གྲོང་ཁྱེར་ཤམ་བྷ་ལ།
མཆན། རྩའི་ཚིག་འགྲེལ་ཇི་མ་བྱི་བཞིན་འདིར་བྲིས་ཡོད། འདིའི་དོགས་དཔྱོད་དང་བཅས་པ་རྒྱས་པར་གཟིགས་འདོད་ན་ གནམ་སའི་གསང་བ་ཞེས་པའི་དེབ་དེར་གཟིགས་པར་ཞུ།
དེ་ཡང་དུས་འཁོར་བསྡུས་རྒྱུད་ལས།
ཆང་དང་ལན་ཚྭའི་ཆུ་གཏེར་དབུས་སུ་ཐུབ་པ་ས་ཡི་དཀྱིལ་འཁོར་ལ་ནི་ལས་ས་ཡང་དག་གནས།།
དཔག་ཚད་འབུམ་ཕྲག་གསུམ་ལ་ཉི་མའི་དུམ་བུ་རྣམས་སུ་མི་ཡི་བདག་པོ་རིམ་པས་འཁོར་བར་འགྱུར།།
དུམ་བུ་གཅིག་ལ་དཔག་ཚད་སྟོང་ཕྲག་ཉི་ཤུ་ལྔ་སྟེ་ནོར་གྱི་འདབ་མ་དག་དང་བཅས་པ་འོ།།
དེ་ཡི་དབུས་ན་ཀཻ་ལ་ཤ་སྟེ་མཆོག་ཀྱི་གངས་རི་ཡིས་ནི་ཕྱོགས་རྣམས་ཀུན་ཏུ་བསྐོར་བ་འོ།། ༡༥༠ །།
ས་ལ་ཀཻ་ལ་ཤ་ཡི་དུམ་བུ་གངས་ཀྱི་རི་དང་བཅས་པ་དེ་ནི་ཀུན་ནས་སུམ་ཆ་སྟེ།།
ཕྱི་རོལ་དུ་ནི་འདབ་མ་རེ་རེ་དག་ཀྱང་ཉིན་བྱེད་ཡུལ་དང་གླིང་གི་ཡུལ་རྣམས་དག་གིས་བརྒྱན།།
གཡས་ཀྱི་ཕྱེད་ན་ཤམ་བྷ་ལར་གྲགས་ཐུབ་མཆོག་གི་གནས་གྲོང་ནི་བྱེ་བ་ལྷག་པར་གནས་པ་སྟེ།།
བྱེ་བའི་གྲོང་གིས་ངེས་པར་བཅིངས་པའི་ཡུལ་དུ་འགྱུར་ཏེ་རྒྱལ་ཁམས་གྲོང་ནི་འབུམ་ཕྲག་རྣམས་ཀྱིས་སོ།། ༡༥༡ །།
ཞེས་པ་འདིའི་ཚིག་དོན་རིམ་བཞིན་ཞུ་བ་ལ། དེ་ཡང་རི་རབ་ནས་ཕྱི་རིམ་བཞིན་དུ་གླིང་དྲུག མཚོ་དྲུག རི་དྲུག་སྤེལ་མར་ཡོད་པ་དེ་དག་ཐམས་ཅད་ལོངས་སྤྱོད་ཀྱི་ས་པ་ཡིན་ལ། མཚོ་དྲུག་པ་ཆང་གི་རྒྱ་མཚོ་དེ་དང་མཚོ་བདུན་པ་ལན་ཚྭའི་ཆུ་གཏེར་གཉིས་ཀྱི་དབུས་སུ་ཐུབ་པ་སྟེ་གླིང་བདུན་པ་སའི་དཀྱིལ་འཁོར་འདི་ལ་ནི་འཛམ་གླིང་ཆེན་པོ་ལས་ཀྱི་ས་པ་ཡང་དག་པར་གནས་སོ།།
