས་དཔའ་ལ་སོགས་པའི་ཚུལ་གྱི་སྒྱུ་འཕྲུལ་ཆེན་པོས་
འཁོར་བ་སྲིད་དུ་སངས་རྒྱས་ཀྱི་འཕྲིན་ལས་མཛད་པ་ཞིག་སྟེ།དོན་དམ་པར་ན་སངས་རྒྱས་
ཐམས་ཀྱི་ཐུགས་གཉིས་སུ་མེད་པའི་ཡེ་ཤེས་ཀྱི་ངོ་བོ་འཇམ་དཔལ་ཡེ་ཤེས་སེམས་དཔའོ།།
དེ་ཉིད་བདེ་བར་གཤེགས་པ་ཐམས་ཅད་ཀྱི་གསུང་མི་ཟད་པ་རྒྱན་གྱི་འཁོར་ལོའི་རྒྱུར་
གྱུར་པ་དང་།དེའི་མཐུས་འཇིག་རྟེན་ཐམས་ཅད་ཀྱི་སྒྲ་དབྱངས་བརྗོད་མ་ལུས་པ་གསལ་
བར་བྱེད་པའང་ཡིན་ནོ།།རྒྱུ་མཚན་དེས་འཇམ་པའི་དབྱངས་ཀྱིས་སྒྲ་དབྱངས་གསུངས་པར་
བསྟན་པ་སྟེ།མཚན་ཡང་དག་པར་བརྗོད་པ་ལས།བཅོམ་ལྡན་འདས་ཀྱི་ཡེ་ཤེས་སྐུ།།གཙུག་
ཏོར་ཆེན་པོ་ཚིག་གི་བདག།ཡེ་ཤེས་སྐུ་སྟེ་རང་བྱུང་བ།།འཇམ་དཔལ་ཡེ་ཤེས་སེམས་དཔའ་
ཡི།།ཞེས་གསུངས་ཤིང་དེའི་ཚིག་རྐང་ཐ་མའི་དོན་སྒེག་པའི་རྡོ་རྗེའི་འགྲེལ་བར།
འཇམ་པ་ནི་མཉེན་པ་དང་དཔལ་དང་ལྡན་པ་གང་ཡིན་པ་དེ་ནི་འཇམ་དཔལ་ལོ།།ཡེ་ཤེས་སེམས་
དཔའ་ཞེས་བྱ་བ་ནི་དེ་བཞིན་གཤེགས་པ་ཐམས་ཅད་ཀྱི་ཐུགས་ཀ་ན་གནས་པའི་ཕྱིར་རོ།།
འཇམ་དཔལ་ཡང་དེ་ཡིན་ལ་ཡེ་ཤེས་སེམས་དཔའང་དེ་ཉིད་ཡིན་པས་འཇམ་དཔལ་ཡེ་ཤེས་སེམས་
དཔའ་སྟེ།དེ་ས་བཅུའི་དབང་ཕྱུག་གི་བྱང་ཆུབ་སེམས་དཔའ་ནི་མ་ཡིན་ནོ།།དེ་ལྟ་ན་དེ་
སུ་ཞིག་ཡིན་ཞེ་ན་གཉིས་སུ་མེད་པའི་ཡེ་ཤེས་ཤེས་རབ་ཀྱི་ཕ་རོལ་ཏུ་ཕྱིན་པ་དེ་
ཉིད་འཇམ་དཔལ་ཡེ་ཤེས་སེམས་དཔའ་སྟེ།ཞེས་དང་།རྫོགས་པའི་སངས་རྒྱས་ཨ་ལས་བྱུང་།།
ཨ་ནི་ཡིག་འབྲུ་ཀུན་གྱི་མཆོག།དོན་ཆེན་ཡི་གེ་དམ་པ་སྟེ།།ཁོང་ནས་འབྱུང་བ་སྐྱེ་
བ་མེད།།བརྗོད་པ་ཀུན་གྱི་རྒྱུ་ཡི་མཆོག།ཚིག་ཀུན་རབ་ཏུ་གསལ་བར་བྱེད།།ཅེས་དང་།
འགྲེལ་བར།དེས་ན་འདི་སྐད་སྟོན་པར་འགྱུར་ཏེ་ཡི་གེ་ཨ་ནི་མ་སྐྱེས་པའི་རྣམ་པས་
སངས་རྒྱས་ཐམས་ཅད་ཀྱི་ཡོན་ཏན་རྣམས་ཀྱི་གནས་བྱང་ཆུབ་སེམས་སྔོན་དུ་འགྲོ་བ་རྣམ་
པར་མི་རྟོག་པའི་ཡེ་ཤེས་ཀྱི་ངོ་བོ་ཉིད་འཇམ་དཔལ་གྱི་རང་བཞིན་བསྐྱེད་པས་ན་ཆོས་
ཀྱི་འཁོར་ལོ་སྐོར་བར་བྱེད་ཅིང་ཚིག་ཐམས་ཅད་རབ་ཏུ་གསལ་བར་བྱེད་པའི་གསུང་གི་ འཁོར་ལོའི་རྒྱུར་གྱུར་པའི་ཕྱིར་བརྗོད་པ་ཐམས་ཅད་རྒྱུའི་མཆོག་ཡིན་ནོ།།ཞེས་
སོགས་རྒྱས་པར་གསུངས་པ་བཞིན་ནོ།།
གཉིས་པ་ནི།
སྐབས་འདིར་འགྲེལ་བྱེད་སྔ་མ་རྣམས་ཀྱིས་སྒྲ་དབྱངས་ཞེས་པ་ཨཱ་ལི་བཅུ་དྲུག་
ཁོ་ནར་ངོས་བཟུང་སྟེ་དེ་འཇམ་དཔལ་གྱིས་གསུངས་སོ་ཞེས་བབ་ཅོལ་དུ་སྨྲ་བར་བྱེད་ མོད།དེ་དག་གིས་བརྗོད་པ་ཙམ་ལ་བསམས་ན་ནི་སྨྲ་པོ་མཐའ་ཡས་པའི་ཕྱིར་མ་ངེས་ལ།
སྔོན་དུ་ཨཱ་ལི་བཅུ་དྲུག་ཁོ་ན་གསུངས་པའི་ལོ་རྒྱུས་གཏན་ཚིགས་ཡོད་ནའང་བཀོད་
རིགས་པ་ལས་མི་སྣང་ཞིང་།འཇམ་དཔལ་ཤེས་རབ་ཀྱི་ལྷ་ཡིན་པས་ཨཱ་ལི་ཁོ་ན་གསུངས་པ་
འཐད་དོ་སྙམ་ནའང་རང་བཟོར་རྟོགས་སླ་བར་མ་ཟད།མདོ་རྒྱུད་རྒྱ་མཚོ་རྣམས་ནས་སྒྲ་
དབྱངས་བརྗོད་པ་ཐམས་ཅད་ཀྱི་དབང་ཕྱུག་ཏུ་གསུངས་པ་དང་འགལ་ལོ།།
གསུམ་པ་ལ་དངོས་དང་ལོག་རྟོག་སེལ་བ་གཉིས།དང་པོ་ནི།
གང་གིས་མིང་གཞི་སྔོན་གསུངས་པ།།རྟག་ཞི་བ་ལ་ཕྱག་འཚལ་ལོ།།
ཞེས་པ་སྟེ།གང་གིས་མིང་ཚིག་བརྗོད་པ་ཀུན་གྱི་གཞི་ཡིན་པས་མིང་གཞི་སྟེ་ཡི་
གེ་སྔོན་དུ་གསུང་བ་པོར་འཇིག་རྟེན་ན་གྲགས་པ་ལྷའི་དབང་པོ་རྟག་ཏུ་ཞི་བ་ལ་ཕྱག་
འཚལ་ལོ།།ཞེས་སོ།།དེའང་འཇིག་རྟེན་གྱི་གྲགས་པ་ཙམ་གྱི་རྗེས་སུ་འབྲངས་ནས།བརྡ་
ཡང་དག་པར་སྦྱོར་བའི་ཚུལ་འདི་དག་འོག་ནས།བསླབ་པ་ཀུན་གྱི་གཞི་འཛིན་ཅིང་།།སོགས་
འཆད་འགྱུར་ལྟར་གྲུབ་མཐར་ཞུགས་མ་ཞུགས་ཕྱི་ནང་ཐམས་ཅད་ཀྱི་བསླབ་བྱར་ཤེས་པའི་
ཆེད་དུའམ།སྤྱི་རོལ་བ་རྗེས་སུ་གཟུང་བའི་སླད་དུ་ལྷ་ཆེན་པོ་དབང་ཕྱུག་ལ་བསྟོད་
ཕྱག་མཛད་པ་ཡིན་ཞིང་།དབང་ཕྱུག་གི་མཚན་དུ་རྟག་ཞི་བ་ཞེས་པ་ནི་ས་དཱ་ཤི་བ་སྟེ་
འཕགས་པའི་ཡུལ་དུ་རླུང་ལྟར་གྲགས་པ་ཡིན་ནོ།།
གཉིས་པ་ནི།
དེ་ལྟ་ན་ལྷ་ཆེན་པོས་ཡི་གེ་ཐོག་མར་བཀོད་པའམ་གསུངས་པའི་ལོ་རྒྱུས་བསྙད་དུ་
མེད་ཅིང་།སྤྱིར་དཀོན་ཅོག་གསུམ་ལ་སྐྱབས་སུ་སོང་ནས་འཇིག་རྟེན་པའི་ལྷ་ལ་ཕྱག་
བྱེད་པའང་མི་འབྲེལ་བས་མི་འཐད་དོ།།ཞེ་ན་ལྷ་ཆེན་པོས་ཡི་གེ་ཐོག་མར་བཀོད་པའི་
ལོ་རྒྱུས་དེང་སང་བོད་ཡུལ་འདིར་ཡོངས་གྲགས་སུ་མེད་ཀྱང་སྔོན་དུས་མེད་པར་མ་ངེས་
ལ།འཕགས་ཡུལ་དུ་ནི་ཕྱི་རོལ་བ་དག་གིས་དབང་ཕྱུག་འཇིག་རྟེན་གྱི་བྱེད་པོར་ཡང་
འདོད་ཅིང་བྲམ་ཟེ་རྣམས་ཀྱི་གཞུང་དུ་བྱེད་པོ་ཉི་ཤུ་རྩ་བཞི་བཤད་པ་ལས་ཡི་གེའི་
བྱེད་པོ་དབང་ཕྱུག་ཏུ་གསལ་བར་བསྟན་པ་ཡོད་པར་མ་ཟད།མ་མཐོང་ཕྱིར་ན་མེད་པ་མིན།།
ཞེས་པ་ལྟར་ཁྱེད་རང་གིས་མ་མཐོང་བའི་རྟགས་ཀྱིས་མེད་པར་བསྒྲུབ་མི་ནུས་པའི་
ཕྱིར་དང་།མཆོག་གསུམ་ལ་སྐྱབས་སུ་སོང་ནས་འཇིག་རྟེན་པའི་ལྷར་ཕྱག་བྱེད་པ་སྤྱིར་
མི་འོས་ཀྱང་འདི་དགོས་པ་དང་བཅས་ཤིང་ལྷ་ཆེན་པོ་དེ་འཇིག་རྟེན་དབང་ཕྱུག་གི་རྣམ་
རོལ་དུའང་ཟ་མ་ཏོག་ལ་སོགས་པའི་མདོ་སྡེ་རྣམས་སུ་བསྟན་པའི་ཚུལ་ཇི་ལྟ་བར་ཐུགས་
སུ་ཆུད་ནས་ཕྱག་མཛད་ཀྱི།འཇིག་རྟེན་རང་རྒྱུད་པར་བཟུང་བའམ།འཇིག་རྟེན་གྱི་བྱེད་
པོ་སོགས་སུ་ཞེན་པས་ཕྱག་མ་མཛད་པའི་ཕྱིར་སྐྱོན་མེད་དོ།།དེས་ན་མཁན་པོ་འདིས་ཡི་
གེ་དབང་ཕྱུག་གིས་བཀོད་པ་འཕགས་ཡུལ་དུ་བྲམ་ཟེ་རྣམས་ལ་ཡོངས་སུ་གྲགས་པར་དགོངས་
ནས་མ་བརྟགས་ཉམས་དགའི་ངོར་འཇིག་རྟེན་གྱི་གྲགས་པ་དང་སྒོ་བསྟུན་ཏེ།དགོས་པའི་
དབང་གིས་འདི་ལྟར་བསྟན་པ་ལ་ནི་ཉེས་པའི་ཆ་ཕྲ་མོས་ཀྱང་གོས་པ་མ་ཡིན་ནོ།།འདིར་
འགྲེལ་བྱེད་གཞན་དང་གཞན་དག་གིས་རྟག་ཞི་བ་ཞེས་པ་སངས་རྒྱས་དང་།སྤྱན་རས་གཟིགས་
དང་།ཚངས་པ་དང་།ཁྱབ་འཇུག་སོགས་སུ་འདོད་པ་ཡོད་ཀྱང་རིམ་བཞིན་འཐད་པར་མ་མཐོང་
སྟེ།སངས་རྒྱས་ནི་དཀོན་ཅོག་གསུམ་གྱི་གཙོ་བོ་ཡིན་པའི་ཕྱིར་དེ་ལ་ཐོག་མར་བསྟོད་
ཕྱག་མཛད་པས་འདིར་སླར་ཡང་ཁྱད་པར་དུ་བསྟོད་ཕྱག་མཛད་པར་བསྒྲུབ་པ་ལ་དགོས་པ་འཐད་
ལྡན་སྨྲ་རྒྱུ་མ་བྱུང་བའི་ཕྱིར་དང་།རྟག་ཞི་བ་སངས་རྒྱས་ཀྱི་མཚན་དུ་གྲགས་ཆུང་
བའི་ཕྱིར་དང་།སྤྱན་རས་གཟིགས་དང་ལྷ་ཚངས་པ་དག་གིས་ཀྱང་ཡི་གེ་ཐོག་མར་བཀོད་པའི་ ལོ་རྒྱུས་འཐད་ལྡན་སྨྲ་རྒྱུ་མེད་པར་མ་ཟད།དེ་དག་ལའང་རྟག་ཞི་བའི་མིང་ཡོངས་སུ་
མ་གྲགས་པའི་ཕྱིར་དང་།ཁྱབ་འཇུག་གིས་ཡི་གེ་བཀོད་པར་བཤད་པའི་གཞུང་དེའང་འཐད་
ལྡན་ཡིན་མིན་བརྟག་དགོས་ཤིང་ཁྱབ་འཇུག་ལ་རྟག་ཞི་བར་ཡང་མ་གྲགས་ཏེ་མིང་སྟོང་
གིས་ཁྱབ་འཇུག་ལ་བསྟོད་པའི་རྒྱ་དཔེ་ཁོ་བོའི་ལག་ཏུ་སོན་པས་དེའི་ནང་དུའང་རྟག་
ཞི་བ་ཞེས་པ་མ་བྱུང་བའི་ཕྱིར་དང་།སོ་སོར་འབྲང་མའི་སྲུང་བའི་སྐབས་སུ།དམངས་
རིགས་ཕྱིར་ན་རྟག་ཞི་བ།།ཁྱབ་འཇུག་ལེགས་པར་བྲི་བར་བྱ།།ཞེས་འབྱུང་བའང་དེ་གཉིས་
གཅིག་པར་བསྟན་པ་མ་ཡིན་པའི་ཕྱིར་ཏེ།དམངས་རིགས་ཀྱི་དོན་དུ་དབང་ཕྱུག་གམ་ཁྱབ་
འཇུག་གང་རུང་བྲི་བའི་དོན་དུ་མངོན་པའི་ཕྱིར་ཏེ།དེ་མ་ཐག་ཏུ།རྗེའུ་རིགས་ཕྱིར་
ནི་རྣམ་ཐོས་བུ།།ལྷ་ཡི་དབང་ཕྱུག་དབང་པོ་བྲི།།ཞེས་འབྱུང་བའམ་རྣམ་ཐོས་བུའམ་
དབང་ཕྱུག་གམ་བརྒྱ་བྱིན་གང་རུང་བྲི་བའི་དོན་དུ་གསལ་བའི་ཕྱིར་རོ།།ཡང་འགྲེལ་
བྱེད་ཕྱི་མ་ཞིག་གིས་རྟག་ཞི་བ་དབང་ཕྱུག་ཏུ་འདོད་མཁན་ལ་དགག་པ་བྱེད་པར་བསམས་
ཏེ།དབང་ཕྱུག་དང་དྲག་པོ་སོགས་སྐབས་འདིར་མཆོད་ཡུལ་དུ་བྱེད་པ་ལ་དགོས་པ་མ་མཆིས་
ཤིང་ཞེས་སྨྲས་ནས་རང་ལུགས་བཞག་པའི་སྐབས་སུ།གཞན་སྡེའི་ངོར་ཚངས་པ་དང་ཁྱབ་འཇུག་
སོགས་ལ་བསྟོད་ཕྱག་མཛད་པར་འགྲེལ་རིགས་ཚུལ་ཟ་མ་ཏོག་གི་ལུང་རྒྱས་པར་དྲངས་ནས་
བསྒྲུབས་འདུག་སྟེ་དེ་དག་དངོས་འགལ་དུ་འགྱུར་རམ་མི་འགྱུར།དབང་ཕྱུག་དང་དྲག་པོ་
ཞེས་པའང་མིང་གི་རྣམ་གྲངས་ཡིན་གྱི་ལྷའི་ངོ་བོ་སོ་སོ་བ་མ་ཡིན་ལགས་སོ།།
ཡང་འདིར་བསྟན་གྱི་མི་གཞི་ཞེས་པའང་ཁ་ཅིག་གིས་གསལ་བྱེད་ཁོ་ན་ལ་ངོས་བཟུང་བ་
ནི།དེ་བས་གང་དུ་སྒྲ་དབྱངས་ཨཱ་ལི་ཁོ་ནར་བཤད་པའི་སྟོབས་ཀྱིས།དེ་དང་འབྲེལ་ མཚུངས་པའི་སླད་དུ་དེ་ལྟར་མི་འཆད་ཀ་མེད་བྱུང་བ་ལས་རྒྱུ་མཚན་གཞན་མི་སྣང་ངོ་།།
མིང་གཞི་ཡི་གེ་ཙམ་ལ་ངོས་འཛིན་པ་ནི་རྒྱུ་མཚན་དང་བཅས་པ་སྟེ།འོག་ཏུ།མིང་ཚིག་
བརྗོད་པ་ཀུན་གྱི་གཞི།།ཡི་གེའི།ཞེས་དང་།ཡི་གེ་ཨཱ་ལི་ཀཱ་ལི་གཉིས།།ཞེས་བཤད་པས་
མི་གཞི་ཡི་གེ་ཡིན་པར་གྲུབ་ཅིང་ཡི་གེའང་ཨཱ་ལི་ཀཱ་ལིའི་བདག་ཉིད་དུ་གྲུབ་པའི་
ཕྱིར་རོ།།
བཞི་པ་ནི།
སྡེབ་སྦྱོར་ལེགས་མཛད་མཁས་རྣམས་དང་།།བླ་མ་ལ་ཡང་ཕྱག་འཚལ་ནས།།
ཞེས་པ་སྟེ།སྒྲ་སྐད་ཀྱི་བརྗོད་པ་དང་དོན་སྡེབ་ལེགས་པར་སྦྱོར་བའི་ཚུལ་སྟོན་
པའི་སྒོ་ནས་ཚིག་དོན་གཉིས་ལ་མི་རྨོངས་པའི་ཤེས་རབ་སྐྱེད་པར་བྱེད་ནུས་པའི་
གཞུང་རྩོམ་ཞིང་འདོམས་པར་མཛད་པའི་མཁས་པ་སྤྱི་དང་།བྱེ་བྲག་ཏུ་མཁན་པོ་ཉིད་ལ་
དེ་ལྟའི་བྱ་བ་མཛད་པའི་བྲམ་ཟེ་ལི་བི་ཀ་ར་ལ་སོགས་པའི་བླ་མ་རྣམས་ལའང་ཕྱག་མཛད་
པ་སྟེ།ནས་ཀྱི་སྒྲ་ནི་མཆོད་པར་བརྗོད་ཟིན་མ་ཐག་ནས་བཤད་པར་དམ་བཅའ་བའི་ཚིག་
འདྲེན་པའི་ཕྱིར་ལྷག་བཅས་ཀྱི་སྒྲའོ།།དེས་ན་སྡེབ་སྦྱོར་ཞེས་པ་སྒྲ་སྐད་ཀྱི་
འཇུག་པ་བྱིངས་རྐྱེན་རྣམ་འགྱུར་རྣམས་སྡེབ་ལེགས་པར་སྦྱར་བས་ཚིག་དོན་འཁྲུལ་བ་
མེད་པར་སྟོན་པའི་ཕྱིར་སྒྲ་རིག་པ་དང་།དེ་ཉིད་ཉན་པོའི་རྣ་བ་དང་ཡིད་དུ་འཇེབས་
ཤིང་ངོ་མཚར་བའི་སླད་དུ་ལྕི་ཡང་གི་ཕྲེང་བ་དང་ཚིག་སྦྱོར་ཚུལ་གྱི་ལུས་རྒྱན་མང་
པོ་བསྡེབས་ནས་སྦྱོར་བ་སྡེབ་སྦྱོར་དང་སྙན་ངག་སྟེ་བོད་བརྡའི་དབང་དུ་མཛད་པ་
ཡིན་གྱི་ཙྪནྡསྲ་བསྒྱུར་བའི་སྡེབ་སྦྱོར་ཏེ་ཚིགས་བཅད་ཁོ་ན་ནི་འདིར་བསྟན་བྱ་མ་
ཡིན་ནོ།།
གཉིས་པ་རྩོམ་པར་དམ་བཅའ་བ་ལ་དངོས་དང་ཞར་བྱུང་གི་དོན་ནོ།།དང་པོ་ནི།
བསླབ་པ་ཀུན་གྱི་གཞི་འཛིན་ཅིང་།།རིག་བྱེད་སྨྲ་བ་རྣམས་ཀྱི་རྒྱུ།།
མིང་ཚིག་བརྗོད་པ་ཀུན་གྱི་གཞི།།ཡི་གེའི་སྦྱོར་བ་བཤད་པར་བྱ།།
ཞེས་པས་བསྟན་ཏེ།ལྷག་པ་ཚུལ་ཁྲིམས་དང་།སེམས་དང་ཤེས་རབ་ཀྱི་བསླབ་པ་སྟེ་སངས་
རྒྱས་པའི་བསླབ་པའི་གཞི་ཐམས་ཅད་ལྟོས་པའི་སྒོ་ནས་འཛིན་པར་བྱེད་ཅིང་།ཕྱི་རོལ་
བའི་ངེས་བརྗོད།མཆོད་སྦྱིན།སྙན་ཚིག།སྲིང་སྲུང་སྟེ་རིག་བྱེད་བཞི་ཡན་ལག་དང་
བཅས་པ་རྣམས་དང་།བཟོ་གསོ་སྒྲ་ཚད་ལ་སོགས་པ་ཤེས་བྱ་རིག་པའི་གནས་ཀྱི་གཞུང་ལུགས་
མཐའ་དག་སྨྲ་བ་རྣམས་ཀྱི་རྒྱུའང་ཡིན་ལ།སྤྱིར་ཡི་གེ་ལས་མིང་མིང་ལས་ཚིག་འབྱུང་
བ་ཡིན་པའི་ཕྱིར་འཇིག་རྟེན་དང་འཇིག་རྟེན་ལས་འདས་པའི་མིང་ཚིག་བརྗོད་པ་ཐམས་
ཀྱི་གཞིར་གྱུར་པ་ཡི་གེའི་སྦྱོར་བ་བཤད་པར་བྱའོ།།ཞེས་སོ།།
གཉིས་པ་ནི།
དེ་ལྟར་ཚིགས་སུ་བཅད་པ་འདིས་ཞར་ལ་བསྟན་བཅོས་ཀྱི་དགོས་སོགས་ཆོས་བཞིའང་
བསྟན་པ་ཡིན་ཏེ།གངས་ཅན་དུ་བདེ་བར་གཤེགས་པའི་གསུང་རབ་ལ་སོགས་པར་འཇུག་པའི་བརྡ་
དང་སྐད་ཀྱི་འཇུག་པ་ཕལ་མོ་ཆེ་གསལ་བར་བྱེད་པའི་ཡི་གེའི་སྦྱོར་བ་གང་ཡིན་པ་ནི་
རྩ་བ་བརྒྱད་པའི་བསྟན་བཅོས་འདི་རྣམས་ཀྱི་བརྗོད་བྱའོ།།དེ་ཉིད་འཛིན་ཅིང་ཆུབ་
པར་བྱས་པ་ལ་བརྟེན་ནས་མིང་ཚིག་བརྗོད་པ་ཐམས་ཅད་ལ་མི་རྨོངས་པའི་བློ་གྲོས་སྐྱེ་
ཞིང་བསླབ་པ་གསུམ་དང་རིག་བྱེད་སོགས་གཙུག་ལག་གཉིས་ཀར་འཇུག་པའི་ལམ་ཡངས་པར་
འགྱུར་བ་ནི་དགོས་པའོ།།དེ་ལ་བརྟེན་ནས་བྱང་ཆུབ་ཀྱི་ལམ་ལ་སྤྲོ་བས་འཇུག་ཅིང་
མཐར་གྱིས་རྣམ་པ་ཐམས་ཅད་མཁྱེན་པ་ཉིད་མངོན་དུ་བྱེད་པ་ནི་དགོས་པའི་དགོས་པའོ།།
ཉིང་དགོས་དགོས་པར་འགྲེལ།དགོས་པ་བརྗོད་བྱར་འབྲེལ་ཞིང་།བརྗོད་བྱའང་ཡན་ལག་ཕྱི་
མ་ཕྱི་མ་སྔ་མ་སྔ་མར་འབྲེལ་བ་ནི་འབྲེལ་བའོ།།
གཉིས་པ་སྐབས་དོན་སུམ་ཅུ་བ་དངོས་ལ།ཡི་གེའི་སྦྱོར་བ་རྒྱས་པར་བཤད་པ་དང་།
གདམས་ངག་བརྗོད་པས་མཇུག་བསྡུ་བའོ།།དང་པོ་ལ།སྦྱར་བྱ་ཡི་གེའི་རྣམ་གཞག་དང་།
སྦྱོར་ཚུལ་ཚིག་འཕྲད་ཀྱི་འཇུག་པ་བཤད་པ་གཉིས།དང་པོ་ལ།བོད་ཡིག་གི་དབྱངས་གསལ་
ངོས་གཟུང་བ་དང་།ཁྱད་པར་གྱི་དབྱེ་བ་བསྟན་པ་གཉིས།དང་པོ་ལ་དངོས་དང་མཐའ་དཔྱད་
དོ།།དང་པོ་ནི།
ཡི་གེ་ཨཱ་ལི་ཀཱ་ལི་གཉིས།།ཨཱ་ལི་གསལ་བྱེད་ཨི་སོགས་བཞི།།ཀཱ་ལི་སུམ་ཅུ་ཐམ་པའོ།།
ཞེས་པས་བསྟན་ཏེ།དེའང་ཡི་གེ་ཞེས་བྱ་བ་ལེགས་སྦྱར་གྱི་སྐད་དུ།ཨཀྵ་ར་སྟེ་
མིག་ལྟ་བུ་འདྲེན་བྱེད་ལྟ་བྱེད་ལ་སོགས་པ་མིང་དུ་མས་བསྙད་དུ་ཡོད་ལ་ཀ་ལྟ་བུ་
ནི་གཞན་གྱིས་མ་ཡིན་པས་འགྱུར་མེད་དང་།བྱཉྫ་ན་སྟེ་མིང་ཚིག་མཐའ་དག་འདིས་གསལ་
བས་ན་གསལ་བྱེད་དང་།ཝརྣ་སྟེ་དོན་མཐའ་དག་འདིས་བརྗོད་པའི་ཕྱིར་རྗོད་བྱེད་ཀྱང་
ཡིན་ཞིང་དེ་ཉིད་ལྷའི་སྐད་ཀྱི་དབང་གིས་དབྱངས་ཡིག་བཅུ་དྲུག་དང་།གསལ་བྱེད་སུམ་
ཅུ་རྩ་གསུམ་དུ་བསྡུ་བ་སོགས་སྐད་ཀྱི་བྱེ་བྲག་དང་སྐབས་ཐོབ་ལས་སྣ་ཚོགས་པར་
འགྱུར་ནའང་རིགས་མཐུན་ཚོགས་པར་བྱས་པའི་དབྱངས་གསལ་གཉིས་སུ་དབྱེ་བ་ཙམ་གྱི་སྒོ་
ནས་ཡི་གེ་མཐའ་དག་བསྡུས་པའི་ཕྱིར་ཨཱ་ལི་སྟེ་ཨ་ཕྲེང་དང་ཀཱ་ལི་སྟེ་ཀ་ཕྲེང་
གཉིས་སུ་དབྱེའོ།།དེ་ལས་གངས་རིའི་ཁྲོད་འདིར་འཇེབས་པར་བརྩི་བའི་སྐད་ལ་ཡོངས་
སུ་གྲགས་ཤིང་ཉེ་བར་མཁོ་བ་ནི་ཨཱ་ལིའི་བྱ་བ་གསལ་བར་མཚོན་པར་བྱེད་པའི་ཡི་གེ་ ཨི་ཨུ་ཨེ་ཨོ་བཞི་དང་།ཀཱ་ལི་མཚོན་པར་བྱེད་པ།ཀ་ཁ་ག་ང་།ཅ་ཆ་ཇ་ཉ།ཏ་ཐ་ད་ན།པ་ཕ་བ་
མ།ཙ་ཚ་ཛ་ཝ།ཞ་ཟ་འ་ཡ།ར་ལ་ཤ་ས།ཧ་ཨ་སྟེ་སུམ་ཅུ་ཐམ་པ་ཡོད་དོ།།
གཉིས་པ་མཐའ་དཔྱད་པ་ནི།
འདི་སྐབས་འགྲེལ་བྱེད་སྔ་མ་ཁ་ཅིག་གིས།ཨ་ཡིག་ཨཱ་ལིར་བགྲངས་པའི་ཨཱ་ལི་ལྔ་
དང་ཀཱ་ལི་ཉེར་དགུར་འདོད་པ་བྱུང་མོད་ཀྱི་མཁན་པོའི་དགོངས་པ་མ་རྟོགས་པར་གཟུ་
ལུམ་བྱས་པར་སྣང་སྟེ་རྩ་བ་ལས་དངོས་འགལ་དུ་སྨྲས་པའི་ཕྱིར།འོ་ན་བརྡ་སྤྲོད་པའི་
གཙུག་ལག་རྣམས་ལས་འབྱུང་བ་བཞིན་དུ་འདིར་ཡང་ཡི་གེ་ཚོགས་པ་མཚུངས་པ་སོ་སོར་
བསྡུ་བར་མཛད་ན་ཨ་ཡིག་ཁོ་ན་ཚོགས་པ་མི་མཚུངས་པར་བསྐྱལ་བའི་དགོས་པ་ཅི་ཞིག་ཅེས་
འདྲི་ན་འདི་ལ་སྔོན་ཆད་མཁས་པའི་གོ་སར་བཞུགས་པ་མང་པོས་རོ་འཛིན་གཡོ་བར་མ་མཛད་
ཀྱང་བཤད་པར་བྱ་སྟེ།ལེགས་པར་སྦྱར་བའི་སྐད་ལ་གསལ་བྱེད་སྲོག་ཅན་སྲོག་མེད་གཉིས་
སུ་དབྱེ་བའི་སྲོག་དེ་ཡིན་ན་དབྱངས་ཡིན་པས་ཁྱབ་པའི་ཕྱིར་ཀ་ལྟ་བུ་སྲོག་མེད་
རྐྱང་བ་བརྗོད་མི་གཏུབ་པ་ཡིན་ཞིང་།བོད་དུའང་།ལེགས་ཟེར་བ་ལྟ་བུ་ལ་ཡིག་ཨེ་
ཞུགས་ཀྱི་རྗེས་སུ་གྲ་སྲ་སྲོག་མེད་སྦྱར་བ་སོགས་འགའ་ཞིག་ལ་རིགས་འགྲེ་ནུས་
ཀྱང་།མགོ་ཅན།འཕུལ་ཅན།འདོགས་ཅན་སོགས་ཀྱི་རྣམ་གཞག་མཛད་པས་མཐའ་གཅིག་ཏུ་སྲོག་
ཅན་སྲོག་མེད་ཀྱི་དབྱེ་བ་དེ་བདེ་བའང་མ་ཡིན་ཞིང་འཇུག་པར་དཀའ་བ་དང་།དགོས་པ་
ལྷག་པོར་མི་ཆེ་བས་དེ་ལྟའི་རྣམ་གཞག་མ་མཛད་དོ།།དེ་བས་ན་བརྗོད་དུ་མེད་པའི་
སྲོག་མེད་རྐྱང་བ་འདིར་མི་འདོད་ཅིང་ཨ་ཡིག་དེ་ཀ་ལ་སོགས་པར་ཞུགས་པའི་ཐ་སྙད་
བྱར་མེད་པས་དེས་དེ་དག་ལ་ཨཱ་ལིའི་བྱ་བ་གསལ་བར་བྱེད་མ་ནུས་པའི་ཕྱིར་ཀཱ་ལིའི་
སྡེ་ཚན་དུ་འདྲེན་པར་མཛད་པ་ཡིན་ནོ།།འོ་ན་མཁན་པོས་ཡི་གེ་སྲོག་མེད་ཀྱི་རྣམ་ གཞག་མ་མཛད་ན།འོག་ཏུ་དེ་ལ་ཨཱ་ལི་བཞི་པ་སྦྱར་སོགས་ཇི་ལྟར་འགྲེལ་ཅེ་ན།དེ་ནི་
སྲོག་མེད་ལ་ཨཱ་ལི་ཞུགས་པའི་དོན་མ་ཡིན་གྱི་ཀཱ་ལི་དེ་དག་ཉིད་ལ་རྣ་རུ་སོགས་
སྦྱར་བའི་དོན་ཡིན་ཏེ།གི་གུ།ཞབས་ཀྱུ།འགྲེང་བུ།རྣ་རུ་བཞི་ལ་ཨི་ཨུ་ཨེ་ཨོ་བཞིར་
བཏགས་པའི་ཕྱིར་དང་དེ་དག་གིས་ཀ་ལྟ་བུའི་སྒྲའི་ངོ་བོ་དེར་ཀི་ཀུ་ཀེ་ཀོ་སོགས་
སྒྲའི་ཁྱད་པར་སྐྱེད་ནུས་པས་ཨཱ་ལིའི་བྱ་བ་གསལ་བར་མཚོན་ནུས་པ་ཙམ་ལ་དགོངས་ནས་
ཨཱ་ལིའི་སྒྲར་ཡང་གསུངས་པའི་ཕྱིར་རོ།།དེས་ན་ཀཱ་ལི་སུམ་ཅུ་བ་ལ་ཨཱ་ལི་དང་པོ་
སྦྱར་བས་ཨི་ཡིག་ཏུ་འགྲུབ་པ་སོགས་ཡིན་པས་དེ་དག་གི་ཨ་ཡིག་ནི་བརྗོད་དོན་རྗེས་
འབྲེལ་དུ་བྱས་པའི་ཕྱིར་དབྱེ་བར་བྱ་བ་ཉིད་དོ།།འདིར་ཁ་ཅིག་གི་གུ་ལ་སོགས་པ་ཁོ་
ན་འདིར་བསྟན་གྱི་ཨཱ་ལི་ཡིན་ན་དེ་དབྱངས་ཡིག་མ་ཡིན་པར་འགྱུར་ཏེ།དབྱངས་ནི་ང་
རོའི་རྣམ་པ་ཅན་ཡིན་ཞིང་དེ་དག་ནི་གསལ་བྱེད་གཞན་ལ་མ་ལྟོས་པར་འདོན་དུ་མེད་པའི་
ཕྱིར་ཞེས་དོགས་པ་སྐྱེ་བ་སྲིད་ཀྱང་སྐྱོན་མེད་དེ།དངོས་སུ་འདིར་ཨཱ་ལི་སྲོག་
ཞུགས་ཀྱི་རྣམ་གཞག་མ་མཛད་ཀྱང་མཚོན་བྱེད་འདི་ཙམ་ལ་བརྟེན་ནས་དབྱངས་ཀྱི་བྱ་བ་
གསལ་བར་མཚོན་ནུས་པ་ལ་དགོངས་པའི་ཕྱིར་དང་།དེ་ལྟ་མ་ཡིན་ན་ལེགས་སྦྱར་ལྟར་ཨ་ཨི་
འདུས་པས་ཨེ་སོགས་སུ་འགྱུར་བར་ཁས་ལེན་དགོས་པའི་སྐྱོན་ཡང་ཡོད་པའི་ཕྱིར་རོ།།
དེ་ལྟར་གཞུང་འདིའི་སྐབས་སུ་ཡི་གེ་བསྡུ་ཚུལ་ཙམ་དུ་མ་ཟད་གསལ་བྱེད་ཅེས་པ་ལའང་
མང་པོས་འབྲུ་གནོན་ལོག་པར་བྱས་འདུག་པས་ཁོ་བོས་ལེགས་པར་བཤད་པ་འདི་ནི་སྣང་
བྱེད་ཀྱི་ཉི་མ་ཆེན་པོ་ལྟར་བསྟེན་པར་འོས་སོ།།
གཉིས་པ་ཁྱད་པར་གྱི་དབྱེ་བ་བསྟན་པ་ལ།མདོར་བསྟན་པ་དང་།རྒྱས་པར་བཤད་པ་གཉིས།དང་པོ་ནི།
དེ་ལ་རྗེས་འཇུག་བཅུ་ཡིན་ཏེ།།དེ་ལས་ལྔ་ནི་སྔོན་དུའང་འཇུག།མི་འཇུག་པ་ནི་ཉི་ཤུ་འོ།།
ཞེས་པས་བསྟན་ཏེ།བཤད་མ་ཐག་པའི་ཡི་གེ་ཀཱ་ལི་དེ་དག་ལ་དབྱེ་ན་རྗེས་སུ་འཇུག་
པ་བཅུ་དང་།རྗེས་འཇུག་དེ་ཉིད་ལས་ལྔ་ནི་སྔོན་དུའང་འཇུག་པ་ཡིན་པས་སྔོན་འཇུག་
ལྔ་དང་།སྔོན་རྗེས་གཉིས་ཀར་མི་འཇུག་པའི་ཡི་གེ་ཉི་ཤུ་སྟེ་ཚན་པ་གསུམ་དུ་ དབྱེའོ།།
གཉིས་པ་རྒྱས་བཤད་ལ་དབྱེ་སྒོ་སྤྱིར་བསྟན་པ་དང་།བྱེ་བྲག་སོ་སོར་བཤད་པ་གཉིས།དང་པོ་ནི།
ཀཱ་ལི་ཕྱེད་དང་བརྒྱད་སྡེ་ནི།།བཞི་བཞི་དག་ཏུ་ཕྱེ་བ་ལས།།
ཞེས་པས་བསྟན་ཏེ།རྗེས་འཇུག་ལ་སོགས་པར་དབྱེ་བའི་ཐོག་མར་སྡེ་བ་སོ་སོར་ངེས་
པར་བྱ་དགོས་པས།ཀཱ་ལི་དེ་རྣམས་སྡེ་བ་ཕྱེད་དང་བརྒྱད་དུ་བགོས་པའི་སྡེ་བ་རེ་རེ་
