འབྱུང་རྩིས་སྔོན་འགྲོ་ཀུན་གསལ་གློག་མེ།

༄༅། །བློ་གྲོས་ཟིལ་དངར་རབ་རྒྱས་པའི། །མཁྱེན་རབ་དབང་ཕྱུག་པདྨའི་ཚལ།།

བདག་བློ་བུང་བའི་རྒྱན་ཉིད་དུ། །དུས་དང་རྣམ་ཀུན་རྒྱས་པར་མཛོད།།

 ཉི་ཟླའི་འོད་ཟེར་གསལ་ན་ཡང་། །དུས་ཀུན་བརྟན་པར་མི་བཞུགས་ཤིང་།།

བྱང་བསྟན་བྲག་ལ་མི་འཕོག་ཕྱིར། །ཀུན་གསལ་བློ་མེ་སྦྱིན་པར་བྱ།།

༼རུས་སྦལ་རྣམ་པ་ལྔའི་འགྲེལ་བཤད།༽ གནས་ཆགས་སྲིད་སྤྲུལ་བཤད་པ་ཡི། །རུས་སྦལ་རྣམ་པ་ལྔ་པོ་ལས། །ཆོས་དབྱིངས་འགྱུར་བ་མེད་པ་འདི། །གནས་པའི་རུས་སྦལ་ཞེས་སུ་གྲགས། །དེ་ལས་འཇིག་རྟེན་ཆགས་པ་དེ། །ཆགས་པའི་རུས་སྦལ་ཞེས་སུ་བཏགས། །ཆགས་ནས་ཡུན་རིང་གནས་པ་དེ། །སྲིད་པའི་རུས་སྦལ་བྱ་བ་ཡིན། །དེ་གསུམ་རུས་སྦལ་དངོས་མིན་པར། །དབྱིངས་དང་ཆགས་གནས་གསུམ་དེ་ཡིན། །ལོ་དང་སྤར་སྨེ་མཚོད་བྱེད་ཀྱི། །རུས་སྦལ་གཟུགས་དེ་སྤྲུལ་པ་ཡིན། །དེ་ཉིད་མཛུབ་མོའི་སྟེང་སྦྱར་ནས། །འགྲེལ་བཤད་བྱེད་པ་བཤད་པ་ཡིན།།

༼སྤྲུལ་པའི་རུས་སྦལ་གྱི་གནས་སྟངས་དང་། དེ་ལ་བཤད་པའི་རུས་སྦལ་སྦྱར་ཚུལ།༽ ☻དེ་ཕྱིར་སྤྲུལ་པའི་རུས་སྦལ་དེ། །གན་རྐྱལ་དག་དུ་གནས་པ་ཡི། །མགོ་བོ་ལྷོར་བསྟན་མེ་ཡི་ཁམས། །མཇུག་མ་བྱང་བསྟན་ཆུ་ཡི་ཁམས། །གློ་གཡས་ཤར་བསྟན་ཤིང་གི་ཁམས། །གློ་གཡོན་ནུབ་བསྟན་ལྕགས་གི་ཁམས། །ཡན་ལག་མཚམས་བཞི་ས་ཡི་ཁམས། །དེ་ཉིད་བཤད་པའི་རུས་སྦལ་དང་། །སྦྱར་ནས་བརྩི་ན་འདི་ལྟ་སྟེ། །མཛུབ་མོ་ལྔ་པོ་རིམ་པ་བཞིན། །ཤིང་མེ་ས་ལྕགས་ཆུ་རུ་བཞག  །དེ་དག་ལྔ་པོ་གང་ཡང་རུང་། །གཅིག་ལ་ངོས་འཛིན་བྱེད་དེ་རང་། །སྔོན་དེ་མ་དང་འོག་དེ་བུ། །ཨ་རྒས་དགྲ་ལ་ཚ་བོ་གྲོགས།། དེ་ལ་བརྩི་བྱ་རྩི་བྱེད་ཀྱི། །གཙུག་ལག་ཐམས་ཅད་གྲུབ་པ་ཡིན།།☺

༼འབྱུང་བ་ལྔའི་ངོ་བོ། ངེས་ཚིག དབྱེ་བ། མཚན་ཉིད། བྱེད་ལས།༽ བརྟག་ན་དབེན་ཕྱིར་མ་གྲུབ་པ། །འབྱུང་བ་དེ་ཡི་ངོ་བོ་ཡིན། །དེ་ལས་ཆགས་གནས་འབྱུང་བ་དེ། །འབྱུང་བ་ལྔ་ཡི་ངེས་ཚིག་ཡིན། །དབྱེ་བ་ལྔ་འམ་དེ་ཡི་སྟེང་། །མཁའ་རླུང་རི་བསྟན་བརྒྱད་ཀྱང་སྲིད། །ཤིང་སོགས་རིམ་བཞིན་གཡོ་སྲེག་དང་། །སྲ་གཅོད་བརླན་ལྔ་མཚན་ཉིད་ཡིན། བྱེད་ལས་མ་འཁྲུག་བདེ་སྟེར་ཞིང་། །འཁྲུག་ན་ན་འཆིའི་སྡུག་བསྔལ་བསྐྱེད། །བདེ་སྡུག་ཕལ་ཆེར་འབྱུང་བས་བྱེད། །དེ་བསལ་ཕྱིར་ན་བརྩི་འདི་གཅེས།།