སའི་དཀྱིལ་འཁོར་གྱི་ཐད་ཀར་དཔག་ཚད་འབུམ་ཕྲག་གཅིག་ཡིན་པས་འཁོར་ཡུག་གི་ཚད་ལ་གསུམ་འགྱུར་དུ་གཏོང་བའི་དཔག་ཚད་འབུམ་ཕྲག་གསུམ་ལ་ཉི་མའི་དུམ་བུ་སྟེ་དུམ་བུ་བཅུ་གཉིས་སུ་བགོས་པའི་གླིང་རྣམས་སུ་མིའི་བདག་པོ་འཁོར་བསྒྱུར་གྱི་རྒྱལ་པོ་རིམ་པ་བཞིན་དུ་འཁོར་བར་འགྱུར་རོ།།
དེ་ནས། དུམ་བུ་གཅིག་ལ་དཔག་ཚད་སྟོང་ཕྲག་ཉི་ཤུ་ལྔ་སྟེ་ནོར་གྱི་འདབ་མ་དག་དང་བཅས་པ་འོ།། ཞེས་པ་ནི་འགྱུར་མ་དག་པ་སྟེ། འདིའི་རྒྱ་དཔེར། ཁཎྜཻ་ཀཾ་ ཡོ་ཇ་ནཱ་ནཱཾ་ བ་སུ་ད་ལ་ས་ཧི་ཏཾ་ པཉྕ་བིཾ་ཤ་ཏི་ས་ཧ་སྲཾ། ཞེས་ནོར་གྱི་འདབ་མ་དང་བཅས་པའི་ཚིག་དེ་སྔོན་དང༌། སྟོང་ཕྲག་ཉི་ཤུ་རྩ་ལྔའི་ཚིག་དེས་མཇུག་སྡུད་བྱས་འདུག་པའི་ཕྱིར་དང༌། གཞན་ཡང༌། དུམ་བུ་རེ་རེ་ལ་དཔག་ཚད་སྟོང་ཕྲག་ཉི་ཤུ་རྩ་ལྔ་དང༌། དེའི་སྟེང་དུ་ནོར་གྱི་འདབ་མ་དང་བཅས་ན་དུམ་བུ་རེ་རེའི་དཔག་ཚད་སྟོང་ཕྲག་ཉི་ཤུ་རྩ་ལྔ་ལས་ལྷག་པར་འགྱུར་ལ། དེ་ལྟར་ན། འཁོར་ཡུག་འབུམ་ཕྲག་གསུམ་ལས་ལྷག་པའི་སྐྱོན་དུ་འགྱུར་རོ།། སྐྱོན་མེད་དེ། ནོར་གྱི་འདབ་མ་ནི་འཛམ་གླིང་ཆུང་ངུའི་ནང་གསེས་ཤམ་བྷ་ལའི་བཀོད་པ་ཡིན་པའི་ཕྱིར། ཞེ་ན། ཁྱེད་རྣམས་ལས་སྟབས་བདེ་བ་ཞིག་སུ་ཡོད། དུམ་བུ་བཅུ་གཉིས་སྤྱིར་སྟངས་ཀྱི་ཚད་བཤད་ཟིན་པ་དང༌། འབྲེལ་བ་གང་ཡང་མེད་པར་སེང་གེའི་མཆོངས་སྟབས་ཞིག་གིས་ལྷོའི་དུམ་བུ་འདིའི་བྱང་ཕྱོགས་ཤམ་བྷ་ལའི་ཡུལ་ལ་མཆོངས་འདུག གལ་ཏེ་དངོས་གནས་རང་ནོར་གྱི་འདབ་མ་དེ་འཛམ་གླིང་ཆུང་ངུའི་ནང་གསེས་ཀྱི་ཤམ་བྷ་ལའི་བཀོད་པ་ཡིན་ན། ཚིག་འོག་མ། གཡས་ཀྱི་ཕྱེད་ན་ཤམ་བྷ་ལར་གྲགས། ཞེས་པ་དེའི་འོག་ཏུ་འབྱུང་དགོས་པ་མིན་ནམ། སེམས་རྣལ་དུ་ཕོབས་ལ་དྲང་པོར་སོམས་ཤིག།
