ཨོ་རྒྱན་པདྨའི་འཁྲབ་སྲུང་འབྲེལ་ཚད་དོན་ལྡན་ཞེས་བྱ་བ་བཞུགས།
༄༅། །པདྨའི་གནས་ལས་པདྨའི་མཚན་རྙེད་པའི། །པདྨའི་སྙིང་པོ་པདྨ་སམ་བྷ་བ།།
པདྨའི་ཕྱག་གཡས་པདྨ་ལྟར་བརྐྱངས་ནས། །པདྨའི་བུ་ལ་པདྨས་དངོས་གྲུབ་སྩོལ།།
༼མཐོང་སྣང་དང་པ།༽
སངས་རྒྱས་མྱང་ངན་ལས་འདས་རནམ་ད་
གུ་རུ་རིན་པོ་ཆེ་འབྱོན་ནི་གི་ལུང་བསྟན་དང་འདུལ་བ་རུང་མཐུན་གསུངས་པའི་སྐོར།
རྒྱབ་ཁའི་མཐོང་སྣང་།
|
རྩ་མཆོག་གྲོང་གི་མཆོད་རྟེན་གྱི་པར་བཞག་ནི།
|
||
ལས་རིམ།
|
ཡལ་ག་དང་ལོ་འདབ་སྦོམ་སྦེ་ཡོད་པའི་ཤིང་༼སཱ་ལའི་ཤིང་༽གཉིས་ཀྱི་རྩ་བར་
བཞུགས་ཁྲི་རིངམ་གཅིག་གུར་སྟོན་པ་བཅོམ་ལྡན་འདས་ དཀྱིལ་ཀྲུང་སྦེ་བཞུགས་ནི་དང་། འཁོར་ལྷ་དང་ལྷམོ་
དགེ་སློང་དང་ མི་གནགཔ་ཚུ་གིས་སྐོར་ཏེ་སྡོད་ཞིནམ་ལས་ཡོལ་ལི་ཕྱེ་ནི།
|
||
སྟོན་པ།
|
ཡཱ༑
འོད་སྲུང་ཆེན་པོ་དང་ ཀུན་དགའ་བ་ལ་སོགས་པའི་སློབ་མ་ཚུ། ང་རྒྱལ་པོའི་སྲས་གཅིག་སྦེ་སྐྱེས་ཏེ་ཡོད་རུང་
འཁོར་བ་ནང་ལུ་སྡུག་བསྔལ་གྱིས་ཉམས་ཐག་པའི་སེམས་ཅན་དེ་ཚུ་གི་དོན་ལུ་ མནོ་བསམ་ལེགས་ཤོམ་སྦེ་བཏང་ཞིནམ་ལས་
ཕོ་བྲང་བཀོག་བཞག ཆུ་བོ་ཡ་མུ་ནའི་འགྲམ་ལུ་ ལོ་དྲུག་དཀའ་བ་སྤྱད་པའི་ཐ་མར་ སངས་རྒྱས་ཀྱི་གོ་འཕང་ཐོབ་ཞིནམ་ལས་ཚུར་
ད་ལྟོ་ཚུན་ཚོད་ལོ་གྲངས་བཞི་བཅུ་ཞེ་ལྔ་དེ་ཅིག་ གཞན་གྱི་དོན་ལུ་བསླབ་བྱའི་ཆོས་དེ་ཚུ་གསུངསམ་གསུངས་ས་རང་སྡོད་ཅི།
ཨིན་རུང་ ད་ ལོ་དང་ན་ཚོད་ཡང་རྒསཔ་མ་ཚད་ ངེད་ཀྱི་བསླབ་བྱ་ཚུ་ཡང་ ཧ་ལམ་ག་ཏེ་ལུ་ཡང་ཁྱབ་སྟེ་ཡོདཔ་ལས།
ད་ སྡུག་བསྔལ་གྱི་ལྷག་མ་བཟུམ་ཅིག་ཨིན་མི་ ང་རང་གི་ཤ་ཁྲག་གི་ལུས་འདི་ཡང་ འཇིག་རྟེན་འདི་ནང་བཞག་སྟེ་
ལྷག་མེད་མྱང་འདས་ཀྱི་དབྱིངས་ལུ་འགྱོ་ནི་གི་དུས་ལུ་བབས་བབས་བཟུམ་ཅིག་འདུག།
|
||
དགེ་སློང་ཚུ་རྔུ་བྱེལ་རལ་བྱེལ་འཐབ་སུ་ཅིག་སྦེ་སྡོད་ནི་དང་།
ཀུན་དགའ་བོ་གིས་ ངུ་ངག་གི་ཐོག་ལས་ཞུ་ནི།
|
|||
ཀུན་དགའ་བོ།
|
སྟོན་པ་རིན་པོ་ཆེ།
ཁྱེད་རང་བཟུམ་ཅིག་མ་བཞུགས་པ་ཅིན། ཤུལ་ལས་ང་བཅས་ཀྱི་སྐྱབས་དང་མགོན་ག་ལུ་ཞུ་ནི། དེ་བཟུམ་སྦེ།
ཤུལ་ལས་དམ་པའི་ཆོས་ནང་ལུ་ དོན་དག་འདྲཝ་མ་འདྲ་རེ་འཐོན་སྲིད་ནི་དང་། སྟོན་པ་རིན་པོ་ཆེ་ཁྱེད་རང་གིས་མ་གསུངས་པའི་དོན་ཚན་རེ་འཐོན་པ་ཅིན་
དེ་ལུ་ག་དེ་སྦེ་ཆ་བཞག་ནི་ཨིན་ན་ལགས།
|
||
སྟོན་པ།
|
འདུས་བྱས་ཀྱི་ཆོས་དེ་ཚུ་
མི་རྟག་པའི་རང་བཞིན་ཨིནམ་ལས་ ཚར་ཅིག་སྐྱེས་ཚར་ཞིནམ་ལས་ ཞིག་སྟེ་འགྱོ་ནི་དེ་ཁོ་རང་གི་རང་བཞིན་ཅིག་ཨིན།
དེ་བཟུམ་སྦེ་ངེད་ཀྱི་ལུས་འདི་ཞིག་སྟེ་ཡར་སོང་རུང་ དེ་ལུ་བློ་འགྱོད་བསྐྱེད་དགོཔ་ག་ནི་ཡང་མེད།
ང་མྱ་ངན་ལས་འདས་པའི་ཤུལ་ལུ་ རྡོ་རྗེ་གདན་གྱི་ནུབ་ཕྱོགས་ཨོ་རྒྱན་མཁའ་འགྲོའི་གླིང་ལུ་
ང་དང་འདྲ་བའི་སྐྱེས་བུ་ གུ་རུ་པདྨ་སཾ་བྷ་བ་ཟེར་མི་ཅིག་འབྱོན་འོང་། ཁོ་གིས་ ངའི་བསྟན་པ་འདི་
འཛམ་གླིང་སྤྱི་དང་ལྷག་པར་ བྱང་ཕྱོགས་ཁ་བ་ཅན་གྱི་གཡུས་ཁ་ལུ་དར་ཁྱབ་གཏང་སྟེ་འགྲོ་དོན་སྦོམ་མཛད་འོང་།
དེ་ལས་བསླབ་དགོཔ་ཁག་ཆེ་ཤོས་འདི་
ཤུལ་ལས་དམ་པའི་ཆོས་ནང་ལུ་ ང་གིས་མ་གསུངས་པའི་དོན་ཚན་རེ་འཐོན་པ་ཅིན། དེ་གི་སྐབས་ལུ་ག་ཅི་འབད་དགོཔ་ཟེར་བ་ཅིན་
ཧེ་མ་ང་གིས་ དེ་འབད་བཏུབ་དང་། དེ་འབད་མི་བཏུབ་ཟེར་བའི་རྣམ་གཞག་སོ་སོ་སྦེ་སྟོན་ཡོད་མི་དེ་དང་
མཐུན་མི་མཐུན་བལྟ་ནི་ཨིན། འབད་བཏུབ་ཟེར་སླབ་མི་དེ་དང་མཐུན་པ་ཅིན་འབད་ནི་དང་། འབད་མི་བཏུབ་ཟེར་སླབ་མི་དེ་དང་མཐུན་པ་ཅིན་འབད་མ་བཏུབ་སྦེ་བཞག་དགོཔ་ཨིན།
ཡ་ ད་ང་མྱ་ངན་ལས་འདས་པའི་དུས་ལུ་བབས་ཅི།
|
||
དེ་ལས་སྟོན་པ་བཅོམ་ལྡན་འདས་ཀྱིས་ཕྱག་གཡསཔ་འགྲམ་པ་བཅོར་ཏེ་གཟིམས་ནི་དང་།
འཁྲུལ་སྣང་ཅན་གྱི་མཆོད་པའི་སྒྲ་དབྱངས་དང་བཅས་པའི་ཐོག་ལས་ སློབ་མ་ཚུ་རྔུ་བྱེལ་རལ་བྱེལ་འཐབ་སྟེ་སྡོད་པའི་བར་ན་ཡོལ་ལི་བསྡམས་ཞིནམ་ལས་མཇུག་བསྡུ་ནི་ཨིན།
|
|||
༼མཐོང་སྣང་གཉིས་པ།༽
གུ་རུ་རིན་པོ་ཆེ་སྐུ་འཁྲུངས་པའི་སྐོར།
རྒྱབ་ཁའི་མཐོང་སྣང་།
|
སྤྲིན་དང་ས་སྨུག་བར་ན་བཞུགས་པའི་སངས་རྒྱས་སྣང་བ་མཐའ་ཡས་ཀྱི་མཛོད་སྤུ་ལས་འོད་ཟེར་འཕྲོས་མི་གཅིག་བཞག་ནི།
|
|
ལས་རིམ།
|
འཁྲབ་སྟེགས་གུར་
མེ་ཏོག་པདྨའི་སྦབ་ཅུ་ཆེ་ཆུང་ཁྲུ་དོ་ལྷག་ཙམ་ཅིག་བཞག་ནི། དེ་ལས་མཆོད་པའི་སྒྲ་དང་བཅས་ཏེ་
སངས་རྒྱས་སྣང་བ་མཐའ་ཡས་ཀྱི་མཛོད་སྤུ་ལས་འོད་ཟེར་འཕྲོས་ཏེ་ མེ་ཏོག་དེ་ལུ་འཕོག་པའི་ཤུལ་ལས་
འཕྲུལ་ཆས་ཀྱི་དུ་པ་བཏང་སྟེ་མེ་ཏོག་དེ་མ་མཐོངམ་སྦེ་བཟོ་སྟེ་ཡོད་པའི་བར་ན་ ཨོ་རྒྱན་གྱི་རྒྱལ་པོ་ཨིན་དྲ་བྷུ་ཏི་སྐུ་འཁོར་དང་བཅས་པ་ཚོང་ལས་ལོག་ཏེ་གྲུ་ནང་བྱོན་ནི་དང་།
བློན་པོ་ཏྲི་ན་འཛིན་ཕེབས་སུ་ལུ་གྲུ་ཐོག་ལས་བཅར་ནི།
༼རྒྱལ་བློན་གྱི་ཆ་ལུགས་འདི་
རྒྱ་གར་རྒྱལ་པོའི་ཆ་ལུགས་སྦེ་བཟོ་དགོ་ནི་དང་། གཡོག་འཁོར་དེ་ཚུ་གིས་ཚོང་པ་ཨིན་པའི་ཚུལ་སྦེ་
གྲུ་ནང་ལུ་ཅ་ལ་བཙུགས་ཏེ་འབག་འོང་ནི།
|
|
རྒྱལཔོ།
|
དབའེ།
བློན་པ་ཏྲིག་ན་འཛིན་ ང་བཅས་ཀྱི་དྲི་མེད་མདངས་ལྡན་ཀྱི་མཚོ་དེ་ན་ ཧེ་མ་དང་མ་འདྲ་བའི་འཇའ་མཚོན་སྣ་ལྔའི་འོད་ཀྱི་གུར་གཅིག་སྤུབས་འདུག
ག་ཅི་ཨིན་ན་སྨོ།
|
|
བློན་པོ།
|
ཀྱེ།
རྒྱལ་པོ་རིན་པོ་ཆེ། ད་རེས་རྒྱལ་པོ་མཆོག་གིས་ འོད་ཀྱི་གུར་ཁང་གཟིགས་ཚུགས་མི་ལུ་བལྟ་བ་ཅིན།
རྒྱལ་པོའི་སྤྱན་དྭངས་ཏེ་གསལ་ཏོག་ཏོ་ཡར་སོངམ་བཟུམ་ཅིག་འདུག དེ་ཚུ་ག་དེ་སྦེ་རང་བྱུང་བྱུངམ་ཨིན་ན་ལགས།
|
|
རྒྱལཔོ།
|
ང་ ཧེ་མ་འབད་བ་ཅིན་ མིག་ཏོ་གཉིས་ཆ་རང་མ་མཐོང་མི་ཅིག་ཨིན་རུང་
ཨོ་རྒྱན་རྒྱལ་ཁབ་ཀྱི་དོན་ལུ་ རྒྱ་མཚོ་ནང་ལས་ནོར་བུ་ལེན་པར་འགྱོ་བའི་ཐ་མར། ནོར་བུའི་བྱེ་བྲག་ལེ་ཤ་ཐོབ་སྟེ་ཡོདཔ་མ་ཚད་
ལྷག་པར་དུ་ རང་གི་འདོད་པ་ཆ་ཚང་འགྲུབ་ཚུགས་མི་ ནོར་བུ་དགོས་འདོད་ཀུན་འབྱུང་ཟེར་མི་འདི་ཐོབ་ལས།
དེ་ལུ་གསོལ་བ་སྨོན་ལམ་བཏབ་ད་ ངེད་ཀྱི་མིག་ཏོག་ཡ་གཅིག་མཐོངམ་སྦེ་ཡར་སོངམ་ཨིན།
|
|
བློན་པོ།
|
དེ་སྦེ་ཨིན་པ་ཅིན།
ང་བཅས་ཨོ་རྒྱན་རྒྱལ་ཁབ་འདི་ནང་བདེ་སྐྱིད་ཀྱི་ཉིམ་ཤརཝ་ཟེར་རུང་དེམ་ཅིག་འོང་ནི་ཨིན་མས་ལགས།
དང་པ་རྒྱལཔོ་ཚོང་ལས་ལོག གཉིས་པར་རྒྱལ་པོའི་སྤྱན་དྭངས། གསུམ་པ་ཟེརཝ་ད་ལུ་ དྲི་མེད་མདངས་ལྡན་གྱི་མཚོ་དེ་གི་སྦུག་ཁ
མེ་ཏོག་པདྨའི་ནང་ལས་ ལོ་བརྒྱད་དེ་ཅིག་ལང་ལངམ་བཟུམ་ གཞན་དང་མ་འདྲ་བའི་ཨ་ལོ་གཅིག་འདུག་ལགས། རྒྱལ་པོའི་བུ་སྐལ་སྦེ་འབག་འོང་དགོ་མནོ་ཡི། ཨིན་རུང་རྒྱལ་པོའི་ཐུགས་ལུ་ག་དེ་སྦེ་འཆར་འོང་ག་མ་ཤེས་པར་ལུས་སོང་ཡི་ལགས།
|
|
རྒྱལཔོ།
|
དབའེ༑
དེ་སྦེ་ཨིན་པ་ཅིན། ཚར་ངད་སྟོན་ཏེ་མཇལ་བར་འགྱོ་དགོ་ནི་ཨིན་མས། ཁ་སང་ཕྱི་རུ་ངེད་ཀྱི་གཉིད་ལམ་ན་ཡང་།
གསེར་གྱི་རྡོ་རྗེ་རྩེ་དགུམ་ཅིག་གནམ་ཁར་ལས་བབས་ཏེ་ ངེད་ཀྱི་ལག་པར་ཐོབ་ནི་དང་། ས་གཞི་སྐྱོང་བའི་ཉིནམ་དེ་ཡང་
ངེད་ཀྱི་དོན་ཧིང་སྦུག་ལས་ཤར་བའི་གཉིད་ལམ་མཐོང་ཅི། དེ་ཚུ་རྟགས་མཚན་ལེགས་ཤོམ་ཅིག་འོང་ནི་ཨིནམ་མས།
འགྱོ་ཤིག་ འགྱོ་ཤིག ཚར་གཅིག་བལྟ་བར་འགྱོ་གེ།
|
|
རྒྱལ་བློན་བྱོནམ་དང་གཅིག་ཁར་ཡོལ་ལི་བསྡམས་ནི།
|
||
རྒྱབ་ཁའི་མཐོང་སྣང་།
|
བདེ་བ་ཅན་གྱི་ཞིང་ཁམས་ཀྱི་ཕོ་བྲང་ནང་སངས་རྒྱས་སྣང་བ་མཐའ་ཡས་བཞུགས་ཡོད་མི་ཅིག་བཀོད་ནི།
|
||
ལས་རིམ།
|
མདུན་ལུ་ ༼དྲི་མེད་མདངས་ལྡན་གྱི་མཚོ་ནང་༽མེ་ཏོག་པདྨའི་སྦུག་ལུ་ལོ་བརྒྱད་ལོན་པའི་ཨ་ལོ་གཅིག་བཞག་ཞིནམ་ལས།
འཕྲུལ་ཆས་ཀྱི་དུ་པ་ཆུང་ཀུ་རེ་བཏང་ཏེ་བཞག་ནི་དང་། རྒྱལ་བློན་གཉིས་བྱོན་ཏེ་ཨ་ལོ་དེ་མཇལཝ་ད་
ཡ་མཚན་གྱི་རྣམ་འགྱུར་སྟོན་ནི།
|
||
རྒྱལ་པོ།
|
ཨེ་མ་ཧོ༑ ཡ་མཚན་ཅན་གྱི་ཁྱེའུ་ཆུང་ཁྱད་འཕགས་ཁྱོད༔
ཡབ་ནི་གང་ཡིན་ཡུམ་ནི་གང་ཡིན་པ༔
ཡུལ་ནི་གང་ཡིན་རིགས་ནི་གང་དུ་གཏོགས༔
།ཟས་སུ་ཅི་གསོལ་འདི་རུ་ཅི་མཛད་གསུངས༔ ཟེར་ཞུ་ནི་དང་།
|
||
གུ་རུ།
|
བདག་གི་ཕ་ནི་རིག་པའི་ཡེ་ཤེས་ཡིན༔
མ་ནི་བདེ་སྟོང་ཀུན་ཏུ་བཟང་མོ་ཡིན༔
ཡུལ་ནི་ཆོས་དབྱིངས་སྐྱེ་བ་མེད་པ་ཡིན༔ རིགས་ནི་དབྱིངས་རིག་གཉིས་སུ་མེད་པར་གཏོགས༔
ཟས་སུ་གཉིས་སྣང་རྟོག་པ་ཟ་བ་ཡིན༔ འདིར་ནི་ཉོན་མོངས་གསོད་པའི་སྤྱོད་པ་སྐྱོང་༔
ཟེར་གསུངས་ནི།
|
||
དེ་ལས་རྒྱལ་པོའི་སྤྱན་ཡ་གཅིག་མ་མཐོང་མི་དེ་ཡང་དྭངས་ཁྲོལ་ཁྲོལ་འགྱོ་བའི་དགའ་བ་དང་ཡ་མཚན་གྱི་རྣམ་འགྱུར་གྱི་ཐོག་ལས་མིག་ཏོ་འཁྱག་ཅི་ར་བལྟ་ཞིནམ་ལས་གསུངས་ནི།
|
|||
རྒྱལཔོ།
|
དབའེ་བློན་པོ༑
ད་རེས་ང་ སྤྲུལ་པའི་སྐུ་འདི་གི་ཞལ་མཇལ་ གསུངས་ཐོསཔ་ཙམ་གྱིས་ ངེད་ཀྱི་མིག་ཏོ་གཞན་མི་དེ་ཡང་དྭངས་ཁྲོལ་ཁྲོལ་ཡར་སོང་ཡི།
སྤྲུལ་སྐུ་འདི་མིའི་ཤ་གཟུགས་ཅན་གྱི་ཡབ་ཡུམ་མེད་པར་མཚོ་ལས་རྫུས་སྐྱེས་སྦེ་འཁྲུངས་པའི་སངས་རྒྱས་ཀྱི་སྤྲུལ་པའི་སྐུ་གཅིག་འོང་ནི་མས།
དེ་འབདཝ་ལས་མཚན་ཡང་ མཚོ་སྐྱེས་རྡོ་རྗེ་ཟེར་གསོལ་ནི་ཨིན། དེ་ལས་ང་གྱིས་རྒྱལ་སྲིད་འཛིན་ཏེ་ལོ་དང་ན་ཚོད་ནེམ་ཅིག་འགྱོ་སྟེ་ཡོད་རུང་།
ང་ལུ་རྒྱལ་བརྒྱུད་འཛིན་པའི་སྲས་ཅིག་ཡང་མེདཔ་ལས། སྤྲུལ་པའི་སྐུ་འདི་ངེད་ཀྱི་སྲས་སྦེ་ཕོ་བྲང་ནང་ལུ་གདན་འདྲེན་ཞུ་ནི་ཨིན་སྨྲ་རེ།
|
||
བློན་པོ།
|
ལགས་སོ་ལགས།
|
||
དེ་ལས་རྒྱལ་བློན་གཉིས་ཀ་གིས་མདངས་དབྱངས་ཀྱི་ཐོག་ལས་གསོལ་འདེབས་འདི་ཕུལ་ནི།
|
|||
རྒྱལ་བློན་གཉིས།
|
མི་ཡི་ཤ་གཟུགས་ཅན་གྱི།
།ཡབ་ཡུམ་གཉིས་ཀ་མེད་པར། །མཚོ༵་ལས་སྐྱེ༵ས་པའི་ཁྱིའུ་ཆུང་། །རྡོ༵་རྗེ༵འི་ལྟ་བུའི་སྐུ་མཆོག །བདག་ཅག་ཨོ་རྒྱན་ཡུལ་གྱི།
།འགྲོ་བའི་དོན་ལུ་འབྱོན་གནང་།།
|
||
རྒྱལ་སྲས།
|
མ་གཞི་ང་
འཛམ་གླིང་འགྲོ་བ་ཀུན་གྱི་དོན་ལུ་འོང་འོངམ་ཨིན། ཨིན་རུང་ ང་སྐྱེས་སའི་གནས་འདི་ཨོ་རྒྱན་གྱི་གཡུས་འདི་ཁར་ཨིནམ་ལས་
ཁྱེད་རྒྱལ་བློན་གཉིས་ཀྱིས་གསུངས་དོ་བཟུམ་སྦེ་ ད་རེས་ཨོ་རྒྱན་གྱི་རྒྱལ་པོའི་ཕོ་བྲང་ནང་འགྱོ་ནི་ཨིན།
|
||
རྒྱལ་བློན་གཉིས།
|
འབྱོན་ཤིག
འབྱོན་ཤིག
|
||
དེ་ལས་རྒྱལ་བློན་གཉིས་ཀྱིས་ གུ་རུ་རིན་པོ་ཆེ་ གདན་འདྲེན་ཞུ་སྟེ་འབྱོན་ནི།
|
|||
བྱོན་པའི་ལམ་ཁར་རྟགས་དང་མཚན་མ་གསུམ་གཟིགས་ནི།
༡༽
ཨ་རྒས་མགོ་ཏོ་དཀརཔ་གཅིག་གིས་ རྐོ་མ་བཏབ་སྟེ་ཉ་བཟུང་ཞིནམ་ལས་ ཐང་ན་སྒལ་རིལ་བསྒྱུར་བའི་ཚུལ་སྟོན་ནི།
|
||
དེ་གཟིགས་ཞིནམ་ལས་ གུ་རུའི་ཐུགས་དགོངས་ལུ།
|
དབའེ༑
རྟགས་མཚན་འདི་ལུ་བལྟ་བ་ཅིན་ ང་གིས་རྒྱལ་སྲས་ཀྱི་ཚབ་སྦེ་ རྒྱལ་སྲིད་འཛིན་ནི་འདི་ ཉའི་ཁ་ནང་ལུ་རྐོ་མ་བཏབ་བཏབ་བཟུམ་གྱི་སྡུག་བསྔལ་ཅིག་འོང་ནི་བཟུམ་ཅིག་འདུག།
|
|
༢༽
ཨོ་ལ་གཅིག་གིས་བྱ་ཅིག་བདའ་ཞིནམ་ལས་ ཚེར་མ་ཕུང་ཅིག་གཡས་སྐོར་གཡོན་སྐོར་རྐྱབ་པའི་ཐ་མར་
བྱ་དེ་བྱོག་ཐལ་བའི་ཚུལ་སྟོན་ནི།
|
||
དེ་གཟིགས་ཞིནམ་ལས་
གུ་རུའི་ཐུགས་དགོངས་ལུ།
|
རྟགས་མཚན་འདི་ལུ་བལྟ་བ་ཅིན་
རྒྱལ་པོའི་རྒྱལ་སྲིད་འཛིན་ནི་འདི་ ལཱ་ཁག་ཅིག་ཨིན་རུང་ ཐ་མ་ལུ་ ང་རྒྱལ་སྲིད་ཀྱི་བྱ་བ་དེ་ལས་
བྱོག་ཐལ་ཚུགས་ནི་གི་བཟུམ་ཅིག་འདུག།
|
|
༣༽
ཨ་ལོ་གཅིག་གིས་རྡོ་རྐྱབ་ཞིནམ་ལས་ བྱི་ཙི་ཅིག་བསད་པའི་ཚུལ་སྟོན་ནི་དང་། དེ་ལས་ཁོ་གི་ཨའི་དང་ཨ་པ་གཉིས་ཀྱིས་
ཁོ་ཁྱིམ་ནང་འོང་མ་བཅུག་པར་བཏོན་བདའ་བའི་ཚུལ་སྟོན་ནི།
|
||
དེ་གཟིགས་ཞིནམ་ལས་
གུ་རུའི་ཐུགས་དགོངས་ལུ།
|
ང་གིས་
རྒྱལ་པོའི་རྒྱལ་སྲིད་ལུ་གནོད་པའི་ལཱ་གཅིག་འབད་བ་ཅིན། ང་དེ་ནང་ལས་བྱོག་ཐལ་ནི་གི་རྟགས་མཚན་ཅིག་ཨིན་མས།
|
|
བྱོན་པའི་བར་ན་ཡོལ་ལི་བསྡམས་ཏེ་མཇུག་བསྡུ་ནི།
|
||
༼མཐོང་སྣང་གསུམ་པ།༽
རྒྱལ་པོའི་སྲས་སྦེ་གསེར་ཁྲི་མངའ་གསོལ་ཞུ་ནི་དང་།
སིང་ག་ལའི་སྲས་མོ་འོད་འཆང་མ་བཙུན་མོར་ཕུལ་ནི།
རྒྱབ་ཀྱི་མཐོང་སྣང་།
|
རྒྱ་གར་རྒྱལ་པོའི་ཕོ་བྲང་ནང་འཁོད་ཀྱི་བཟོ་བཀོད་ཅན་གྱི་པར་ཅིག་བཞག་ནི།
|
|
ལས་རིམ།
|
ཨོ་རྒྱན་རྒྱལ་པོའི་ཕོ་བྲང་ནང་
སྦུག་ལུ་རྒྱལ་པོ་ཨིན་དྲ་བྷཱུ་ཏི་དང་། རྒྱབ་ལུ་དམག་མི་གཉིས་ལངས་ཏེ་སྡོད་ནི། གཡས་ཁ་ཐུག་ལུ་བཞུགས་ཁྲི་དེ་ལས་ཆུངམ་གཅིག་ལུ་
གུ་རུ་རིན་པོ་ཆེ་དང་། གཡོན་གྱི་བཞུགས་ཁྲི་ལུ་རྒྱལ་བཙུན་ཆེན་མོ། དེ་ལས་འཁྲབ་སྟེགས་གི་ས་གོ་དང་བསྟུན་ཏེ་
བློན་པོ་དང་དམག་དཔོན་ དེ་ལས་གཞན་སྐུ་འཁོར་ཚུ་བཞུགས་ནི།
|
|
རྒྱལཔོ།
|
འཛམ་བུའི་གླིང་གི་ནུབ་བྱང་
ཨོ་རྒྱན་གྱི་རྒྱལ་ཁབ་འདི་ ཕྱི་གི་ཡུལ་ལྗོངས་ཉམས་དགའ་བའི་ཁ་ལུ་ ནང་གི་མི་སེར་ག་ར་བྱམས་སེམས་ཅན་ཅིག་ཨིནམ་ལས་
ང་བཅས་རྒྱལ་བློན་འབངས་གསུམ་ག་ར་ དགའ་སྐྱིད་ཀྱི་ངང་ལུ་ཡོད་རུང་ ང་ལུ་རྒྱལ་བརྒྱུད་འཛིན་པའི་སྲས་ཅིག་མེདཔ་ལས་
ཚ་གྱང་སྦོམ་སྦེ་རང་ལངས་ཏེ་ཡོད། ཨིན་རུང་ད་རེས་ དཀོན་མཆོག་གསུམ་གྱི་ཐུགས་རྗེས་བྱིན་རླབས་ལས་
མེ་ཏོག་པདྨའི་སྦུག་ལས་རྫུས་སྐྱེས་སྦེ་འཁྲུངས་པའི་སྤྲུལ་པའི་སྐུ་གཞན་དང་མ་འདྲཝ་ཅིག་
ང་ལུ་གནང་སྟེ་ཡོདཔ་ལས་ སྤྲུལ་པའི་སྐུ་འདི་ ངེད་ཀྱི་རྒྱལ་བརྒྱུད་འཛིན་པའི་སྲས་སྦེ་གསེར་ཁྲི་མངའ་གསོལ་ཞུ་ནི་ཨིན།
|
|
རྒྱལཔོ་དང་རྒྱལ་སྲས་གཉིས་ཀ་ཁྲི་གུར་ཡར་བཞེངས་ཏེ་རྒྱལ་སྲས་ལུ་སྤྲོ་ཞུ་དང་ཁྲི་དར་གནང་ནི།
|
||
རྒྱལཔོ།
|
ད་རེས་ལས་
སྤྲུལ་པའི་སྲས་མཆོག་རིན་པོ་ཆེ་ ངེད་ཀྱི་བརྒྱུད་པ་འཛིན་མི་ རྒྱལ་བརྒྱུད་ཀྱི་སྲས་སྦེ་
རྟེན་འབྲེལ་མངའ་གསོལ་ཞུ་ནི་དང་གཅིག་ཁར་ ད་རེས་ལས་ཁྱོད་ཀྱི་མཚན་ལུ་ པདྨ་རྒྱལ་པོ་ཟེར་གསོལཝ་ཨིན།
|
|
རྒྱལ་སྲས་ལུ་ཁྲི་དར་གནང་ནི་དང་ཅིག་ཁར་སྨོན་ལམ་བཏབ་ཞིནམ་ལས་ཁྲི་གུ་བཞུགས་ནི་དང་།
དེ་ལས་བློན་འབངས་ཚུ་གིས་ཁྲི་དར་ཕུལ་བའི་ཤུལ་ལས་ གླུ་དབྱངས་ཀྱི་མཆོད་པ་ཕུལ་ནི།
|
||
གླུ་གཞས་པ་ཚུ་གིས།
|
སྐྱེས་ས་འདམ་དུ་སྐྱེས་ཀྱང།
།འདམ་གྱི་དྲེག་པ་མེད་པའི།།
ཡིད་འོང་ཨུཏྤལ་སྔོན་པོ།
།འདི་ན་ཤར་བ་ལེགས་སོ།།
མ་དག་འཁྲུལ་པ་སྦྱངས་ཕྱིར།
།དག་པའི་ཡེ་ཤེས་སྐུ་གཅིག།
རྒྱལ་པོའི་སྲས་སུ་བྱུང་བར།
།འབྱོན་པ་ལེགས་སོ་ཞུ་གེ།
ཨ་ཞང་ཤ་ཤི་ཟླ་བ།
།མི་སྡོད་གླིང་བཞི་བསྐོར་རུང་།།
ཡིད་འོང་ཀུ་མུད་ང་ཡི།
།མ་འདྲིས་གྲོགས་སུ་ཤར་བྱུང་།།
སྣང་བ་མཐའ་ཡས་སྤྲུལ་པ།
།ཕྱོགས་བཅུར་ཁྱབ་པའི་བར་ལས།།
སྲས་གཅིག་གཡུས་འདིར་བྱུང་བར།
།འབྱོན་པ་ལེགས་སོ་ཞུ་གེ།།
|
|
ཞབས་བྲོ་མཇུག་བསྡུཝ་དང་གཅིག་ཁར་ཡོལ་ལི་བསྡམས་ཏེ་མཇུག་བསྡུག་ནི།
|
||
རྒྱབ་ཀྱི་མཐོང་སྣང་།
|
སྐྱེད་ཚལ་ལྡུམ་རའི་པར་ཅིག་བཞག་ནི།
|
||
ལས་རིམ།
|
རྒྱལ་སྲས་ཤིང་གཅིག་གི་རྩ་བར་ཐུགས་བསམ་བཞེས་པའི་ཚུལ་སྦེ་བཞུགས་ནི།
དེ་ལས་རྒྱལཔོ་དང་གཟིམ་དཔོན་དེ་ལས་ཕྱག་ཕྱིས་ཞུ་མི་དག་པ་གཅིག་ རྒྱལ་སྲས་འཚོལ་ཏེ་བྱོན་ནི།
|
||
རྒྱལཔོ།
|
རྒྱལ་སྲས་རིན་པོ་ཆེ༑
ན་ལུ་ག་ཅི་ར་མཛདཔ་སྨོ། རོགས་གཞན་མི་སེར་དེ་ཚུ་འབད་བ་ཅིན་ ཟ་ནི་འཐུང་ནི་དང་། བཀབ་ནི་གྱོན་ནི་གི་དོན་ལུ་
ཕྱི་ཁར་འཚོལ་ཏེ་འགྱོ་དགོཔ་ཨིན། ཁྱོད་ལུ་དེ་བཟུམ་གྱི་དཀའ་ངལནི་ ག་ནི་ཡང་མེད། དེ་བ་འདི་
ཕོ་བྲང་ནང་ལོག་སྟེ་འབྱོན་གེ།
|
||
དེ་ལས་རྒྱལ་སྲས་ཧེ་མ་དང་།
རྒྱལཔོ་ཤུལ་ལས་སྦེ་ཕོ་བྲང་ནང་བྱོནམ་ད། རྒྱལ་པོ་ལུ་ རྒྱབ་ཁ་ལས་ གཟིམ་དཔོན་གྱིས་གནས་ཚུལ་ཅིག་ཞུ་བའི་ཚུལ་སྟོན་ནི།
|
|||
རྒྱལཔོ།
|
ག་ཅི་སླབ་ནི་ཡོདཔ་སྨོ།
སླབ་ཤིག
|
||
གཟིམ་དཔོན།
|
རྒྱལ་སྲས་མཆོག་
ཕོ་བྲང་ནང་ཨ་རྟག་རང་སྐུ་རྐྱང་སྦེ་བཞུགས་ནི་དེ་གིས་ ཐུགས་བསྲུན་མཆིཝ་བཟུམ་ཅིག་འོང་ནི་མས།
དེ་བ་འདི་ རྒྱལ་སྲས་ཀྱི་ཞབས་ཕྱི་ཞུ་མི་ཆ་རོགས་གཅིག་འཚོལ་བ་ཅིན་མི་དྲག་ག་ལགས།
|
||
རྒྱལཔོ།
|
དབའེ༑
ག་དེ་སྦེ་ལོ། ཕྱག་ཕྱིས་ཞུ་མི་རྒྱགས་ཚད་བཞག་སྟེ་ ད་རུང་ཡང་ཕྱག་ཕྱིས་ཞུ་མི་ཆ་རོགས་ཡ།
|
||
གཟིམ་དཔོན།
|
དཔྱེ་གཏམ་ལས་འབད་རུ།
རང་ལུ་དགོ་པའི་མི་དེ། །གདོང་སྐོར་རྐྱབ་ནི་ཡོད་ན། །འཛམ་གླིང་སྟོངམ་སྦེ་འགྱོ་རུ། །ཚ་གྱང་ལང་དགོཔ་མིན་འདུག
།དེ་མེན་ཁྲོམ་ཁར་ལྷོད་རུང་། །རི་ཁར་ལྷོདཔ་དང་འདྲ་བས།། ཟེར་སླབ་དོ་བཟུམ་སྦེ། སྣང་བར་མ་འགྱོ་བའི་མི་དེ་
བརྒྱ་དང་སྟོང་སྦེ་ཡོད་འཛོམས་རུང་ མི་གཅིག་ཡང་མེད་པར་སྟོངམ་བཟུམ་ཅིག་དང་། སེམས་ཁར་བབས་པའི་མི་གཅིག་གདོང་ཁར་ཡོད་པ་ཅིན་
གཞན་ག་ཡང་མེད་རུང་བཏུབ་པའི་ཚོར་སྣང་གཅིག་ཤར་ནི་ཡོད་ལགས། ད་ལྟོ་ང་གིས་ཞུ་མི་འདི་ རྒྱལ་སྲས་ཁོ་རང་ལུ་
སྐྱིད་སྡུག་གི་སྙིང་གཏམ་བཤད་ས་ ཚེ་གཅིག་གཏན་གྱི་དགའ་རོགས་ བཙུནམ་ཅིག་འཚོལ་བ་ཅིན་མི་དྲག་ག་ཟེར་
ཞུཝ་ཨིན་ལགས།
|
||
རྒྱལཔོ།
|
དབའེ༑
གཟིམ་དཔོན༑ ཁོ་གི་རྣམ་འགྱུར་དེ་ལུ་བལྟ་སྟེ་ ང་ཡང་སེམས་ལུ་ཚ་གྱང་སྦོམ་སྦེ་ལངས་ཏེ་