ལ་ཡི་གེ་བཞི་བཞིར་དབྱེ་བ་ཡིན་ཞིང་།དེའང་ཀ་ཁ་ག་ང་སྡེ་བ་དང་པོ་སོགས་ནས།ཧ་ཨ་
སྡེ་བ་ཕྱེད་པའི་བར་དུ་སོ་སོའི་ཤེས་པར་བྱའོ།།ལས་ཞེས་པ་ནི།དབྱེ་བ་བྱས་པ་འདི་
ལས་འོག་ཏུ་དང་པོ་གསུམ་པ་སོགས་ཀྱི་སྐབས་སུ་སོ་སོའི་ཡི་གེ་རྣམས་དྲན་པར་བྱའོ་
ཞེས་པའི་དོན་ཏེ་འབྱུང་ཁུངས་དང་འདྲ་བའི་རྒྱུ་མཚན་གྱི་སྒྲའོ།།
གཉིས་པ་བྱེ་བྲག་སོ་སོར་བཤད་པ་ལ།རྗེས་འཇུག་བཤད་པ།སྔོན་འཇུག་བཤད་པ།མི་འཇུག་པ་བཤད་པ་གསུམ།དང་པོ་ནི།
དང་པོ་གསུམ་པ་བཞི་པ་ལ།།མས་གཉིས་དྲུག་པའི་གསུམ་པ་དང་།།བདུན་པ་ལ་ནི་ཤ་མ་གཏོགས།།རྗེས་འཇུག་ཡི་གེ་བཅུ་རུ་འདོད།།
ཅེས་པས་བསྟན་ཏེ།གོང་དུ་རྗེས་འཇུག་བཅུ་ཞེས་བཤད་པ་དེ་གང་ཞེ་ན།སྡེ་བ་དང་པོ་
དང་གསུམ་པ་དང་བཞི་པ་རྣམས་ཀྱི་མས་ཀྱི་ཡི་གེ་གཉིས་གཉིས་ཏེ།ག་ང་ད་ན་བ་མ་རྣམས་
དང་།སྡེ་བ་དྲུག་པའི་གསུམ་པ་འ་དང་།བདུན་པའི་ཤ་མ་གཏོགས་པའི་ལྷག་མ་ར་ལ་ས་གསུམ་
མོ།།དེའང་ཡི་གེ་ཐམས་ཅད་ཀྱི་རྗེས་སུ་འདི་དག་འཇུག་པའི་ཕྱིར་རྗེས་འཇུག་ཅེས་བྱ་
ཞིང་ཡི་གེའི་གྲངས་བཅུ་ཉིད་དུ་ངེས་པ་ཡིན་ནོ།།
གཉིས་པ་སྔོན་འཇུག་བཤད་པ་ནི།
རྗེས་འཇུག་ཡི་གེ་བཅུ་ཉིད་ལས།།དང་པོ་གསུམ་པ་ལྔ་པ་དྲུག།བདུན་པ་རྣམས་ནི་སྔོན་དུའང་འཇུག།
ཅེས་པས་བསྟན་ཏེ།གོང་དུ་སྔོན་འཇུག་ཅེས་པ་གང་ཞེ་ན།རྗེས་འཇུག་ཡི་གེ་བཅུ་པོ་
དེ་དག་ཉིད་ལས།དང་པོ་ག།གསུམ་པ་ད།ལྔ་པ་བ།དྲུག་པ་མ།བདུན་པ་འ་རྣམས་ཡིན་ཞིང་དེ་
དག་རྗེས་སུ་འཇུག་པར་མ་ལད་ཡི་གེ་རྣམས་ཀྱི་སྔོན་དུ་འཇུག་པའང་སྲིད་པས་སྔོན་
འཇུག་ཅེས་ཀྱང་བྱ་སྟེ་ཡི་གེའི་གྲངས་ལྔར་ངེས་པ་ཡིན་ནོ།།སྔོན་རྗེས་འདི་དག་གི་
འཇུག་ཚུལ་ནི་རྟགས་འཇུག་གིས་རྒྱས་པར་འཆད་པར་འགྱུར་རོ།།
གསུམ་པ་མི་འཇུག་པ་བཤད་པ་ལ།དངོས་དང་།སྐབས་དོན་གྱི་མི་གཞི་ཁྱད་པར་དུ་བཤད་པ་གཉིས།དང་པོ་ནི།
མིང་གཞི་གཉིས་སམ་གསུམ་སྦྲེལ་ལམ།།དེ་ལ་དབྱངས་ཀྱི་བཞི་ལྡན་ཡང་།།གང་དུའང་འཇུག་མིན་སྦྱར་བའང་མིན།།
ཞེས་པས་བསྟན་ཏེ།སྔོན་འཇུག་དང་རྗེས་འཇུག་བསལ་བའི་ལྷག་མ་མིང་གཞི་ཁོ་ན་ཡིན་
པ།ཀ་ཁ།ཅ་ཆ་ཇ་ཉ།ཏ་ཐ།པ་ཕ།ཙ་ཚ་ཛ་ཝ།ཞ་ཟ་ཡ།ཤ།ཧ་ཨ་སྟེ་ཡི་གེ་ཉ་ཤུ་ཐམ་པ་དེ་དག་ནི་
ཚེག་བར་གཅིག་ཏུ་གཉིས་སམ་གསུམ་སྦྲེལ་བའམ་དེ་ལ་དབྱངས་ཨི་སོགས་གང་རུང་རེ་སྦྱར་
བས་བཞི་ལྡན་དུ་བྱས་པ།ཙཀ།ཚཕཁ།ཝཟིཡ།ལྟ་བུ་གངས་ལྗོངས་སུ་གྲགས་པའི་ཐ་སྙད་གང་
ལའང་འཇུག་པ་མིན་པས་འདི་བཞིན་སྦྱར་བར་རིགས་པའང་མ་ཡིན་ནོ།།
གཉིས་པ་ནི།
སྤྱིར་གཞུང་འདིའི་སྐབས་སུ་སྔོན་རྗེས་མིང་གསུམ་གྱིས་ཟླས་ཕྱེ་བའི་མིང་གཞི་
ཞེས་བྱ་བ་ནི་སྔོན་རྗེས་ཀྱི་འཇུག་པའི་ཡི་ག་རྣམས་གང་ལ་འཇུག་པར་འགྱུར་བ་དེ་ལ་
དེ་ལྟར་བཏགས་པས་གསལ་བྱེད་སུམ་ཅུ་ཐམས་ཅད་མིང་གཞིར་འགྱུར་མོད་ཀྱི།འོན་ཀྱང་
གནས་སྐབས་ཀྱི་དབྱེ་བ་ཡོད་དེ་དཔེར་ན་བསྒྲུབས་ཟེར་བ་ལྟ་བུའི་ཚེ་བརྩེགས་མའི་ས་
ག་ར་གསུམ་ནི་སྔོན་འཇུག་བ་དང་།རྗེས་འཇུག་བ་ས་དག་གི་འཇུག་ཡུལ་དུ་གྱུར་པའི་
ཕྱིར་མིང་གཞིའི་ཐ་སྙད་ཐོབ་ཅིང་།རབ་ལྟ་བུ་ལ་ར་ཡིག་མིང་གཞི་པ་ཡིག་རྗེས་འཇུག་
དང་བར་ལྟ་བུ་དེ་ལས་བཟློག་པའང་ཡིན་པའི་ཕྱིར་རོ།།ཡང་བསྒྲུབས་ཟེར་བ་ལྟ་བུའི་
ཨུ་ཡིག་སོགས་ཨཱ་ལི་བཞི་པོ་རྣམས་ནི་མིང་གཞིར་འོས་ཀྱ་འདིར་དབྱངས་སྲོག་ཞུགས་
ཀྱི་རྣམ་གཞག་མ་མཛད་པའི་ཕྱིར་དེ་འདྲའི་ཐ་སྙད་བྱར་མེད་པས་ཨུ་ཡིག་སོགས་ཀྱི་
སྒྲས་གསུངས་པའི་ཞབས་ཀྱུ་ལ་སོགས་པ་དེ་རྣམས་འཕུལ་རྟེན་འཇུག་ཡུལ་གྱི་མིང་ གཞིའི་ཡན་ལག་ལས་དངོས་མིན་ཏེ།འདིར་བསྟན་གྱི་ཨཱ་ལི་རྐྱང་བ་ཡིན་ན་འཕུལ་རྟེན་
གྱི་བྱ་བ་མི་འཇུག་པས་ཁྱབ་པའི་ཕྱིར་རོ།།དེས་ན་སྔོན་འཇུག་རྗེས་འཇུག་མིང་གཞི་
ཅི་རིགས་པར་འགྱུར་བ་སྔོན་འཇུག་ལྔ།རྗེས་འཇུག་མིང་གཞི་ཅི་རིགས་པར་འགྱུར་བ་
རྗེས་འཇུག་བཅུ།མིང་གཞི་ཁོ་ན་ཡིན་པ་ལྷག་མ་མི་འཇུག་པ་ཉི་ཤུ་ཐམ་པ་སྟེ་གསུམ་དུ་
དབྱེར་ཡོད་པ་ལས།བྱེ་བྲག་འདིར་ནི་མི་འཇུག་པ་ཁོ་ན་འཆད་པའི་སྐབས་ཡིན་པའི་ཕྱིར་
ཐ་མ་འདི་ཉིད་བཟུང་ནས་བཤད་ཟིན་ཏོ།།འདིར་ཁ་ཅིག་གོང་དུ།ཡི་གེ་ཐམས་ཅད་ལ་མིང་
གཞིས་ཁྱབ་པར་བསྟན་པ་དང་འགལ་བར་དོགས་པ་སྲིད་ཀྱང་སྐྱོན་མེད་དེ།དེ་དག་ཏུ་ནི་
སྤྱིར་ཡི་གེ་ཙམ་ལ་དགོངས་པས་ཡི་གེ་ཡིན་ན།ཡི་གེ་ཨཱ་ལི་ཀཱ་ལི་གཉིས།།ཞེས་པའི་
སྐབས་ནས་བསྟན་པས་ཁྱབ་ཅིང་།དེ་ལས་འཇིག་རྟེན་འདི་ཉིད་ཀྱི་ཡི་གེ་ཡིན་ན་མཆོད་
བརྗོད་གསུམ་པའི་སྐབས་ཀྱི་མིང་གཞི་ཡིན་པས་ཁྱབ་པ་དང་།མིང་གཞི་དེ་ནི་མིང་ཚིག་
གི་གཞིར་གྱུར་པ་ལ་དགོངས་ཏེ།དཔེར་ན་བོད་ཡུལ་དུ་ཡི་གེ་རྣམས་ལས་འགྲེང་བུ་ཙམ་
མེད་པས་ཀྱང་དེས་བརྗོད་པ་ཇི་སྙེད་ཡོད་པ་ཉམས་པར་འགྱུར་བས་ངེས་པར་ཡི་གེ་ཇི་
སྙེད་པ་མིང་ཚིག་གི་གཞིར་དགོས་པ་བཞིན་ནོ།།དེ་ལྟར་སྔོན་འགྲེལ་བྱེད་འགས་སྟབས་
ལེགས་ཀྱིས་སྐབས་འདིའི་མི་གཞིའི་ངོས་འཛིན་ཙམ་འགྲིག་ཀྱང་དཔྱིས་ཕྱིན་པའི་ལེགས་
བཤད་ནི་རུས་སྦལ་གྱི་སྤུ་ལ་འགྲན་ཟླར་སྣང་བའི་ཕྱིར་རང་སྟོབས་ཀྱིས་བཤད་པ་ཡིན་
པས་བློ་ལྡན་རྣམས་དགྱེས་པའི་འཛུམ་ཞལ་ངོམས་པར་མཛོད་ཅིག།
གཉིས་པ་སྦྱོར་ཚུལ་ཚིག་ཕྲད་ཀྱི་འཇུག་པ་བཤད་པ་ལ།རྗེས་འཇུག་ལ་ལྟོས་པའི་ཕྲད་
རྣམ་དབྱེ་དང་བཅས་པ་དང་།ཕྲད་རང་དབང་ཅན་བཤད་པ་གཉིས།དང་པོ་ལ།སླར་བསྡུ།ལ་དོན།
ཨི་ལྡན་གྱི་རྣམ་དབྱེ།རྒྱན་སྡུད།ལྷག་བཅས།འབྱེད་སྡུད།འབྱུང་ཁུངས།བོད་པའི་སྒྲ་
བསྟན་པ་སྟེ་བརྒྱད་དོ།།དང་པོ་ལ་དངོས་དང་།ལོག་རྟོག་སེལ་བའོ།།དང་པོ་ནི།
རྗེས་འཇུག་ཡི་གེ་བཅུ་པོ་ནི།།མིང་གང་གི་ནི་མཐར་སྦྱར་བ།།
དེ་ལ་ཨཱ་ལི་བཞི་པ་སྦྱར།།སླར་བསྡུ་བར་ནི་ཤེས་པར་བྱ།།
ཞེས་པས་བསྟན་ཏེ།སྔར་བཤད་པའི་རྗེས་འཇུག་གི་ཡི་གེ་བཅུ་པོ་དེ་རྣམས་ཉིད་མིང་
ཚིག་གང་གི་མཐར་སྦྱར་བ་ཡོད་ཀྱང་རུང་།དེ་དག་ལ་ཨཱ་ལི་བཞི་པ་ཨོ་ཡིག་སྟེ་རྣ་རུ་
སྦྱར་བ་ནི།སྐབས་བབ་ཀྱི་བརྗོད་བྱའི་དོན་ནམ་ཚིག་དེ་ཉིད་དེ་ཙམ་གྱིས་བསྡུ་བར་
སོང་བས་སླར་བསྡུའི་སྒྲ་ཞེས་སམ་རྫོགས་ཚིག་ཅེས་ཀྱང་བྱའོ།།ཞེས་སོ།།དེའང་གཞུང་ འདིའི་དངོས་བསྟན་གྱི་དབང་དུ་བྱས་ན།གོ།ངོ་།བོ།མོ།དོ།ནོ།འོ།རོ།ལོ།སོ་སྟེ་བཅུ་
པོ་ཉིད་ཡིན་ཡང་།ད་དྲག་གི་མཐར་ཏོ་འཐོབ་པས་བཅུ་གཅིག་ཏུ་འགྱུར་རོ།།འོ་ན་འདིར་
ཏོའི་སྒྲ་མ་བསྟན་པ་ཅི་ཞེ་ན།གཞུང་འདི་གའི་གཤམ་དུ།རྗེས་འཇུག་བཅུ་ཡི་དོན་ཤེས་
ན།།ཞེས་དང་།རྗེས་འཇུག་སྦྱོར་བ་མཁས་པ་ན།།ཞེས་སོགས་ཀྱི་སྐབས་སུ་འཆད་པར་འགྱུར་
བ་བཞིན་གཞུང་འདིས་གཙོ་བོར་རྗེས་འཇུག་གི་བྱ་བ་འཆད་པ་ཡིན་པའི་ཕྱིར།མིང་གཞི་
རྐྱང་བའི་སྒྲ་གཙོ་བོར་གྱུར་པའི་ཕྲད་བདག་སྒྲ་ཙམ་ལས་གཞན་འདིར་མ་གསུངས་པ་ཡིན་
ནོ།།རྒྱུ་མཚན་དེས་སྐབས་འདིའི་ཏོའི་སྒྲ་གཅིག་པུར་མ་ཟད།ལྷག་བཅས་ཀྱི་ཏེ་དང་།
ཨི་ལྡན་གྱི་ཡི་ཡིས།རྒྱན་སྡུད་ཀྱི་ཡང་།འབྱེད་སྡུད་ཀྱི་ཏམ།ལ་དོན་གྱི་ཏུ།རྣམས་
ཀྱང་འདིར་མ་བསྟན་པའི་གནད་ཀ་ཤེས་པར་བྱ་ཞིང་།ཀྱི་ཀྱིས་ཀྱང་སྟེ་རྣམས་ནི་འཇུག་
པའི་ཡི་གེ་དང་ལྷན་ཅིག་པའི་སྒྲ་གཙོ་བོར་གྱུར་པའི་ཕྱིར་འདིར་ཡང་གསུངས་པ་ཉིད་
དོ།།དེ་ལྟ་ན་ཁྱེད་རང་གིས་སྔར་འཇུག་པའི་ཡི་གེ་རྣམས་ཀྱང་འཕུལ་རྟེན་གྱི་ཡུལ་
དུ་སྦྱོར་ཚེ་མིང་གཞི་ཉིད་དུ་ཁས་བླངས་པའི་ཕྱིར་འཕྲད་འདི་རྣམས་ལའང་མཐའ་རྟེན་
འཇུག་པའི་རྒྱུ་མཚན་གྱིས་མིང་གཞི་ཉིད་དུ་ཐལ་བས་རྗེས་འཇུག་གི་བྱ་བར་མི་འགྱུར་
རོ།།སྙམ་ན་སྐྱོན་མེད་དེ།རྗེས་འཇུག་གི་བྱ་བ་ཞེས་པ་ནི་རྗེས་འཇུག་གི་ཡི་གེ་
བཅུ་པོ་དེ་ལ་བྱ་བ་འབྱུང་བ་ཙམ་གྱི་ཆ་ནས་ཡིན་གྱི།ཕྲད་སོགས་སུ་གྲུབ་ཟིན་ནས་
མིང་གཞི་དང་རྗེས་འཇུག་གང་ཡིན་དཔྱད་པའི་ཆ་ནས་མ་ཡིན་པའི་ཕྱིར་རོ།།ད་དྲག་ཅན་
གྱི་མཐར་ཏོ་ལ་སོགས་པ་འཐོབ་པའི་དོན་ནི།རྟགས་འཇུག་ཏུ།དེ་ཉིད་རང་གི་སྒྲ་མཐུན་
པའི།།ཞེས་པའི་སྐབས་སུ་འཆད་པར་འགྱུར་བ་བཞིན་སྤྱིར་བཏང་རྗེས་འཇུག་ལ་ལྟོས་པའི་
རྣམ་དབྱེ་དང་ཕྲད་རྣམས་ལ།སྦྱོར་ཡུལ་མིང་ཚིག་གི་མཐའ་དེ་དང་སྦྱར་བས་བརྗོད་པ་
བདེ་ཞིང་སྒྲ་མཐུན་པ་ཡོད་ན་རྟགས་མཚུངས་ཉིད་སྦྱར་བར་བྱ་ཞིང་།དེ་ལྟ་བུ་མེད་
ནའམ་ཡོད་ཀྱང་བརྗོད་མི་བདེ་ན་བརྗོད་བདེ་བ་གང་ཡིན་སྦྱར་བར་བྱ་བ་ཡིན་པ་དང་།དེ་
དག་ཀྱང་འཇིག་རྟེན་གྱི་གྲགས་པའི་རྗེས་སུ་འབྲང་དགོས་པས་རྗེས་འཇུག་གཞན་རྣམས་
རང་རང་ལ་རྣ་རུ་སོགས་སྦྱར་བར་རྟགས་མཚུངས་ཡིན་མིན་ཅི་རིགས་ཡོད་ཀྱང་བརྗོད་བདེ་
བ་དང་གྲགས་ཤིང་གྲུབ་པའི་ཕྱིར་འོས་པ་ཡིན་ལ།ད་དྲག་ཅན།བསྟནད།གྱུརད།སྩལད།ལྟ་བུ་
རྣམས་ལ་ཀློག་དག་པའི་དབང་གིས།རྗེས་འཇུག་གཉིས་ལས་ན་ར་ལ་རྣམས་ཀྱི་སྒྲ་ཤུགས་ཆེ་ ཙམ་དང་དའི་སྒྲ་འབྱུང་བར་ཆ་བ་ཙམ་ལས་མི་གསལ་བའི་ཕྱིར།བསྟན་དོ།གྱུར་དོ།སྩལ་དོ།
བསྟནད་དམ།སྩལད་དམ།གྱུརད་དམ།ལྟ་བུ་ནི་བརྗོད་བདེ་བའང་མ་ཡིན་ཞིང་ཡོངས་སུ་མ་
གྲགས་པས་བརྗོད་བདེ་རྟགས་མཚུངས་གཉིས་ཀའི་སྒོ་ནས་སྒྲ་མཐུན་པ་ནི་ཏོ་དང་ཏམ་
སོགས་ཁོ་ནར་ངེས་པའི་ཕྱིར་རོ།།སླར་བསྡུའི་ཕྲད་དེ་རྣམས་ཀྱི་དཔེར་བརྗོད་པའང་།
རྟག་གོ།བཟང་ངོ་།།ཡོད་དོ།།ཡིན་ནོ།།སྒྲུབ་བོ།།བསམ་མོ།།བྱའོ།།འགྱུར་རོ།།སེལ་
ལོ།།བྱས་སོ།།ཞེས་སོགས་འབྱམས་ཀླས་པ་ནི།གོ་བར་སླ་ཞིང་།ད་དྲག་ཅན་གྱི་མཐར་ཡང་།
བསྟནད་ཏོ།།གྱུརད་ཏོ།།སྩལད་ཏོ།།ཕྱིནད་ཏོ།།འཛིནད་ཏོ།།ཞེས་སོགས་མང་དུ་འབྱུང་བ་
རྣམས་སོ།།
གཉིས་པ་ནི།
སྐབས་འདིར་འགྲེལ་བྱེད་སྔ་མ་ཁ་ཅིག་གིས་དེར་ཕྱིན་ཏོ་ལྟ་བུ་སླར་བསྡུ་དངོས་
ཡིན་ཞིང་རྫོགས་ཚིག་ཀྱང་ཡིན་པ་དང་།རྟག་གོ་ལྟ་བུ་སླར་བསྡུ་ཙམ་པོ་བ་དང་།བྱའོ་
སྙམ་ནས་བྱེད་དོ་ལྟ་བུ་ཙམ་པོ་པའི་ཁོངས་སུ་གཏོགས་ཙམ་ལས་དོན་དུ་དེའང་མིན་པར་
འདོད་པ་ཞིག་འདུག་པ།དེ་ལ་འདི་འདྲི་བར་བྱ་སྟེ།བྱའོ་ཞེས་པའི་འོ་སྒྲ་བརྗོད་པའི་
ཚེ་འོ་སྒྲ་དེས་གང་ཞིག་སྡུད་དགོས་པའི་དོན་དེ་བསྡུས་པར་སོང་ངམ་མ་སོང་།སོང་ན་
སླར་བསྡུ་དང་རྫོགས་ཚིག་དངོས་མིན་ཞེས་བསྙད་པའི་རྒྱུ་མཚན་ཅི་ཞིག།དེ་ལ་ལྟོས་
ཤིང་འབྲེལ་བའི་ཚིག་དེ་མ་ཐག་ཏུ་འབྱུང་བས་སོ་ཞེ་ན།འོ་ན་ཁྱེད་ཀྱིས་སླར་བསྡུ་ དངོས་ཀྱི་མཚན་གཞི་མཐའ་རྟེན་གྱི་རྫོགས་སོ་ལྟ་བུ་ལས་མང་དུ་མི་རྙེད་པར་འགྱུར་
ཏེ།ཁྱེད་རང་གིས་རྫོགས་ཚིག་དངོས་སུ་ཁས་བླངས་པའི་དེར་ཕྱིན་ཏོ་ལྟ་བུ་ལའང་ཕྱིན་
ནས་ཀྱང་ལྟ་བུའི་ཚིག་གཞན་སྦྲེལ་བའི་ཚེ་དེ་དངོས་མ་ཡིན་པར་འགྱུར་བ་སོགས་གཞུང་
འདིར་བསྟན་གྱི་སླར་བསྡུའི་སྒྲའི་འཇུག་པ་ཕལ་མོ་ཆེ་སླར་བསྡུ་དངོས་མ་ཡིན་པར་
འགྱུར་བའི་ཕྱིར་རོ།།ཡང་མ་སོང་ཟེར་ན་འོ་སྒྲ་ལ་ནུས་པ་མེད་པར་ཐལ་བའི་སྐྱོན་
ཡོད་དོ།།ཁོ་བོ་ནི་གཞུང་འདིར་བསྟན་གྱི་སླར་བསྡུ་སྨྲ་སྒོ་ནས་བཤད་པའི་ཟླ་སྡུད་
དེང་སང་རྫོགས་ཚིག་ཏུ་གྲགས་པ་རྣམས་དོན་གཅིག་ཅིང་།བྱའོ་སྙན་ནས་བྱེད་དོ་ལྟ་
བུའི་འོ་སྒྲས་ཀྱང་སྙམ་རྒྱུའི་དོན་དེ་བསྡུས་ཤིང་རྫོགས་པར་ག་ནུས་པས་སླར་བསྡུ་
དངོས་ཡིན་ཏེ།དཔེར་ན་བརྡ་སྤྲོད་པའི་གཞུང་དུ།གྲངས་ལས་རྫོགས་པ་ལ་ཌ་མ་དག་གོ།
ཞེས་པའི་རྐྱེན་གྱི་རྗེས་བིང་ཤ་ཏི་མཿཞེས་པར་ཚིག་གྲོགས་ཨི་ཏི་བཱ་ཙྱཾ་ཞེས་པ་
སྦྱར་བས་རྫོགས་ཚིག་དངོས་མིན་པར་མི་འགྱུར་བ་བཞིན་དང་།ཀ་རོ་མཱི་ཏཾཙིནྟེ་ན་
ཀྲི་ཡ་ཏེ།ཞེས་པར་ཡང་བྱ་ཚིག་སྔ་ཕྱི་དག་ཏིང་མཐའ་དངོས་ཡིན་པར་མཚུངས་པ་ལྟ་
བུའོ།།ཞེས་འཆད་པར་བྱེད་དོ།།ཡང་ཁ་ཅིག་གིས།རྗེས་འཇུག་བ་ཡིག་གི་རྗེས་སུ་པོ་
དང་།ད་ས་དག་གི་རྗེས་སུ་ཏོ་སྦྱར་བར་འདོད་པ་དང་།ཁ་ཅིག་གིས།བ་ཡིག་འདས་ཚིག་
དངོས་ཡིན་པའི་རྗེས་སུ་པོ་སྦྱར་བར་བཤད་མོད།སྔ་མས་ཞེན་དོན་རྟགས་མཚུངས་སྦྱར་
ཁུལ་དུ་འདུག་ཀྱང་གོང་སྨོས་ལྟར་རྟགས་འཇུག་གི་དོན་དཔྱིས་ཕྱིན་པར་མ་རྟོགས་པས་
རིགས་འགྲེ་ཐལ་ཆེས་པའི་སྐྱོན་དང་།བྱས་ཏོ་ལྟ་བུ་ཤིན་ཏུ་བརྗོད་མི་བདེ་བ་ཚེགས་
ཀྱིས་སྦྱར་བ་དོན་མེད་ཅིང་གྲགས་པ་ལས་ཧ་ཅང་བརྒལ་བའི་སྐྱོན་ཡང་ཡོད་དོ།།འདོད་པ་ ཕྱི་མ་དེའང་རིགས་པ་མ་ཡིན་ཏེ།བ་ཡིག་གི་མཐའ་འདས་ཚིག་ཡིན་དུ་ཟིན་ཀྱང་དེ་ཉིད་
དང་སྦྱར་བས་བརྗོད་བདེ་ཞིང་སྒྲ་མཐུན་པ་བ་ཡིག་ཨོ་ལྡན་ཉིད་ཡོད་བཞིན་དུ་གཞན་
འཚོལ་བ་ལ་དགོས་པ་མེད་པའི་ཕྱིར།འདས་ཚིག་ཡིན་པ་ཤེས་པའི་ཆེད་དུའོ་སྙམ་ནའང་མི་
འཐད་དེ།དེ་ལྟ་ན།རྡོ་བཅག་གོ།ལྟ་བུ་ལའང་།བཅག་ཀོ།ཞེས་སྦྱར་དགོས་པར་འགྱུར་བས་ཧ་
ཅང་ཐལ་ལོ།།ཡང་འགྲེལ་བྱེད་ཕལ་ཆེར་གྱིས།སླར་བསྡུའི་སྒྲ་འདི་རྣམ་དབྱེ་དང་པོའི་
དོན་དུ་བཤད་ཀྱང་ཤིན་ཏུ་འཐད་པར་མ་མཐོང་སྟེ།རྣམ་དབྱེ་དང་པོའི་གཅིག་ཚིག་གིས་
ནི་དོན་གྱི་ངོ་བོ་ཙམ་ལས་གཞན་མི་སྟོན་ལ།འདི་ནི་སྡུད་པའི་སྒྲ་ཡིན་པའི་ཕྱིར་
དོན་གྱི་ལྡོག་པ་སྟོན་བྱེད་དུ་འགྱུར་བས་ཀྱང་ཁྱད་པར་ཆེ་ཞིང་།ཁྱོད་ལའོ།།འདི་
ཡིས་སོ།།སློང་མོ་བར་རོ།།འབྱུང་ཁུངས་ནས་སོ།།བདག་གིའོ།།ཤིང་ལའོ།།རྟག་ཏུའོ།།
ལྟ་བུ་གཉིས་པ་ལ་སོགས་པའི་རྣམ་དབྱེ་ཐམས་ཅད་ཀྱི་མཐར་ཡང་སླར་བསྡུ་སྦྱར་བ་ཡོད་
པས།ཁྱེད་ལྟར་ན་དེ་རྣམས་ཀྱང་རྣམ་དབྱེ་དང་པོའི་དོན་ཅན་དུ་འདོད་དགོས་པའི་ཕྱིར་
རོ།།སྨྲས་པ།
ལེགས་ལེགས་ལྟར་སྣང་རྨོངས་བློའི་རྣམ་འགྱུར་གྱིས།།བདེན་བདེན་བཅོས་པའི་ཚིག་
ཕྲེང་གསེར་འོད་ཅན།།གསལ་གསལ་རིགས་པའི་ཞུགས་ཆེན་འདིས་རེག་ཚེ།།ངེས་ངེས་པིཏྟ་ལ་
ཡི་རང་ཚུལ་བཟུང་།།གཞན་ཟེར་མཆིང་བུའི་དུམ་བུ་མང་བསྡུས་ནས།།འགྲིག་འགྲིག་ཚིག་
གི་སྲད་བུར་བརྒྱུས་ན་ཡང་།།འཁྲུལ་མེད་རྣམ་དཔྱོད་ཟོང་གིས་ཉེར་བསྒྲུབས་པའི།།
ལེགས་བཤད་དོ་ཤལ་འདི་དང་བསྒྲུན་དུ་ཅི།།བློ་ནོར་གྱིས་ཕོངས་བླུན་རྒན་མུ་ཏོ་
བའི།།ཚོགས་སུ་གང་ཞིག་བྲིམ་པ་མ་འཚལ་ཀྱང་།།གཟུར་གནས་མཁས་པ་གནས་པའི་མདུན་ས་
དེར།།རིགས་པའི་སྲང་གིས་ཡོན་ཏན་ལྕིད་ཤེས་འགྱུར།།
གཉིས་པ་ལ་དོན་བཤད་པ་ལ།དངོས་དང་།མཐའ་དཔྱད་དོ།།དང་པོ་ལ།གཞུང་དོན་འགྲོལ་བ་དང་།སྦྱོར་ཚུལ་བཤད་པའོ།དང་པོ་ནི།
རྗེས་འཇུག་ཡི་གེ་བཅུ་རྣམས་ལས།།གང་མིང་མཐའ་ན་བཅུ་པ་གནས།།
དེ་ལ་ཨཱ་ལི་གཉིས་ པ་སྦྱར།།གང་མིང་མཐའ་ན་བརྒྱད་པ་གནས།།
དེ་ལ་གཉིས་པ་ཨུ་ཡང་སྦྱར།།གང་མིང་མཐའ་ན་ གསུམ་པ་གནས།།
དེ་ལ་ཨཱ་ལི་གཉིས་པ་སྦྱར།།བཞི་པ་དགུ་པ་དངོས་ཀྱང་སྟེ།།
ལས་དང་ཆེད་ དང་རྟེན་གནས་དང་།།དེ་ཉིད་ཚེ་སྐབས་ལ་སྒྲ་ཡིན།།
ཞེས་པ་སྟེ།རྗེས་འཇུག་ཡི་གེ་བཅུ་པོ་དེ་རྣམས་ཉིད་ལས།གང་ཡང་རུང་བའི་མིང་གི་
མཐའ་ན་ལ་དོན་གྱི་རྣམ་དབྱེ་སྦྱར་བའི་ཆེད་དུ་བཅུ་པ་ས་ཡིག་གནས་པ་དེ་ལ་ཨཱ་ལི་
གཉིས་པ་ཨུ་ཡིག་སྦྱར་བས་སུ་ཞེས་གྲུབ་པ་དང་།དེ་བཞིན་དུ་ཚེག་བར་གཅིག་ཉིད་དུ་
མིང་མཐར་བརྒྱད་པ་ར་ཡིག་སྦྱར་ཏེ་གནས་པ་ལྷག་པར་ལྟ་བུ་དང་།ཡང་ར་ཡིག་དེ་ཉིད་
ཚེག་བར་ཕྱེས་པ་ལ་ཨུ་ཡིག་ཀྱང་སྦྱར་བས་རུ་ཞེས་པ་དང་།རྗེས་འཇུག་གསུམ་པ་ད་ཡིག་
གནས་པར་ཨུ་ཡིག་སྦྱར་བས་དུ་དང་།རྗེས་འཇུག་བཞི་པ་ན་དང་དགུ་པ་ལ་གཉིས་ནི་དབྱངས་
ཀྱིས་མ་བརྒྱན་པའི་དངོས་པོ་ཉིད་དུ་གནས་པའང་སྟེ་དྲུག་པོ་དེ་དག་དང་།འདི་ནས་མ་
གསུངས་ཀྱང་གོང་བཤད་སླར་བསྡུའི་སྐབས་ལྟར་དོན་གྱིས་ཐོབ་པའི་ཏ་ཡིག་ཨུ་ཞུགས་
བཅས་ལ་དོན་བདུན་དུ་ངེས་ཤིང་།འདི་དག་ཀྱང་སྐྱབས་སུ་མཆིའོ་ལྟ་བུ་རྣམ་དབྱེ་
གཉིས་པ་ལས་སུ་བྱ་བའི་དོན་ཅན་དུ་སྦྱར་ན་ལས་ཀྱི་སྒྲ་དང་།དབུལ་ཕོངས་ལ་སྦྱིན་པ་
གཏོང་ལྟ་བུ་ཆེད་དུ་བྱ་བའི་དོན་ཅན་ཡིན་ན།དགོས་ཆེད་ཀྱི་སྒྲ་དང་།ཤར་ཕྱོགས་སུ་
ཡོད་ལྟ་བུ་བདུན་པ་གནས་གཞིའི་དོན་ཅན་ཡིན་ན།རྟེན་གནས་ཀྱི་སྒྲ་དང་།འོད་དུ་གསལ་
ལྟ་བུ་སྤྱིར་བཏང་ལས་ཀྱི་སྒྲ་ཡིན་པ་ལས།ཁྱད་པར་ལས་དང་བྱ་བ་ཐ་མི་དད་པའི་རང་གི་ དེ་ཁོ་ན་ཉིད་སྟོན་པའི་དོན་ཅན་ཡིན་ན་དེ་ཉིད་ཀྱི་སྒྲ་དང་།ཉི་མ་ཤར་བ་ན་ཆོས་
སྟོན།ལྟ་བུ་དུས་བརྗོད་པའི་བདུན་པ་ཡིན་ན་ཚེ་སྐབས་ཀྱི་སྒྲར་ཤེས་པར་བྱ་དགོས་
ཤིང་།དེ་དག་ཐམས་ཅད་རྣམ་དབྱེར་སྦྱོར་བ་ན་ལ་སྒྲའི་འཇུག་པ་དང་ཕལ་ཆེར་མཐུན་པས་
ལ་སྒྲ་ཞེས་ཀྱང་བརྗོད་པར་བྱ་བ་ཉིད་དོ།།ཞེས་སོ།།
གཉིས་པ་ལ་སྒྲ་དང་དོན་གྱི་སྦྱོར་ཚུལ་གཉིས།དང་པོ་ནི།
སྐབས་འདིའི་གཞུང་གི་དངོས་བསྟན་དུ་རྣམ་དབྱེའི་རྐྱེན་གྱི་ངོ་བོ་ཙམ་ལས་དེ་
དག་མིང་མཐའི་རྗེས་འཇུག་དང་སྦྱོར་ཚུལ་མི་གསལ་ཡང་ཤུགས་ཀྱིས་རྟོགས་ནུས་པའི་
དབང་དུ་མཛད་པས་རྗེས་འཇུག་ག་བ་གཉིས་དང་ད་དྲག་ཅན་གྱི་མཐར་སླར་བསྡུའི་སྐབས་སུ་ བཤད་པ་བཞིན་འདིར་མ་བསྟན་ཀྱང་དོན་གྱིས་ཐོབ་པས་ཏ་ཡིག་ཨུ་ལྡན་སྦྱར་བ་དང་།ང་ད་
ན་མ་ར་ལ་རྣམས་ཀྱི་རྗེས་སུ་དུ་དང་།ས་མཐར་སུ་དང་།འ་ཡིག་མཐར་ར་ཡིག་རྐྱང་བའམ་
རུ་སྦྱར་བར་བྱ་ཞིང་།ལ་ན་དག་ནི་སྐབས་དང་བསྟུན་ཏེ་རྗེས་འཇུག་ཐམས་ཅད་ལ་བྱེ་
བྲག་མེད་པར་ཅི་རིགས་སུ་སྦྱར་བར་བྱའོ།།དེ་རྣམས་ཀྱང་རིམ་པ་བཞིན་དཔེར་བརྗོད་ན།
རྟག་ཏུ།རབ་ཏུ།ཀུནད་ཏུ།ཕ་རོལད་ཏུ།མཚརད་ཏུ།གང་དུ།ཐམས་ཅད་དུ།གཏན་དུ།ནམ་དུ།ཤར་
དུ།དཔལ་དུ།གཡས་སུ།ལྷར།ལྷ་རུ།འོག་ལ།འོག་ན།སྟེང་ལ།སྟེང་ན།ཡོད་ལ།ཡོད་ན།འཛིནད་
ལ།འཛིནད་ན།འཛེརད་ལ།འཛེརད་ན།སྩལད་ལ།སྩལད་ན།གྲུབ་ལ།གྲུབ་ན།ཁྱིམ་ལ།ཁྱིམ་ན།མཐའ་
ལ།མཐའ་ན།ཤར་ལ།ཤར་ན།རབ་གསལ་ལ།རབ་གསལ་ན།གཡས་ལ།གཡས་ན།ལྟ་བུ་རྣམས་སོ།།
དེ་ལ་ཏ་ཡིག་ཨུ་ལྡན་སྦྱོར་བ་རྣམས་ནི་ཕོས་ཕོའི་མིང་མཐའ་འདྲེན་པའི་ལུགས་ཏེ་
ཀློག་ཚུལ་ཟུར་མི་ཕྱིན་པ་རྣམས་ལ་ཅི་ཆ་ཡོད་ཀྱང་།རྗེས་འཇུག་ཞུགས་པའི་ཀློག་ཚུལ་
ཟུར་ཕྱིན་པར་འདོན་པ་རྣམས་ལ་ནི་དེ་ཉིད་བརྗོད་བདེ་བའང་ཡིན་ནོ།།དེ་བཞིན་དུ་ང་