ཚིག་དེ་ཇི་ལྟར་དགོས་ཞེ་ན། དུམ་བུ་གཅིག་ལ་ནོར་གྱི་འདབ་མ་དག་དང་བཅས་པར་དཔག་ཚད་སྟོང་ཕྲག་ཉི་ཤུ་རྩ་ལྔ་འོ། ཞེས་དགོས་འདུག དེས་ན་ལྷོའི་དུམ་བུ་གཅིག་པོ་འདི་ལ་མཐའ་ནས་བསྐོར་བའི་ཡུལ་འཁོར་བརྒྱད་ཀྱི་ནོར་གྱི་འདབ་མ་དག་དང་བཅས་པ་ཡོངས་རྫོགས་བསྡོམས་ན་དཔག་ཚད་སྟོང་ཕྲག་ཉི་ཤུ་རྩ་ལྔ་འོ།། ཞེས་ནོར་གྱི་འདབ་མ་ནི་སྟོང་ཕྲག་ཉེར་ལྔའི་ཁོངས་སུ་བསྡུ་དགོས་སོ།།
སྐབས་འདིའི་ནོར་གྱི་འདབ་མའི་དོན་ལ། ནོར་ཞེས་པ་བརྒྱད་དང༌། འདབ་མ་ཞེས་པ་ནི་མཐའི་ཡུལ་འཁོར་བརྒྱད་པོ་པདྨའི་འདབ་མའི་ཚུལ་དུ་ཡོད་པའི་དོན་ཡིན། ཡུལ་འཁོར་བརྒྱད་ནི་སྔར་རི་རབ་ཀྱི་སྐབས་སུ་བཤད་པ་ལྟར། སྔོན་རབས་ནང་དུ། འཛམ་གླིང་འདི་ལ་ལྷོ་ལ་ཡུལ་སྡེ་གསུམ། བྱང་ལའང་གསུམ། ཤར་ནུབ་གཉིས་ལ་རེ་རེ་སྟེ་ཡུལ་སྡེ་ཆེན་པོ་བརྒྱད་དང༌། བརྒྱད་པོ་དེ་དག་གི་དབུས་སུ་ཨི་ལ་བྲིཏ་ཞེས་པའི་ཡུལ་སྡེ་ཆེན་པོ་ཞིག་དང་བཅས་སྟེ་འཛམ་བུའི་གླིང་འདི་ལ་ཡུལ་སྡེ་དགུ་ཡོད་པར་གསུངས་པའི་མཐའི་ཡུལ་འཁོར་བརྒྱད་པོ་དེ་དག་གོ།།
མཐའི་ཡུལ་འཁོར་བརྒྱད་པོ་དེ་ཡི་དབུས་ན་ཀཻ་ལ་ཤ་ཞེས་པའི་ལྗོངས་སྟེ་མཆོག་གི་གངས་རིའི་ཕྲེང་བ་རྣམས་ཀྱིས་ནི་ཕྱོགས་རྣམས་ཀུན་ཏུ་ཡོངས་སུ་བསྐོར་ཏེ་གནས་པའི་གངས་རིའི་ཕྲེང་བ་འོ།། ༡༤༩ །།
ལྷོའི་དུམ་བུའི་ས་གཞི་འདི་ལ་དཔག་ཚད་སྟོང་ཕྲག་ཉེར་ལྔ་ཡོད་པའི་ནང་ནས་དབུས་ཀྱི་ཀཻ་ལ་ཤའི་དུམ་བུ་གངས་གི་རི་དང་བཅས་པའི་ཚད་དེ་ནི་སྟོང་ཕྲག་ཉེར་ལྔ་ཕྱོགས་ཀུན་ནས་མཉམ་པར་བགོས་པའི་གསུམ་ཆ་གཅིག་སྟེ་དཔག་ཚད་བརྒྱད་སྟོང་སུམ་བརྒྱ་སོ་གསུམ་ཙམ་མོ།།
ཀཻ་ལ་ཤའི་ཕྱི་རོལ་དུ་གྱུར་པའི་ཡུལ་འཁོར་རྣམས་ལ་ནི་ཡུལ་འཁོར་བརྒྱད་པོའི་འདབ་མ་རེ་རེ་དག་ཀྱང་ཉིན་བྱེད་ཀྱི་ཡུལ་ཏེ་ཡུལ་སྡེ་བཅུ་གཉིས་བཅུ་གཉིས་ཀྱིས་བརྒྱན་པ་དང༌།། ད་དུང་དེར་མ་གཏོགས་པའི་གླིང་ཕྲན་གྱི་རྒྱལ་ཁམས་རྣམས་ཀྱིས་ཀྱང་བརྒྱན་ཏེ་གནས་སོ།།