ག་ཅི་འབདཝ་དྲག་ག་མ་ཤེས་པར་སྡོད་པའི་སྒང་ཨིན། ད་ལྟོ་འབདན་ ཁྱོད་ཀྱིས་མེ་བཏེགཔ་དེ་བཏེག་ཅི།
ད་ ཁྱོད་ཀྱིས་ ཨོ་རྒྱན་རྒྱལ་ཁབ་འདི་ནང་གི་ ལང་ཚོ་དུས་ལུ་བབས་པའི་ཁ་ལུ་ ངོ་རིས་གཟུགས་ཤེད་ལེགས་པའི་བུམོ་དེ་ཚུ་
བཀུག་ཞིནམ་ལས་ རྒྱལ་སྲས་ལུ་སྤྱན་འབུལ་ཞུ་སྟེ་ ཁོ་གི་ཐུགས་ཁར་ཚུད་པའི་བུམོ་ཅིག་ཡོད་ག་མེད་ག་བལྟ་སྨ་རེ།
|
||
གཟིམ་དཔོན།
|
ལགས་སོ་ལགས།
བཀའ་བཞིན་ཞུ།
|
||
ཡོལ་ལི་བསྡམས་ཏེ་མཇུག་བསྡུག་ནི།
|
|||
རྒྱབ་ཀྱི་མཐོང་སྣང་།
|
ཕོ་བྲང་ནང་གི་པར་ཅིག་བཞག་ནི།
|
||
ལས་རིམ།
|
ཁྲི་རིངམ་གཅིག་གུ་
རྒྱལ་སྲས་རིན་པོ་ཆེ་ ཕྱེད་ཉལ་གྱི་ཚུལ་དུ་ འབོལ་ཧང་གཅིག་མཆན་ཁུངས་གཡས་པའི་འོག་ལུ་གཙུགས་ཏེ་བཞུགས་ནི་དང་།
གཟིམ་དཔོན་གྱིས་ཟུར་ཁ་ལས་ རྐེདཔ་བསྒུར་ སྐད་ཆུང་སུ་ཅིག་སྦེ་ཞུ་ནི།
|
||
གཟིམ་དཔོན།
|
རྒྱལ་སྲས་རིན་པོ༑ ད་རེས་ན་ལུ་འོང་མི་བུམོ་དེ་ཚུ་གི་གྲལ་ཁ་ལས་ རྒྱལ་སྲས་ཀྱི་ཐུགས་ཁར་ཚུད་མི་རེ་ཡོད་པ་ཅིན་
མཛུབ་དཀྱི་འདི་ མོ་གི་མཛུབ་མོ་གུར་བཙུགས་ཏེ་བཀའ་དྲིན་བསྐྱངས་གནང་ལགས།
|
||
བུམོ་བྱ་རིམ་བསྡེ་ཚན་གཅིག་
ལུས་ཀྱི་རྣམ་འགྱུར་ཁྱུག་ཁྱུག་ལྡེམ་ལྡེམ་གྱི་ཐོག་ལས་ཞབས་བྲོ་རྐྱབ་ནི། དེ་ལས་དམིགས་བསལ་བུམོ་རེ་རེ་གིས་ཞབས་བྲོ་ཚིགས་བཅད་རེ་འཐེན་ཏེ་
རྒྱལ་སྲས་ཀྱི་གདོང་ཁར་ཐོན་ནི།
|
|||
སེམས་མེད་མེ་ཏོག་པད་མར།
།གཉེན་གྲོགས་ཉི་མ་དགོ་ན། །སེམས་ལྡན་རྒྱལ་སྲས་ཁྱོད་ལུ། །བརྩེ་བའི་གྲོགས་ཅིག་ལོས་དགོས།།
འཛམ་གླིང་མི་ཡི་ཕུལ་བྱུང་།
།ལང་ཚོ་དར་བའི་བུ་མོ། །ལུས་ལ་བསིལ་རས་གྱོན་རུང་། །སེམས་ལ་ཚ་དྲོད་འབར་སོང་།།
སྨད་ཀྱི་ཚ་དྲོད་རྒྱས་ནས།
།སྟོད་ཀྱི་དབུགས་ཀྱང་ཆད་སོང་། །རྒྱལ་སྲས་ཐུགས་ལ་འབབ་ན། །ལང་ཚོའི་མཆོད་པ་འཕུལ་ཆོག།
དགའ་བའི་དགའ་སྤྲོ་བསྒྱུར་ས། །སྡུག་པའི་སྙིང་གཏམ་བཤད་ས། །ཚེ་གཅིག་བརྟན་གྱི་གཉེན་གྲོགས།
།བུ་མོ་ང་གིས་བྱེད་ཆོག།
|
|||
བུམོ་དེ་ཚུ་འགྱོ་ཚར་བའི་ཤུལ་ལུ་གཟིམ་དཔོན་གྱིས་རྒྱལ་སྲས་ལུ་ཞུ་ནི།
|
|||
གཟིམ་དཔོན།
|
རྒྱལ་སྲས་རིན་པོ་ཆེ༑
ད་ལྟོ་ན་ལུ་འཛོམས་པའི་བུམོ་འདི་ཚུ་ ག་དེ་སྦེ་འདུག་ག་ལགས།
|
||
རྒྱལ་སྲས།
|
བུམོ་དེ་ཚུ་ཡ།
རྐངམ་བཞི་ས་ཁར་མ་བཙུགས་པའི་ནོར། ཆང་མ་འཐུང་པའི་ར་གཟིར་གཟིརཝ། སྲོག་མ་བཅད་པའི་རོ་དེ་ཚུ་ག་ཅི་འབད་ནི།
|
||
ཟེར་གསུངས་ཞིནམ་ལས་
ཡི་གུ་གཅིག་སྟོན་ཏེ་ལྷག་ནི།
|
|||
རྒྱལ་སྲས།
|
ཡ་
ང་ལུ་བཙུནམ་གཅིག་འཚོལ་རང་འཚོལ་དགོ་པ་ཅིན་ ཁྱད་ཆོས་འདི་ཚུ་ཚང་དགོཔ་ཨིན།
ན་ཚོད་རུས་རིགས་དག་པས་སེམས་བསྒྱུར་འོས༔
གཡོ་མེད་མི་ཁྲོ་ཕྲག་དོག་སེར་སྣ་མེད༔ ངོ་ཚ་ཤེས་ཤིང་བག་ཡོད་གཏོང་ལ་མོས༔ །འདོད་ཆགས་ཞེ་སྡང་གཏི་མུག་ཤས་ཆུང་བ༔
བདག་གི་སེམས་དང་འགལ་བར་མི་བྱེད་དེ༔ དེ་འདྲའི་བུ་མོ་མཆིས་ན་བཀའ་སྩོལ་ཅིག༔ ཡ་ འདི་བཟུམ་གྱི་ཁྱད་ཆོས་ཚང་མི་བུམོ་གཅིག་འཐོབ་པ་ཅིན་
གཉེན་རྐྱབ་ནི་ཨིན། དེ་མེན་པ་ཅིན་ ང་གཉེན་མི་རྐྱབ།
|
||
ཟེར་ཡི་གུ་གཅིག་གཟིམ་དཔོན་གྱི་ཕྱག་ལུ་གནངམ་དང་གཅིག་ཁར་ཡོལ་ལི་བསྡམས་ཏེ་མཇུག་བསྡུག་ནི།
|
|||
རྒྱབ་ཀྱི་མཐོང་སྣང་།
|
རྒྱ་གར་རྒྱལ་པོ་ཕོ་བྲང་ནང་འཁོད་ཀྱི་བཟོ་བཀོད་ཅན་གྱི་པར་ཅིག་བཞག་ནི།
|
||
ལས་རིམ།
|
རྒྱལ་བློན་ཚུ་ཁྲི་གུ་བཞུགས་ཏེ་
ག་ཅི་ཅིག་བསྒུག་སྟེ་སྡོད་པའི་ཚུལ་སྦེ་བཞུགས་ནི།
|
||
རྒྱལཔོ།
|
བཀའི་བློན་པོ་ཏྲི་ན་འཛིན་དེ་
རྒྱལ་སྲས་ཀྱིས་སྟོན་པའི་ ཆ་རྐྱེན་དེ་ཚུ་ཚང་མི་བཙུནམ་ཅིག་འཚོལ་བར་ སིང་ག་ལའི་གླིང་ཕྲན་ནང་སོང་ཡོད་རུང་།
ད་ལྟོ་ཚུན་ཚོད་ཁོ་རང་ཡང་ལོག་ནི་མེད་པའི་ཁར་ ཡི་གུ་དང་ ཡངནི་ཁ་འཐེན་གཅིག་ཡང་མིན་འདུག
ག་དེ་སྦེ་ར་འབད་དོ་ག་སྨོ།
|
||
དུས་ཚོད་དེམ་ཅིག་གི་བར་ན་སྒོ་ཁ་ལས་
གཟིམ་དཔོན་ནང་ན་འཛུལ་ཞིནམ་ལས།
|
|||
གཟིམ་དཔོན།
|
ཀྱེ༑
རྒྱལ་པོ་རིན་པོ་ཆེ༑ བློན་པོ་ཏྲིག་ན་འཛིན་ཞབས་སར་བཅར་བར་འཐོན་འོང་ནུག་ལགས།
|
||
རྒྱལཔོ།
|
ནང་ན་ཤོག་ཟེར་སླབས་ཤིག།
|
||
བློན་པོ་ཏྲིག་ན་འཛིན་ཞབས་སར་བཅར་ཏེ་
ཕྱག་གཅིག་འཚལ་ སྤུས་མོ་བཙུགས་ཏེ་ཞུ་ནི།
|
|||
བློན་པོ་ཏྲིག་ན་འཛིན།
|
རྒྱལ་པོའི་བཀའ་བཞིན་དུ་
སིང་ག་ལའི་གླིང་ལུ་ བཙུན་མོ་འཚོལ་བར་སོངམ་ད་ ཉིནམ་གཅིག་སངས་རྒྱས་ཀྱི་དུས་ཆེན་རྩིས་སྲུང་ཞུ་བའི་སྐབས་ལུ་
མཚན་ཉིད་ཚང་བའི་བུམོ་འོད་འཆང་མ་ཟེར་མི་གཅིག་མཐོང་ཅི་ལགས། མོ་ལུ་ཟུར་ཁ་བོ་སྟེ་ ལོ་རྒྱུས་དེ་ཚུ་ཞུཝ་ད་
མོ་རང་སྤྲུལ་པའི་རྒྱལ་སྲས་ཀྱི་བཙུནམ་སྦེ་འོང་ནི་གི་འདོད་པ་ཡོད་རུང་ མོ་རང་སིང་ག་ལའི་གླིང་གི་རྒྱལ་པོའི་སྲསམོ་གཅིག་ཨིནམ་ལས་
ཡབ་རྒྱལ་པོ་ལུ་ཞུ་དགོ་ཟེར་ཨིན་མས་ལགས། དེ་ལས་ཡབ་རྒྱལ་པོ་ཅན་དྲ་གོམ་ཤི་ལུ་བཞུགས་སར་བཅར་ཏེ་ཞུཝ་ད་
རྒྱལ་པོ་མཆོག་གིས་ སྲསམོ་དེ་རྒྱལ་པོ་ད་ཧའི་སྲས་ལུ་བྱིན་ཚར་ཡི། ནངས་པ་གནང་ཚེ་ཅིག་ཁར་བཙུན་མོ་གཏང་ནི་གི་དུས་ཚོད་རན་མཆིཝ་ལས་
ཨོ་རྒྱན་གྱི་རྒྱལ་སྲས་ལུ་གཏང་ཐབས་རྩ་ལས་མེད་ཟེར་ཨིན་མས་ལགས།
|
||
རྒྱལཔོ།
|
བུམོ་འོད་འཆང་མ་གདན་འདྲེན་ཞུ་མ་ཚུགས་པ་ཅིན་
རྒྱལ་སྲས་ཀྱིས་གཉེན་མི་རྐྱབ་ཟེར་ཨིན་མས། དེ་བ་འདི་ཐབས་ཤེས་ཅིག་སྟོན་པ་ཅིན་དྲག་ནི་ཨིན་མས།
དབའེ༑ བློན་པོ་ཏྲིག་ན་འཛིན༑ ཁྱོད་ཀྱིས་སྔགས་པ་རྟེན་འབྲེལ་མཁན་པོ་ཆ་རོགས་སྦེ་ འཁྱིད་སོང་ཞིནམ་ལས་
བུ་མོ་འོད་འཆང་མ་རྒྱལ་པོ་ད་ཧའི་སྲས་ཀྱི་བཙུནམ་སྦེ་བྱོན་པའི་ལམ་ཁ་ལས་ མཐུ་དང་སྔགས་ཀྱིས་སྦེ་འཕྱོག་སྟེ་འབག་ཤོག་སྨ་རེ།
|
||
བློན་པོ།
|
ལགས་སོ་ལགས།
བཀའ་བཞིན་ཞུ།
|
||
བློན་པོ་བྱོནམ་ད་ཅིག་ཁར་ཡོལ་ལི་བསྡམས་ཏེ་མཇུག་བསྡུ་ནི།
|
|||
རྒྱབ་ཀྱི་མཐོང་སྣང་།
|
བཟོ་བཀོད་ལེགས་པའི་རྒྱ་གར་རྒྱལ་པོའི་ཕོ་བྲང་ནང་འཁོད་ཀྱི་པར་ཅིག་བཞག་ནི།
|
|
ལས་རིམ།
|
གྱལ་གི་སྦུག་ལུ་
དཀྱིལ་འཁོར་གྲུ་བཞི་མ་མཐོ་ཚད་མི་གཟུགས་ཙམ་ཅིག་གི་སྦུག་ལུ་སྟོན་པའི་སྐུ་འདྲ་དང་ གདོང་ཁ་ལས་མཆོད་པ་བསྒྲིགས་ཏེ་ཡོད་མི་ཅིག་བཞག་ནི།
དེ་ལས་གསེར་སྒྲེང་དང་བཅས་པའི་ཐོག་ལས་ འཁྲབ་སྟེགས་ཀྱི་གཡས་ཕྱོགས་ལས་རྒྱལ་སྲས་བློན་འབངས་ཚུ་དང་།
གཡོན་ཕྱོགས་ལས་བློན་པོ་ཏྲིག་ན་འཛིན་གྱིས་གཙོ་བྱས་པའི་ཞབས་རིམ་པ་ཚུ་གིས་ བཙུན་མོ་འོད་འཆང་མ་གདན་འདྲེན་ཞུ་ཞིནམ་ལས།
དབུས་ཀྱི་ཁྲི་ལུ་རྒྱལ་སྲས་དང་། གཡས་ལུ་བཙུན་མོ་འོད་འཆང་མ། གཡོན་ལུ་ཡབ་རྒྱལཔོ། མདུན་གྲལ་ལུ་མཆོད་གནས་སྔགས་པ་གཅིག་
དེ་ལས་མཐའ་སྐོར་ལུ་བློན་འབངས་ཚུ་བཞུགས་ནི།
|
|
རྒྱལཔོ།
|
ད་རེས་ལས་
བུ་མོ་འོད་འཆང་མ་མཆོག་ རྒྱལ་སྲས་པདྨ་རྒྱལ་པོའི་རྒྱལ་བརྒྱུད་འཛིན་པའི་བཙུནམ་སྦེ་གསེར་ཁྲི་མངའ་གསོལ་ཞུ་ནི་ཨིན།
|
|
རྒྱལ་སྲས་དང་བཙུནམ་གཉིས་དཀྱིལ་འཁོར་གྱི་གདོང་ཁར་བྱོན་ཞིནམ་ལས་
གཅིག་གིས་གཅིག་ལུ་མེ་ཏོག་གི་ཕྱེངམ་བཏགས་ནི་དང་། བཀག་སྣེ་གི་མཐའམ་མདུད་ཕུད་བཏབ་སྟེ་དཀྱིལ་འཁོར་བསྐོར་ར་རྐྱབ་པའི་བར་ན་
མཆོད་གནས་སྔགས་པ་གིས་བཀྲ་ཤིས་པའི་ཚིགས་བཅད་འདོན་ཏེ་མེ་ཏོག་གཏོར་ནི།
|
||
སྔགས་པ།
|
བརྩེ་དུང་མི་འགྱུར་བརྟན་པའི་གངས་རི་ལས།
།ལྷག་བསམ་ཁ་བའི་ཞུར་རྒྱུན་འབབ་པ་དེས། །ཆབ་འབངས་མི་སེར་ཐང་ལ་སིམ་ནས་ནི། །གུས་བཀུར་སྔོ་ཚལ་རྒྱས་པའི་བཀྲ་ཤིས་ཤོག
།ལུས་ལ་ན་ཚ་མེད་པའི་བཀྲ་ཤིས་ཤོག །ངག་ལ་རྫུན་མེད་དྲང་པོའི་བཀྲ་ཤིས་ཤོག །སེམས་ལ་གཡོ་སྒྱུ་མེད་པའི་བཀྲ་ཤིས་ཤོག།
།ཀུན་ལ་དམ་ཚིག་གཙང་བའི་བཀྲ་ཤིས་ཤོག།
|
|
དེ་ལས་ཁྲི་གུར་བཞུགས་ཞིནམ་ལས་
ཡབ་རྒྱལ་པོ་གིས་གཙོ་བྱས་ཏེ་ ཁྲི་དར་ཚུ་རིམ་པ་བཞིན་དུ་ཕུལ་བའི་བར་ན་ གླུ་གཞས་པ་ཚུ་གིས་ཞབས་ཁྲ་འཕུལ་ནི།
|
||
གླུ་གཞས་པ་ཚུ་གིས།
|
རྒྱལ་སྲས་ཉིན་བྱེད་དབང་པོའི།
།ཞལ་གྱི་དཀྱིལ་འཁོར་ཤར་ཚེ།།
འོད་འཆང་པདྨའི་ཟེར་འབྲུ།
།མ་ངོམས་རང་དབང་མིན་འདུག།
བརྩེ་དུངས་དར་སྐུད་སྣ་ལྔ།
།ལས་ཀྱིས་ཐགས་སུ་འབྱེན་ཚེ།།
སྔར་ལས་འོད་མདངས་ཚེར་བའི།
།གནམ་བཀོད་མེ་ཏོག་བཞེད་སོང་།།
སྤྱན་རས་གཟིགས་ཀྱི་རྣམ་སྤྲུལ།
།རྒྱལ་སྲས་ཚུལ་དུ་བྱོན་ཚེ།།
སྒྲོལ་མ་མི་སེར་ཚ་ནས།
།སྐད་ཅིག་བྲལ་ཐབས་མིན་འདུག།
རྔ་ཡབ་ཨོ་རྒྱན་གླིང་ལ།
།རྒྱལ་སྲིད་མངའ་ཐང་རྒྱས་སོང་།།
བཙུན་མོ་ཁྲི་མངའ་གསོལ་སོང་།
།མི་སེར་བདེ་ལ་བཀོད་སོང་།།
|
|
ཡོལ་ལི་བསྡམས་ནི།
|
||
༼མཐོང་སྣང་བཞི་པ།༽
རྒྱལ་སྲིད་སྤངས་ཏེ་འབྱོན་པའི་སྐོར།
རྒྱབ་ཀྱི་མཐོང་སྣང་།
|
རྒྱལ་བ་རྡོ་རྗེ་སེམས་དཔའ་ལ་
འཁོར་ལྷ་དང་ལྷ་མོ་ཚུ་གིས་བསྐོར་ཏེ་ཡོད་མི་ཅིག་བཀོད་ནི།
|
|
ལས་རིམ།
|
དེ་ལས་ས་སྨུག་གི་ཚུལ་སྦེ་དུ་པ་བཏང་།
འབྲུག་གི་སྒྲ་གྲགས། གློག་འོད་ཆམ་མ་ཆེམ་སྦེ་བཟོ་ཞིནམ་ལས་ རྒྱལ་སྲས་འཁྲབ་སྟེགས་གུར་འཐོནམ་དང་ཅིག་ཁར་
ནམ་མཁའ་ལས་ལུང་བསྟན་གྱི་སྒྲགས་གྲགས་ནི།
|
|
ལུང་བསྟན།
|
ཨེ་མ་ཧོ༔
རྒྱལ་པོའི་ཕོ་བྲང་དབུས་ན་ནི༔ ཆོས་ཀྱི་རྒྱལ་པོ་གནས་གྱུར་པ༔ བཙུན་མོ་སྡུ་གུའི་ཚོགས་ཀྱིས་བསྐོར༔ ཕན་ཚུན་གནས་ཀྱང་འདུ་བ་དག༔
དེ་དག་ཐམས་ཅད་མི་དགའ་ཞིང་༔ འཇིགས་པའི་ཡིད་ཀྱིས་མྱ་ངན་བྱེད༔ དེ་ཡི་དུས་ལ་ད་བབ་བོ༔
|
|
རྒྱལ་སྲས་ཀྱི་ཐུགས་དགོངས་ལུ་ཤར་བའི་ཚུལ།
|
དབའེ༑
ཧེ་མ་ང་ དྲི་མེད་མདངས་ལྡན་གྱི་མཚོ་ལས་འོངས་པའི་ལམ་ཁ་ལུ་ རྒྱལ་པོའི་རྒྱལ་སྲིད་སྤངས་དགོ་པའི་རྟགས་དང་མཚན་མ་ལེ་ཤ་རང་
མཐོང་མི་དེ་ཚུ་ དུས་ཚོད་ལུ་བབས་བབས་བཟུམ་ཅིག་འདུག ད་ང་འགྱོ་དགོ་ནི་ཨིན་མས།
|
|
དེ་ལས་རྒྱལ་སྲས་བྱོནམ་དང་ཅིག་ཁར་ཡོལ་ལི་བསྡམས་ནི།
|
||
མཐོང་སྣང་།
|
ཕོ་བྲང་ནང་རྒྱལཔོ་གཟིམས་ཏེ་བཞུགས་ནི་དང་།
རྒྱལ་སྲས་ནང་ན་འཛུལ་བ་དང་གློག་འོད་རིམ་གྱིས་འབར་ཏེ་སྐྱ་དུང་དུང་འགྱོཝ་ད་ རྒྱལཔོ་ཡར་བཞེངས་ནི།
|
རྒྱལཔོ།
|
དབའེ༑
ཉིནམ་ཤར་ནུག་མེན་ན།
|
དེ་ལས་རྒྱལ་སྲས་མཐོང་སྟེ་ སྤྱན་འཕྱག་ཅི་འཕྱག་ཅི་གསུངས་ནི།
|
|
རྒྱལཔོ།
|
དབའེ༑
རྒྱལ་སྲས༑ གནམ་ཕྱི་རུ་ལུ་ཡང་དེ་སྦེ་འོང་སྟེ། ག་ཅི་འབད་དཔ་སྨོ། སྟབས་མ་བདེཝ་ཅིག་བྱུང་བྱུངམ་འདྲ་བས་མེན་ན།
|
དེ་ལས་རྒྱལ་སྲས་ཀྱིས་སྤུས་མོ་བཙུགས་ ཕྱག་གཉིས་ཐལ་མོ་སྦྱར་ཏེ་ཞུ་ནི།
|
|
རྒྱལ་སྲས།
|
ཡབ་རིན་པོ་ཆེ༑
ད་གཏི་མུག་གི་གཉིད་ལོག་སྟེ་ དོན་དག་མིན་འདུག་ ད་ ང་ རང་རྒྱུད་ཀྱི་ཉོན་མོངས་པ་དེ་ཚུ་སྤངས་ཏེ་
འཁོར་བའི་འདམ་ལས་དགྲོལ་བའི་ སངས་རྒྱས་ཀྱི་ཆོས་ཅིག་སྒྲུབ་པར་འགྱོ་ནི་ཨིན་ལགས།
ཡབ་རིན་པོ་ཆེ་ཐུགས་ངལ་མ་མཛད་པར་
ཐུགས་ཀྱི་དགོངས་པ་གནང་སྟེ་ བཀའ་དྲིན་བསྐྱང་གནང་ལགས།
|
རྒྱལཔོ།
|
ངེད་ཀྱི་གཉིད་ལམ་ནང་ཡང་
ཉིནམ་ལ་རྒྱབ་འཛུལ་ནི་དང་། ཁ་ལས་སོ་བུད་པའི་གཉིད་ལམ་ཅིག་མཐོང་ཅི་ས། ད་རེས་ ངེད་ཀྱི་ཧིང་དང་འདྲ་བའི་རྒྱལ་སྲས་ཁྱོད་ཀྱིས་
མ་ཧན་པའི་གཏམ་དེ་བཟུམ་ཅིག་སླབ་ནི་གི་རྟགས་མཚན་འོང་ནི་མས།
རྒྱལ་སྲས་རིན་པོ་ཆེ༑
སངས་རྒྱས་ཀྱི་གོ་འཕང་གྲུབ་རུང་ ལཱ་འདིནི་ སེམས་ཅན་གཞན་གྱི་དོན་མཛད་ནི་འདི་ཨིན། རྒྱལ་སྲས་ཆོས་བཞིན་དུ་སྐྱོང་སྟེ་མི་སེར་གྱི་སྐྱིད་སྡུག་གཟིགས་པ་ཅིན་
སེམས་ཅན་གྱི་དོན་སྒྲུབ་ནི་ཟེར་རུང་དེམ་ཅི་ཨིན་མས་མེན་ན།
|
རྒྱལ་སྲས།
|
འཇིག་རྟེན་པ་འདི་ཚུ་
རང་གི་ལུས་ལུ་འཕོག་པའི་སྡུག་བསྔལ་ཆུང་ཀུ་ཅིག་ཡང་བཟོད་མི་ཚུགས་པར་ ངན་སོང་གསུམ་གྱི་སྡུག་བསྔལ་བཟོད་ཚུགས་མནོ་སྟེ་སྡོདཔ་མ་ཚད།
ཚེ་མི་རྟག་པ་ཨིན་རུང་ དེ་ལུ་རྟག་པ་ཨིན་ཟེར་མནོ་སྟེ་སྡོདཔ་མས། དེ་བཟུམ་གྱི་འཇིག་རྟེན་པའི་སྦུག་ལུ་ང་མི་སྡོད།
དེ་བ་འདི་ སྒྱུ་མ་དང་འདྲ་བའི་འཁོར་བ་འདི་སྤངས་ནི་གི་དོན་ལུ་ དམ་པའི་ཆོས་ཅིག་འབད་བར་འགྱོ་ནི་ཨིན་ལགས།
|
རྒྱལཔོ་ ཐུགས་སྐྱོ་བ་དང་ཁྲོ་བའི་རྣམ་འགྱུར་ཟུང་འབྲེལ་གྱི་ཐོག་ལས།
|
|
རྒྱལཔོ།
|
ཀྱེ་མ༑
ཁྱོད་དང་མ་འཕྱད་པའི་ཧེ་མ་ལས་ ང་ག་ཅི་སྦེ་མ་ཤིཝ་ཨིན་ན་སྨོ། འདི་བཟུམ་གྱི་སྡུག་བསྔལ་འདི་
ཤུལ་ལས་ཡང་འབྱུང་མ་བཅུག
|
ཟེར་གསུངས་ཞིནམ་ལས་ དབུ་སྤུར་ཏེ་གཟིམས་ནི་དང་ཅིག་ཁར་ ཡོལ་ལི་བསྡམས་ནི།
|
|
རྒྱབ་ཀྱི་མཐོང་སྣང་།
|
ཕོ་བྲང་གི་ཕྱིའི་བར་འཁྱམས་ཐོག་ཚད་ལེ་ཤ་ཡོད་མི་ཅིག་བཞག་ནི།
|
|
ལས་རིམ།
|
རྒྱལ་སྲས་རྣལ་འབྱོར་པའི་གོ་ལ་གྱོན༼ས་དྷུ་བཱ་བཱ་གི་གོ་ལ༽
ཕྱག་ལུ་གསེར་གྱི་རྡོ་རྗེ་སྦོམ་གཅིག་དང་ཁ་ཊམ་གཅིག་བསྣམས་ཏེ་ ཕོ་བྲང་སྟེང་གི་འཁྱམས་གཅིག་ནང་སྨྱོན་པའི་སྤྱོད་པ་སྟོན་ཏེ་བཞུགས་ནི་དང་།
འོག་གི་ཐང་ཆེན་ནང་ལུ་བློན་འབངས་དེ་ཚུ་འཛོམས་ཏེ་ རྒྱལ་སྲས་ལུ་བལྟ་ཞིནམ་ལས་ ག་ཅི་མཛདཔ་ཨིན་ན་སྨོ།
ཟེར་བ་ལ་སོགས་པའི་ཆིག་ལབ་རྒྱབ་སྟེ་སྡོད་པའི་བར་ན། རྒྱལ་སྲས་ཀྱི་ཕྱག་ལས་རྡོ་རྗེ་དང་ཁ་ཊམ་ག་བཤོར་ཏེ་
འོག་ལུ་ཡོད་པའི་ཨམ་སྲུ་ཨ་ལུ་འབག་མི་༼བློན་པོ་དབང་ཆེན་ཀ་ཏ་མའི་ཨམ་སྲུ༽ དེ་ལུ་འཕོག་སྟེ་མ་བུ་གཉིས་ཀ་ས་ལུ་འགྱེལ་ཞིནམ་ལས་ཤི་བའི་ཚུལ་སྟོན་ནི་དང་།
མི་ཚུ་ག་ར་སྤུངས་ཏེ་སྐད་རྐྱབ་སྡོད་པའི་བར་ན་བློན་པོ་ཀ་ཏ་མ་ཡང་དེ་ནང་བྱོན། གནས་སྟངས་ཚུ་གཟིགས་ཞིནམ་ལས་
སྐད་རྐྱབ་ནི།
|
|
བློན་པོ་ཀ་ཏ་མ།
|
རྒྱལ་པོ་རིན་པོ་ཆེ༑
རྒྱལ་པོ་རིན་པོ་ཆེ༑
|
|
ཟེར་སྐད་རྐྱབ་སྟེ་སྡོད་པའི་བར་ན་རྒྱལཔོ་བྱོན་ནི་དང་། རྒྱལཔོ་གིས་གཟིགས་ཏེ་བཞུགས་པའི་བར་ན་བློན་པོ་ཀ་ཏ་མ་གིས་ཞུ་ནི།
|
||
ཀ་ཏ་མ།
|
རྒྱལ་པོ་རིན་པོ་ཆེ༑
རྒྱལ་སྲས་དེ་གིས་ཧེ་མ་ཡང་ ཨ་ལོ་གཅིག་བསད་བཏང་སྟེ་འབད་རུང་ རྒྱལ་པོ་མཆོག་གིས་དེ་ལུ་ཉེས་ཁྲིམས་ག་ནི་ཡང་མ་བཀལ།
ད་རེས་འབད་ཚེ་ངེད་ཀྱི་ཨམ་སྲུ་དང་ཨ་ལོ་གཉིས་ཆ་རང་བསད་བཏང་ནུག ད་རེས་ཀྱི་འདི་ལུ་ཡང་ཉེས་ཆད་མེད་པར་གུ་ཡངས་གནང་པ་ཅིན།
ང་བཅས་རའི་རྒྱལ་ཁབ་འདི་ནང་རྒྱལ་ཁྲིམས་མེདཔ་བཟུམ་ཅིག་ལུ་འགྱོ་ནི་དང་། ལྷག་པར་དུ་རྒྱལ་སྲས་ཀྱི་སྤྱོད་པ་འདི་ངན་པ་ལང་ཤོར་ལུ་འགྱོ་ནི་བཟུམ་ཅིག་འདུག་ལགས།
དེ་འབདཝ་ལས་བརྟེན་ཏེ། ངནམ་མཐའ་ལུ་མ་བཏོནི། བཟངམ་གཡུས་ལུ་མི་འཁོར། ཟེར་བའི་དཔྱེ་བཟུམ་སྦེ།
སྤྱོད་པ་འདུག་རྩུབ་ཆེ་བའི་རྒྱལ་སྲས་འདི་ལུ་ཉེས་ཆད་ཅིག་བཀལ་རང་བཀལ་དགོ་ལགས།
|
|
བློན་པོ་གཞན་གཅིག་གིས།
|
རྒྱལ་སྲས་ལུ་ཉེས་ཆད་མ་བཀལཝ་བཟུམ་ཅིག་འབད་བ་ཅིན།
ཆུ་རྐ་ལས་མེདནི་གཟར་ལུ་ཆད། །ཁྲིམས་གོང་ལུ་མེདནི་འོག་ལུ་མེད།། ཟེར་སླབ་དོ་བཟུམ་སྦེ་ཤུལ་ལས་མི་སེར་དེ་ཚུ་གིས་
དེ་བཟུམ་གི་ལས་ངན་འབད་དེ་འཐོན་འོང་པ་ཅིན་ ཉེས་ཁྲིམས་བཀལ་ཐབས་མིན་འདུག་ལགས།
|
|
རྒྱལཔོ་ རྒྱལ་སྲས་ལུ་གཟིགས་ཏེ་ ཐུགས་སེམས་སྐྱོ་བའི་ཐོག་ལས་གསུངས་ནི།
|
||
རྒྱལཔོ།
|
རྒྱལ་སྲས་རིན་པོ་ཆེ༑
ངེད་ཀྱི་སེམས་ལས་འབད་བ་ཅིན། ཁྱོད་སྤྲུལ་པའི་སྐུ་གཅིག་ཨིན་ནི་དེ་གིས་ བློ་གཏད་ཧིང་གཏད་འབད་རང་
ངེད་ཀྱི་རྒྱལ་སྲས་སྦེ་ཞུ་ཞུཝ་ཨིན།
|
|
དེ་ལས་ཁྲོ་བོའི་རྣམ་འགྱུར་ཆུང་ཀུ་ཅིག་སྟོན་ཏེ་གསུངས་ནི།
|
|||
རྒྱལཔོ།
|
ཨིན་རུང་ཁྱོད་ཀྱི་ཕྱག་ལཱ་མཛད་ཐངས་འདི་ལུ་བལྟ་བ་ཅིན།
ཁྱོད་ཀྱི་ང་ལུ་ཞེ་སྡུག་འབད་དོ་བཟུམ་ཅིག་འདུག ཧེ་མ་ཡང་མི་གཅིག་བསད་བཏང་ཡི་ས་གིན། ད་རུང་ཡང་མ་བུ་གཉིས་བསད་བཏང་ནུག
དེ་ག་དེ་སྦེ་སྨོ། ཁྱོད་རང་གིས་ཚར་ཅིག་སླབ་ཤིག
|
||
རྒྱལ་སྲས།
|
རྒྱལ་པོ་རིན་པོ་ཆེ༑
མ་གཞི་ང་གིས་ཁོང་ཆ་ཁྱབ་བསད་དགོ་མནོ་སྟེ་བསད་བསདཔ་རྩ་ལས་མེན་ལགས། རྡོ་གནམ་ཁར་བཀོཝ་ད་
བྱ་འཕུརཝ་ཁ་ཐུག་རྐྱབ། ཟེར་སླབ་དོ་བཟུམ་སྦེ། ཁོང་ཆ་ཁྱབ་ང་ལུ་ ཚེ་རབས་ཧེ་མ་གི་ལེན་ཆགས་བུ་ལོན་འཇལ་ནི་ཡོདཔ་ལས་
ཤི་བའི་རྐྱེན་དེ་ང་དང་འཕྱད་འཕྱདཔ་ཨིན་མས་ལགས། ཨིན་རུང་བློན་འབངས་དེ་ཚུ་གི་མཐོང་ཚུལ་ལུ་
ང་གིས་བསད་བསདཔ་བཟུམ་ཅིག་ཡར་སོངམ་ལས། རྒྱལ་ཁབ་ཁྲིམས་དང་འཁྲིལ་བའི་ཉེས་ཆད་ག་ཅི་བཀའ་གནང་རུང་
ཕྱག་ཕྱིས་ཞུ་ནི་ཨིན་ལགས།
|
||
རྒྱལཔོ་ དུས་ཡུན་ཐུང་ཀུ་ཅིག་གི་རིང་ལུ་ ཐུགས་སྐྱོ་བའི་རྣམ་པ་སྟོན་ཏེ་བཞུགས་ནི་དང་།
དེ་ལས་བློན་འབངས་ཚུ་ལུ་གཟིགས་ཏེ།
|
|||
རྒྱལཔོ།
|
ད་
ཁྱེད་ཆ་ཁྱབ་ཀྱིས་འབད་བ་ཅིན་ རྒྱལ་སྲས་ཉེས་ཆད་ག་ཅི་བཟུམ་ཅིག་བཀལ་བ་ཅིན་དྲག་ནི་ཨིན་མས་གོ།
|
||
ཀ་ཏ་མ་གིས་གཙོས་པའི་བློན་འབངས་རེ་རེ་གིས་ འོག་གི་དོན་ཚན་རེ་རེ་ཞུ་ནི།
|
|||
མི་རེ་རེ་བཞིན་དུ་གིས།
|
༼གཅིག་གིས།༽ རྒྱལ་སྲས་ཀྱི་ཉེས་ཆད་འདི་ སྲོག་ཐོག་ལུ་བཏང་པ་ཅིན་དྲག་ནི་མས་ལགས།
༼གཞན་གཅིག་གིས།༽ རྒྱལ་ཁྲིམས་དང་འཁྲིལ་བ་ཅིན།
རྒྱལ་ཁབ་འདི་ནང་ལས་མཐར་ཤུད་བཏང་དགོཔ་ཨིནམ་ལས། རྒྱ་གར་ཤར་ཕྱོགས་ལུ་མཐར་ཤུད་གཏང་པ་ཅིན་དྲག་ལགས།
༼གཞན་གཅིག་གིས།༽ ལྷོ་ཕྱོགས་བྷཻ་དར་བྷའི་གཡུས་ཁ་གཏང་པ་ཅིན་དྲག་ལགས།
༼གཞན་གཅིག་གིས།༽ ལི་ཡུལ་ལུ་གཏང་པ་ཅིན་དྲག་ལགས།