མ་འ་ས་རྣམས་ལ་དུ་སོགས་སྦྱོར་བའི་ཚུལ་དེ་ནི་མོས་མི་ཡིག་འདྲེན་པ་དང་།ད་མཐར་
ཏུ་སྦྱོར་བ་ནི་རྟགས་མཚུངས་སུ་སྦྱར་ན་བརྗོད་པ་མི་བདེ་བས་བརྗོད་བདེ་འདྲེན་པ་
དང་།ལྷག་མ་ན་ར་ལ་རྣམས་ལ་དུ་སྦྱོར་བ་ནི་རྟགས་མཚུངས་དྲང་དུ་མེད་པས་བརྗོད་བདེ་
འདྲེན་པའི་ལུགས་སུ་བྱས་ཤིང་།གོ་དོན་ཅུང་ཟད་སླར་བསྡུའི་སྐབས་སུ་སྨོས་པ་བཞིན་
ཏེ།འཆད་འགྱུར་རྣམས་ལའང་ཅི་རིགས་སུ་སྦྱར་ཞིང་ཤེས་པར་བྱའོ།།
གཉིས་པ་དོན་གྱི་སྦྱོར་ཚུལ་ལ།འདིར་བསྟན་བཤད་པ་དང་།མ་བཤད་པ་ཁ་སྐོང་བ་གཉིས།དང་པོ་ནི།
ལ་ན་གཉིས་དེ་ཉིད་ཀྱི་དོན་དུ་མི་འཇུག་ཅིང་གཞན་ལ་འཇུག་པ་དང་།སུ་ར་རུ་དུ་
ཏུ་ལྔ་པོ་དེ་རྣམས་ལས་སོགས་དོན་ལྔ་ལ་མཚུངས་པར་འཇུག་པ་ཡིན་པས་དེ་རྣམས་ཇི་ལྟར་
སྦྱོར་ན།བྱེད་པ་པོས་བྱ་བ་གང་ལ་བྱེད་པའི་ལས་ཀྱི་དོན་ཅན་དུ་འགྱུར་བ་རྣམ་དབྱེ་
གཉིས་པ་ནི།ཤར་ཕྱོགས་སུ་འགྲོ།རྡོ་བར་གཟུགས་བརྙན་བྱེད།མཐའ་རུ་འཁྱོལ།རྒྱ་གར་
དུ་འགྲོ།རྒྱབ་ཏུ་ཕྱོགས།ཕ་རོལད་ཏུ་ཕྱིན།གཟུགས་ལ་ལྟ།མདུན་ན་རྒྱུ།ཞེས་སོགས་
མཐའ་ཡས་པར་བསྒྲེས་ནས་སྦྱར་བར་བྱའོ།།དེ་བཞིན་དུ་བྱ་བ་གང་ཞིག་གིས་བྱ་བའི་ཡུལ་
དེའམ།དེ་དང་འབྲེལ་བའི་ལས་ལ་ཕན་འདོགས་པར་འགྱུར་བའི་དོན་གྱི་ཆེད་དུ་བྱ་བའི་
ཡུལ་ལ་འཇུག་པ་རྣམ་དབྱེ་བཞི་པ་ནི།ཆོས་ཕྱོགས་སུ་དཀའ་བ་སྤྱད།དམན་པར་བརྩེ།བདུད་
རྩི་རུ་བསྒྲུབ།ཤིང་གཅོད་དུ་སྟ་རེ་དགོས།གྲུབ་ཏུ་རེ།གར་ལྟ་བ་ལ་སྒྲོན་མེ་ཐོགས།
ཤིང་ལ་ཆུ་འདྲེན།ཚོགས་ན་ནོར་འགྱེད།ལ་སོགས་པ་རྒྱ་ཆེར་སྦྱར་བར་བྱ་སྟེ།དེའི་
ཆེད་དུ།དེའི་ཆེད་ལ།དེའི་དོན་དུ།དེའི་དོན་ལ།དེའི་ཕྱིར་དུ་ལྟ་བུ་དགོས་ཆེད་
གསལ་བྱེད་ཀྱི་སྒྲ་དང་ལྡན་པ་རྣམས་ནི་ཆེད་ཀྱི་དོན་ཡིན་པ་སྨོས་མ་དགོས་སོ།།
རྟེན་གནས་ཏེ་གང་ཞིག་གང་ལ་བརྟེན་པའམ་ཡོད་པའི་དོན་ཅན་དུ་འཇུག་པ་རྣམ་དབྱེ་
བདུན་པ་ནི།ཤར་ཕྱོགས་སུ་འོད་སྣང་།མེར་མེ་ལྷ་གནས།ལྟེ་བ་རུ་རྫིང་བཅས།ལྷ་ཁང་དུ་
མཆོད་རྟེན་ཡོད།ས་འོག་ཏུ་སྟོབས་ལྡན་གནས།གཟུགས་ཁམས་ན་ཚངས་པ།ལྕགས་ལ་གསེར་
འབྱུག།ལྟ་བུ་སྟེ་གོ་བར་སླའོ།།རྣམ་དབྱེ་གཉིས་པའི་བྱེ་བྲག་ཡུལ་གང་ཞིག་ལ་བྱ་བ་
གང་ཞིག་བྱེད་པའི་ཚེ།ལས་དེ་ཁོ་ན་ཉིད་ཀྱི་ངོ་བོར་གྱུར་པས་ལས་དང་བྱ་བ་ངོ་བོ་
གཅིག་པ་ཡིན་པ་དེ་ལྟ་བུའི་ལས་ཀྱི་དོན་ལ་འཇུག་པ་ནི།མཆོག་གསུམ་ལ་སྐྱབས་སུ་ཤེས།
ལྷར་གསལ།སྲ་བར་བྱེད།བརྟན་པར་གྱུར།སྒྲོལ་མ་ཚེའི་ལྷ་རུ་བསྟེན།འོད་དུ་འཚེར། གཅིག་ཏུ་འགྱུར།སོགས་སུ་ཤེས་པར་བྱ་སྟེ།འདི་ཉིད་རྟོགས་དཀའ་བས་ཅུ་ཟད་བཤད་ན།
མཆོག་གསུམ་ལ་སྐྱབས་སུ་ཤེས་ཞེས་པ་ལྟ་བུ་ལ།སྤྱིར་བཏང་།སྐྱབས་སུ་ཤེས་པ་ནི་བྱ་
བ།མཆོག་གསུམ་ནི་བྱ་བ་དེའི་ཡུལ་ཡིན་པས་དེ་ལ་ལས་ཀྱི་རྣམ་དབྱེ་སྦྱོར་བ་ཡིན་
མོད།བྱེ་བྲག་ཕྱེ་ན་ལས་དང་བྱ་བ་ཐ་དད་མི་དད་ཀྱི་དབང་གིས་ལས་ཀྱི་རྣམ་དབྱེ་
འཇུག་པའི་ཡུལ་གཙོ་ཕལ་གཉིས་ལས་གཙོ་བོ་ནི་དེ་ཉིད་དང་།ཕལ་བའམ་འདིར་བསྟན་དེ་
ཉིད་ཀྱི་དོན་ཅན་ནི་བྱ་བ་ཉིད་ལ་ལས་དང་བྱ་གཉིས་སུ་དབྱེ་བའི།ཤེས་པ་ནི་བྱ་བ།
སྐྱབས་ནི་ཤེས་པར་བྱ་རྒྱུའི་ལས་ཡིན་པས་དེར་ལ་དོན་གྱི་རྣམ་དབྱེ་འཇུག་པ་དེ་
ཉིད་དེ།སྐྱབས་དང་ཤེས་པ་གཉིས་སྤྱིར་ཐ་དད་ཡིན་ཡང་བྱ་བ་གཅིག་ལ་སྦྱོར་བ་འདི་
འདྲའི་སྐབས་སུ་ཤེས་པ་ཉིད་སྐྱབས་ཡིན་ནོ་སྙམ་པའི་ངོ་བོར་སྐྱེས་པ་བརྗོད་པ་ཡིན་
པས།ཤེས་པ་ཡུལ་ཅན་དང་སྐྱབས་ཡུལ་དུ་མི་བཟུང་བར།མཆོག་གསུམ་ཡུལ་དང་།སྐྱབས་དང་
ཤེས་པ་བསྡམས་པའི་ཚིག་ནུས་ཡུལ་ཅན་གྱི་ངོ་བོ་གཅིག་སྟོན་པ་ཡིན་ནོ།།དེས་ན་བྱ་
ལས་ངོ་བོ་གཅིག་པའི་ཕྱིར་ལ་དོན་འདི་རིགས་ལ་གཞུང་འདིར་དེ་ཉིད་ཀྱི་སྒྲས་བསྟན་
ཅིང་།ངོ་བོ་གཅིག་ལ་བྱ་བ་དངོས་མི་འབྱུང་བས།འཕགས་ཡུལ་བའི་བརྡ་སྤྲོད་པ་དག་གིས་
ལས་ཀྱི་དོན་གཙོ་བོ་མ་ཡིན་པའམ་ཕལ་བ་ཞེས་ཟེར་རོ།།ལ་ན་དག་ནི་དོན་འདི་འདྲ་ལ་ནམ་
ཡང་འཇུག་པ་མ་ཡིན་པས།སྨྲ་སྒོར་ལ་ན་དག་གི་འཇུག་པ་འཆད་པའི་སྐབས་སུ་འདིར་འཇུག་
པ་མ་བཤད་པ་དང་།དུ་ལ་སོགས་པ་ལ་དང་མཐུན།།དེ་ཉིད་དག་ནི་ལྷག་པ་ཡིན།།ཞེས་འབྱུང་
བ་ནི་ལེགས་པར་བཤད་པའོ།།ཚེ་སྐབས་ཏེ་རྣམ་དབྱེ་བདུན་པ་ཉིད་དུས་བརྗོད་པའི་དོན་
ལ་འཇུག་པ་ནི།ཚེས་གཉིས་སུ་ཉི་མ་ཟློག།ཉི་མ་མ་ཤར་བར་ལྡང་།འཆར་ཁ་རུ་དུས་གདབ། རྒྱུན་དུ་ཁ་ཏོན་བྱེད།རྟག་ཏུ་བདེན་པར་སྨྲ།ནམ་ལངས་པ་ན་ཆོས་སྟོན།སྲོད་ལ་བདུད་
བཏུལ།སོགས་མང་དུ་ཤེས་པར་བྱའོ།།ཡང་སྐབས་འདིར་ལས་ཀྱི་དོན་སོགས་ལ་དགག་སྒྲ་དང་
འབྲེལ་བས་ལས་ལ་སོགས་པ་སོ་སོའི་མཚན་ཉིད་དང་མི་ལྡན་པར་གྱུར་པ།གཟུགས་ལ་མི་ལྟ།
སློང་བ་པོར་སྦྱིན་པར་མི་བྱ།གཟུགས་ཁམས་ན་དྲི་རོ་མེད།རྟེན་འཇིག་པར་མི་བྱེད།
ལྟ་བུ་རྣམས་ཀྱི་ལ་དོན་དེ་དག་ལས་ལ་སོགས་པ་སོ་སོའི་རྣམ་དབྱེར་འགྱུར་རམ་སྙམ་ན།
རིམ་པ་བཞིན།ལས་དང་།ཆེད་དུ་བྱ་བ་དང་།རྟེན་པ་དང་།དེ་ཉིད་ལས་གཞན་མིན་པའི་ལས་
རྣམས་བཀག་པས།དེ་དག་གི་རྒྱུ་མཚན་གྱིས་བཞག་པའི་རྣམ་དབྱེ་དེ་དག་དངོས་སུ་མི་
འགྱུར་ཡང་།དགག་བྱའི་ཚིག་དེ་རྣམས་དང་འབྲེལ་བའི་དབང་ལས་རྣམ་དབྱེ་དེ་རྣམས་དང་
རྗེས་སུ་མཐུན་པ་ཙམ་དུ་ཤེས་པར་བྱའོ།།
གཉིས་པ་གཞུང་འདིར་དངོས་སུ་མ་བསྟན་ཀྱང་།བཤད་མ་ཐག་པའི་ལ་སྒྲ་རྣམས་ཀྱི་ནང་
ནས་ན་ལ་གཉིས་པོ་དེ་ལ་དོན་གྱི་འཇུག་ཚུལ་གཞན་ཡང་ཡོད་དེ།ནའི་སྒྲ་དམིགས་ཀྱིས་
དབྱེ་བའི་དོན་དུ་སྦྱར་བ།དངོས་སུ་ན།མདོར་བསྡུ་ན།ཡིན་གྲང་ན།སོགས་དང་།རྒྱུ་
མཚན་གྱི་དོན་དུ་སྦྱར་བ།འདི་ཡོད་ན་འདི་འབྱུང་།མེ་ཡོད་ན་དུ་བ་འབྱུང་།ལྟ་བུ་
དང་།རྒྱུ་མཚན་དོན་གྱིས་བསྟན་པའི་དོན་དུ་སྦྱར་བ།འདིར་ཤིང་ཡང་མེད་ན་ཤིམ་ཤ་པ་
ཇི་ལྟར་ཡོད།འདུས་མ་བྱས་ཡིན་ན་མི་རྟག་པར་རུང་ངམ།ལྟ་བུ་དང་།སྔ་མ་དེ་ལས་ཚིག་
ཕྱི་མ་འགལ་བའམ་མ་ཡིན་པ་སོགས་སྟོན་པའི་དོན་དུ་སྦྱར་ལ།འདི་སྔོན་དུ་སྡིག་པ་
སྤྱོད་པ་ཞིག་ན་ད་ནི་དགེ་བ་ལ་ཡིད་འཇུག་པར་བྱེད་དོ།།འདི་སྔོན་ནོར་གྱིས་དབུལ་
བ་ཡིན་ན།ད་ནི་དབུལ་པོ་མ་ཡིན་ནོ།།ཞེས་པ་ལྟ་བུ་དང་།འོས་པར་དཀའ་བ་སྟེ་མི་འོས་
པའི་ཆག་གམ་ཚོད་འཛིན་པའི་སྒོ་ནས་ཚིག་དོན་ཕྱི་མ་ངེས་པར་བྱེད་པའི་དོན་དུ་སྦྱར་
བ།ལྷས་བཏུད་ན་མིས་ལྟ་ཅི་སྨོས།རབ་བྱུང་རྣམས་ཁྱིམ་ལ་འཁྲེན་པར་བྱེད་ན་ཁྱིམ་པ་
རྣམས་ལྟ་ཅི་སྨོས།ལྟ་བུ་དང་།འོས་པ་ནན་གྱིས་བཟུང་ནས་ཕྱི་ཚིག་ངེས་པར་བྱེད་པའི་
དོན་དུ་སྦྱར་བ།ཁྱིམ་པ་ལྟ་འདོད་པ་ལ་སྲེད་ན་རབ་བྱུང་རྣམས་ཀྱང་།འདོད་པ་ལ་སྲེད་ པར་བྱེད་དོ།།དུད་འགྲོ་རྣམས་བླུན་པ་ཉིད་ན་མིའང་དེ་ལྟ་བུ་དག་མཐོང་ངོ་།།ལྟ་བུ་
དང་།སྨོན་པའི་དོན་དུ་སྦྱར་བ།བདག་བྱང་ཆུབ་ཐོབ་ན་ཅི་མ་རུང་།སེམས་ཅན་ཐམས་ཅད་
བདེ་བ་དང་ལྡན་ན་སྙམ་མོ།།ལྟ་བུ་དང་།ཐེ་ཚོམ་གྱི་གཞིའི་དོན་དུ་སྦྱར་བ།ས་བོན་
ནི་བཏབ་ན།འདི་ལས་མྱུ་གུ་འབྱུང་ངམ་མི་འབྱུང་།ཆོས་ནི་བསྟན་ཟིན་ན་གཞན་གྱིས་
རྟོགས་སམ་མ་རྟོགས།ལྟ་བུ་མང་དུ་འབྱུང་ཞིང་།ལའི་སྒྲའང་ཚིག་ལྷག་མ་འདྲེན་པ་ལྷག་
བཅས་ཀྱི་དོན་དུ་སྦྱར་བ།མཉམ་པར་བཞག་ལ་དེ་ཁོ་ན་ཉིད་སེམས།ལག་པ་བསྙལ་ལ་ཟས་ཟ།ལྟ་
བུ་དང་།ཚིག་སྔ་ཕྱི་མཚམས་སྦྱོར་བ་ཙམ་གྱི་དོན་དུ་སྦྱར་བ།བདེ་བ་དང་ལྡན་ལ་གནོད་
པ་མི་མངའ་བ།གསལ་ཞིང་དྭངས་ལ་དྲི་མ་མེད་པ།ཞེས་སོགས་རྒྱ་ཆེར་འབྱུང་བ་རྣམས་སོ།།
འདིར་སྨྲ་སྒོ་ལས།
ན་ཞེས་བྱ་བའི་ཚིག་གི་དོན།།དམིགས་ཀྱིས་འབྱེད་དང་རྒྱུ་མཚན་དང་།།རྒྱུ་མཚན་
དོན་གྱིས་བསྟན་པ་དང་།།ལས་དང་ཆེད་དང་རྟེན་གནས་དང་།།ཕྱི་ཚིག་དེ་གཞན་སོགས་ སྟོན་དང་།།འོས་པར་དཀའ་བ་ཆག་འཛིན་ལས།།ཕྱི་ཚིག་ངེས་པར་བྱེད་པ་དང་།།དེ་ལས་
བཟློག་པ་ཉིད་དང་ནི།།འགལ་བའང་མི་འགལ་སྟོན་པ་དང་།།སྨོན་དང་འདྲི་དང་ཐེ་ཚོམ་
གཞི།།ཚེ་སྐབས་རྣམས་ལ་འདི་མཐོང་ངོ་།།ཞེས་དང་།ལ་ནི་གཉིས་པ་བཞི་པ་དང་།།བདུན་པ་
སྡུད་དང་སྦྱོར་བ་དང་།།སྨོན་དང་ཚད་འཛིན་གཞི་དང་ནི།།ཚེ་སྐབས་དག་ཏུ་འདོད་པ་
ཡིན།།ཞེས་འབྱུང་བའི་དོན་འགྲེལ་བས་བཀྲལ་བ་ལས་འཐད་པའི་ཆར་འདུག་སྙམ་པ་རྣམས་
བཀོད་ཀྱི།ན་སྒྲ་འགལ་བའམ་མི་འགལ་བར་སྟོན་པ་ལ་འཇུག་པ་ནི།དོན་དམ་དུ་དབྱེར་མེད་
ན་ཀུན་རྫོབ་ཏུ་དབྱེར་ཡོད་ལྟ་བུ་དཔེར་བརྗོད་པས།ཕྱི་ཚིག་དེ་གཞན་སོགས་སྟོན་
དང་།།ཞེས་པའི་བསྟན་བྱ་དང་ཟློས་པར་འགྱུར་ཞིང་།འདྲི་བའི་གཞིར་འཇུག་པ་ནི།
གཟུགས་གཟུགས་སུ་རུང་བ་ཡིན་ན་འདི་ཅིས་གཟུགས་སུ་རུང་ལྟ་བུ་དཔེར་བརྗོད་པས།
དམིགས་ཀྱིས་འབྱེད་པའམ་ཐེ་ཚོམ་གྱི་གཞི་གང་རུང་ལས་བརྩམས་ཏེ་འདྲི་དགོས་པའི་
ཕྱིར་དེ་དག་གི་དོན་ལས་ལོགས་སུ་དབྱེ་བ་དགོས་པ་མེད་པ་དང་།ལའི་སྒྲ་སྡུད་པ་དང་
སྦྱོར་བ་དང་སྨོན་པ་རྣམས་ལ་འཇུག་པར་བཤད་པ་ནི་སོ་སོའི་དཔེར་བརྗོད་དང་སྦྱར་ནས་
བརྟགས་ན་ལྷག་བཅས་ཉིད་དུ་གསལ་བས་སོ་སོར་དབྱེ་བ་དོན་མི་ཆེ་བ་དང་།ཚད་འཛིན་ལ་
འཇུག་པར་བཤད་པ་དེ་ནི་ཚད་བརྗོད་པའི་དོན་ཅན་དུ་མི་འཇུག་པས་དེ་རྣམས་ནི་འདིར་མ་
སྨོས་སོ།།
གཉིས་པ་མཐའ་དཔྱད་ནི།
སྐབས་འདིར་འགྲེལ་བྱེད་སྔ་ཕྱི་རྣམས་ལ་བཞེད་ཚུལ་མི་འདྲ་བ་འགའ་ཞིག་འདུག་པ་
དེ་རྣམས་ཀྱི་མཐའ་དཔྱད་པས་འགྲེལ་ཚུལ་འདི་ཉིད་ལའང་ངེས་པ་རྙེད་པའི་རྒྱུར་
འགྱུར་བའི་ཕྱིར།གཞན་བཞེད་ཀྱི་སྙིང་པོ་བསྡུས་ནས་ཅུང་ཟད་དཔྱད་ན།གང་མིང་མཐའ་ན་
བཅུ་པ་གནས།།སོགས་ཀྱིས་བསྟན་པའི་མིང་མཐར་གནས་པའི་དོན་འགྲེལ་བྱེད་སྔ་མ་ཕལ་
ཆེར་གྱིས་རྣམ་དབྱེ་སྦྱར་ཡུལ་མིང་མཐའི་རྗེས་འཇུག་དེ་ཉིད་དུ་འདོད་ཅིང་།རྒྱུ་
མཚན་དེས།གང་མིང་མཐའ་ན་བརྒྱད་པ་གནས།།དེ་ལ་གཉིས་པ་ཨུ་ཡང་སྦྱར།།ཞེས་འབྱུང་བས་
ར་མཐར་རུ་འཇུག་པ་མི་འདོད་བཞིན་དུ་ཁས་ལེན་པ་དང་།འགའ་ཞིག་གིས།མིང་མཐར་གནས་
པའི་དོན་སྔ་མ་བཞིན་དུ་འདོད་ཅིང་ར་མཐར་རུ་འཇུག་པ་མི་འདོད་པས།དེ་ལ་གཉིས་པར་
ཨུ་ཡང་སྦྱར།།ཞེས་ར་ཡིག་བསྣན་ནས།གཉིས་ཞེས་པའང་སྔོན་འཇུག་གཉིས་པར་ངོས་བཟུང་
སྟེ་ར་མཐར་དུ་སྦྱར་བའི་དོན་དུ་འཆད་པ་དང་།ཁ་ཅིག་གིས་རྟགས་མཚུངས་སྦྱོར་བར་
རློམ་ནས་ད་མཐར་དུ་འཇུག་པར་འདོད་པ་དང་།ཕལ་ཆེར་གྱིས་ལ་སྒྲའི་འཇུག་ཡུལ་དེ་ཉིད་
ཅེས་པ་དངོས་པོའི་དེ་ཁོ་ན་ཉིད་ལ་ངོས་བཟུང་བ་དང་།ཁ་ཅིག་གིས།དེ་ཉིད་ཅེས་པ་ངེས་
གཟུང་གི་དོན་དུ་འདོད་པ་དང་།ལ་ལས་ལ་སྒྲ་ཟེར་བའི་རྒྱུ་མཚན་སུ་ལ་སོགས་པ་རྣམས་
ལས་སོགས་དོན་ལྔ་ལ་མཚུངས་པར་འཇུག་པས་སོ་ཞེས་འདོད་ཅིང་རྒྱུ་མཚན་དེས།ལ་ན་དག་
ཀྱང་དེ་ཉིད་ལ་འཇུག་པར་འདོད་པ་རྣམས་ཏེ།དེ་དག་འགའ་དང་འགས་རྗེས་ཟློས་ཀྱི་ཚུལ་
དུ་སྨྲ་བར་བྱེད་ཅིང་།འགའ་དང་འགས་ཁྱད་ཆོས་སུ་ངོམ་པར་བྱེད་དོ།།དེ་ལ་འདོད་པ་
སྔ་མ་དེ་ནི་ཤིན་ཏུ་འཁྲུལ་ཏེ།དེ་ལྟ་ན་རྗེས་འཇུག་ས་ར་ད་གསུམ་གྱི་མཐར་སུ་རུ་
དུ་རྣམས་འཇུག་ཟེར་བ་ཉི་ཚེ་ཞིག་གཞུང་འདིས་བསྟན་པར་སོང་བས་རུ་དང་དུ་གཉིས་ཀྱི་ འཇུག་ཡུལ་ད་དུང་གཞན་ཡང་ཡོད་ན་གཞུང་འདིས་མི་སྟོན་པའི་རྒྱུ་མཚན་འཐད་ལྡན་སྨྲ་
དགོས་ཤིང་།རྒྱུ་མཚན་མེད་ན་ནི་གཞུང་གི་བསྟན་བྱ་མ་ཚང་བའི་སྐྱོན་དུ་འགྱུར་བའི་
ཕྱིར་དང་།ར་མཐར་རུ་འཇུག་པའང་ཤིན་ཏུ་བརྗོད་མི་བདེ་བས་མིང་མཐས་རྣམ་དབྱེ་
འདྲེན་ཚུལ་གཞུང་འདི་དང་འགལ་བར་མ་ཟད།མེས་དཔོན་གྱི་བཀའ་གཙིགས་ཞལ་བཤུས་དག་པ་
རྣམས་དང་།ཁྲི་ལྡེ་སྲོང་བཙན་དུས་ཀྱི་ཞལ་བྱང་ཅན་བྲག་ལ་བརྐོས་པའི་ལྷ་དང་ཡི་གེ་
དུ་མ་ཁམས་ཕྱོགས་སུ་སྣང་བ་རྣམས་དང་།རྡོ་རིང་གི་ཡི་གེ་དང་།གནའ་བོའི་གསུམ་རབ་
དག་པ་རྣམས་སོགས་གང་དུའང་མི་འབྱུང་བས་མི་འཐད་པར་ངེས་པའི་ཕྱིར་རོ།།འོ་ན་ལ་
དོན་འཆད་པའི་གཞུང་འདིས་སླར་བསྡུ་དང་འབྲེལ་སྒྲ་སོགས་འཆད་པའི་སྐབས་ལྟར་ཕྲད་
དང་མིང་མཐའ་སྦྱོར་ཚུལ་ཞིག་སྟོན་རིགས་པ་ལ་མ་བསྟན་པར་ཐལ་བར་འགྱུར་རོ་ཞེ་ན།
སྦྱོར་ཚུལ་དེ་ནི་གཞུང་འདི་ཉིད་ཀྱི་གོང་འོག་གཞན་དང་རྟགས་འཇུག་སོགས་ལས་ཀྱང་
རྗེས་སུ་དཔག་ནུས་པར་དགོངས་ནས་གཞུང་ཟོར་ཡང་བའི་ཆེད་དུ་དངོས་སུ་མ་བསྟན་པར་མ་
ཟད་པས་སྐྱོན་དུ་ཅི་ཞིག་འགྱུར།དེ་བས་ཁྱེད་རང་གིས་གཞུང་འདིས་ཕྲད་དང་མིང་
སྦྱོར་ཚུལ་བསྟན་པར་འདོད་པ་ཉིད་སྐྱོན་ཆེ་སྟེ།རྗེས་འཇུག་ས་ར་ད་གསུམ་ཁོ་ན་ལ་
སྦྱོར་ཚུལ་བཤད་ཀྱི་གཞན་མ་བཤད་པ་དང་།དེ་གསུམ་བཤད་པས་སྦྱོར་ཚུལ་གཞན་གོ་བར་མི་
ནུས་པའི་ཕྱིར་ཉན་པ་པོ་ལ་སླ་ཡང་ཐེ་ཚོམ་སྐྱེད་པར་མ་ཟད།གོང་དུ་སྨོས་པ་ལྟར་མཁས་
པ་ལ་མ་གྲགས་ཤིང་།གཞུང་དོན་སྤྱིའི་མིང་མཐའ་འདྲེན་ཚུལ་དང་འགལ་བ་ཁས་ལེན་དགོས་
པ་དེའང་ཞེ་འདོད་འདིའི་སྐྱོན་གྱིས་བསྐྱེད་པར་སྣང་བའི་ཕྱིར་རོ།།དེས་ན་མིང་
མཐར་ས་ཡིག་སོགས་གནས་ཞེས་པ་དེ་མིང་མཐའ་ལ་སྔ་ནས་གནས་པའི་དོན་མིན་གྱི།དཔེར་ན།
གཡས།ལྷ།ཤར་ལྟ་བུའི་མིང་མཐར་རྣམ་དབྱེའི་དོན་དུ་ས་ར་ད་རྣམས་བཀོད་དེ་གནས་པ་ལྟ་
བུ་ལ་ཨུ་ཡིག་སྦྱར་རྒྱུའི་དོན་ཏེ།ལེགས་སྦྱར་ལའང་།དེ་བ་ཞེས་པར་སི་བྱིན་ཨི་
ཕྱིས་དེ་བསྲ་ཞེས་གནས་པ་ལ་ཟེར་བ་ལྟ་བུར་ཤེས་དགོས་སོ།།དེ་ལྟར་བསྟན་པས་འདོད་པ་
གཉིས་པ་དེའི་ལོག་རྟོག་གི་རྩ་བ་སུན་འབྱིན་པར་ནུས་མོད།འོན་ཀྱང་གཞུང་བཅོས་ནས་
དོན་མིན་དུ་བཤད་པ་ལ་བརྗོད་པར་བྱ་སྟེ།ཁྱེད་དག་གིས་རྩལ་དུ་བཏོན་པའི་བཤད་པ་དེ་
ལ།གཉིས་པ་ཞེས་པ་སྔོན་འཇུག་གཉིས་པར་ངོས་འཛིན་པ་སྐབས་དང་མི་འབྲེལ་བ་དང་།གཉིས་
པར་ཞེས་བཅོས་ནས་ད་ཡིག་ལ་ཨུ་སྦྱར་བའི་དོན་དུ་འདོད་པ་དགོས་པ་མེད་པ་དང་།དེ་ ལྟར་འདོད་པས་གཞུང་གི་བསྟན་བྱ་གཞན་རྣམས་ཆད་པར་འགྱུར་བ་དང་།ཡང་སྒྲ་བརྗོད་པ་
དོན་མེད་དུ་ཐལ་བའི་སྐྱོན་ཡང་ཡོད་དོ།།དང་པོ་གྲུབ་སྟེ།སུམ་ཅུ་པའི་གཞུང་ཚིག་
འདི་གྲས་རྣམས་ཀྱིས་རྗེས་འཇུག་དང་ཨཱ་ལིའི་གྲངས་སྟོན་པར་སྣང་བ་ལ།སྔ་ཕྱིའི་
འབྲེལ་ཅིའང་མེད་པར་འདིར་བླ་རྡོལ་དུ་སྔོན་འཇུག་གི་གྲངས་སྟོན་པ་མཁས་པའི་བསྟན་
བཅོས་ཀྱི་ལུགས་སུ་མི་རིགས་པའི་ཕྱིར།གཉིས་པ་གྲུབ་སྟེ།གང་མིང་མཐའ་ན་གསུམ་པ་
གནས།།ཞེས་སོགས་ཁྱེད་རང་ཡང་དུ་སྒྲ་འཆད་པའི་གཞུང་དུ་འདོད་པ་གང་ཞིག།དེར་འཆད་
པར་འགྱུར་བས་འདིར་བསྟན་པ་ལ་དགོས་པ་མེད་པའི་ཕྱིར།དེ་ནི་ད་མཐར་དུ་འཇུག་པའི་
དོན་དང་།འདིར་ར་མཐར་དུ་འཇུག་པའི་དོན་ཡིན་པས་སོ་སོ་ལ་དགོས་པ་ཡོད་དོ་ཞེ་ན།
དེའང་མི་འཐད་དེ།དེ་ལྟ་ན་ང་ན་མ་ལ་རྣམས་ཀྱི་མཐར་ཡང་དུ་སྒྲ་འཇུག་པས་དེ་རྣམས་
རེ་རེ་ནས་འཆད་པའི་གཞུང་འབྱུང་བར་རིགས་པའི་ཕྱིར་ཧ་ཅང་ཐལ་ལོ།།གསུམ་པ་གྲུབ་
སྟེ།ཁྱེད་འདོད་པ་དེ་ལྟ་ན།ལ་དོན་གཞན་རྣམས་ཀྱི་ཡ་གྱལ་ར་དང་རུའི་སྒྲ་དག་སྟོན་
བྱེད་ཀྱི་གཞུང་ཆད་པར་འགྱུར་བའི་ཕྱིར་ཏེ།སླར་བསྡུའི་སྐབས་སུ་རྒྱུ་མཚན་སྨོས་
པ་བཞིན་ཏ་ཡིག་ཨུ་ལྡན་ལྟ་བུ་འདིར་མ་བཤད་པ་སྐྱོན་དུ་མི་འགྱུར་ཡང་སྐབས་དོན་
རྗེས་འཇུག་གི་ཡི་གེ་དང་སྦྱར་བའི་ལ་དོན་ཆད་ན་རྩོམ་པ་པོ་མཁས་པའི་གསུང་དུ་མི་
འགྱུར་བའི་ཕྱིར་རོ།།བཞི་པ་གྲུབ་སྟེ།ཡང་ཞེས་པ་ཚིག་རྒྱན་གཉིས་དང་སྡུད་པའི་
དོན་དུ་འཇུག་པ་ལས་ཚིག་རྒྱན་གྱི་དོན་མ་ཡིན་པ་ནི་རྟོགས་པར་སླ་བས་སྡུད་པའི་
དོན་ལས་འོས་མེད་ཅིང་།སྡུད་པའི་དོན་ཡང་དབྱེ་གཞི་གཅིག་ལ་དབྱེ་བ་གཉིས་སམ་མང་
པོ་མཐུན་པར་བསྡུ་པའམ།ཁྱད་གཞི་གཅིག་ལ་ཁྱད་ཆོས་གཉིས་སམ་མང་པོ་ལྷན་ཅིག་ཏུ་ བརྗོད་དགོས་པ་ལྟ་བུར་འདོད་དགོས་པའི་རྒྱུ་མཚན་གྱིས།ཁྱེད་ལྟར་ན།ཨུ་ཡང་སྦྱར་
ཞེས་པའི་ཡང་སྒྲ་དེས།གཞི་གང་ལ་གང་ཞིག་གང་དང་ལྷན་ཅིག་ཏུ་སྡུད་པའི་དོན་ཅིའང་
མི་སྟོན་པར་འགྱུར་བས་མཁན་པོས་འདིར་ཡང་སྒྲ་གསུངས་པ་དགོས་པ་མེད་པར་ཐལ་བའི་
ཕྱིར་རོ།།དེས་ན་ཉེས་པ་འདི་ནི་གཞུང་འདིས་རུ་ཡིག་རྐྱང་བ་བསྟན་པར་འདོད་པ་རྣམས་
ལའང་འབྱུང་བར་དོགས་སོ།།འདོད་པ་གསུམ་པ་དེ་ཡང་འཐད་པར་མ་མཐོང་སྟེ།ད་ཡིག་རྗེས་
འཇུག་ཕོ་ཡིན་པའི་རྒྱུ་མཚན་གྱིས་དེས་ཏུ་འདྲེན་པ་འཐད་དོ་སྙམ་པར་འདུག་ཀྱང་།དེ་
ལྟ་ན།ས་ཡིག་ལའང་མཚུངས་པས།གཡས་ཏུ།སྔས་ཏུ།ལྟ་བུ་ཤིན་ཏུ་བརྗོད་མི་བདེ་ཞིང་མ་
གྲགས་པ་མང་པོ་ཞིག་གསར་དུ་སྦྱོར་དགོས་པར་འགྱུར་ཞིང་།ས་མཐར་སུ་ཐོབ་པ་གཞུང་
འདིས་དངོས་སུ་བསྟན་པའི་ལུགས་ཡིན་པས་སྐྱོན་མེད་དོ་སྙམ་པའང་མི་འཐད་དེ།དེ་ལྟ་
ན་ད་མཐར་དུ་ཐོབ་པའང་གཞུང་འདིས་དངོས་བསྟན་དུ་འདོད་དགོས་པའི་ཕྱིར་ཏེ།དེ་གཉིས་
རིགས་པ་མཚུངས་པའི་ཕྱིར་དང་།སྤྱིར་ཡང་ལུགས་དེ་མི་འཐད་པ་གོང་དུ་སྨོས་པ་ལྟ་
བུའི་ཕྱིར་རོ།།ཡང་ད་དྲག་གི་མཐར་ཏུ་ཐོབ་པའི་རྒྱུ་མཚན་གྱིས་སོ་སྙམ་ནའང་མི་
འཐད་དེ།སླར་བསྡུའི་སྐབས་སུ་བཤད་པ་བཞིན་ད་ཡིག་གི་འཇུག་ཡང་འཇུག་གི་མཐའ་གཉིས་
ད་ཡིག་ཡིན་པ་ཙམ་དུ་མཚུངས་ཀྱང་ཀློག་ཚུལ་ལ་ཁྱད་པར་ཤིན་ཏུ་ཆེ་བས་ད་དྲག་གི་མཐར་
ཏུ་སྒྲ་ཉིད་བརྗོད་བདེ་ཞིང་།གཅིག་ཤོས་ལ་དེ་བས་དུ་སྒྲ་ཉིད་བརྗོད་བདེ་བར་མངོན་
སུམ་གྱིས་གྲུབ་ཅིང་།ཡོངས་སུ་གྲགས་པའི་ཕྱིར་རོ།།འདོད་པ་བཞི་པ་དེའང་མི་འཐད་
དེ།སྤྱིར་ན་ཕྲད་འཆད་འགྱུར་ལྟར་དེ་ཉིད་ལ་མི་འཇུག་ཅིང་།ཁྱད་པར་ཁྱེད་ཀྱི་ལུགས་
སུ་དེ་ཉིད་ཅེས་པ་དངོས་པོའི་དེ་ཁོ་ན་ཉིད་ལ་འདོད་པར་འདུག་པས་དེ་ལ་ནམ་ཡང་འཇུག་ པ་མི་སྲིད་པའི་ཕྱིར་དང་།ཁོ་ན་ཞེས་པའི་ན་ཡིག་ཁྱེད་འདོད་པའི་དེ་ཉིད་ཀྱི་དོན་
ཡིན་ན་ཉིད་ཅེས་པའི་སྒྲ་ལ་མ་ལྟོས་པར་དངོས་པོའི་དེ་ཉིད་ལ་འཇུག་རིགས་པ་ལ།དེའང་
མི་འཇུག་པའི་ཕྱིར་ཏེ།སྨྲ་སྒོ་ལས་ཁོ་ནའི་སྒྲ་དོན་དྲུག་ལ་འཇུག་པར་བཤད་པ་འཐད་
ཅིང་དེ་རྣམས་ཐམས་ཅད་ངེས་གཟུང་གི་དོན་དུ་སྣང་བའི་ཕྱིར་དང་།དེ་ཁོ་ན་ཉིད་ཅེས་