༼བརྩི་ཐབས་མདོར་བསྡུས།༽ ☻དེ་ལ་མེད་ཐབས་མེད་པ་ཡི། །བརྩི་ཐབས་བསྡུ་ན་བཅུ་གཅིག་སྟེ། །ལོ་ཟླ་ཞག་དུས་སྤར་སྨེ་དང་། །གཟའ་སྐར་དར་རྒུད་དགུ་དུར་རོ།།

༼རྒྱས་བཤད་ལས་དང་པ་ལོའི་སྐོར།༽

༈ ལོ་ལ་དཀྱུས་ལྡོག་རྣམ་པ་གཉིས། །དཀྱུས་མ་ལོ་འགྲོས་བཅུ་གཉིས་ཏེ། །བྱི་བ་གླང་སྟག་ཡོས་འབྲུག་སྦྲུལ། །རྟ་ལུག་སྤྲེལ་དང་བྱ་ཁྱི་ཕག །བྱི་སྟག་འབྲུག་རྟ་སྤྲེལ་ཁྱི་ཕོ། །གླང་ཡོས་སྦྲུལ་ལུག་བྱ་ཕག་མོ།།

༈ དེ་དག་སོ་སོའི་གནས་ལུགས་ཀྱང་། །རུས་སྦལ་གན་རྐྱལ་གནས་པ་དེའི། །ཕྱོགས་བཞིར་གཉིས་གཉིས་མཚམས་རེ་རེ། །ཤར་དུ་སྟག་ནས་འགོ་བཟུང་སྟེ། །བྱང་ཤར་གླང་གི་བར་དུ་དང་། །ལག་གཡོན་མཛུབ་མོ་བཞི་པོ་ལའང་། །རིམ་པ་དེ་དང་མཐུན་པར་བཀོད།།

༼སྲོག་ཁམས་འཚོལ་ཐངས།༽ ལོ་དེའི་སྲོག་ལུས་དབང་ཀླུང་ལས། །སྲོག་ནི་གནས་ཕྱོགས་འབྱུང་དེ་ཡིན། །སྟག་ཡོས་སྲོག་ཤིང་རྟ་སྦྲུལ་མེ། །བྱ་སྤྲེལ་ལྕགས་ལ་བྱི་ཕག་ཆུ། །གླང་ལུ་ཁྱི་འབྲུག་བཞི་སྲོག་ས། །སྲོག་གི་མ་ནི་བླ་རུ་གྲགས།།

༼དབང་ཐང་འཚོལ་ཐངས།༽ ལུས་ཁམས་འཚོལ་བ་དབང་ཐང་ཁམས། །དགོས་པས་ཐོག་མར་དེ་བཤད་བྱ། །ཕོ་ལོ་གནམ་ལོ་ཤར་བའི་ཚེ། །གཅིག་བཅུ་རང་ལ་གཉིས་གསུམ་མ། །བཞི་ལྔ་དགྲ་ལ་དྲུག་བདུན་གྲོགས། །བརྒྱད་དགུ་བུ་རུ་ཤེས་པར་བྱ།། ༈ མོ་ལོ་གནམ་ལོ་ཤར་བའི་ཚེ། །གཅིག་གཉིས་རང་ལ་གསུམ་བཞི་མ། །ལྔ་དྲུག་དགྲ་ལ་བདུན་བརྒྱད་གྲོགས། །དགུ་དང་བཅུ་ནི་བུ་ཡིན་ནོ།།

༼ལུས་ཁམས་འཚོལ་ཐངས།༽ དེ་ནས་ལུས་ཀྱི་ལྡེ་མིག་ནི། །སྟག་ཡོས་བྱ་སྤྲེལ་ཁམ་ནས་བརྩི། །གླང་ལུག་རྟ་བྱི་ཟིན་ནས་བརྩི། །ཁྱི་འབྲུག་ཕག་སྦྲུལ་དྭ་ནས་བརྩི། །ལྕགས་ཆུ་མེ་ས་ཤིང་དུ་བགྲང་། །དབང་ཐང་ལུས་གཉིས་བབ་ས་བསྟུན།།

༼ཀླུང་རྟ་འཚོལ་ཐངས།༽ སྟག་རྟ་ཁྱི་གསུམ་ཀླུང་སྤྲེལ་ལྕགས། །བྱི་འབྲུག་སྤྲེལ་གསུམ་ཀླུང་སྟག་ཤིང་། །བྱ་གླང་སྦྲུལ་གསུམ་ཀླུང་ཕག་ཆུ། །ཕག་ལུག་ཡོས་གསུམ་ཀླུང་སྦྲུལ་མེ།།

༈ ལྡོག་པ་ལེག་མེན་བསྐོར་ཚུལ་ནི། །སྐྱེས་པ་སྟག་ནས་གཡས་བསྐོར་དང་། །བུད་མེད་སྤྲེལ་ནས་གཡོན་བསྐོར་དུ། །རང་གི་ལོ་གྲངས་བར་དུ་བརྩི། །སྐྱེས་པ་རང་ནས་བུ་དེད་དང་། །བུད་མེད་རང་ནས་མ་དེད་བགྲང་།།