༼གཞན་གཅིག་གིས།༽ ཤམ་བྷ་ལ་ལུ་གཏང་པ་ཅིན་དྲག་ལགས།
|
||
རྒྱལཔོ།
|
ཧིང་༑
གནམ་བྱཱ་གི་བྱ་སྐད་ཉན་པ་ཅིན་ ཁུ་བྱུག་ཆགས་ས་མི་འཐོབ། རྒྱལ་སྲས་ཀྱི་ཉེས་ཆད་འདི་ སྲོག་ཐོག་ལུ་གཏང་པ་ལུ་
དང་པ་ཁོ་རང་སྤྲུལ་པའི་སྐུ་གཅིག་ཨིནམ་མ་ཚད། གཉིས་པ་སོངམ་ད་ ངེད་ཀྱི་སྲས་བཟུམ་ཅིག་ཨིནམ་ལས་
ང་གིས་ཁོ་སྲོག་ཐོག་ལུ་གཏང་ཐབས་མིན་འདུག དེ་བ་འདི་ ཨོ་རྒྱན་གྱི་རྒྱལ་ཁབ་ལས་མཐར་ཤུད་གཏང་ནི་ཨིན།
|
||
རྒྱལ་སྲས་ལུ་གཟིགས་ཞིནམ་ལས་གསུངས་ནི།
|
|||
རྒྱལཔོ།
|
རྒྱལ་སྲས་རིན་པོ་ཆེ༑
རྒྱལཔོ་ཡང་རྒྱལ་ཁབ་ཀྱི་ཁྲིམས་དང་བསྟུན་དགོཔ་ལས། ད་ང་ལུ་འབད་ཐབས་ཤེས་ག་ཅི་ཡང་མིན་འདུག
ཨིན་རུང་ མཐར་ཤུད་གཏང་སའི་ས་གོ་འདི་ ཁྱོད་རང་གི་ཐུགས་འདོད་ཡོད་ས་གཅིག་ནང་གཏང་ནི་ཨིན།
ད་ག་སྟེ་ཕྱོགས་ལུ་འགྱོ་ནི་ཨིན་ན་ ཁྱོད་རང་གསུངས་ཤིག
|
||
རྒྱལ་སྲས།
|
ངེད་ཀྱི་སེམས་ལུ་
སྐྱེ་ནི་དང་ཤི་ནི་ཟེརཝ་མེདཔ་ལས་ གསད་ནི་ཨིན་ཟེར་སླབ་རུང་འདྲོག་དགོཔ་མེདཔ་དང་། སྡོད་སའི་ས་གནས་ངེས་པ་མེདཔ་ལས་
ག་སྟེ་བསྐྱེལ་རུང་ ས་ཆ་དེ་ངེད་ཀྱི་གཞལ་ཡས་ཁང་བཟུམ་ཅིག་ཨིནམ་ལས་ རྒྱལ་པོ་ཁྱོད་རང་གིས་ག་སྟེ་གཏང་རུང་
ང་ལུ་ཁྱད་པར་རྩ་ལས་མེད་ལགས།
|
||
རྒྱལ་སྲས་ཀྱི་ལན་ལུ་བལྟ་སྟེ་
རྒྱལཔོ་ཐུགས་དགོངསམ་ཁྲེལ་ཞིནམ་ལས་ ཞལ་ཤོར་ནི།
|
|||
རྒྱལཔོ།
|
ཨིན་ན།
བཏུབ་ས། དེ་འབད་བ་ཅིན་ ཁྱོད་དུར་ཁྲོད་བསིལ་བ་ཚལ་ལུ་གཏང་ནི་ཨིན་སྨ་རེ།
|
||
བློན་པོ་གཅིག་གིས།
|
རྒྱལ་སྲས་ཀྱི་ཉེས་པ་དེ་དང་འཁྲིལཝ་ད་
དུར་ཁྲོད་བསིལ་བ་ཚལ་ལུ་མཐར་བཤུད་གཏང་ནི་འདི་ འོས་འབབ་ལྡན་ཏོག་ཏོ་ཅིག་ཨིན་མས་ལགས།
|
||
དེ་ལས་བློན་པོ་གཞན་ཚུ་གིས་ཡང་
དེ་ལུ་རྒྱབ་སྐྱོར་འབད་དེ་
|
|||
བློན་པོ་གཞན་ཚུ་གིས།
|
ཨིན་མས་ལགས།
ཨིན་མས་ལགས། ཨིན་མས་ལགས།
|
||
ཟེར་ཞུ་ཚརཝ་ད་ལུ། རྒྱལཔོ་སྤྱན་གནམ་ཁར་གཟིགས་ཞིནམ་ལས་ཨ་ཙི་ཅིག་ཐུགས་བསམ་བཞེས་ཏེ་བཞུགས་པའི་མཐའ་མར།
|
|||
རྒྱལཔོ།
|
དབའེ༑
བཀའི་བློན་པོ་ཚུ༑ སྤྲུལ་པའི་རྒྱལ་སྲས་འདི་བཟུམ་ཅིག་ཧེ་མ་ཡང་མ་བྱོན་ས་གིན། ད་ན་ལས་ཕར་ཡང་མི་འབྱུངམ་འོང་།
རྒྱལ་སྲས་རིན་པོ་ཆེ། ཧེ་མ་རབ་བྱུང་མཛད་ནི་ཨིན་ཟེརཝ་ད་ལུ་ཡང་ གཏང་མ་ནུམ་པར་བཞག་མི་འདི་
ད་རེས་དུར་ཁྲོད་བསིལ་བ་ཚལ་ལུ་གཏང་དགོ་ཟེརཝ་ད་ ངེད་ཀྱི་དོན་ཧིང་མགུ་ལུ་ཆུ་བླུ་དོ་བཟུམ་སྦེ་
མ་བདེཝ་སྦོམ་ཅིག་རང་ཚོརཝ་མས། ཁྱེད་བློན་པོ་ཚུ་ཐུགས་ཀྱི་དགོངས་པ་ཚར་གཅིག་ལེགས་ཤོམ་སྦེ་བཞེས་ཤིག
|
||
བློན་པོ་ཀ་ཏ་མ་གིས་
དེའི་འཕྲོ་ལས་ཞུ་ནི།
|
|||
བློན་པོ་ཀ་ཏ་མ།
|
རྒྱལ་པོའི་སྨྲ་བ་ལན་གཅིག་དང་།
གྲོས་མཁན་བློན་པོའི་མདུན་གྲོས་ལན་གཅིག་ཨིནམ་ལས་ ཚར་གཅིག་ཐག་བཅད་འབད་མི་དེ་ལུ་བཏུབ་སྦེ་བཞག་དགོ་ལགས།
|
||
རྒྱལཔོ་ག་ནི་ཡང་གསུངས་མ་ཚུགས་པར་ དབུ་ཕབས་སྟེ་བཞུགས་པའི་བར་ན་ཡོ་ལ་ལི་བསྡམས་ནི།
|
|||
རྒྱབ་ཀྱི་མཐོང་སྣང་།
|
རྒྱ་གར་རྒྱལ་པོའི་ཕོ་བྲང་གི་རྒྱལ་སྒོའི་ཕྱི་ཁའི་པར་གཅིག་བཞག་ནི།
|
|
གྲ་སྒྲིག
|
རྒྱལ་སྲས་འཁྲབ་སྟེགས་གུ་བྱོན་ནི་དང་།
ཟུར་ཁ་ལས་མི་དམངས་ལེ་ཤ་འཛོམས་ཏེ་ རྒྱལ་སྲས་བྱོན་མི་དེ་ལུ་སེམས་སྐྱོ་བའི་རྣམ་པ་སྟོན་ཏེ་སྡོད་པའི་བར་ན།
བཙུན་མོ་འོད་འཆང་མ་རྒྱུགས་ཏེ་འོང་ཞིནམ་ལས་ རྒྱལ་སྲས་གུར་འཐམས་ཏེ་ཤུམ་པའི་ཐ་མར་སྤུས་མོར་ས་ཁར་བཙུགས་ཏེ་གླུ་འདི་འཕུལ་ནི།
|
|
འོད་འཆང་མ།
|
ཐག་རིང་རྒྱང་གི་གསེར་སྦྱངམ། །མེ་ཏོག་ཁྱོད་ལུ་འཁོར་རུང་།།
མེ་ཏོག་སེར་གྱིས་བཅོམ་ན། །གསེར་སྦྱངམ་ཆགས་ས་མི་འདུག།
རྒྱལ་སྲས་སྤྲིན་དཀར་ཕུང་པོ། །རྐྱེན་ངན་རླུང་གིས་འབག་ན།།
ཞིང་པའི་ལོ་ཐོག་རྩི་བཅུད། །འཐོབ་པའི་རེ་བ་མིན་འདུག།
ཁྱོད་ནི་ལྷ་བྱ་གོང་མ། །ང་ནི་ཁྱོད་ཀྱི་གྲིབ་མ། །ལྷ་བྱ་གང་དུ་འཕུར་ཡང་།
།གྲིབ་མ་མཉམ་དུ་འཕུར་ཆོག།
|
|
གླུ་འཐེན་པའི་བར་ན་
རྒྱལ་སྲས་ཀྱི་རྒྱབ་ཕྱོགས་ལས་རྒྱལ་པོ་ཨིན་དྲ་བྷུ་ཏི་ཡང་བྱོན་ཞིནམ་ལས་གཟིགས་ཏེ་བཞུགས་ནི་དང་།
མདུན་ཕྱོགས་ལས་ཕྱོགས་ཀྱི་རྒྱལ་ཆེན་བཞི་དང་ མཁའ་འགྲོ་སྡེ་བཞི་ རྟ་མཆོག་དཀར་པོ་དང་བཅས་པ་བྱོན་ཞིནམ་ལས།
འོད་འཆང་མའི་གླུ་རྫོགསཔ་ཅིག་རྒྱལ་ཆེན་བཞི་གིས་སྤུས་མོ་ས་ཁར་བཙུགས་ཏེ་དུས་གཅིག་ལུ་ཞུ་ནི།
|
||
རྒྱལ་ཆེན་བཞི།
|
ཨེ་མ་ཧོ།
རྒྱལ་པོའི་རྒྱལ་ས་ཐུན་མོང་སྐྱབས་གནས་མིན༔ །སྐྱེ་གནས་སོ་སོར་སྔ་ཕྱིར་སྤྲུལ་པའི་སྐུ༔
པད་འབྱུང་མ་ཡིན་ངེས་དོན་སྟོན་པ་མེད༔ ཐ་དད་དྲང་ཕྱིར་ཐེག་པ་སོ་སོ་ཀུན༔ ལྟ་སྤྱོད་སྦྱོར་སྒྲོལ་པད་འབྱུང་སངས་རྒྱས་ལམ༔
འབྲས་བུ་བདག་གཞན་མཆོག་ཐུན་སངས་རྒྱས་འགྲུབ༔
རྒྱལ་སྲས་རིན་པོ་ཆེ༑
ད་ལུང་བསྟན་དུས་ལུ་བབས་ཨིནམ་ལས་ ང་བཅས་ཕྱོགས་ཀྱི་རྒྱལ་ཆེན་བཞི་དང་མཁའ་འགྲོ་སྡེ་བཞི་ཚུ་
རྒྱལ་སྲས་རིན་པོ་ཆེ་གདན་འདྲེན་ཞུ་བར་བཅར་ཡི་ལགས། ད་བྱོན་གནང་།
|
|
དེ་ལས་རྒྱལ་སྲས་ཀྱིས་
ཞལ་ཕོ་བྲང་ལུ་ལོག་སྟེ་གཟིགས་ཞིནམ་ལས་ཕྱག་ཐལ་མོ་སྦྱར་ཏེ་སྨོན་ལམ་བཏབ། དེ་ལས་ཡབ་རྒྱལཔོ་དང་བཙུན་མོ་འོད་འཆང་མ་ལུ་གཟིགས་ཞིནམ་ལས།
|
||
རྒྱལ་སྲས།
|
ཡབ་རྒྱལ་པོ་མཆོག༑
ཁྱེད་ཀྱི་ང་ལུ་ཐུགས་ཀྱི་རེ་བ་སྦོམ་སྦེ་བསྐྱེད་དེ་ཡོད་རུང་ རྐྱེན་ངན་གྱི་དབང་གིས་སྦེ་
དེ་ཚུ་ང་གིས་འགྲུབ་མ་ཚུགས། ད་ང་ཡང་འགྱོ་ནི་གི་དུས་ཚོད་རནམ་ལས་ ཡབ་རྒྱལཔོ་སྐུ་ཁམས་བདེ་ཏོག་ཏོ་སྦེ་བཞུགས་གནང་ལགས།
འོད་འཆང་མ༑ ངནི་དམ་པའི་ཆོས་ཀྱི་དོན་ལུ་དཀཝ་སྤྱད་པར་འགྱོཝ་ཨིནམ་ལས་ ཁྱོད་ཀྱི་སྐུ་གཟུགས་ག་ནི་བ་འཇམ།
ག་ནི་ཡང་རེག་ས་མེད་མི་དེ་གིས་ ང་དང་གཅིག་ཁར་དཀཝ་སྤྱད་མི་ཚུགས། དེ་བ་འདི་ ངེད་ཀྱི་ཡབ་ཡུམ་གཉིས་དང་གཅིག་ཁར་དགའ་ཏོག་ཏོ་སྦེ་བཞུགས་སྨ་རེ།
ད་ངནི་འགྱོ་བའི་དུས་ལུ་བབས་ཨིན།
|
|
དེ་ལས་རྒྱལ་སྲས་མདུན་ཕྱོགས་ཀྱི་རྟ་ལུ་ཆིབས་ནི་དང་།
མཁའ་འགྲོ་སྡེ་བཞི་གིས་རྟའི་རྐང་ལག་བཞི་ནས་བཏེགས། རྒྱལ་ཆེན་སྡེ་བཞི་གིས་སྣ་དྲངས་ཏེ་ནམ་མཁའ་མཐོང་ལས་འཕུར་ཏེ་བྱོན་ནི།
དེ་ལས་བཙུན་མོ་འོད་འཆང་མ་དྲན་མེད་བརྒྱལ། རྒྱལཔོ་དང་མི་དམངས་ཚུ་མྱ་ངན་གྱི་འབད་དེ་རྔུའི་བར་ན་ཡོལ་ལི་བསྡམས་ཏེ་མཇུག་བསྡུ་ནི་ཨིན།
|
||
རྒྱབ་ཀྱི་མཐོང་སྣང་།
|
ཉམས་དགའ་བའི་བྱག་ཕུག་གི་པར་ཅིག་བཞག་ནི།
|
||
ལས་རིམ།
|
དེ་ལས་རྒྱལ་སྲས་ཕེབས་བསྐྱེལ་དང་བཅས་པ་དེ་ན་བྱོན་ཞིནམ་ལས་ཆིབས་ལས་བབ་ནི།
|
||
རྒྱལ་སྲས།
|
ས་ཆ་ག་སྟེ་ཟེར་མི་འདི་ཨིན་མ་སྨོ།
དབའེ༑ དེ་ནང་བྱག་ཕུག་ཉམས་དགའ་ཏོག་ཏོ་གཅིག་ཡང་འདུག བྱག་ཕུག་འདི་གི་མིང་ག་ཅི་ཟེར་སླབ་ཨིན་ན་སྨོ།
|
||
མཁའ་འགྲོ་སྡེ་བཞི།
|
ས་ཆ་འདི་ཆུ་བོ་ལྔ་ལྡན་གྱི་གཡུས་དང་།
བྱག་ཕུག་འདི་ལུ་ བཀའ་སྐྱོང་བྱག་ཕུག་ཟེར་སླབ་ཨིན་ལགས། འདི་ནང་ལུ་རྣལ་འབྱོར་པ་ཉམས་ལེན་མཛད་མི་དང་
བྱ་དང་རི་དྭགས་མ་གཏོགས་ གཞན་ མི་ཅུང་གཅིག་ཡང་མཐོང་ནི་མེད་ལགས།
|
||
རྒྱལ་སྲས།
|
དབའེ༑
ཨིན་ན། དེ་འབདནི་ ང་ཡང་སྒྲུབ་པ་ཉམས་ལེན་འབད་དེ་ བྱག་ཕུག་འདི་ནང་སྡོད་ནི་ཨིན། ད་ཁྱེད་ར་ཆ་ཁྱབ་
རང་རང་གི་གནས་ལུགས་ལོག་སྟེ་བྱོན་སོང་སྨ་རེ།
|
||
མཁའ་འགྲོ་སྡེ་བཞི།
|
ལགས་སོ་ལགས།
རྒྱལ་སྲས་རིན་པོ་ཆེ་ལུ་ རྐྱེན་ངན་བར་ཆད་རེ་འབྱུང་པ་ཅིན་ ཆ་རོགས་འབད་བར་བཅར་འོང་ལགས།
|
||
དེ་ལས་མཁའ་འགྲོ་སྡེ་བཞི་དང་
རྒྱལ་ཆེན་བཞི་པོ་ལོག་སྟེ་བྱོན་ཞིནམ་ལས་ རྒྱལ་སྲས་ཁོ་རང་རྐྱངམ་ཅིག་ བྱག་ཕུག་དེ་གི་གདོང་ཁར་
སྤྱན་ས་ལུ་ཕབ། ཞབས་རྡོ་རྗེ་དཀྱིལ་ཀྲུང་། ཕྱག་གཉིས་མཉམ་གཞག་སྦེ་བསྒོམ་རྐྱབ་སྟེ་བཞུགས་ནི།
|
|||
བགོད་བྲོའི་ལས་རིམ།
རྒྱབ་ཀྱི་མཐོང་སྣང་།
|
རྒྱ་གར་ཁྲོམ་ཚོགས་ཀྱི་པར་ཅིག་བཞག་ནི།
|
|
ལས་རིམ།
|
སྦྱིན་བདག་དང་ཁོ་གི་བྱ་རོགས་གཉིས་འཐོན་ཏེ་བགོད་བྲོ་བསྒྱུར་ནི།
|
|
སྦྱིན་བདག
|
དབའེ༑
ཨཔ་རྡོས་སྒོར༑ ནང་ཤོག་ཤིག
|
|
རྡོས་སྒོར།
|
བཀའ་ག་ཅི་གནང་ནི་ཡོདཔ་ཨིན་ན་ལགས།
|
|
སྦྱིན་བདག
|
ང་ཁྱོད་ལུ་བློ་གཅིག་འདྲི་ནི་ཡོདཔ་ཨིན་སི།
དེ་ག་ཅི་སྨོ་ཟེར་བ་ཅིན། ངེད་ཀྱི་ལག་མཐིལ་གུར་སྤུ་གཅིག་ཡང་མེད་པར་གཡའ་ཐལ་ཐལ་ར་ཨིན་པས་
དེ་ག་ཅི་སྦེ་ཨིན་ན་སྨོ།
|
|
རྡོས་སྒོར།
|
སྦྱིན་བདག་གིས་ཨ་རྟག་ར་
ཕྱག་ལས་གསོལ་ར་གནང་སྟེ་ར་བཞུགས་ནི་འདི་གིས་ཨིན་མས་སྟེ།
|
|
སྦྱིན་བདག
|
ཨ༑
ཨིན་ན། དེ་འབདནི་ ཁྱོད་ཀྱི་ལག་པར་ཡང་སྤུ་མི་འདུག་པ་ཡ། དེ་ག་ཅི་སྦེ་ཨིན་ན།
|
|
རྡོས་སྒོར།
|
ང་ཡང་
ཨ་རྟག་ར་ སྦྱིན་བདག་ལས་གསོལ་ར་ཞུ་སྟེ་ར་ སྡོད་ནི་དེ་གིས་ ངེད་ཀྱི་ལག་པར་ཡང་སྤུ་སྐྱེས་མ་ཚུགསཔ་ཨིན་མས་ལགས།
|
|
སྦྱིན་བདག
|
དབའེ༑
ཁྱོད་ཀྱིས་ག་ཅི་ཡང་སླབ་འོང་། དེ་འབད་བ་ཅིན། ཁྱོད་ཀྱི་ཆ་རོགས་དེ་ཚུ་ཡང་ ལག་པར་སྤུ་མི་འདུག་སྟེ།
ཁོང་གི་ལག་པར་ག་ཅི་སྦེ་སྤུ་མེདཔ་ཨིན་ན།
|
|
རྡོས་སྒོར།
|
འེང་༑
དེ་འདི་ སྦྱིན་བདག་གིས་གསོལ་ར་གནང་སྟེ་ར་བཞུགས། ང་གིས་གསོལ་ར་ཞུ་སྟེ་ར་སྡོདཔ་ད་ ཁོང་ཆ་ཁྱབ་ལགཔ་གཡའ་སྟེ་
འཕུར་ཡི་ར་སྡོད་ནི་དེ་གིས་ཨིན་མས་ལགས། དེ་འབདཝ་ད་ ན་ཧིང་སྦྱིན་བདག་བྱོནམ་ལས་འགོ་བཙུགས་ཏེ་
ད་ ངེད་ཀྱི་ལག་པར་མ་ཚད་ རྣམ་ཅོག་ནང་ལས་ཡང་སྤུ་སྐྱེ་དོ་ལགས།
|
|
སྦྱིན་བདག
|
ག་ཅི་སྦེ།
|
|
རྡོས་སྒོར།
|
སྦྱིན་བདག་བྱོནམ་ལས་འགོ་བཙུགས་ཏེ་
གསོལ་རས་གནང་མི་མེདཔ་མ་ཚད་ ད་སྦྱིན་བདག་ལོག་བྱོན་ཞིནམ་ལས་ཟླཝ་གཅིག་དེ་ཅིག་སོང་རུང་
ག་ནི་ཡང་གནང་ནི་མི་འདུག་ལགས། སྦྱིན་བདག་ཕྱི་ཁར་བྱོནམ་ད་གསོལ་ར་གནང་ནི་བརྗེད་སོངམ་འདྲ་བས་མེན་ན་ལགས།
|
|
སྦྱིན་བདག
|
འ་འོ༑
དེ་གི་བློ་མ་སླབ། དེ་གི་སྐོར་ལས་གོཝ་ད་ར་ ང་ སེམས་འཁྲུལ་ཏེ་འདྲེག་ར་མི་ཚུགས་པས།
|
|
རྡོས་སྒོར།
|
ག་ཅི་སྦེ་ལགས།
|
|
སྦྱིན་བདག
|
ན་ཧིང་དེ་ཅི་ཁར་
རྒྱལ་སྲས་པདྨ་རྒྱལ་པོ་དེ་ རྒྱལ་སྲིད་ཀྱི་ལོངས་སྤྱོད་དང་ བཙུནམ་བྱ་རིམ་དེ་ཚུ་བཀོ་བཞག་སྟེ་
ཆོས་འབད་བར་བྱོན་སོང་ནུག དེ་ལས་ང་ཡང་མནོ་བསམ་ཅིག་བཏང་སྟེ་བལྟཝ་ད་ རོགས་རྒྱལ་པོའི་རྒྱལ་སྲིད་ལུ་ཡང་ཆགས་ཞེན་མེད་པར་སྤངས་ཚུགས་པ་ཅིན་
ང་འདི་རྟག་པ་མེད་པའི་ལོངས་སྤྱོད་ཆུང་ཀུ་འདི་བཟུམ་ཅིག་ལུ་ཆགས་སྟེ་སྙིང་པོ་ཅིག་ར་མིན་འདུག་མནོ་སྟེ་
རྒྱུ་ནོར་དེ་ཚུ་ག་ར་རོགས་ལུ་བྱིན་སྦེ། ཆོས་འབད་བར་སོང་སོངམ་ཨིན། ལོག་འབད་ཚེ་ཅིན་
རྒྱལ་སྲས་པདྨ་རྒྱལ་པོ་དེ་ ཁོ་རང་ཡང་སྤྱང་ཀ་འགྱོཝ་མ་ཚད་ ང་ཡང་སྤྱང་ཀ་བཟོ་དའི་སྟེ། ད་ ག་དེ་སྦེ་འབད་བ་ཅིན་དྲག་ག་སྨོ། ཨཔ་རྡོས་སྒོར༑
ཁྱོད་ཀྱིས་ཐབས་ཤེས་ཅིག་སྟོན་ནི་མི་འདུག་ག
|
|
རྡོས་སྒོར།
|
འོང་།
ནོརཔ་ཁ་ལུ་ཡོད་ཚེ་ལྕེ་གིས་འཕུལ། སེམས་ཅན་སྟག་གིས་མཆོང་སར་ཝམོ་གིས་མཆོངས། ཐབས་ཤེས་ཅིག་ར་ཡོད་པ་ཅིན་འདི་
ང་ཡང་ཁྱོད་ལས་གསོལ་ར་ཞུ་ཡི་ར་སྡོད་འོང་ག་སྟེ། ག་ཅི་ཨིན་རུང་ཁྱད་མིན་འདུག ངེད་ཀྱི་ཁྱིམ་ནང་ཚར་ཅིག་བྱོན་གེ་སྟེ།
དེ་ལས་ཐབས་ཤེས་འོང་མེན་ན།
|
|
དེ་ལས་ཁོང་གཉིས་འགྱོཝ་ད་ཅིག་ཁར་ཡོལ་ལི་བསྡམས་ནི།
|
||
༼མཐོང་སྣང་ལྔ་པ།༽
དཀའ་སྤྱད་དང་ཐོས་བསམ་བསྒོམ་གསུམ་མཛད་པའི་ཚུལ།
མཐོང་སྣང་།
|
རྒྱབ་ཁར་བྱག་གི་པར་བཞག་ནི།
|
|
ལས་རིམ།
|
རྒྱལ་སྲས་བསྒོམ་སྒྲུབ་འབད་དེ་བཞུགས་ཚུལ་
གོང་ལུ་ཡོད་མི་དེ་འཕྲོ་མཐུད་མཛད་ནི།
|
|
དེ་ལས་དུས་ཚོད་ཨ་ཙི་ཅིག་ཁ་ལུ་
བདུད་ཀྱི་ཆོ་འཕྲུལ་བཟུམ་སྦེ་ གློག་འོད་ཆམ་ཆེམ་སྦེ་འབར་ཞིནམ་ལས་རླུང་འཚུབ་འཕུར། ས་གཡོམ་རྐྱབ་སྟེ་བར་ཆད་བྱུངམ་ད་ལུ་
ཞལ་རས་ཅུང་ཟད་ཁྲོ་བའི་རྣམ་འགྱུར་དང་ ཕྱག་གིས་སྡིག་མཛུབ་སྟོན་པའི་མཐའ་མར་ བར་ཆད་དེ་ཚུ་ཞི་སྟེ་
ཞི་འཇམ་གྱི་ཐོག་ལུ་གནས་སྟེ་དུས་ཡུན་མཐུང་ཀུ་ཅིག་བཞག་ནི། དེ་ལས་ཕྱི་རུ་གནམ་སྲོ་པའི་ཚུལ་སྦེ་གློག་འོད་བསད་པའི་གནག་དུང་དུང་གི་སྐབས་ལུ་
སངས་རྒྱས་དང་བྱང་ཆུབ་སེམས་དཔའ་ ལྷ་ཞི་བའི་རྣམ་པ་ཅན་ཚུ་གིས་ རྒྱལ་སྲས་ལུ་བསྐོར་ར་རྐྱབ་སྟེ་ཡོད་པའི་བར་ན་གློག་བཏེག་ནི་དང་།
དེ་ལས་ཁོང་ལུ་སྐོར་ར་ཚར་གསུམ་རྐྱབ་ཞིནམ་ལས་ རྒྱབ་བཤུད་རྐྱབ་སྟེ་རང་རང་སོ་སོའི་ཕྱོགས་ལུ་ལོག་བྱོན་ནི།
ཨ་ཙི་ཅིག་ཁ་ལས་ རྒྱལ་སྲས་མཉམ་བཞག་ལས་ལང་ཞིནམ་ལས་སྤྱན་གཉིས་གྱེན་ལུ་གཟིགས་ཏེ་ཐུགས་ཀྱི་དགོངས་པ་ཤར་བའི་ཚུལ་སྟོན་ནི།
|
||
རྒྱལ་སྲས་ཀྱི་ཐུགས་དགོངས་ལུ་ཤར་ནི།
|
ང་ན་ལུ་བསྒོམ་སྒྲུབ་འབད་དེ་
ཞག་བདུན་བརྒལ་མ་ལང་རུང་ མཆོག་དང་མཐུན་མོང་གི་དངོས་གྲུབ་དེ་ཚུ་ཐོབ་མ་ཚད་ འཆི་བ་མེད་པའི་ཚེའི་དངོས་གྲུབ་ཡང་ཐོབ་ཅི།
ད་རྒྱལ་བློན་ཚུ་གི་བཀའ་བཞིན་དུ་ དུར་ཁྲོད་བསིལ་བ་ཚལ་ལུ་འགྱོ་དགོ་ནི་ཨིན་མས།
|
|
དེ་ལས་ཡར་བཞེངས་ཏེ་བྱོན་ཞིནམ་ལས་ཡོལ་ལི་བསྡམས་ནི།
|
||
རྒྱབ་ཁའི་མཐོང་སྣང་།
|
འཇིགས་སུ་རུང་བའི་ནགས་ཚལ་གཅིག་ནང་
རྡོ་ལས་གྲུབ་པའི་རྒྱ་གར་གྱི་མཆོད་རྟེན་རྙིངམ་གི་པར་ཅིག་བཞག་ནི།
|
||
ལས་རིམ།
|
མདུན་གྱི་འཁྲབ་སྟེགས་གུར་
མི་རོ་དག་པ་གཅིག་བཞག་ཞིནམ་ལས་ ཤ་ཟ་སྲིན་པོ་དག་པ་ཅིག་མི་རོ་ལུ་ཧབ་འཐོབ་རྐྱབ་སྟེ་སྡོད་པའི་བར་ན་
རྒྱལ་སྲས་སྔགས་པའི་ཚུལ་སྦེ་ལུས་ལུ་ཐལཝ་བྱུགས་ སྟག་གཤམ་གྱོན་ཏེ་བྱོན་ནི།
|
||
དེ་སྒང་སྲིན་པོ་དེ་ཚུ་རྒྱལ་སྲས་ལུ་མཆོང་ས་མཆོང་ས་འབད་རུང་
མཆོང་མ་ནུམ་པར་ སོ་བསྡམ་མཆེ་བ་བཙིགས་ཏེ་ གདོང་ཁར་མཆོང་ རྒྱབ་བཤུད་རྐྱབ་ཅིག་ར་སྡོད་རུང་
རྒྱལ་སྲས་ལུ་ཡ་ང་ཐེ་ཚོམ་མེད་པར་ མཆོད་རྟེན་གྱི་གདོང་ཁར་བྱོན་ཞིནམ་ལས་ བསྒོམ་རྐྱབ་སྟེ་བཞུགས་ནི། དེ་ལས་དུས་ཡུན་ཨ་ཙི་ཅིག་ཁར་ལས་ རྒྱལ་སྲས་ཀྱིས་
སྲིན་པོ་དེ་ཚུ་ལུ་ ཕྱག་གིས་སྡིག་མཛུབ་མཛད་ སྤྱན་གྱིས་འབུར་ཚུགས་གཟིགས་ཞིནམ་ལས་གསུངས་ནི།
|
|||
རྒྱལ་སྲས།
|
ང་ཆོས་ཉིད་ཀྱི་དོན་རྟོགས་
མཆོག་གི་དངོས་གྲུབ་ཐོབ་ཚརཝ་ཨིནམ་ལས་ འདྲེ་དང་སྲིན་པོ་གིས་ང་ལུ་གླག་མི་འཁེལ། དེ་བ་འདི་
ངེད་ཀྱི་བཀའ་ལུ་ཉོན་ཤིག།
|
||
དེ་ལས་སྲིན་པོ་དེ་ཚུ་
གཅིག་གིས་གཅིག་ལུ་བལྟ་ཡི་ར་ གོ་ལེ་གོ་ལེ་སྦེ་ རྒྱལ་སྲས་ཀྱི་གདོང་ཁར་འགྱོ་ཞིནམ་ལས་སྤུས་མོ་བཙུགས་ཏེ་སྡོད་ནི།
|
|||
རྒྱལ་སྲས།
|
ཁྱོད་ཆ་ཁྱབ་
ཚེ་ཧེ་མ་ མ་རུངས་སྡུག་པའི་ལས་ངན་བསགསཔ་ལས་བརྟེན་ཏེ་ ད་ལྟོ་ཤ་ཟ་སྲིན་པོའི་ལུས་ལུ་སྐྱེས། ཚེ་འདི་ལུ་ཡང་ འགྲོ་བ་སེམས་ཅན་ལུ་ཕན་པའི་ལཱ་ཟེར་མི་འདི་
ཏིལ་འབྲུ་ཙམ་ཅིག་ཡང་མི་འབད་བའི་ཁར་ ཤ་ཟ་ཁྲག་མཐུང་གི་ལཱ་འདི་རང་འབད་བ་ཅིན། གནག་ས་ལས་གནག་ས་འགྱོ་ནི་མ་གཏོགས་
ངན་སོང་གསུམ་གྱི་གནས་ལས་ཐར་བའི་གོ་སྐབས་ནམ་ཡང་མེད། དེ་བ་འདི་ སེམས་ཅན་ཐམས་ཅད་སྡུག་བསྔལ་མ་དགོ་མི་དང་།
བདེ་བ་དགོ་མི་ཙང་ཙ་ཨིནམ་ལས་ གཞན་གྱི་སྲོག་ལུ་གནོད་པའི་ལཱ་འདི་སྤངས་ཞིནམ་ལས་ གཅིག་གིས་གཅིག་ལུ་བྱམས་སེམས་བསྒོམ།
དཀར་པོ་དགེ་བའི་ལཱ་ལུ་བརྩོན་ཤིག གལ་ཏེ་ངའི་བཀའ་ལས་བརྒལ་ན་ སྐད་ཅིག་གཅིག་ལུ་རང་ ཁྱོད་ཆ་ཁྱབ་ཀྱི་ཁ་ལས་ཁྲག་སྐྱུགས།
ལུས་ཐལ་བར་བརླགས་ཏེ་ དམྱལ་མནར་མེད་ཀྱི་གནས་ལུ་གཏང་ནི་ཨིན་སྨ་རེ།
|
||
སྲིན་པོ་ཚུ་གིས།
|
ཕྱིན་ཆད་རང་གི་སྲོག་ལུ་འབབ་རུང་
སྡིག་པའི་ལཱ་ཚུ་སྤངས་ཞིནམ་ལས་ རྡོ་རྗེ་སློབ་དཔོན་མཆོག་གིས་ ཅི་གསུངས་བཀའ་བཞིན་ཞུ་ནི་ཨིན་ལགས།
|
||
དེ་ལས་ཡོལ་ལི་བསྡམས་ཏེ་མཇུག་བསྡུ་ནི།
|
|||
རྒྱབ་ཁའི་མཐོང་སྣང་།
|
ལོ་རྟགས་བཅུ་གཉིས་དང་
གཟའ་སྐར་ཡོད་པའི་པར་གཅིག་བཞག་ནི།
|
|
མཐོང་སྣང་།
|
གདོང་ཁ་ལུ་
དྲང་སྲོང་སྲིད་སྒྲུབ་༼རྒྱ་གར་པཎྜི་ཏའི་ཚུལ༽ས་གཞོང་ནང་ལུ་ས་རིས་བསྒྱུར་ཏེ་བཞུགས་ནི།
རྒྱལ་སྲས་སླར་ཡང་ རྣལ་འབྱོར་པའི་ཚུལ་སྦེ་བྱོན་ཞིནམ་ལས་སློབ་དཔོན་ལུ་ཞུ་ནི།
|
|
རྒྱལ་སྲས།
|
སློབ་དཔོན་རིན་པོ་ཆེ༑ འཇིག་རྟེན་སྲིད་པའི་རི་མོ་ རང་གི་ཕང་མ་ལས་ཤར་ཚུགས་པའི་
རྩིས་ཀྱི་རིག་པ་དེ་ཚུ་ཞུ་བར་བཅར་ཡི་ལགས། སློབ་དཔོན་རིན་པོ་ཆེ་གིས་ ཐུགས་རྗེའི་སྤྱན་གྱིས་གཟིགས་ཏེ་
ང་ལུ་གསུངས་གནང་ལགས།
|
|
སློབ་དཔོན།
|
ཡ་
རྩ་བར་སྡོད་ཤིག མ་གཞི་རྒྱ་གར་གྱི་ལུགས་སྲོལ་ལས་འབད་བ་ཅིན་ རང་སློབ་མ་ཅིག་ཨིནམ་ལས་
དང་པ་རང་སློབ་དཔོན་གྱི་ཞབས་ཏོག་སྒྲུབ་སྟེ་ཐུགས་ཀྱི་རེ་བ་བསྐང་དགོ། སློབ་དཔོན་གྱི་ཐུགས་ཀྱི་རེ་བ་ཆ་ཚང་མ་བསྐང་པར་
ཤེས་བྱ་རིག་པའི་གནས་དེ་ཚུ་ལྷབ་ནི་ཨིན་ཟེར་སླབ་པར་འཇམ་ཏོང་ཏོ་ཅིག་མེད། དེ་གི་ནང་ལས་ཡང་
རྩིས་ཀྱི་རིག་པ་དེ་ཚུ་ གསང་རྒྱ་འབད་དགོཔ་ལེ་ཤ་ཡོདཔ་ལས་ སློབ་དཔོན་དེ་ཚུ་གིས་ཐ་ན་རང་གི་བུ་ལུ་ཡང་
སྟོན་བྱིན་པར་ལཱ་ཁག་ཡོད། ཨིན་རུང་ ང་གིས་བལྟཝ་ད་ ཁྱོད་མི་གཞན་དང་མ་འདྲཝ་ཅིག་དང་ ཁྱོད་ལུ་སྐྱེས་བུ་དམ་པའི་མཚན་ཉིད་དེ་ཚུ་ལེ་ཤ་ར་ཚང་སྟེ་འདུག