སྦྲེལ་ནས་བརྗོད་པའི་སྒྲའང་།དངོས་པོའི་དེ་ཉིད་ལ་འཇུག་པ་ནི་བདེན་མོད་ཀྱི་དེ་
ལ་དེས་ཁྱབ་པ་ནི་མ་ཡིན་ཏེ།དཔེར་ན་ལྷ་རྣམས་ཀྱི་ནང་ནས་སྲེད་མེད་ཀྱི་བུ་དེ་ཁོ་
ན་ཉིད་མཐུ་ཆེའོ།།ལྟ་བུ་ངེས་གཟུང་ལ་འཇུག་པ་ཤིན་ཏུ་མང་བའི་ཕྱིར་ཏེ་ཞེ་འདོད་ ཀྱི་དཔེར་བརྗོད་གཅིག་རྙེད་ཁུལ་དེའང་ཞེ་འདོད་དེར་མ་ངེས་པའི་ཕྱིར་རོ།།དེས་ན་
ཁོ་ན་ཞེས་པ་ཚིག་ཕྲད་གཅིག་ཡིན་པ་ལ་ཁོ་དང་ན་སོ་སོར་བྲལ་ནས་འཆད་པར་རློམ་པ་ནི།
ལ་དོན་དེ་ཉིད་ལ་འཇུག་པར་བཤད་པ་དེ་རྣམ་དབྱེ་གཉིས་པ་དང་མ་འབྲེལ་བ་ཞིག་དགོས་
པར་བཟུང་ནས་དཔེར་བརྗོད་བཙལ་ཀྱང་མ་རྙེད་པ་གཏིང་ཐུག་སྟེ་ཟེར་རྒྱུས་ཕོངས་པའི་
རྟགས་ཟང་མར་བསྟན་པ་ཡིན་ནོ།།འདོད་པ་ལྔ་པ་དེའང་རིགས་པ་མ་ཡིན་ཏེ།ཁྱེད་ཉིད་
ཀྱིས་བཀོད་པའི་འདི་ཐད་ཀྱི་དཔེར་བརྗོད་དུ།རྒྱ་གར་དུ་ཤེས།སྟོད་དུ་རིག།འོག་
མིན་དུ་ཤེས།དཔལ་དུ་འདུག།ཅེས་འབྱུང་བ་རྣམས་ཀྱི་ལ་སྒྲ་ནི་ལས་དང་བྱ་བ་ངོ་བོ་
གཅིག་པའི་ལས་ཀྱི་རྣམ་དབྱེ་ཡིན་པས་ངེད་འདོད་པའི་དེ་ཉིད་ཀྱི་དཔེར་རིགས་ཀྱང་
ཁྱེད་རང་གི་ཞེན་དོན་དུ་མི་འགྱུར་ཏེ་དེ་དག་ངེས་གཟུང་གི་སྒྲ་མ་ཡིན་པའི་ཕྱིར་
དང་།ཀུན་ལ་དགའ།དེ་རུ་སྐྱིད།རྒྱབ་ཏུ་སྤྲོ།ཞེས་འབྱུང་བའི་ལ་སྒྲ་རྣམས་ནི་བྱ་བ་
དང་ཐ་དད་པའི་ལས་ཀྱི་དོན་ཡིན་པས་འདིར་བསྟན་གྱི་ལས་ཀྱི་རྣམ་དབྱེ་དངོས་སུ་
འགྱུར་བའི་ཕྱིར་ངེས་གཟུང་མ་ཡིན་པ་དང་།རྟག་ཏུ་དགའ།ཕ་རོལ་ཏུ་འདུག།ཅེས་འབྱུང་
བའི་ལ་དོན་སྔ་མ་དུས་བརྗོད་པའི་བདུན་པ་ཡིན་པས་འདིར་བསྟན་ཚེ་སྐབས་ཀྱི་སྒྲ་
དང་།ཕྱི་མ་རྟེན་གནས་ཀྱི་བདུན་པ་དངོས་ཡིན་པའི་ཕྱིར་དེ་དག་ལ་ངེས་གཟུང་གི་
སྒྲའི་དོན་མེད་པས་སོ།།ཅི་སྟེ་དེ་དག་ནན་གྱིས་ངེས་གཟུང་དུ་འཛིན་ཅིང་ལ་དོན་
འཇུག་ཡུལ་གྱི་དེ་ཉིད་ཀྱང་དེ་དག་ཏུ་འདོད་པ་མི་གཏོང་ན་ནི།མཁན་པོ་ཉིད་ལ་ཅོ་
འདྲི་བར་ཆས་སྟེ།དེ་ཉིད་གཅིག་པུ་བསྟན་པས་ཆོག་གི།ལས་དང་ཚེ་སྐབས་དང་རྟེན་གནས་
རྣམས་ལ་འཇུག་ཚུལ་སོ་སོར་འཆད་པ་དགོས་པ་མེད་པར་ཐལ་བའི་ཕྱིར་རོ།།དེས་ན་རྣམ་
དབྱེ་འདི་དག་སོ་སོར་འཆད་པར་རློམ་བཞིན་དུ་བྱེ་བྲག་མ་ཕྱེད་པ་དང་།ངེས་གཟུང་གི་
སྒྲའང་ལན་དུ་མར་བསྐྱར་ཞིང་འཆད་བཞིན་དུ་དེ་མ་ཡིན་པ་ལ་དེར་འཁྲུལ་བ་སོགས་བློ་
གྲོས་ཀྱི་བཞིན་རས་གསལ་བར་སྟོན་པའི་འགྲེལ་བཤད་སྣང་བྱེད་ནོར་བུ་འདི་ནི་ཤིན་
ཏུ་ཡ་མཚན་པའི་གནས་སོ།།འདོད་པ་དྲུག་པ་དེའང་འཐད་པའི་ཕྱོགས་མ་ཡིན་ཏེ།དུ་ལ་
སོགས་པ་ལྔའམ་དྲུག་པོ་ཐམས་ཅད་ལས་སོགས་དོན་ལྔ་ལ་ལ་ཡིག་དང་མཚུངས་པར་འཇུག་པ་མ་
ཡིན་པའི་ཕྱིར་ཏེ།ལ་ན་གཉིས་དེ་ཉིད་ཀྱི་དོན་ལ་མི་འཇུག་པའི་ཕྱིར་ཏེ།ཁྱེད་རང་
གིས་ཀྱང་དཔེར་བརྗོད་འགའ་ཞིག་བཀོད་ནས་འདི་རྣམས་ཕལ་ཆེར་ལ་ལ་ཡིག་སྦྱར་རུང་ངོ་
ཞེས་སྨྲ་བ་ཙམ་ལས་དངོས་སུ་ལའི་དཔེར་བརྗོད་བཀོད་མ་ནུས་པ་དང་།ན་ཡིག་འཇུག་པའི་
དཔེར་བརྗོད་ཀྱང་འཐད་ལྡན་འགོད་རྒྱུ་མ་རྙེད་འདུག་པའི་ཕྱིར་རོ།།དེའང་ཞིབ་མོར་
བརྗོད་ན།འདུས་བྱས་སུ་གྲུབ།ཆོས་སུ་གནས།མི་བསླུ་བར་ངེས།ཆོས་ཉིད་དུ་གསལ།དགྲ་
བཅོམ་དུ་གྲུབ།སོགས་བཀོད་པ་ནི་དེ་ཉིད་ཀྱི་དཔེར་རུང་ཡང་།དེ་དག་ལ་ལ་ཡིག་སྦྱར་
དུ་མི་རུང་སྟེ།འདུས་བྱས་ལ་གྲུབ།ཆོས་ལ་གནས།མི་བསླུ་བ་ལ་ངེས།ཆོས་ཉིད་ལ་གསལ།
དགྲ་བཅོམ་ལ་གྲུབ།ཅེས་སོགས་སྦྱར་བས་རྟེན་བརྟེན་པའམ་བྱ་བའི་ཡུལ་དང་བྱ་བ་ཐ་དད་
དུ་གསལ་བའི་ཚིག་ཏུ་གྱུར་བའི་ཕྱིར་འགའ་ཞིག་རྟེན་གནས་དང་འགའ་ཞིག་ལས་དང་འགའ་
ཞིག་དགོས་ཆེད་ཀྱི་སྒྲར་ཡང་འགྱུར་ཅིག།བྱ་ལས་ངོ་བོ་གཅིག་པའི་དེ་ཉིད་ཀྱི་སྒྲར་
མི་འགྱུར་བའི་ཕྱིར་རོ།།དེ་བཞིན་དུ་དེ་རྣམས་ལ་ན་ཡིག་ཀྱང་དེ་ཉིད་ཀྱི་དོན་དུ་
སྦྱར་མི་རུང་ཞིང་།དཔེར་བརྗོད་དུ་དེ་རང་ན་འདུག།ཅེས་པ་ཁོ་ན་བཀོད་ཀྱང་དེ་ནི་
གནས་གཞིའི་དོན་ཅན་ཡིན་གྱི་དེ་ཉིད་ཀྱི་དོན་ལྟ་ཅི་སྨོས་ལས་ཀྱི་དོན་ཡང་མ་ཡིན་ ནོ།།འོ་ན་གཞུང་འདིར་ལ་ན་དག་དམིགས་སུ་མ་ཕྱེ་བར།ལས་དང་ཆེད་དང་རྟེན་གནས་དང་།།
དེ་ཉིད་ཚེ་སྐབས་ལ་སྒྲ་ཡིན།།ཞེས་གསུངས་པ་ཅི་ཞེ་ན།དེ་ལྟར་གསུངས་པ་ནི།ལ་སྒྲ་
རྣམས་ལས་སོགས་དོན་ལྔ་པོ་ཕལ་ཆེར་ལ་མཚུངས་པར་འཇུག་པ་མང་བའི་དབང་གིས་སྤྱིར་
བསྟན་པ་ཡིན་པས་སྐྱོན་མེད་ལ།ལ་སྒྲ་ཞེས་པའི་དོན་ཡང་ལས་སོགས་འཇུག་དོན་ཐམས་ཅད་
ལ་ལ་ཡིག་དང་མཚུངས་པར་འཇུག་པས་མ་ཡིན་ཏེ།ཏུ་ལ་སོགས་པ་བདུན་ནམ་དུ་ལ་སོགས་པ་
དྲུག་པོ་དེའི་ཐ་མ་ལ་ཡིག་ཡིན་པས་དེ་བཟུང་ནས་ཐམས་ཅད་ལ་ལ་སྒྲ་ཞེས་པའི་མིང་གིས་
བཏགས་པ་ཡིན་པའི་ཕྱིར་རོ།།དེ་ལྟར་འཐད་པའང་མ་ཡིན་དེ་བརྡ་སྤྲོད་པའི་བསྟན་བཅོས་
རྣམས་ན།བརྡ་ཆད་ཀྱི་སྐབས་སུ།ཙར྄།ཕལ྄།ལྟ་བུ་ཡི་གེ་བསྡུས་ནས་མིང་དུ་བྱས་པ་
རྣམས་ལ་མིང་དེའི་ཁོངས་སུ་མིང་དེ་བྱ་བ་གང་གི་ཆེད་དུ་བཏགས་པའི་བྱ་བ་དེ་ལ་མི་
མཁོ་བའི་ཡི་གེ་འགའ་ཞིག་ཀྱང་ཡོད་མོད་ཀྱི་མཁོ་བ་མང་བའི་ཆ་ནས་དེར་བཏགས་པ་མི་
འགལ་བ་དང་།དམིགས་བསལ་ཐམས་ཅད་ལ་མ་ཁྱབ་ཀྱང་སྒྲུབ་པ་སྤྱིར་བཏང་བཤད་པ་མི་འགལ་བ་
ལྟ་བུར་ངེས་པའི་ཕྱིར་རོ།།དེ་ལྟར་བློ་ལྡན་རྣམས་ཀྱི་བློ་གྲོས་ཀྱི་སྒོ་དབྱེ་
བའི་ཕྱིར་མཐའ་དཔྱད་ཅུང་ཟད་སྤྲོས་ཀྱི།གཞན་གྱི་ནོར་བ་མཐའ་དག་ནི་དགག་པར་མི་ལང་ ངོ་།།
སྨྲས་པ།
དོན་མིན་རྙོག་མ་མཐའ་དག་དགྲུང་བྱེད་ཅིང་།།
དོན་གྱི་བཞིན་རས་ཡོངས་རྫོགས་གསལ་མཐོང་བ།།
ནོར་བུ་ཀེ་ཏ་ཀ་ཡི་མེ་ལོང་དང་།།
མཚུངས་པའི་གཏམ་འདི་བློ་ལྡན་དགའ་སྐྱེ་ཡིན།།ཞེས་སོ།།
གསུམ་པ་ཨི་ལྡན་གྱི་རྣམ་དབྱེ་འཆད་པ་ལ།མདོར་བསྟན་དང་རྒྱས་པར་བཤད་པ་གཉིས།དང་པོ་ནི།
རྗེས་འཇུག་ཡི་གེ་བཅུ་པོ་ལ།།ཨི་དང་མཐུན་ལུགས་འདི་ཞེས་བྱ།།
ཞེས་པ་སྟེ།རྗེས་འཇུག་ཡི་གེ་བཅུ་པོ་དེ་དག་གང་རུང་རྗེས་སུ་ཞུགས་པའི་མིང་
རྣམས་ལ།ཨི་ཡིག་དང་སྦྱར་བའི་རྣམ་དབྱེའི་ཕྲད་རྣམས་ཇི་ལྟར་མཐུན་པར་སྦྱོར་བའི་
ལུགས་ནི་འདི་དང་འདིའོ་ཞེས་བསྟན་པར་བྱའོ།།ཞེས་སོ།།
གཉིས་པ་ལ།འབྲེལ་སྒྲ་བཤད་པ་དང་།བྱེད་པ་པོའི་སྒྲ་བཤད་པའོ།།དང་པོ་ནི།
དང་པོ་གཉིས་ལ་དང་པོ་མཐུན།།གསུམ་ལྔ་བཅུ་ལ་ཀྱ་དང་སྦྱར།།
བདུན་པ་ཉིད་ལ་བདུན་པ་སྟེ།།ལྷག་མ་རྣམས་ལ་གྱ་སྦྱར་བ།།
དེ་དག་ཨི་སྦྱར་འབྲེལ་བའི་ས།།
ཞེས་གསུངས་ཏེ།རྗེས་འཇུག་བཅུའི་དང་པོ་ག་དང་ང་གཉིས་གང་རུང་རྗེས་སུ་ཞུགས་
པའི་མིང་རྣམས་ལ་ནི།རྗེས་འཇུག་དང་པོ་ག་ཉིད་མཐུན་ཞིང་།དེ་བཞིན་དུ་རྗེས་འཇུག་
གསུམ་པ་ད།ལྔ་པ་བ།བཅུ་པ་ས་རྣམས་རྗེས་སུ་ཞུགས་པ་ལ་ཀྱ་དང་སྦྱར་བ་དང་།བདུན་པ་འ་
ཡིག་གི་མཐའ་ཅན་རྣམས་ལ་དངོས་སུ་འ་ཡིག་ཡོད་དམ་མེད་ཀྱང་རུང་བདུན་པ་འ་ཉིད་སྦྱར་
བ་དང་།འདིར་རྗེས་འཇུག་གི་ཡི་གེའི་བྱ་བ་གཙོ་བོར་བསྟན་པས་དངོས་སུ་མི་འབྱུང་
ཡང་འ་ཡིག་གི་མཐར་རྐང་པ་ཁ་སྐོང་དགོས་པའི་ཚེ་ཡ་ཡིག་སྦྱར་བ་དང་།དེ་དག་ལས་གཞན་ ལྷག་མ་ན་མ་ར་ལ་བཞི་པོའི་མཐའ་ཅན་རྣམས་ལ་ནི་གྱ་ཉིད་དང་སྦྱར་བ་མཐུན་པ་བཅས།དེ་
དག་ཐམས་ཅད་ལ་རིམ་པ་བཞིན་ཨི་ཡིག་སྟེ་གི་གུ་སྦྱར་བས།གི།ཀྱི།འི།ཡི།གྱི་རྣམས་
སུ་གྲུབ་པ་དེ་རྣམས་གང་ཞིག་གང་དང་སྒྲ་མཐུན་པའི་མིང་མཐའ་སོ་སོ་དང་སྦྱར་བས།
བདག་གི།གང་གི།ཐམས་ཅད་ཀྱི།རབ་ཀྱི།ཕྱོགས་ཀྱི།དེའི།དེ་ཡི།གཏན་གྱི།ལམ་གྱི།གསེར་
གྱི།དཔལ་གྱི་སོགས་སུ་འགྱུར་ཏེ་དེ་དག་ནི་གཞུང་གཞན་དུ་རྣམ་དབྱེ་དྲུག་པ་ཞེས་
འབྱུང་བ་རྟེན་དང་བརྟེན་པའམ་ཡན་ལག་དང་ཡན་ལག་ཅན་སོགས་མི་དོན་ཕན་ཚུལ་འབྲེལ་བ་
བརྗོད་པའི་དོན་ཅན་གྱི་སྒྲ་ཡིན་པས་འབྲེལ་བའི་ས་ཞེས་བྱའོ།།ཞེས་པའོ།།འདིར་ཡིག་
རྙིང་དག་པ་རྣམས་སུ་ད་དྲག་ཅན་གྱིས་ཀྱི་ཉིད་དྲངས་པ་མཐོང་མོད་ཀྱི་དེང་སང་ད་
དྲག་མི་མཛད་པས་ཕལ་ཆེར་གྱི་ཉིད་སྦྱོར་བར་སྣང་ཡང་ཕྲད་གཞན་དང་བསྟུན་ན་ཀྱི་རང་
འདྲེན་པ་བརྗོད་བདེ་ཞིང་ལེགས་པར་སེམས་པས།ཀུནད་ཀྱི།རབ་འབྱོརད་ཀྱི།བཀའ་སྩལད་
ཀྱི།སོགས་སུ་སྦྱར་བར་བྱའོ།།འབྲེལ་སྒྲ་དེ་དག་ཚིག་གྲོགས་དང་ཇི་ལྟར་སྦྱོར་
བའང་།བདག་གི་ནོར།གང་གི་དྲིན།ཐམས་ཅད་ཀྱི་དོན།རབ་ཀྱི་ཕུལ།ཕྱོགས་ཀྱི་གླང་པོ།
དེའི་ཚུལ།དེའི་ཕྱོགས་སུ་ཅི་ཞིག་ལྷུང་།གཏན་གྱི་དོན།ལམ་གྱི་ཡོན་ཏན།གསེར་གྱི་
རྒྱན།དཔལ་གྱི་བེའུ།ཀུནད་ཀྱི་མཆོག།རབ་འབྱོརད་ཀྱི་ཚུལ།བཀའ་སྩལད་ཀྱི་སྙིང་པོ་
སོགས་ཏེ་རྟོགས་པར་སླའོ།།གི་ལ་སོགས་པ་དེ་རྣམས་རྣམ་དབྱེའི་དོན་མ་ཡིན་པ་གཞན་
ལའང་འཇུག་པ་ཡོད་དེ།འདི་ནི་བདེན་གྱི་གཞན་ནི་གཏི་མུག་གོ།བདག་ཅག་གི་སྐྱབས་ནི་
སྟོན་པ་སངས་རྒྱས་ཡིན་གྱི་དྲག་པོ་སོགས་མ་ཡིན་ནོ།།འདི་ལྟར་འཐད་མོད་ཀྱི་འོན་
ཀྱང་།ཞེས་པ་ལྟ་བུ་ཕྱི་ཚིག་འགལ་བའམ་མི་མཐུན་པར་སྟོན་པའི་ཚིག་གི་རྒྱན་ལའང་ འཇུག་པའི་ཕྱིར་རོ།།
གཉིས་པ་བྱེད་པ་པོའི་སྒྲ་ནི།
དེ་ཉིད་ལ་ནི་བཅུ་པ་སྦྱར།།བྱེད་པ་པོ་རུ་ཤེས་པར་བྱ།།
ཞེས་པས་བསྟན་ཏེ།སྔར་བཤད་པའི་རྣམ་དབྱེ་དྲུག་པའི་སྒྲ་གི་ལ་སོགས་པ་དེ་དག་
ཉིད་ལ་རྗེས་འཇུག་བཅུ་པ་ས་ཡིག་སྦྱར་བས།གིས།ཀྱིས།འིས།ཡིས།གྱིས་རྣམས་སུ་གྲུབ་
པ་ནི་བྱེད་པ་པོས་བྱ་བ་ལ་སྦྱོར་བ་སྟོན་པས་ན་གཞུང་གཞན་དུ་རྣམ་དབྱེ་གསུམ་པ་
ཞེས་འབྱུང་བ་བྱེད་པ་པོའི་ས་རུ་ཤེས་པར་བྱའོ།།ཞེས་སོ།།དེ་རྣམས་མིང་མཐར་སྦྱོར་
ཚུལ་ནི་འབྲེལ་སྒྲའི་སྐབས་དང་མཚུངས་པས།བདག་གིས།གང་གིས།ཐམས་ཅད་ཀྱིས།རབ་ཀྱིས།
ཕྱོགས་ཀྱིས།དེའིས།དེ་ཡིས།གཞན་གྱིས།ལམ་གྱིས།གསེར་གྱིས།དཔལ་གྱིས།ཀུནད་ཀྱིས།
རབ་འབྱོརད་ཀྱིས།ཟིལད་ཀྱིས།ལ་སོགས་པར་འགྱུར་ཏེ་རྟོགས་པར་སླ་མོད།འོན་ཀྱང་འ་
མཐར་འིས་ཞེས་པ་སྐད་གསར་བཅད་ཀྱི་ལུགས་ལ་མི་འབྱུང་བ་ནི་ཡི་གེ་ཟོར་ཡང་བའི་ཆེད་
དུ་འ་མཐའ་ཕལ་ཆེར་བསྡུས་པ་བཞིན་འིས་ཞེས་པའི་འི་ཡིག་ཕྱིས་ནས་བསྡུས་པར་ཟད་ཀྱི་
ཐོབ་ཐང་མེད་པས་ནི་མ་ཡིན་པར་ཤེས་དགོས་དེ་གཞུང་འདིར་བསྟན་པར་མ་ཟད་ཆོས་རྒྱལ་
མེས་དབོན་དུས་ཀྱི་རྡོ་རིང་གི་ཡི་གེ་སོགས་ལའང་དེ་ལྟར་སྣང་བ་མངོན་སུམ་གྱིས་
གྲུབ་པའི་ཕྱིར་རོ།།བྱེད་པ་པོའི་སྒྲ་དེ་རྣམས་ཚིག་གྲོགས་དང་ཇི་ལྟར་སྦྱོར་
བའང་།བདག་གིས་བསྟན།གང་གིས་བསྒྲུབས།ཐམས་ཅད་ཀྱིས་འདུད།རབ་ཀྱིས་བཀུར།ཕྱོགས་ ཀྱིས་དབྱེ།དེའིས་མཚོན།ཞེས་སམ།སྐད་གསར་བཅད་ལྟར་ན།དེས་མཚོན།དེ་ཡིས་ཐམས་ཅད་
དབང་དུ་བྱེད།གཞན་གྱིས་གསོས།ལམ་གྱིས་འཚོ།གསེར་གྱིས་བྱུག།དཔལ་གྱིས་བརྒྱན།
ཀུནད་ཀྱིས་སྐྱོང་།རབ་འབྱོརད་ཀྱིས་གསོལ།ཟིལད་ཀྱིས་མནན།ཞེས་སོགས་རྒྱ་ཆེར་
སྦྱར་ནས་ཤེས་པར་བྱའོ།།
སྨྲ་སྒོ་ལས།གིས་ལ་སོགས་པ་འདི་རྣམས་མི་མཐུན་པའི་རྒྱན་ལ་འཇུག་པར་བཤད་ཀྱང་
འཐད་པར་མ་མཐོང་སྟེ།དེའི་དཔེར་བརྗོད་དུ།དེ་ལྟ་ཡིན་མོད་ཀྱིས་ཞེས་དང་།འོན་
གྱིས་ཀྱང་།ཞེས་བཀོད་པའི་སྔ་མའི་ཞེན་དོན་ལ་བརྟགས་ན།རྟག་པར་ཡོད་ཀྱིས།མི་རྟག་
པར་མ་ཡིན་ནོ།།ཞེས་པ་ལྟ་བུ་ལ་བསམས་པར་སྣང་ཡང་།དེ་འདྲའི་ཀྱིས་སོགས་ཀྱི་སྒྲ་
དེ་རྒྱུ་མཚན་གྱི་དོན་གྱི་བྱེད་པ་པོའི་རྣམ་དབྱེ་ཡིན་གྱི་མི་མཐུན་པའི་རྒྱན་མ་
ཡིན་པའི་ཕྱིར་དང་།ཕྱི་མ་དེའི་ཞེན་དོན་ལ་བརྟགས་ན་བསྒྲུབ་ཏུ་རུང་གིས་ཀྱང་མི་
བསྒྲུབ་བོ།།ལྟ་བུ་ལ་བསམས་པས་སྣང་ཡང་དེ་འདྲའི་མི་མཐུན་པའི་རྒྱན་དུ་གྱུར་པའི་
སྒྲ་ནི་ཀྱང་ཞེས་པ་ཡིན་གྱི་གིས་ཀྱི་སྒྲ་མ་ཡིན་ཏེ།དེའང་རྒྱུ་མཚན་གྱི་དོན་ཅན་
ཡིན་པའི་ཕྱིར་རོ།།དེས་ན་འདི་འདྲའི་རིགས་རྣམས་དང་།བྱེད་དུ་རུང་གིས་གྱིས་ཤིག།
ལྟ་བུའི་བྱེད་པ་པོའི་སྒྲ་རྣམས་ནི་རྒྱུ་མཚན་གྱི་དོན་དུ་ཤེས་པར་བྱའོ།།སྐབས་
འདིར་འགྲེལ་བྱེད་ཁ་ཅིག་གིས།ཁྲུས་ཀྱིས་ལྟ་བུའང་བྱེད་པ་པོའི་སྒྲ་རུ་འཁྲུལ་བ་
མཐོང་མོད་ཀྱི་བླུན་པོའི་ཉམས་སུ་རྟོགས་པར་སླ་བ་ཉིད་དོ།།
བཞི་པ་རྒྱན་སྡུད་ཀྱི་སྒྲ་ནི།
ཨཱ་ལི་ཕྱིས་ནས་གཉིས་པ་སྦྱར།།ཚིག་རྒྱན་གཉིས་དང་སྡུད་པར་འགྱུར།།
ཞེས་པས་བསྟན་ཏེ།གོང་དུ་བཤད་པའི་འབྲེལ་སྒྲ་དེ་དག་ལས།ཀྱི།འི།གཉིས་ཀྱི་ཨཱ་
ལི་སྟེ་གི་གུ་ཕྱིས་ནས་སོ་སོར་རྗེས་འཇུག་གཉིས་པ་ང་ཡིག་སྦྱར་བས།ཀྱང་།འང་།ཞེས་
པར་གྲུབ་པ་དང་།འདིར་མ་བསྟན་ཀྱང་དོན་གྱིས་ཐོབ་པའི་ཡང་གི་སྒྲ་དང་བཅས་གསུམ་པོ་
དེ་རྣམས་ནི་ཚིག་ཕྱི་མ་མཐུན་པའམ་མི་མཐུན་པར་སྟོན་པའི་ཚིག་རྒྱན་གཉིས་དང་།
གཞིའམ་དོན་གཞན་ཞིག་ལ་སྡུད་ཅིང་སྦྱོར་བའི་སྒྲར་འགྱུར་རོ།།ཞེས་སོ།།དེ་རྣམས་
མི་མཐར་ཇི་ལྟར་སྦྱོར་བའི་ཚུལ་ནི།རྗེས་འཇུག་གི་ཕོ་ཡིག་ག་ད་བ་ས་རྣམས་དང་ད་
དྲག་གི་མཐར་རྟགས་མཚུངས་བརྗོད་བདེ་གཉིས་ཀའི་སྒོ་ནས་སྒྲ་མཐུན་པ་ཀྱང་ཉིད་སྦྱར་
ཞིང་དེ་བཞིན་དུ་དངོས་སུ་ཡོད་མེད་ཇི་ལྟར་རུང་འ་མཐའ་ཅན་རྣམས་ལ།འང་དང་།ང་མ་དག་
གི་མཐར་ཡང་གི་སྒྲ་འཇུག་པ་དང་།ན་ར་ལ་གསུམ་གྱི་རྗེས་སུ་བརྗོད་བདེ་ཁོ་ནའི་དབང་ གིས་ཡང་ཉིད་འཇུག་གོ།ཚིགས་བཅད་ཀྱི་རྐང་བ་ཁ་སྐོང་དགོས་པའི་ཚེ་ནི་འ་མཐར་ཡང་།
ཡང་གི་སྒྲ་སྦྱར་དགོས་སོ།།དཔེར་ན།རྟག་ཀྱང་།བཅད་ཀྱང་།བཀབ་ཀྱང་།བྱས་ཀྱང་།
བསྟནད་ཀྱང་།འབྱོརད་ཀྱང་།སྩལད་ཀྱང་།ལྷའང་།ལྷ་ཡང་དུས་སུ་ཆར་འབེབས་ཤིང་།གང་
ཡང་།ལམ་ཡང་།ཡིན་ཡང་།ཆར་ཡང་།གསལ་ཡང་།ལྟ་བུ་རྒྱ་ཆེར་ཤེས་པར་བྱའོ།།
དེ་དག་དོན་ལ་ཇི་ལྟར་སྦྱོར་བའི་ཚུལ་ཡང་མཐུན་པའི་ཚིག་རྒྱན་དུ་སྦྱོར་ན།གསལ་
ཡང་གསལ།མཛེས་ཀྱང་མཛེས།ལྟ་བུ་དང་།མི་མཐུན་པའི་རྒྱན་དུ་སྦྱོར་ན།བཏུད་ཀྱང་ཁྲོ།
མཛའང་བསླུ།ལྟ་བུ་དང་།སྡུད་པའི་དོན་དུ་སྦྱོར་ན།གཟུགས་འདི་ནི་མཛེས་ཤིང་འོད་
ཀྱང་འཕྲོ།མར་མ་ཟད་ལྷས་ཀྱང་བཏུད་དོ།།འདི་ནི་ཨུཏྤལའང་ཡིན་ལ་སྔོན་པོའང་ཡིན་
ནོ།།གང་ཡང་ཕྱོགས་བཅུའི་བདེ་གཤེགས་ཐམས་ཅད་ལ།།ཞེས་སོགས་མང་དུ་བསྒྲེས་ནས་
རྟོགས་པར་བྱའོ།།
འདིར་ལ་ལ་ཞིག་གིས།མཐུན་པའི་རྒྱན་གྱི་དཔེར།ཨུཏྤལའང་ཡིན་ལ་སྔོན་པོའང་ཡིན་
ཞེས་དང་།གཅིག་ཤོས་ཀྱི་དཔེར།ཇི་ལྟར་པདྨ་ཆུ་ནང་དུ།།སྐྱེས་ཀྱང་ཆུ་ཡིས་གོས་པ་
མེད།།དེ་བཞིན་འདི་ནི་འཇིག་རྟེན་དུ།།སྐྱེས་ཀྱང་འཇིག་རྟེན་གྱིས་མ་གོས།།ཞེས་
སོགས་བཀོད་མོད།འཐད་པར་མ་མཐོང་སྟེ།སྔ་མ་ནི།གཞི་གཅིག་ལ་མཐུན་པའི་ཆོས་ཨུཏྤལ་
དང་སྔོན་པོ་གཉིས་སྡུད་པའི་དོན་ཡིན་ལ།ཕྱི་མ་ནི་གཞི་གཅིག་ལ་མི་མཐུན་པའི་ཆོས་
ཆུ་ནང་དུ་སྐྱེས་པ་དང་ཆུས་མ་གོས་པ་གཉིས་སྡུད་པ་སོགས་ཀྱི་དོན་ཡིན་པའི་ཕྱིར་
དེ་དག་སྡུད་པའི་དཔེར་འོས་ཀྱི།ཚིག་རྒྱན་གྱི་དཔེར་མི་འོས་པའི་ཕྱིར་རོ།།དེས་ན་
ངེས་མེད་ཀྱི་དཔེ་དང་།སྨད་པའི་དཔེ་སོགས་སྙན་ངག་གི་རྒྱན་འགའ་ཞིག་ཚིག་རྒྱན་
གཉིས་ཀྱི་དཔེར་སྨོས་པའང་དེ་དང་འདྲའོ།།ཡང་སྨྲ་སྒོ་ལས།ཡང་ཞེས་བྱ་བ་བསྣན་པའང་ ཡིན།།ཞེས་འབྱུང་བར་སྡེབ་བཅོས་ནས་བརྣན་པ་ཞེས་བཏོན་ཏེ་ཁུངས་སུ་དྲངས་ནས།ཡང་དང་
ཡང་དུ་གསུང་བ་གང་།།ཞེས་སོགས་བསྐྱར་བའམ་བརྣན་པའི་དོན་དུ་བཤད་མོད།བརྣན་པ་ནི་
དམིགས་འཛིན་པའི་དོན་ཡིན་པས་བསྐྱར་བ་དང་གཅིག་པའི་སྐབས་མེད་ཅིང་།སྨྲ་སྒོའི་
ཚིག་སྡེབ་མ་བཅོས་པ་དེ་ཉིད་དོན་ལ་གནས་པར།ཡང་ཡང་།སླར་ཡང་།དེ་ནས་ཡང་།ཡང་གསུངས་
པ།ལྟ་བུ་རྣམས་བསྐྱར་བའམ་བསྣན་པའི་སྒྲར་འགྱུར་བ་ཡིན་ནོ།།འོན་ཀྱང་ཡང་གི་སྒྲ་
དེ་འདྲ་དེ།སྐབས་འདིའི་ཀྱང་སོགས་ཀྱི་སྒྲ་དང་མཚུངས་པ་ནི་མི་སྲིད་དོ།།
ལྔ་པ་ལྷག་བཅས་ཀྱི་སྒྲ་བཤད་པ་ནི།
ལ་དོན་སུ་ལ་ཨུ་ཕྱིས་ནས།།དེ་ལ་གསུམ་པའི་དང་པོ་སྦྱར།།
དེ་ལ་ཨཱ་ལི་གསུམ་པ་སྦྱར།།དེ་ནི་ལྷག་དང་བཅས་པའོ།།
ཞེས་པ་སྟེ།སྔར་བཤད་པའི་ལ་དོན་གྱི་ནང་ཚན་སུ་ཞེས་པ་དེའི་ཨུ་ཡིག་སྟེ་ཞབས་
ཀྱུ་ཕྱིས་ནས་ས་ཞེས་གནས་པ་དེ་ལ་ཀཱ་ལི་སྡེ་བ་གསུམ་པའི་དང་པོ་ཏ་ཡིག་སྦྱར་ཞིང་།
དེ་ལ་སླར་ཡང་སྟེང་དུ་ཨཱ་ལི་གསུམ་པ་སྟེ་འགྲེང་བུ་སྦྱར་བས།སྟེ།ཞེས་གྲུབ་པ་ནི་ མིང་ཚིག་དང་གི་མཐར་སྦྱར་ཡང་བསྟན་བྱའི་ལྷག་མ་འདྲེན་པའི་དོན་དུ་འགྱུར་བས་ལྷག་
མ་དང་བཅས་པའི་སྒྲ་ཞེས་བྱའོ།།ཞེས་སོ།།དེ་ལྟར་གཞུང་འདིའི་དངོས་བསྟན་ལ་སྟེ་
སྒྲ་གཅིག་པུ་ལས་མི་འབྱུང་ཡང་།མིང་མཐའ་སོ་སོ་དང་སྦྱར་བའི་ཚེ་གོང་དུ་སྨོས་པ་
རྣམས་ཀྱི་རིགས་པས་བརྗོད་བདེ་བ་ཁོ་ན་སྦྱོར་གྱི་རྟགས་མཚུངས་ཀྱང་བརྗོད་མི་བདེ་
བ་སྦྱོར་བ་མིན་པས།ཡི་གེ་རྣམས་ཀྱི་ཟུར་ཕྱིན་པར་ཀློག་པའི་དབང་དུ་བྱས་ཏེ།ག་ང་
བ་མ་འ་རྣམས་ཀྱི་མཐར་སྟེ་ཡིག་ས་སྒྲ་དང་ལྡན་པ་དེ་བརྗོད་བདེ་བས་འཇུག་ཀྱང་།ན་ར་
ལ་གསུམ་དང་ད་དྲག་གི་མཐར་ནི་དེ་ཤིན་ཏུ་བརྗོད་མི་བདེ་བའི་ཕྱིར་དང་།ས་ཡིག་གི་ མཐར་ནི་ས་སྒྲ་སྔ་མ་དེ་ཉིད་དང་སྟེ་ཡིག་གི་ས་སྒྲ་གཅིག་ཏུ་འདྲེས་པས་སོ་སོར་མི་
མངོན་པའི་ཕྱིར་དགོས་པ་མེད་པས།དེ་རྣམས་ཀྱི་མཐར་ས་ཡིག་ཕྱིས་ནས་ཏེ་རྐྱང་ཉིད་
སྦྱར་བ་གཞུང་འདིའི་དགོངས་པར་དོན་ཐོབ་ཏུ་གནས་ཤིང་།དེ་བཞིན་དུ་ད་མཐར་ཡང་ས་
སྒྲ་ཅན་ཀློག་མ་བདེ་བ་མ་ཟད།དེ་སྒྲ་འཇུག་ཡུལ་གཞུང་འདིའི་དགོངས་པ་དང་།སྨྲ་སྒོ་
རྩ་འགྲེལ་མཐུན་པར་སྣང་བས།དེར་དེ་སྒྲ་ལྷག་བཅས་ལ་འཇུག་པར་བཤད་པ།ལ་དོན་གྱི་
སྐབས་སུ་ད་མཐར་དུ་སྦྱོར་བ་ལྟར་ད་ཡིག་གི་མཐར་སྦྱར་བར་རིགས་པའི་ཕྱིར་ན་རྗེས་
འཇུག་གི་ཁྱད་པར་ལ་ལྟོས་པའི་ལྷག་བཅས་ཀྱི་སྒྲ།སྟེ།ཏེ།དེ།གསུམ་དུ་འགྱུར་བ་ཡིན་
ནོ།།གོང་དུ་སྨོས་པའི་ལ་དང་འཆད་འགྱུར་གྱི་ནས་དག་ལྷག་བཅས་ལ་འཇུག་པ་ནི།རྗེས་
འཇུག་གི་ཁྱད་པར་ལ་མི་ལྟོས་པའི་ཕྱིར་ཕྲད་རང་དབང་ཅན་དུ་ཤེས་པར་བྱའོ།།དེས་ན་
སྟེ་ལ་སོགས་པ་གསུམ་མིང་ཚིག་ཅི་རིགས་པའི་མཐར་ཇི་ལྟར་སྦྱོར་བའི་དཔེར་བརྗོད་
པའང་།བཞག་སྟེ།བྱུང་སྟེ།བཀབ་སྟེ།ལམ་སྟེ།བྱ་སྟེ།ཁྱོད་ཀྱི་སྟེ།མདུན་དུ་སྟེ།