གཤོང་འགྱུར་དུ། གླིང་གི་ཡུལ་རྣམས་དག་གིས་བརྒྱན། ཞེས་འདུག་ཀྱང་སྐབས་འདིའི་ཡུལ་གྱི་སྐད་དོད། དེ་ཤཿ དང༌། གོང་གི་ཉིན་བྱེད་ཡུལ་ཞེས་པའི་ཡུལ་གྱི་སྐད་དོད། བི་ཥ་ཡ། ཞེས་སོ་སོར་འདུག་པས་འདིར་གླིང་གི་རྒྱལ་ཁམས་ཞེས་བསྒྱུར་བ་ཡིན།།
དེ་ནས། སའི་གོ་ལ་འདི་ལ་དབུས་ནས་ཚངས་ཐིག་གིས་བཅད་པའི་གཡས་ཀྱི་ཕྱེད་ན་སྟེ་གཡས་པའི་དོ་ཟླ་གཡོན་ཕྱོགས་བྱང་མ་དེ་ལ་ཤམ་བྷ་ལ་ཞེས་བྱ་བར་གཞན་ལ་གྲགས་སོ།།
འདི་ལ་གཡས་ཀྱི་སྐད་དོད། སབྱ། ཞེས་འདུག་པ་དང༌། གཞན་ཡང་བསྡུས་རྒྱུད་འགྲེལ་ཆེན་དང་བཅས་པའི་བོད་འགྱུར་ནང་དུ། གཡས་དང་གཡས་མིན་ཞེས་པའི་ཚིག་ཡོད་ཚད་ཀྱི་ལེགས་སྦྱར་མ་དཔེ་མཇལ་ཚེ་ཚིག་དེ་གཉིས་ཀྱི་སྐད་དོད། སབྱ་དང༌། ཨ་སབྱ། ཞེས་འདུག། དེས་ན། སབྱའི་དོན་ནི་གཡས་དང་ལྷོ་ལ་གོ་བ་དང༌། དེ་བཞིན། ཨ་སབྱ་ཞེས་པའི་དོན་ནི་གཡོན་དང་བྱང་ལ་གོ་བ་ཡིན། འོན་ཀྱང་གནམ་ས་དང་གཟའ་སྐར་བཤད་པའི་སྐབས་སུ་སབྱ་ཞེས་པའི་དོན་ངོ་མ་ལྷོ་ཕྱོགས་དང༌། ཨ་སབྱ་ཞེས་པའི་དོན་ངོ་མ་བྱང་ཕྱོགས་ལ་གོ་དགོས་ཏེ། འགྲེལ་ཆེན་ལས། ཕྱི་ནས་གཡས་དང་གཡས་མིན་དག་ཏུ་རྒྱུ་སྟེ་ཞེས་པ་ནི། ཕྱི་ནས་མཉམ་པའི་དུས་ཀྱི་ཉིན་ཞག་ལས་ལྷོར་བགྲོད་པ་ལྷོར་རྒྱུའོ།། བྱང་དུ་བགྲོད་པ་བྱང་དུ་རྒྱུའོ།། གཡས་དང་གཡས་མིན་དག་ནི་སྲང་ལ་སོགས་པ་དང༌། ལུག་ལ་སོགས་པ་ལའོ།། ཞེས་གསུངས་པའི་ཕྱིར་རོ། དེ་ལྟར་གོ་དགོས་པའི་རྒྱུ་མཚན་ནི། གཟའ་རྣམས་ཀྱིས་རི་རབ་ལ་གཡོན་བསྐོར་དུ་འགྲོ་བའི་ཚེ། རང་གི་གཡས་དེ་ལྷོ་དང་གཡོན་དེ་བྱང་ཡིན་པའི་རྒྱུ་མཚན་གྱིས་དེ་ལྟར་བཞག་པ་ཡིན་འདུག