དེ་གིས་མ་ཚད་ རྩིས་ཀྱི་རིག་པ་དེ་ཁྱོད་ལུ་སྟོན་ཏེ་བྱིན་པ་ཅིན་ མ་འོངས་པ་ན་སེམས་ཅན་ལུ་ཕན་ཐོག་འབྱུང་ནི་བཟུམ་ཅིག་འདུག
དེ་འབདཝ་ལས་ ངེད་ཀྱི་ཤེས་བྱ་དེ་ཚུ་མ་ཚངམ་མེད་པར་ག་ར་ཁྱོད་ལུ་སྟོན་ཏེ་བྱིན་ནི་ཨིན།
ཡ༑ རྩ་བར་སྡོད་ཤིག
|
|
དེ་ལས་རྒྱལ་སྲས་དྲང་སྲོང་གི་རྩ་བ་སྡོད་ནི།
|
||
སློབ་དཔོན།
|
རྩིས་ཀྱི་རིག་པ་དེ་ལུ་མ་འདྲཝ་ལེ་ཤ་ཡོད་རུང་
ཚུར་བསྡུ་བ་ཅིན་ སིདྡྷནྟ། ག་ཎིཏ། ཕ་ལི་ཏ་ཟེར་མི་གསུམ་ནང་ལུ་བསྡུ་ནི་ཨིན། དང་པ་སིདྡྷནྟ་ཟེར་མི་འདི་སྣོད་བཅུད་ཀྱི་འཇིག་རྟེན་གྲུབ་ཚུལ་དང་།
ད་ལྟོ་ག་དེ་སྦེ་གནས་ཏེ་ཡོད་པའི་སྐོར་ལས་བཤདཔ་ཨིན། དེ་གི་ན་ལས་ཁག་ཆེ་ཤོས་ར་ རྒྱུ་སྐར་ཉི་ཤུ་རྩ་བདུན་དང་།
གཟའ་བདུན་དེ་ཚུ་ག་དེ་སྦེ་གནས་ཏེ་ཡོདཔ་ཨིན་ན་གི་སྐོར་དེ་ཨིན། དེ་ལས་ག་ཎི་ཏ་ཟེར་མི་འདི་
གཟའ་སྐར་གྱི་གནས་སྟངས་དེ་ཚུ་ས་རིས་ཨང་རྩིས་ཀྱི་ཐོག་ལུ་བསྟན་ལ་ཕབ་ཏེ་ ཉིནམ་རེ་རེ་གི་གཟའ་སྐར་དང་
དུས་སྦྱོར་སྟོན་མི་དེ་ཚུ་ཨིན། དེ་ལས་ཕ་ལི་ཏ་ཟེར་མི་འདི་ ཨང་རྩིས་ཀྱི་ཐོག་ལས་བསྟན་ལ་ཕབ་མི་དེ་ལུ་བལྟ་ཞིནམ་ལས་
སྣོད་ཀྱི་འཇིག་རྟེན་དང་བཅུད་ཀྱི་སེམས་ཅན་ལུ་ བདེ་སྡུག་ག་ཅི་འབྱུང་ནི་ཨིན་ན་སྟོན་མི་དེ་ཚུ་ཨིན།
དེ་ལས་དབྱངས་འཆར་གྱི་རྩིས་དེ་ ཕ་ལི་ཏ་གི་ཁོངས་སུ་གཏོགས་མི་ཅིག་ཨིན་རུང་ དེ་ནང་ རང་གི་བསྟན་པ་བསྲུང་ནི་གི་དོན་ལུ་
ཕ་རོལ་དགྲ་བོ་བཅོམ་ནི་གི་རྩིས་ཀྱི་རིག་པ་ལེ་ཤ་ཡོདཔ་ལས་ དེ་ཚུ་བསམ་པ་ངན་པའི་སློབ་མ་ཚུ་ལས་གསང་སྟེ་རྣ་བ་བཞི་ལྡན་སྦེ་བཞག་དགོཔ་ཨིན། རྣ་བ་བཞི་ལྡན་ཟེར་མི་དེ་ཡང་ བཤད་མི་སློབ་དཔོན་དེ་གི་རྣ་མཆོག་གཉིས་དང་།
བྱང་ཆུབ་ཀྱི་སེམས་དང་ལྡན་པའི་སློབ་མ་དེ་གི་རྣ་མཆོག་གཉིས་འབདཝ་ད་ བསྡོམས་ཏེ་རྣ་མཆོག་བཞི་ལས་བརྒལ་ཏེ་
གོ་མ་ཆོགཔ་ཨིནམ་ཁྱོད་ཀྱི་སེམས་ལུ་བཞག་གོ།
|
|
རྒྱལ་སྲས།
|
སློབ་དཔོན་རིན་པོ་ཆེ་ལགས༑
ནཱ་གིས་གསུངས་མི་འདི་ཚུ་ག་ར་ ངེད་ཀྱི་སེམས་ཁར་ངེས་ཅི་ལགས། དེ་ལས་ད་རུ་གཞན་ཡང་ འགྲོ་བ་སེམས་ཅན་གྱི་དོན་སྒྲུབ་ནི་དང་
རྗེས་སུ་བཟུང་ནི་གི་དོན་ལུ་ གསོ་བ་སྨན་གྱི་རིག་པ་དེ་ཡང་ སློབ་དཔོན་མཆོག་གིས་རང་སྟོན་ཏེ་བཀའ་དྲིན་བསྐྱང་གནང་ལགས།
|
|
སྲིད་སྒྲུབ།
|
མ་གཞི་ང་གིས་ཡང་
གསོ་བ་རིག་པ་ཨ་ཙི་རེ་ཤེས་ ཨིན་རུང་ ཁྱོད་ཀྱི་རིག་པ་དང་ དོན་གཉེར་དེ་དང་འཁྲིལ་བ་ཅིན་
ང་གིས་ཤེས་མི་དེ་གིས་ ཁྱོད་ཀྱི་བསམ་པའི་རེ་བ་རྫོགས་མི་ཚུགས་ནི་ཨིན་པས། དེ་བ་འདི་
གསོ་བ་རིག་པའི་གཞུང་ལུ་མཁསཔ་མ་ཚད་ ཕ་བརྒྱུད་བུ་བརྒྱུད་སྦེ་ གསོ་བ་རིག་པ་ལུ་ཉམས་ལེན་མཛད་མི་
གཡུས་པདྨ་ཅན་ལུ་ སྨན་པ་འཚོ་བྱེད་གཞོན་ནུའི་བུ་ངོ་མ་བཞུགས་ཏེ་ཡོད། ཁྱོད་ཀྱིས་འཚོ་བྱེད་གཞོན་ནུའི་བུ་བཞུགས་སར་སོང་སྨ་རེ།
|
|
རྒྱལ་སྲས།
|
ལགས་སོ།
སློབ་དཔོན་རིན་པོ་ཆེ་བཀའ་དྲིན་ཆེ་ལགས།
|
|
ཟེར་ཞུ་ཞིནམ་ལས་
བལ་གྱི་ཤ་ཝཱལ་དཀརཔ་ཅིག་ཕུལ་ནི་དང་། སློབ་དཔོན་གྱིས་དེ་མགུལ་ལུ་བཞེས་ཞིནམ་ལས་ ཕྱག་གིས་རྒྱལ་སྲས་ལུ་བྱམས་བྱམས་འབད་བའི་ཞོར་ཁར་གསུངས་ནི།
|
||
སྲིད་སྒྲུབ།
|
བུ་ཁྱོད་ཀྱིས་
ཤེས་བྱ་རིག་པའི་གནས་ག་ར་ལུ་སྦྱངས་བཙོན་འབད་དེ་ འགྲོ་བ་སེམས་ཅན་ལུ་ཕན་པའི་རེ་བ་དང་
སྨོན་ལམ་ང་ལས་ཡོད། ཡ་ ད་སོང་སྨ་རེ།
|
|
རྒྱལ་སྲས།
|
ལགས་སོ་ལགས།
|
|
ཟེར་ཞུ་ཞིནམ་ལས་
ཁོ་རའི་ཇཱོ་ལ་དེ་འབག་ཏེ་བྱོན་ཞིནམ་ལས་ཡོལ་ལི་བསྡམས་ནི།
|
||
རྒྱབ་ཁའི་མཐོང་སྣང་།
|
སངས་རྒྱས་སྨན་བླའི་སྐུ་པར་དང་ཅིག་བཞག་ནི།
|
|
ལས་རིམ།
|
ཟུར་ཁ་སྟེགས་རིངམ་ཅིག་གུར་སྔོ་སྨན་དང་སྨན་གྱི་ཤེལ་དམ་དག་པ་ཅིག་བཀྲམ་ཏེ་བཞག་ནི།
དེ་ལས་འཚོ་བྱེད་གཞོན་ནུའི་བུ་གོ་ལ་ཀུར་ཏ་དང་པ་ཡི་ཇ་མ་དཀར་སངས་ཅིག་བཞེས་ཏེ་ཁྲི་ཆུང་ཀུ་ཅིག་གུར་བཞུགས་ནི་དང་།
སློབ་མ་དག་པ་ཅིག་ཆོས་ཞུ་བར་འོང་པའི་ཚུལ་སྦེ་འོངས་ཏེ་རིམ་པ་བཞིན་དུ་རྩ་བར་སྡོད་ནི།
དེ་ལས་སློབ་མ་གཅིག་འོངས་ཞིནམ་ལས་སློབ་དཔོན་ལུ་ཞུ་ནི།
|
|
སློབ་མ།
|
སློབ་དཔོན་རིན་པོ་ཆེ་ལགས༑
ནུབ་བྱང་ཨོ་རྒྱན་གྱི་གཡུས་ཁ་ལས་འོངས་པའི་མི་གཅིག་ སློབ་དཔོན་མཇལ་བར་འཐོན་འོང་ནུག་ལགས།
|
|
འཚོ་བྱེད།
|
ག་ཅི་འབད་བར་ཨིན་ན་སྨོ།
ག་ཅི་ཨིན་རུང་ ནང་ན་ཤོག་ཟེར་སླབ།
|
|
སློབ་མ་དེ་ཕྱི་ཁར་འཐོན་ཞིནམ་ལས་
ནང་ན་རྒྱལ་སྲས་དང་ཅིག་ཁར་འཛུལ་ནི། སློབ་མ་དེ་ཟུར་ཁར་རྩ་བར་སྡོད་ནི་དང་། རྒྱལ་སྲས་ཀྱིས་
རྒྱ་གར་གྱི་ལུགས་སྲོལ་སྦེ་ སློབ་དཔོན་གྱི་ཞབས་ལུ་ཕྱག་གིས་གཏུགས་ཞིནམ་ལས་ འབུལ་བ་སྒྲོམ་ཆུང་གཅིག་ཕུལ།
སྤུས་མོ་ས་ཁར་བཙུགས་ ཕྱག་གཉིས་ཐལ་མོ་སྦྱར་ཏེ་ཞུ་ནི།
|
|
རྒྱལ་སྲས།
|
སློབ་དཔོན་རིན་པོ་ཆེ་གི་མཚན་གྱི་སྙན་གྲགས་རྒྱང་ལས་ཐོས་ཏེ་
ཉིནམ་གཅིག་གི་ཞག་དུས་ཡང་མ་ཐེག་པར་ ཉིན་མཚན་བཏུད་མར་འགྲོ་འགྲུལ་འབད་དེ་ སློབ་དཔོན་རིན་པོ་ཆེའི་ཞབས་སར་བཅར་བ་འོང་དགོ་མི་དེ་ཡང་
འགྲོ་བ་སེམས་ཅན་གྱི་དོན་ལུ་ གསོ་བ་རིག་པ་ཅིག་ལྷཔ་ནི་སྦེ་འོང་ཡི་ལགས། སློབ་དཔོན་མཆོག་གིས་ཐུགས་རྗེ་བཀའ་དྲིན་བསྐྱང་གནང་ལགས།
|
འཚོ་བྱེད།
|
ཡ་
དེ་སྦེ་ཨིན་པ་ཅིན་ བརྟེན་འབྲེལ་བཟང་ནུག ད་རེས་ང་ཡང་ སློབ་ཕྲུག་ཚུ་ལུ་ཡན་ལག་བརྒྱད་པའི་གཞུང་གི་བཤད་འཁྲིད་འབད་ཡི་བསྒང་ཨིན།
ཁྱེད་རང་ཡང་ཁོང་དང་ཅིག་ཁར་ཉན་པ་ཅིན་བཏུབ་སྦེ་མེན་ན།
|
རྒྱལ་སྲས།
|
ལགས་སོ་ལགས།
|
འཚོ་བྱེད།
|
ད་རེས་གནས་ལུགས་ནད་གཞི་གི་སྐོར་ལས་སྟོན་ནི་ཨིན།
དེ་ཡང་ང་བཅས་རའི་ལུས་ལུ་
ནད་དང་ལུས་ཟུངས་དྲི་མ་ཟེར་གསུམ་ཡོད། ནད་འདི་ལུ་རླུང་མཁྲིས་བད་ཀན་ཟེར་གསུམ་དང་། ལུས་ཟུངས་འདི་ལུ་
དྭངས་མ། ཤ ཁྲག ཚིལ་ལུ། རུ་ཏོ། རྐང་། ཁུ་བ་ཟེར་བདུན། དྲི་མ་འདི་ལུ་གཤང་། གཅི་བ། རྔུལ་ནག་ཟེར་རྣམ་པ་གསུམ་ཡོད།
མ་གཞི་རླུང་མཁྲིས་བད་ཀན་གསུམ་འདི་ནད་ཅིག་ཨིན་རུང་ དེ་ཚུ་ང་བཅས་རའི་ལུས་ལུ་དགོཔ་ཨིན།
དེ་ག་དེ་སྦེ་ཟེར་བ་ཅིན། རང་གི་ལུས་ལུ་རླུང་མཁྲིས་བད་ཀན་གསུམ་དེ་ཆ་མཉམ་འདྲན་འདྲ་སྦེ་ཡོད་པ་ཅིན།
བཞེས་དགོ་ག་ཅི་ཟ་རུང་ ཟས་ཀྱི་བཅུད་དེ་དྭངས་མ་ལུ་འགྱོ་ཞིནམ་ལས་ ཤ་ཁྲག་ཚིལ་ལུ་རྐང་དང་ཁུ་བ་དེ་ཚུ་རིམ་གྱིས་རྒྱས་ནི་དང་།
དེ་ལས་དྲི་མ་གཤང་གཅི་རྔུལ་ནག་དེ་ཚུ་ཡང་དུས་ཐོག་ལུ་བབས་ཏེ་ ལུས་སེམས་བདེ་ཏོག་ཏོ་སྦེ་སྡོད་ཚུགསཔ་ཨིན།
ད་
རླུང་མཁྲིས་བད་ཀན་གསུམ་པོ་ཆ་མཉམ་པར་ ཕྲལ་ཕྲལ་རླུང་འཕེལ། ཕྲལ་ཕྲལ་མཁྲིས་པ་རྒྱས། ཕྲལ་ཕྲལ་བད་ཀན་ལངས་ཏེ་འབད་བ་ཅིན།
དེ་ལས་ལུས་ཟུངས་ལུ་སྐྱོན་ཤོར། དེ་ལས་གཤང་གཅི་དུས་ལུ་མི་འབབ་པར་ ལུས་ལུ་ན་ཚ་འབྱུངམ་ཨིན།
ཡ་ད་རེས་བཤད་མཚམས་དེ་གུར་བཞག་ཞིནམ་ལས་
སྨན་རྫས་ཀྱི་ངོ་སྤྲོད་དུམ་དྲག་ཅིག་འབད་གེ།
|
དེ་ལས་སློབ་དཔོན་བཞེངས་ཏེ་བྱོན་ཞིནམ་ལས་
སྨན་རྫས་ཤེལ་དམ་རེ་རེ་སྦེ་འཐུ་ཏེ་གསུངས་ནི།
|
|
འཚོ་བྱེད།
|
སྨན་རྫས་འདི་ཚེ་འཕེལ་བདུད་རྩི་ཟེར་མི་འདི་ཨིན། སྨན་འདི་དྲོ་པ་ཁ་ལག་འཁྱུ་ཚརཝ་ད་
སྔགས། ཨོཾ་ཨ་མ་ར་ཎི་ཇཱི་ཝནྟི་སྭཱ་ཧཱ། ཟེར་མི་འདི་སྦྱངས་ཞིནམ་ལས་ཟ་བ་ཅིན་ ནད་གདོན་ཞི།
ལུས་སྟོབས་རྒྱས། ཚེ་ཡང་རིནམ་སྦེ་སྡོད་བཏུབ།
འ་ནི་ སྙིང་ནད་སྨན་ཇ་ཟེར་མི་འདི་ཨིན།
ཇ་འདི་འཐུང་པ་ཅིན་ ཁྲག་འགག་སྟེ་ཡོད་མི་དང་། དོན་ཧིང་ལུ་ཟུག་རྐྱབ་མི། སེམས་ལུ་དངངས་སྐྲག་སྐྱེས་མི།
སེམས་མ་བདེ་མི་དེ་ཚུ་ལུ་ཕན།
དེ་ལས་ཁྱེད་ཆ་ཁྱབ་རེ་རེ་གིས་ སྨན་རྫས་རེ་རེ་གདམ་ཁ་རྐྱབ་ཞིནམ་ལས་ དེ་ཚུ་ག་ཅི་ལུ་ཕནམ་ཨིན་ན་དང་། ག་ཅི་ལུ་གནོདཔ་ཨིན་ན་ཚུ་གི་སྐོར་ལས་ཞིབ་འཚོལ་འབད་དེ་འབྲི་འབག་ཤོག། |
དེ་ལས་ཁོང་ཆ་ཁྱབ་འགྱོཝ་ད་ཅིག་ཁར་ཡོལ་ལི་བསྡམས་ནི།
|
|
རྒྱབ་ཁའི་མཐོང་སྣང་།
|
ལྷ་མོ་དབྱངས་ཅན་མའི་པར་ཅིག་བཞག་ནི།
|
|
ལས་རིམ།
|
རྒྱབ་ཡོལ་ཡོད་པའི་ཁྲི་ཆུང་གཅིག་གུ་པཎྜི་ཏ་བཞུགས་ནི།
དེ་ལས་སློབ་མ་གཞན་དག་པ་ཅིག་དང་རྒྱལ་སྲས་ཡང་དེ་ཁར་བཞུགས་ཞིནམ་ལས་ ག་ར་གིས་དབྱངས་ཅན་མ་ལུ་བསྟོད་པ་ཕུལ་ནི།
|
|
དབྱངས་ཅན་མའི་བསྟོད་པ།
|
ཡཱ ཀུནྡེནདུཏུཤཱརཧཱར དྷབལཱ ཡཱ ཤུབྷྲབསྟྲཱབྲྀཏཱ།
ཡཱ བཱིཎཱབར དཎྜམཎྜིཏཀརཱ ཡཱ ཤྦེཏཔདྨཱསནཱ།
ཡཱ བྲཧྨཅཡུཏཤནྐརཔྲབྷྲྀཏིབྷིཿ དེབཻཿ སདཱ པཱུཇིཏཱ།
སཱ མཱཾ པཱཏུ སརསྦཏཱི བྷགབཏཱི ནིཿ ཤཻཤཿ ཇཱཌཡཱ
པཧཱ།།
|
|
བསྟོད་པ་མཇུག་བསྡུ་ཞིནམ་ལས་
སློབ་སྦྱོང་ངོ་མ་འགོ་བཙུགས་ནི།
|
||
པཎྜི་ཏ།
|
ལེགས་སྦྱར་གྱི་སྒྲ་མདོ་འདི་གི་ནང་དོན་བསྡུ་བ་ཅིན།
མིང་སྒྲུབ་ཚུལ་དང་། ཚིག་སྒྲུབ་ཚུལ་གཉིས་སྦེ་ཡོད། མིང་དེ་ཚུ་སྒྲུབ་ནི་ཨིན་པ་ཅིན་ རྩ་བའི་བྱིངས་ཟེར་
འགྲུབ་གཞིའི་ཚིག་ངོ་མ་དེ་ལུ་ ཕོའི་རྐྱེན་དང་མོའི་རྐྱེན། དེ་ཕན་གྱི་རྐྱེན་ལ་སོགས་པ་སྦྱར་ཏེ་བཟོ་ནི་ཨིན།
དེ་ལས་ཚིག་སྒྲུབ་ནི་ཨིན་པ་ཅིན། བྱིངས་ཀྱི་ཐ་མར་རྣམ་དབྱེ་སྦྱར་ཏེ་བཟོ་ནི་གཅིག་དང་།
བྱ་ཚིག་སྦྱར་ཏེ་བཟོ་ནི་ཁག་གཉིས་ཡོད། དེ་ལས་ད་རེས་རྣམ་དབྱེ་གི་སྐོར་ལས་ལྷབ་ནི་ཨིན།
ཡ
རྣམ་དབྱེ་དེ་ཚུ་རྗེས་ཟློས་འབད་དེ་སླབས་ཤིག
|
|
འོག་གི་རྣམ་དབྱེ་དེ་ཚུ་སློབ་དཔོན་གྱིས་གསུངས་ཞིནམ་ལས་
སློབ་མ་ཚུ་གིས་རྗེས་ཟློས་འབད་དེ་ལྷབ་ནི་ཨིན།
|
||
དེ་བཟུམ་སྦེ་རྣམ་དབྱེ་རེ་རེ་ལུ་རྐྱེན་གསུམ་གསུམ་རེ་འབདཝ་ད་
རྣམ་དབྱེའི་རྐྱེན་ཉི་ཤུ་རྩ་གཅིག་ཡོད་མི་དེ་ཚུ་ བློ་ལུ་བཟུང་སྟེ་ ནངས་པར་སྐྱོར་ནི་ཡོདཔ་སྦེ་འབད་དགོ་སྨྲ་རེ།
|
||
སློབ་མ་ཚུ་གིས།
|
ལགས་སོ་ལགས།
|
|
ཡོལ་ལི་བསྡམས་ནི།
|
||
རྒྱབ་ཁའི་མཐོང་སྣང་།
|
རྒྱ་གར་གྱི་རྩྭ་ཁྱིམ་ཆུང་ཀུ་གཅིག་གི་པར་བཞག་ནི།
|
||||
ལས་རིམ།
|
གདོང་ཁར་གཡུས་ཁ་གི་ཨམ་གཅིག་རྫམ་བཟོ་སྟེ་སྡོད་པའི་སྐབས་ལུ་རྒྱལ་སྲས་དེ་ན་བྱོན་ནི།
ཨམ་དེ་གི་བློ་སླབ་ཐངས་དེ་སྒྲ་མ་དྭགཔ་སྦེ་སླབ་ནི།
|
||||
རྒྱལ་སྲས།
|
དབའེ་ཨ་མ༑
ཁྱོད་ཀྱི་རྫམ་བཟོ་ཐངས་དེ་ ང་ལུ་ཡང་སྟོན་གནང་མས། ང་ཡང་ཁྱོད་བཟུམ་སྦེ་རྫམ་ཅིག་བཟོ་ནི་ཨིན་ས།
|
||||
ཨམ།
|
འོ་ལོ།
བལྟ་ཤིག སྐུ་གཟུགས་རྨ་བྱ་བཟུམ་ཅིག་གིས་ རྫམ་བཟོ་ནི་ལོ། རྫམ་བཟོ་ནི་མེན་པར་ ངའི་བུམོ་འདི་ལུ་རྫམ་ཅུ་རྐང་ལག་ཡོད་མི་ཅིག་བཟོ་ནི་འོང་།
|
||||
རྒྱལ་སྲས།
|
མེན།
ཨ་མ་མེན། ང་གིས་རྫམ་བཟོ་ནི་ལྷབ་ཞིནམ་ལས་ མི་གནགཔ་མཉམ་ཆུང་དེ་ཚུ་ལུ་སྟོན་ནི་སྦེ་ཨིན།
ཨ་མ། ཁྱོད་ཀྱིས་སྟོན་གནང་མས།
|
||||
ཨམ།
|
ཧིང་།
མ་གཞི་ཁྱོད་མི་གཞན་དང་མ་འདྲཝ་ཅིག་ཨིན་མས་ས། ལྷཔ་ནི་ར་ཨིན་པ་ཅིན་ ཨ་མ་གིས་སྟོན་བྱིན་གེ་ནོ།
ཤོག་ཤིག།
|
||||
རྒྱལ་སྲས།
|
རྫམ་བཟོ་ནི་གི་རྒྱུ་འདི་ལུ་མ་འདྲཝ་ག་དེ་སྦེ་ཡོད་ག།
དེ་ལས་བཟོ་ཐངས་ཀྱི་རིམ་པ་དེ་ཚུ་ག་དེ་སྦེ་ཨིན་ན་སྨོ།
|
||||
ཨམ།
|
རྫམ་གྱི་རྒྱུ་དེ་ལུ་
ས་དང་རྡོ། གསེར་དངུལ་ཟངས་ལྕགས་ ག་ཅི་གིས་ཡང་བཟོ་བཏུབ། དེ་ལས་བཟོ་ཐངས་དེ་རབ་བྱུང་པ་ཅིན་
རྡོ་དང་གསེར་དངུལ་ཟངས་ལྕགས་བཞུར་ཞིནམ་ལས་བླུགས་ཏེ་བཟོ་ནི། འབྲིང་ཨིན་པ་ཅིན་རྡོ་ལུ་པ་ཏྲ་བརྐོ་སྟེ་བཟོ་ནི་དང་།
ཐ་མ་ས་འདམ་ལས་བཟོ་ནི་དེ་ཨིན། ས་འདམ་དེ་ཡང་ དང་པ་རྩིས་ཡོད་པའི་ས་དམརཔ་བརྐམས་ཞིནམ་ལས་བརྡུངས།
དེ་ལས་བསྲིག་ཞིནམ་ལས་ འདམ་ ག་ལྷ་རན་ཏོ་ཏོ་སྦེ་སྦྱོར། དེ་ལས་འཁྲུལ་འཁོར་འདི་གུ་བཀལ་ཏེ་
བཟོ་བལྟ་ལགཔ་གིས་སྟོན་ནི་ཨིན་ལགས།
|
||||
དེམ་ཅིག་གི་བར་ན་དགེ་སློང་གཉིས་བྱོན་ནི།
|
|||||
རྒྱལ་སྲས།
|
བཙུན་པ༑
ག་ཏེ་ཕྱོགས་ལུ་བྱོན་ནི་ཨིན་ན་ལགས།
|
||||
དགེ་སློང་།
|
ཚེ་དང་ལྡན་པ༑
ང་བཅས་གཉིས་བྲག་དམར་བྱ་སྐྱིབས་ཟེར་ས་ལུ་ གསང་སྔགས་ཀྱི་བདག་པོ་ སློབ་དཔོན་པྲ་བྷ་ཧསྟི་བཞུགས་ས་ལུ་ཆོས་ཅིག་ཞུ་བར་འགྱོ་ནི་ཨིན།
|
||||
རྒྱལ་སྲས།
|
ང་ཡང་ཧེ་མ་ལས་རང་
གསང་སྔགས་ཀྱི་ཆོས་ཅིག་ཞུ་ནི་གི་རེ་བ་སྦོམ་སྦེ་རང་ཡོདཔ་ཨིན། ང་ཡང་བཙུན་པ་ཁྱེད་གཉིས་དང་ཅིག་ཁར་
ཆོས་ཅིག་ཞུ་བར་འགྱོ་བ་ཅིན་བཏུབ་ག་སྨོ་ལགས།
|
||||
དགེ་སློང་།
|
འེང་།
ཀྲིག་ཀྲི་ཨིན་མས་སྟེ། ས་ཐག་རིང་ས་འགྱོ་དགོཔ་ལས་ང་བཅས་གཉིས་ལུ་ཡང་ཆ་རོགས་ཕན་ནི་ཨིན་མས།
འགྱོ་གེ་ འགྱོ་ཤིག
|
||||
རྒྱལ་སྲས་ཀྱིས་
ཨམ་དེ་ལུ་གཟིགས་ཞིནམ་ལས།
|
|||||
རྒྱལ་སྲས།
|
ཨ་མ༑
བཀའ་དྲིན་ཆེ། ཁྱོད་ལས་ལྷཔ་མི་ཡོན་ཏན་དེ་ཚུ་དང་ ཁྱོད་ཀྱི་ཐུགས་རྗེ་བཀའ་དྲིན་དེ་ཚུ་ངེད་ཀྱི་སེམས་ཁར་ར་བཞག་འོང་།
ཤུལ་ལས་མཇལ་གེ་སྨྲ་རེ།
|
||||
ཨ་མ།
|
འོ༑
འོ༑ འབྱོན་ཤིག་དེནི།
|
||||
དེ་ལས་རྒྱལ་སྲས་དེ་དགེ་སློང་གཉིས་དང་ཅིག་ཁར་བྱོན་པའི་ཤུལ་ལུ་
ཨམ་དེ་གིས་ཆིག་ལབ་རྐྱབ་ནི།
|
|||||
ཨ་མ།
|
དཔའོ་དབའེ༑
ངོ་མ་ཤེས་པའི་བུཚུ་བྱ་རིམ་དེ་ཚུ་ལུ་འདི་ བློ་གཏད་ནི་མེན་པས་སྨྲ་རེ། གདོང་ཁར་གཱ་འཕྱད་མི་དེ་
འབད་ནི་ཟེར་སྒྲེག་མཆིཝ་མས། བལྟ་ཤིག ད་ཅི་ར་རྫམ་བཟོ་ནི་ཟེར་ཞིནམ་ད་ དནི་གསང་སྔགས་ཀྱི་ཆོས་ཞུ་བར་འགྱོ་ཡི་ལོ།
ངེད་ཀྱི་བུམ་འདི་གིས་ཡང་
འཕྲལ་འཕྲལ་ར་ཆ་རོགས་ཨིན་ཟེར་ མི་ངོ་མ་ཤེསཔ་རེ་འཁྱིད་འོང་ནི་འདུག་ས། ད་ཚར་ཅིག་འཁྱིད་ཤོག་མས།
གཉིས་ཆ་ར་ང་གིས་ སྦུལ་བརྡུངམ་དེ་ར་བརྡུང་གེ་ནོ།
|
||||
དེ་ལས་ཁོང་གསུམ་ཕྱོགས་གཅིག་ལས་འཛུལ་ནི་དང་།
ཨམ་དེ་ཕྱོགས་གཅིག་ལས་འཛུལ་ཚར་བའི་ཤུལ་ལུ། ཕྱོགས་གཅིག་ལས་ སློབ་དཔོན་པྲ་བྷ་ཧསྟི་ གྲུབ་ཐོབ་པའི་ཆ་ལུགས་སྦེ་ཨང་ར་དང་བསྒོམ་ཐག་གྱོན་ཏེ་བྱོན་ཞིནམ་ལས་
བསྒོམ་ཐག་དཀྱིས་ཏེ་སེམས་དཔའི་དཀྱིལ་ཀྲུང་སྦེ་བཞུགས་ཚརཝ་ད་ རྒྱལ་སྲས་དང་དགེ་སློང་གསུམ་བྱོན་ནི།
|
|||||
དགེ་སློང་།
|
སློབ་དཔོན་རིན་པོ་ཆེ༑
ང་བཅས་གསུམ་པོ་ ད་རེས་རྡོ་རྗེ་སློབ་དཔོན་མཆོག་ལས་ ཚེ་གཅིག་ལུས་གཅིག་ལུ་རྒྱལ་བ་རྡོ་རྗེ་འཆང་གི་གོ་འཕང་འགྲུབ་ཚུགས་པའི་
གསང་སྔགས་ཀྱི་ཆོས་ཅིག་ཞུ་བར་བཅར་ཡི་ལགས། སློབ་དཔོན་མཆོག་གིས་རྗེས་སུ་གཟུང་དུ་གསོལ།
|
||||
དེ་ལས་ཁོང་གསུམ་པོ་རེ་རེ་གིས་འབུལ་བ་རེ་ཕུལ་ནི་དང་།
དེ་གི་ཤུལ་ལས་སློབ་དཔོན་ཁྲོ་བའི་ཐོག་ལས་ ཁོང་གསུམ་གྱི་རྐང་པ་ལས་མགོ་ཏོ་ཚུན་ཚོད་ སྤྱན་གྱིས་འབུར་ཚུགས་གཟིགས་ཞིནམ་ལས་གསུངས་ནི།
|
|||||
སློབ་དཔོན།
|
མ་གཞི་གསང་སྔགས་ཀྱི་སློབ་མ་ལུ་བརྟག་ཤིང་དཔྱད་དགོཔ་ལེ་ཤ་ཡོད།
ཨིན་རུང་ བལ་པོའི་སེ་འུ་མ་ཟོས་ཀྱང་། །ཁ་དོག་ཉིད་ལས་བྲོ་བ་ཤེས། ཟེར་དོ་བཟུམ་སྦེ་ ཁྱེད་གཉིས་རྟེན་དགེ་སློང་ཨིནམ་མ་ཚད་
གཅིག་དེནི་ བལྟ་བའི་སྒང་ལས་རང་ཡིན་ལུགས་ཚུལ་ལྡན་ཅིག་འདུག དེ་འབདཝ་ལས་ང་གིས་ཤེས་ཤེས་མཐོང་མཐོངམ་ཅིག་སྟོན་ཏེ་བྱིན་གེ།
གསང་སྔགས་ཀྱི་ལུང་མེད་པར་རྒྱུད་ཀྱི་གཞུང་ལྷག་མི་ཆོག དེ་བཟུམ་སྦེ་དབང་དང་རྗེས་གནང་མ་འཐོབ་པར་གསང་སྔགས་ཀྱི་ཉམས་ལེན་འབད་མི་ཆོག
དེ་འབདཝ་ལས་ ཁྱེད་གསུམ་ལུ་དང་པ་ར་བྱིས་པ་འཇུག་པ་ཐུན་མོང་གི་དབང་གནང་གེ། ཁྱེད་རང་ཚུ་དབང་གི་ཅ་ལ་སྒྲིག་ཤིག།
|
||||
དེ་ལས་ཁོང་གསུམ་དང་སློབ་མ་དག་པ་ཅིག་གིས་
ལྕོགས་སྒྲོམ་གཅིག་གུར་ མཆོད་གཏོར་ དུང་ཆོས་བསྒྲིགས། དེ་ལས་ལྕོགས་སྒྲོམ་གཅིག་བླ་མའི་གདོང་ཁར་བཀལ་ཞིནམ་ལས་
དེ་གུ་རྡོ་རྗེ་དྲིལ་བུ་བུམ་པ་བཅས་སྒྲིག་ཞིནམ་ལས་སློབ་མ་ཚུ་རྩ་བར་སྡོད་ནི་དང་། བླ་མའི་ཕྱག་ལུ་བུམ་པ་བསྣམས་སྟེ།
|
|||||
བླ་མ།
|
ཇི་ལྟར་བལྟམས་པ་ཙམ་གྱིས་ནི།
།ལྷ་རྣམས་ཀུན་གྱིས་འཁྲུས་གསོལ་ལྟར། །ལྷ་ཡི་ཆུ་ནི་དག་པ་ཡིས། །དེ་བཞིན་བདག་གིས་སྐུ་ཁྲུས་གསོལ།།
ཨོཾ་སརྦ་ཏ་ཐཱ་ག་ཏ་ཨ་བྷི་ཥེཀྟ་ས་མ་ཡ་ཤྲི་ཧཱུྃ། ཨོཾ་བཛྲ་སཏྭ་ས་མ་ཡ་སོགས་ཡིག་བརྒྱ་འདོན།
|
||||
བུམ་པ་ལྕོགས་སྒྲོམ་གུར་བཞག་
རྡོར་དྲིལ་བསྣམས་ཞིནམ་ལས་ རྡོ་རྗེ་སོར་བའི་ཕྱག་རྒྱ་དང་དྲིལ་བུ་དཀྲོགས་ཏེ་ཡིག་བརྒྱ་འདོན་ཏེ་དབང་བསྐུར་བའི་ཚུལ་མཛད་ནི་དང་།
དེ་ལས་རྡོར་དྲིལ་ལྕོགས་སྒྲོམ་གུར་བཞག་ནི།
|
|||||
བླ་མ།
|
གཙོ་བོས་ཇི་ལྟར་བཀའ་བསྩལ་པ།
།དེ་དག་ཐམས་ཅད་བདག་གིས་བགྱི།
|
||||
ཞེས་པའི་ཚིག་གཉིས་པོ་རྗེས་ཟློས་འབད་བཅུག་ནི།
|
|||||
བླ་མ།
|
ཡ་
ད་སྨིན་བྱེད་དབང་གི་རིམ་པ་དེ་ཚུ་ཚརཝ་མ་ཚད། རྫོགས་བྱེད་ལམ་གྱི་རིམ་ལས་ཡང་ ངན་སོང་སྦྱོང་བའི་རྒྱུད།
ཁྲོ་བོ་རྣམ་རྒྱལ་གྱི་རྒྱུད། ཡོ་ག་ཅཱརྱ་དང་། ལས་ཀྱི་རྟོགས་པའི་རྒྱུད་ལ་སོགས་པའི་རྒྱུད་དེ་ཚུ་གི་ཟབ་འཁྲིད་དང་ཉམས་ལེན་ཧ་ལམ་ཚང་སོངཔ་ལས་
ཁྱེད་ར་ཆ་ཁྱབ་ཀྱི་རྒྱུད་ལུ་ཡང་རྟོགས་པ་དགའ་རབས་སྐྱེས་ནུག ལྟ་བ་སྤྲོས་བྲལ་གྱི་ངང་ལས་མ་གཡོ་བར་གནས་ཚུགས་པ་ཅིན་བསྒོམ་པ་ཟེར་རུ་ལོགས་སུ་མེད།
ལྟ་བ་དང་བསྒོམ་པ་ཟུང་འཇུག་དེ་ལུ་གནས་པའི་ཚེ་ ཕྱིའི་འཇིག་རྟེན་གྱི་བསམ་ཚུལ་དང་མཐུན་པའི་བྱ་བ་སྤྱོད་ལམ་ཅིག་རང་བཞིན་གྱིས་འཐོན་ནི་ཡོད།