ཡིན་ཏེ།འགྱུར་ཏེ།གསལ་ཏེ།བུམ་པར་ཏེ།བསྟནད་སྟེ།གྱུརད་ཏེ།བསལད་ཏེ།བྱས་ཏེ།
བསྒྲུབས་ཏེ།དེ་ཡིས་ཏེ།ཡོད་དེ།བཤད་དེ།ལ་སོགས་པ་རྣམས་ཏེ་རྟོགས་སླ་བར་ཟད་དོ།།
སྨྲ་སྒོ་ལས།
སྟེ་ནི་ལྷག་མ་ཡོད་པ་སྟེ།།མཚམས་སྦྱོར་བ་དང་དམ་བཅའ་དང་།།གཞན་འདྲེན་པ་དང་
གསུམ་དུ་འདོད།།བྱེད་དང་བྱ་བའང་ཡང་ན་ནི།།བྱ་བ་ཉིད་དུ་སྦྱོར་བ་གང་།།ཚིག་གཉིས་
རིམ་མམ་དུས་གཅིག་ཏུ།།སྦྱོར་བར་བྱེད་པ་མཚམས་སྦྱོར་ཡིན།།གང་ཞིག་གིས་ནི་སྔ་མ་
ལ།།གསལ་བར་བྱེད་པ་དམ་བཅའ་བ།།ལྷག་མ་ཡོད་ཙམ་སྟོན་འགྱུར་ཞིང་།།དེ་ལས་གཞན་གྱུར་
གཞན་འདྲེན་པའོ།།ཞེས་འབྱུང་བ་ནི་ཚིག་དོན་ལྷག་མ་འདྲེན་ཚུལ་གྱི་དོན་གྱི་དབྱེ་
བ་བཤད་པ་ཡིན་ཞིང་།ཕལ་ཆེར་ལེགས་བཤད་དུའང་འདུག་པས་འདིར་སྨོས་ན།སྟེ་ལ་སོགས་པ་
དེ་རྣམས་ལྷག་མ་འདྲེན་ཚུལ་གྱི་སྒོ་ནས་དབྱེ་ན་གསུམ་དུ་འགྱུར་ཏེ།མཚམས་སྦྱོར་
དང་།དམ་བཅའ་དང་།གཞན་འདྲེན་ནོ།།དང་པོ་ལ།ཚིག་སྔ་མ་བྱེད་པ་དང་ཕྱི་མ་བྱ་བར་
སྦྱོར་བས་འདྲེན་བྱེད་དང་འདྲེན་བྱ་དུས་རིམ་པར་འཇུག་པ་ཞིག་དང་།སྔ་ཕྱི་གཉིས་ཀ་
བྱ་བར་སྦྱོར་ཞིང་དུས་རིམ་གྱིས་འཇུག་པ་ཞིག་དང་།དེ་ཉིད་ལ་དུས་སྔ་ཕྱི་མེད་པ་
ཞིག་སྟེ་གསུམ་འབྱུང་བའི།སྔ་མ་ནི།མཐའ་འཕངས་ཏེ་ཕོག།ལྷ་བསྒྲུབས་ཏེ་གྲུབ།ལྟ་བུ་
དང་།གཉིས་པ་ནི།ལྷ་མཆོད་དེ་ལས་བྱ།ཕྱག་འཚལ་ཏེ་བཤད།ལྟ་བུ་དང་།ཕྱི་མ་ནི།འཛུམ་ དམུལ་ཏེ་མདངས་ཕྱུང་།འཕར་ཏེ་འགྲོ།ཚེག་སྒྲ་དང་བཅས་ཏེ་འབར།ལྟ་བུ་སྟེ་དེ་རྣམས་
ནི་ནས་དང་ཅིང་སོགས་ཀྱི་ཕྲད་དང་ཡང་འཇུག་པ་མཐུན་ནོ།།དམ་བཅའ་ཞེས་པ་ནི་ཚིག་སྔ་
མ་དམ་བཅས་པ་དེའི་གསལ་བྱེད་དམ་སྒྲུབ་བྱེད་དུ་ཚིག་ཕྱི་མ་འདྲེན་པ་སྟེ།དེའང་
དབྱེ་བ་འདྲེན་པ་དང་།གཏན་ཚིགས་འདྲེན་པ་དང་།ངེས་ཚིག་འདྲེན་པ་དང་།རྒྱས་བཤད་
འདྲེན་པ་སོགས་ནང་གསེས་མང་པོར་འགྱུར་རོ།།དཔེར་ན།དངོས་པོ་ནི་གསུམ་སྟེ།བེམ་པོ་
དང་ཤེས་པ་དང་ལྡན་མིན་འདུ་བྱེད་དོ།།རྟག་པ་ཡིན་ཏེ་ཡོད་པ་གང་ཞིག་འདུས་བྱས་མ་
ཡིན་པའི་ཕྱིར།སངས་རྒྱས་ཏེ་མ་རིག་པའི་གཉིད་སངས་པ་དང་ཤེས་བྱ་ལ་བློ་གྲོས་རྒྱས་
པའོ།།བསླབ་པ་ཀུན་གྱི་གཞི་འཛིན་ཅིང་།།ཞེས་གསུངས་ཏེ།བསླབ་པ་ནི་ལྷག་པ་ཚུལ་
ཁྲིམས་དང་ལྷག་པ་སེམས་དང་ལྷག་པ་ཤེས་རབ་ཀྱི་བསླབ་པ་གསུམ་དུ་ནང་པ་ལ་གྲགས་པ་
དང་།ཕྱི་རོལ་པ་ལའང་ཚངས་པར་སྤྱོད་པའི་བརྟུལ་ཞུགས་ཀྱི་བསླབ་པ་མང་དུ་འབྱུང་བས།
ཞེས་སོགས་རིམ་པར་སྦྱར་བར་བྱའོ།།གཞན་འདྲེན་ནི་མཚམས་སྦྱོར་དང་དམ་བཅའ་གཉིས་སུ་
མི་གཏོགས་པའི་ལྷག་མ་ཡོད་པ་ཙམ་སྟོན་པའི་སྒྲ་གཞན་རྣམས་ཏེ།ཤར་གྱི་ཕྱོགས་ན་དབང་
པོ་སྟེ།།ལྷོ་ཡི་ཕྱོགས་ན་འཆི་བདག་གོ།ཁྱོད་ནི་དཔལ་ཏེ་ཁྱོད་ནི་མགོན།།ལྟ་བུ་ རྣམས་སོ།།
སྐབས་འདིར་འགྲེལ་བྱེད་ཁ་ཅིག་གིས།ལྷག་བཅས་ཀྱི་སྒྲ་སྟེ་ཁོ་ནར་འདོད་པ་ནི་
མི་འཐད་དེ།གོང་སྨོས་ལྟར་རྗེས་འཇུག་འགའ་ཞིག་ལ་སྟེ་སྦྱར་བ་ཀློག་དཀའ་བའི་
སྐྱོན་དང་།དེ་ཡིག་ལྷག་བཅས་ཀྱི་དོན་ཅན་འཇུག་པའི་སྐབས་མི་འབྱུང་བའི་སྐྱོན་
དང་།སྔོན་གྱི་གླེགས་བམ་དག་པ་རྣམས་ལ་ཡོངས་སུ་གྲགས་པ་དང་འགལ་བའི་སྐྱོན་ཡང་
ཡོད་པའི་ཕྱིར་རོ།།
དྲུག་པ་འབྱེད་སྡུད་ནི།
རྗེས་འཇུག་ཡི་གེ་བཅུ་པོ་ལ།།དྲུག་པ་སྦྱར་ན་འབྱེད་སྡུད་ཡིན།།
ཞེས་པས་བསྟན་ཏེ།རྗེས་འཇུག་གི་ཡི་གེ་བཅུ་པོ་དེ་རྣམས་ལ་དེ་ཉིད་ཀྱི་དྲུག་པ་
མ་ཡིག་སྦྱར་བས།གམ།ངམ།དམ།ནམ།བམ།མམ།འམ།རམ།ལམ།སམ།རྣམས་སུ་གྲུབ་པ་དེ་དག་དང་།སྔ་
མ་རྣམས་ཀྱི་རིགས་པས་དོན་གྱིས་ཐོབ་པའི།ཏམ།བཅས་བཅུ་གཅིག་པོ་རྣམས་ནི།ཚིག་དོན་
སོ་སོར་འབྱེད་པའམ་ཕྱོགས་གཅིག་ཏུ་སྡུད་པའི་སྒྲར་འཇུག་པ་ཡིན་ནོ།།ཞེས་སོ།།དེ་
རྣམས་མིང་ཚིག་གང་གི་མཐར་ཡང་རུང་སླར་བསྡུའི་སྐབས་དང་མཚུངས་པར་སྤྱིར་བཏང་
རྗེས་འཇུག་སོ་སོར་རང་རང་ལ་མ་ཡིག་སྦྱར་བ་ཉིད་འཇུག་པ་མཐུན་པ་ཡིན་ཡང་།དམིགས་
བསལ་ད་དྲག་ཅན་རྣམས་ཀྱི་མཐར་ཏམ་ཡིག་སྦྱོར་ཏེ།དེ་དག་རིམ་པས་དཔེར་བརྗོད་ན།རྟག་
གམ།མཐོང་ངམ།ཡོད་དམ།ཡིན་ནམ།སྒྲུབ་བམ།སྒོམ་མམ།རིགས་ཀྱི་བུའམ།འདི་ཉིད་དུའམ།
གསེར་རམ།མཚལ་ལམ།བྱས་སམ།ཁྱོད་ཀྱིས་སམ།འཛིནད་ཏམ།གྱུརད་ཏམ།འཚལད་ཏམ།སོགས་སོ།།
དེ་དག་དོན་ལ་ཇི་ལྟར་སྦྱོར་བའི་ཚུལ་ཡང་།དབྱེ་གཞི་གཅིག་ལས་བྱེ་བྲག་གཉིས་སམ་
མང་པོར་འབྱེད་པ།ཆོས་ནི་གཉིས་ཏེ།འདུས་བྱས་སམ།འདུས་མ་བྱས་སོ།།ཕུང་པོ་ནི་ལྔ་
སྟེ།གཟུགས་སམ།ཚོར་བའམ།འདུ་ཤེས་སམ།འདུ་བྱེད་དམ།རྣམ་པར་ཤེས་པའི་ཕུང་པོའོ།།ལྟ་
བུ་དང་།ཚིག་དོན་གཉིས་སམ་མང་པོ་དོན་གཅིག་ཏུ་སྡུད་པ།འདུས་བྱས་སམ་འདུས་མ་བྱས་
ནི་ཆོས་སོ།།གཟུགས་སམ་ཚོར་བའམ་འདུ་ཤེས་སམ་འདུ་བྱེད་དམ་རྣམ་པར་ཤེས་པ་ནི་ཕུང་
པོའོ།།ལྟ་བུ་རྒྱ་ཆེར་ཤེས་པར་བྱའོ།།འཇིག་རྟེན་མཐའ་དང་ལྡན་ནམ་མི་ལྡན།རྟག་གམ་
མི་རྟག།ལྟ་བུ་དྲི་བ་དང་ཐེ་ཚོམ་གྱི་ཚིག་ཅན་རྣམས་ཀྱང་དོན་གྱི་ཁྱད་པར་བརྟག་
ཅིང་འབྱེད་པའི་དོན་ཅན་ཡིན་པས།དེ་འདྲའི་འམ་ལ་སོགས་པའི་སྒྲའང་འབྱེད་པའི་སྒྲ་ ཉིད་དུ་ངེས་སོ།།
ཁ་ཅིག་སྐབས་འདིར་ཡང་།རྗེས་འཇུག་ད་བ་ས་རྣམས་ཀྱི་རྗེས་སུ་ཏམ་འཇུག་པར་འདོད་ཀྱང་རྟགས་མཚུངས་འདྲེན་པའི་རིགས་འགྲེ་ཐལ་ཆེས་པར་ཟད་དོ།།
བདུན་པ་འབྱུང་ཁུངས་ལ།དངོས་དང་།དེ་དགར་སྡུད་ལ་འཇུག་པའི་ཚུལ།མ་བཤད་པ་ཁ་སྐོང་ཞིང་འདོད་པ་གཞན་ལ་ཅུང་ཟད་དཔྱད་པ་སྟེ་གསུམ།དང་པོ་ནི།
རྗེས་འཇུག་ཡི་གེ་བཅུ་པོ་ཡི།།བཞི་པ་དགུ་པ་ལ་བཅུ་པ།།སྦྱར་བ་འབྱུང་ཁུངས་ས་ཡིན་ཏེ།།
ཞེས་པས་བསྟན་ལ།རྗེས་འཇུག་ཡི་གེ་བཅུ་པོ་དེའི་བཞི་པ་ན་དང་དགུ་པ་ལ་གཉིས་ལ་
སོ་སོར་བཅུ་པ་ས་ཡིག་སྦྱར་བས།ནས།ལས།ཞེས་གྲུབ་པ་ནི་ཆོས་གང་ལས་གང་ཞིག་བྲལ་བའམ་
བྱུང་བ་སྟོན་པའི་དོན་དུ་མཚུངས་པར་འཇུག་པས་གཞུང་གཞན་དུ་རྣམ་དབྱེ་ལྔ་པ་ཞེས་
བཤད་པ་འབྱུང་ཁུངས་ཀྱི་ས་ཡིན་ནོ།།ཞེས་སོ།།ཏེ་ཞེས་པའི་ཚིག་ལྷག་མ་འདྲེན་པའི་
དོན་ཏོ།།དེ་དག་ཕྲད་རང་དབང་ཅན་ཡིན་པས་སྦྱོར་ཚུལ་རྗེས་འཇུག་གི་ཁྱད་པར་ལ་མི་
ལྟོས་པར་མིང་མཐའི་རྗེས་འཇུག་ཐམས་ཅད་ཀྱི་མཐར་ཅི་རིགས་པར་སྦྱར་བར་བྱའོ།།
འབྱུང་ཁུངས་ཀྱི་དོན་ལ་ཇི་ལྟར་འཇུག་པ་ནི་དཔེར་ན།སངས་རྒྱས་ལས་ཆོས་ཆོས་ལས་
འཕགས་པའི་ཚོགས།།ཚོགས་ལས་སྙིང་པོ་ཡེ་ཤེས་ཁམས་ཐོབ་མཐར།།ཞེས་དང་།གསེར་ཁ་ནས་
གསེར།རྒྱ་མཚོ་ནས་ནོར་བུ།བ་ལས་འོ་མ།མཁས་པ་ལས་རིག་པ།ལྟ་བུ་དང་།འབྱུང་ཁུངས་
དངོས་མ་ཡིན་ཡང་སྐབས་དེར་དེ་ལས་བྱུང་བས་འབྱུང་ཁུངས་དང་འདྲ་བ།རྟ་ལས་ལྷུང་།རི་
ལས་ལྷུང་།སྐས་ནས་བབས།ཤར་ཕྱོགས་ནས་འོད་སྣང་ལྟ་བུ་རྣམས་སུ་ཤེས་པར་བྱའོ།།ཡང་
དུ་བ་ལས་མེར་ཤེས།ཆུ་སྐྱར་ལས་ཆུར་ཤེས།སྐྱེ་ཞིང་འཇིག་པ་ལས་དངོས་པོར་རྟོགས།ལྟ་
བུ་ལས་ཀྱི་སྒྲ་ཁོ་ན་རྒྱུ་མཚན་ལ་འཇུག་པ་ཡོད་ཀྱང་།མེར་ཤེས་པ་སོགས་རྒྱུ་མཚན་
ཅན་དེ་དུ་བ་མཐོང་བ་སོགས་ཀྱི་རྒྱུ་མཚན་ལས་བྱུང་བའི་ཕྱིར་འབྱུང་ཁུངས་དང་འདྲ་
བའི་རྣམ་དབྱེ་ལྔ་བ་ཉིད་དོ།།
གཉིས་པ་ནི།
དགར་དང་སྡུད་པའང་དེ་བཞིན་ཡིན།།
ཞེས་པས་བསྟན་ཏེ།བཤད་མ་ཐག་པའི་ལས་ནས་ཀྱི་སྒྲ་དེ་དག་འབྱུང་ཁུངས་ཁོ་ནར་མ་
ཟད།རྣམ་དབྱེ་སྦྱར་གཞི་དེ་ལས་རིགས་དང་བྱ་བ་ཡོན་ཏན་རྣམས་ཀྱི་ཁྱད་པར་གང་ཡང་
རུང་བ་ལོགས་སུ་དགར་བའི་དོན་ལའང་འཇུག་ཅིང་།དེ་ལས་ནས་ཀྱི་སྒྲ་གཅིག་པུ་ནི་ཡུལ་
དང་དུས་དང་དངོས་པོ་ལ་སོགས་པ་མཚམས་འཛིན་ཅིང་སྡུད་པའི་དོན་དུའང་དེ་བཞིན་དུ་
འཇུག་པ་ཡིན་ནོ།།ཞེས་པའོ།།དེ་དག་དབྱེ་བ་དང་བཅས་ཏེ་དཔེར་བརྗོད་ན།རིགས་དང་བྱ་
བ་ཡོན་ཏན་རྣམས་ཀྱི་ཁྱད་པར་གྱིས་གཞི་གཅིག་ལས་དགར་བ་ནི།མིའམ་ཅི་ལས་དྲི་ཟ་ཐ་
དད་དོ།།བཤེས་གཉེན་ངན་པ་ལ་བཀུར་སྟི་བྱེད་པ་ལས་ལྷ་མཆོད་པ་ཉིད་ལེགས།ཡང་སོས་ལས་
ཐིག་ནག་པ་སྡུག་བསྔལ་ཆེ།ལྷ་ཆེན་པོ་ལས་བདེ་བར་གཤེགས་པ་ཡོན་ཏན་དུ་མས་འཕགས་སོ།།
ཞེས་པ་ལྟ་བུ་སྟེ་འདི་འདྲའི་རིགས་ལ་ལས་ཀྱི་སྒྲ་ཉིད་འཇུག་གོ།དེ་བཞིན་དུ་གཞི་
གཉིས་སམ་མང་པོ་ལས་ཀྱང་རུང་།དེ་དག་གི་ནང་ནས་ཕྱུང་བ་ལྟ་བུ་མ་ཡིན་པར་ལོགས་སུ་
དགར་བ་ཙམ་གྱི་དོན་ལའང་ལས་ཀྱི་སྒྲ་ཉིད་འཇུག་སྟེ།རྟག་པ་དང་དངོས་པོའི་ཆོས་ལས་
དེ་བཞིན་ཉིད་གཞན་ནོ།།ཟ་བ་དང་དགོད་པ་དང་སྨྲ་བ་དང་འགྲོ་བ་ལ་སོགས་པ་སྤྱོད་ལམ་
ཕལ་བ་རྣམས་ལས་མཆོད་རྟེན་ལ་ཕྱག་དང་སྐོར་བ་བྱེད་པ་ལེགས་སོ།།ཁ་དོག་རྣམས་ལས་
དཀར་པོ་ཉིད་མཛེས་སོ།།ལྟ་བུའོ།།རིགས་སོགས་ཀྱི་ཁྱད་པར་གྱིས་ཚོགས་ཀྱི་ནང་ནས་
འབྱིན་པ་ལྟ་བུར་དགར་བ་ནི།མི་རྣམས་ཀྱི་ནང་ནས་རྒྱལ་རིགས་དཔའ།གསེར་དངུལ་གཉིས་
ཀྱི་ནང་ནས་གསེར་གོང་ཆེ།རིགས་བཞིའི་ནང་ནས་དམངས་རིགས་དམན།བ་རྣམས་ཀྱི་དཀྱིལ་
ནས་ནག་མོ་འོ་མ་མང་།བྱ་བ་རྣམས་ཀྱི་ནང་ནས་སངས་རྒྱས་བཅོམ་ལྡན་འདས་ལ་མཆོད་པ་ནི་
ཕུལ་དུ་བྱུང་བའོ།།ལྟ་བུ་སྟེ་འདི་འདྲ་ལ་ནས་ཉིད་འཇུག་གོ།ནས་ཀྱི་སྒྲ་སྡུད་པ་ལ་
འཇུག་པ་ནི།ལྷ་ས་ནས་གཞིས་ཀ་རྩེའི་བར།མནར་མེད་ནས་སྲིད་རྩེའི་བར།དེང་ནས་སང་ཉི་
མ་མ་ཤར་གྱི་བར།གཟུགས་ནས་རྣམ་མཁྱེན་གྱི་བར།གཅིག་ནས་བརྒྱའི་བར།ལྟ་བུའོ།།དེ་
ལྟར་དགར་སྡུད་ལ་འཇུག་པའི་སྒྲ་འདི་རྣམས་ཀྱང་འཕྲད་གཞན་མ་ཡིན་པར་རྣམ་དབྱེ་ལྔ་
པའི་ཡན་ལག་ཉིད་དུ་ཤེས་དགོས་ཏེ།དགར་བ་ནི་གང་ལས་དགར་བའི་གཞི་དེ་ལས་ཁྱད་པར་དུ་
བྱུང་བ་ལྟར་སྣང་བ་དང་།སྡུད་པ་ནི་ཐོག་མ་གང་ནས་བརྩམས་པ་དེ་ལས་བསྡུ་རྒྱུའི་
གནས་སྐབས་ཐམས་ཅད་བྱུང་བ་དང་འདྲ་བའི་ཕྱིར་འབྱུང་ཁུངས་ཀྱི་རྣམ་དབྱེ་སྦྱར་བར་
སྣང་བའི་ཕྱིར་རོ།།འོ་ན་འབྱུང་ཁུངས་ཉིད་སྨོས་པས་ཆོག་གོ་སྙམ་ན།འབྱུང་ཁུངས་ལ་
འཇུག་པར་བསྟན་པ་ནི་འབྱུང་ཁུངས་དངོས་དང་།དེ་དང་ཆ་འདྲ་བ་གཙོ་བོ་རྣམས་སྡུད་
པའི་དོན་དང་།དགར་སྡུད་གསུངས་པ་ནི་འབྱུང་ཁུངས་དངོས་དང་ཆ་མཐུན་པ་གཉིས་ཀ་མ་ ཡིན་ཡང་ཚིག་སྦྱོར་ཙམ་གྱིས་ཆ་མཐུན་དང་འདྲ་རུང་དུ་ཡོད་པའི་ཕྱིར་ལྔ་པའི་ཡན་ལག་
ཕལ་བར་གྱུར་གྱུར་པ་རྣམས་སྡུད་པའི་དོན་ཡིན་པས་སྐྱོན་མེད་དོ།།
གསུམ་པ་ནི།
གཞུང་འདིར་མ་བསྟན་ཀྱང་ནས་ཀྱི་སྒྲ་ནི་མཚམས་སྦྱོར་བའི་ལྷག་བཅས་ལའང་འཇུག་པ།
ཕྱག་འཚལ་ནས་བཤད།ལྷ་མཆོད་ནས་ལས་བྱ།ལག་པ་བརྐྱངས་ནས་བཟུང་།མིག་ཕྱེས་ནས་བལྟས།
ལྟ་བུ་སྟེ་ལྷག་བཅས་ཀྱི་སྐབས་སུའང་ཕྱོགས་ཙམ་སྨོས་པ་བཞིན་ནོ།།སྨྲ་སྒོ་ལས།
ལས་ནི་རྒྱུ་དང་འབྱུང་ཁུངས་དང་།།དགར་བ་ཡིན་ཏེ་ནས་དེ་བཞིན།།ཞེས་ལས་ནས་ཀྱི་
སྒྲ་དག་རྒྱུ་ལ་འཇུག་པར་བཤད་ཅིང་།འགྲེལ་བར།རྒྱུའི་དོན་ནི་ས་བོན་ལས་མྱུ་གུ་
ཞེས་པ་ལྟ་བུའོ།།ཞེས་འབྱུང་བ།ཁ་ཅིག་གིས་དེ་འདྲ་དེ་འབྱུང་ཁུངས་དངོས་ཡིན་པར་
བྱས་ནས།འབྱུང་ཁུངས་ལས་ལོགས་སུ་དབྱེ་བ་མི་འཐད་ཅེས་སྨྲས་ཀྱང་།དེ་འབྱུང་ཁུངས་
དངོས་ནི་མ་ཡིན་ཏེ།འབྱུང་ཁུངས་ཀྱི་དོན་གོང་སྨོས་ལྟར།རྒྱ་མཚོ་ནས་ནོར་བུ་ལྟ་
བུ་ནོར་བུའི་འབྱུང་ཁུངས་རྒྱ་མཚོ་ཡིན་ཞིང་ནོར་བུ་མིའི་ལག་ཏུ་བྱུང་བའི་ཚེ་ རྒྱ་མཚོ་ལས་བྱེ་དགོས་པ་དང་།དངོས་སུ་འབྲེལ་བ་བྱེ་མི་དགོས་ཀྱང་རིག་པའི་འབྱུང་
ཁུངས་མཁས་པ་ཡིན་ཞིང་དེ་ལས་སློབ་མས་རིག་པ་ལོབ་པ་ན་རྒྱུད་ཐ་དད་དུ་གྱུར་པས་
བྱེ་བར་སྣང་བ་ལྟ་བུ་ཞིག་ཏེ།བརྡ་སྤྲོད་པའི་གཞུང་རྣམས་སུ་འབྱུང་ཁུངས་ཀྱི་དོན་
འཆད་པ་ན།གང་ལས་འབྲལ་བའམ།ལེན་པའམ།ཞེས་དང་།བྱེ་ཞིང་ལྷུང་བ།ཞེས་དང་།ཨ་པཱ་ད་ན་
ངེས་པར་སྦྱིན་པ་ཞེས་བསྒྱུར་ཀྱང་ཨ་པ་འབྲལ་བ་ཨཱ་ད་ན་ཚུར་ལེན་པ་ཡིན་པས་འབྲལ་
བར་ལེན་པ་ཞེས་སོགས་རྒྱས་པར་འབྱུང་ལ།མྱུ་གུ་ནི་ས་བོན་དང་མེད་ན་མི་འབྱུང་གི་
འབྲེལ་བར་གྲུབ་ཀྱང་ས་བོན་ཉིད་མྱུ་གུར་འགྱུར་བས་ས་བོན་གྱི་སྐབས་ན་མྱུ་གུ་ མེད་ཅིང་མྱུ་གུའི་གནས་སྐབས་ན་ས་བོན་གྱི་གནས་སྐབས་གཏོང་བའི་ཕྱིར་དེ་འདྲའི་
འབྱུང་ཁུངས་ཀྱི་དོན་མེད་པས་སོ།།དེས་ན་དེ་འདྲ་དེ་འབྱུང་ཁུངས་དངོས་མ་ཡིན་ཡང་
དེ་ལས་དེ་སྐྱེ་བའམ་འབྱུང་བ་ཡིན་པའི་ཕྱིར་འབྱུང་ཁུངས་དང་འདྲ་བར་རིགས་པས།གོང་
སྨོས་ཤར་ཕྱོགས་ནས་འོད་སྣང་སོགས་དང་ཕྱོགས་མཚུངས་པར་ཤེས་པར་བྱའོ།།
སྐབས་འདིར་འགྲེལ་བྱེད་ཕལ་ཆེར་གྱིས་དགར་སྡུད་ལ་འཇུག་པའི་ལས་ནས་ཀྱི་སྒྲ་
དག་རྣམ་དབྱེ་ལྔ་བར་མི་འདོད་པར་སྣང་ཡང་མི་འཐད་དེ།རྒྱུ་མཚན་གོང་དུ་སྨོས་པ་
ལྟར་འཐད་པའི་ཕྱིར་ཏེ།ལེགས་སྦྱར་ལའང་ཚོགས་ཀྱི་ནང་ནས་དགར་བ་ལ།ག་བཱཾ་ཀྲྀཥྞཱ་
སཾ་པནྣ་ཀྵི་རཱ།༼བ་རྣམས་ལས་ནག་མོ་འོ་མ་ཕུན་སུམ་ཚོགས།༽ལྟ་བུ་དམིགས་བསལ་དུ་
དྲུག་པ་འཇུག་ཀྱང་།སྤྱིར་བཏང་དགར་བ་ཙམ་ལ།ཏསྨཱཏྲཨ་ནྱསྨིནྲ།༼དེ་ལས་གཞན་དུ།༽ཨ་
ནྱོ་གྲྀ་ཧཱ་དྦི་ཧཱ་རཿ༼ཁང་པ་ལས་གཞན་དུ་གཙུག་ལག་ཁང་།༽ལྟ་བུ་ལྔ་པ་ཉིད་འཇུག་པ་
དང་།མཚམས་བཟུང་ནས་སྡུད་པ་ལའང་།ཨཱ་པཱ་ཊ་ལི་པུ་ཏྲཱཔྲྀཥྚོ་དེ་བཿ༼འདི་ནས་སྐྱ་ ནར་བུའི་ཡུལ་གྱི་བར་དུ་ལྟས་ཆར་འབེབས་སོ།༽།ལྟ་བུ་རྣམ་དབྱེ་སྦྱོར་ཡུལ་སྔ་ཕྱི་
ཅུང་ཟད་མི་འདྲ་བ་ལས།དོན་གྱིས་མཚུངས་པར་ལྔ་བ་འཇུག་པའི་ཕྱིར་དང་།གནས་བརྒྱད་
འགྲེལ་བར་ཡང་ལྔ་པའི་དོན་ནི་གང་ཞིག་ལ་གང་གིས་ཡོད་པ་ལས་དེ་གཞི་དེ་ལས་བྱུང་བ་
དང་བྲལ་བ་དང་དགར་བ་དང་ཁྱད་པར་དུ་བྱེད་ན་གང་ལས་ཞེས་བྱ་བའི་སྒྲ་ཡོད་དེ།ཞེས་
འབྱུང་བ་ལེགས་བཤད་དུ་སྣང་བའི་ཕྱིར་རོ།།
ཡང་ཁ་ཅིག་གིས་ལས་སྒྲ་སྡུད་པའི་དོན་ལ་འཇུག་པར་བཤད་ཅིང་།དཔེར་བརྗོད་དུ་ལས་
སོགས་པ་ཞེས་འགོད་པ་དང་།ལ་སོགས་པ་ཞེས་ཀློག་པ་རྒྱུ་མཚན་དུ་མས་འགོག་པར་བྱེད་
མོད།ལེགས་བཤད་དུ་མ་མཐོང་སྟེ།དེ་ལྟ་ན་གཟུགས་ལས་སོགས་པ་ལྟ་བུར་སོགས་ཀྱི་སྒྲ་
དེ་ངེས་པར་ལས་སྒྲ་ལ་ལྟོས་པ་ཞིག་འདོད་དགོས་པར་འགྱུར་ན་དེའང་མི་ལྟོས་ཏེ་
གཟུགས་སོགས་ཤེས་ལས་སྒྲ་མེད་པས་ཀྱང་དོན་དེ་སྟོན་པར་མཚུངས་པའི་ཕྱིར།ལ་སོགས་
ཞེས་འདོན་པ་མི་འཐད་པའི་སྒྲུབ་བྱེད་དུ་ལ་སྒྲ་དེ་ལ་གཞུང་འདི་དང་སྨྲ་སྒོ་སོགས་
ནས་བཤད་པའི་ལ་སྒྲའི་འཇུག་དོན་གྱི་མཚན་ཉིད་ཅིའང་མེད་པའི་རྒྱུ་མཚན་བཀོད་མོད།
དེ་ལྟ་ན།ལ་ལ་དག་ཅེས་འདོན་པའང་མི་འཐད་པར་ཐལ།དེ་འདྲའི་ལ་སྒྲ་ལ་གཞུང་འདི་དང་
གཞན་ནས་བཤད་པའི་ལ་སྒྲའི་འཇུག་དོན་གི་མཚན་ཉིད་ཅིའང་མེད་པའི་ཕྱིར་རོ།།ཞེས་
གསུངས་པས་ཀྱང་དགར་སྡུད་གཉིས་ལ་ལས་ནས་ཀྱི་འཇུག་པ་ཁྱབ་མཉམ་དུ་བསྒྲུབ་མི་ནུས་
ཏེ།དེ་དག་ལ་རྣམ་པ་ཀུན་ཏུ་མཚུངས་པར་འཇུག་པ་མ་ཡིན་པ་གོང་སྨོས་ལྟར་གྱི་ཕྱིར་
དང་།ལས་ནས་གཉིས་དགར་སྡུད་ལ་འཇུག་པ་ཡོད་དོ་ཞེས་གསུངས་པས་དེ་གཉིས་སོ་སོ་ནས་
དོན་དེ་གཉིས་གང་རུང་ལ་འཇུག་པ་ཡོད་པས་ཆོག་གི་ཁྱབ་མཉམ་དུ་སྟོན་ག་ལ་དགོས་པའི་
ཕྱིར་རོ།།དེ་བཞིན་དུ་གསུང་རབ་རྙིང་བ་ལ།ལ་སྩོགས།ཞེས་བར་ཚེག་མེད་པ་ཡོད་པས་
ཀྱང་ལ་སོགས་ཞེས་ཀློག་པ་མི་འཐད་པར་བསྒྲུབ་མི་ནུས་ཏེ།གསུང་རབ་རྙིང་པ་རྣམས་སུ།
རལ་གྱི་སོགས་དང་།མྱེ་དང་མྱི་སོགས་དང་།སྩོགས་སོགས་ཡོད་པས་རལ་གྲི་དང་མེ་དང་
མི་དང་སོགས་ལ་སོགས་པ་རྣམས་མ་དག་པར་བསྒྲུབ་མི་ནུས་པ་ལྟ་བུའི་ཕྱིར་རོ།།
ཡང་ཁ་ཅིག་གིས་དགར་སྒྲའི་སྐབས་སུ་རྫས་དགར་བའི་དཔེར་བརྗོད་དུ།བུམ་པ་ལས་
གསེར་བུམ།ཞེས་དང་།ལ་ལས།ལྷའི་ནང་ནས་རྡོ་རྗེ་རྩེ་བརྒྱ་འཛིན་པ་ནི་བརྒྱ་བྱིན་
ནོ།།ཞེས་བཀོད་མོད།ཤིན་ཏུ་མི་འཐད་དེ།དེ་གཉིས་ཀ་རིགས་སམ་དངོས་པོ་བཀར་བ་ཉིད་
ཡིན་པའི་ཕྱིར་ཏེ་སྔ་མ་ནི་དགར་གཞི་དང་དགར་བྱ་གཉིས་ཀ་བུམ་པ།དགར་བྱེད་དམ་ཁྱད་
པར་འབྱེད་བྱེད་ནི་གསེར་ཡིན་པ་དང་།ཕྱི་མ་ནི་དགར་གཞི་ལྷ་རྣམས་དགར་བྱ་བརྒྱ་
བྱིན།ཁྱད་པར་འབྱེད་བྱེད་རྡོ་རྗེ་ཐོགས་པ་ཡིན་པས་དེ་དག་གི་དགར་བྱ་རིགས་ཙམ་དུ་
ངེས་པའི་ཕྱིར།སྤྱིར་ཡང་དགར་བ་ཞེས་བྱ་བ་ནི་རིགས་དང་བྱ་བ་ཡོན་ཏན་གང་ཡང་རུང་བ་
དགར་བ་ཡིན་གྱི་རྫས་རྐྱང་བ་དགར་བ་མི་སྲིད་དེ།རྫས་ནི་རྫས་གཞན་ལྡན་པ་བརྗོད་པ་
ཡིན་པས་དབྱུག་གུ་ཅན་ལས་ཕྲེང་བ་ཅན་མཛེས་ལྟ་བུ་ནི་ཕྲེང་བའི་རྫས་དང་ལྡན་པའི་
གང་ཟག་ལྟ་བུ་རིགས་དགར་བར་སོང་།དབྱུག་གུ་ཐོགས་པ་ལས་འཕྲེང་བ་ཐོགས་པ་ལེགས།ལྟ་
བུ་ནི་འཕྲེང་བ་ཐོགས་པའི་བྱ་བ་དགར་བར་སོང་།དེས་ན་དེས་རིགས་བསྒྲེས་ཏེ་ལེགས་
པར་བསམས་པས་རྫས་རྐྱང་བ་དགར་བ་མི་རྙེད་པའི་ཕྱིར་དང་།བརྡ་སྤྲོད་པའི་བསྟན་
བཅོས་ཆེན་པོ་རྣམས་སུའང་འཕགས་ཡུལ་གྱི་མཁས་པ་དག་གིས་རྫས་དགར་བ་མ་བཤད་པའི་
ཕྱིར་རོ།།དེས་ན་འདི་དག་གི་དཔེར་བརྗོད་ཚུལ་བཞིན་འགོད་པར་འདོད་ན་ཐོག་མར་རིགས་
སོགས་བཞི་བོ་དེ་ཅི་ལ་ཟེར་མནོ་བསམ་ཞིབ་མོར་བཏང་ན་མཛེས་སོ།།སྨྲས་པ།
མཁས་བླུན་མང་པོའི་གཏམ་དག་འདྲེས་པའི་ཚང་ཚིང་སྟུག་ལྡན་འབྲོག་དགོན་དུ།།
རྣམ་དཔྱོད་རྟུལ་པོས་འཇུག་པར་རློམ་ཡང་གཞུང་དོན་ལམ་བཟང་ག་ལ་རྙེད།།
འདི་ན་དེ་དག་སོ་སོར་འབྱེད་པའི་ལེགས་བཤད་རིགས་པའི་འཕྲུལ་ཡོད་པས།།
གཟུར་གནས་གང་དག་བདེར་འཇུག་འདོད་རྣམས་ཐབས་འདི་གེགས་མེད་བསྟེན་མཛོད་ཅིག།
བརྒྱད་པ་བོད་པའི་སྒྲ་ནི།
གང་མིང་བརྗོད་པའི་དང་པོ་རུ།།ཀྱེ་སྦྱར་བ་ནི་བོད་པ་ཡིན།།
ཞེས་པས་བསྟན་ཏེ།གང་ཡང་རུང་བའི་མིང་བརྗོད་པའི་ཐོག་མར་ཀྱེ་ཞེས་བྱ་བ་སྦྱར་
བ་ནི་བོད་པའི་རྣམ་དབྱེ་གསལ་བར་བྱེད་པའི་སྒྲ་ཡིན་ནོ།།ཞེས་སོ།།དེའང་རྣམ་དབྱེ་
གཉིས་པ་ལ་སོགས་པའི་མཐའ་ཅན་ལ་ནི་མི་འཇུག་ཅིང་བོད་སྐད་ཀྱི་རྣམ་དབྱེ་དང་པོ་
མིང་ཙམ་ལ་ཁྱད་པར་མེད་པས་དེའི་སྔོན་དུ་སྦྱོར་བ།ཀྱེ་ལྷའི་ལྷ།ཀྱེ་ཁ་ལོ་སྒྱུར་
བ།ཀྱེ་ལྷ།ཀྱེ་རྒྱལ་པོ་ཆེན་པོ།ལྟ་བུ་སྟེ་འདིའང་ཐོག་མར་སྦྱོར་བ་གཙོ་ཆེ་བའི་
དབང་གིས་གསུངས་པ་ལས།ཚིགས་བཅད་སོགས་སྦྱོར་བའི་ཚེ།བདག་ལ་དགོངས་ཤིག་མགོན་པོ་