གཉིས་པ་ནས་བཞི་པའི་བར་གྱི་ཟླ་ཞག་དུས་ཚོད་ཀྱི་སྐོར།

༈ གཉིས་པ་ཟླ་བ་བཅུ་གཉིས་ལས། །ལོ་འགྲོས་བཅུ་གཉིས་མཛུབ་མོའི་སྟེང་། །བཅུ་གཅིག་སྟག་ཟླ་ཡིན་པ་ནས། །ཟླ་གྲངས་དེད་ནས་རིམ་བཞིན་བརྩི། །༈ གསུམ་པ་ཚེས་གྲངས་སུམ་ཅུ་ལ། །ལོ་རྟགས་འཁོར་ཚུལ་འདི་ལྟ་སྟེ། །ཕོ་ཟླ་སྟག་གིས་འགོ་བཟུང་ཞིང་། །མོ་ཟླ་སྤྲེལ་གྱིས་འགོ་བཟུང་བརྩི། །༈ བཞི་པ་ཆུ་ཚོད་ཉེར་བཞི་པོ། །མཛུབ་མོའི་ལོ་ལ་གཉིས་གཉིས་སྦྱར། །ཡོས་ལ་ལྔ་དྲུག་འབྲུག་བདུན་བརྒྱད། །སྦྲུལ་ལ་དགུ་བཅུ་ལ་སོགས་སྦྱར།།

༈ ཟླ་ཞག་དུས་ཀྱི་དབང་ཐངས་ཁམས། །གནམ་ལོ་མ་ལ་ཟླ་བ་བུ། །ཟླ་བ་མ་ལ་ཞག་ནི་བུ། །ཞག་ནི་མ་ལ་དུས་ཚོད་བུ།། ༈ ཟླ་བ་སྟག་ནས་འགོ་བཟུང་ཞིང་། །ཞག་ནི་སྟག་སྤྲེལ་གང་རུང་ནས། །དུས་ཚོད་ཡོས་ནས་འགོ་བཟུང་ཚེ། །ལོ་ཟླ་དབང་ཐང་གཉིས་སྦྲགས་ལ། །ཞག་དང་དུས་ཚོད་རྐྱང་པར་དེད།།☺

༼ཟླ་ཞག་དུས་ཀྱི་དབང་ཁམས་འཚོལ་ཐངས་ནི། གནམ་ལོ་ལྕགས་སྟག་ཟླ་བ་༦པའི་ཚེས་༥། ཉིན་གུང་ཆུ་ཚོད་༡༢ཡིན་པའི་དབང་དུ་བཏང་ན། དང་པ་རང་ཟླ་བའི་ལོ་རྟགས་ངོས་བཟུང་དགོས། དེའི་བརྩི་ཚུལ་ནི། ལག་པའི་མཛུབ་ཚིག་གི་སྟེང་ལུ་ལོ་རྟགས་བཅུ་གཉིས་བཀོད་དེ་ཡོད་མི་དེ་ལུ། སྟག་ལུ་ཟླ་བ་བཅུ་གཅིག་སྦེ་རྩིས། དེ་ལས་རིམ་པ་བཞིན་དུ། ཡོས་ལུ་བཅུ་གཉིས། འབྲུག་ལུ་ཟླ་བ་དང་པ་པ་སོགས་རིམ་པ་བཞིན་དུ་བརྩིཝ་ད་ ཟླ་བ་དྲུག་པ་དེ་ བྱ་ལུ་འཕོག་ཆིཝ་ལས་ཟླ་བ་དྲུག་པའི་ལོ་རྟགས་བྱ་སྦེ་བཞག་ནི་ཨིན། ༈ དེ་ལས་ཟླ་བ་དྲུག་པ་དེ་གི་ཁམས་འཚོལ་ཚུལ་ནི། གནམ་ལོའི་དབང་ཁམས་ལྕགས་ཨིནམ་ལས། ལྕགས་བུ་ཆུ་ཟེར་སླབ་སྟེ། མཛབ་མོ་ལྔའི་ཆུང་ཤོས་ཆུ་ཁམས་དེ་ལུ་བཟུང་། དེ་ལས་མཛུབ་མོ་དེ་གི་མདུན་ལུ་སྟག་དང་རྒྱབ་ལུ་ཡོས་ཟེར་ མཛུབ་མོ་རེ་རེ་ལུ་ ཁམས་གཉིས་གཉིས་སྦེ་བརྩི་སྟེ་འགྱོ་བའི་ཚེ། སྤྲེལ་བྱ་གཉིས་པོ་འདི་མཛུབ་མོ་རིང་ཤོས་ ས་ཁམས་འདི་ལུ་འཕོག་ཆིཝ་ལས་ ཟླ་བ་དྲུག་པའི་ཁམས་དེ་ས་ཨིན་མས། དེ་འབདཝ་ལས་ཟླ་བ་དྲུག་པ་ས་བྱ་སྦེ་བཞག་ནི་ཨིན།