འ་ནི་ལུ་ཤུགས་འབྱུང་གི་སྤྱོད་པ་ཟེར་སླབ་ཨིན། རྟོགས་པ་ལྷ་དང་མཉམ་རུ་ སྤྱོད་པ་མི་དང་བསྟུན་དགོ།
ད་རྟོགས་པའི་རྒྱུན་སྐྱོང་ནི་མ་གཏོགས་ ང་དང་ཅིག་ཁར་སྡོད་དགོཔ་ཅིག་ཡང་མེདཔ་ལས་ རང་རང་སོ་སོའི་གནས་ལུ་ལོག་སྟེ་འགྲོ་བ་སེམས་ཅན་གྱི་དོན་མཛད་པར་སོང་སྨྲ་རེ།
|
||||
རྒྱལ་སྲས།
|
སངས་རྒྱས་བསྟན་པའི་གཞི་མ་འདི་དགེ་སློང་ལུ་ཐུགཔ་ཨིནམ་ལས་
ང་ དམ་པའི་ཆོས་འདུལ་བ་ལུ་རབ་ཏུ་བྱུང་ནི་ཨིན་ལགས། དེ་གི་སྡོམ་པ་ཅིག་ཡང་སློབ་དཔོན་མཆོག་གི་ར་གནང་སྟེ་བཀའ་དྲིན་བསྐྱང་གནང་ལགས།
|
||||
བླ་མ།
|
སངས་རྒྱས་བསྟན་པའི་དོན་ལུ་
རབ་ཏུ་བྱུང་ནི་འདི་ལེགས་ཤོམ་ཅིག་ཨིན་མས། དེ་འབདཝ་ད་ རབ་བྱུང་དང་དགེ་སློང་གི་སྡོམ་པ་དེ་ཚུ་ང་བཟུམ་གྱི་སྔགས་པ་གཅིག་ལས་ཞུ་ནི་མེན་པར།
ལུས་ལུ་ཆོས་གོས་རྣམ་གསུམ་བཞེས། རྒྱུད་ལུ་ལྔ་ཚན་ཉེར་གཅིག་གི་ཡོན་ཏན་ལྡན་པའི་མཁན་པོ་དང་ལས་ཀྱི་སློབ་དཔོན་ཚུ་ལས་ཞུ་དགོཔ་ཨིན།
སངས་རྒྱས་སྐུ་དངོས་ཀྱི་སློབ་མ་དང་སྤུན་ཆ་ཨིན་མི་གནས་བརྟན་ཀུན་དགའ་བོ་ད་ལྟོ་འཚོ་ཞིང་བཞེས་ཏེ་བཞུགས་ཡོད།
སྡོམ་པ་དེ་ཚུ་གནས་བརྟན་ཀུན་དགའ་བོ་ལས་ཞུ་སོང་སྨྲ་རེ།
|
||||
རྒྱལ་སྲས།
|
ལགས་སོ་ལགས།
བཀའ་དྲིན་ཆེ།
|
||||
ཡོལ་ལི་བསྡམས་ནི།
|
|||||
རྒྱབ་ཁའི་མཐོང་སྣང་།
|
རྒྱབ་ཁར་བྱག་གི་པར་གཅིག་བཞག་ནི།
|
|
ལས་རིམ།
|
དེ་གི་གདོང་ཁར་ལས་མར་དགེ་སློང་གཅིག་
ཆོས་རྣམ་གསུམ་དང་ལྷུང་བཟེད་མཁར་བསིལ་བསྣམས་ཏེ་བསོད་སྙོམས་ལུ་བྱོནམ་ད་རྒྱལ་སྲས་དང་མཇལ་ཕྲད་བྱུང་ནི།
|
|
རྒྱལ་སྲས།
|
བཙུན་པ༑
བཙུན་པ༑ གནས་བརྟན་ཀུན་དགའ་བོ་ག་ཏེ་ལུ་བཞུགསཔ་ཨིན་ན་ལགས།
|
|
དགེ་སློང་།
|
ཚེ་དང་ལྡན་པ༑
གནས་བརྟན་མཆོག་ དུས་ཅི་གི་དབྱར་གནས་འདི་ཨ་སུ་རའི་བྱག་ཕུག་འདི་ནང་བཞུགས་ནི་སྦེ་ནང་ལུ་བྱོན་ཏེ་ཡོད།
ཨིན་རུ་ད་ལྟོ་བསོད་སྙོམས་ལུ་བྱོན་སོངམ་འོང་། མ་གཞི་གནས་བརྟན་མཆོག་དང་མཇལ་ཏེ་ དོན་དག་ག་ཅི་བཟུམ་ཅིག་ཞུ་ནི་ཡོདཔ་ཨིན་ན་སྨོ།
|
|
རྒྱལ་སྲས།
|
འཁོར་བའི་བྱ་བ་སྤངས་ཏེ་
དམ་པའི་ཆོས་གཅིག་སྒྲུབ་ནི་དོན་ལུ་ གནས་བརྟན་མཆོག་ལས་དགེ་སློང་གི་སྡོམ་པ་ཅིག་ཞུ་ནི་སྦེ་ཨིན་ལགས།
|
|
དགེ་སློང་།
|
དེ་སྦེ་ཨིན་པ་ཅིན་
ཁྱེད་རང་གནས་སྐབས་ཅིག་དགེ་སློང་ཚུ་གི་ཕྱག་ཕྱིས་ཞུ་སྟེ་སྡོད། དེ་ལས་ནངས་པ་གནང་ཚེ་
ཚེས་བཅུ་ཐམ་ལུ་གནས་བརྟན་མཆོག་གིས་ ཉི་མ་གུང་པ་དང་། གཞན་ཡང་ཁོང་དགེ་ཚུལ་དག་པ་ཅིག་ལུ་
དགེ་སློང་གི་སྡོམ་པ་གནང་ནི་ཨིན་པས་ དེ་སྒང་གཅིག་ཁར་ཞུ་བ་ཅིན་བཏུབ་པས་མེན་ན།
|
|
རྒྱལ་སྲས།
|
ལགས་སོ་ལགས།
དེ་སྦེ་ཨིན་པ་ཅིན་ ང་ཡང་བསྒུགས་ཏེ་སྡོད་དགོ་ནི་ཨིན་མས་ལགས།
|
|
དགེ་སློང་།
|
ཇི་ཏེ་ར་ཧོ།
|
|
དེ་ལས་དགེ་སློང་བསོད་སྙོམས་ལུ་བྱོན་ནི་དང་།
རྒྱལ་སྲས་མཆོག་བྱག་ཕུག་གི་ཕྱོགས་ལུ་འགྱོ་བའི་བར་ན་ཡོལ་ལི་བསྡམས་ནི།
|
||
རྒྱབ་ཁའི་མཐོང་སྣང་།
|
རྒྱ་གར་གྱི་གཙུག་ལག་ཁང་ནང་གི་པར་ཅིག་བཞག་ནི།
|
||
ལས་རིམ།
|
གཡས་ཕྱོགས་ཀྱི་བཞུགས་ཁྲི་གུ་ལུ་སྟོན་པའི་སྐུ་འདྲ་དང་།
གཡོན་ཕྱོགས་ཀྱི་བཞུགས་ཁྲི་གུ་ལུ་གནས་བརྟན་ཀུན་དགའ་བོ་ཁྲི་ཁར་བཞུགས་ནི། མཁན་པོ་གི་ཟུར་ཁར་དགེ་སློང་གཉིས་༼ལས་ཀྱི་སློབ་དཔོན་དང་གསང་སྟེ་སྟོན་པའི་སློབ་དཔོན།༽
ཡར་བཞེངས་ཏེ་སྡོད་ནི། གྲལ་གཡས་དང་གཡོན་ལུ་དགེ་སློང་བཞི་བཞི་བཞུགས་ནི། དེ་ལས་རྒྱལ་སྲས་དང་
ཉི་མ་གུང་གཉིས་གཉིས་ཆོས་གོས་གྱོན་ཞིནམ་ལས་འཁྲབ་སྟེགས་ཁར་འོང་ནི།
|
||
ལས་ཀྱི་སློབ་དཔོན་བྱོན་ཞིནམ་ལས་
ཞལ་ཁོང་གཉིས་ལུ་ཞག་སྒོར་ཏེ་ ལག་པའི་ཕྱག་རྒྱ་དང་བཅས་པའི་སྒོ་ལས་གསུངས་ནི།
|
|||
ལས་ཀྱི་སློབ་དཔོན།
|
ཐོག་མར་སྟོན་པ་དང་
དེ་ནས་མཁན་པོ་ལ་ཕྱག་མཛད་པར་ཞུ།
|
||
ཁོང་གཉིས་ཀྱིས་སྟོན་པ་ལ་ཕྱག་གསུམ།
དེ་ལས་མཁན་པོ་ལུ་ཕྱག་གསུམ་འཚལ་ཏེ་མཁན་པོའི་སྐུ་མདུན་འགྱོ་ནི། དེ་ལས་མཁན་པོ་གིས་སྣམ་སྦྱར་ལྟབ་ཞིནམ་ལས་
ཁོང་གཉིས་ཀྱི་ཕྱག་ལྟག་གཡོན་པར་བཀལ་ནི། དེ་ལས་ཁོང་གཉིས་བསྔོཝ་ཞུ་དོ་བཟུམ་སྦེ་སྡོད་ཞིནམ་ལས་གསོལ་བ་བཏབ་ནི།
|
|||
ཁོང་གཉིས།
|
མཁན་པོ་འདུལ་བ་འཛིན་པ་དགོངས་སུ་གསོལ།
བདག་་་་་་་་་་་་་་༼རང་རང་སོ་སོའི་མིང་བཙུགས་ནི།
གཅིག་པདྨ་རྒྱལ་པོ། གཅིག་ཉི་མ་གུང་པ།༽ ཞེས་བྱ་བ།
དུས་འདི་ནས་བཟུང་སྟེ་ཇི་སྲིད་འཚོ་བའི་བར་དུ་ དགེ་སློང་དུ་གསོལ།
|
||
ཚིག་དེ་ཚར་གསུམ་ཞུ་བའི་ཐ་མར་མཁན་པོ་གིས་སེ་གོལ་དཀྲོགས་ཏེ་གསུངས་ནི།
|
|||
མཁན་པོ།
|
ཐབས་ཡིན་ནོ།
|
||
ཁོང་གཉིས།
|
ལེགས་སོ།
|
||
ལས་ཀྱི་སློབ་དཔོན་གྱིས་ཐུར་ཤིང་གཅིག་འབག་འོང་ཞིནམ་ལས་ཁོང་གཉིས་ལུ་གསུངས་ནི།
|
|||
ལས་སློབ།
|
དེ་རིང་ཉི་མ་བྱང་བགྲོད་དབྱར་ཟླ་ཡར་ངོའི་ཡར་ཚེས་བཅུ་
སྔ་དྲོ་སྐྱེས་བུ་གསུམ་དང་རྩ་བ་བཅུ་ལ་ ཁྱེད་གཉིས་དགེ་སློང་གི་སྡོམ་པ་ཐོབ་པ་ཡིན་ནོ།
|
||
ལས་སློབ་ཀྱིས་ཕྱག་གི་བརྡ་སྟོན་ཞིནམ་ལས་
ཁོང་གཉིས་རྩ་བར་སྡོད་བཅུག་ནི་དང་། དེ་གི་ཤུལ་ལས་མཁན་པོ་གིས་བསླབ་པ་བརྗོད་ནི།
|
|||
མཁན་པོ།
|
རྩ་བ་བཞི་དང་ལྷག་མ་བཅུ་གསུམ་དང་།
།སྤང་ལྟུང་སུམ་ཅུ་ལྟུང་བྱེད་དགུ་བཅུ་སྟེ། །སོར་བཤགས་བཞི་དང་ཉེས་བྱས་བརྒྱ་བཅུ་གཉིས།
།འདུལ་ཁྲིམས་ཉེས་བརྒྱ་ལྔ་བཅུ་རྩ་གསུམ་འདི། །མིག་གི་འབྲས་བཞིན་རྒྱུན་དུ་བསྲུང་བར་བྱའོ།།
|
||
ལས་སློབ་ཀྱིས་ཕྱག་བརྡ་སྟོན་ཞིནམ་ལས་མཁན་པོ་ལུ་ཕྱག་འཚལ་བཅུག་ནི་དང་
དེ་ལས་མཁན་པོ་གིས་ཁོང་གཉིས་ལུ་སྟོན་པའི་སྐུ་ཆུང་ཀུ་རེ་གནང་ནི། དེ་ལས་མཁན་པོ་མ་གཏོགས་གཞན་ག་ར་ཚར་ཅིག་ཕྱི་ཁར་འཐོན་ཞིནམ་ལས་
ལོག་སྟེ་རང་ནང་ནང་ན་འཛུལ་ཏེ་གྱལ་ཁར་ཆོས་ཞུ་བའི་ཚུལ་སྦེ་སྡོད་ནི།
|
|||
སུ་མི་ཏྲ།
|
སྟོན་པ་བཅོམ་ལྡན་འདས་ཀྱི་ཉེ་གནས་གཙོ་བོ་གཅིག་
གནས་བརྟན་ཆེན་པོ་ཁྱེད་རང་ཨིནམ་ལས་ སྟོན་པ་བཅོམ་ལྡན་འདས་ཀྱིས་ ས་གནས་ག་ཏེ་ལུ་ཆོས་ག་ཅི་བཟུམ་ཅིག་གསུངས་གསུངསམ་ཨིན་ན་དང་།
ཆོས་ཀྱི་རྣམ་གྲངས་དེ་ཚུ་ ཚད་སྦེ་འབད་བ་ཅིན་ མང་ཉུང་ག་དེམ་ཅིག་དེ་ཅི་གསུངས་ཡི་ག་ དེ་གི་སྐོར་ལས་ང་བཅས་ལུ་ཚར་ཅིག་གསུངས་ཏེ་བཀའ་དྲིན་བསྐྱང་གནང་ལགས།
|
||
ཀུན་དགའ་བོ།
|
སྟོན་པ་བཅོམ་ལྡན་འདས་ཀྱིས་འགྲོ་བ་རང་རང་སོ་སོའི་སྐད་ཀྱི་ཐོག་ལས་ཆོས་ཚུལ་མ་འདྲཝ་ལེ་ཤ་ར་གསུངས་ཡོདཔ་ལས་དེ་ཚུ་ག་ར་བསྡོམས་ད་
དེམ་ཅིག་ཡོད་ཟེར་བའི་ཚོད་དཔག་ང་གིས་འབད་མི་ཚུགས། ཨིན་རུང་དེ་ཚུ་ག་ར་གི་བསྡོམས་ཙམ་ཅིག་ཞུ་བ་ཅིན།
ཉོན་མོངས་འདོད་ཆགས་འདུལ་བའི་གཉེན་པོ་ལུ། །འདུལ་བའི་སྡེ་སྣོད་ཉི་ཁྲི་ཆིག་སྟོང་དང་།
།ཉོན་མོངས་ཞེ་སྡང་འདུལ་བའི་གཉེན་པོ་ལུ། །མདོ་སྡེའི་སྡེ་སྣོད་ཉི་ཁྲི་ཆིག་སྟོང་གསུངས།
།ཉོན་མོངས་གཏི་མུག་འདུལ་བའི་གཉེན་པོ་ལུ། །མངོན་པའི་སྡེ་སྣོད་ཉི་ཁྲི་ཆིག་སྟོང་དང་།
།དུག་གསུམ་ཆ་སྙོམས་འདུལ་བའི་གཉེན་པོ་ལུ། །གསང་སྔགས་སྡེ་སྣོད་ཉི་ཁྲི་ཆིག་སྟོང་གསུངས།།
དེ་ཡང་བཅུད་བསྡུ་སྟེ་སླབ་པ་ཅིན་ ཆོས་ཀྱི་ཕུང་པོ་བརྒྱད་ཁྲི་བཞི་སྟོང་ཟེར་མི་འདི་ཨིན།
སངས་རྒྱས་ཀྱི་ཆོས་ཚུལ་མ་འདྲཝ་ག་དེ་སྦེ་ཡོད་རུང་
དེ་ཚུ་གི་གྲལ་ཁ་ལས་གཙོ་བོ་དེ་ དམ་པའི་ཆོས་འདུལ་བ་དེ་ཨིན། དེ་ཨིན་དགོ་པའི་རྒྱུ་མཚན་འདི་ཡང་
འདུལ་བ་འཛིན་པའི་དགེ་སློང་བཞི་ཡན་ཆད་ཡོད་པ་ཅིན། སངས་རྒྱས་ཀྱི་བསྟན་པ་མ་ཉམས་པར་གནས་ཏེ་ཡོད་ཟེར་ཐག་བཅད་ཚུགས་ནི་དང་།
གལ་སྲིད་འདུལ་འཛིན་གྱི་དགེ་སློང་བཞི་མ་ལོངས་པ་ཅིན་ ཆོས་ཚུལ་མ་འདྲཝ་གཞན་ག་དེམ་ཅིག་ཡོད་རུང་
འཛམ་བུའི་གླིང་འདི་ན་སངས་རྒྱས་ཀྱི་བསྟན་པ་ཉམས་ཚརཝ་ཨིན། དེ་འབདཝ་ལས་ སངས་རྒྱས་ཀྱི་བསྟན་པ་ཡུན་རིང་དུ་གནས་དགོ་པ་ཅིན་
དགེ་སློང་དེ་ཚུ་གིས་དམ་པའི་ཆོས་འདུལ་བ་ལུ་ ཉམས་ལེན་ཚུལ་བཞིན་མཛད་དགོཔ་དང་། ཁྱིམ་བདག་མི་སེར་ཕོ་མོ་ཚུ་གིས་ཡང་
བསྟན་པའི་རྩ་བ་དགེ་འདུན་འདུས་པའི་སྡེ་ལུ་ གུས་ཞབས་དང་བརྩི་མཐོང་བསྐྱེད་དགོཔ་འདི་ཨིན།
|
||
ཟེར་བའི་བར་ན་ཡོལ་ལི་བསྡམས་ནི་ཨིན།
|
|||
༼མཐོང་སྣང་དྲུག་པ།
༽
ཟ་ཧོར་གྱི་རྒྱལ་པོ་གཙུག་ལག་འཛིན་དང་ལྷ་ལྕམ་མན་ད་ར་བ་ཆོས་ལ་བཀོད་པ།
རྒྱབ་ཁའི་མཐོང་སྣང་།
|
རྒྱ་གར་རྒྱལ་པོའི་ཕོ་བྲང་ནང་གི་མཐོང་སྣང་ཞིག་སྟོན་ནི།
|
||
ལས་རིམ།
|
གདོང་ཁ་བཞུགས་ཁྲི་བཤམས་པའི་གུ་ལུ་
ཟ་ཧོར་གྱི་རྒྱལ་པོ་གཙུག་ལག་འཛིན༼ཨིན་དྲ་བྷཱུ་ཏི༽ སྤྲོ་ཞུ་གྱོན་ཏེ་བཞུགས་པའི་གཡོན་ལུ་ཁྲི་ལྕམ་བཙུན་མོ་དང་
སྲས་མོ་མན་ད་ར་བ། དེ་ལས་མཐའ་འཁོར་ལུ་བློན་པོ་ཚུ་བཞུགས་ནི། དེ་ལས་རྒྱལ་པོའི་ཞལ་རས་བློན་པོ་ཚུ་ལུ་གཟིགས་ཞིནམ་ལས་གསུངས་ནི།
|
||
རྒྱལ་པོ།
|
དགྲ་མེདནི་གཉེན་འཚོལ་ཟེར་སླབ་མི་དེ་ཡང་
མ་བདེནམ་ཅིག་ག་ནི་ཡང་མིན་འདུག ངེད་ཀྱི་ཧིང་དང་འདྲ་བའི་སྲསམོ་མན་ད་ར་བ་འདི་ གཟུགས་བྱད་ངོ་རིས་གཞན་དང་མ་འདྲཝ་ཅིག་ཡོད་ནི་དེ་གིས་
ངེད་ཀྱི་དགྲ་བཟུམ་ཅིག་ལུ་འགྱུར་དོ། ད་ཕྱོགས་མཚམས་ཀྱི་རྒྱལ་སྲས་ལེ་ཤ་གཅིག་ར་ སྲས་མོ་མན་ད་ར་བ་དགོ་ནི་གི་དོན་ལུ་
འབུལ་བ་ལེ་ཤ་འབག་སྟེ་ན་ལུ་འཐོན་འོང་ཡི། མོ་ལུནི་ མོ་རང་ག་དགའ་མི་རྒྱལ་སྲས་གཅིག་གདམ་ཁ་རྐྱབ་སྟེ་སོང་ཟེར་
ང་གིས་ག་དེམ་ཅིག་སླབ་རུང་ མོ་གིས་རྣམ་ཅོ་གཡས་ལས་ཉན་རུང་གཡོན་ལས་བཏང་སྟེ་ཉན་རང་མ་བཏུབ།
ད་མོ་རང་གིས་གདམ་ཁ་མ་རྐྱབ་པ་ཅིན་ གདམ་ཁ་འདི་ ཁོང་རྒྱལ་སྲས་དེ་ཚུ་ལུ་རྐྱབ་བཅུག་ནི་ཨིན།
|
||
དེ་ལས་ཁྲི་ལྕམ་ལུ་གཟིགས་ཞིནམ་ལས་གསུངས་ནི།
|
|||
རྒྱལ་པོ།
|
དབའེ༑
ཁྲི་ལྕམ་བཙུན་མོ༑ ནད་མ་ཡོང་གོང་ལས་རིམ་གྲོ་དང་། ཆུ་མ་ཡོང་གོང་ལས་གཡུ་བ་ཟེར་དོ་བཟུམ་སྦེ་
གནས་ཚུལ་འདི་ཁྱོད་ལུ་ མདའི་རྣ་བར་དུག་སྦྱར་དེ་སྦྱར་དགོ་པས། ད་རེས་ལས་འགོ་བཟུང་ཏེ་
སྲས་མོ་མན་ད་ར་བ་ལུ་ བསྲུང་སྐྱོབ་འདི་ཚུ་སྒྲིང་སྒྲིང་སྦེ་བཙུགས་ཞིནམ་ལས་ མོ་ག་སྟེ་ལུ་ཡང་མ་གཏང་པར་
ཕོ་བྲང་ནང་ར་བསྡམ་སྟེ་བཞག་སྨྲ་རེ། བཤུལ་ལས་མཐོཝ་གནམ་ལུ་འཕུར་སོང་ཡི་ལོ། དམའཝ་ས་ལུ་འཛུལ་སོང་ཡི་ལོ་ཟེར་བའི་ལོ་རྒྱུས་འཐོན་ཏེ་
ཕྱོགས་ཀྱི་རྒྱལ་སྲས་དེ་ཚུ་ ང་བཅས་ལུ་དགྲ་སྦེ་ལངས་པ་ཅིན་ མན་ད་ར་བའི་སྐུ་ཚབ་སྦེ་ཁྱོད་རང་གཏང་ནི་ཨིན་སྨྲ་རེ།
|
||
ཁྲི་ལྕམ་བཙུན་མོ།
|
ལགས་སོ་ལགས།
བཀའ་བཞིན་ཞུ།
|
||
དེ་ལས་ག་ར་ཡར་བཞེངས་ཞིནམ་ལས་
རྒྱལ་བློན་དེ་ཚུ་བྱོན་ནི་དང་། ཁྲི་ལྕམ་དེ་ཁར་བཞུགས་ཏེ་ ལག་པ་གིས་ཏག་རྐྱབ་སྟེ་ཞབས་ཞུ་མ་དེ་ཚུ་བོ་ནི།
དེ་ལས་ཞབས་ཞུ་མ་དག་པ་ཅིག་ནང་ན་འཛུལ་ཞིནམ་ལས་ གྲལ་བསྒྲིགས་མགོ་བསྒུར་ཏེ་ཞུ་ནི།
|
|||
ཞབས་ཞུ་མ།
|
ཁྲི་ལྕམ་མཆོག༑
སྐུ་ཁམས་བཟང་།
|
||
ཁྲི་ལྕམ།
|
ན་ལུ་ཉན་ཤིག ད་རེས་ལས་ཁྱོད་ཆ་ཁྱབ་ ལྷ་ལྕམ་གྱི་ཕྱག་ཕྱིས་ཞུ་མི་སྦེ་བཞགཔ་ཨིནམ་ལས་
ལྷ་ལྕམ་ལུ་ཆ་རོགས་ག་ཅི་འབད་དགོཔ་ཡོད་རུང་ཁྱོད་ཆ་ཁྱབ་ཀྱིས་འབད་སྨྲ་རེ། དེ་འབདཝ་ད་
ལྷ་ལྕམ་སྒོ་ར་སྒོ་བརྒལ་ཏེ་ཕྱི་ཁར་གཏང་ནི་མེདཔ་དང་། ནང་ན་བཞུགས་ཏེ་འབད་རུང་ རང་སྲོག་བློས་གཏོང་གི་ཉེན་ཁ་རེ་ཡང་
འབྱུང་སྲིད་ནི་ཨིནམ་ལས་ ལྷ་ལྕམ་ག་ཏེ་བྱོན་རུང་ཁྱོད་ཆ་ཁྱབ་ཡང་ཕྱག་ཕྱིས་ཞུ་སྟེ་འགྱོ་དགོ་སྨྲ་རེ།
ག་དེམ་ཅིག་སྦེ་ ལྷ་ལྕམ་ལུ་ཉེན་ཁ་རེ་འབྱུང་སྟེ་འབད་བ་ཅིན་ ཁྱོད་ཆ་ཁྱབ་ཀྱི་ཉེས་པ་འདི་སྲོག་ཐོག་ལུ་ཨིན་སྨྲ་རེ།
གོ་ཡི་ག།
|
||
སྨྲ་རེ་ཚར་རེ་ལུ་
ཞབས་ཞུ་མ་ཚུ་གིས་ ལགས་སོ་རེ་རེ་ཞུ་ནི་དང་ ཐ་མ་ལུ་ གོ་ཡི་ལགས། ཟེར་ཞུ་ཚརཝ་ད་ ཁྲི་ལྕམ་བྱོན་ནི་ཨིན།
དེ་ལས་ལྷ་ལྕམ་གྱིས་དགའ་སྤྲོའི་རྣམ་འགྱུར་སྟོན་ཞིནམ་ལས་
གསུངས་ནི།
|
|||
ལྷ་ལྕམ།
|
ང་ལུ་ཆ་རོགས་གཅིག་མེད་པར་
སེམས་མ་དགའ་བར་སྡོད་སྡོདཔ་ཨིན་ས། ད་རེས་འབདནི་ ཆ་རོགས་འབྱོརཔ་འབྱོར་ཐོབ་སྟེ་སེམས་དགའ་ཡི།
ད་ ང་བཅས་ཆ་ཁྱབ་གཅིག་གིས་གཅིག་ལུ་ཆ་རོགས་འབད་ དགའ་སྤྲོ་བསྒྱུར་ཏེ་སྡོད་གེ་སྨྲ་རེ།
|
||
ཞབས་ཞུ་མ།
|
ལགས་སོ་ལགས།
ལྷ་ལྕམ་མཆོག་ བཀའ་དྲིན་ཆེ།
|
||
ལྷ་ལྕམ།
|
མ་གཞི་ཁྱོད་ཆ་ཁྱབ་ཕྱི་རུ་ཡང་
ང་དང་ཅིག་ཁར་ན་ལུ་སྡོད་དགོཔ་འོང་སྟེ་སྨོ། སྟེ་ ཅ་ལ་ཀ་ལེ་ ཅ་ལ་འབག་མ་འོང་སྦོ།
|
||
ཞབས་ཞུ་མ།
|
ང་བཅས་ཆ་ཁྱབ་
ན་ལུ་སྡོད་དགོཔ་ཨིནམ་མ་ཤེས་ལགས། དེ་འབད་ནི་དེ་གིས་ཅ་ལ་ཡང་ག་ནི་ཡང་འབག་མ་འོང་ལགས།
|
||
ལྷ་ལྕམ།
|
ན་ལུ་སྡོད་དགོ་སྟེ།
ཁྲི་ལྕམ་མཆོག་གི་བཀའ་ལས་བརྒལ་བ་ཅིན་ ཉེས་ཁྲིམས་ག་ཅི་ཨིན་ན་ཤེས་གོ་ཤིག
|
||
ཞབས་ཞུ་མ།
|
ཤེས་ལགས།
ལྷ་ལྕམ་མཆོག
|
||
ལྷ་ལྕམ།
|
ཨིན་ན་དེནི་བཏུབ་པས།
ཁྱོད་ར་ཆ་ཁྱབ་ཅ་ལ་ལེན་སོང་སྨྲ་རེ།
|
||
ཞབས་ཞུ་མ།
|
ལགས་སོ་ལགས།
|
||
དེ་ལས་ཁོང་ཆ་ཁྱབ་འགྱོ་ཚར་བའི་ཤུལ་ལུ་
ལྷ་ལྕམ་འདྲོག་པའི་རྣམ་འགྱུར་གྱི་ཐོག་ཕར་ཚུར་བལྟའི་ར་ བྱོག་སྟེ་བྱོན་ནི། དེ་གི་ཤུལ་ལས་ཞབས་ཞུ་མ་དེ་ཚུ་ལོག་སྟེ་འོངམ་ད་
ལྷ་ལྕམ་མེདཔ་ལས་ ཅ་སྡུག་འཐབ་ནི།
|
|||
ཞབས་ཞུ་མ།
|
ཡ་
ལྷ་ལྕམ་ག་སྟེ་བྱོན་སོངཔ་ཨིན་ན། བྱོག་སྟེ་བྱོན་སོངཔ་མེན་ན་སྨོ།
|
||
གཅིག་གིས།
|
ག་སྟེ་འགྱོ་བ།
སྒོ་ར་སྒོ་ཁ་ལསནི་ སྲུང་རྒྱབ་ཚུ་གིས་གཏང་མི་བཏུབ།
|
||
གཅིག་གིས།
|
གླེན་མགོམ་འདི་ཚུ་བལྟ་མས་
བྱོག་འགྱོཝ་ད་ སྒོ་ར་སྒོ་ཁ་ལས་འགྱོ་འོང་ཡ།
|
||
གཅིག་གིས།
|
སྟེ་
ག་སྟེ་ལས་འགྱོ་ནི།
|
||
གཅིག་གིས།
|
རྒྱབ་ཁ་ལས་
གསང་སྒོ་ཡོད་མེན་ན་སྟེ། འ་ནི་ལས་ཡར་སོངཔ་འོང་།
|
||
གཅིག་གིས།
|
ཝ་འེ༑
ཨིནམ་འོང་སྟེ་ ད་འབདནི་ བཀལ་ས་བཀལ་ཡི་སྦ། དབའེ༑ མགྱོགས་པར་འཚོལ་བ་འགྱོ་གེ་ས་ ང་བཅས་འབདནི་
ཤི་ནི་ལུ་འདྲོགཔ་ཨིན་སྨྲ་རེ། འགྱོ་འགྱོ།
|
||
དེ་ལས་ཁོང་ཆ་ཁྱབ་འགྱོ་ནི་དང་ཅིག་ཁར་ཡོལ་ལི་བསྡམས་ནི།
|
|||
རྒྱབ་ཁའི་མཐོང་སྣང་།
|
རི་ཐལ་གོག་རིལ་རིལ་གཅིག་གི་པར་བཞག་ནི།
|
||
ལས་རིམ།
|
ལྷ་ལྕམ་སྐྱ་ཤུབས་གྱོན་ཞིནམ་ལས་
སྐྱ་དེ་ཚུ་གཟིངས་སུ་ཅི་སྦེ་བྱོན་ནི་དང་ མོ་གི་ཤུལ་ལས་ ཞབས་ཞུ་མ་ སེམས་ཤོང་མ་ཟེར་མི་དེ་འོང་ནི།
|
||
སེམས་ཤོང་མ།
|
ལྷ་ལྕམ་རིན་པོ་ཆེ༑
ག་སྟེ་བྱོན་སོངཔ་སྨོ། ང་བཅས་ག་ར་ཁྱོད་འཚོལ་བའི་སྒང་ཨིན། ད་ཕོ་བྲང་ནང་ལོག་སྟེ་འབྱོན་གེ།
|
||
ལྷ་ལྕམ་གྱིས་
རྒྱན་ཆ་དེ་ཚུ་ཕུད། རྡོ་གིས་བརྡུང་སྟེ་བཅག་ཞིནམ་ལས་གནམ་ཁར་གཏོར་ ཕྱག་གཉིས་ཐལ་མོ་སྦྱར་ཏེ་གསུངས་ནི།
|
|||
ལྷ་ལྕམ།
|
བསླུ་མེད་དཀོན་མཆོག་གསུམ་ལ་སྐྱབས་སུ་མཆིས།
།འདི་བཟུམ་གྱོན་མི་ལུས་སུ་སྐྱེ་མ་བཅུག །བསམ་པ་འཇིག་རྟེན་ཆོས་བརྒྱད་དང་བྲལ་ཏེ། །རང་གི་བསམ་དོན་ཆོས་བཞིན་འགྲུབ་པར་ཤོག
|
||
སེམས་ཤོང་མ་གིས་
རྔུའི་རྔུའི་ར་ཞུ་ནི།
|
|||
སེམས་ཤོང་མ།
|
ལྷ་ལྕམ་རིན་པོ་ཆེ༑
ད་ལྟོ་ཚུན་ཚོད་བར་ན་ ཡབ་ཡུམ་གཉིས་ཀྱིས་རང་གི་སྲོག་ལས་ལྷགཔ་སྦེ་ ཁྱོད་ལུ་བྱམས་སྐྱོང་གི་ཐོག་ལས་གསོ་སྐྱོང་གནང་གནངམ་ཨིན།
ད་ཁྱོད་ཀྱིས་ཁོང་ཡབ་ཡུམ་གཉིས་ལུ་ ཚ་གྱང་དང་སྡུག་བསྔལ་དེ་སྦེ་བཀལ་མ་ད་ ག་དེ་སྦེ་ཨིན་རུང་
ད་རེས་ཚར་གཅིག་ཕོ་བྲང་ནང་ལོག་སྟེ་འབྱོན་གེ།
|
||
ལྷ་ལྕམ་གྱིས་
མགོ་གི་སྐྱ་ཡང་འབེལ། གདོང་ལུ་སེན་མོ་གིས་བཞར་ཞིནམ་ལས་ ཚིགཔ་ཟ་བའི་ཐོག་ལས་གསུངས་ནི།
|
|||
ལྷ་ལྕམ།
|
སེམས་ཤོང་མ༑
ང་ འཇིག་རྟེན་མིའི་གནམ་སྦེ་རྩ་ལས་མི་འགྱོ། ཁ་སྐོམ་པ་ཅིན་ཆུ་མཐུང། ལྟོཝ་བསྐྱེད་པ་ཅིན་ས་ཟ་སྦེ་སྡོད་དགོཔ་འཐོན་རུང་ཁྱད་མེད།
ད་ང་ ཕོ་བྲང་ནང་ལོག་སྟེ་མི་འགྱོ་སྨྲ་རེ། ད་ཁྱོད་རང་ལོག་སོང་སྦེ་ ཡབ་ཡུམ་གཉིས་ལུ་ཡང་དེ་སྦེ་ཞུ་ཤིག།
|
||
དེ་ལས་ཁོང་གཉིས་འགྱོ་ནི་དང་།
སེམས་ཤོང་མ་འཁྲབ་སྟེ་གུ་ལོག་སྟེ་འོང་ཞིནམ་ལས་ རྒྱལ་པོ་ཡབ་ཡུམ་ལུ་སྙན་གསན་ཞུ་ནི།
|
|||
སེམས་ཤོང་མ།
|
རྒྱལ་པོ་རིན་པོ་ཆེ༑
རྒྱལ་པོ་རིན་པོ་ཆེ༑ རྒྱལ་པོ་རིན་པོ་ཆེ༑
|
||
དེ་ལས་རྒྱལ་པོ་ཡབ་ཡུམ་གཉིས་དང་བློན་པོ་ཚུ་བྱོན་ཞིནམ་ལས་
ཐུགས་དངངས་སྐྲག་དང་ཚབ་ཚུབ་གྱི་ངང་ལས་གསུངས་ནི།
|
|||
རྒྱལ་པོ།
|
དབའེ༑
སེམས་ཤོང་མ༑ ག་ཅི་འབད་དྭཔ་སྨོ། ལྷ་ལྕམ་ལུ་གནས་ཚུལ་ཅིག་བྱུང་བྱུངམ་འདྲ་བས་མེན་ན། མགྱོགས་པར་སླབ་ཤིག
|
||
སེམས་ཤོང་མ།
|
ལྷ་ལྕམ།
ལྷ་ལྕམ། ལྷ་ལྕམ་མཆོག་གིས་ འཇིག་རྟེན་མིའི་གནམ་སྦེ་མི་འགྱོ་ཟེར་གསུངས་ཞིནམ་ལས་ མགོ་གི་སྐྱ་ཡང་འབེལ།
གདོང་སེན་མོ་གིས་ཧྲལ་སྦེ་ བྱོག་སྟེ་ཆོས་འབད་བར་བྱོན་སོང་ཡི་ལགས།
|
||
ཡུམ་དྲན་མེད་འགྱེལ་ནི་དང་།
ཡབ་ཐུགས་སྡུག་པའི་རྣམ་འགྱུར་གྱི་ཐོག་ལས་ཕྱག་བྱང་ལུ་བརྡབ་སྟེ་གསུངས་ནི།།
|
|||
རྒྱལ་པོ།
|
ངའི་བུ་མོ༑
ངའི་བུ་མོ༑
|
||
རྒྱལ་པོ་