ཀྱེ།།ཞེས་པ་ལྟ་བུ་མཐར་སྦྱར་བའང་ཡོད་དོ།།འདི་ནས་མ་བསྟན་པ།ཀ་ཡེ་དང་ཀྭའི་སྒྲ་
དག་ཀྱང་བོད་པ་གསལ་བྱེད་ཡིན་མོད་ཀྱི།ཟུར་གྱིས་སྟོན་པ་དང་སྐུལ་བ་དང་གླུ་ལེན་
པ་དང་འཕྱ་བ་ལྟ་བུ་སྒེག་ཆོས་དང་དྲག་ཤུལ་ལ་སོགས་པར་འབྲེལ་བ་ལས་ཡུལ་ཁྱད་པར་ཅན་
ལ་བརྗོད་པ་ནི་ཅུང་ཞིག་མི་མཛེས་པར་མངོན་ནོ།།
སྐབས་འདིར་འགྲེལ་བྱེད་ཕལ་ཆེར་གྱིས།ཀྱེ།ཞེས་པ་བོད་པའི་རྣམ་དབྱེར་འདོད་
ཀྱང་མི་འཐད་དེ།རྣམ་དབྱེ་མིང་གི་ཐོག་མར་སྦྱར་བ་མེད་པ་དང་།བོད་པའི་རྣམ་དབྱེ་
ལེགས་སྦྱར་གྱི་གཅིག་ཚིག་ལ་ཁྱད་པར་ཡོད་པ་ཙམ་མ་གཏོགས་ངོ་བོ་རྣམ་དབྱེ་དང་པོ་
ལས་ལོགས་སུ་དབྱེར་མེད་ཅིང་བོད་སྐད་ལ་དང་པོའི་གཅིག་ཚིག་གི་རྗེས་མི་གསལ་ཡང་
གཉིས་ཚིག་དང་མང་ཚིག་གི་རྗེས་ཆ་མཐུན་ཡོད་པར་མ་ཟད་རྣམ་དབྱེ་ཞིག་ངེས་པར་འཇུག་
དགོས་ཤིང་གཉིས་པ་སོགས་གཞན་མི་འཇུག་པའི་རྒྱུ་མཚན་ལས་དོན་ཐོབ་ཀྱིས་དེ་དང་
མཚུངས་པར་མིང་མཐའ་རྣམ་དབྱེ་དང་པོ་ཉིད་དུ་ངེས་པ་ལ་སླར་རྣམ་དབྱེ་སྦྱིན་མི་ དགོས་པའི་ཕྱིར་རོ།།དེས་ན་ཀྱེ་ཞེས་པ་རྣམ་དབྱེ་མ་ཡིན་ཞིང་བོད་པ་གསལ་བྱེད་ཀྱི་
སྒྲ་ཡིན་ཏེ།ལེགས་སྦྱར་གྱི་ཧེ་བྷོ་བྷོསྲ་སོགས་དང་མཚུངས་པར་ཤེས་དགོས་སོ།།
གཉིས་པ་འཕྲད་རང་དབང་ཅན་ཁོ་ན་བཤད་པ་ལ།ནི་སྒྲ།དང་སྒྲ།དེ་སྒྲ།གང་སྒྲ།བདག་སྒྲ།དགག་སྒྲ་བཤད་པ་སྟེ་དྲུག་ལས།དང་པོ་ནི།
གང་མིང་མཐའ་དང་མཐུན་པ་ཡི།།བཞི་པ་ལ་ནི་ཨི་སྦྱར་བ།།དགར་དང་བརྣན་པའི་ཚིག་ཏུ་འགྱུར།།
ཞེས་པ་སྟེ།གང་ཡང་རུང་བའི་མིང་ཚིག་གི་མཐའ་དང་མཐུན་པར་སྦྱར་རུང་བའི་ཕྲད།
རྗེས་འཇུག་བཞི་པ་ན་ཡིག་ལ་དབྱངས་ཨི་སྦྱར་བས་ནི་ཞེས་གྲུབ་པ་དེ་ནི་གཞི་ལས་
མཆོག་ཏུའམ་དམན་པར་རམ་ཐ་དད་ཙམ་དུ་དམིགས་བཟུང་ནས་དགར་བའི་དོན་དང་།དོན་གང་ཡིན་
པ་དེ་ཉིད་ལ་ནན་ཏན་དུ་བརྣན་པའི་དོན་ལའང་འཇུག་པའི་ཚིག་ཏུ་འགྱུར་རོ།།ཞེས་སོ།།
དེ་ལ་མཆོག་ཏུ་དགར་བ་ནི།ཁྱབ་འཇུག་ནི་ལྷ་རྣམས་ཀྱི་ནང་ནས་བརྟུལ་ཕོད་པའོ།།དམན་
པར་དགར་བ་ནི།རིགས་རྣམས་ལས་ནི་གདོལ་པའི་རིགས་ཐ་ཆད་དོ།།ཐ་དད་པ་ཙམ་དུ་དགར་བ་
ནི།མཐིང་ག་ནི་སྔོ་སངས་ལས་གཞན་ནོ།།ཞེས་པ་ལྟ་བུ་རྣམས་སོ།།སྨྲ་སྒོ་ལས་དགར་གཞི་
དངོས་སུ་སྨོས་མ་སྨོས་ཀྱི་དབྱེ་བས་གཉིས་སུ་བཤད་དེ།ལྷ་རྣམས་ལས་གདོང་བཞི་དང་
ལྡན་པ་ནི་ཚངས་པའོ།།མཆོད་སྦྱིན་བརྒྱའི་བདག་ཉིད་ནི་བརྒྱ་བྱིན་ནོ།།ལྟ་བུའོ།།
བརྣན་པ་ལ་འཇུག་པ་ནི།ཁྱོད་ནི་གཉེན་དང་ཁྱོད་ནི་བཤེས།སྤང་བར་བྱ་བ་ནི་སྤངས།ཆུབ་
པར་བྱ་བ་ནི་ཆུབ།ལྟ་བུ་སྟེ།སྡོམ་པ་ཐམས་ཅད་ལྡན་པར་ནི།།ལྟ་བུ་ཚིག་གི་ཁ་སྐོང་
དུ་འཇུག་པའང་ཡོད་མོད་ཀྱི་དོན་ནི་ངེས་བཟུང་གིས་བརྣན་པའི་སྒྲ་ཉིད་ཡིན་ནོ།།
དེས་ན་ནི་སྒྲ་འདི་ལེགས་སྦྱར་གྱི་ཏུ་དང་ཧི་བསྒྱུར་བ་ཡིན་པར་བཤད་པའང་ཕྱོགས་
འགའ་ཞིག་ནས་ཡིན་གྱི་རྣམ་པ་ཐམས་ཅད་དུ་ནི་མ་ཡིན་ནོ།།
གཉིས་པ་དང་སྒྲའི་འཇུག་ཚུལ་ནི།
མིང་གང་རུང་བའི་བར་མཚམས་སུ།།གསུམ་པ་ལ་ནི་གཉིས་པ་སྦྱར།།
དེ་ནི་སྡུད་དང་འབྱེད་པ་དང་།།རྒྱུ་མཚན་ཚེ་སྐབས་གདམས་ངག་ལྔའོ།།
ཞེས་པས་བསྟན་ཏེ།མིང་ཚིག་གང་ཡང་རུང་བའི་བར་མཚམས་རྣམས་སུ་རྗེས་འཇུག་གསུམ་
པ་ད་ཡིག་ལ་གཉིས་པ་ང་ཡིག་སྦྱར་བས།དང་།ཞེས་གྲུབ་པ་དེ་ནི།ཚིག་སྔ་ཕྱི་ཕྱོགས་
གཅིག་ཏུ་སྡུད་པ་དང་།སོ་སོར་འབྱེད་པ་དང་།རྒྱུ་མཚན་ཏེ་རྒྱུའི་མཚན་ཉིད་ཀྱི་
དོན་དང་།དུས་བརྗོད་པ་ཚེ་སྐབས་ཀྱི་དོན་དང་།གཞན་ལ་གདམས་ངག་བརྗོད་པའི་དོན་ཏེ།
དོན་ལྔ་ལ་འཇུག་གོ།ཞེས་སོ།།དེའང་སྡུད་པའི་དོན་དུ་སྦྱར་བ།འདུས་བྱས་དང་འདུས་མ་
བྱས་ནི་ཆོས་སོ།།མིག་དང་རྣ་བ་དང་སྣ་དང་ལྕེ་དང་ལུས་རྣམས་ནི་དབང་པོའོ།།གང་དང་
མཚུངས་པར་དེ་དང་ལྷན་ཅིག་འགྲོགས།།དགར་དང་བདེ་དང་མཐུན་པ་འཐོབ་པར་འགྱུར།།ལྟ་
བུ་ཚིག་དོན་གཉིས་སམ་མང་པོ་དོན་གཞན་ཞིག་ལ་སྦྱར་ཞིང་བསྡུ་རྒྱུ་ཡོད་པ་རྣམས་
དང་།འབྱེད་པ་ལ་སྦྱར་བ།ཆོས་ནི་འདུས་བྱས་དང་འདུས་མ་བྱས་པའོ།།དབང་པོ་རྣམས་ནི་
མིག་དང་རྣ་བ་དང་སྣ་དང་ལྕེ་དང་ལུས་སོ།།ལྟ་བུ་དབྱེ་གཞི་གཅིག་ལས་གཉིས་སམ་དུ་
མར་འབྱེད་པའི་དོན་དུ་སྦྱར་བ་རྣམས་དང་།རྒྱུ་མཚན་ལ་སྦྱར་བ།སྨན་ཟོས་པ་དང་ནད་
སོས་སོ།།ཆོས་མང་དུ་ཐོས་པ་དང་ལྷག་མཐོང་འཕེལ་ལོ།།དུ་མཐོང་བ་དང་མེར་ཤེས་སོ།།
ལྟ་བུ་རྣམ་དབྱེ་གསུམ་པ་དང་ལྔ་བ་རྒྱུ་མཚན་ལ་འཇུག་པ་བཞིན་དུ་དང་སྒྲ་དེ་ཉིད་
རྒྱུ་མཚན་སྟོན་བྱེད་དུ་འགྱུར་བ་རྣམས་དང་།ཚེ་སྐབས་ལ་སྦྱར་བ།རྒྱུ་སྐར་རྒྱལ་
འཆར་བ་དང་ཡུལ་དུ་ཆས་སོ།།ཉི་མ་ཤར་བ་དང་ཆོས་སྟོན་དྲང་།ལྟ་བུ་དུས་བརྗོད་པའི་
སྒྲ་དང་འཇུག་པ་གཅིག་པ་རྣམས་དང་།གདམས་ངག་ལ་སྦྱར་བ།ལེགས་པར་སློབས་དང་།ཁ་ཏོན་
གྱིས་དང་།ཡིད་ལ་ཟུངས་དང་།ལྟ་བུ་གཞན་ལ་གདམས་པའམ་སྐུལ་བའི་ཚིག་དང་འབྲེལ་བ་ རྣམས་སོ།།
འདི་སྐབས་འགྲེལ་བྱེད་ཁ་ཅིག་གིས་རྒྱུ་མཚན་ལ་འཇུག་པའི་དཔེར་བརྗོད་དུ་སྒྲ་
ཆོས་ཅན་མི་རྟག་སྟེ་དངོས་པོ་ཡིན་པའི་ཕྱིར་དང་།སྐྱེ་ལྡན་ཡིན་པའི་ཕྱིར་དང་།
རྒྱུ་རྐྱེན་ལས་བྱུང་བའི་ཕྱིར་དང་།ཞེས་པ་ལྟ་བུ་བཀོད་མོད་ཀྱི་དེ་འདྲའི་དང་
སྒྲ་དེ་རྣམས་རྒྱུ་མཚན་གྱི་དོན་དུ་མི་འགྱུར་ཏེ་དེ་དག་ལ་རྒྱུ་མཚན་སྟོན་པའི་
ནུས་པ་ཅིའང་མ་མཐོང་བའི་ཕྱིར།ཕྱིར་གྱི་སྒྲས་རྒྱུ་མཚན་སྟོན་པས་དེ་དང་འབྲེལ་
བའི་དང་གི་སྒྲས་ཀྱང་དེ་སྟོན་ཏོ།།སྙམ་ན།ཚོར་བ་པོ་དང་མཐོང་བ་པོ་དང་བྱེད་པ་པོ་
དང་།ཞེས་པ་ལྟ་བུའི་དང་གི་སྒྲ་རྣམས་ཀྱིས་ཀྱང་བདག་པོའི་དོན་སྟོན་པར་ཐལ་བ་
སོགས་ཧ་ཅང་ཐལ་ལོ།།འོ་ན་གྱིས་དང་།ལྟ་བུ་གྱིས་ཀྱི་སྒྲས་སྐུལ་བ་སྟོན་ལ་དེ་དང་
འབྲེལ་བའི་དང་གིས་ཀྱང་དེ་སྟོན་པར་འདོད་པ་མ་ཡིན་ནམ་ཞེ་ན།དེ་དང་འདི་མི་མཚུངས་ ཏེ།གྱིས་དང་ལྟ་བུའི་གྱིས་ཀྱི་སྒྲ་དེ་སྐུལ་ཚིག་དངོས་དང་དང་སྒྲ་དེའི་ཡན་ལག་
ཏུ་འགྱུར་བར་དངོས་སུ་གྲུབ་ཅིང་།དེ་འདྲའི་དང་སྒྲ་དེས་སྐུལ་ཚིག་ལས་གཞན་པའི་
དོན་ཅིའང་མི་སྟོན་པ་དང་།ཁྱེད་འདོད་པའི་དང་སྒྲ་དེ་རྣམས་ཀྱིས་རྒྱུ་མཚན་མི་
སྟོན་ཅིང་།སྒྲ་མི་རྟག་པར་བསྒྲུབ་པ་ལ་གཏན་ཚིགས་ཀྱི་རྣམ་གྲངས་གཞན་དང་གཞན་
ཕྱོགས་གཅིག་ཏུ་སྦྱོར་ཞིང་སྡུད་པ་སྟོན་པར་སྣང་བའི་ཕྱིར་རོ།།འགའ་ཞིག་གིས་དང་
སྒྲ་རྒྱུ་མཚན་ལ་འཇུག་པ་ལས་འཕྲོས་ནས་དུས་བརྗོད་པའི་ཚེའི་སྒྲའང་རྒྱུ་མཚན་ལ་
འཇུག་པར་བཤད་མོད།འཐད་པར་མ་མཐོང་ཡང་དོ་གལ་ཆེ་བས་དགག་པའི་སྤྲོས་པ་མི་བྱེད་ དོ།།
གསུམ་པ་དེ་སྒྲའི་འཇུག་ཚུལ་བཤད་པ་ལ་དངོས་དང་།མཐའ་དཔྱད་དོ།།དང་པོ་ནི།
གང་མིང་གི་ནི་ཡ་མཐའ་རུ།།གསུམ་པ་ལ་ནི་ཨེ་སྦྱར་བ།།
ཐ་སྙད་དབང་དུ་གསུམ་ཡིན་
ཏེ།།དངོས་པོའི་དབང་དུ་བཞི་རུ་འགྱུར།།
དུས་ཀྱི་དབང་དུ་གཉིས་ཡིན་ནོ།།
ཞེས་པས་བསྟན་ཏེ།གང་ཡང་རུང་བའི་མིང་གི་ཡ་མཐའ་སྟེ་ཐོག་མར་རྗེས་འཇུག་གསུམ་
པ་ད་ཡིག་ལ་དབྱངས་ཨེ་སྟེ་འགྲེང་བུ་སྦྱར་བས།དེ།ཞེས་གྲུབ་པ་ནི་ཐ་སྙད་ཙམ་གྱི་
དབང་དུ་བྱས་ན།རྣམ་གྲངས་གཞན་ཞིག་ལ་སྦྱོར་རྒྱུ་ཡོད་པར་སྟོན་པའི་དོན་ཅན་དང་།
ལྷག་མ་དང་བཅས་པ་དང་།དུས་གསུམ་ལས་འདས་པ་སྟེ་གསུམ་ལ་འཇུག་པ་དང་།དངོས་པོའི་
དབང་དུ་བྱས་ན།བདེན་པ་དང་།གསང་བ་དང་།བདག་གི་བ་དང་།ཕ་རོལ་པོའི་དངོས་པོ་སྟེ་
བཞི་ལ་དུས་གསུམ་གར་འཇུག་པར་འགྱུར་བ་དང་།དུས་ཉིད་ཀྱི་དབང་དུ་བྱས་ན།འདས་པ་དང་
མ་འོངས་པ་གཉིས་ལ་འཇུག་པ་ཡིན་ནོ།།ཞེས་སོ།།དེ་ལྟར་གཞུང་ནས་མིང་གི་ཡ་མཐར་
གསུངས་པ་ནི་གཙོ་ཆེ་བའི་དོན་ཡིན་གྱི་མཐའ་གཅིག་ཏུ་ངེས་པ་ནི་མ་ཡིན་ནོ།།དེ་དག་
སོ་སོའི་དོན་ཡང་འོལ་ཚོད་ཙམ་ལས་དཔྱིས་ཕྱིན་པར་ནི་སྔོན་ཆད་སུས་ཀྱང་མ་རྟོགས་
པར་སྣང་བས་ཞིབ་ཏུ་བཤད་ན།འདི་སྐབས་དབྱེ་ཚུལ་གསུམ་ལས་སྔ་མ་ཐ་སྙད་ཀྱི་དབྱེ་བས་
དེ་སྒྲའི་འཇུག་པ་ཐམས་ཅད་ལ་ཁྱབ་པ་ཡིན་ཏེ།དཔེར་ན།དེ་སྒྲ་དེའི་ཤུལ་དུ་ཚིག་ཟིན་
ལ་དངོས་སུ་གསལ་མི་གསལ་ཇི་ལྟར་ཡང་དོན་གྱི་རྣམ་གྲངས་གཞན་ཞིག་སྦྱར་ཞིང་དྲང་དུ་
ཡོད་པའི་ཐ་སྙད་ཀྱི་ཚེ།དེ་བཞིན་གཤེགས་པ།དེ་བཞིན་ནོ།།གང་པ་ཡིན་པ་དེ།དེ་ལས་
ཀྱང་གཞན།ལེགས་སྤྱད་དེས་ནི་འབྲས་བུ་ཆེན་པོར་འགྱུར།།དེ་ནི་ཕུན་སུམ་ཚོགས་པའི་
འབྱུང་གནས་ཉིད།།ཅེས་པ་ལྟ་བུའི་དེ་སྒྲ་རྣམས་ཀྱིས་རིམ་པ་བཞིན་དུ་གང་ལ་དཔེར་
བྱ་བའི་ཡུལ་དེ་དང་།སྤྱི་ལས་དམིགས་སུ་གཟུང་བྱ་དེ་དང་།ལས་ཀྱི་སྒྲས་གང་ལས་དགར་
བའི་གཞི་དེ་དང་།འབྲས་བུ་འབྱིན་བྱེད་ཀྱི་རྒྱུ་དེ་དང་།འབྱུང་གནས་སུ་ངོས་གཟུང་
བྱ་དེ་བཅས་གོ་ཞིང་མཚོན་ནུས་པ་ལྟར་ལྷག་བཅས་ཁོ་ན་མ་གཏོགས་དེ་སྒྲའི་འཇུག་པ་
ལྷག་མ་ཐམས་ཅད་རྣམ་གྲངས་གཞན་ཡོད་པར་སྦྱོར་བའི་དོན་ཅན་དུ་འདུས་ཤིང་།ལྷག་བཅས་ ཀྱི་དེ་སྒྲ་ནི་རང་ཉིད་ཀྱི་ཤུལ་དུ་དོན་གཞན་མི་མཚོན་པས།དཔེར་ན།ཤིང་བཅད་དེ་ཅི་
ཞིག་བྱེད།བདེན་གྲུབ་ཏུ་ཡོད་དེ་རྟག་པའི་ཕྱིར།ལྟ་བུ་བརྗོད་བྱ་ལྷག་མ་འདྲེན་པ་
ཙམ་དུ་ཟད་པའི་ཕྱིར་དབྱེ་བ་ཟུར་དུ་མཛད་པ་དང་།འཇུག་པ་དེ་གཉིས་ཀའང་བརྗོད་བྱ་
སྤྱིའི་དོན་ལ་མ་དཔྱད་པར།བརྗོད་ཚུལ་དེ་ཉིད་ལ་ཐད་ཀར་བརྟགས་པའི་དུས་ཀྱི་ཐ་སྙད་
ཀྱི་དབང་དུའམ་།ལ་ལར་ཚིག་དོན་གཉིས་ཀའི་དབང་དུ་བྱས་ནའང་འདས་པ་ཁོ་ན་ཡིན་ཏེ།
དཔེར་ན་རྣམ་གྲངས་གཞན་སྦྱོར་ལ།དེ་སྒྲ་དང་སྦྱོར་རྒྱུའི་དོན་དེ་དངོས་སུ་ཚིག་
ཟིན་དུ་ཡོད་ན་དེ་སྔོན་དུ་བརྗོད་ཟིན་པ་མཚོན་པར་བྱེད་པའི་འཕྲད་ཡིན་པས་འདས་པར་
འགྱུར་བ།མ་འོངས་པ་ན་འཁོར་ལོས་སྒྱུར་བའི་རྒྱལ་པོ་དུང་ཞེས་བྱ་བ་འབྱུང་བར་
འགྱུར་བ་དེ་ནི་བསྐལ་བཟང་གི་སངས་རྒྱས་དྲུག་པ་སེང་གེའི་སྒྲར་འགྱུར་རོ།།སང་གི་
ཁ་ཟས་དེ་དེ་རིང་སྟ་གོན་གྱིས་ཤིག།ཅེས་པ་ལྟ་བུ་དང་།ཚིག་ཟིན་དུ་མེད་ཀྱང་དེ་
བཞིན་གཤེགས་པ་ལྟ་བུའི་དེ་སྒྲས་བསྡུས་པའི་དོན་དེ་སྔོན་དུ་སོང་བའམ།བརྗོད་ཟིན་
པ་ཞིག་ལ་མི་བསམ་པ་མི་སྲིད་པས་འདས་པར་འགྱུར་ཞིང་།ལྷག་བཅས་ནི་ཚིག་ཙམ་བརྗོད་
ཟིན་ཀྱི་འདས་པ།རི་མོར་བྱེད་དེ་བཀུར་སྟིར་ཡང་བྱེད་དོ།།ལྟ་བུ་དང་།ཚིག་དོན་
གཉིས་ཀ་འདས་མ་ཐག་པ་ཕྱིར་བསྐྱེད་དེ་འགྲོ།ཤིང་བཅད་དེ་འབུད།ལྟ་བུ་འདས་པ་ཉིད་
ཀྱིས་ཁྱབ་པའི་ཕྱིར་རོ།།དེས་ན་ཐ་སྙད་ཀྱི་དབང་གིས་དབྱེ་བ་མཚན་ཉིད་པ་གཉིས།
དབྱེ་གཞི་སྤྱི་ཁྱབ་ཏུ་དུས་ད་ལྟ་དང་མ་འོངས་པ་བསལ་བའི་འཇུག་ཚུལ་གཅིག་བཅས་
གསུམ་དུ་གྲངས་ངེས་ཤིང་།དབྱེ་བ་འདི་ཐ་སྙད་ཀྱི་དབང་གིས་བཞག་པའི་རྒྱུ་མཚན་ཡང་
རྣམ་གྲངས་གཞན་སྦྱོར་གྱི་དེ་ནི་དོན་གཞན་ལ་དེ་ཞེས་ནན་གྱིས་བཏགས་པ་ཙམ་དང་།ལྷག་
བཅས་ཀྱི་དེ་ནི་ལྷག་མ་འདྲེན་པར་ཐ་སྙད་བྱས་པ་ཙམ་དང་།དུས་འདས་པའི་དེའང་དོན་ལ་
ཇི་ལྟར་ཡང་བརྗོད་པ་ཙམ་གྱི་དབང་དུ་བྱས་པའི་ཕྱིར་ཏེ་ཐ་སྙད་ཅེས་པའི་གོ་བའང་།
གནས་བརྒྱད་རྩ་བར།ཐ་སྙད་ནི་དངོས་པོ་མེད་པ་ལ་དངོས་པོར་བཏགས་པ་སྟེ།དེའང་བཏགས་
པ་དང་འཇུག་པ་དང་བརྗོད་པར་བཅས་པ་ཐམས་ཅད་དོ།།དེ་ལ་བརྡ་ནི་གོ་བར་བྱེད་པའི་བདག་
ཉིད་ཅན་ཡིན་ལ།ཐ་སྙད་ནི་འཇུག་པར་བྱེད་པའི་བདག་ཉིད་ཅན་ཡིན་ནོ།།ཞེས་དང་།འགྲེལ་
བར།ཐ་སྙད་ནི་དངོས་པོ་ལ་ཐ་སྙད་མེད་པ་ལ་ནན་གྱིས་བཏགས་པ་སྟེ།དེའང་བཏགས་པའི་
ཤེས་པ་ནི་འདི་ཀ་བ་ཡིན་ནོ་སྙམ་པ་ལ་སོགས་པའི་ཤེས་པའོ།།བརྗོད་པ་ནི་འདི་ཀ་བའོ་ ཞེས་བྱ་བའི་སྒྲའོ།།འཇུག་པ་ནི་ཀ་བ་ཡིན་པས་ཁང་ཁྱིམ་བྱེད་པར་རྩོམ་པ་ལ་སོགས་
པའོ།།ཐ་སྙད་ཅེས་བྱ་བ་ནི་འཇུག་པའི་རྒྱུ་མཚན་ཡིན་ནོ།།ཞེས་ལྷུག་པར་བཀྲལ་ནས་
བསྟན་པ་ཡིན་ནོ།།དབྱེ་ཚུལ་གཉིས་པ་དེས་ནི།ལྷག་བཅས་ཁོ་ན་དངོས་པོར་མི་འཇུག་པས་
བསལ་བ་མ་གཏོགས་དེ་སྒྲའི་འཇུག་པ་ཐམས་ཅད་ལ་ཁྱབ་སྟེ།དེ་ཁོ་ན་ཉིད་དོ།།དེ་དེ་
བཞིན་ནོ།།ལ་སོགས་པ་ལྟ་བུ་བདེན་པའི་དངོས་པོ་སྟོན་པ་དང་།གཞན་གྱིས་ཤེས་ཀྱིས་
དོགས་ནས་དོན་དངོས་སུ་མི་སྨྲ་བར་ཟུར་གྱིས་གོ་བར་བྱེད་པའི་ཚིག།ཁྱོད་ཀྱིས་དེ་
ལེགས་པར་གྲུབ་བམ།ཞེས་པ་ལྟ་བུ་གསང་བའི་དངོས་པོ་སྟོན་པར་བྱེད་པ་དང་།བདག་ཉིད་
དང་འབྲེལ་བ།བདག་གི་ལྷ་དེ།ཁོ་བོའི་ནོར་དེ།ཞེས་པ་ལྟ་བུ་བདག་གི་བའི་དངོས་པོ་
སྟོན་པ་དང་།དེ་ནི་ཡོད་དོ།།དེ་ནི་མེད་དོ།།ཀ་བ་དེ་ལྟ་བུ།ཁྱོད་ཀྱི་དེ།དེས་
བསྟན་པ་དེ་ནི།ཞེས་པ་ལ་སོགས་པ་ལྟ་བུ་ཕ་རོལ་པོའམ་གཞན་གྱི་དངོས་པོ་སྟོན་པར་
འདུ་བའི་ཕྱིར་ཏེ།དེ་བཞི་གང་རུང་དུ་མ་འདུས་པའི་འཕྲད་འདིས་དངོས་པོ་བསྟན་པ་
མེད་ཅིང་དངོས་པོ་མི་སྟོན་པའི་སྒྲ་དེ་སྒྲའང་ལྷག་བཅས་ཙམ་དུ་ཟད་པའི་ཕྱིར་རོ།།
དེས་ན་དབྱེ་བ་འདི་སྤྱིའི་དངོས་པོའི་དོན་གཙོ་བའི་སྒོ་ནས་ཕྱེས་པས་དུས་གསུམ་ག་
ལ་ཡོད་དེ།འདས་པ་ལ་དམིགས་ནས་བརྗོད་པ།སྔོན་གྱི་ཚེ་འཕགས་པའི་ཡུལ་དེ་ན།ཞེས་པ་
ལྟ་བུ་དང་།ད་ལྟར་ལ།རྡོ་བ་དེ་ཁྱོད་ཀྱིས་འདེགས་ནུས་སམ།ལྟ་བུ་དང་།འབྱུང་འགྱུར་
ལ།འཚང་རྒྱ་བར་འགྱུར་བ་དེ།ཞེས་པ་ལྟ་བུ་ཚིག་གྲོགས་ཀྱི་དོན་ལས་རིག་པར་བྱ་ཞིང་།
མི་འཇུག་པ་ནི།རང་གིས་རང་ལ་དེ་ཞེས་མི་བརྗོད་པའི་ཕྱིར།བདག་ཉིད་ཀྱི་དངོས་པོ་ལ་
འཇུག་པ་མ་ཡིན་ནོ།།དབྱེ་ཚུལ་གསུམ་པ་དེ་ནི།དེ་སྒྲ་སྤྱིའི་དབང་དུ་མ་བྱས་པར་ དུས་ཁོ་ན་བརྗོད་པ་དང་འབྲེལ་བའི་དེ་སྒྲ་ལ་དབྱེ་བ་བྱས་པར་ཟད་དེ།འདས་པའི་དུས་
བརྗོད་པ་དང་འབྲེལ་བ།སྔོན་དེ་བཞིན་གཤེགས་པ་འཁོར་བ་འཇིག་འཇིག་རྟེན་དུ་བྱོན་པ་
དེའི་ཚེ།ན་ནིང་གི་ལོ་དེ་ལ།ཁ་སང་གི་ཉི་མ་ཤར་བ་དེའི་ཚེ།སྐད་ཅིག་མ་སྔ་མ་དེར་
ཞེས་པ་ལྟ་བུ་དང་།མ་འོངས་པའི་དུས་བརྗོད་པ་དང་འབྲེལ་བ།དེའི་དུས་ན་འཁོར་ལོས་
སྒྱུར་བའི་རྒྱལ་པོ་དུང་ཞེས་བྱ་བ་འབྱུང་བར་འགྱུར་རོ།།སང་ཉི་མ་ཤར་བའི་དུས་
དེར་འགྲོའོ།།ཞེས་པ་ལྟ་བུ་འདས་པ་དང་མ་འོངས་པ་གཉིས་ལ་འཇུག་པ་ཉིད་དོ།།ད་ལྟར་
བའི་དུས་ལ་ནི་ནམ་ཡང་མི་འཇུག་སྟེ།ད་ལྟའི་བསྐལ་པ་འདིར།ད་ལྟའི་ལོ་འདིར།དེ་རིང་
གི་དུས་འདིར་ཞེས་སོགས་སྦྱོར་བ་ལས།ད་ལྟའི་བསྐལ་པ་དེར་སོགས་མི་སྦྱོར་བ་མངོན་
སུམ་གྱིས་གྲུབ་པའི་ཕྱིར་རོ།།དེས་ན་སྨྲ་སྒོ་ལས།
དེ་ཞེས་བྱ་བའི་ཚིག་གི་དོན།།ཐ་སྙད་དངོས་དང་དུས་འཇུག་གསུམ།།འདས་དང་རྣམ་
གྲངས་གཞན་ཅན་དང་།།ལྷག་མ་དག་དང་བཅས་པའོ།།བདེན་པ་དག་དང་གསང་བ་དང་།།བདག་གི་བ་
དང་ཕ་རོལ་པོ།།དངོས་པོ་དག་ལ་འཇུག་པ་བཞི།།འདས་པ་དང་ནི་མ་འོངས་པའི།།དུས་གཉིས་
ལ་ནི་འཇུག་པ་ཡིན།།བདག་ཉིད་ད་ལྟར་ཉིད་ལ་སྤང་།།དངོས་པོའི་དུས་ནི་མི་འདོར་ཏེ།།
ཀུན་ལ་རབ་ཏུ་སྦྱར་བར་བྱ།།
ཞེས་འབྱུང་བའི་དོན་རང་འགྲེལ་ལས་ཀྱང་ཤིན་ཏུ་གསལ་བ་གཞུང་འདིའི་དགོངས་པ་དང་
ཡང་ལེགས་པར་འབྱོར་བར་སྣང་བའི་ཕྱིར་རྣམ་པར་ཕྱེས་ནས་བཤད་པ་ཡིན་པས་ཟློས་སྐྱོན་
གྱི་དོགས་པ་སོགས་མི་བདེ་བ་མང་པོས་མ་བཅིངས་པའི་གུ་ཡངས་སུ་བློ་ལྡན་རྣམས་རྩེན་
པར་མཛོད་ཅིག།
གཉིས་པ་ནི།
འགྲེལ་བྱེད་སྔ་མ་འགའ་ཞིག་གིས།ཐ་སྙད་ཀྱི་དབང་དུ་བྱས་པའི་གསུམ་ལ་ཀུན་
བརྟགས་གཞན་དབང་ཡོངས་གྲུབ་གསུམ་དང་བྱ་བྱེད་ལས་གསུམ་ལུས་ངག་ཡིད་གསུམ་སོགས་སུ་
འདོད་པ་དང་དངོས་པོའི་དབང་གིས་རིགས་དང་བྱ་བ་ཡོན་ཏན་རྫས་བཞིར་འདོད་པ་སོགས་
སྣང་ཡང་ཐ་སྙད་ལ་མི་མཁས་པའི་མཚན་མ་གསལ་བར་བསྟན་པ་ཡིན་ཏེ།དེ་ལྟ་ན་ཁམས་གསུམ་
སྲིད་གསུམ་འཇིག་རྟེན་གསུམ་མཚན་མཚོན་གཞི་གསུམ་སོགས་དང་ཕྱག་རྒྱ་བཞི་སྡེ་བཞི་
སོགས་གསུམ་སྡེབ་བཞི་སྡེབ་ཡོད་དགུ་ཅོག་ཐམས་ཅད་ལ་སྦྱོར་རིགས་པ་ལ་དེ་དག་ཁོ་ན་
ངེས་པར་བཟུང་བ་ཅི་ཞིག།དེ་དག་ཐ་སྙད་བཏགས་པ་ཙམ་དང་དངོས་པོ་ཙམ་ཡིན་པའི་ཕྱིར་
རོ་ཞེས་ན་གཞན་ལའང་ཅིའི་ཕྱིར་མི་མཚུངས།དེ་བས་ན་འདི་སྐབས་སུ་གལ་ཆེ་བའི་ཕྲད་
ཀྱི་འཇུག་ཚུལ་འཆད་དུ་མེད་པར་དབུ་ཕར་སོགས་ཀྱི་བཤད་ཡམ་རྒྱས་པས་ནི་གང་དུའང་མི་
འགྱུར་རོ།།ཡང་ཕལ་མོ་ཆེས་སྨྲ་སྒོའི་ལུགས་སུ་བྱས་ཀྱང་།གཞུང་འགྲེལ་གྱི་དོན་
ལེགས་པར་མ་ཁྲོལ་བས་ནོངས་པ་མཐོང་སྟེ།འགའ་ཞིག་གིས།ཐ་སྙད་ཀྱི་འཇུག་ཚུལ་ལ་དབྱེ་
གཞི་དབྱེ་བའི་ཡ་རྒྱལ་དུ་བགྲངས་པ་མ་ཤེས་པས་ངེས་གཟུང་གི་དེ་སྒྲ་འདས་པར་ཁས་
བླངས་ནས་རྣམ་གྲངས་གཞན་སྦྱོར་གྱི་དེ་སྒྲ་ངེས་གཟུང་དང་ལྷག་བཅས་མ་ཡིན་པ་ཞིག་
འདོད་ཀྱང་མ་རྙེད་པས།ཇི་ལྟ་ཇི་ལྟར་མཉན་འདོད་པ།།དེ་དེ་ལ་དོན་དེ་དང་དེ།།སོགས་
བཀོད་པ་དང་།དངོས་པོའི་སྐབས་སུ།བདག་གི་བ་དང་གསང་བ་དང་བདེན་པའི་དངོས་པོ་
བརྗོད་པ་ལས་གཞན་པའི་དངོས་པོ་ལ་སྦྱོར་བའི་དེ་སྒྲ་ཐམས་ཅད་ཕ་རོལ་པོའི་དངོས་པོ་ སྟོན་པར་འཇུག་པ་མ་གོ་བས།དེའི་དཔེར་ཁྱོད་ཀྱི་སྒྲ་ཁོ་ན་སྦྱར་ནས་བཀོད་པ་སོགས་
དང་།འགའ་ཞིག་གིས་རྣམ་གྲངས་གཞན་སྦྱོར་ཞེས་པའི་རྣམ་གྲངས་དེ་དོན་ནམ་མིང་གི་
རྣམ་གྲངས་མང་པོར་བསམས་ནས།དེ་འདྲ་གོ་བར་བྱེད་པའམ་དངོས་སུ་བརྗོད་པ་དང་འབྲེལ་
བའི་དེ་སྒྲ་རྣམས་རྣམ་གྲངས་གཞན་སྦྱོར་གྱི་དོན་དུ་འདོད་པ་སོགས་སོ།།འོ་ན་དེ་
ལྟར་འདོད་པ་དེ་དག་ལ་སྐྱོན་ཅི་ཞིག་ཡོད་ཅེ་ན།འདོད་པ་དང་པོ་དེའི་སྐྱོན་ནི་རྣམ་
གསལ་གྱི་དཔེར་བརྗོད་འཐད་ལྡན་མ་རྙེད་པ་དེར་ཟད་དེ།དཔེར་བརྗོད་དེ་རྣམས་ཁྱེད་
རང་གི་ཞེན་དོན་དུ་མ་སོང་བའི་ཕྱིར་ཏེ།དེ་རྣམས་ཀྱི་དེ་སྒྲ་དེ་ངེས་གཟུང་ཁོ་ནར་
སྣང་བའི་ཕྱིར།གྲུབ་སྟེ།ཁྱེད་རང་གིས་ངེས་གཟུང་གི་དཔེར་བཀོད་པའི་སྐྱེས་བུ་དེ་
ཞེས་པ་དང་།དཔེར་བརྗོད་ཕྱི་མའི་ཇི་ལྟར་མཉན་འདོད་པ་དེ།ཞེའམ།དོན་དེ།ཞེའམ།སངས་
རྒྱས་ཀྱང་དེ།ཞེས་པ་རྣམས་ཀྱི་དེ་སྒྲའི་འཇུག་པ་མཐུན་པའི་ཕྱིར་ཏེ།ཕྱི་མའི་དེ་
རྣམས་ཀྱང་ཇི་ལྟར་མཉན་པ་དང་དོན་དང་སངས་རྒྱས་རྣམས་ངེས་པར་གཟུང་བའི་སྒྲ་ཡིན་