གཡས་གཡོན་ལ་གོ་ནའང་འདྲ། ལྷོ་བྱང་ལ་གོ་ནའང་འདྲ། གང་ལྟར་ཡང་དེ་གཉིས་ཀྱི་བརྩི་གཞི་དབུས་མ་ནི། གོ་ལའི་ཚངས་ཐིག་སྟེ་དེང་སངས་༼Equator༽ཞེས་གྲགས་པ་འདི་ཡིན། དེས་ན་ཚངས་ཐིག་དབུས་མར་བཞག་ནས་གཡས་གཡོན་བརྩི་བའི་ཚེ་གཡས་དེ་ལྷོ་དང༌། གཡོན་དེ་བྱང་ཡིན་ནོ།།
དེ་ནས་ཕྱེད་ཀྱི་དོན་ལ་དུས་འཁོར་རང་ལུགས་ཀྱི་འཇིག་རྟེན་གྱི་བཀོད་པའི་ལྟ་གྲུབ་དང་ཅུང་ཟད་མི་མཐུན་པའི་རྒྱ་གར་སྐར་རྩིས་རིག་པའི་ཤན་ཤོར་འདུག རྒྱ་གར་སྐར་རྩིས་རིག་པའི་ལྟ་གྲུབ་ལྟར་ན། སའི་གོ་ལ་འདི་ལ་དབུས་ནས་ཚངས་ཐིག་གིས་བཅད་དེ་ལྷོ་བྱང་དུམ་བུ་གཉིས་སུ་གཏོང་བའི་ཚེ། ལྷོ་མ་དེ་ཕལ་ཆེར་རྒྱ་མཚོ་ཡིན་པ་དང༌། དེ་ལ་ལྷ་མ་ཡིན་རྣམས་གནས་པར་བཤད་ཅིང༌། བྱང་མའི་ས་གཞི་འདི་ལ་ལྷ་དང་མི་རྣམས་གནས་པར་བཤད་པ་ལྟར། འདིར་ཡང་ཚངས་ཐིག་གི་གཡས་ལ་ཕྱེད་དང་གཡོན་ལ་ཕྱེད་དུ་བརྩི་བ་ཡིན། འོན་ཀྱང་གཡས་ཀྱི་ཕྱེད་ཅེས་བརྗོད་ཚེ། གཡས་པ་རང་ལ་དུམ་བུ་གཉིས་སུ་བགོས་པའི་ཕྱེད་མིན་པར་གཡས་ཀྱི་དོ་ཟླ་གཡོན་པའམ། ཡང་ན་ལྷོའི་དོ་ཟླ་བྱང་མ་ལ་གོ་དགོས་སོ།། དེས་ན་གཡས་ཀྱི་དོ་ཟླ་ཕྱེད་པ་དེ། ཡུལ་བྱེ་བྲག་པ་ཞིག་མིན་པར་འོག་ནས་རྒྱ་གར་རྒྱ་མཚོས་བཅད་པའི་བྱང་ཕྱོགས་ཀྱི་ཨེ་ཤི་ཡའི་ཡུལ་ལྗོངས་ཡོངས་རྫོགས་ལ་གོ་དགོས་པ་དང༌། ཤམ་བྷ་ལ་ཡང་གཡས་ཀྱི་ཕྱེད་པ་འདི་ཉིད་ཡིན་པར་རྩ་ཚིག་གིས་གསལ་བས་འདི་ལས་ལོགས་སུ་འཚོལ་བར་མི་བྱའོ།།
མདོར་ན་སྔོན་རབས་ལས་སའི་གོ་ལ་འདི་ལ་གླིང་ཆེན་བདུན་བཤད་པའི་ནང་ནས་འཛམ་བུའི་གླིང་ཞེས་བཤད་པ་དེ་དང༌། སྐབས་འདིའི་ཤམ་བྷ་ལ་གཉིས་དོན་གཅིག་མིང་གི་རྣམ་གྲངས་ཡིན་འདུག་གོ།།