ཕྱག་མཐིལ་བྱང་ལུ་སྦྱར་ དབུ་ཐོད་ཕྱག་གུ་བཀལ་ཞིནམ་ལས་ཐུག་སྡུག་པའི་ཚུལ་སྦེ་བཞུགས་པའི་བར་ན་
བློན་པ་གིས་སེམས་གསོ་སྦེ་ཞུ་ནི།
|
|||
བློན་པོ།
|
རྒྱལ་པོ་རིན་པོ་ཆེ༑
ང་གིས་བལྟ་བ་ཅིན་ དེ་སྦེ་ཐུགས་བརྡུང་སྟེ་བཞུགས་དགོཔ་ཅིག་མིན་འདུག་ལགས། མཚམས་ཚོད་དུས་ཀྱིས་རནི།
ས་དང་རྡོ་ཡང་སྦུག་ལས་གག་ ཟེར་བའི་དཔེ་བཟུམ་སྦེ་ ད་ལྷ་ལྕམ་ལུ་ཡང་དམ་པའི་ཆོས་ཀྱི་ལུང་བསྟན་བབས་བབས་བཟུམ་ཅིག་འདུག
དེ་འབདཝ་ལས་ མོ་ལུ་ཡང་ཆོས་ཀྱི་ལམ་བཀག་མ་རྐྱབ་པར་ ཆ་རོགས་མཛད་དེ་ ཆོས་རྣམ་དག་ཅིག་སྒྲུབ་ནི་ཡོདཔ་དང་།
རྒྱལ་སྲས་དེ་ཚུ་ལུ་ཡང་ གསོལ་རས་ཐུགས་མ་ཕམ་རེ་གནང་སྦེ་ རང་རང་སོ་སོའི་རྒྱལ་ཁབ་ནང་ལོག་སྟེ་གཏང་པ་ཅིན་དྲག་ནི་བཟུམ་ཅིག་འདུག་ལགས།
|
||
རྒྱལ་པོ།
|
ཨིན་པས།
བློན་པོ༑ ཁྱོད་ཀྱི་སླབ་མི་འདི་ལུ་ཡང་རྒྱུ་མཚན་ཅིག་འདུག ད་མོ་ལུ་སྡོམ་པ་ཅིག་ཞུ་བཅུག་དགོ་ནི་ཨིན་མས།
མཁན་པོ་ལེགས་ཤོམ་ཅིག་ག་དྲག་ག་སྨོ།
|
||
བློན་པོ།
|
ང་བཅས་རའི་ཟ་ཧོར་རྒྱལ་ཁབ་འདི་ན་ལུ་
མཁས་བཙུན་བཟང་གསུམ་དང་ལྡན་པའི་མཁན་ཆེན་བོ་དྷི་སཏྭ་བཞུགས་ཡོདཔ་ལས་ ཁོ་ལས་ཞུ་བ་ཅིན་དྲག་ནི་ཨིན་མས་ལགས།
|
||
རྒྱལ་པོ།
|
ཡ་
ཨིན་པས་ དེ་འབད་བ་ཅིན་ བློན་ཆེན་ཁྱོད་ཀྱིས་མཁན་ཆེན་གདན་འདྲེན་ཞུ་ཞིནམ་ལས་ མན་ད་ར་བ་ལུ་དགེ་བསྙེན་གྱི་སྡོམ་པ་ཞུ་བཅུག
དེ་ལས་མོ་རང་ཕོ་བྲང་གི་ཟུར་ཁ་གཅིག་ལུ་བཞག་ཞིནམ་ལས་ ཕྱག་ཕྱིས་ཞུ་མི་དག་པ་ཅིག་ཡང་བཞག་ད་
དེ་ལས་ཉེ་བར་མཁོ་བའི་ཆོས་ཀྱི་མཐུན་རྐྱེན་དེ་ཚུ་དང་ ཆ་རོགས་འབད་དགོཔ་དེ་ཚུ་ག་ར་ཕོ་བྲང་ནང་ལས་འབད་བཅུག་སྨྲ་རེ།
|
||
བློན་པོ།
|
ལགས་སོ་ལགས།
|
||
ཡོལ་ལི་བསྡམས་ནི།
|
|||
རྒྱབ་ཁའི་མཐོང་སྣང་།
|
ཁང་མིག་ཆུང་ཀུ་གཅིག་གི་པར་བཞག་ནི།
|
||
ལས་རིམ།
|
གདོང་ཁར་འཁྲག་སྟེགས་གུར་
ཟུར་གཅིག་ལུ་སྟོན་པའི་སྐུ་འདྲ་བཞུགས་པའི་མཆོད་གཤམ་ཆུང་ཀུ་གཅིག་དང་། དེའི་ཐད་ཀར་ཉལ་ཁྲི་གཅིག་གུར་
ལྷ་ལྕམ་དགེ་བསྙེན་མའི་ཚུལ་སྦེ་གོ་ལ་དཀརཔ་གྱོན་ཞིནམ་ལས་ ཏིང་ངེ་འཛིན་བསྒོམ་པའི་ཚུལ་སྦེ་བཞུགས་ནི།
དེ་ལས་གཡོགམ་དག་པ་ཅིག་འཐོན་ནི།
|
||
གཡོགམ།
|
ལྷ་ལྕམ་མཆོག༑
ཨ་རྟག་ར་བསྒོམ་གནང་སྟེ་བཞུགསཔ་ད་ ཐུགས་མི་བསྲུན་པས་ག་ ད་རེས་ཚར་གཅིག་ཁམས་གསང་བྱོན་གེ་མེན་ན་ལགས།
|
||
ལྷ་ལྕམ།
|
ཨིན་པས་སྟེ།
ཚར་གཅིག་བཤལ་ཏེ་འགྱོ་གེ། འགྱོ་ཤིག
|
||
རྒྱབ་ཁ་ལུ་མེ་ཏོག་ལྡུམ་རའི་པར་གཅིག་བཞག་ནི་དང་།
ལྷ་ལྕམ་གཡོག་མོ་དང་བཅས་པ་ལྡུམ་ར་ནང་བྱོནམ་ད་ རྒྱལ་སྲས་ལོག་སྟེ་ར་ རྒྱ་གར་རྒྱལ་པོའི་སྲས་ཀྱི་ཆ་ལུགས་སྦེ་
སྤྲིན་གྱི་སྦུག་ལས་ལྡུམ་ར་དེ་ན་བྱོན་ནི། དེ་ལས་ལྷ་ལྕམ་གྱིས་ རྒྱལ་སྲས་མཇལཝ་ཅི་ར་ཧ་ལས་ཏེ་
ག་ནི་ཡང་མ་ཞུ་བར་ཞལ་ལུ་བལྟ་སྟེ་ཨ་ཙི་ཅིག་སྡོད་ཞིནམ་ལས་དྲན་མེད་འགྱེལ་ནི། དེ་ལས་རྒྱལ་སྲས་མཆོག་
མོ་གི་གདོང་ཁར་བྱོན་ཞིནམ་ལས་གསུངས་ནི།
|
|||
རྒྱལ་སྲས།
|
སྲས་མོ༑
སྲས་མོ༑ ག་ཅི་འབད་དྭཔ་སྨོ། ཡར་བཞེངས་ཤིག ཡར་བཞེངས་ཤིག
|
||
དེ་ལས་སྲསམོ་ཡར་བཞེངས་ཞིནམ་ལས་
ཕྱག་གཉིས་ཐལ་མོ་སྦྱར་ཏེ་ རྒྱལ་སྲས་ལུ་ཞུ་ནི།
|
|||
ལྷ་ལྕམ།
|
ཐུགས་རྒྱུད་བྱམས་དང་སྙིང་རྗེའི་ལྕགས་ཀྱུ་གིས།
།འགྲོ་བ་འདྲེན་པའི་རྒྱལ་སྲས་སེམས་དཔའ་མཆོག །བདག་སོགས་འཁོར་བའི་འདམ་ལས་འདྲེན་པའི་ཕྱིར།
།བདག་གི་གནས་སུ་ཅིས་ཀྱང་འབྱོན་པར་ཞུ།།
|
||
རྒྱལ་སྲས་གདན་འདྲེན་ཞུ་སྟེ་
འཁྲབ་སྟེགས་ཀྱི་ཕྱོགས་གཅིག་ལས་འཛུལ་ཞིནམ་ལས་ རྒྱབ་ཁ་ལས་སྐོར་ར་རྐྱབ་སྟེ་ཕྱོགས་གཅིག་ལས་འཐོན་ནི།
དེ་སྒང་རྒྱབ་ཁར་ གོང་གི་ལྷ་ལྕམ་གཟིམ་ཅུ་ནང་གི་པར་དེ་བཞག་ནི་དང་། གདོང་ཁར་ཁྲི་གཅིག་རྐྱབ་ཞིནམ་ལས་
དེ་གུ་རྒྱལ་སྲས་བཞུགས། མོ་རང་བཞེངས་ཞིནམ་ལས་ རྒྱལ་སྲས་ཀྱིས་མ་གོཝ་སྦེ་གཡོག་མོ་ཚུ་ལུ་བཀོད་རྒྱ་གསུང་སྐད་ཆུང་ཀུ་སྦེ་གནང་ནི།
|
|||
ལྷ་ལྕམ།
|
དབའེ༑
ཆ་རོགས་ཚུ། ཕྱི་ཁ་ལས་བལྟ་ཞིནམ་ལས་ མི་རེ་འོང་པ་ཅིན་ ཁྲང་སྟེ་ནང་ན་མ་བཙུགས་པར་ དང་པ་ང་ལུ་ལན་ཅིག་བསྐྱལ་སྨྲ་རེ།
|
||
ཁོང་དག་པ་ཅིག་ཕྱི་ཁར་བཏང་།
གཅིག་མོ་རང་དང་ཅིག་ཁར་ རྒྱལ་སྲས་ཀྱི་སྐུ་མདུན་ལུ་སྤུས་མོ་བཙུགས་ཏེ་བཞུགས་ཞིནམ་ལས་གསོལ་བ་བཏབ་ནི།
|
|||
ཁོང་གཉིས།
|
ཆོས་རྔ་ཆེན་པོའི་སྒྲ་ཡིས་ནི།
།སྡུག་བསྔལ་སེམས་ཅན་མཐར་གྱིས་ཤོག བསྐལ་བ་བྱེ་བ་བསམ་ཡས་སུ། །ཆོས་སྟོན་མཛད་ཅིང་བཞུགས་འགྱུར་ཅིག།
|
||
ཡོལ་ལི་བསྡམས་ནི།
|
|||
ནོར་རྫིཔ་གཉིས་འཐོན་ནི།
|
||
ནོར་རྫིཔ་ཀུ་ཅུ།
|
དབའེ༑
ཁྱོད་ཀྱིས་མཐོང་ཅི་ག ལྷ་ལྕམ་འདི་ སྤྱང་ལོ་ཆོསཔ་གཅིག་དང་ཅིག་ཁར་ ཁྱིམ་གྱི་སྒོ་ཡང་བསྡམས་སྦེ་བཞུགས་ནུག་སྦ།
|
|
ནོར་རྫིཔ་སྤྱེ་ཐེར།
|
དབའེ༑
ཨཔ་ཀུ་ཅུ༑ གནམ་གྲུ་ལྡིརཝ་བཤོལ་ད། ཁྱོད་ཀྱི་ཁ་ལས་ནམ་རང་འབད་རུང་ མ་འཐུས་མ་རྐྱཝ་གཅིག་དང་
ཚར་ཁ་མ་ཚུད་པའི་ལོ་རྒྱུ་གཅིག་ལས་འཐོན་ནི་མེད། དེ་སྦེ་ཤོབ་མ་རྐྱབ།
|
|
ཀུ་ཅུ།
|
ཨའེ༑ ངའི་ཁ་གིས་ཤོབ་རྐྱབ་རུང་
མིག་ཏོ་གིས་ཤོབ་མི་རྐྱབ་པ་སྟེ། ང་གིས་མཐོང་ཅི་སི།
|
|
དེམ་ཅིག་གི་བར་བར་ན་བློན་པོ་བྱོན་ནི།
|
||
བློན་པོ།
|
དབའེ༑
སྦྱིན་འབྲས་ཨཔ་བསོད་མེད་པའི་མི་དེ་ཚུ་ ག་དེ་སྦེ་ལོ། ལོ་རྒྱུ་འདི་ག་སྟེ་ཡང་ཁྱབ་སོང་ནུག་ས་
སླབ་མི་འདི་ཁྱོད་འོང་ནི་མས་སྦ་སྟེ། ཁྱོད་ཀྱི་ཁུངས་ཅིག་བཀལ་ནི་ཡོད་ག་
འགྱོ་ཤིག་ཁྱོད་རང་རྒྱལ་པོའི་སྐུ་མདུན་ལུ།
|
|
བློན་པོ་གིས་
ཁོ་གི་ལྟག་ལྐོག་གུ་ཤེད་དེ་འགྱོ་ནི་དང་ དེའི་འཕྲོ་ལས་རྒྱལཔོ་བྱོནམ་དང་མཇལ་ཞིནམ་ལས་
བློན་པོ་གིས་ཞུ་ནི།
|
||
བློན་པོ།
|
རྒྱལ་པོ་རིན་པོ་ཆེ༑
དཀྲོགས་གཏམ་བཟོ་མི་དང་པ་དེ་རང་ སྦྱིན་འབྲས་ཨ་བསོད་མེད་པའི་མི་ཁོ་ཨིན་མས་ལགས།
|
|
དེ་གི་བར་ན་
སྐུ་འཁོར་ཚུ་ཡང་བྱོན་ནི་དང་ རྒྱལ་པོ་གིས་ནོར་རྫིཔ་དེ་ལུ་དགོངསམ་ཁྲེལ་སུ་ཅིག་སྦེ་གསུངས་ནི།
|
||
རྒྱལཔོ།
|
དབའེ༑
ཁྱོད་ཀྱིས་ལོ་རྒྱུ་དེ་མགོ་མཇུག་ཅིག་སྦྲགས་ནི་ཡོད་ག ཁྱོད་རང་འདྲོག་དགོཔ་ག་ནི་ཡང་མེད།
ཁྱོད་ཀྱི་ཧིང་སང་ས་སྦེ་སླབ་ནི་ཡོད་པ་ཅིན་ ཁྱོད་ལུ་གསོལ་རས་ཡང་ཡོད། མེདཔ་བཟུམ་ཅིག་འབད་ཅིན་འབདནི་
དཀྲོགས་གཏམ་བཟོ་ཡི་ཉེས་ཁྲིམས་འདི་ ག་ཅི་བཟུམ་ཅི་བཀལ་ནི་ཨིན་ན་ང་གིས་བལྟ་གེ།
|
|
ཀུ་ཅུ།
|
ཁ་ཙ་ང་
ནོར་འཚོ་སྟེ་སྡོདཔ་ད་ལྷ་ལྕམ་ཁམས་གསང་ལུ་བྱོན་དེས་ལགས། དེ་སྒང་ང་གིས་བལྟ་སྟེ་རང་སྡོདཔ་ད་
ལྷ་ལྕམ་སྤྱང་ལོ་དེ་མཐོངམ་ཅི་ར་དྲན་མེད་བརྒལ།
དེ་ལས་བཞེངསམ་ཅིག་ སག་སུག་ལེ་ཤ་ར་སླབ་ཞིནམ་ལས་ ཕོ་བྲང་ནང་འཁྱིད་དེ་ཡར་སོངམ་མ་ཚད།
ཕོ་བྲང་ནང་ལྷོདཔ་ད་ ཕྱག་ཞུ་མི་དེ་ཚུ་ཡང་ཕྱི་ཁར་སྟོན། ཁོང་ར་གཉིས་རྐྱངམ་ཅིག་སྒོ་བསྡམས་ཏེ་བཞུགས་ནུག་ལགས།
ཚར་ཅིག་གཟིགས་ཤིག་ལགས། གཅིག་འབདནི་ད་ལྟོ་ཡང་ ཁོ་ནང་ན་ཡོདཔ་འོང་ལགས།
|
|
རྒྱལ་པོ།
|
གཟིམ་དཔོན༑
ཁྱོད་ཀྱི་བལྟ་སོང་ཞིག ཡོད་པ་ཅིན་ཐགཔ་གིས་བསྡམས་ཞིནམ་ལས་འཁྱིད་ཤོག་སྨྲ་རེ།
|
|
གཟིམ་དཔོན་གྱིས་བལྟ་བར་འགྱོ་བའི་ཤུལ་ལུ་
རྒྱལཔོ་ཐུགས་དགོངསམ་ཁྲེལ་བའི་ཚུལ་སྦེ་ ཕར་ཚུར་བྱོན་ཏེ་བཞུགས་ནི་དང་། དེ་གི་བར་གཟིམ་དཔོན་གྱིས་ལོག་སྟེ་དགོངས་སྐོར་ཞུ་ནི།
|
||
གཟིམ་དཔོན།
|
རྒྱལ་པོ་རིན་པོ་ཆེ༑
ཡོད་ནི་འདུག་ལགས། དེ་འབདཝ་ད་ དགེ་སྦྱོང་འདི་ལུ་ སྐུའི་གཟི་བརྗིད་དང་། གསུང་གི་དབྱངས་སྙན་གཞན་དང་མ་འདྲཝ་ཅིག་ཡོདཔ་མ་ཚད་
ལྷ་ལྕམ་ལུ་ཆོས་གསུངས་ཏེ་བཞུགས་ནུག་ལགས། ལྷ་ལྕམ་གྱི་བླམ་ཨིནམ་འདྲ་བས་མནོ་སྟེ་ བཟུང་མ་ནུམ་པར་བཞག་དའི་ལགས།
རྒྱལ་པོ་མཆོག་གི་བཀའ་བསྔགས་ཡོད་པར་ཞུ།
|
|
རྒྱལ་པོ།
|
ག་དེ་སྦེ་ལོ།
ལས་རྒྱུ་འབྲས་མེད་པའི་སྤྱང་ལོ་འདི་ རྒྱལ་པོའི་སྲསམོ་གཅིག་ལུ་མགོ་སྐོར་རྐྱབ་ནུམ་པའི་ལཱ་དབའེ༑
གཟིམ་དཔོན༑ ཁོ་ཐགཔ་གིས་བསྡམས་ཞིནམ་ལས་མི་ཁྲོམ་འཛོམས་སར་སྟོན། དེ་ལས་མི་སེར་གུང་པ་རེ་རེ་ལས་ཏིལ་གྱི་མར་ཁུ་སྦོ་ཏལ་རེ་རེ་བསྡུས་ཞིནམ་ལས་
མར་ཁུ་བླུགས་ཏེ་མེ་གཏང་ད་སྨྲ་རེ། དེ་ལས་རྒྱལ་བརྒྱུད་ཀྱི་ཞབས་འདྲེན་ཞུ་མི་ ཁྲེལ་དང་ངོ་ཚ་མེད་པའི་ཁྱི་མོ་འདི་ཡང་
ས་དོང་ནང་བཙུགས་ཞིནམ་ལས་ ཁ་ལས་ཚེར་མ་བཀབ་ གནམ་ཧོནམ་ཟེར་མི་འདི་མཐོང་ནི་རང་མེདཔ་སྦེ་
བཙུགས་བཞག་ད་སྨྲ་རེ།
|
|
གཟིམ་དཔོན།
|
ལགས་སོ་ལགས།
|
|
དེ་ལས་རྒྱལ་པོ་ལོག་སྟེ་བྱོན་ཚར་བའི་ཤུལ་ལུ་
ཕྱོགས་གཅིག་ལས་རྒྱལ་སྲས་ཐགཔ་གིས་བསྡམས་ཏེ་འཁྱིད་འོང་ནི་དང་། མི་ཡང་ལེ་ཤ་འཛོམས་ཏེ་ལྟདམོ་བལྟ་བའི་ཤུལ་ལུ་
ཤིང་བརྩིགས། མི་དམངས་ཚུ་གིས་མར་ཁུ་བླུགས་ཏེ་མེ་མཆོད་ཕུལ་ནི། དུས་ཡུན་ཨ་ཙི་ཅིག་ལས་
མེ་ཆུང་ཀུ་འགྱོཝ་ད་ མི་དམངས་དེ་ཚུ་ལོག་སྟེ་འགྱོ་ཚར་བའི་ཤུལ་ལུ་ མཁའ་འགྲོ་སྡེ་ལྔ་བྱོན་
རླུང་གཡབ་གཡོབ་སྟེ་ སྐུ་གཟུགས་ཀྱི་རྡུལ་ཕྲན་དང་ རྣམ་ཤེས་བཀུག་པའི་ཚུལ་མཛད་པའི་བར་ན་ཡོལ་ལི་བསྡམས་ནི།
༼མེ་མཆོད་ཀྱི་རྣམ་པ་བཟོ་ཐངས། ཤིང་གི་མཐའ་སྐོར་ལུ་
ཀྲ་ཤོག་དམརཔ་མེ་རིའི་རྣམ་པ་སྦེ་བཏུབ་སྟེ་རྩཝ་ཤིང་ལུ་སྦྱར་ རྩེདམོ་མ་སྦྱར་བར་བཞག་ཞིནམ་ལས་
འོག་ལས་རླུང་འཁོར་གཏང་སྟེ་མེ་འབར་བའི་རྣམ་པ་སྟོན། དེ་ལས་དུ་པ་དེ་ཚུ་འཁྲུལ་ཆས་ཀྱིས་གཏང་ནི།༽
|
||
རྒྱབ་ཁའི་མཐོང་སྣང་།
|
མཚོ་པདྨའི་པར་བཞག་ནི།
|
|
ལས་རིམ།
|
འོག་ལུ་ཀྲ་ཤོག་དང་ཡང་ན་ཏིག་པགས་ཧོནམ་ཅིག་བཏིང་སྟེ་མཚོའི་རྣམ་པ་བཟོ་ནི།
དེ་གི་སྦུག་ལུ་མེ་ཏོག་པདྨའི་སྦུག་ལས་གུ་རུ་འཁྲུངས་པའི་ཚུལ་སྟོན། མཁའ་འགྲོ་སྡེ་ལྔ་གིས་ཁྲུས་གསོལ་འཕུལ་ཏེ་ལོག་བྱོན་ནི་དང་།
དེ་གི་ཤུལ་ལས་རྒྱལ་བློན་གཉིས་བྱོན་ཞིནམ་ལས་གུ་རུ་མཇལཝ་ད་ ཡིད་མ་ཆེས་པར་སྤྱན་ཕྱི་སྟེ་སྐོར་ར་རྐྱབ་ཅི་ར་གཟིགས་ནི།
|
|
གུ་རུ།
|
དུས་གསུམ་སངས་རྒྱས་ངོ་བོ་བླ་མ་ལ༔
གསོན་སྲེགས་བྱེད་པའི་སྡིག་རྒྱལ་བྱོན་ལགས་སམ༔ འཇིག་རྟེན་སླུ་བྱེད་ཆོས་ལ་རབ་ཆགས་ནས༔
དོན་མེད་ཁྲིམ་འཇུག་སྡིག་རྒྱལ་བྱོན་ལགས་སམ༔ མ་རིག་རྩ་བ་ཉོན་མོངས་དུག་ལྔ་ལ༔ འཕྲལ་ཕུགས་གནས་པའི་སྡིག་རྒྱལ་བྱོན་ལགས་སམ༔
འདུན་མའི་རྩ་བ་སེམས་ཅན་མགུ་བྱེད་ལ༔ མི་དགེས་རྒྱགས་པའི་རྒྱལ་བློན་བྱོན་ལགས་སམ༔
|
|
དེ་ལས་རྒྱལཔ་དྲན་མེད་འགྱེལ།
བློན་པོ་གིས་བཟུང་སྟེ་ཡར་ལྷོང་ཞིནམ་ལས་ ཁོང་གཉིས་ཀྱི་གུ་རུ་ལུ་ཕྱག་འཚལ་ཏེ་ཞུ་ནི།
|
||
རྒྱལ་བློན།
|
བདག་ཅག་མ་རིག་པའི་དབང་གིས་
བླ་མ་སངས་རྒྱས་དངོས་ཨིན་རུང་ངོ་ཤེས་པར་ གསོན་སྲེགས་ཕུལ་ཏེ་ཉེས་པ་སྦོམ་ར་བསགས་དའི་།
དེ་གི་བཤགས་པ་བཟུམ་ཅིག་སྦེ་ ངེད་ཀྱི་རྒྱལ་སྲིད་འདི་ག་ར་སྤྲུལ་པའི་སྐུ་ཁྱེད་ལུ་ཕུལ་ནི་ཨིནམ་ལས།
ཐུགས་ཀྱི་བཟོད་པ་བཞེས་ཏེ་ ས་ཧོར་རྒྱལ་ཁམས་ཀྱི་དོན་ལུ་ལོག་སྟེ་རང་ཕོ་བྲང་ནང་འབྱོན་གནང་ལགས།
|
|
དེ་གི་བར་ན་ལྷ་དང་ལྷམོ་དེ་ཚུ་ཡང་བྱོན་ཏེ་སྐོར་ར་རྐྱབ་ཞིནམ་ལས་བསྟོད་པ་ཕུལ་ནི།
|
||
ལྷ་དང་ལྷམོ།
|
མ་བཅོས་སྤྲོས་བྲལ་བླ་མ་ཆོས་ཀྱི་སྐུ།
།བདེ་ཆེན་ལོངས་སྤྱོད་བླ་མ་ཆོས་ཀྱི་རྗེ། །པད་སྡོང་ལས་བྱུང་བླ་མ་སྤྲུལ་པའི་སྐུ །སྐུ་གསུམ་རྡོ་རྗེ་འཆང་ལ་ཕྱག་འཚལ་བསྟོད།།
|
|
གུ་རུ།
|
རྒྱལ་པོ་གཙུག་ལག་འཛིན་པ་ཉོན་ཤིག
ངེད་ཀྱི་མཛད་པ་ནམ་མཁའ་དང་མཉམ་ནི་དེ་གིས་ དགའ་དང་མི་དགའི་རྣམ་གཞག་ང་ལུ་མེད། མ་ཟད་ངེད་ཀྱི་ལུས་འདི་ཤ་ཁྲག་ལས་གྲུབ་གྲུབ་མེན་པར་ཟག་མེད་ཀྱི་ཕུང་པོ་ཨིན་ནི་དེ་གིས་
མེ་གིས་ཡང་འཚིག་མི་ཚུགས། རྒྱལ་པོ་ཁྱོད་རང་འགྲོ་བ་མི་ཅིག་ཨིནམ་ལས་ལྷག་ཆད་ནོར་འཁྲུལ་འོང་སྲིད་དང་སྲིད།
ད་འགྲོ་བ་སེམས་ཅན་དེ་ཚུ་སངས་རྒྱས་ཀྱི་ལམ་ལུ་བཀོད་ནི་གི་དོན་ལུ་ ཁྱེད་ཀྱི་བཀའ་ལུ་དྭང་ལེན་ཞུ་སྟེ་
ཁྱོད་ཀྱི་ཕོ་བྲང་ནང་འགྱོ་ནི་ཨིན་སྨྲ་རེ།
|
|
རྒྱལ་པོ།
|
སྐྱབས་སུ་མཆིས།
སྐྱབས་སུ་མཆིས།
|
|
དེ་ལས་གཟིམ་དཔོན་ལུ་གཟིགས་ཞིནམ་ལས་གསུངས་ནི།
|
||
རྒྱལ་པོ།
|
གཟིམ་དཔོན༑
ཁྱོད་ཕོ་བྲང་ནང་སོང་ཞིནམ་ལས་ ངེད་ཀྱི་དབུ་ཞྭ་དང་ནམ་བཟའ་ཟ་འོག་གི་བེར་ དར་དང་གོས་ཆེན་དེ་ཚུ་མགྱོགས་པར་འབག་ཤོག
དེ་ལས་ཕེབས་སུ་ཞུ་ནི་གི་བཅའ་སྒྲིག་དེ་ཚུ་ཡང་མ་བཏུབ་བཏུབ་སྦེ་རྐྱབ་སྨྲ་རེ།
|
|
གཟིམ་དཔོན།
|
ལགས་སོ་ལགས།
|
|
གཟིམ་དཔོན་གྱིས་
ཨོ་རྒྱན་པད་ཞྭ་དང་ན་བཟའ་ཟ་འོག་གི་བེར་དེ་ཚུ་ གུ་རུའི་སྐུ་ལུ་གསོལ། རྒྱལ་པོ་འཁོར་བཅས་ཀྱིས་གུ་རུ་གདན་འདྲེན་ཞུ་སྟེ་ཕོ་བྲང་ནང་བྱོན་ཏེ་ཡོལ་ལི་བསྡམས་ནི།
|
||
རྒྱབ་ཁའི་མཐོང་སྣང་།
|
རྒྱ་གར་རྒྱལ་པོའི་ཕོ་བྲང་ནང་འཁོད་ཀྱི་པར་ཅིག་བཞག་ནི།
|
|
ལས་རིམ།
|
རྒྱལ་པོའི་ཁྲི་ལུ་གུ་རུ་བཞུགས།
དེ་ལས་མཐའ་འཁོར་ལུ་ རྒྱལ་བློན་ཚུ་བཞུགས་ཏེ་གསོལ་ཇ་བཞེས་པའི་བར་ན་ ལྷ་ལྕམ་ཡང་བཙོན་དོང་ལས་བཏོན་ཏེ་
གུ་རུའི་སྐུ་མདུན་ལུ་ཕྱག་འཚལ་ཏེ་བཅར་ནི།
|
|
རྒྱལ་པོ།
|
དུས་གསུམ་སངས་རྒྱས་ཀྱི་སྤྲུལ་པ་
ཨོ་རྒྱན་གུ་རུ་རིན་པོ་ཆེ་ ནང་ལུ་བཞུགས་མི་འདི་ ང་བཅས་ཟ་ཧོར་རྒྱལ་ཁམས་ཀྱི་བསོད་བདེ་བསོད་ནམས་བཟུམ་ཅིག་ཨིན།
ད་ན་ལས་ཕར་མདོ་དང་སྔགས་ཀྱི་ཆོས་འཁོར་བསྐོར་ཏེ་ ང་མ་ཤི་ཚུན་ཚོད་ན་ལུ་ར་བཞུགས་གནང་ཟེར་ཞུ་ནི་ཨིན།
|
|
གུ་རུ།
|
ཁྱོད་རང་མ་བཤགས་ཚུན་ཚོད་དེ་སྡོད་ཚུགས་ག་མི་ཚུགས་མི་ཤེས།
དེ་འབདཝ་ད་ ཟ་ཧོར་གྱི་འགྲོ་བ་སེམས་ཅན་དེ་ཚུ་གི་སེམས་རྒྱུད་སྨིན་ཅིང་གྲོལ་བའི་ལམ་ལུ་
བཀོད་ཚར་ཚུན་ཚོད་ན་ལུ་སྡོད་འོང་།
|
|
རྒྱལ་བློན།
|
དེ་སྦེ་བཞུགས་པ་ཅིན་དེ་
ག་ནི་བ་བཀའ་དྲིན་ཆེ་བས་ལགས།
|
|
ཡོལ་ལི་བསྡམས་ནི།
|
||
༼མཐོང་སྣང་བདུན་པ།
༽
གུ་རུ་རིན་པོ་ཆེ་འབྲུག་ཡུལ་བུམ་ཐང་ལུ་ཕེབས་པའི་སྐོར།
རྒྱབ་ཁའི་མཐོང་སྣང་།
|
རྒྱལ་པོའི་གཟིམ་ཅུ་གི་སྒོ་ཅུ་ལས་ཕར་བུམ་ཐང་གི་ཆ་ཉམས་མཚོན་པའི་པར་གཅིག་སྟོན་ནི།
|
||
ལས་རིམ།
|
གདོང་ཁའི་ཁྲི་ལུ་རྒྱལ་པོ་སིན་དྷུ་རཱ་ཇ་ནད་པའི་ཚུལ་སྦེ་གཟིམ་ཏེ་བཞུགས་པའི་མཐའ་འཁོར་ལུ་
སྡོད་ཁྲི་གུར་སྐུ་འཁོར་ཚུ་མྱ་ངན་གིས་གདུངས་པའི་རྣམ་པ་སྟོན་ཏེ་སྡོད་པའི་སྐབས་ལུ་ རྒྱལཔོ་ཁོ་རང་གི་ཐུགས་ཁར་
ནད་ལས་དྲག་མི་ཚུགས་པའི་སྣང་བ་ཤར་ཏེ་ ལོ་རྒྱུས་ཀྱི་ཞལ་ཆེམས་ཐུགས་སྐྱོ་བའི་རྣམ་པ་སྟོན་ཏེ་གསུངས་ནི།
|
||
རྒྱལ་པོ།
|
ཡ༑
ང་བཅས་ཆ་ཁྱབ་རྒྱ་གར་སིན་དྷུ་རྒྱལ་ཁབ་ནང་ལས་ བྱོག་སྟེ་འོང་མི་ཅིག་ཨིན་རུང་ མོན་ཡུལ་བུམ་ཐང་འདི་ནང་གནས་གཞི་བཅའ་སྟེ་
རྒྱལ་ཁབ་ཀྱི་གཞི་རྟེན་ལེགས་ཤོམ་སྦེ་ཚུད་དེ་ཡོད། དེ་འབདཝ་ད་ རྒྱ་གར་མཐའ་འཁོརཔ་གྱི་རྒྱལཔོ་སྣ་བོ་ཆེ་འདི་གིས་
ང་བཅས་སྐྱིད་ཏོང་ཏོ་སྦེ་ནམ་ཡང་སྡོད་མ་སྟེརཝ་མ་ཚད་ ངེད་ཀྱི་བཙུན་མོ་ལོ་ཟ་ཀུན་སྐྱོང་གི་སྲས་སྟག་ལ་མེ་འབར་འདི་ཡང་
ལོ་ངོ་ཉི་ཤུ་དེ་ཅིག་ང་རང་གིས་གསོ་སྐྱོང་འབད་བའི་ཐ་མར་དམག་ནང་ལུ་དཀྲོངས་ད་ཡི་ས་གིན་
ད་ང་ཡང་ཡུན་རིངམ་སྦེ་སྡོད་ཚུགས་ཚུགས་འདྲཝ་ཅིག་མིན་འདུག ད་ངེད་ཀྱི་རྒྱལ་སྲིད་་་ རྒྱལ་སྲིད་འདི་་་་་
|
||
བློན་པོ།
|
རྒྱལ་པོ༑
རྒྱལ་པོ༑ ཐུགས་ཕམ་མ་གནང་ལགས། རྒྱལ་པོའི་བསྙུན་གཞི་འདི་ ལྷ་འདྲེ་གཞི་བདག་ཚུ་གི་བར་ཆད་བཟུམ་ཅིག་ཨིནམ་ལས་
སྔགས་པ་ནུས་མཐུ་ཅན་ཅིག་གདན་འདྲེན་ཞུ་སྟེ་འབད་བ་ཅིན་ བརྟན་བརྟན་བསྙུན་གཞི་ལས་དྲག་བསྐྱེད་འབྱུང་ཚུགསཔ་འོང་ལགས།
|
||
རྒྱལ་པོ།
|
ཨིན་ན་སྟེ།
ཁྱོད་ཀྱི་ཐབས་ཤེས་ཅིག་སྟོན་ཏེ་ ང་ནད་གཞི་འདི་ལས་དྲག་ཚུགསཔ་བཟུམ་ཅིག་འབད་བ་ཅིན་ སིན་དྷུ་རྒྱལ་པོའི་རྒྱལ་བརྒྱུད་མི་ཆད་པར་གནས་ནི་དང་།
ང་བཅས་ཀྱི་རྒྱལ་ཁབ་འདི་ཡང་ཡུན་དུ་གནས་པའི་རེ་བ་གཅིག་ཡང་ཡོད་ནི་མས། ཡ༑ བློན་པོ༑ ཁྱོད་ཀྱིས་ཐབས་ཤེས་ཅིག་སྟོན་སྨྲ་རེ།
|
||
དེ་ལས་བློན་པ་གིས་
ཞལ་མདུན་ཕྱོགས་ལུ་བསྒྱུར་ཏེ་བཀའ་གནང་ནི།
|
|||
བློན་པོ།
|
དབའེ༑
གཟིམ་དཔོན༑ རྐང་མགྱོགས་ཀྱི་ནུས་པ་ཡོད་མི་ རྣལ་འབྱོར་པ་རླུང་གི་འཁོར་ལོ་དེ་ དགོན་པ་སྐུ་མཚམས་ནང་བཞུགས་སྟེ་ཡོདཔ་འོང་ནི་མས་
ཁྱོད་ཀྱིས་ཁོ་གདན་འདྲེན་ཞུ་སོང་སྨྲ་རེ།
|
||
གཟིམས་དཔོན།
|
ལགས་སོ་ལགས།
|
||
གཟིམ་དཔོན་བྱོན་པའི་ཤུལ་ལུ་ཁོང་ཆ་ཁྱབ་རྒྱལ་པོའི་མཐའ་སྐོར་ཏེ་མྱང་ངན་གྱིས་གདུང་པའི་རྣམ་པ་སྟོན་ཏེ་སྡོད་ནི་དང་།
དེམ་ཅིག་བར་ན་ གཟིམ་དཔོན་ལོག་སྟེ་བྱོན་ཞིནམ་ལས་ཞུ་ནི།
|
|||
གཟིམ་དཔོན།
|
བློན་པོ་རིན་པོ་ཆེ༑
རྣལ་འབྱོར་པ་རླུང་གི་འཁོར་ལོ་ ཞབས་སར་བཅར་བར་འཐོན་འོང་ཡི་ལགས།
|
||
བློན་པོ།
|
ནང་ན་འབྱོན་ཟེར་ཞུ་ཤིག
|
||
རྣལ་འབྱོར་པ་སྒོམ་ཆེན་གྱི་ཆ་ལུགས་ཅན་གཅིག་ཞབས་སར་བཅར་ནི་དང་།
བློན་པོ་ཡར་བཞེངས་ཏེ་ཕེབས་སུ་ལུ་བྱོན་ཞིནམ་ལས་གུས་ཞབས་དང་བཅས་པའི་སྒོ་ལས་མགོ་བསྒུར་ཏེ་ཞུ་ནི།
|
|||
བློན་པོ།
|