༈ ཚེས་ཀྱི་ལོ་རྟགས་འཚོལ་བའི་ཚེ། ཟླ་བ་དེ་ ཕོ་ཟླ་མོ་ཟླ་གང་ཡིན་བལྟ་དགོ། ད་ལྟོ་ཟླ་བ་དྲུག་པ་མོ་ཟླ་ཨིནམ་ལས་བརྟེན། ཚེས་གཅིག་ལུ་སྤྲེལ་ལས་འགོ་བཙུགས་དགོ། དེ་ཡང་ལག་པའི་མཛུབ་ཚིག་གི་སྟེང་ལུ་ཡོད་མི་ སྤྲེལ་དེ་ལས་འགོ་བཟུང་སྟེ་ལོ་རྟགས་རེ་རེ་ལུ་ཚེས་རེ་སྦེ་བརྩིཝ་ད་ ཚེས་ལྔ་འདི་ བྱི་བ་ལུ་འཕོག་མཆིཝ་ལས་དེ་ལུ་མཚམས་བཞག་སྟེ་ ཚེས་ལྔའི་ལོ་རྟགས་བྱི་བ་སྦེ་བཞག་ནི་ཨིན། དེ་བཟུམ་སྦེ་ཟླ་བ་ཕོ་ཟླ་ཨིན་པ་ཅིན། མཛུབ་ཚིག་གི་སྟག་ལས་འགོ་བཟུང་སྟེ་རིམ་བཞིན་བརྩི་དགོ། ༈ ཁམས་འཚོལ་བའི་ཚེ་ ཟླ་བ་ས་ཁམས་ཨིནམ་ལས་བརྟེན། ས་བུ་ལྕགས་ཟེར་སླབ་སྟེ་ མཛུབ་མོ་ལྕགས་ཁམས་དེ་ལུ་བཟུང་དགོ དེ་ལས་འགོ་བཟུང་སྟེ། མཛུབ་མོ་རེ་རེ་ལུ་ ཚེས་རེ་འགྱང་སྟེ་འགྱོཝ་ད་ ཚེས་ལྔ་ལུ་ མཛུབ་མོ་ས་ཁམས་དེ་ལུ་ལྷོད་ནི་དེ་གིས་ ཚེས་ལྔ་དེ་ས་ཁམས་ཨིནམ་ལས་ ཞག་དེ་ས་བྱི་ཨིན་མས། ཞག་དང་དུས་ཚོད་རྐྱང་པ་བརྩི་དགོ་ནི་དེ་གིས་ དེ་གཉིས་ཀྱི་སྐབས་ལུ་མཛུབ་མོ་རེ་རེ་ལུ་ཁམས་གཉིས་གཉིས་མ་བརྩི་བར་རེ་རེ་སྦེ་བཞག་དགོ།

༈ དེ་ལས་དུས་ཚོད་ཀྱི་ལོ་རྟགས་འཚོལཝ་ད་ དུས་ཚོད་ཀྱི་འགོ ནམ་ལངས་ཡོས་ཀྱི་ཆུ་ཚོད་ལྔ་ལས་འགོ་བཙུགས་ནི་འདི་གིས་ ལག་པའི་ཚིག་ལུ་ལོ་རྟགས་བཅུ་གཉིས་བཀོད་དེ་ཡོད་མི་དེ་གི་ ཡོས་ལུ་ཆུ་ཚོད་ལྔ་པ་དང་དྲུག་པ། འབྲུག་ལུ་བདུན་པ་དང་བརྒྱད་པ་སོགས་ ལོ་རྟགས་རེ་རེ་ལུ་ཆུ་ཚོད་གཉིས་རེ་སྦེ་བརྩིཝ་ད་ བཅུ་གཅིག་དང་བཅུ་གཉིས་ གཉིས་པོ་འདི་རྟ་ལུ་ལྷོད་ནི་དེ་གིས་ ཆུ་ཚོད་བཅུ་གཉིས་འདི་རྟ་ཨིན་མས། ༈ དེ་ལས་དེ་གི་ཁམས་འཚོལཝ་ད་ ཞག་གི་ཁམས་ས་ཨིན་ནི་དེ་གིས་ ས་བུ་ལྕགས་ཟེར་སླབ་སྟེ། མཛུབ་མོ་ལྕགས་ཁམས་དེ་ལུ་བཟུང་དགོ། དེ་ལས་མཛུབ་མོ་ལྕགས་ཁམས་དེ་ལུ་ ཡོས་སྦེ་རྩིས་ཞིནམ་ལས་མཛུབ་མོ་རེ་རེ་ལུ་ལོ་རྟགས་རེ་རེ་རྩིས་ཏེ་འགྱོ་ནི་ཨིན དེ་སྦེ་འགྱོཝ་ད་ རྟ་དེ་མཛུབ་མོ་མེ་ཁམས་དེ་ལུ་ལྷོད་ནི་དེ་གིས་ ད་ལྟོ་དུས་ཚོད་ཀྱི་ཁམས་དེ་མེ་ཁམས་ཨིནམ་དང་། དུས་ཚོད་འདི་མེ་རྟ་ཨིན་མས།།༽