པའི་ཕྱིར་རོ།།འདོད་པ་གཉིས་པ་དེ་ལའང་ལེགས་པར་མ་བཤད་པ་དང་བསྟན་བྱ་མ་ཚང་བའི་
སྐྱོན་ཡོད་དེ།བདག་གི་བ་མ་ཡིན་པའི་དངོས་པོ་གཞན་ཐམས་ཅད་ལ་ཕ་རོལ་པོའམ་གཞན་གྱི་
དངོས་པོ་ཞེས་བརྗོད་པར་རིགས་བཞིན་དུ་ཁྱོད་ཅེས་པའི་སྒྲ་ཉི་ཚེ་དང་འབྲེལ་བ་ཕ་
རོལ་པོའི་དོན་དུ་ཞེན་པར་སྣང་བའི་ཕྱིར།འདོད་པ་ཕྱི་མ་དེ་ལའང་སྤྱིར་རྣམ་གྲངས་
ཀྱི་སྒྲ་དོན་ལ་འཁྲུལ་བ་དང་།རྒྱུ་དེས་སྐབས་དོན་གྱི་རྣམ་གྲངས་ལེགས་པར་མ་བཤད་
པའི་སྐྱོན་ཡོད་དེ།ཁྱེད་དག་གིས་རྣམ་གྲངས་ཞེས་པའི་སྒྲ་དེ་གྲངས་མང་པོར་འཇུག་
པར་དོན་གྱིས་ཞེན་པས་མི་འཐད་པའི་ཕྱིར་དང་།སྐབས་འདིའི་རྣམ་གྲངས་ཞེས་པའི་དོན་
ཀྱང་དེ་མ་ཡིན་པའི་ཕྱིར་རོ།།དང་པོ་གྲུབ་སྟེ།རྣམ་གྲངས་ཞེས་པ་ལེགས་སྦྱར་གྱི་
སྐད་དུ་པཪྻཱ་ཡ་ཞེས་པ་ཡིན་ཏེ།དེ་ནི་གནས་སྐབས་དང་རིམ་པ་དང་སྤྲུལ་པ་དང་རྣམ་པ་
རྣམས་ལ་འཇུག་པར་མངོན་བརྗོད་ཀྱི་བསྟན་བཅོས་རྣམས་སུ་བཤད་ལ།དེ་རྣམ་གྲངས་སུ་
བསྒྱུར་བ་ནི་རྣམ་པ་ལ་འཇུག་པའི་རྒྱུ་མཚན་གྱིས་ཡིན་པས།རྣམ་གྲངས་དང་རྣམ་པ་དོན་
གཅིག་ཏུ་གྲུབ་པའི་ཕྱིར་ཏེ།དཔེར་ན་མིང་གི་རྣམ་གྲངས་གཞན་མེད་དོ།།དོན་གྱི་རྣམ་
གྲངས་མང་པོའོ།།དོན་གྱི་རྣམ་གྲངས་གཅིག་གོ།འདི་ནི་རྣམ་གྲངས་ཙམ་མོ།།རྣམ་གྲངས་
ཀྱི་དོན་དམ་བདེན་པའོ།།ཞེས་པ་ལྟ་བུ་རྣམས་ལ་གྲངས་མང་ཉུང་གི་ཁྱད་པར་མེད་པར། མིང་གི་རྣམ་པ་གཞན་མེད་དོ།།དོན་གྱི་རྣམ་པ་མང་པོའོ།།དོན་གྱི་རྣམ་པ་གཅིག་གོ།
འདི་ནི་རྣམ་པ་ཙམ་མོ།།རྣམ་པའི་དོན་དམ་བདེན་པའོ།།ཞེས་ཐམས་ཅད་དུ་རྣམ་པའི་སྒྲ་
དང་འཇུག་པ་གཅིག་པར་སྣང་བའི་ཕྱིར་རོ།།དེས་ན་ཕྱི་མའང་གྲུབ་སྟེ།སྐབས་འདིར་སྨྲ་
སྒོའི་གཞུང་དུ་རྣམ་གྲངས་གཞན་ཅན་ཞེས་དང་།འགྲེལ་བར་རྣམ་གྲངས་གཞན་ཡོད་པར་
སྦྱོར་བ་ཞེས་འབྱུང་བར་རྣམ་གྲངས་ཀྱི་སྒྲས་ནི་རྣམ་པ་ཙམ་ལས་གཞན་མ་བསྟན།དེ་ལས་
གཞན་དུའང་མང་པོ་དགོས་པ་སྟོན་བྱེད་ཀྱི་ཚིག་མ་བྱུང་ཞིང་རྒྱུ་མཚན་གཞན་ཡང་མེད་
པས།དེ་སྒྲ་དེའི་ཤུལ་དུ་དོན་གྱི་རྣམ་པ་གཞན་སྦྱར་རྒྱུ་ཡོད་པས་ཆོག་པ་ལ།དགོས་
མེད་ཀྱི་འབྲུ་དོན་ལྷག་པར་གཉེར་པར་སྣང་བའི་ཕྱིར་རོ།།
གཞན་ཡང་འགྲེལ་བྱེད་ཕྱི་མ་ཞིག་གིས།ཐ་སྙད་ལ་བློའི་ཐ་སྙད་དང་།མིང་ཚིག་གི་ཐ་
སྙད་གཉིས་སུ་ཕྱེས་ཤིང་འདིར་བསྟན་གྱི་ཐ་སྙད་ཕྱི་མར་འདོད་པ་དང་།དངོས་པོ་ཞེས་
པ་སྐབས་འདིར་བརྗོད་བྱའི་དོན་ཙམ་ལ་ངོས་བཟུང་མོད།སྔ་མ་མི་འཐད་དེ།མིང་ཚིག་ལ་མ་
བརྟེན་པར་བློ་ཁོ་ནས་ཐ་སྙད་བྱར་མི་རུང་ཞིང་།བློ་ལ་མ་བརྟེན་པར་ཡང་མིང་ཚིག་ཁོ་
ནས་ཐ་སྙད་གདགས་སུ་མེད་པས་དེ་གཉིས་ཀྱི་དབྱེ་བ་འཁྲུལ་བའི་ཕྱིར་ཏེ།ཐ་སྙད་ལ་
ཤེས་བརྗོད་འཇུག་གསུམ་དང་བཅས་པ་ཞེས་མཁས་པའི་བསྟན་བཅོས་ལ་རླུང་ལྟར་གྲགས་པའི་
ཕྱིར་རོ།།ཕྱི་མའང་མི་འཐད་དེ།དེ་ལྟ་ན།ལྷག་བཅས་ཀྱི་དེ་སྒྲ་དེས་ཆོས་ཅན།དངོས་
པོ་སྟོན་བྱེད་དུ་ཐལ།བརྗོད་བྱའི་དོན་སྟོན་བྱེད་ཡིན་པའི་ཕྱིར།འདོད་ན་དེ་འདྲ་
དེས་བདེན་པ་ལ་སོགས་པ་དངོས་པོ་བཞི་ལས་གང་ཞིག་སྟོན་པ་བཤད་དགོས་ཤིང་།མ་གྲུབ་ན་
ལྷག་བཅས་ཀྱི་སྒྲ་མཚམས་སྦྱོར་སོགས་དོན་མང་པོ་ལ་འཇུག་པར་བཤད་པ་དང་དངོས་སུ་
འགལ་ལོ།།འདིར་སྨྲས་པ།
ལ་ལས་ལོ་བརྒྱར་སྦྱངས་པ་གང་།།ལ་ལས་ཡུད་ཙམ་གཅིག་ལ་ཤེས།།ལ་ལས་ཚེགས་ཀྱིས་
བསྒྲུབ་པ་ཡང་།།ལ་ལས་བདེ་བླག་ཉིད་དུ་བྱེད།།ལ་ལས་མཁས་པར་རློམ་པ་གང་།།ལ་ལས་
རྨོངས་པའི་གནས་སུ་བཀོད།།ལ་ལར་སྨྲ་བའི་དབང་ཕྱུག་ཀྱང་།།ལ་ལར་ལྐུགས་པའི་བརྟུལ་
ཞུགས་འཛིན།།བློ་ལྡན་ཙམ་དུ་མཚུངས་ན་ཡང་།།བློ་གྲོས་མཆོག་གི་ཁྱད་པར་ལྟོས།།བློ་
སྟེར་དབང་པོའི་བློ་མཚོ་ལས།།བྱུང་བའི་བློ་ཅན་ང་མིན་སུ།།
བཞི་པ་གང་སྒྲའི་འཇུག་ཚུལ་ནི།
གང་མིང་བརྗོད་པའི་དང་པོ་རུ།།དང་པོ་ལ་ནི་གཉིས་པ་སྦྱར།།སྤྱི་ལ་ཁྱབ་པ་ཉིད་དུ་འགྱུར།།
ཞེས་པས་བསྟན་ཏེ།གང་ཡང་རུང་བའི་མིང་བརྗོད་པའི་དང་པོར་རྗེས་འཇུག་དང་པོ་ག་
ལ་གཉིས་པ་ང་སྦྱར་བས།གང་།ཞེས་གྲུབ་པ་དེ་ནི་གཙོ་བོར་དོན་གྱི་བྱེ་བྲག་དམིགས་
སུ་མི་འཛིན་པར་སྤྱི་ལ་ཁྱབ་པའི་དོན་ཅན་གྱི་སྒྲ་ཉིད་དུ་འགྱུར་རོ།།ཞེས་སོ།།
དེའང་དཔེར་ན།གང་ཞིག་རྟག་ཏུ་སྙིང་པོའི་དོན་བསམས་པས།།གང་ཡང་དམན་པར་འགྱུར་བའི་
གནས་དེ་ཅི།།ཞེས་པ་ལྟ་བུ་སྤྱི་སྒྲ་དངོས་དང་།གང་ཞིག་བསྟེན་ན་ཡོན་ཏན་ཀུན།།
འདོད་དགུར་སྦྱིན་པ་ཁོ་བོའི་རྗེ།།ཞེས་པ་ལྟ་བུ་བྱེ་བྲག་ལ་འཇུག་པའི་སྤྱིའི་
སྒྲ་དང་།འདིའི་གཏན་ཚིགས་གང་།ཁྱོད་ཀྱི་ལྷ་གང་ཡིན།གང་བྱེད།ལྟ་བུ་སྤྱི་སྒྲ་
འདྲི་བའི་དོན་དུ་སྦྱོར་བ་སོགས་སྐབས་ཐོབ་ཀྱི་སྒོ་ནས་ཤེས་པར་བྱ་ཞིང་།འདིར་
མིང་ཐོག་ཏུ་སྦྱར་བ་གསུངས་པའང་གཙོ་ཆེ་བའི་དོན་ལ་དགོངས་ཀྱི་མིང་མཐར་མི་འཇུག་
པ་ནི་མ་ཡིན་ཏེ།སྔོན་དུ་དྲི་བའི་དཔེར་བརྗོད་ལ་སོང་བ་ལྟར་དང་དེ་འདྲར་མ་ཟད།དེ་
ཐོབ་བྱ་ཕྱིར་གང་དང་བསྟན་བཅོས་གང་།།ཞེས་སོགས་མང་དུ་འབྱུང་བ་ལྟར་རོ།།
འདི་ནས་མ་བསྟན་ཀྱང་ཅི་དང་ཇི་དང་སུའི་སྒྲ་རྣམས་གང་དང་སྐབས་ཕལ་ཆེར་ལ་འཇུག་
པ་མཚུངས་པ་ཡིན་ཏེ།དེ་དག་ཐམས་ཅད་གང་ཅིའང་རུང་།།ཇི་ལྟར་སུ་དག་འགྲོ་བ་རྣམས།།
ལྟ་བུའི་ཅི་སོགས་སྤྱི་སྒྲ་ལ་འཇུག་པ་དངོས་དང་།ཅི་ཞིག་བསམས་པ་དེ་གྲུབ་ནས།།ཇི་
ལྟར་བདེ་བ་དེ་ལྟ་བར།།སྐལ་བཟང་སུ་ཡིན་དེ་འགྲོ་འགྱུར།།ཞེས་པ་ལྟ་བུ་བྱེ་བྲག་ལ་
འཇུག་པའི་སྤྱི་སྒྲ་དང་།དངོས་པོ་དེ་ཅི་ཇི་ཙམ་ཞིག།བདག་པོ་ཁྱོད་སུ་ལེགས་པར་
སྨོས།།ལྟ་བུ་དྲི་བ་ལ་འཇུག་པ་རྣམས་སོ།།ཅི་ལ་སོགས་པ་དེ་རྣམས་རྣམ་པ་ཐམས་ཅད་གང་
དང་འཇུག་པ་མཚུངས་པའང་མ་ཡིན་ཏེ་སུའི་སྒྲ་གང་ཟག་ཁོ་ན་ལ་སྦྱོར་གྱི་བེམ་པོ་
སོགས་དངོས་པོ་གཞན་ལ་མི་འཇུག་པ་དང་།ཇི་སྙེད་དང་།ཇི་སྲིད་ལྟ་བུ་ལ་གང་སྒྲ་མི་ འཇུག་པ་དང་།ཅིས་ཀྱང་ལྟ་བུ་ལའང་གང་དང་ཇིའི་སྒྲ་མི་འཇུག་པ་སོགས་འཇིག་རྟེན་
པའི་ཉེར་སྤྱོད་དང་བསྟུན་ནས་སྐབས་ཐོབ་ཀྱིས་ཤེས་པར་བྱའོ།།
ལྔ་པ་བདག་སྒྲ་བཤད་པ་ལ།དངོས་དང་།མཐའ་དཔྱད་དོ།།དང་པོ་ནི།
གང་མིང་གི་ནི་མ་མཐའ་ན།།པུ་ལིངྒ་ཡི་སྒྲ་མེད་པ།།
དེ་ལ་པུ་ལིངྒ་སྦྱར་ན།།བདག་པོའི་སར་ནི་ཤེས་པར་བྱ།།
ཞེས་པ་སྟེ།གང་ཡང་རུང་བའི་མིང་གི་མ་མཐའ་རྣམས་སུ་པུ་ལིངྒ་སྟེ་སྐྱེས་བུའི་
རྟགས་མཚོན་པར་བྱེད་པའི་སྒྲ་སྔར་མེད་པ་ཞིག་ཡིན་ན།དེ་ལ་པུ་ལིངྒའི་སྒྲ་སྦྱར་
བར་བྱས་པས་དེའི་བདག་པོའི་དོན་གསལ་བར་ནུས་པའི་ཕྱིར་བདག་པོའི་སར་ཤེས་པར་
བྱའོ།།ཞེས་སོ།།དེ་ལ་པུ་ལིངྒའི་སྒྲ་ནི་བདག་པོའི་དོན་སྟོན་པར་བྱེད་པའི་པ་དང་
པོའི་སྒྲ་གཉིས་ཡིན་ཏེ།དེ་དག་སྔར་མེད་པ་ལ་གསར་དུ་སྦྱར་བས།རྟ་པ།གསེར་པ།ཁ་ལོ་
པ།ཕྲིན་ལས་པ།བྱེད་པོ།ལེན་པོ།གཏོང་བ་པོ་སོགས་སོ་སོའི་བདག་པོ་གོ་བར་བྱེད་པ་
རྣམས་སོ།།དེ་བཞིན་དུ།ཡོད་པ་པ།མེད་པ་པ།བྱེད་པ་པོ།ཤེས་པ་པོ།ལྟ་བུ་རྣམས་ཀྱང་
སྔོན་ནས་ཡོད་པའི་སྒྲ་རྣམས་བདག་པོའི་དོན་མི་སྟོན་པའི་ཕྱིར་པུ་ལིངྒའི་སྒྲ་
མིན་པས་སླར་པུ་ལིངྒའི་སྒྲ་སྦྱར་ཏེ་བདག་པོའི་དོན་ཅན་དུ་སོང་བ་ཡིན་ནོ།།བདག་
པོ་ཞེས་པའང་།རྟ་དང་གསེར་སོགས་དང་བྱེད་པ་དང་ཤེས་པ་སོགས་གང་ལ་ཡོད་པའི་གང་ཟག་
དེར་ཤེས་དགོས་ཏེ།བེམ་པོ་སོགས་ལ་བདག་པོའི་ཐ་སྙད་མི་འཇུག་པའི་ཕྱིར་རོ།།འདིར་
པུ་ལིངྒ་དང་སྟྲཱི་ལིངྒ་ཞེས་པའི་དོན་ཀྱང་བོད་ཡུལ་དུ་གྲགས་པའི་ཐ་སྙད་ལ་བྱེད་
པ་པོ།འབྱིན་པ་པོ།ཞི་བ་པ།ལྷ་པ།ཆོས་པ།ལྟ་བུའི་པ་དང་པོའི་སྒྲས་སྐྱེས་པར་མཚོན་
ཞིང་དེ་ལས་ལྡོག་སྟེ།བྱེད་པ་མོ།འབྱིན་པ་མོ།ཞི་བ་མ།ལྷ་མ།ཆོས་མ་ལྟ་བུའི་མ་དང་
མོའི་སྒྲས་བུད་མེད་དུ་མཚོན་པར་བྱེད་པའི་རྒྱུ་མཚན་གྱིས་སྒྲ་དེ་དང་དེ་དག་ལ་
སྐྱེས་པའི་རྟགས་དང་བུད་མེད་ཀྱི་རྟགས་ཀྱི་མིང་གིས་བསྟན་པར་ཤེས་པར་བྱའོ།།
གཉིས་པ་ནི།
སྐབས་འདིར་འགྲེལ་བྱེད་ཁ་ཅིག་གིས།བ།ཅན།ལྡན་རྣམས་ཀྱང་པུ་ལིངྒའི་སྒྲར་འདོད་
པར་སྣང་བ་འཐད་པར་མ་མཐོང་སྟེ།དེ་དག་ལ་བཤད་མ་ཐག་པ་ལྟར་གྱི་པུ་ལིངྒའི་སྒྲ་
འཇུག་པའི་རྒྱུ་མཚན་མེད་པའི་ཕྱིར་དང་།ཅན་དང་ལྡན་གྱི་སྒྲ་གཉིས་གང་ཞིག་གང་ལ་
ཡོད་པ་སྟོན་པའི་ཆ་ནས་བདག་སྒྲ་དང་མཚུངས་པ་ཡོད་ཀྱང་དེ་དག་བེམ་པོ་ལའང་འཇུག་པས་
བདག་སྒྲར་མ་ངེས་པའི་ཕྱིར་དང་།བ་ཡིན་ནི་པུ་ལིངྒའི་སྒྲ་དངོས་སུ་འགྱུར་བ་ལྟ་
ཅི་སྨོས།སྤྱིར་བདག་པོ་སྟོན་བྱེད་ཙམ་དུའང་མི་འཇུག་པའི་ཕྱིར་རོ།།ཕྱི་མ་གྲུབ་
སྟེ།བ་ཡིག་བདག་སྒྲར་འཇུག་པའི་དཔེར་བརྗོད་དུ།འཁོར་ལོས་སྒྱུར་བ།ལྷ་ས་བ།སེ་ར་
བ།ལྟ་བུ་དུ་མ་བཀོད་པ་རྣམས་ཀྱང་མི་འཐད་ཅིང་འཐད་ལྡན་གྱི་དཔེར་བརྗོད་གཞན་ཡང་
དགོད་རྒྱུ་མེད་པའི་ཕྱིར་ཏེ།འཁོར་ལོས་སྒྱུར་བ།ལྟ་བུའི་བ་ཡིག་གིས་བདག་པོ་ མཚོན་པ་ལྟར་སྣང་ཡང་དེ་འདྲ་ནི་འཁོར་ལོས་སྒྱུར་བ་པོ་ཞེས་པའི་པོ་སྒྲ་བསྡུས་
པའི་རྗེས་ཙམ་ཡིན་པས་པོ་ཡིག་དངོས་སུ་མེད་ཀྱང་མིང་སྤྱིའི་ཁོག་ནས་བདག་པོའི་
དོན་གསལ་བ་ཡིན་གྱི་བ་ཡིག་ཁོ་ནའི་ནུས་པ་མ་ཡིན་པ།བ་ཡིག་མེད་པའི།འཁོར་སྒྱུར།
ལྟ་བུས་ཀྱང་བདག་པོ་གོ་ནུས་པ་སོགས་ཀྱིས་མཚོན་ལ།ལྷ་ས་བ།སེ་ར་བ།ལྟ་བུ་རྣམས་ནི་
གྲོང་པའི་སྐད་ཕལ་པ་ཙམ་དུ་ཟད་པས་དཔེར་མི་འོས་ཏེ།དེ་འདར་ལ་ཡིད་བརྟན་འཆའ་ན་
ནོར་བ་མང་པོའང་ཁས་ལེན་དགོས་པར་འགྱུར་ཞིང་།དེ་དག་དག་པར་འདོན་ན།ལྷ་ས་པ།སེ་ར་
པ།ལྟ་བུར་བརྗོད་རིགས་པའི་ཕྱིར་རོ།།
ཡང་རྗེས་འཇུག་འ་ཡིག་མོར་འདོད་པ་རྣམས་ཀྱིས་དེ་འདྲ་དེ་རྟགས་མཚུངས་འདྲེན་
ཚུལ་དུ་བསམས་པ་ཡོད་སྲིད་ཀྱང་།བདག་སྒྲ་འདི་རྗེས་འཇུག་གི་ཁྱད་པར་ལ་མི་ལྟོས་
པའི་ཕྲད་རང་དབང་ཅན་ཡིན་པས་དེ་འདྲར་མི་འགྱུར་བར་མ་ཟད།རྟ་པ།གྲྭ་པ།ཡོད་པ་པ།ཞི་
བ་པ།ལ་སོགས་པ་སྦྱོར་ཚུལ་མ་ལོག་པའི་དཔེར་བརྗོད་རྣམས་ལ་བརྟགས་པས་ཀྱང་འཁྲུལ་བ་
སེལ་བར་འགྱུར་རོ།།
ཡང་འགའ་ཞིག་གིས།པ་བ་ཅན་རྣམས་འཇུག་པ་མཚུངས་པའི་སྒྲུབ་བྱེད་དུ།པ་བ་ཅན་ནི་
བདག་པོའམ།།ལྡན་པའི་དོན་དུ་སྦྱར་བར་བྱ།།ཞེས་སྨྲ་སྒོའི་ལུང་འདྲེན་མོད།དེའི་
དཔེ་དག་པ་རྣམས་སུ།པའམ་ཅན་ནི་བདག་པོའམ།།ཞེས་འབྱུང་ཞིང་འགྲེལ་པར་ཡང་གསེར་པ་
དང་གསེར་ཅན་ཞེས་དཔེར་བརྗོད་པ་ལས་བ་ཡིག་གི་དཔེར་བརྗོད་མ་བྱུང་བ་མ་ཟད་གཞུང་
གི་དེ་མ་ཐག་ཏུ།
བ་ནི་སྤྱི་རུ་བཞག་པ་སྟེ།།ཡུལ་དུས་ངེས་པར་མ་བཟུང་བའོ།།ཟ་བ་བཟའ་དང་ཟ་པོ་
བཞིན།།མ་ནིང་དག་ཏུ་གཞག་པར་བྱ།།ཞེས་ཟ་བ་ལྟ་བུའི་བ་ཡིག་དེ་བྱ་བྱེད་བདག་གཞན་
དུས་གསུམ་གང་ལའང་བྱེ་བྲག་ཏུ་མི་འཇུག་པར་བཤད་པས།ཁྱེད་རང་གིས་དཔེ་མ་དག་པ་ཞིག་
མཐོང་བའང་བཀླགས་ཉེས་པའམ་རང་འདོད་ཀྱིས་བཅོས་པར་བས་ཀྱི།ལུང་དེ་ནི་ཁྱེད་ཀྱི་
འདོད་པ་དེའི་གནོད་བྱེད་ཡང་དག་ཏུ་ཡོད་དོ།།ཡང་འགའ་ཞིག་གིས།ཇ་མ་ཆང་ལ་སོགས་མ་
ཡིག་པུ་ལིངྒར་འགྱུར་བ་ཡོད་ཅེས་ཟེར་བ་ཐོས་ཀྱང་།གཞུང་དོན་ལ་ཅུང་ཟད་ཀྱང་མ་
དཔྱད་པའི་རྟགས་སུ་ཟད་དེ།དེ་འདྲ་དེས་བདག་པོའི་དོན་བསྟན་དུ་ཆུག་ཀྱང་པུ་
ལིངྒའི་ཟློག་ཕྱོགས་སྟྲཱི་ལིངྒའི་སྒྲ་ཡིན་པའི་ཕྱིར་རོ།།
དྲུག་པ་དགག་སྒྲ་བཤད་པ་ལ།དངོས་དང་།མཐའ་དཔྱད་གཉིས།དང་པོ་ནི།
གང་མིང་བརྗོད་པའི་ཡ་མཐའ་ན།།སྟྲཱི་ལིངྒ་ཡི་སྒྲ་མེད་པ།།
དེ་ལ་སྟྲཱི་ལིངྒ་སྦྱར་ན།།དགག་པའི་གནས་སུ་ཤེས་པར་བྱ།།
ཞེས་པ་སྟེ།གང་ཡང་རུང་བའི་མིང་བརྗོད་པའི་ཡ་མཐའ་སྟེ་ཐོག་མར་སྟྲཱི་ལིངྒ་
སྟེ།མོ་རྟོགས་ཀྱི་སྒྲ་མེད་པ་རྣམས་ལ་སྟྲཱི་ལིངྒའི་སྒྲ་སྦྱར་བ་བྱས་པ་ན་སྦྱོར་
ཡུལ་གྱི་དོན་དེ་མ་ཡིན་པའམ་མེད་པར་སྟོན་པའི་ཕྱིར་དགག་པའི་གནས་སུ་ཤེས་པར་
བྱའོ།།ཞེས་སོ།།དེ་ལ་སྟྲཱི་ལིངྒའི་སྒྲ་དངོས་ནི།མ་དང་མོ་གཉིས་ཁོ་ན་ཡིན་པ་གོང་ སྨོས་ལྟར་ལས་མོ་ཡིག་དགག་སྒྲ་ལ་མི་འཇུག་པས་འདིར་མ་ཡིག་ཉིད་གཟུང་བར་བྱ་ཞིང་།
དེ་དང་འབྲེལ་བའི་མི་ཡིག་ཀྱང་ཞར་གྱིས་ཐོབ་པས་དེ་དག་དགག་སྒྲར་སྦྱོར་ཚེ་དགག་
བྱའི་མིང་ཐོག་ཁོ་ནར་ངེས་པ།དཔེར་ན།མ་ཡིན།མ་ལུས།མ་ཤེས།མ་མཐོང་།མ་ངལ།མ་བྱེད།མ་
སྟོན།མི་རིགས།མི་འགྱུར།མི་རྟག།མི་འགལ།མི་བྱ།ལ་སོགས་པ་ལྟ་བུའོ།།
གཉིས་པ་ནི།
སྐབས་འདིར་འགྲེལ་བྱེད་ཕལ་ཆེར་གྱིས་འདིར་བསྟན་མོ་རྟགས་ཀྱི་དགག་སྒྲ་མིང་
མཐར་ཡང་འཇུག་པ་ཡོད་པར་འདོད་ཅིང་།དེའི་དཔེར་བརྗོད་དུ།གཟུགས་མེད།སྒྲ་མེད།ཡོད་
མིན།མེད་མིན།སྒྲ་མ་ཡིན་སོགས་བཀོད་པ་དང་།ལ་ལས།བུམ་པས་སྟོང་བ།བུམ་པས་དག་པ།ལྟ་
བུའང་འདིའི་དཔེར་བརྗོད་དུ་བྱས་སྣང་བ་བློ་གྲོས་རྩིང་པོར་གྱུར་པའི་སྐྱོན་དུ་
ངེས་ཏེ།མེད་དང་མིན་དག་ནི་མ་ཡིག་དང་འབྲེལ་བའི་དགག་སྒྲར་གྱུར་པ་དང་དོན་དང་
ལྡན་པའི་ཕྲད་ཀྱང་ཡིན་པས་རྟགས་འཇུག་གི་སྐབས་སུ་འཆད་འགྱུར་ལྟར་སྟྲཱི་ལིངྒའི་
སྒྲའི་ཆ་ཤས་སུ་གཏོགས་མོད་ཀྱི་འདི་དག་མིང་གི་ཐོག་མར་མི་འཇུག་པས་སྐབས་འདིའི་
བསྟན་བྱ་མ་ཡིན་པ་དང་།མ་ཡིན་ཞེས་པ་ནི་དགག་བྱ་ཡིན་ཞེས་པའི་མིང་དེའི་སྔོན་དུ་
འགོག་བྱེད་མོ་རྟགས་སྦྱར་བ་ཡིན་པས་ཁོ་རང་གི་ཞེན་དོན་གྱི་དཔེར་མི་རུང་བ་དང་།
སྟོང་པ་དང་དག་པ་སོགས་ཀྱང་ཕྲད་མོ་རྟགས་གཉིས་ཀ་མིན་པའི་ཕྱིར་ཏེ།དགག་པའི་དོན་
ཅན་གྱི་སྒྲ་ཡོད་ཚད་གཏི་ཐུག་རིགས་འགྲེས་ཀྱིས་འདིར་བསྡུ་བར་རློམ་པ་གཞུང་དོན་
ལ་ཤིན་ཏུ་མ་ཞུགས་པར་འདུག་པའི་ཕྱིར་རོ།།འདི་སྐབས་ཕྲད་ཁོ་ན་མ་ཡིན་པར་མིང་གི་
འཇུག་པ་གཞན་བསྟན་པས་ཅི་ཞིག་ཉེས་ཤེ་ན།སྤྱིར་མིང་གི་འཇུག་པ་སྟོན་པ་ནི་མངོན་
བརྗོད་ཀྱི་བསྟན་བཅོས་སོགས་སུ་གཙོ་བོར་ཡིན་ཞིང་།བརྡ་དག་གི་བསྟན་བཅོས་རྣམས་
སུ་ནི་མིང་ཚིག་དེ་དག་གི་ཡི་གེའི་སྦྱོར་ཚུལ་ཕྲད་དང་རྣམ་དབྱེ་ལ་སོགས་པ་གཙོ་
བོར་འབྱུང་བ་ཤེས་དགོས་ལ།ཁྱད་པར་གཞུང་འདིར་ནི་ཕྲད་དང་རྣམ་དབྱེ་ཁོ་ན་བསྟན་པ་
མངོན་སུམ་གྱིས་གྲུབ་བཞིན་དུ་དེའི་སྐབས་དོན་དང་མི་མཐུན་པའི་མིང་དོན་ལྷག་པོ་
ཁ་ཤས་བསྣན་ནས་དགོས་མེད་ཀྱི་བཤད་ཡམ་བྱེད་པ་ནི་རིགས་པར་སྨྲ་བའི་མཁས་པ་རྣམས་
ཀྱི་མདུན་སར་མཛེས་པ་མ་ཡིན་ནོ།།
གཞན་ཡང་སྨྲ་སྒོ་རྩ་འགྲེལ་དུ་འདིར་མ་བསྟན་པའི་ཕྲད་སོགས་མང་དུ་བཤད་ཅིང་ཕལ་
ཆེར་ལེགས་བཤད་དུའང་ཡོད་ལ་སྐྱོན་དུ་མངོན་པའང་དུ་མ་མཐོང་མོད།འདིར་ནི་ཡི་གེ་
མང་བའི་འཇིགས་པས་སྤྲོ་བར་མི་བྱ་ཞིང་བློ་ལྡན་རྣམས་ཀྱིས་ཤེས་པར་འདོད་ན་དེ་
ཉིད་དུ་རྟོགས་ཤིག།
གཉིས་པ་གདམས་ངག་བརྗོད་པས་མཇུག་བསྡུ་བ་ལ་བཞི་སྟེ།ཚིགས་བཅད་འགྲོལ་ཚུལ་ལ་
འདོམས་པ།ཉན་པ་པོ་སྤྲོ་བསྲིང་བའི་སྒོ་ནས་འདོམས་པ།བསླབ་ཚུལ་གྱི་གོ་རིམ་ལ་
འདོམས་པ།གདམས་ངག་སྣོད་རུང་ལ་བསྟན་དགོས་པར་འདོམས་པའོ།།དང་པོ་ནི།
ཚིགས་སུ་བཅད་པའི་མཚམས་སྦྱོར་རྣམས།།ཅུང་ཟད་བསྡུས་པ་ཡོད་ན་ཡང་།།
དེ་ནི་དེ་བཞིན་སྦྱར་བར་བྱ།།
ཞེས་པ་སྟེ།དེའང་བདེ་བར་གཤེགས་པའི་བཀའ་དང་བཀའི་དགོངས་འགྲེལ་གྱི་བསྟན་
བཅོས་དེ་དག་དང་རྗེས་སུ་འབྲེལ་བའི་རིག་གནས་ཐུན་མོང་བའི་བསྟན་བཅོས་རྣམས་ལ་
ཚིགས་སུ་བཅད་པ་ཡང་དག་པར་སྦྱར་བ་ཡོད་ན་ལྟ་ཅི་སྨོས།ཅུང་ཟད་བསྡུས་པར་གྱུར་པ་
ཡོད་ནའང་།དེ་ནི་འདིར་སྔོན་དུ་བསྟན་པའི་སླར་བསྡུ་ལ་སོགས་པ་ཇི་སྐད་བཤད་པ་དེ་
བཞིན་དུ་བསྣན་ཅིང་སྦྱར་ཏེ་བཤད་པས་དོན་ཁོང་དུ་ཆུད་པར་བྱ་སྟེ།དཔེར་ན།ཟག་བཅས་
ཟག་པ་མེད་ཆོས་རྣམས།།ཞེས་པ་ལྟ་བུར་ཟག་པ་དང་བཅས་པའི་ཆོས་རྣམས་དང་ཟག་པ་མེད་ པའི་ཆོས་རྣམས་ཞེས་སྡུད་པའི་སྒྲ་དང་འབྲེལ་སྒྲ་སོགས་བསྣན་ནས་དོན་རང་གིས་བསམ་
པ་དང་གཞན་ལ་འཆད་དགོས་པ་བཞིན་ནོ།།དེའང་ཚིགས་བཅད་ལ་ཚིག་སྡུད་མང་བའི་རྒྱུ་མཚན་
གྱིས་གཙོ་བོར་གསུངས་པ་ལས་ཚིག་ལྷུག་པར་ཡང་ཕྲད་སོགས་མཚམས་སྦྱོར་བསྡུས་པ་རྣམས་
ལ་འདི་ལྟར་སྦྱར་ཏེ་ཤེས་པར་བྱ་བ་ཉིད་དོ།།
གཉིས་པ་ལ།རྗེས་འཇུག་མེད་མི་རུང་དུ་བསྟན་པ།རྗེས་འཇུག་ཤེས་པའི་དགོས་པ་བསྟན་པ།དེ་དོན་ལ་དབབ་པའི་ཚུལ་བསྟན་པའོ།།དང་པོ་ནི།
སྔོན་འཇུག་ཡོད་དམ་མེད་ཀྱང་རུང་།།མིང་གཞིའི་ཡི་གེ་གང་ཡིན་ལ།།
གཉིས་འབྲེལ་
ཡོད་དམ་གསུམ་འབྲེལ་ཡོད།།ཨཱ་ལི་བཞི་ལས་གང་ལྡན་ཡང་།།
རྗེས་འཇུག་བཅུ་པོ་མ་ཞུགས་ ན།།མིང་གཞན་སྦྱོར་བ་ཡོད་མི་སྲིད།།
ཅེས་པ་སྟེ།མིང་ཚིག་གི་སྦྱོར་བ་རྣམས་ལ་གོང་དུ་བཤད་པའི་སྔོན་འཇུག་གི་ཡི་
གེ་རྣམས་སྔོན་དུ་ཞུགས་པ་ཡོད་དམ་མེད་ཀྱང་རུང་སྟེ།བསྒྲུབས།སྒྲུབ།ལྟ་བུ་ཅི་
རིགས་པར་སྣང་ཞིང་འཕུལ་རྟེན་གྱི་འཇུག་ཡུལ་མིང་གཞིའི་ཡི་གེ་རྣམས་ནི།ལྔ།ལྷ།ལྟ་
བུ་གཉིས་འབྲེལ་ཡོད་དམ།སྒྲ།རྒྱ།ལྟ་བུ་གསུམ་འབྲེལ་ཡོད་དམ།དེ་དག་ལ་ཨཱ་ལི་བཞི་
ལས་གང་ཡང་རུང་བ་ལྡན་པ།ལྷུ།སྒྲོ།ལྟ་བུ་རྣམས་ལའང་རྗེས་འཇུག་བཅུ་པོ་གང་ཡང་རུང་
བ་ཞིག་མ་ཞུགས་ན་ཡི་གེའི་གཟུགས་དེ་ཉིད་ལས་མིང་དོན་གཞན་ལ་འཇུག་ཅིང་སྦྱོར་བ་
ནི་ཚུལ་འདི་ལ་ནམ་ཡང་སྲིད་པ་མ་ཡིན་ནོ།།ཞེས་སོ།།དེས་ན་དཔེར་སྨོས་པ་དེ་དག་ལ་
རིམ་པ་བཞིན་རྗེས་འཇུག་སྦྱར་བས།ལྡན།ལྷའ།སྒྲའ།རྒྱན།ལྷུན།སྒྲོན།ལྟ་བུ་སོ་སོར་
དོན་དང་བཅས་པར་འགྱུར་བ་སྟེ།སྒྲ་སྒྱུར་ཕྱི་མ་རྣམས་ཀྱིས་སྐད་གསར་བཅད་ཀྱི་ཚེ།
དཔའ།འདའ།དགའ།སོགས་དགོས་དབང་གིས་དམིགས་གསལ་ཁ་ཤས་མ་གཏོགས་འ་མཐའ་ཕལ་ཆེར་ཟོར་
ཡང་བའི་ཆེད་དུ་བསྡུ་བར་མཛད་པས་དེང་སང་དངོས་སུ་མེད་ནའང་རྣམ་དབྱེ་དང་ཕྲད་ཀྱི་
སྐབས་སུ་དོན་གྱིས་ཐོབ་པ་དེ་གསལ་བར་མཚོན་པ་གོང་བཤད་ལྟར་རོ།།
འདི་སྐབས་འགྲེལ་བྱེད་སྔ་མ་འགའ་ཞིག་གིས།རྗེས་འཇུག་གང་རུང་མ་ཞུགས་པའི་མིང་
གི་སྦྱོར་བ་ཡོད་པར་འདོད་པ་སོགས།འཁྱོག་བཤད་མང་དུ་བྱས་པ་མཐོང་མོད་ཀྱི་སླད་ནས་
དཔྱོད་ལྡན་ཁ་ཅིག་གིས་སུན་འབྱིན་པར་མཛད་འདུག་པས་དགག་པ་མ་སྤྲོས་སོ།།