དེ་ནས། དྲང་སྲོང་སེར་སྐྱ་དང་བཅོམ་ལྡན་འདས་ལ་སོགས་པ་བཞུགས་པའི་གནས་ཡིན་པས་ཐུབ་པ་མཆོག་གི་གནས་ཤམ་བྷ་ལ་དེ་ལ་གྲོང་ཁྱེར་ནི་བྱེ་བ་ཙམ་ཡོད་ཅིང༌། དེར་ཐོག་མ་ཉིད་ནས་ཡུལ་འདི་ཉིད་དུ་གཉུག་མར་གནས་པའི་ཡུལ་མི་རྣམས་གནས་སོ།།
འདིའི་གཤོང་འགྱུར་དུ། ལྷག་པར་གནས་པ་སྟེ། ཞེས་འདུག་ཀྱང༌། ལྷག་པའི་དོན་ཡིན་ན། ཨ་དྷིཀ། ཅེས་འོང་དགོས་པ་ལ། འདིར། ཨ་དྷི་བཱ་ས། ཞེས་འདུག་པས་གཉུག་མར་གནས་པའི་མི་ལ་གོ་དགོས། ཤམ་བྷ་ལའི་ཡུལ་དེ་གོང་དུ་ཞུས་པ་དེ་ཉིད་མ་ཡིན་པར་གལ་ཏེ་དག་ཞིང་འབའ་ཞིག་ཡིན་ན་དེ་ལ་ཨ་དྷི་བཱ་སའི་མི་ཡོད་པ་ཡ་མཚན་རེད།
དེ་ནས། བྱེ་བའི་གྲོང་གིས་ངེས་པར་བཅིངས་པའི་ཡུལ་དུ་འགྱུར་ཏེ་རྒྱལ་ཁམས་གྲོང་ནི་འབུམ་ཕྲག་རྣམས་ཀྱིས་སོ།། ཞེས་པ་འདི་ལ་ནང་དོན་མི་ཚང་བས་མི་ཚད་གོ་བ་ཕྱིན་ཅི་ལོག་ཏུ་ཕྱིན་འདུག། ཚིག་འདིའི་ལེགས་སྦྱར་མ་དཔེར། ཀོ་ཊི་གྲཱ་མཻརྣིརྦདྡྷོ་ བྷ་བ་ཏི་ ཧི་ བི་ཥ་ཡོ་ མཎྜ་ལོ་ གྲཱ་མ་ལཀྵཻཿ ཞེས་འདུག་པ་དེའི་གཤོང་འགྱུར་དུ། བྷ་བ་ཏི། ཞེས་པ་དེ། བི་ཥ་ཡཿ ཞེས་པ་དེ་དང་མཉམ་དུ་སྦྱར་ནས། ཡུལ་དུ་འགྱུར་ཏེ། ཞེས་འགྱུར་བ་དང༌། ཧི། དང༌། མཎྜ་ལ། ཞེས་པའི་དོན་ཚང་མི་འདུག། དེས་ན་ཇི་ལྟར་དགོས་ཞེ་ན། བྱེ་བའི་གྲོང་གིས་ངེས་པར་བཅིངས་པར་འགྱུར་བ་ཉིད་ནི་ཡུལ་ཀྱི་དཀྱིལ་འཁོར་ལ་ནི་གྲོང་ནི་འབུམ་གྱིས་སོ།། ཞེས་དགོས་འདུག
ཚིག་གི་དོན་ནི། ཤམ་བྷ་ལའི་ཡུལ་ལ་བྱེ་བའི་གྲོང་གིས་ངེས་པར་བཅིངས་པ་སྟེ་གྲོང་ཁྱེར་བྱེ་བ་དང་ལྡན་པར་འགྱུར་བ་ཉིད་ནི་ཇི་ལྟར་ཞེ་ན། ལྷོའི་དུམ་བུ་འཛམ་གླིང་ཆུང་ངུ་འདི་ལ་སྤྱིར་ནོར་གྱི་འདབ་མའི་ཡུལ་སྡེ་བརྒྱད། དེ་རེ་རེ་ལ་ཉིན་བྱེད་ཀྱི་ཡུལ་འཁོར་བཅུ་གཉིས་རེ་ཡོད་པ་དེ་དག་བསྡོམས་ཚེ་ཡུལ་འཁོར་དགུ་བཅུ་རྩ་དྲུག་ཡོད་པའི་ཡུལ་གྱི་དཀྱིལ་འཁོར་རེ་རེ་ལ་ནི་གྲོང་ཁྱེར་གྱི་གྲངས་ནི་འབུམ་འབུམ་གྱིས་གང་བ་དེ་ཉིད་ཀྱིས་སོ།། ཡུལ་དགུ་བཅུ་རྩ་དྲུག་ལ་འབུམ་གྱིས་བསྒྱུར་ན་བྱེ་བ་ལོངས་པ་ལ་འབུམ་བཞིས་ཆད་པའི་འབུམ་དགུ་བཅུ་རྩ་དྲུག་འོང་ངོ༌།།