༼ལོ་གཅིག་གི་དུས་བཞི་དང་ཟླ་བའི་ར་འབྲིང་ཐ་གསུམ།༽ དུས་བཞི་དཔྱིད་དབྱར་སྟོན་རྒུན་བཞི། །རེ་རེར་ར་འབྲིང་ཐ་གསུམ་ཕྱེ། །བཅུ་གཅིག་དཔྱིད་ཟླ་ར་བ་ནས། །བཅུ་པ་སྟོན་ཐ་བར་དུ་སྦྱར།།

༈ ☻ཉ་སྐར་ཟླ་བའི་ཐ་སྙད་ཀྱང་། །དཔྱིད་ཟླ་ར་བ་བཅུ་གཅིག་ནས། །མགོ་རྒྱལ་མཆུ་དབོ་ནག་པ་དང་། །ས་ག་སྣྲོན་དང་ཆུ་སྟོད་དེ། །གྲོ་བཞིན་ཁྲུམས་དབྱུག་སྨིན་དྲུག་རྣམས། །རིམ་བཞིན་སྦྱར་ནས་ཤེས་པར་བྱ།།

ལྔ་པ་སྤར་ཁ་བརྒྱད་ཀྱི་སྐོར།

༈ ལྔ་པ་སྤར་ཁ་བརྒྱད་པོ་དེ། །ཕྱོགས་མཚམས་བརྒྱད་ལ་རེ་རེ་བཀོད། །ལི་མེ་ཁོན་ས་དྭ་ལྕགས་དང་། །ཁེན་གནམ་ཁམ་ཆུ་གིན་རི་དང་། །ཟིན་ཤིང་ཟོན་རླུང་སྤར་ཁ་བརྒྱད། །མཁའ་རི་རླུང་ཡང་སར་བསྡུས་པས། །མདོར་དོན་འབྱུང་བ་ལྔ་རུ་འགྱུར།།

༼བབ་སྤར་བརྩི་ཚུལ།༽  སྐྱེས་པ་ལི་ནས་ཁོན་ཕྱོགས་སྐོར། །བུད་མེད་ཁམ་ནས་ཁེན་ལ་སྐོར། །བཅུ་ཁ་མ་ལོངས་རེ་རེ་བརྩི། བཅུ་ཁ་ལོངས་ན་ཟུར་ལ་མཆོངས།།

༼སྐྱེས་སྤར་འཚོལ་ཐངས།༽ མ་ལོའི་སྟེང་ནས་བུ་ཡི་ལོས། །འཕྲི་ལྷག་སྟེང་དུ་གཅིག་བསྣན་པའི། །གྲངས་དེར་མ་ཡི་སྤར་ཁ་སྐོར། །གང་བབ་བུ་ཡི་སྐྱེས་སྤར་ཡིན།།

༼སྤར་ཁ་ཚེས་ལ་འཁོར་ཐངས།༽ སྟག་རྟ་ཁྱི་གསུམ་ལི་ཡིས་ཚེས། །བྱི་འབྲུག་སྤེལ་གསུམ་ཁམ་གྱིས་ཚེས། །བྱ་གླང་སྦྲུལ་གསུམ་དྭ་ཡིས་ཚེས། རིམ་བཞིན་དེད་པས་ཚེས་ལ་འཁོར།།

དྲུག་པ་སྨེ་མ་དགུའི་སྐོར།

༈ དྲུག་པ་སྨེ་བ་དགུ་པོ་དེ། །གཅིག་དཀར་གཉིས་ནག་གསུམ་མཐིང་དང་། །བཞི་ལྗང་ལྔ་སེར་དྲུག་དཀར་དང་། །བདུན་དམར་བརྒྱད་དཀར་དགུ་དམར་སྟེ། །དཀར་གསུམ་ལྕགས་ལ་ནག་མཐིང་ཆུ། །བཞི་ལྗང་ཤིང་ལ་ལྔ་སེར་ས། །དགུ་དམར་བདུན་དམར་མེ་ཡིན་ནོ།།

༼སྨེ་བ་བཀོད་ཐང་།༽ དབུས་ནས་གནམ་ལྕགས་རི་བོ་དང་། །མེ་ཆུ་ས་ཤིང་རླུང་ནས་དབུས།།

༼སྨེ་བ་སླར་ཡང་རང་གནས་སུ་འཁོར་གྲངས།༽ གཅིག་བཅུ་བཅུ་དགུ་ཉེར་བརྒྱད་དང་། །སོ་བདུན་ཞེ་དྲུག་ང་ལྔ་དང་། །རེ་བཞི་དོན་གསུམ་གྱ་གཉིས་དང་། །གོ་གཅིག་བརྒྱ་ལ་དབུས་སུ་ཚོགས།།

༼ལུས་ཀྱི་སྨེ་བ་འཚོལ་ཐངས།༽ གནམ་ལོའི་སྨེ་བ་དབུས་བཞག་ནས། །བྱ་འཕུར་ཁོ་ནས་སྨེ་བ་རེར། །བཅུ་ཚན་རེ་རེ་བགྲང་བྱ་ཞིང་། །བཅུ་ཁ་མ་ལོངས་རེ་རེ་བརྩི།།

༼བབ་སྨེ་འཚོལ་ཐངས།༽ སྐྱེས་སྨེ་དབུས་བྱས་རིམ་བཞིན་བཀོད། །སྐོར་ལུགས་དབུས་ནས་ཤར་དུ་ཐོན། །ཕོ་ལོ་དྲུག་པོ་གཡོན་སྐོར་དང་། །མོ་དྲུག་གཡས་སྐོར་དུ་ལོན་བགྲང་།།☺

༼སྨེ་བའི་སྲོག་ལུས་དབང་ཀླུང་།༽ སྐྱེས་པའི་སྨེ་བ་དབུས་བཞག་པས། །སྲོག་ནི་ལྷོ་ནུབ་མཚམས་ན་གནས། །དབང་ཐང་བྱང་ཤར་ལུས་ནི་དབུས། །མཐུན་གསུམ་ཀླུང་རྟའི་སྲོག་སྨེ་ཀླུང་།།

༼སྨེ་བ་ཚེས་ལ་འཁོར་ཚུལ།༽ ☻སྟག་སྤྲེལ་ཕག་སྦྲུལ་གཅིག་དཀར་ཚེས། །བྱི་རྟ་བྱ་ཡོས་བཞི་ལྗང་ཚེས། །གླང་ལུག་ཁྱི་འབྲུག་བདུན་དམར་ཚེས། །རིམ་བཞིན་དེད་པས་ཚེས་ལ་འཁོར།།

བདུན་པ་གཟའི་སྐོར།

༈ བདུན་པ་གཟའ་ནི་བདུན་པོའི་སྟེང་། །སྒྲ་གཅན་བསྣན་པས་བརྒྱད་ཡིན་ཏེ། །ཉི་མ་མིག་དམར་མེ་ཡི་ཁམས། །ཟླ་བ་ལྷག་པ་ཆུ་རུ་འདོད། །ཕུར་བུ་སྒྲ་གཅན་རླུང་ཡིན་ལ། །པ་སངས་སྤེན་པ་ས་ཡི་ཁམས།། ༼འབྱུང་རྩིས་ཀྱི་གཟའི་ཁམས་དགོས་མཁོ་མེད་པས་སྐབས་འདིར་གཟའི་ཁམས་འདི་སྐར་རྩིས་ལྟར་དུ་བཀོད་པ་ཡིན།༽

༼གཟའ་བདུན་ཚེས་ལ་འཁོར་ཚུལ།༽ སྟག་རྟ་ཁྱི་གསུམ་སྤེན་པས་ཚེས། །བྱི་འབྲུག་སྤྲེལ་གསུམ་མིག་དམར་སྟེ། །ཕག་ལུག་ཡོས་གསུམ་ཟླ་བ་དང་། །བྱ་གླང་སྦྲུལ་གསུམ་ཕུར་བུས་ཚེས།།☺

བརྒྱད་པ་སྐར་མའི་སྐོར།

༈ བརྒྱད་པ་སྐར་མ་ཉི་ཤུ་བརྒྱད། །ཐ་སྐར་བྲ་ཉེ་སྨིན་དྲུག་དང་། །སྣར་མ་མགོ་ལག་ནབས་སོ་རྒྱལ། །སྐག་མཆུ་བྲེ་དབོ་མེ་བཞི་ནག ས་རིས་ས་ག་ལྷ་མཚམས་སྣྲོན། །སྣུབས་དང་ཆུ་སྟོད་ཆུ་སྨད་དང་། །གྲོ་བཞིན་མོན་གྲེ་མོན་གྲུ་དང་། །ཁྲུམས་སྟོད་ཁྲུམས་སྨད་ནམ་གྲུ་བཅས། །རྒྱུ་སྐ་ཉི་ཤུ་རྩ་བདུན་ཏེ། །བྱི་བཞིན་ཞེས་པ་གྲོ་བཞིན་མཐར། །སྦྱར་བས་ཤི་ཤུ་རྩ་བརྒྱད་འབྱུང་། །སྨིན་དྲུག་ཤ་ནས་འགོ་བཟུང་སྟེ། །ཕྱོགས་ལ་དྲུག་དྲུག་མཚམས་རེ་སྦྱར།།

༼སྐར་མའི་དབང་ཁམས་སྐར་རྩིས་ལྟར་དུ་བྱས་པ།༽ ☻སྨིན་དྲུག་རྒྱལ་དང་མཆུ་དང་བྲེ། །ས་ག་ཁྲུམས་སྟོད་བྲ་ཉེ་མེ། །སྣར་མ་ལྷ་མཚམས་སྣྲོན་ཆུ་སྨད། །གྲོ་བཞིན་བྱི་བཞིན་མོན་གྲུ་ས། །ལག་སྐག་སྣུབས་དང་ཆུ་སྟོད་དང་། །མོན་གྲེ་ཁྲུམས་སྨད་ནམ་གྲུ་ཆུ། །མགོ་དང་ནབས་སོ་དབོ་མེ་བཞི། །ནག་པ་ས་རི་ཐ་སྐར་རླུང་།།☺☺☺