རྣལ་འབྱོར་པ་
སྐུ་ཁམས་བཟང་། ན་ལུ་བཞུགས་ཤིག
|
||
རྣལ་འབྱོར་པ་
བཞུགས་ཁྲི་གཅིག་གུར་བཞུགས་བཅུག་ཞིནམ་ལས་གནད་དོན་ཞུ་ནི།
|
|||
བློན་པོ།
|
ད་རེས་རྣལ་འབྱོར་པ་མཆོག་
ན་ལུ་བྱོན་ཟེར་ཞུ་དགོ་མི་འདི་ ཁྲང་སྟེ་ར་ཞུ་བ་ཅིན་ རྒྱལ་པོའི་བསྙུན་གཞི་དྲག་ཐབས་ལུ་
ལྷ་འདྲེ་གི་ནུས་པ་བཟློག་ཚུགས་མི་ སྔགས་པ་ནུས་མཐུ་ཅན་ཅིག་གདན་འདྲེན་ཞུ་བར་གཏང་ནི་སྦེ་ཨིན།
དེ་ཡང་རྒྱལ་ཕྲན་གཅིག་གིས་སླབ་དོ་བཟུམ་འབད་བ་ཅིན། རྒྱལ་པོ་སྣ་བོ་ཆེ་གི་རྩ་བའི་བླ་མ་ཨིན་མི་
གསང་སྔགས་ཀྱི་བདག་པོ་ ཨོ་རྒྱན་གུ་རུ་རིན་པོ་ཆེ་མཆོག་ ད་ལྟོ་བལ་ཡུལ་ཡངས་ལེ་ཤོད་ལུ་བཞུགས་ནུག་ཟེར་ཨིན་མས།
ཁྱོད་ཀྱིས་རྐང་མགྱོགས་ཀྱི་ནུས་པ་ལུ་བརྟེན་ཏེ་སྦེ་ ཨོ་རྒྱན་གུ་རུ་རིན་པོ་ཆེ་དེ་འཕྲལ་མགྱོགས་ར་གདན་འདྲེན་ཞུ་བར་བྱོན་གནང་ཟེར་ཞུ་ནི་ཨིན།
|
||
རྣལ་འབྱོར་པ།
|
གནད་དོན་འདི་
མངའ་བདག་རྒྱལ་པོའི་སྐུ་སྲོག་ལུ་ཐུག་པའི་གནད་དོན་ཅིག་ཨིནམ་མ་ཚད་ ང་བཅས་རའི་རྒྱལ་ཁབ་ཀྱི་དོན་ཆེན་གཅིག་ཡང་ཨིནམ་ལས་
ཉིནམ་ནངས་པ་ཟེརནི་ད་རེས་དང་ དེ་རེས་ཟེརནི་ ད་ལྟོ་ལས་ར་འགྱོ་སྟེ་ ཨོ་རྒྱན་གུ་རུ་རིན་པོ་ཆེ་གདན་འདྲེན་ཞུ་ཚུགསཔ་སྦེ་ར་འབད་འོང་ལགས།
|
||
བློན་པོ།
|
ཁྱོད་ཀྱིས་ར་དེ་སྦེ་ཐུགས་ཁུར་གནང་པ་ཅིན་
ང་ཡང་བློ་བདེཝ་ཟེར་རུང་དེམ་ཅིག་ཨིན་མས། ཡ༑ གཟིམ་དཔོན༑ ཁྱོད་ཀྱིས་ རྣལ་འབྱོར་པའི་ལམ་ཆས་དང་
ཨོ་རྒྱན་གུ་རུ་རིན་པོ་ཆེ་ལུ་འཕུལ་ནི་གི་གསེར་ཕྱེ་གི་འབུལ་བ་དེ་ཚུ་ རྣལ་འབྱོར་པ་ལུ་འཕུལ་ཤིག།
|
||
དེ་ལས་གཟིམ་དཔོན་གྱིས་
གོ་ལ་བསྡམ་བསྡམས་ཅིག་དང་ གསེར་ཕྱེ་བསྡམ་བསྡམས་ཅིག་རྣལ་འབྱོར་པ་ལུ་འཕུལ་ཏེ་ཞུ་ནི།
|
|||
གཟིམ་དཔོན།
|
ཡ་
འ་ནི་རྣལ་འབྱོར་པ་ཁྱོད་རང་གི་ལམ་ཆས་དང་། འ་ནི་གུ་རུ་རིན་པོ་ཆེ་ལུ་འཕུལ་ནི་གི་ གསེར་ཕྱེ་གི་འབུལ་བ་འདི་ཨིན།
|
||
བློན་པོ།
|
ཡ་
ད་ལོག་སྟེ་ཞུ་དགོཔ་ཅིག་མིན་འདུག་ ག་ལས་བསྒོར་རུང་ ང་བཅས་རྒྱལ་བློན་གྱི་རེ་བ་འདི་ཆུས་ཟོས་མ་གཏངམ་ཅིག་ཁྱོད་ཀྱིས་མཛད་དགོ་སྨྲ་རེ།
|
||
རྣལ་འབྱོར་པ།
|
ལགས་སོ་ལགས།
|
||
དེ་ལས་རྣལ་འབྱོར་པ་བྱོན་པའི་ཤུལ་ལུ་ཡོལ་ལི་བསྡམས་ནི།
|
|||
རྒྱབ་ཁའི་མཐོང་སྣང་།
|
རྒྱབ་ཀྱི་ཡོལ་ལི་གུར་ཕོ་བྲང་ནང་འཁོད་ཀྱི་པར་དང་།
མདུན་གྱི་ཡོལ་ལི་གུར་བུམ་ཐང་གི་ཆགས་ཉམས།
|
|||
ལས་རིམ།
|
ཡོལ་ལི་གཉིས་བརྩེགས་བཟོ་ཞིནམ་ལས་
ཡོལ་ལི་གཉིས་པམ་དེ་གི་རྒྱབ་ཀྱི་ཁྲི་གཅིག་གུ་རྒྱལཔོ་ཕྱེད་ཉལ་གྱི་ཚུལ་སྦེ་བཞུགས་ནི་དང་།
དེ་གི་ཟུར་ཁར་ཁྲི་སྟོངམ་གཅིག་བཞག་ཞིནམ་ལས་ ཡོལ་ལི་གཉིས་པམ་དེ་བསྡམས་ཏེ་བཞག་ནི།
གདོང་ཁ་གི་ཡོལ་ལི་ཕྱེ་ཞིནམ་ལས་བློན་འབངས་ཚུ་གིས་གུ་རུ་རིན་པོ་ཆེ་ལུ་གུས་འདུད་འབད་དེ་ཕེབས་སུ་བཅར་ནི།
དེ་སྒང་གུ་རུ་རིན་པོ་ཆེ་དང་ཅིག་ཁར་རྣལ་འབྱོར་པ་རླུང་གི་འཁོར་ལོ་དང་ མདུན་བསུ་ལུ་འགྱོ་བའི་ཚུལ་གྱི་མི་དག་པ་ཅིག་བཅས་བྱོན་ནི་དང་།
མཇལ་ཕྲད་མཛད་པའི་སྐབས་ གུ་རུ་རིན་པོ་ཆེ་ལུ་ རྣལ་འབྱོར་པ་གིས་ བློན་པོ་ཀུན་འདུས། བློན་པོ་ཀུན་བྱེད།
དེ་ལས་རྒྱལ་བཙུན་ལོ་ཟ་ཀུན་སྐྱོང་། ཉི་ཟེར་ལྡན་བཅས་ངོ་སྤྲོད་ཕུལ་ནི་དང་། དེ་ལས་གསེར་སྦྲེང་གི་ཐོག་ལས་གུ་རུ་རིན་པོ་ཆེ་གདན་འདྲེན་ཞུ་ཞིནམ་ལས་
འཁྲབ་སྟེགས་གུར་ལྷོདཔ་ད་ གུ་རུ་གིས་གསུངས་ནི།
|
|||
གུ་རུ།
|
གངས་རིས་བསྐོར་བའི་མོན་ཡུལ་འདིར།
།ཕྱི་ཡི་ཡུལ་ལྗོངས་ཉམས་རེ་དགའ། །རྒྱལ་བློན་དེ་གུས་ལྡན་པ་འདི། །བསྟན་པ་འཕེལ་བའི་རྟེན་འབྲེལ་ཡིན།།
ཡ་ རྒྱལཔོ་ག་སྟེ་བཞུགས་ཡོད་གོ་ དང་པ་ར་རྒྱལཔོ་དང་ཚར་ཅིག་མཇལ་གེ།
|
|||
དེ་ལས་བློན་པོ་གིས་ཡོལ་ལི་གཉིས་པམ་དེ་ཕྱེ་ཞིནམ་ལས་
ནང་ན་བྱོནམ་ད་ རྒྱལ་པོ་གིས་ཁོ་སྟོད་ཡར་བཞེངས་ཞིནམ་ལས་གུ་རུ་ལུ་གུས་འདུད་གནང་ནི་ཅིག་ཁར་
ཕྱག་རྒྱ་དང་བཅས་པའི་ཐོག་ལས་ཁྲི་ཁར་བཞུགས་ཟེར་ཞུ་ནི།
|
||||
རྒྱལ་པོ།
|
བདག་སོགས་འགྲོ་བ་སེམས་ཅན་གྱི་དོན་ལུ་
སངས་རྒྱས་སྐུ་ཤ་རློནམ་ ད་རེས་མོན་པའི་གཡུས་ཁ་བྱོན་ཚུགས་མི་འདི་ ང་བཅས་རྒྱལ་བློན་འབངས་གསུམ་ལུ་
བསོད་ནམས་བྲེ་གིས་རྫོགས་རུང་ཕུད་ཀྱིས་མ་རྫོགས་ཟེར་བའི་དཔྱེ་བཟུམ་ཅིག་ཨིན་མས། ད་སློབ་དཔོན་རིན་པོ་ཆེ་གིས་བཀའ་དྲིན་ལས་
ང་ནད་འདི་ལས་དྲག་ཚུགསཔ་ཅིག་ཡོད་པ་ཅིན་ སློབ་དཔོན་མཆོག་ལུ་ ཐུགས་འདོད་ག་ཅི་ཡོདཔ་ཅིག་ཕུལ་ནི་དང་།
ཕྱིན་ཆད་ད་ལས་ཕར་ཅི་གསུངས་བཀའ་བཞིན་སྒྲུབ་ནི་ཨིན་ལགས། སློབ་དཔོན་མཆོག་གིས་ ནད་འདི་ལས་དྲག་ཚུགསཔ་ཅིག་ཐུགས་རྗེས་གཟིགས་གནང་།
|
|||
གུ་རུ།
|
ང་ལུ་དགོཔ་འདི་ག་ནི་ཡང་མེད།
ད་འབདཝ་ད་ ཁྱོད་རང་ནད་འདི་ལས་དྲག་དགོ་པ་ཅིན་ ཁས་ལེན་ཅིག་འབད་དགོ། ཁས་ལེན་དེ་ཡང་ག་ཅོ་སྨོ་ཟེར་བ་ཅིན།
རྒྱལཔོ་ཁྱོད་རང་རྐྱངམ་ཅིག་མེན་པར་ གཡུས་འདི་ནང་གི་མི་སེར་ག་ར་གིས་ སྡིག་པའི་ལཱ་འདི་སྤོངས་ཞིནམ་ལས་དགེ་བའི་ལཱ་ལུ་བརྩོན་ཤུགས་བསྐྱེད་དགོཔ་མ་ཚད་
ངེད་ཀྱི་བསྟན་པ་ལུ་འཇུག་ནི་གི་ཁས་ལེན་འབད་དགོ། དེ་ཚུ་འབད་ཚུགས་པ་ཅིན་ ཁྱོད་རང་ནད་འདི་དྲག་པའི་ཐབས་ཤེས་ང་ལུ་ཡོད།
དེ་མེན་པ་ཅིན་ ང་མེན་པར་སངས་རྒྱས་སྟོང་མངོན་སུམ་བྱོན་རུང་ ཕན་ཐབས་མིན་འདུག
|
|||
དེ་ནང་ཡོད་པའི་རྒྱལ་བློན་འབངས་གསུམ་ག་ར་གིས་སྟབས་གཅིག་ལུ་ཁས་ལེན་འབད་ནི།
|
||||
དེ་ཁ་ཡོད་མི་ག་ར་གིས།
|
ཕྱིན་ཆད་ད་ལས་ཕར་
ཨོ་རྒྱན་གུ་རུ་མཆོག་གི་བཀའ་བཞིན་དུ་ སྡིག་པའི་ལཱ་སྤོངས་ཞིནམ་ལས་དགེ་བའི་ལཱ་ལུ་བརྩོན་ཤུགས་བསྐྱེད།
སངས་རྒྱས་ཀྱི་བསྟན་པ་ལུ་ཡང་ཞུགས་ནི་ཨིན་ལགས།
|
|||
གུ་རུ།
|
དེ་སྦེ་ཨིན་པ་ཅིན་བཏུབ་པས།
ད་དེ་ལུ་ཐབས་ཤེས་འབད་དགོཔ་ཟེར་རུང་ བྲག་དམར་རྡོ་རྗེ་བརྩེགས་པའི་གུ་ལུ་ ལྷ་འདྲེ་འགུགས་པའི་བསྒོམ་སྒྲུབ་ཅིག་འབད་དགོ་པས་
དེ་ཁར་ཆ་རོགས་འབད་མི་སྦེ་ ཐབས་ཤེས་ཟུང་སྦྲེལ་གྱི་ཐོག་ལས་ལྷ་འདྲེ་བཀུག་ནི་གི་དོན་ལུ་
ས་སྟེང་མིའུ་ཕུད་ འཇིག་རྟེན་པའི་སྐྱོན་གྱིས་མ་གོས་པའི་ མཁའ་འགྲོ་མའི་མཚན་རྟགས་དང་ལྡན་པའི་བུམ་ཅིག་དགོཔ་འདུག་
དེ་བཟུམ་ཅིག་ཡོད་ག
|
|||
རྒྱལ་པོ།
|
དེ་འདི་
མ་བསྒྲིག་པའི་རྟེན་འབྲེལ་འགྲིག་འགྲིགཔ་བཟུམ་ཅིག་འོང་ནི་མས། ངེད་ཀྱི་བཙུན་མོ་ཉི་ཟེར་ལྡན་གྱི་སྲསམོ་
འབུམ་ལྡན་མཚོ་མི་འདི་ མཁའ་འགྲོ་མའི་མཚན་རྟགས་དང་ལྡན་པའི་ཁར་ འཇིག་རྟེན་པའི་སྐྱོན་གྱིས་ཡང་རྩ་ལས་ར་མ་གོས་མི་ཅིག་ཨིན་ལགས།
འབུམ་ལྡན་མཚོ་མོ༑ གུ་རུ་གི་ཕྱག་དབང་བཅར་ཤིག
|
|||
འབུམ་ལྡན་མཚོ་མོ་གུས་འདུད་ཀྱི་སྒོ་ལས་ཕྱག་དབང་བཅར་ནི།
|
||||
འབུམ་ལྡན་མཚོ་མོ་
|
ཨོ་རྒྱན་གྱི་གུ་རུ་རིན་པོ་ཆེ༑
སྐྱབས་སུ་མཆིས། གོང་ལུ་གསུངས་མི་ཁྱད་ཆོས་དེ་ཚུ་ང་ལུ་ཚངམ་བཟུམ་ཅིག་འབད་བ་ཅིན། ཆ་རོགས་འབད་ནི་འདི་
ང་གིས་ཕྱག་ཕྱིས་ཞུ་ནི་ཨིན་ལགས།
|
|||
མོ་ལུ་ལེགས་ཤོམ་སྦེ་གཟིགས་ཞིནམ་ལས།
ཞལ་མཛུམ་དང་བཅས་པའི་ཐོག་ལས་གསུངས་ནི།
|
||||
གུ་རུ།
|
བཏུབ་པས།
འབུམ་ལྡན་མཚོ་མོ༑ ད་བྲག་དམར་རྡོ་རྗེ་བརྩེགས་པ་ལུ་བསྒོམ་སྒྲུབ་འབད་བར་འགྱོ་ནི་ཨིན་སྨྲ་རེ།
|
|||
འབུམ་ལྡན་མཚོ་མོ་
|
ལགས་སོ་ལགས།
བཀའ་བཞིན་ཞུ།
|
|||
ཡོལ་ལི་བསྡམས་ནི།
|
||||
ལས་རིམ།
|
ཡོལ་ལི་རིམ་པ་གཉིས་པའི་རྒྱབ་ལུ་རྒྱལ་པོ་རང་རྐྱ་བཞག
དེ་གི་གདོང་ཁར་བྱག་གི་པར་གཅིག་སྟོན་ཞིནམ་ལས་ དེ་གི་གདོང་ཁར་འབུམ་ལྡན་མཚོ་མོ་དང་གུ་རུ་གཉིས་
ཞབས་རྡོ་རྗེ་དཀྱིལ་ཀྲུང་དང་ ཕྱག་གཉིས་མཉམ་བཞག་མཛད་དེ་བསྒོམ་སྒྲུབ་ལུ་བཞུགས་ཞིནམ་ལས་ཡོལ་ལི་ཕྱེ་ནི།
ཨ་ཙི་ཅིག་ཁར་ལས་ གུ་རུ་གིས་ཕྱག་ལུ་རྡོ་རྗེ་རྩེ་དགུམ་བསྣམས་ཏེ་སྡིག་མཛུབ་མཛད་པའི་ཤུལ་ལུ་
ཡིད་དམ་ཤེལ་གིང་དཀར་པོ་འཐོན་ཏེ་ གུ་རུའི་སྐུ་མདུན་སྤུས་མོ་བཙུགས་ཏེ་ཞུ་ནི།
|
||
ཤེལ་གིང་དཀར་པོ།
|
ཀྱེ།
སྔགས་པ་ཆེན་པོ་ལགས། བདག་ནི་སྲོག་བདག་དཔོན་བྱེད་ཚེ། །ཤེལ་གིང་དཀར་པོ་བྱ་བ་ཡིན། །གནོད་སྦྱིན་དཔོན་པོ་བྱད་པའི་ཚེ།
།གང་བ་བཟང་པོ་བྱ་བ་ཡིན། །བཙན་གྱི་དཔོན་པོ་བྱེད་པའི་ཚེ། །སྐྱེས་བུ་རླུང་བཙན་བྱ་བ་ཡིན།
།སྣང་སྲིད་ལྷ་འདྲེ་ང་ཡི་འབངས། །ང་བས་ཆེ་བཙན་སུ་ཡང་མེད། །རྒྱལ་པོ་སིན་དྷུ་རཱ་ཇ་ཡི།
།བླ་སྲོག་འདི་ཡིན་ཁྱེད་ལ་འབུལ། །སྔར་ནི་བདུད་ཀྱི་རྒྱལ་པོ་སྟེ། ད་ནི་ཁྱེད་ཀྱི་བསྟན་པ་བསྲུང།།
|
||
ཞེས་ཞུ་ནི་དང་ཅིག་ཁར་
འོད་ཚེར་བའི་ཤེལ་རྡོག་གསེརཔ་གཅིག་ཕུལ། ཤེལ་གིང་དཀར་པོ་ལོག་པའི་ཤུལ་ལས་ གུ་རུ་དང་འབུམ་ལྡན་མཚོ་མོ་བཞེངས་ཞིནམ་ལས་
སྐུ་འཁོར་ཚུ་དང་ཅིག་ཁར་ཡོལ་ལི་གཉིས་པམ་ཕྱེ་སྟེ་རྒྱལ་པོ་བཞུགས་སར་བྱོན། འོད་དེ་རྒྱལ་པོའི་ཐུགས་ཁར་བསྟིམ།
དྲིལ་བུ་དང་ཌ་མ་རུ་དཀྲོགས་ཏེ་གསུངས་ནི།
|
|||
གུ་རུ།
|
བཅོམ་ལྡན་རྟ་མཆོག་རོལ་པའི་བྱིན་རླབས་དང་།
།གསང་སྔགས་རིགས་སྔགས་རྣམས་ཀྱི་མཐུ་སྟོབས་དང་། །བདེན་པར་སྨྲ་བ་རྣམས་ཀྱི་བདེན་ཚིག་གིས།
།རྒྱལ་པོ་ཁྱོད་ནི་བདག་གིས་བསྲུངས་ཟིན་གྱིས། །ཁྱོད་ལ་སུས་ཀྱང་གནོད་པ་མ་བྱེད་ཅིག། བཛྲ་རཀྵ་རཀྵ།
|
||
ཌ་མ་རུ་ལྕོགས་སྒྲོམ་གུ་བཞག
རྡོ་རྗེ་རྒྱལ་པོའི་དབུ་ལུ་བཞག་སྟེ་ བསྲུང་བའི་ཚུལ་སྦེ་ཨ་ཙི་ཅིག་བཞུགས་པའི་ཐ་མར་་
|
|||
གུ་རུ།
|
རྒྱལ་པོ༑
ག་དེ་སྦེ་འདུག བསྙུང་གཞི་ཨ་ཙི་དྭང་ཡི་ག
|
||
རྒྱལཔོ་ཡར་བཞེངས་ཞིནམ་ལས་
གུ་རུ་ལུ་ཕྱག་འཚལ་ཞབས་ལུ་བཟུང་སྟེ་ ངུ་ངག་གི་ཐོག་ལས་ཞུ་ནི།
|
|||
རྒྱལ་པོ།
|
གུ་རུ་རིན་པོ་ཆེ༑
སྐྱབས་སུ་མཆིས། ངེད་ཀྱི་ན་ཚ་དེ་ཚུ་ རྐང་པ་ལས་རྩང་བཏོན་དོ་བཟུམ་སྦེ་ ད་ ན་ཚ་ག་ནི་ཡང་མེད་པར་དྲག་སོང་ནུག
ཨོ་རྒྱན་གྱི་གུ་རུ་རིན་པོ་ཆེ་ངེད་ཀྱི་སྲོག་སྐྱབས་ཀྱི་དྲིན་ཅན་ཡིན། བཀའ་དྲིན་ཆེ། བཀའ་དྲིན་ཆེ།
|
||
དེ་ལས་རྒྱལཔོ་ཁྲི་ཁར་བཞུགས།
བློན་འབངས་དེ་ཚུ་གིས་ཡང་ ཕྱག་འཚལ་ཏེ་ བཀའ་དྲིན་ཆེ་ཟེར་ཞུ་ནི།
|
|||
རྒྱལ་པོ།
|
ཨོ་རྒྱན་གྱི་གུ་རུ་རིན་པོ་ཆེ་
ང་བཅས་མོན་པའི་རྒྱལ་ཁབ་ཀྱི་སྲོག་སྐྱབས་ཀྱི་དྲིན་ཅན་རྩ་བའི་བླམ་ཅིག་ཨིནམ་ལས་ དེ་ལུ་བཀའ་དྲི་ཆེ་ཟེར་ཞུ་ནི་དང་ཅིག་ཁར་
ད་ལོག་སྟེ་བྱོན་མ་སོང་པར་ ན་ལུ་བཞུགས་ཏེ་བཀའ་དྲིན་བསྐྱང་གནང་ཟེར་ཞུ་ནི་ཨིན་ལགས།
|
||
གུ་རུ།
|
ང་འགྲོ་བ་སེམས་ཅན་གྱི་དོན་ལེ་ཤ་འབད་ནི་ཡོདཔ་ལས་
ཁྱོད་དང་ཅིག་ཁར་སྡོད་ལོང་མེད། དེ་བ་འདི་ ཁྱོད་རང་ནག་པོ་སྡིག་པའི་ལཱ་མ་འབད་བར་ དཀར་པོ་དགེ་བའི་ལྷ་ཆོས་འབད།
རྒྱལ་ཁབ་ཀྱི་བར་ན་དམག་འཁྲུགས་མ་རྐྱབ་པར་མཐུན་བསྒྲིག་འབད་དེ་ བློན་འབངས་བདེ་སྐྱིད་ཀྱི་ངང་ལུ་བཞག
ད་ང་རྒྱལ་པོ་སྣ་བོ་ཆེ་དང་ཚར་ཅིག་མཇལ་ཕྲད་འབད་བར་འགྱོ་དགོ་པས།
|
||
རྒྱལ་བློན།
|
ལགས་སོ་ལགས།
|
||
དེ་ལས་ཡོལ་ལི་ཚར་གཅིག་བསྡམས་ནི་དང་།
ལོག་སྟེ་ཕྱེཝ་ད་ གུ་རུ་དང་རྒྱལཔོ་སྣ་ཆེ་གཉིས་སྐུ་འཁོར་དང་བཅས་པ་འཁྲབ་སྟེགས་གུར་བྱོན་ནི་དང་རྒྱལཔོ་སིན་དྷུ་རཱ་ཇ་ཡང་དེ་ནང་བཅར་ནི།
༼རྒྱལ་པོ་སིན་དྷུ་རཱ་ཇ་བུམ་ཐང་པའི་ཆ་ལུགས་དང་།
སྣ་བོ་ཆེ་རྒྱ་གར་གྱི་ཆ་ལུགས་སྦེ་ཐོན་པ་ཅིན་ལེགས་ཤོམ་འོང་།༽
|
|||
གུ་རུ།
|
ད་ཁྱིམ་ཚེ་རྒྱལ་ཁབ་གཉིས་
སྡོང་ཁོག་དང་ཤ་མུ་སྦེ་ཅིག་ཁར་རུལ་ནི་མེན་པར་ སྤང་དང་མེ་ཏོག་སྦེ་ཅིག་ཁར་རྒྱས་ནི་གི་དོན་ལུ་
ཁྱོད་གཉིས་མཐུན་སྒྲིག་འབད་ཞིནམ་ལས་ ཕྱིན་ཆད་དམག་འཁྲུགས་མི་ལང་གི་དོན་ལུ་ ཞལ་ཆེམས་ཀྱི་བཀའ་ཚིག་རྡོ་རིང་བཙུགས་ཤིག
|
||
དེ་ལས་ཁོང་གཉིས་ཀྱི་ས་མཚམས་ལུ་རྡོ་རིང་བཙུགས་ཞིནམ་ལས་
དེ་གུར་ཡོད་མི་ཡི་གུ་འདི་ཅིག་ཁར་ལྷག་ནི།
|
|||
ཡི་གུ།
|
མོན་གྱི་རྒྱལ་པོ་སིན་དྷུ་རཱ་ཇ་དང་
རྒྱའི་རྒྱལ་པོ་སྣ་བོ་ཆེ་གཉིས་ཀྱི་བར་ན་བཙུགས་པའི་བཀའ་ཚིག་ཞལ་ཆེམས། སྔོན་ཆད་མོན་གྱིས་རྒྱ་བཅོམ། རྒྱ་ཡིས་མོན་པ་བཅོམ་རུ་
ད་ནས་ཕར་ ཨོ་རྒྱན་རིན་པོ་ཆེའི་བཀའ་དགོངས་སྒྲུབ་སྟེ་ ཕྱིན་ཆད་དམག་འཁྲུགས་མི་འབད་ནི་གི་ཁས་བླངས་འབདཝ་ཨིན།
|
||
དེ་ལས་གུ་རུ་གིས་ཞལ་རས་རྒྱལཔོ་སིན་དྷུ་རཱ་ཇའི་ཕྱོགས་ལུ་བསྒོར་ཏེ་གསུངས་ནི།།
|
|||
གུ་རུ།
|
མོན་པའི་གཡུས་ཁ་ལུ་འོངས་པའི་དགོས་པ་ག་ར་བསྒྲུབས་ཚརཝ་ལས་
ན་ལུ་སྡོད་རུང་དོན་དག་ཅིག་མིན་འདུག་ དེ་བ་འདི་ འཛམ་གླིང་འགྲོ་བའི་དོན་ལུ་ རྒྱ་གར་འཕགས་པའི་གཡུས་ཁར་ལས་བསྐོར་ཏེ་
གངས་ཅན་བོད་ལུ་འགྱོ་ནི་ཨིན། ཤུལ་ལས་ཚར་ཅིག་མོན་པའི་གཡུས་འདི་ནང་ལོག་སྟེ་འཐོན་འོང་།
ད་འགྱོཝ་ཨིན་སྨྲ་རེ།
|
||
རྒྱལ་བློན་འབངས་གསུམ་ག་ར་མྱ་ངན་གྱི་ཐོག་ལས་ཕེབས་བསྐྱེལ་ཞུ་བའི་ཐ་མར་ཡོལ་ལི་བསྡམས་ཏེ་མཇུག་བསྡུ་ནི་ཨིན།
|
|||
༼མཐོང་སྣང་བརྒྱད་པ།
༽
གུ་རུ་རིན་པོ་ཆེ་བོད་ལུ་བྱོན་ཏེ་སངས་རྒྱས་བསྟན་པའི་རྨང་གཞི་བཏིང་པའི་སྐོར།
རྒྱབ་ཁའི་མཐོང་སྣང་།
|
བསམ་ཡས་རིའི་པར་གཅིག་བཞག་ནི།
པར་དེ་ཤིང་མེད་པའི་རི་གཅིག་གི་གདོང་ཁར་སྤང་ཐང་དང་གཙང་ཆུ་ཡོད་མི་ཅིག་འབད་རུང་བཏུབ།
༼རྒྱལ་བློན་གྱི་ཆ་ལུགས་དེ་ཚུ་
བོད་ཀྱི་རྒྱལ་བློན་གྱི་ཆ་ལུགས་སྦེ་རང་བཟོ་བ་ཅིན་ལེགས་ཤོམ་འོང་།༽
|
|
ལས་རིམ།
|
འཁྲབ་སྟེགས་གུར་
བསམ་ཡས་རྨང་གཞི་གི་རྩིག་རྡོ་བརྩིག་པའི་རྣམ་པ་ཅིག་བཟོ་སྟེ་ལས་མི་དེ་ཚུ་ལཱ་འབད་བའི་རྣམ་པ་སྟོན་ཞིནམ་ལས་ཡོལ་ལི་ཕྱེ་ནི།
|
|
ལས་མི་གཅིག
|
ཨའོ་དབའེ༑ ང་བཅས་ཀྱི་མངའ་བདག་རྒྱལ་པོ་ཁྲི་སྲོང་ལྡེའུ་བཙན་གྱི་
འགྲུབ་ནི་མེད་པའི་ལཱ་འདི་དབའེ། ས་སླང་ཅིག་ཡང་ལེགས་ཤོམ་སྦེ་མ་འབདཝ་འདྲ་བས་ས་དབའེ།
|
|
གཅིག་གིས་
|
དབའེ༑
རྡེའུ༑ ཁྱོད་ཀྱིས་མ་ཤེས་སྦོ། རོགས་རྒྱ་གར་འཕགས་པའི་གཡུས་ཁ་ལས་ ཟ་ཧོར་གྱི་མཁན་པོ་བོ་དྷི་སཏྭ་ཟེར་ཞུ་མི་འདི་
ལཱ་ཁག་སྦེ་གདན་འདྲེན་ཞུ་ཞིནམ་ལས་ས་སླང་འབད་འབདཝ་མེན་སྦོ།
|
|
སྔ་མ་དེ་གིས་
|
སྟེ་
ང་བཅས་ཀྱིས་ག་དེམ་ཅིག་རྩ་འགེངས་རུ་ལཱ་ཤུལ་ག་ནི་ཡང་འཐོན་ནི་མེད་མི་འདི་ག་ཅི་སྨོ་སྟེ།
ལྷ་འདྲེ་ཚུ་གིས་ར་མེདཔ་བཏངམ་ཨིན་ན། ཡང་ཅིན་བོན་པོ་དེ་ཚུ་གིས་མེདཔ་བཏངམ་ཨིན་ན་མ་ཤེས་སྨྲས།
|
|
གཞན་གཅིག་གིས།
|
དབའེ༑
མགོ་ལུ་རྭཝ་མེད་པའི་ནོར་དེ་ཚུ་ ཏ་མ་ཁ་ཤུབས་སོར་གྭངམ་དེ་གིས་ལྟག་ལྐོག་ལག་གྭངམ་འདི་རྒྱང་འོང་སྨྲ་རེ།
ང་འབདནི་མི་ཤེས། དེ་བ་འདི་ ད་གནམ་ཡང་སྲོ་དེས་ ལཱ་མཇུག་བསྡུ་སྟེ་འགྱོ་གེ་མེན་ན།
|
|
གཅིག་གིས།
|
ཨིན་པས་ས།
འགྱོ་ཤིག
|
|
དེ་ལས་གློག་འོད་མར་ཕབས་སྟེ་གནམ་སྲོ་པའི་ཚུལ་སྟོན་པའི་ཤུལ་ལུ་
ལྷ་འདྲེ་ཚུ་འོང་སྟེ་རྩིག་པ་བཤིག་བཏང་སྟེ་འགྱོ་ནི། དེ་ལས་གནམ་ཞག་དཀར་བའི་ཚུལ་སྦེ་
གློག་འོད་སྤར་ཞིནམ་ལས་ རྒྱལ་བློན་དང་མཁན་ཆེན་བྱོན་ཏེ་ ཧ་ལེགས་པའི་ཚུལ་གྱིས་གཟིགས་ནི།
|
||
རྒྱལ་པོ།
|
མཁན་ཆེན་མཆོག༑
བསམ་ཡས་ཀྱི་ས་ཆ་འདི་ཁར་ བྱིན་རླབས་ཅིག་ལེགས་ཤོམ་སྦེ་ འབད་མ་ཚུགསཔ་མེན་ན་སྨོ། རྒྱ་ཆེ་བའི་གཙུག་ལག་ཁང་འདི་གི་ལཱ་འདི་
ལེགས་ཤོམ་ཅིག་སྦེ་བཞེངས་ར་མ་སྟེར། ད་ ག་དེ་སྦེ་འབད་བ་ཅིན་དྲག་ག་སྨོ། མཁན་ཆེན༑
|
|
མཁན་ཆེན།
|
རྒྱལ་པོ་རིན་པོ་ཆེ༑
ས་ལུ་བྱིན་རླབས་མ་འབད་འདི་རྩ་ལས་མེན། དེ་འབདཝ་ད་ ང་བཅས་ཀྱིས་ཆོས་ལུགས་གསརཔ་ཅིག་དར་ཁྱབ་གཏང་ནི་ཨིནམ་ཤེས་ཞིནམ་ལས་
བོད་ཀྱི་ལྷ་འདྲེ་དེ་ཚུ་མ་དགའ་བར་ བར་ཆད་རྐྱབ་དོ་ཡོདཔ་ཨིན་མས། ངནི་ཞི་བའི་ཐོག་ལས་བྱང་ཆུབ་ཀྱི་སེམས་ལུ་བློ་སྦྱོང་འབད་མི་ཅིག་ཨིནམ་ལས་བརྟེན་ཏེ་
ང་གིས་དེ་ཚུ་བཏུལ་ཚུགས་པར་ལཱ་ཁག་འོང་ནི་མས།
|
|
རྒྱལ་པོ།
|
དེ་སྦེ་ཨིན་པ་ཅིན།
དེ་ལུ་ཐབས་ཤེས་ ག་ཅི་སྟོནམ་དྲག་ག་སྨོ།
|
|
མཁན་ཆེན།
|
དེ་ལུ་ཐབས་ཤེས་ཟེར་རུ་
ལྷ་འདྲེ་གི་ནུས་པ་བཟློག་ཚུགས་མི་སྔགས་པ་ནུས་མཐུ་ཅན་ ཨོ་རྒྱན་གྱི་གུ་རུ་པདྨ་འབྱུང་གནས་
གདན་འདྲེན་ཞུ་ཞིནམ་ལས་ལྷ་འདྲེ་དམ་ལུ་བཏགས་ཏེ་བཀའ་བསྒོ་གནང་གནང་པ་ཅིན་དྲག་འོང་ལགས།
|
|
རྒྱལ་པོ།
|
དབའེ༑
གུ་རུ་པདྨ་འབྱུང་གནས་འདི་ ང་བཅས་ཀྱིས་གདན་འདྲེན་ཞུ་བ་ཅིན་ འབྱོན་འོང་ག་སྨོ།
|
|
མཁན་ཆེན།
|
གུ་རུ་རིན་པོ་ཆེ་ཡང་
འཕགས་པ་སྤྱན་རས་གཟིགས་ཀྱི་སྤྲུལ་པ་ཅིག་ཨིནམ་མ་ཚད་ ང་བཅས་ཅིག་ཁར་འཛོམས་ནི་གི་ལས་འཕྲོ་དང་སྨོན་ལམ་ཡོདཔ་ལས་
འབྱོན་ར་འབྱོན་འོང་ལགས།
|
|
རྒྱལ་པོ།
|
ལས་འཕྲོ་དང་སྨོན་ལམ་ག་ཅི་བཟུམ་ཅིག་ཡོདཔ་ཨིན་ན་སྨོ།
མཁན་པོ་གིས་ཚར་གཅིག་གསུངས་གནང་པ་ཅིན་བཀའ་དྲིན་ཆེ་ནི་མས།
|
|
མཁན་ཆེན།
|
ཧེ་མ་བལ་ཡུལ་ལུ་
ཨམ་བྱ་རྫི་མ་དང་ མོ་གི་བུ་བཞི་གིས་མཆོད་རྟེན་བྱ་རུང་ཁ་ཤོར་ཟེར་མི་འདི་བཞེངས་པའི་བར་ན་ཡུམ་དེ་བཤགས་སོང་རུང་
ཁོང་བུ་སྤུན་བཞི་གིས་ མཆོད་རྟེན་དེ་འཕྲོ་མཐུད་བཞེངས་ཞིནམ་ལས་རབ་གནས་གནང་པའི་སྐབས་ལུ་