འོ་ན། འདིར་བཤད་པའི་ཤམ་བྷ་ལའི་གྲོང་ནི་འབུམ་དགུ་བཅུ་རྩ་དྲུག་ལས་མི་འདུག་ལ། འགྲེལ་ཆེན་ལེའུ་དང་པོའི་མདོར་བསྡུས་གསུམ་པར། བྱང་ཆུབ་སེམས་དཔའ་ཕྱག་ན་རྡོ་རྗེ་ནི་ཆུ་བོ་སི་ཏཱའི་བྱང་ཕྱོགས་གྲོང་བྱེ་བ་དགུ་བཅུ་རྩ་དྲུག་ན་གནས་པའི་གདུལ་བྱ་རྣམས་རྒྱུད་ཀྱི་རྒྱལ་པོ་མཆོག་གི་དང་པོའི་སངས་རྒྱས་ཀྱི་ཡང་དག་པར་རྫོགས་པའི་སངས་རྒྱས་ཀྱི་ལམ་ཐོབ་པར་བྱ་བའི་ཕྱིར་རྒྱལ་པོ་ཟླ་བ་བཟང་པོར་གྱུར་ཏོ། ཞེས་བྱེ་བ་དགུ་བཅུ་རྩ་དྲུག་གསུངས་པ་ཇི་ལྟར་འཐད་ཅེ་ན།
འབུམ་བཞི་ཆད་ཀྱང་བྱེ་བ་ལོངས་པ་ལ་ཉེ་བ་ཡིན་པས་བྱེ་བའི་བདག་ཉིད་ཀྱི་འབུམ་དགུ་བཅུ་རྩ་དྲུག་ཡིན་པར་བརྟེན་བྱེ་བ་དགུ་བཅུ་རྩ་དྲུག་ཅེས་གསུངས་པ་ཡིན་ཏེ། འགྲེལ་ཆེན་ལེའུ་དང་པོའི་མདོར་བསྡུས་བཞི་པའི་མཇུག་ཏུ། དེ་ལྟར་གྲོང་བྱེ་བའི་བདག་ཉིད་ཡུལ་དགུ་བཅུ་རྩ་དྲུག་རྣམས་སུ་ཡུལ་དགུ་བཅུ་རྩ་དྲུག་གི་སྐད་ཀྱིས་བྲིས་སོ།། ཞེས་གསུངས་པའི་ཕྱིར་རོ།། ཡང་ན། ནོར་གྱི་འདབ་མ་བརྒྱད་པོ་རེ་རེར་ཉིན་བྱེད་ཀྱི་ཡུལ་འཁོར་བཅུ་གཉིས་རེ་བརྩིས་པས་ཡུལ་འཁོར་དགུ་བཅུ་རྩ་དྲུག་སོང་ཞིང༌། དབུས་ཀྱི་ཀཻ་ལ་ཤའི་གྲོང་དང་གཞན་ཡང་གླིང་ཕྲན་གྱི་རྒྱལ་ཁམས་ཡོད་པས་དེ་དག་བརྩི་ན་ཡུལ་འཁོར་བརྒྱ་ལས་ལྷག་ཅིང༌། བརྒྱ་ལྷག་པའི་ཡུལ་འཁོར་རེ་རེ་ལ་གྲོང་ཚོགས་འབུམ་རེ་བརྩི་ན་བྱེ་བ་ལས་ལྷག་ན་མ་གཏོགས་ཉུང་བའི་སྐྱོན་མེད་དོ།། དེས་ན། གཡས་ཀྱི་ཕྱེད་ན་ཤམ་བྷ་ལར་གྲགས་གྲོང་ནི་བྱེ་བར་གཉུག་མར་གནས་པ་གནས། ཞེས་ཤམ་བྷ་ལའི་ཡུལ་ལ་གྲོང་བྱེ་བ་ཡོད་པ་དེ་བསྒྲུབ་བྱ། བྱེ་བའི་གྲོང་གིས་ངེས་པར་བཅིངས་པ་འགྱུར་བ་ཉིད་ནི་ཡུལ་གྱི་དཀྱིལ་འཁོར་ལ་ནི་གྲོང་ནི་འབུམ་གྱིས་སོ།། ཞེས་པས་ཡུལ་དགུ་བཅུ་རྩ་དྲུག་དང་གླིང་ཕྲན་གྱི་རྒྱལ་ཁམས་དང་བཅས་པའི་ཡུལ་འཁོར་རེ་རེ་ལའང་གྲོང་ཚོགས་འབུམ་དང་ལྡན་པའི་ཕྱིར་ཞེས་སྒྲུབ་བྱེད་དུ་འགྲོ་དགོས། དེ་ལྟར་མིན་ན། ཚིག་རྐང་གོང་མའི་གྲོང་ནི་བྱེ་བ་ཞེས་པ་དེ་དང༌། འོག་མའི་བྱེ་བའི་གྲོང་གིས་ངེས་པར་བཅིངས་པ་ཞེས་པ་འདི་ཉིད་ཀུན་མཁྱེན་གཽ་རམས་པས་གསུངས་པའི་གསེར་གྱི་ཨ་ལོང་བཞིན་དུ་བསྒྲུབ་བྱ་སྒྲུབ་བྱེད་དུ་བཀོད་ནས་མཐའ་མེད་དུ་འགྱུར་བའམ། ཡང་ན་ཟློས་པའི་སྐྱོན་དུ་འགྱུར་རོ།།
སྤྱིར་ནས་གྲོང་བྱེ་བ་ཞེས་བརྗོད་ཚེ་གྲོང་ཚོགས་བྱེ་བ་གཅིག་ཏག་ཏ་དགོས་པའི་ངེས་པ་མེད། གལ་ཏེ་ཏག་ཏ་དགོས་ན། ཨ་རབ་མཀྐའི་ཡུལ་ལ་གྲོང་ཚོགས་བྱེ་བ་གཅིག་ཚང་དགོས་པར་འགྱུར་ཏེ། འགྲེལ་ཆེན་དུ། ཆུ་བོ་སི་ཏཱའི་ལྷོ་ཕྱོགས་མ་ཁའི་གྲོང་བྱེ་བས་རྣམ་པར་བརྒྱན་པར་ཀློ་ཀློ་སྟགས་གཟིག་རྣམས་ཀྱི་ལྷ་མ་ཡིན་གྱི་ཆོས་རབ་ཏུ་འཇུག་པར་འགྱུར་རོ།། ཞེས་གསུངས་པའི་ཕྱིར་རོ།།
ཁྱེད་རྣམས་ཀྱི་ཐུགས་བཞེད་ལ་
ཤམ་བྷ་ལ་དེ་ངོས་འཛིན་ཁྱད་མཚར་ཞིག་བྱས་འདུག་བསམ་གྱི་རེད། ཡིན་ན་ཡང་།
ཁྱོད་རང་གནམ་སའི་གསང་བ་ནང་ལ་གཟིགས་དང་།
ཞིབ་ཅིང་ཕྲ་བའི་སྒྲུབ་བྱེད་དོགས་དཔྱོད་དང་བཅས་པ་མཁྱེན་གྱི་རེད། སྤྱིར་ནས་ཤམ་བྷ་ལའི་སྐོར་ལ་ཞིབ་འཚོལ་གནང་མཁན་མང་པོ་འདུག་སྟེ།
དུས་འཁོར་བསྡུས་རྒྱུད་དང་འགྲེལ་ཆེན་གཉིས་པོ་ཞལ་མཇལ་བྱུང་མཁན་ཉིན་སྐར་ལས་ཀྱང་དཀོན་པོ་འདུག་གོ།
No comments:
Post a Comment