དགུ་པ་དར་རྒུད་ཀྱི་སྐོར།

༈ དར་རྒུད་སྟག་སྤྲེལ་ཕག་སྦྲུལ་ནས། །འགོ་བཟུང་ནས་ནི་བརྩི་བ་སྟེ། །ས་ཆུ་རྣམས་ནི་སྦྲུལ་ནས་དང་། །ཤིང་རྣམས་སྤྲེལ་དང་མེ་རྣམས་ཕག ལྕགས་རྣམས་སྟག་ནས་འགོ་བཟུང་སྟེ། །ལོ་ཟླ་ཞག་དུས་སྟེང་དུ་བཞག།

༈ དབུགས་ལེན་མངལ་གནས་ལུས་རྫོགས་གསུམ། །བཙས་པ་ཁྲུས་བྱེད་གོས་གྱོན་གསུམ། །ལས་བྱེད་དར་བ་གུས་པ་གསུམ། །ན་བ་ཤི་བ་དུར་ཞུགས་གསུམ།། ༈ དར་བ་ལས་བྱེད་བཟང་པོའི་རབ། །ཁྲུས་བྱེད་གོས་གྱོན་བཟང་པོའི་འབྲིང་། །ལུས་རྫོགས་བཙས་པ་བཟང་པོའི་མཐའ། །དབུགས་ལེན་མངལ་གནས་ངན་པའི་རབ། །གུད་པ་ན་བ་ངན་པའི་འབྲིང་། །ཤི་བ་དུར་ཞུགས་ངན་པའི་མཐའ།།

བཅུ་པ་དགུ་མིག་གི་སྐོར།

༼༡༠༽ ༈ དགུ་མིག་རྐྱང་སྦྲགས་སྤར་སྨེ་བཞི། །རྐྱང་པ་སྐྱེས་པ་བྱི་བ་དང་། །བུད་མེད་བྱ་ནས་འགོ་བཟུང་སྟེ། །གཡོན་སྐོར་བགྲང་པའི་དགུ་པ་རྣམས། །དགུ་མིག་ནང་དུ་ཚུད་པ་ཡིན།། ༼དགུ་མིག་བབ་པའི་ལོ་གྲངས།༽ ༩ ༡༨ ༢༧ ༣༦ ༤༥ ༥༤ ༦༣ ༧༢ ༨༡༽

ས་ཆུ་ལོ་དྲུག་བྱི་ནས་དང་། །ཕྱོགས་གསུམ་རང་གི་འོག་མ་ནས། །གཡོན་སྐོར་བགྲང་པའི་དགུ་པ་རྣམས། །སྦྲགས་མའི་དགུ་མིག་ཅེས་སུ་གྲགས།།

ས་བཞི་དང་ཆུ་གཉིས་ཀྱི་ལོ་རྟགས་ཡིན་ན་བྱི་བ་ནས་འགོ་བཙུགས་ནས་བགྲང་དགོས་པ་དང་། ཕྱོགས་གཞན་ཤར་ལྷོ་ནུབ་གསུམ་གྱི་ལོ་རྟགས་དྲུག་པོ་གང་རུང་ཡིན་ན། ལོ་རྟགས་གཉིས་གཉིས་ཡོད་པའི་ནང་ནས་རང་གི་འོག་མ་དེ་ལས་འགོ་བཙུགས་ཏེ་བགྲང་པའི་ཚེ་དགུ་པ་དེ་མཚམས་གྱི་གཤེད་བཞི་ལོ་པ་གླང་ལུག་ཁྱི་འབྲུག་གང་རུང་ལ་བསླེབས་པ་ཡིན་པས་དེ་ལ་སྦྲགས་མའི་དགུ་མིག་ཅེས་བྱ་བ་ཡིན། སྦྲགས་མའི་དགུ་མིག་བབས་པའི་ལོ་གྲངས། ༩ ༢༡ ༣༣ ༤༥ ༥༧ ༦༩ ༨༡ མདོར་ན་རྐྱང་པའི་དགུ་མིག་གི་སྐབས་སུ་ལོ་གྲངས་དགུ་དགུ་བགྲང་ནས་དུར་བཞི་གང་ལ་བབས་ཀྱང་དགུ་མིག་གི་གྲངས་སུ་བརྩི་བ་དང་། སྦྲགས་མའི་དགུ་མིག་ནི་དུར་ས་གཅིག་ཏུ་ངེས་པ་ཡིན་ནོ།

༈ སྤར་ཁ་ཕོ་ལི་མོ་ཁམ་དང་།། ༈ སྨེ་བ་སྐྱེས་སྨེར་བབས་པ་འོ།། ༼སྤར་ཁའི་དུར་མིག་བབས་པའི་ལོ་གྲངས། ༩ ༡༧ ༢༥ ༣༣ ༤༡ ༤༩ ༥༧ ༦༤ ༧༣ ༨༡༽ ༼སྨེ་བའི་དགུ་མིག་བབས་པའི་ལོ་གྲངས། ༡ ༡༠ ༡༩ ༢༨ ༣༧ ༤༦ ༥༥ ༦༤ ༧༣ ༨༢ ༩༡༽

བཅུ་གཅིག་པ་དུར་མིག་གི་སྐོར།

༈ དུར་མིག་སྐོར་འགོ་བབས་ས་གཉིས། །སྦྲགས་མའི་དགུ་མིག་འདྲ་ན་ཡང་། །སྐོར་འགོ་འབྲིང་པོ་བཞི་ཡི་ཁམས། །བརྩི་བྱའི་དབང་ཁམས་མཐུན་པ་དགོས། །དབང་མཐུན་དུར་དེ་རང་དུར་ཆེ། །དུར་དེའི་བདུན་ཟུར་རང་དུར་ཆུང་། །དབང་ཐང་དགྲ་དུར་གཤེད་དུར་ཆེ། །དེ་མཐུན་བདུན་ཟུར་གཤེད་དུར་ཆུང་།། དཔེ་ན་ལོ་གྲངས་ཉེར་གཅིག་དང་། །ལྔ་གཅིག་ཞེ་ལྔ་བཅོ་ལྔའི་སྟེང་། །སླེབས་པ་རང་དུར་ཆེ་ཆུང་དང་། །གཤེད་དུར་ཆེ་ཆུང་རིམ་པར་སྦྱར།།

༼དཔེར་ན་ལོ་གྲངས་མེ་རྟ་ལྟ་བུ་ཞིག་ལ་མཚོན་ན། ལོ་གྲངས་༢༡གི་སྟེང་དུ་མེ་དུར་ཁྱི་ལ་བབ་ཅིང་། དེའི་ཁམས་མེ་ཡིན་པའི་དབང་གིས། མེ་རྟ་ནི་རང་དང་ཁམས་མཐུན་པ་ཡིན་པས་རང་དུར་ཆེ་བ་བཞག ལོ་གྲངས་༥༡ལ་བསླེབས་ཚེ་མེ་དུར་དེ་ཉིད་ ཁྱིའི་བདུན་ཟུར་འབྲུག་ལ་བབ་ཅིང་ འབྲུག་དེའི་ཁམས་མེ་ཡིན་པས་མེ་རྟ་ང་དང་ཁམས་མཐུན་སོང་བའི་དབང་གིས་ ང་དུར་ཆུང་བ་ཞེས་བྱ། ༤༥ལ་སླེབ་ཚེ་སླར་ཡང་མེ་དུར་ཁྱི་ལ་བབ་ཅིང་། དེའི་ཁམས་ཆུ་ཡིན་པས་མེ་རྟ་རང་གི་དགྲ་ལ་སོང་བའི་དབང་གིས་གཤེད་དུར་ཆེ་བ་ཞེས་བྱ། ལོ་གྲངས་༡༥ལ་སླེབ་ཚེ་མེ་དུར་དེ་ ཁྱིའི་བདུན་ཟུ་འབྲུག་ལ་བབ་ཅིང་། དེའི་ཁམས་ཆུ་ཡིན་པས་མེའི་དགྲ་ཁམས་ལ་སོང་བའི་དབང་གིས་གཤེད་དུར་ཆུང་བར་བཞག་པ་ཡིན་ནོ།། སྐབས་འདིར་དུར་མིག་གི་དབང་ཁམས་འཚོལ་ཐངས་ནི། བུད་མེད་ཀྱི་ལོག་མེན་འཚོལ་ཐངས་ལྟར་འཚོལ་དགོས།༽

༈ དྲུག་གསུམ་དུར་གྱི་ཉི་མ་ཞེས། །ཟླ་བ་ཀུན་ལ་གསུམ་གསུམ་ཡོད།།ར་བཞིའི་དུར་རྣམས་གནམ་དུར་དང་། །འབྲིང་བཞི་བར་དུར་ཐང་ཆུང་བཞིའི། །དུར་རྣམས་ས་དུར་ཞེས་བྱ་འོ།།

འབྱུང་རྩིས་ཀུན་གསལ་གློག་མེ་ལས་རེ་ཞིག་ལེའུ་དང་པོ་རྫོགས་སོ།།  །།

ཞེས་པ་འདི་ཡང་ གསང་ཟབ་རིག་གཞུང་མཐོ་སློབ་ཀྱི་སློབ་མ་ དུས་ཀྱི་བྱ་བས་བྲེལ་ནས་ མང་པོ་སྦྱང་ལོངས་མེད་པ་རྣམས་ཀྱི་དོན་དུ་ ཉུང་ངུ་རྣམ་གསལ་གྱི་རྩ་བ་ཞིག་དགོས་མཁོར་མཐོང་ནས་ བསམ་གཏན་མིང་པས་གྲོ་བཞིན་ཟླ་བའི་མང་ངོ་ ༼(7-8-2010) བཟང་པོ་དང་རྒྱལ་བ་གཉིས་པ་སྟེ་ ཉིན་གཉིས་ཀྱི་རིང་ལ་རྫོགས་པར་བགྱིས་པ་འདིས་ཀྱང་སློབ་བུ་རྣམས་ལ་ཕན་པའི་རྒྱུར་གྱུར་ཅིག།