གཉིས་པ་ནི།
རྗེས་འཇུག་བཅུ་ཡི་དོན་ཤེས་ན།།འབྲི་དང་ཀློག་དང་བཤད་རྣམས་ཀྱི།།
མཚམས་སྦྱོར་
སྒྲ་ལ་ཐོགས་མེད་ཅིང་།།འབྲེལ་བ་སྨྲ་བའི་མཆོག་ཏུ་འགྱུར།།
གཞན་ཡང་རྗེས་འཇུག་ ཤེས་པ་ཡིས།།དོན་གྱི་སྦྱོར་བ་མ་མཐོང་ཡང་།།
དོན་དང་མཐུན་པའི་སྦྱོར་བ་ཤེས།།
ཞེས་པ་སྟེ།དེ་ལྟར་རྗེས་འཇུག་གི་ཡི་གེ་བཅུའི་བྱ་བ་དང་གཙོ་བོར་འབྲེལ་བའི་
ཕྲད་དང་རྣམ་དབྱེ་ལ་སོགས་པའི་སྒྲ་དོན་གྱི་འཇུག་ཚུལ་ལེགས་པར་ཤེས་ན།མདོ་རྒྱུད་
བསྟན་བཅོས་རྣམས་ཡི་གེར་འབྲི་བ་དང་ཡི་གེར་བྲིས་ཟིན་པ་རྣམས་བརྗོད་པ་དག་པར་
ཀློག་པ་དང།ཚིག་དོན་རྒྱ་ཆེར་བཀྲོལ་ནས་བཤད་པ་བྱེད་པ་དང་།དེར་མ་ཟད།བསྟན་བཅོས་
སོགས་རྩོམ་པ་དང་།གཞན་གྱི་རྒོལ་བ་ཚར་གཅོད་པའི་ཕྱིར་རྩོད་པ་བྱེད་པ་ལ་སོགས་
པའི་ཚེ་ཚིག་དོན་སྔ་ཕྱི་མཚམས་སྦྱོར་བའི་སྒྲ་དོན་རྣམས་ལ་བློ་གྲོས་ཀྱི་སྣང་བ་
འཇུག་པར་ཐོགས་པ་མེད་ཅིང་ཚིག་དང་དོན་སྔ་ཕྱི་གོ་ལོག་པ་དང་།མི་འབྲེལ་བ་དང་།
འགལ་བ་ལ་སོགས་པའི་སྐྱོན་མེད་པར་འཐད་པ་དང་ལྡན་ཞིང་འབྲེལ་ཆགས་པ་ཁོ་ན་སྨྲ་བའི་
མཆོག་ཏུ་འགྱུར་བ་དང་།གཞན་ཡང་རྗེས་འཇུག་གི་དོན་ཚུལ་བཞིན་ཤེས་པ་དེས།ཡི་གེར་
བྲིས་པ་མཐོང་བའམ་གཞན་གྱིས་ལེགས་པར་སྨྲས་པ་ཐོས་ཀྱང་རུང་རང་ཉིད་ཀྱིས་དེའི་
དོན་གྱི་སྦྱོར་བ་སྔར་མ་མཐོང་བ་སྟེ་སྤྱོད་ཡུལ་དུ་མ་གྱུར་པ་ཞིག་ཡིན་ནའང་
བརྗོད་པ་དེའི་ཕྲད་སོགས་ཀྱི་ནུས་པས་དོན་དང་མཐུན་པའི་སྦྱོར་བ་གང་ཡང་རྗེས་སུ་
དཔག་སྟེ་ཤེས་པར་ནུས་པ་ཡིན་ནོ།།ཡང་ན་ཚིག་རྐང་ཕྱི་མ་གཉིས་ཀྱི་དོན།བསྟན་བཅོས་
ལ་སོགས་པའི་དོན་རྣམ་པར་འབྱེད་པའི་སྦྱོར་བ་སྟེ།དེའི་འགྲེལ་བཤད་སོགས་སྔོན་ཆད་
མ་མཐོང་ཡང་འགྲེལ་བཤད་སོགས་ཀྱི་དོན་དང་མཐུན་པའི་ཚིག་གི་སྦྱོར་བ་ཤེས་པར་
འགྱུར་རོ།།ཞེས་པའོ།།
གསུམ་པ་ནི།
རྗེས་འཇུག་སྦྱོར་བ་མཁས་པ་ན།།ལུང་གི་དོན་དང་སྦྱོར་བ་དང་།།
བླ་མའི་མན་ངག་གསུམ་སྦྱར་ནས།།དོན་གྱི་ཐོག་ཏུ་དབབ་པར་བྱ།།
ཞེས་པ་སྟེ།རྗེས་འཇུག་གི་སྦྱོར་བ་རྣམས་ལ་མཁས་པར་གྱུར་པའི་གང་ཟག་གིས་རང་
ཉིད་ཐུན་མོང་དང་ཐུན་མོང་མ་ཡིན་པའི་ཤེས་བྱ་རིག་པའི་གནས་གང་དང་གང་ལ་འཇུག་ཅིང་
ཤེས་པར་འདོད་པ་ན་དེ་དང་དེའི་རང་རང་གི་ཁུངས་སུ་ཆེ་བའི་ལུང་ཐུན་མོང་བར་དྲང་
སྲོང་དང་པཎྚིཏས་བྱས་པའི་བསྟན་བཅོས་དང་།ཐུན་མོང་མིན་པར་བཅོམ་ལྡན་འདས་ཀྱི་
གསུང་རབ་དང་།དེའི་དགོངས་འགྲེལ་ཚད་ལྡན་རྣམས་ལས་འབྱུང་བ་དག་གི་དོན་དང་སྐབས་
སུ་ཇི་ལྟར་འཚམ་པར་སྦྱོར་བར་བྱེད་པ་དང་།བསླབ་པར་བྱ་བ་གང་ཡིན་པ་དེ་ལ་མཁས་ཤིང་
དོན་ཚུལ་བཞིན་དུ་འདོམས་པའི་བླ་མའི་མན་ངག་དག་ཀྱང་མཉན་ནས་རྗེས་འཇུག་གི་སྦྱོར་
བ།ལུང་དོན།བླ་མའི་མན་ངག་གསུམ་ཕྱོགས་གཅིག་ཏུ་སྦྱར་ཏེ་ཤེས་པར་འདོད་པའི་དོན་ དེའི་སྟེང་དུ་དབབ་པས་བདེ་བླག་ཏུ་རྟོགས་པར་འགྱུར་བ་དེ་ལྟར་བྱའོ།།ཞེས་སོ།།
དེའང་ངག་དོན་རྟོགས་པར་སླ་བ་རྣམས་ནི་འཕྲད་ལ་སོགས་པའི་དོན་ཤེས་པས་ཀྱང་འགྲོལ་
བར་ནུས་ལ།རྟོགས་པར་དཀའ་ཞིང་འཁྲུལ་གཞི་དང་བཅས་པ་རྣམས་ལ་ནི་དེར་མ་ཟད་ལུང་དོན་
ཀྱང་སྦྱོར་དགོས་པ་དང་།ལུང་གི་དོན་ཀྱང་ཟབ་ཅིང་རྒྱ་ཆེ་བ་དག་འཁྲུལ་མེད་དུ་ཤེས་
པ་བླ་མའམ་སློབ་དཔོན་ལ་རག་ལས་པའི་ཕྱིར་དེ་ལྟར་གསུངས་ཀྱི།ཚིག་སྦྱོར་ཕྲ་མོ་
རེའི་དོན་ལའང་དེ་གསུམ་ག་ངེས་པར་ཚོགས་དགོས་པའི་དོན་ནི་མ་ཡིན་ནོ།།འདི་སྐབས་ཁ་
ཅིག་གིས།དོན་གྱི་ཐོག་ཏུ་ཞེས་པའི་དོན་དེ་སྙིང་པོའི་དོན་ཉམས་ལེན་ཁོ་ནར་བཤད་པ་
ནི་ཁྱབ་ཆུང་ངོ་།།
གསུམ་པ་བསླབ་ཚུལ་གྱི་གོ་རིམ་ལ་འདོམས་པ་ནི།
བསླབ་ལ་བརྩོན་པའི་གང་ཟག་གིས།།དང་པོར་ང་རོ་རྣམས་ལ་སྦྱང་།།
སྔོན་འཇུག་མིང་
གཞི་རྗེས་འཇུག་གསུམ།།ཀློག་གི་ཆེད་དུ་བསླབ་པ་ཡིན།།
རྗེས་འཇུག་བཞི་ཡི་སྦྱོར་བ་
ནི།།མཉན་བསམ་བསྟན་པའི་དོན་དུ་སྦྱར།།
ཡན་ལག་དེ་དག་མཐུ་ཡིས་ནི།།འབྲས་བུའི་ཆེད་ དུ་དོན་ལ་དབབ།།
བསླབ་པའི་རིམ་པ་འདི་ཡིས་ནི།།གང་ཞིག་འབད་པ་ཆུང་ངུས་ཀྱང་།།
ཤེས་
རབ་མྱུར་དུ་གྲོལ་བར་འགྱུར།།དེ་ཕྱིར་དང་པོར་འདི་ཉིད་བསླབ།།
དེ་ནས་རྒྱས་པའང་ མཉན་བྱས་ཏེ།།བསླབ་པ་གང་ལ་དད་པ་ཡི།།
གཞུང་ཉིད་བླ་མ་དག་ལས་མཉན།།
ཞེས་པས་བསྟན་ཏེ།རིག་པའི་ཚུལ་གང་ཞིག་བསླབ་པར་བྱ་བ་ལ་བརྩོན་པས་འཇུག་པར་
བྱེད་པའི་གང་ཟག་ལས་དང་པོ་པ་དེས་ནི་ཐོག་མ་ཉིད་དུ་ང་རོ་ཞེས་བྱ་བ་ཡི་གེ་རྐྱང་
བ་རྣམས་རང་རང་གི་སྐྱེ་གནས་དང་མཐུན་པ་དང་།དབྱངས་ལྡན་རྣམས་ཀྱང་སོ་སོའི་ང་རོ་
དབྱུང་ཚུལ་བཅས་ཡི་གེ་རེ་རེ་ནས་ཀློག་པའི་སྒྲ་གདངས་ལ་སྦྱང་བར་བྱ་ཞིང་།དེ་ནས་
སྔོན་འཇུག་ལྔ་དང་འཕུལ་རྟེན་གྱི་འཇུག་ཡུལ་མིང་གཞི་སུམ་ཅུ་དང་རྗེས་འཇུག་བཅུ་
སྟེ།དེ་གསུམ་ཅི་རིགས་པ་ཚེག་བར་གཅིག་ཏུ་སྦྱོར་བའི་ཚུལ་ཡང་ཀློག་ལེགས་པར་ཤེས་
པའི་ཆེད་དུ་བསླབ་པར་བྱ་བ་ཡིན་པ་དང་།ཀློག་ལ་བྱང་ནས་རྗེས་འཇུག་སྟེ་དེར་སྔོན་
འཇུག་ཀྱང་འདུས་པས་དེ་དག་རྟགས་འཇུག་ནས་བཤད་པ་ལྟར་སྒྲ་དོན་གང་ལ་འཇུག་པ།ཡི་གེ་
གང་གིས་འཇུག་པ།ཚུལ་ཇི་ལྟར་འཇུག་པ།དགོས་པ་ཅིའི་ཕྱིར་འཇུག་པ་སྟེ་རྣམ་པ་བཞིའི་
སྦྱོར་བ་རྣམས་ནི།རང་ལ་སློབ་ཅིང་འདོམས་པར་བྱེད་པ་པོ་བླ་མ་སོགས་ལས་ལེགས་པར་
བཤད་པ་མཉན་པ་དང་།ཉན་པ་དེའི་དོན་རང་ཉིད་ཀྱིས་ཚུལ་བཞིན་དུ་བསམ་པ་དང་།དོན་དེ་
རང་ཉིད་ཀྱིས་ཁོང་དུ་ཆུད་ནས་གཞན་ལ་བསྟན་པ་རྣམས་ཀྱི་དོན་དུ་སྦྱར་ཏེ་མཁས་པར་
བསླབ་པར་བྱའོ།།ཀློག་དང་བརྡ་དག་གི་ཡན་ལག་དེ་གཉིས་ཀྱི་མཐུས་ནི་གང་བསླབ་པར་བྱ་
བ་དེ་ཤེས་པའི་འབྲས་བུ་ཐོབ་པར་བྱ་བའི་སླད་དུ་དོན་ལ་དབབ་ནས་ཉམས་སུ་བསྟར་བར་
བྱའོ།།དེ་ལྟར་བསླབ་པའི་རིམ་པ་འདིས་ནི་སྐྱེས་བུ་གང་ཞིག་ཐོས་བསམ་ལ་བརྩོན་
འགྲུས་ཆེན་པོ་དང་ལྡན་པ་རྣམས་སྨོས་ཅི་དགོས་ཏེ།འབད་པ་ཆུང་ངུ་ཙམ་བྱས་པས་ཀྱང་
ཚིག་དོན་ལ་རྨོངས་པ་མེད་པའི་ཤེས་རབ་མྱུར་དུ་གྲོལ་བར་འགྱུར་རོ།།རྒྱུ་མཚན་
དེའི་ཕྱིར་མཁས་པར་འདོད་པ་རྣམས་ཀྱིས་ཐོག་མར་སུམ་ཅུ་པའི་གཞུང་འདི་ཉིད་བསླབ་
པར་བྱ་ཞིང་འདི་ཤེས་ནས་རྟགས་འཇུག་ལ་སོགས་པ་འདིའི་སྐབས་ཕྱི་མ་རྣམས་དང་།དེ་ནས་
བརྡ་སྤྲོད་པའི་གཞུང་རྒྱས་པ་གཞན་དང་གཞན་རྣམས་ཀྱང་མཉན་པར་བྱས་ནས་ཁོང་དུ་ཆུད་
པ་ན།ཐེག་པ་གསུམ་གྱི་གཞིར་གྱུར་པའི་བསླབ་པ་གང་ལ་དད་ཅིང་སློབ་པར་འདོད་པ་དེའི་
གཞུང་ལུགས་ཡན་ལག་དང་བཅས་པ་ཉིད་བླ་མ་རྣམས་ལས་མཉན་པར་བྱའོ།།ཞེས་སོ།།
དེས་ན་འདིར་ཐོག་མར་ཡི་གེའི་ང་རོ་དང་ཕྱི་ནས་སྦྱོར་ཀློག་ལ་སྦྱང་དགོས་པར་
གསུངས་པ་དེའི་ཚུལ་བོད་ཡུལ་དུ་རླུང་ལྟར་གྲགས་པ་ཉིད་ཡིན་མོད་ཀྱི།འོན་ཀྱང་དེ་
དག་དག་པར་འདོན་པ་ནི་ཆེས་དཀོན་པར་སྣང་བས་ཅུང་ཟད་བཤད་ན།ཙནྡྲ་པའི་ཡི་གེའི་
མདོར།གནས་དང་བྱེད་པ་དང་རྩོལ་བ་ཞེས་གསུམ་དུ་བཤད་པ།བོད་ཀྱི་ཡི་གེ་རྣམས་ལ་
སྦྱོར་བའི་ཚེ།སོ་སོའི་གནས་ནི།ཀ་ཁ་ག་ང་འ་ཧ་ཨ།རྣམས་ཀྱི་སྐྱེ་གནས་མགྲིན་པ།ཅ་ཆ་
ཇ་ཉ་ཙ་ཚ་ཛ་ཞ་ཡ་ཤ་ཨི་ཨེ་རྣམས་ཀྱི་སྐྱེ་གནས་རྐན།ཏ་ཐ་ད་ན་ཟ་ལ་ས་རྣམས་ཀྱི་སྐྱེ་
གནས་སོ།པ་ཕ་བ་མ་ཝ་ཨུ་ཨོ་རྣམས་ཀྱི་སྐྱེ་གནས་མཆུ།ར་ཡིག་གི་སྐྱེ་གནས་ལྕེ་རྩེ་
དང་ཉེ་བའི་སྤྱི་བོ་སྟེ་ལྕེ་རྩེའི་སྟེང་ཕྱོགས།ང་ཉ་ན་མ་རྣམས་རང་རང་གི་གནས་སུ་
མ་ཟད་སྣ་དང་བཅས་པའོ།།བྱེད་པ་ནི།མགྲིན་པ་དང་མཆུ་ལས་སྐྱེས་པ་རྣམས་རང་རང་གི་
གནས་ཀྱི་བྱེད་པ་ཅན་དང་།རྐན་ལས་བྱུང་བ་རྣམས་ལྕེའི་དབུས་ཀྱི་བྱེད་པ་ཅན་དང་།
སོ་ལས་བྱུང་བ་རྣམས་ལྕེ་རྩེའི་བྱེད་པ་ཅན་དང་།ར་ཡིག་ནི་ལྕེ་རྩེ་དང་ཉེ་བའི་ བྱེད་པ་ཅན་ནོ།།རྩོལ་བ་ལ་ཕྱི་ནང་གཉིས་ལས་ཕྱིའི་རྩོལ་བ་ནི།ཕྱི་རོལ་ཏུ་སྒྲ་
འཐོན་པ་ལྟ་བུའི་བྱེད་རྩོལ་དང་ལྡན་པའི་ཕྱིར་ཏེ།དེ་ལའང་འཐོན་ཆེ་ཆུང་གི་དབྱེ་
བས།ག་ང་ཇ་ཉ་ད་ན་བ་མ་ཛ་ཝ་འ་ཡ་ར་ལ་ཧ་ཨ་ཨི་ཨུ་ཨེ་ཨོ་རྣམས་སྒྲ་ལྡན་དང་།ཀ་ཁ་ཅ་ཆ་
ཏ་ཐ་པ་ཕ་ཙ་ཚ་ཞ་ཟ་ཤ་ས་རྣམས་སྒྲ་མེད་དང་།སྒྲ་ཕྱིར་དབྱུང་བའི་ཚེ་དབུགས་ཆེ་ཆུང་
གི་ཁྱད་པར་གྱིས།ཁ་ཆ་ཐ་ཕ་ཚ་ཞ་ཟ་ཤ་ས་ཧ་ཨ་ཨི་ཨུ་ཨེ་ཨོ་རྣམས་སྲོག་ཆེན་དང་།ཡི་
གེ་ལྷག་མ་རྣམས་སྲོག་ཆུང་དང་།དེ་དག་ལས་ཞ་ཟ་ཤ་ས་ཧ་རྣམས་བརྗོད་པའི་ཚེ་དབུགས་
དྲོ་བར་འབྱིན་པས་དྲོ་བའང་ཡིན་ནོ།།ནང་གི་རྩོལ་བ་ནི།མགྲིན་པ་གདངས་ནས་བརྗོད་
དགོས་པའི་ཕྱིར་ཨ་ཡིག་མ་གཏོགས་པའི་སྲོག་ཆེན་གྱི་ཡི་གེ་རྣམས་ཕྱེ་བའི་རྩོལ་བ་
ཅན་དང་།ཨ་ཡིག་མགྲིན་པ་མ་ཕྱེ་བར་བརྗོད་པའི་ཕྱིར་བཙུམ་པའི་རྩོལ་བ་ཅན་དང་།ཡི་
གེའི་གནས་རྣམས་འདུ་འཕྲོད་ཀྱི་རྩོལ་བ་ཆེ་བའི་ཕྱིར་ཝ་མ་གཏོགས་པའི་སྡེ་བ་ལྔའི་
ཡི་གེ་རྣམས་ཕྲད་པའི་རྩོལ་བ་ཅན་དང་།འདུ་འཕྲོད་ཀྱི་རྩོལ་བ་དེ་དག་ལས་ལྷོད་པའི་
ཕྱིར་ཡ་ར་ལ་ཝ་རྣམས་ཅུང་ཟད་ཕྲད་པའི་རྩོལ་བ་ཅན་ནོ།།དེས་ན་ཡི་གེ་དེ་རྣམས་སོ་
སོར་ཀློག་པའི་ཚེ་སོ་སོའི་གནས་དང་བྱེད་པ་དང་རྩོལ་བ་རྣམས་དང་མཐུན་པ་ཞིག་གལ་
ཆེ་ཞིང་གསལ་བྱེད་ལ་དབྱངས་ཡིག་སྦྱོར་བའི་ཚེའང་།ཀ་ལྟ་བུ་མགྲིན་པའི་སྐྱེ་གནས་
ཅན་ལ་ཨི་ཨེ་མཚོན་བྱེད་གི་གུ་དང་འགྲེང་བུ་སྦྱར་བས་རྐན་གྱི་སྐྱེ་གནས་དང་ཡང་
ལྡན་པར་འགྱུར་བ་སོགས་ཤེས་པར་བྱས་ནས་དེ་དང་མཐུན་པའི་ཀློག་ཚུལ་ཐོན་པ་དགོས་
སོ།།ཁྱད་པར་དབྱངས་སྦྱར་བའི་ཀློག་ཚུལ་ནི་དག་པ་ཤིན་ཏུ་གཅེས་པར་མཐོང་སྟེ།ཁམས་
ཕྱོགས་ཀྱི་ཡུལ་གྲུ་འགའ་རེ་ན་ན་རོ་དང་འགྲེང་བུ་ཡོད་མེད་ཀྱི་ཀློག་ཚུལ་ཐ་དད་
དུ་མི་འབྱུང་བ་དང་།འགའ་ཞིག་ན་ཞབས་ཀྱུ་དང་ན་རོ་ཀློག་ཚུལ་གཅིག་ཏུ་བྱེད་པ་
སོགས་ཀྱིས་མཚོན་མ་དག་པར་འདོན་པ་མང་ཞིང་།དེས་ཡི་གེ་འབྲི་བ་ནའང་མ་དག་པ་ཁོ་ནར་
འགྱུར་བའི་ཕྱིར་རོ།།སྦྱོར་ཀློག་གི་སྐབས་སུའང་འཕུལ་རྟེན་དང་མགོ་འདོགས་ཀྱི་
ཡི་གེ་རྣམས་སོ་སོའི་སྒྲ་ཐོན་དགོས་པ་ནི།རྫེ་བཙུན་བསོད་ནམས་རྩེ་མོས།
གང་དང་གང་ལ་གང་བཏགས་པས།།གོ་རིམ་བཞིན་དུ་གནས་ནས་འབྱུང་།།དེ་ལ་ར་མགོ་ལྕེ་
རྩེ་འདར།།ལ་མགོ་ལྕེ་ཀློད་རྒྱ་ཡང་བསྐྱེད།།ས་མགོ་སོ་ཡི་བར་ནས་དབྱུང་།།ལྷག་མ་
རྣམས་ཀྱང་དེ་བཞིན་ཤེས།།གལ་ཏེ་མ་ཕྱིན་གྱུར་པ་ནི།།ཡི་གེ་ཕྲལ་ཞིང་བརྗོད་པར་
བྱ།།དཔེར་ན་གྲ་ལ་ག་ར་འམ།།སྒྲ་ལ་སྒ་ར་ཇི་བཞིན་དུ།།དེ་ནས་འཕུལ་བ་བསླབ་པར་བྱ།།
གས་འཕུལ་ཐོག་མར་རྐན་ནས་དབྱུང་།།དས་འཕུལ་ལྕེ་རྩེ་ཀློད་པ་ལས།།བ་མས་འཕུལ་བ་
ཐོག་མར་ནི།།མཆུ་བཙུམ་པ་ལས་ཁྱད་པར་སྣ།།འས་འཕུལ་གྲེ་བའི་ཕུགས་ནས་དབྱུང་།།
འཕུལ་ཞིང་བརྩེགས་པའི་ཡི་གེ་ཡང་།།གོ་རིམ་བཞིན་དབྱུང་མ་ཕྱིན་ན།།འདི་ཡང་ཕྲལ་
ཞིང་བཀླགས་པ་སྟེ།།མཁྲ་ལ་མཁའ་ར་ཇི་བཞིན་ནོ།།
ཞེས་སོགས་གསུངས་པས་ཀྱང་གྲུབ་མོད།།སྔོན་འབྲི་ཁུང་དུ་སྐྱོབ་པ་རིན་པོ་ཆེ་
བཞུགས་པའི་ཚེ་གནའ་བོའི་དུས་བཞིན་དུ་ཡིག་ཀློག་ཚུལ་ཆད་ཀྱང་བརྩེགས་འཕུལ་སོགས་
ཀྱི་སྒྲ་ཟུར་ཕྱིན་པར་འདོན་པའི་སྲོལ་བཟང་པོ་བྱུང་བར་གྲགས་པ་དང་།ཁམས་ཕྱོགས་
ཀྱི་མཐའ་ཨ་མདོ་དང་རྒྱལ་མོ་རོང་སོགས་བྱང་ཤར་གྱི་ཆ་རྣམས་སུ་འཁོད་པའི་སྐྱེ་བོ་
དག་ལའང་གནའ་བོའི་དུས་སུ་བོད་ཡུལ་དབུས་ནས་བྱུང་བའི་ཀློག་ཚུལ་མ་ཉམས་པ་ཡིན་པར་
གྲགས་པའི་ཡི་གེ་ཀློག་ཚུལ་དང་།དེ་དག་གི་ཡུལ་སྐད་བཅས་ལའང་གྱོང་ཉམས་ཆེ་ཙམ་ལས་
འཕུལ་རྟེན་སོགས་ཀྱི་ཟུར་དག་པར་འདོན་པ་འབྱུང་བར་མངོན་སུམ་གྱིས་གྲུབ་པ་སོགས་
ཀྱིས་ཀྱང་མཚོན་ནུས་སོ།།གཞན་ཡང་བོད་ཡིག་གི་སྡེབ་ཇི་ལྟར་སྦྱོར་བའི་ཚུལ་ནི་
སྔོན་གྱི་བོད་སྐད་དག་པ་ཉིད་ལ་བརྗོད་པའི་སྒྲ་ཇི་ལྟར་འབྱུང་བ་དེ་ལྟར་མཁན་པོ་
འདིས་སྦྱར་བ་ཡིན་པས།སྐད་ལ་འཕུལ་རྟེན་སོགས་ཀྱི་ཟུར་གསལ་བ་མེད་ན་ཡི་གེ་ལ་དེ་ ལྟར་ཐོབ་པ་རྒྱུ་མཚན་གང་ཞིག་གིས་རྟོགས་པར་ནུས།དེས་ན་འགའ་བོའི་དུས་སུ་ཡིག་
ཀློག་ཙམ་དུ་མ་ཟད་བོད་སྐད་ཉིད་ལའང་སྒྲ་ཟུར་ཐམས་ཅད་མ་ཉམས་པར་འདོན་པ་ཞིག་ཡོད་
པར་ངེས་ཀྱང་།དེང་སང་བོད་ཡུལ་དབུས་དང་མཐའ་འཁོབ་ཕལ་ཆེར་ལ་རང་སྐད་དང་ཡིག་ཀློག་
གཉིས་ཀར་སྒྲ་དག་པར་འདོན་པ་མེད་པ་ལ་བརྟེན་ནས་མཁས་པའི་ཁྲོད་ནའང་ཡིག་གཟུགས་
ཀྱི་སྡེབ་དག་ཕྱིན་ཀློག་ཚུལ་དེ་དང་ངེས་པར་བསྟུན་མི་དགོས་བསམས་པའམ།སྡེབ་
སྦྱོར་ནི་ཡི་གེ་འབྲི་བའི་དབང་དུ་བྱས་ཀྱི་བརྗོད་པའི་དབང་དུ་མ་བསྟུན་པའམ།
ཀློག་ཚུལ་ཡིག་སྡེབ་དང་བསྟུན་དགོས་ཀྱང་ཕྱོགས་ཙམ་ལས་ཡིག་སྡེབ་ཇི་ལྟ་བར་སྒྲ་
ཟུར་ཐོན་པ་ནི་སྔར་ཡང་མ་བྱུང་ཞིང་ད་ལྟའང་འདོན་པར་མི་ནུས་སོ་སྙམ་པ་མང་དུ་ཡོད་
པར་དོགས་པ་དང་།ལེགས་སྦྱར་གྱི་སྐད་ལའང་།གངས་ཅན་གྱི་བརྡ་སྤྲོད་ཤེས་པར་རློམ་པ་
ཕྱིས་བྱུང་རྣམས་ཀྱིས་སྔགས་ཀྱི་ཀློག་ཚུལ་ཞེས་བརྡ་སྤྲོད་ཀྱི་གཞུང་དང་གཏན་འགལ་
བ་རེ་ལ་ཡིད་བརྟན་འཆའ་ཞིང་དབྱངས་གསལ་གྱི་མཚམས་སྦྱོར་ལས་བྱུང་བའི་རྣམ་འགྱུར་
དེ་རྣམས་ཡིག་གཟུགས་ཀྱི་སྐབས་སུ་མ་གཏོགས་བརྗོད་པ་ལ་ཇི་ལྟ་བར་སྦྱོར་མི་ནུས་
སྙམ་པར་འདུག་པ་ནི་ཡ་ཆའོ།།དེ་བས་ན་རང་ཉིད་ཀྱིས་སྒྲ་དག་པར་བཀླག་མ་ཤེས་པའམ་མ་
ནུས་ནའང་།ཀློག་ཚུལ་དག་པ་མེད་དོ་ཞེས་བརྗོད་པར་མི་བྱའོ།།སྦྱོར་ཀློག་དངོས་ཇི་
ལྟར་བྱ་བའང་།འཕུལ་ཅན་རྣམས་ལ་བཤད་མ་ཐག་པ་ལྟར་འཕུལ་བྱེད་ཀྱི་ཡི་གེ་རང་རང་གི་
སྐྱེ་གནས་དང་མཐུན་པའི་སྒྲ་ཐོག་མར་འབྱུང་དགོས་ཤིང་།མགོ་ཅན་དང་འདོགས་ཅན་རྣམས་
ལའང་མགོ་དང་འདོགས་ཀྱི་ཡི་གེ་སོ་སོའི་གནས་དང་མཐུན་པའི་བརྗོད་པ་སོ་སོར་འབྱུང་
དགོས་པ་དཔེར་ན་སྒྲ་ལྟ་བུ་ལ་ས་ག་ར་རྣམས་རིམ་པར་རང་སྒྲ་ཐོན་ཙམ་དུ་མྱུར་བར་
ཀློག་པ་ལྟ་བུ་དང་།འ་མཐའ་ཅན་ཕལ་ཆེར་ཞིག་གི་རྟེན་བྱེད་ཀྱི་སྒྲ་མི་གསལ་བས་དེ་
དག་མ་གཏོགས་གསལ་བར་སྣང་བའི་མཐའ་རྟེན་ཅན་ཡང་འཇུག་མེད་པ་རྣམས་ནི་རྟེན་ཡིག་སོ་
སོའི་གནས་དང་མཐུན་པའི་སྒྲ་རྗེས་སུ་འབྱུང་བ་དང་།ཡང་འཇུག་ཅན་ལ་ས་ཡིག་གི་ཡང་
འཇུག་ཅན་ནི་ཕ་རོལ་ཏུ་ཚིག་གྲོགས་གཞན་མེད་ན་ས་སྒྲ་དངོས་སུ་མི་གསལ་ཡང་སྒྲ་དེ་
འབྱུང་བར་ཉེ་བ་ལྟར་བཀླག་ཅིང་།ཚིག་གྲོགས་ཡོད་ན་རྗེས་འཇུག་སྔ་མ་དེའི་སྒྲ་ཟུར་
གྱི་རྗེས་སུ་ས་སྒྲའང་ཐོན་པར་འབྱུང་དགོས་པ་དང་།ད་ཡིག་གི་ཡང་འཇུག་ཅན་ནི་ཚིག་
གྲོགས་ལ་ལྟོས་མི་དགོས་པར་རྗེས་འཇུག་སྔ་མའི་སྒྲའི་མཐར་དའི་སྒྲ་འབྱུང་ལ་ཁད་ ཙམ་སྒྲ་མནན་པ་ལྟ་བུར་བཀླག་པ་ཡིན་ནོ།།དེས་ན་སྐད་གསར་བཅད་ཀྱི་དུས་སུ་འ་མཐའ་
ཕལ་ཆེར་དང་ད་དྲག་མ་བྲིས་པའང་དེ་དག་གི་སྒྲ་བརྗོད་པ་ལ་ཧ་ཅང་མ་གསལ་བས་ཡིན་པར་
སྣང་ངོ་།།དེ་ལྟར་ཡི་གེ་ཀློག་ཚུལ་དག་པར་འདོད་པ་རྣམས་ལ་ཕྱོགས་ཙམ་སྨོས་པར་ཟད་
ཀྱི་རྒྱས་པར་སྨོས་སུ་མ་ལའང་ཤིང་འདི་ཙམ་གྱིས་ཀྱང་།ཀྱ་ཁྱ་གྱ་རྣམས་དང་།སྤྱ་ཕྱ་
བྱ་དང་།ཅ་ཆ་ཇ་རྣམས་ཕྱོགས་མཚུངས་པར་ཀློག་པ་དང་།བསྒྱ་བརྒྱ་རྒྱ་སྒྱ་དགྱ་སྦྱ་
རྫ་རྣམས་མཚུངས་པར་ཀློག་པ་དང་།རྔ་སྔ་དངའ་མངའ་རྣམས་མཚུངས་པར་ཀློག་པ་སོགས་
འཁྲུལ་བ་འབྱམས་སུ་ཀླས་པ་རྣམས་ཀྱི་མཚང་རིག་པར་ནུས་སོ།།
སྐབས་འདིར་འགྲེལ་བྱེད་སྔ་མ་འགའ་ཞིག་གིས།རྗེས་འཇུག་བཞི་ཡི་སྦྱོར་བ་ནི།།
ཞེས་དང་།གཞན་ལའང་ཀྱོག་བཤད་བྱས་པ་འགའ་ཞིག་ཡོད་ཀྱང་།འགྲེལ་བ་གཞན་དང་གཞན་དུ་
ལེགས་པར་བཀག་པའང་མཐོང་བས་འདིར་དགག་པའི་སྤྲོས་པ་མ་བྱས་སོ།།
བཞི་པ་སྣོད་རུང་ལ་གདམས་ངག་བསྟན་དགོས་པར་འདོམས་པ་ནི།
སློབ་དཔོན་དེ་ཉིད་དུ་འཛིན་ཅིང་།།ལེ་ལོ་གཡེང་བ་རྣམ་པར་སྤངས།།
ཟོ་བཟང་དད་པ་ ལ་བརྟེན་པ།།སྐྱེས་བུ་དེས་ནི་མྱུར་རྟོགས་ཏེ།།
དེ་ལ་དུས་སུ་འདོམས་པར་བྱ།།གཅིག་ ཤོས་དེ་ལས་ལྡོག་པའོ།།
ཞེས་པ་སྟེ།བརྡའི་སྦྱོར་བ་ལ་མཁས་པར་བྱེད་པའི་བསྟན་བཅོས་འདི་ལྟ་བུའི་གདངས་
ངག་བསྟན་དུ་རུང་བའི་སྣོད་ནི་གདམས་ངག་སྟོན་མཁན་གྱི་སློབ་དཔོན་དེ་ལ་སློབ་ དཔོན་དུ་འཛིན་ཅིང་ཞེ་ས་དང་བཅས་པས་དྲིན་དུ་གཟོ་བ་དང་།རིག་པ་སློབ་པའི་མི་
མཐུན་ཕྱོགས་བསླབ་པར་བྱ་བ་དེ་ལ་སྤྲོ་བ་ཞན་པའི་ལེ་ལོ་དང་།བྱ་བ་གཞན་ལ་འཇུག་
པའི་གཡེང་བ་གཉིས་སྤངས་པ་སྟེ་སྐྱོན་དེ་དག་གིས་གླགས་མི་རྙེད་པའི་རྟག་སྦྱོར་
གྱི་བརྩོན་འགྲུས་དང་ལྡན་པ་དང་།རིག་པ་སློབ་པའི་མཐུན་རྐྱེན་ཐོ་སྟེ་རང་བཞིན་
ནམ་ངང་ཚུལ་བཟང་ཞིང་བསླབ་པར་བྱ་བའི་གནས་ལ་མཆོག་ཏུ་དད་པ་ལ་བརྟེན་པའི་གུས་
སྦྱོར་གྱི་བརྩོན་འགྲུས་དང་ལྡན་པ་སྟེ།མཚན་ཉིད་གསུམ་དང་ལྡན་པ་དེ་ལྟ་བུའི་
སྐྱེས་བུ་དེས་ནི་བསླབ་པར་བྱ་བ་གང་ཡིན་དེ་མྱུར་དུ་རྟོགས་པར་འགྱུར་བས་དེ་ལ་
དུས་ཤེས་པར་བྱས་ནས་དུས་སུ་འདོམས་པར་བྱ་ཞིང་།གཅིག་ཤོས་གཞན་ནི་དེ་ལས་ལྡོག་པ་
སྟེ།སློབ་དཔོན་ལ་མི་གུས་པ་དང་།ལེ་ལོ་དང་།གཡེང་བ་ཅན་དང་།རང་བཞིན་ངན་ཞིང་དད་
པ་མེད་པ་རྣམས་ལ་ནི་སྣོད་དང་མི་ལྡན་པས་རེ་ཞིག་འདོམས་པར་བྱ་བ་མ་ཡིན་མོད།འོན་
ཀྱང་ཕྱི་ནས་དོན་དུ་གཉེར་ཅིང་འདུན་པར་གྱུར་ན་ལེགས་པར་རྗེས་སུ་བསྟན་པར་ཡང་
བྱའོ།།ཞེས་སོ།།འདིར་སྨྲས་པ།
ཐུ་མའི་གཞུང་བཟང་ནོར་འཛིན་མར།།ལོག་རྟོག་རྡུལ་ཚོགས་འབེབས་བྱེད་པའི།།བཤད་
སྒྲོས་མང་པོའི་ལྷོ་བུར་གྱིས།།དཀྲིགས་ལྡན་དཔྱིད་ཀ་ཤར་བའི་ཚེ།།གང་གི་ཐུགས་
རྗེས་སླར་བསྐུལ་བས།།བདག་བློའི་གདེངས་ཅན་གཉིད་སད་དེ།།ལེགས་བཤད་སྦྲང་རྩིའི་
ཆར་ཕབ་པས།།དོན་རབ་གསལ་བའི་དབྱར་ཁ་བྱུང་།།ད་སྟེ་བློ་གསལ་གཞོན་ནུ་རྣམས།།
འཁྲུལ་མེད་རྣམ་དཔྱོད་མྱུ་གུ་གསར།།ཅི་ཡང་རྒྱས་པའི་ཐང་ག་འདིར།།བག་ཡངས་ཉིད་དུ་
རྩེན་པར་འོས།།
དེ་ལྟར་སུམ་ཅུ་པའི་གཞུང་གི་ཚིག་དོན་གྱི་ཆ་རང་བློས་ཇི་ལྟར་དཔོག་པ་རེ་ཞིག་བཤད་ཟིན་ཏོ།།།།
No comments:
Post a Comment