མདུན་གྱི་ནམ་མཁར་སངས་རྒྱས་རབ་བདུན་མངོན་སུམ་དུ་བྱོན་ཡོདཔ་ཨིན་མས། དེ་ཁ་ལུ་ཁོང་བུ་སྤུན་བཞི་གིས་སྨོན་ལམ་བཏབ་པའི་སྐབས་ལུ་
བུ་རྒན་ཤོས་ཀྱིས་སངས་རྒྱས་ཀྱི་བསྟན་པ་འཛིན་པའི་ཆོས་ལྡན་གྱི་རྒྱལཔོ་གཅིག་སྦེ་སྐྱེས་ནི་གི་སྨོན་ལམ་བཏབ་མི་དེ་
ད་ལྟོ་མངའ་བདག་རྒྱལཔོ་ཁྱེད་རང་ཨིན། བུ་གཉིས་པམ་དེ་གིས་ སངས་རྒྱས་ཀྱི་བསྟན་པ་བསྲུང་མི་སྦེ་སྨོན་ལམ་བཏབ་མི་འདི་
ད་ལྟོ་ཨོ་རྒྱན་གྱི་གུ་རུ་རིན་པོ་ཆེ་ཨིནམ་ལས་ ཁོ་བྱོན་པ་ལུ་ཐེ་ཚོམ་ག་ནི་ཡང་མི་འོང་ལགས།
|
|
རྒྱལ་པོ།
|
དེ་བདེན་རྫུན་ག་དེ་སྦེ་ཨིན་རུང་
ཉན་ནི་ལུ་སྤྲོ་བ་ཅན་ཅིག་ཨིན་མས། ཡ་ དེ་ལས་བུ་གཞན་མི་གཉིས་དེ་ག་དང་ག་སྨོ།
|
|
མཁན་ཆེན།
|
དེ་ལས་བུ་གསུམ་པམ་དེ་གིས་
སངས་རྒྱས་ཀྱི་བསྟན་པ་སྤེལ་མི་ཅིག་ལུ་སྨོན་ལམ་བཏབ་མི་འདི་ བོ་དྷི་སཏྭ་ང་རང་ཨིན། དེ་ལས་བུ་བཞི་པམ་དེ་གིས་
འཕྲིན་བསྐྱེལ་བློན་པོ་སྦེ་སྨོན་ལམ་བཏབ་མི་འདི་ ད་ལྟོ་ཡར་ཀླུངས་སྦ་མི་ཁྲི་གཞེར་ཨིན་མས་ལགས།
ང་བཅས་བུ་སྤུན་བཞི་གི་བཏབ་མི་སྨོན་ལམ་འདི་ རང་བཞིན་ལྷུན་གྱིས་འགྲུབ་ནི་གི་དུས་ཚོད་འདི་ད་ལྟོ་ཨིནམ་ལས་
གུ་རུ་རིན་པོ་ཆེ་གདན་འདྲེན་ཞུ་མི་འདི་ཡང་ བུ་སྤུན་བཞི་པ་སྦ་མི་ཁྲི་གཞེར་ཁོ་རང་གཏང་པ་ཅིན་
བརྟན་བརྟན་གདན་འདྲེན་ཞུ་ཚུགས་ལགས།
|
|
རྒྱལ་པོ།
|
ལགས་སོ།
དེ་སྦེ་ཨིན་པ་ཅིན་ གུ་རུ་གདན་འདྲེན་ཞུ་མི་གི་བང་ཆེན་གཙོ་བོ་དེ་སྦ་མི་ཁྲི་གཞེར་དང་
ཁོ་གི་ཆ་རོགས་སྦེ་ རྡོ་རྗེ་བདུད་འཇོམས། ཤཱ་ཀྱ་པྲ་བྷ། དཔལ་གྱི་སེང་གེ་སྦེ་ཁོང་བཞི་གཏང་ནི་ཨིན།
དབའེ༑ བློན་པོ༑ ཁོང་བཞིཔ་དེ་རྒྱ་གར་ནང་འགྱོ་ནི་གི་གྲབ་སྒྲིག་རྐྱབ་ཞིནམ་ལས་ན་ལུ་ཤོག་ཟེར་སླབ་ཤིག།
|
|
འཕྲིན་བློན་བཞི་པོ་སྐུ་མདུན་ལུ་བཅར་ཏེ་སྤུས་མོ་བཙུགས་ཞིནམ་ལས་ཞུ་ནི།
|
||
འཕྲིན་བློན།
|
མངའ་བདག་རྒྱལ་པོའི་སྐུ་ཚེ་ཁྲི་ལོ་ནས་ཁྲི་ལོར་བརྟན།
བསམ་དོན་ཆོས་བཞིན་འགྲུབ་པར་ཤོག།
|
|
རྒྱལ་པོ།
|
ཁྱོད་འཕྲིན་བློན་བཞི་པོ་ན་ལུ་ཤོག་ཟེར་བོ་མི་འདི་
རྒྱལ་ཁབ་ཀྱི་དོན་ཆེན་གཅིག་གི་དོན་ལུ་བོ་བོཔ་ཨིན། དེ་ཡང་ད་ལྟོ་ཡོད་མི་རྒྱལ་བློན་འབངས་གསུམ་དང་།
འབྱུང་འགྱུར་མ་འོངས་སེམས་ཅན་གྱི་དོན་ལུ་ཨིན་མི་ བསམ་ཡས་གཙུག་ལག་ཁང་གི་ སྐུ་གསུངས་ཐུགས་རྟེན་ཆ་ཚང་སྒྲུབ་ནི་ལུ་
ཨོ་རྒྱན་གྱི་གུ་རུ་རིན་པོ་ཆེ་དེ་མེད་ཐབས་མེདཔ་ཅིག་ཨིན་མི་དེ་ང་བཅས་ག་ར་གིས་ཤེས་ས་དང་མཁྱེན་ས་ཨིན།
དེ་འབདཝ་ལས་ ཁྱོད་བཞི་གིས་རྒྱ་གར་རྡོ་རྗེ་གདན་ལུ་སོང་ཞིནམ་ལས་ སྐུ་ལུ་འགྱུར་བ་མེད།
གསུང་ལ་འགག་པ་མེད། ཐུགས་ལུ་འཁྲུལ་པ་མེད་པའི་ཨོ་རྒྱན་གྱི་གུ་རུ་རིན་པོ་དེ་ གདན་འདྲེན་ཞུ་ཚུགསཔ་སྦེ་ར་
འབད་དགོ་སྨ་རེ།
|
|
ལགས་སོ་ལགས།
|
||
ཁོང་བཞི་པོ་འགྱོཝ་དང་ཅིག་ཁར་ཡོལ་ལི་བསྡམས་ནི།
|
||
རྒྱབ་ཁའི་མཐོང་སྣང་།
|
རི་འགྲམ་ལུ་གཙང་ཆུ་ཡོད་པའི་པར་གཅིག་བཞག་ནི།
|
|
མཐོང་སྣང་།
|
འཁྲབ་སྟེགས་གུར་རྒྱལ་བློན་དང་ཞབས་འཁོར་དང་མཁན་ཆེན་བཅས་གསུང་གྲོས་གནང་པའི་ཚུལ་སྦེ་བྱོན་ནི།
|
|
རྒྱལ་པོ།
|
གུ་རུ་རིན་པོ་ཆེ་གདན་འདྲེན་ཞུ་མི་ཐེངས་གསུམ་བཏང་རུང་བྱོན་མ་བཏུབ།
ཕལ་ཆེར་ན་ལུ་འབྱོན་འདོད་མེདཔ་འདྲ་བས་མེན་ན།
|
|
བློན་པོ།
|
རྒྱལ་པོ་རིན་པོ་ཆེ༑
དེ་སྦེ་འདི་མེན་པས་ལགས། འདས་པའི་ཟླཝ་དེ་ན་རང་ མང་ཡུལ་གུང་ཐང་ཕྱོགས་ལུ་ཕེབས་ཡོད་པའི་ལོ་རྒྱུས་འདུག ད་ཧ་ལམ་ཡར་ཀླུང་ཕྱོགས་ལས་འབྱོན་དོ་འོང་ལགས།
|
|
དེམ་ཅིག་གི་བར་ན་
ཕོ་ཉ་བང་ཆེན་ཅིག་རྒྱལ་པོའི་སྐུ་མདུན་སྙན་གསོལ་ཞུ་ནི།
|
||
བང་ཆེན།
|
རྒྱལ་པོ་རིན་པོ་ཆེ༑
གུ་རུ་པདྨ་འབྱུང་གནས་ཞབས་འཁོར་དང་བཅས་པ་ ཆུ་བོ་ལོ་ཧི་ཏའི་འགྲམ་ལུ་བྱོན་འོང་ནུག་ལགས།
|
|
རྒྱལ་པོ།
|
དབའེ༑
ཨིན་པས་ག་ མགྱོགས་པར་གསེར་སྦྲེང་གི་གྲབ་བསྒྲིག་རྐྱབས་ཤིག ཕེབས་སུ་ཞུ་བར་ལོ་ཧི་ཏའི་ཆུ་འགྲམ་ཟུང་མཁར་ལུ་འགྱོ་གེ།
|
|
ཡོལ་ལི་ཚར་གཅིག་བསྡམས་ཞིནམ་ལས་ཕྱེ་བའི་སྐབས་ལུ་
རྒྱལ་བློན་ཕོ་སྐྱེས་དེ་ཚུ་ན་བཟའ་དཀར་རྐྱང་བཞེས་ ཕྱག་ལུ་ཁ་དར་བསྣམས་ཏེ་གཡས་ཕྱོགས་ལུ་དང་།
བཙུན་མོ་རྣམ་གཉིས་ཀྱིས་གཙོས་པའི་བུད་མེད་རྣམས་ཀྱིས་ཁ་དར་འབག་སྟེ་གཡོན་ཕྱོགས་ལས་གྲལ་བསྒྲིགས།
བསངས་དང་གསེར་སྦྲེང་དང་བཅས་པའི་ཐོག་ལས་བསྒུག་སྟེ་བཞུགས་པའི་བར་ན་ ཕེབས་བསུའི་བང་ཆེན་འབྱོར་བ་དང་གསེར་སྦྲེང་འགོ་བཙུགས་ཞིནམ་ལས་
གུ་རུ་རིན་པོ་ཆེ་བྱོན་ནི། རྒྱལ་སློབ་རྣམ་གཉིས་ཞལ་མཇལ་སྐབས་ གཅིག་གིས་གཅིག་ལུ་གུས་ཕྱག་མ་ཕུལ་བར་ཨ་ཙི་ཅིག་བཞུགས་པའི་བར་ན་
གུ་རུ་གིས་མགུར་མ་གསུངས་ནི།
|
||
གུ་རུ།
|
དུས་གསུམ་སངས་རྒྱས་མངལ་སྒོ་འགྲིམ།
།གྲངས་མེད་གསུམ་དུ་ཚོགས་གཉིས་བསགས། །ང་སངས་རྒྱས་པདྨ་འབྱུང་གནས་ཡིན། །ང་རྒྱལ་པོ་ཁྱོད་ལ་ཕྱག་མི་འཚལ།
།འོན་ཀྱང་སྨོན་ལམ་འབྲེལ་བ་ཡིས། བོད་ཡུལ་དབུས་སུ་འོངས་ནས་མཆིས། རྒྱལ་པོ་ཆེན་པོ་དེར་བྱོན་ནམ།།
|
|
ཟེར་གསུངས་ཞིནམ་ལས་
ཕྱག་གཉིས་བརྐྱངས་ དབུ་གུག་ཙམ་བྱས་པའི་ཤུལ་ལས་ རྒྱལ་བློན་ཚུ་གིས་ཡང་ཕྱག་འཚལ་ནི། དེ་ལས་གདན་འདྲེན་ཞུ་སྟེ་བྱོན་པའི་བར་ན་ཡོལ་ལི་བསྡམས།
|
||
རྒྱབ་ཁའི་མཐོང་སྣང་།
|
རྒྱབ་ཁའི་པར་དེ་གི་སྦུག་ལུ་བྱ་ཁྱུང་གི་མགོ་དང་
མཐའ་འཁོར་ལུ་དམག་གི་གོ་མཚོན་སོགས་ཡོད་པའི་པར་ཅིག་བཞག་ནི།
|
|
ལས་རིམ།
|
ཁྲི་གསུམ་རྐྱབ་པའི་དབུས་ལུ་རྒྱལ་པོ་དང་
གཡས་ལུ་གུ་རུ་ གཡོན་ལུ་མཁན་ཆེན་ མཐའ་འཁོར་ལུ་བཙུན་མོ་དང་བློན་པོ་རྣམས་བཞུགས་ནི། ཡོལ་ལི་ཕྱེ་བ་དང་
རྒྱལ་བློན་ཚུ་གིས་གུ་རུ་ལུ་འབུལ་བ་ཕུལ་ཞིནམ་ལས་ རང་རང་སོ་སོའི་ཁྲི་ཁར་བཞུགས་ཏེ་ཞུ་ནི།
|
|
རྒྱལ་པོ།
|
ད་རེས་ཨོ་རྒྱན་གྱི་གུ་རུ་པདྨ་འབྱུང་གནས་མཆོག
སྤྲིན་དཀར་པོ་མཚམས་བཙུགས་ ས་ནག་པོ་འདོམ་གྱིས་མཇལ་ཏེ་ རྒྱ་གར་འཕགས་པའི་གཡུས་ཁ་ལས་
བྱང་ཕྱོགས་བོད་ཀྱི་དོན་ལུ་བྱོན་གནང་མི་དེ་ལུ་ཁ་ཞེ་གཉིས་མེད་ཀྱི་སྒོ་ལས་ བཀའ་དྲིན་ཆེ་ཟེར་ཞུ་ནི་དང་ཅིག་ཁར།
རྒྱལ་པོ་ཁྲི་སྲོང་ངེད་ཀྱི་བྱ་སྒོའི་ལས་རིམ་གྱི་སྐོར་ལས་ཞུ་བ་ཅིན། བོད་ཀྱི་མི་རིགས་འདི་
ཤེས་རྒྱུད་ག་ནི་བ་གྱོང་དྲག་ཨིནམ་ལས་ ཁོང་གི་ཤེས་རྒྱུད་དུལ་ནི་དོན་ལུ་ སངས་རྒྱས་བསྟན་པའི་སྐུ་གསུང་ཐུགས་རྟེན་བཞུགས་སའི་གཙུག་ལག་ཁང་ཅིག་བཞེངས་འགོ་བཙུགས་ཡོད་རུང་
ལྷ་འདྲེ་གདུག་པ་ཅན་དེ་ཚུ་གིས་ རྩ་ལས་བཞེངས་མ་སྟེར་བར་ཡོདཔ་ཨིན། དེ་འབདཝ་ལས་ གུ་རུ་རིན་པོ་ཆེ་མཆོག་གིས་
སངས་རྒྱས་བསྟན་པའི་དོན་ལུ་དམིགས་ཏེ་ གཙུག་ལག་ཁང་རྟེན་དང་བརྟན་པ་བཅས་པ་ཆ་ཚང་སྒྲུབ་ནི་གི་དོན་ལུ་
ཆ་རོགས་ག་ཅི་གནང་དགོཔ་ཅིག་མཛད་གནང་ཟེར་ཞུ་ནི་ཨིན།
|
|
གུ་རུ།
|
བོད་ཁམས་སྐྱོང་བའི་མངའ་བདག་ཆེན་པོ་ལགས༑
མཐའ་འཁོརཔ་བོད་ཀྱི་རྒྱལ་ཁམས་འདི་འདྲེ་གི་གཡུས་བཟུམ་ཅིག་ལུ་འགྱུར་སོང་ནུག ང་འོངས་པའི་ལམ་ཁར་ཡང་ལྷ་འདྲེ་ལེ་ཤ་ཅིག་ར་དམ་ལུ་བཏགས་ཏེ་འོང་འོངམ་ཨིན།
དེ་ཚུ་ག་དེ་སྦེ་ཨིན་རུ་ ཐུགས་བསམ་རྒྱ་ཆེ་ས་ལས་བཞེས་ཏེ་ མ་འོངས་སེམས་ཅན་གྱི་དོན་ལུ་གཙུག་ལག་ཁང་འདི་བཟུམ་ཅིག་བཞེངས་འགོ་བཙུགས་གནང་མི་འདི་ལུ་
ཨོ་རྒྱན་པདྨ་ངེད་ཀྱི་ཁ་ཐུག་ལས་ བཀྲ་ཤིས་བདེ་ལེགས་དང་བཀའ་དྲིན་ལེགས་སོ་སྦོམ་སྦེ་ཡོད།
ད་ལྟོ་ཚུན་ཚོད་བར་ན་
གཙུག་ལག་ཁང་གི་ཕྱག་ལཱ་ལེགས་ཤོམ་འགྱོ་མ་བཏུབ་མི་དེ་ཡང་ བོད་ཀྱི་ལྷ་འདྲེ་དེ་ཚུ་ཐུགས་སེམས་འཁྲུགས་ཏེ་ཡོདཔ་ལས་བརྟེན་ཏེ་ཨིན་མས།
ད་གཙུག་ལག་ཁང་འདི་ལེགས་ཤོམ་སྦེ་གྲུབ་དགོཔ་བཟུམ་ཅིག་འབད་བ་ཅིན། འབད་དགོཔ་ལེ་ཤ་ཡོད་པའི་ནང་ལས་
དང་པ་ར་ རི་མཐོ་ས་ཅིག་ཁར་འགྱོ་ཞིནམ་ལས་ ལྷ་འདྲེ་ལུ་བཤགས་པ་ཕུལ་དགོ་འདུག།
|
|
རྒྱལ་པོ།
|
ཨོ་རྒྱན་གུ་རུ་རིན་པོ་ཆེ༑
ད་ནས་བཟུང་སློབ་དཔོན་མཆོག་གི་ཅི་གསུངས་བཀའ་བཞིན་སྒྲུབ་ནི་ཨིནམ་ལས་བོད་ཀྱི་ལྷ་འདྲེ་ཚུ་གི་དོན་ལུ་
བཤགས་པ་དང་གསེར་སྐྱེམས་འཕུལ་སའི་ས་གོ་འདི་ ཧས་པོ་རིའི་རྩེ་ལུ་སྦེ་གནང་པ་ཅིན་དྲག་ནི་བཟུམ་ཅིག་འདུག་ལགས།
དེ་འབདཝ་ལས་ དང་པ་ར་ཧས་པོ་རིའི་རྩེ་མོ་ལུ་ བཤགས་པ་འཕུལ་བར་འབྱོན་གེ་ལགས།
|
|
རྒྱལ་བློན་ཚུ་བྱོན་ཏེ་ཡོལ་ལི་བསྡམས།
|
||
རྒྱབ་ཁའི་མཐོང་སྣང་།
|
རི་རྩེ་ལེ་ཤ་ཡོད་པའི་རིའི་པར་གཅིག་བཞག་ནི།
|
||
ལས་རིམ།
|
གདོང་ཁར་བསངས་དང་གསེར་སྐྱེམས་བསྒྲིགས་ཞིནམ་ལས་རྒྱལ་བློན་ཚུ་བྱོན་ཏེ་ཞི་བའི་སྒོ་ལས་ཕུལ་ནི།
|
||
གུ་རུ།
|
རང་ཉིད་པདྨའི་ཐུགས་ཀ་ནས།
གཉིས་འཛིན་བསྲེག་པའི་མེ་དཔུང་འབར། །ལྷན་སྐྱེས་སྦྱར་བྱུང་དྲི་བསྲེགས་པའི། །དུད་པས་གང་ལ་གང་འདོད་འགྱུར།
།ཞིང་མཆོག་དམ་པ་ཁྱེད་ལ་འབུལ། །མཆོག་ཐུན་དངོས་གྲུབ་འགྲུབ་པར་ཤོག །འགྲོ་དྲུག་སྙིང་རྗེའི་མགྲོན་ལ་འབུལ།
།ལན་ཆགས་བུ་ལོན་དག་གྱུར་ཅིག།
|
||
དེ་ལས་རྒྱལ་བློན་ཚུ་གིས་
ཕྱག་གཡས་པས་དཀར་ཕྱེ་གཏོར་ཏེ་སྐད་རྐྱབ་ནི།
|
|||
རྒྱལ་བློན་ཚུ།
|
ཀྱེ༑
ཀྱེ༑ སྭ༑ སྭ༑ ལྷ་རྒྱལ་ལོ།
|
||
དེ་ལས་ནམ་མཁའ་ལས་སྒྲ་གྲགས།
ལྷ་འདྲེ་འཇིགས་པའི་ང་རོ་སྟོན་པའི་ཚེ་ གུ་རུ་ཁྲོ་བའི་རྣམ་པ་སྟོན་ རྡོ་རྗེ་སོར་བའི་ཕྱག་རྒྱ་མཛད་ཞིནམ་ལས་བཀའ་བསྒོ་མཛད་ནི།
|
|||
གུ་རུ།
|
ཉོན་ཅིག་བགེགས་དང་ལོ་འདྲེན་ཚོ།
།མངའ་བདག་ཁྲི་སྲོང་ལྡེའུ་བཙན་གྱིས། །དགེ་བའི་བྱ་བ་བྱེད་པ་ལ། །འགལ་རྐྱེན་བར་ཆད་མི་གཏོང་ཞིང་།
།མཐུན་རྐྱེན་བསམ་པ་ཆོས་བཞིན་སྒྲུབས། གལ་ཏེ་བཀའ་ལས་འདའ་བ་ན། །མགོ་བོ་དུམ་བུ་བརྒྱར་བཀས་ཤིང་།
།བརླག་པར་འགྱུར་བར་གདོན་མི་ཟའོ།།
|
||
དེ་ལས་ལྷ་འདྲེ་ཚུ་རང་གཟུགས་སྟོན་ཏེ་གདོང་ཁར་འོང་ཞིནམ་ལས་
ཁས་ལེན་དམ་བཅའ་ཞུ་ནི།
|
|||
ལྷ་འདྲེ་ཚུ་གིས།
|
ཕྱིན་ཆད་སྲོག་ལ་འབབ་ཀྱང་སྡིག་པའི་ལས། །ནམ་ཡང་མི་བགྱི་གུ་རུའི་བཀའ་བཞིན་བྱ།།
མངའ་བདག་རྒྱལ་པོའི་ལས་ལ་གྲོགས་བགྱི་ཞིང་། །སངས་རྒྱས་བསྟན་པ་བསྲུང་བར་ཁས་བླང་ངོ།།
|
||
ལྷ་འདྲེ་ཚུ་རྒྱབ་ཤུད་རྐྱབ་སྟེ་རང་གནས་སུ་བྱོན་པའི་ཤུལ་ལུ།
ལྕོགས་སྒྲོམ་གུར་ ཤེལ་སྣོད་གཅིག་གི་སྟེང་ལུ་མེ་ཏོག་ཚོམ་བུ་ཅིག་བཞག དེའི་མདུན་ལུ་གཏོར་མ་དང་མཆོད་པ་བདུན་ཚར་བཤམས་པ་ཧེ་མ་ལས་གྲབ་བསྒྲིགས་འབད་དེ་ཡོད་མི་ཅིག་
འཁྲབ་སྟེགས་ཀྱི་ཟུར་གཅིག་ལུ་བཞག་ཞིནམ་ལས་ དེ་གི་གདོང་སྐོར་སྦེ་མཁན་སློབ་ཆོས་གསུམ་སོགས་བཞེངས་ཏེ་ས་བླང་མཛད་ནི།
|
|||
གུ་རུ།
|
ཕྱག་གཡས་ཁས་ལེན་ཕྱག་རྒྱ་དང་།
།གཡོན་པ་གསེར་གྱི་བུམ་པ་བསྣམས། །རིན་ཆེན་སྣ་ཚོགས་རྒྱན་ལྡན་པའི། །ས་ཡི་ལྷ་མོ་འདིར་འབྱོན་ཅིག།
མཆོད་ཡོན་ཞབས་བསིལ་མེ་ཏོག་ཕྲེང་། །བདུག་སྤོས་སྣང་གསལ་དྲི་ལྡན་ཆབ། །ཞལ་ཟས་རོལ་མོའི་བྱེ་བྲག་ནི།
།ནམ་མཁའི་མཐའ་ཁྱབ་འབུལ་གྱིས་བཞེས།། བྷུ་མི་པ་ཏི་ས་པ་རི་ཝཱ་རི་ཨི་དམ་བ་ལིཏཾ་ཁ་ཁཱ་ཁ་ཧི་ཁ་ཧི།
གང་དག་འདིར་གཤེགས་ལྷ་ཚོགས་ལ། །རྒྱལ་པོའི་གཙུག་ལག་ཁང་གི་ཕྱིར། །ས་འདི་བདག་ལ་ཞུ་བ་ན།
།བྱམས་བརྩེའི་ཐུགས་ཀྱིས་གནང་བར་མཛོད།།
|
||
ལྷ་རྣམས་ཀྱིས།
|
ཅི་དགར་ལོངས་སུ་སྤྱོད་པར་བྱའོ།།
|
||
གུ་རུ།
|
བཛྲ་མུཾ།
ཚོགས་ཞིང་རྣམས་རང་གནས་སུ་གཤེགས་པར་གྱུར།
|
||
དེ་ལས་ས་ཐིག་རྐྱབ་ཞིནམ་ལས་རྒྱལ་པོ་གིས་ཏོག་རྩེ་བསྣམས་ཏེ་
ཐེངས་གསུམ་བརྐོ་ནི་ཨིན།
|
|||
གུ་རུ།
|
ཡ༑
མངའ་བདག་རྒྱལ་པོ༑ གཞི་བདག་དང་སའི་ལྷ་མོ་ཚུ་ལས་ གཙུག་ལག་ཁང་བཞེངས་ནི་གི་ས་ལྷངམ་ད་
ཁོང་ལས་སའི་གནང་བ་ཡང་ཐོབ་ཅི། ད་ ཉིནམ་ད་རེས་ལས་གཙུག་ལག་ཁང་བཞེངས་ནི་འགོ་བཙུགས་ནི་ཨིན།
|
||
རྒྱལཔོ་གིས་ས་བརྐོ་མི་དེ་ཁར་གུ་རུ་གིས་རྩིག་རྒྱམ་རྡོ་བཙུགས་ཞིནམ་ལས་
རྒྱལ་བློན་འཁོར་བཅས་ལོག་སྟེ་བྱོན་ནི་དང་ ལས་མི་ཚུ་གིས་ལཱ་འགོ་བཙུགས་ནི་དང་ ཨ་ཙི་ཅིག་ལས་
|
|||
ལས་མི།
|
ཨཱའོ་དབའེ༑
ང་བཅས་ཀྱི་མངའ་བདག་རྒྱལ་པོའི་འགྲུབ་ནི་མེད་པའི་ལཱ་འདི་ ད་རུ་ཡང་འགོ་བཙུགས་དའི། དབའེ༑
ཁ་གིས་བགོད་བྲ་བ་ཟེར་སླབ་ད། ད་ཅི་རྒྱ་གར་ཨ་ཙ་ར་འདི་གིས་རྡག་རྡོག་ལེ་ཤ་ཅི་ར་སླབ་ནི་འདུག་སྦ་ཡ།
ག་ཅི་ར་སླབ་ཨིན་ན།
|
||
གཞན།
|
ཁའི༑
དབའེ༑ ཆོས་མ་ཉན་པའི་རྣཝ་སྤུ་སུལ་སུལ་ཟེར་མི་འདི་ཁྱོད་ཨིན་པས་སྦོ་སྟེ། གུ་རུ་རིན་པོ་ཆེ་གིས་ལྷ་འདྲེ་དམ་ལུ་བཏགས།
གནས་བདག་གཞི་བདག་ཚུ་ལས་ས་ལྷང་འབད་འབདཝ་ཨིན་མས། ད་འབདནི་ ང་བཅས་ཀྱི་ལཱ་ལུ་བར་ཆད་རྐྱབ་མི་ག་ཡང་མི་འོང་།
|
||
སྔ་མ་དེས།
|
བར་ཆད་ཡ།
བར་ཆད་རྐྱབ་མི་དེ་ ལྷ་འདྲེ་རང་དེ་གཱ་ཆགས་རུང་ ཆོས་ལུ་མ་དགའ་མི་བོན་པོ་འདི་ཚུ་འོང་ག་ཡང་མི་ཤེས།
དེ་བ་འདི་ ཕྱི་རུ་བསྲུང་རྒྱབ་ལེགས་ཤོམ་སྦེ་བཙུགས་པ་ཅིན་དྲག་འོང་།
|
||
གཞན།
|
ཁ་བཙུམ།
ཧང་ཧུང་ཡང་མི་ཤེས་སྦ། དེ་བ་འདི་ རྩིག་རྒྱམ་འདིནི་བཙུགས་ཚར་ཡི། ད་སྤར་འཁྱམས་ཏེ་ མ་ཎི་སྐུལ་གེ་
ཤོག།
|
||
དེ་ལས་མ་ཎི་སྐུལ་ཏེ་སྤར་འཁྱམས་ནི།
|
|||
སྤར་འཁྱམས་པ་ཚུ་གིས།
|
ཨོྃ་ས་ལ་མ་ཎི།
པདྨེ་ཆོས་ལ་ཆོས་ལ་ཧཱུྃ་ཧྲིཿ ཧཱུྃ་ཧྲིཿ བོད་ལ་འཇམ་དཔལ་དབྱངས་ཀྱི་དབའེ་སྤྲུལ་པ་འཁྲུངས།
ཨོྃ་ས་ལ་མ་ཎི། པདྨེ་ཆོས་ལ་ཆོས་ལ་ཧཱུྃ་ཧྲིཿ ཧཱུྃ་ཧྲིཿ ལྷ་ཁང་བཞེངས་ཚེ་བདུད་ཀྱི་དབའེ་བར་ཆད་བྱུང་།།
ཨོྃ་ས་ལ་མ་ཎི།
པདྨེ་ཆོས་ལ་ཆོས་ལ་ཧཱུྃ་ཧྲིཿ ཧཱུྃ་ཧྲིཿ ཨོ་རྒྱན་པདྨས་ལྷ་འདྲེ་དབའེ་དམ་ལ་བཏགས།།
ཨོྃ་ས་ལ་མ་ཎི།
པདྨེ་ཆོས་ལ་ཆོས་ལ་ཧཱུྃ་ཧྲིཿ ཧཱུྃ་ཧྲིཿ ཉིན་མོ་མི་དང་མཚན་མོ་དབའེ་འདྲེ་གིས་བཞེངས།།
ཨོྃ་ས་ལ་མ་ཎི།
པདྨེ་ཆོས་ལ་ཆོས་ལ་ཧཱུྃ་ཧྲིཿ ཧཱུྃ་ཧྲིཿ རྒྱལ་པོའི་བསམ་དོན་ཆོས་བཞིན་དབའེ་འགྲུབ་པར་ཤོག།
|
||
གཅིག་གིས།
|
དབའེ༑
ད་ལཱ་མཇུག་བསྡུ་གེ་ས་དབའེ༑ འཕོཝ་ནང་བྱི་ཙི་རྒྱུགས་དོ། བལྟ་ཤིག་ ཁྲི་གདུགས་ཉིནམ་ཡང་
ཡུམ་ཆེན་ཆུ་ལྷའི་ཕང་མར་ཉལ་ནི་འབད་དེས།
|
||
གཞན་
|
ཨིན་ན་དེནི་ལཱ་མཇུག་བསྡུ་ཤིག་བསྡུ་ཤིག།
|
||
དེ་ལས་ལཱ་མཇུག་བསྡུ་སྟེ་འགྱོ་བའི་སྐབས་ལུ་
གླུ་འཐེན་ཏེ་འགྱོ་ནི།
|
|||
ལས་མི་ཚུ།
|
ཞིམ་ནི་སྦང་ཆང་ཞིམ་རུ་ས་ཁོ་རེ།
གར་ནི་ཨ་ར་གར་བས་ས་ཁོ་རེ། དབའེ༑ དབའེ༑ འདྲེ་འདྲེ། འདྲེ་འོང་དོ། བྱོ་བྱོ།
|
||
ཁོང་འགྱོ་བའི་བར་ན་གློག་འོད་མར་ཕབས།
ལྷ་འདྲེ་དེ་ཚུ་འོང་ཞིནམ་ལས་ ལཱ་འགོ་བཙུགས་ཏེ་འབད་བའི་བར་ན་ཡོལ་ལི་བསྡམས་ཏེ་མཇུག་བསྡུ་ནི།
|
|||
རྒྱབ་ཁའི་མཐོང་སྣང་།
|
བསམ་ཡས་མི་འགྱུར་ལྷུན་གྱིས་གྲུབ་པའི་གཙུག་ལག་ཁང་གི་པར་བཞག་ནི།
|
||
ལས་རིམ།
|
རྒྱལ་བློན་འཁོར་བཅས་ཞལ་རས་
གཙུག་ལག་ཁང་ལུ་གཟིགས་ཏེ་རབ་གནས་གནང་ནི།
|
||
གུ་རུ།
|
ཇི་སྲིད་མེ་དང་ཆུ་དང་ནི།
།རླུང་གི་བསྐལ་པས་འཇིག་བར་དུ། །སྦྱིན་བདག་བསོད་ནམས་སྤེལ་བ་དང་། །སེམས་ཅན་ཀུན་གྱི་དོན་གྱི་ཕྱིར།
།ཇི་ལྟར་རྫོགས་པའི་སངས་རྒྱས་རྣམས། །དགའ་ལྡན་གནས་སུ་རབ་བཞུགས་ནས། །ལྷ་མོ་སྒྲུ་འཕྲུལ་ལྷུམས་ཞུགས་ལྟར།
།དེ་ལྟར་འདིར་ནི་བཞུགས་སུ་གསོལ། །བདག་སོགས་སེམས་ཅན་དོན་དུ་ནི། །བྱང་ཆུབ་སེམས་ནི་ཡོངས་འཕེལ་ཕྱིར།
།མེ་ཏོག་ལ་སོགས་འདི་བཞེས་ཏེ། །མགོན་པོ་འདིར་ནི་རྟག་བཞུགས་མཛོད།། ཨོཾ་ཨཱཿ བིགྣན་ཏ་ཀྲྀ་ཧཱུཾཿ
|
||
སྔགས་ལན་གསུམ་བརྗོད་པའི་སྐབས་ལུ་
ཕྱག་གི་རྡོ་རྗེ་གིས་ གཙུག་ལག་ཁང་གི་འོག་ བར་ སྟེང་གསུམ་ལུ་འོག་ནས་རིམ་པ་བཞིན་ རྡོ་རྗེ་རྒྱ་གྲམ་གྱི་ཚུལ་བཀོད་ནི།
དེ་ལས་བཀྲ་ཤིས་རབ་གནས་ཀྱི་པད་བསྐོར་གནང་སྟེ་ལོག་ཞིནམ་ལས། ཁྲི་གསུམ་གྱི་སྦུག་ལུ་གུ་རུ།
གཡས་གཡོན་གཉིས་ལུ་མཁན་པོ་དང་ཆོས་རྒྱལ དེ་ལས་གཞན་བཙུན་མོ་དང་བློན་འབངས་ཚུ་ཡང་བཞུགས་ཞིནམ་ལས་
བོད་ཀྱི་རྒྱལ་པོའི་ཁ་ཐུག་ལས་ བློན་འབངས་ཚུ་གིས་མཁན་སློབ་གཉིས་ལུ་འབུལ་བ་འཕུལ་ནི་དང་།
དེའི་ཞོ་ཁར་བཀྲ་ཤིས་དགའ་སྟོན་གྱི་ཞབས་བྲོ་གཟིགས་ནི།
|
|||
གླུ་གཞས་པ་ཚུ་གིས།
|
དྲོ་དྲོ་ཉི་མའི་དྲོད་ནང་། །ཟིམ་ཟིམ་མེ་ཏོག་ཆར་པ། །ཡང་ཡང་དལ་གྱིས་བབས་དུས།
།ལྷང་ལྷང་གླུ་ཞིག་ལེན་གེ།།
ཉི་ཟླ་སྐར་གསུམ་འཛོམས་པ།།གནམ་གང་དུས་ཆེན་ཉིན་མོ། །མཁན་སློབ་ཆོས་གསུམ་འཛོམས་པ།།བོད་ཀྱི་རྫོགས་ལྡན་བསྐལ་པ།།
སྦྱིན་བདག་མི་དབང་རྒྱལ་པོ།།ཆབ་སྲིད་གོང་དུ་འཕེལ་བས། །སངས་རྒྱས་བསྟན་པའི་གཞི་མ།།བྱང་སེམས་མཁན་པོ་ཕེབས་སོང་།།
ཨོ་རྒྱན་པདྨའི་ཞབས་ཀྱིས།།ལྷ་འདྲེ་བཀའ་བསྒོ་མཛད་པས། །བསམ་ཡས་གཙུག་ལག་ཁང་ཆེན།།མ་བཞེངས་ལྷུན་གྱིས་གྲུབ་སོང་།།
ཕྱི་ནས་གླིང་བཞི་གླིང་ཕྲན། །ཉི་ཟླ་བཅས་པ་ཚང་བའི། །སྦུག་ལུ་དབུ་རྩེ་རིམ་གསུམ།
།རི་རྒྱལ་ལྟ་བུར་མཐོ་བ།།
རྒན་པས་བསྐོར་ར་རྐྱབ་ས། །གཞོན་པས་ཞབས་ཏོག་སྒྲུབ་ས། །བྱིས་པས་སློབ་སྦྱོང་གནང་ས།
།བསམ་ཡས་ལྷུན་གྱིས་གྲུབ་སོང་།།
གང་གིས་བསམ་ཡས་འདི་ལ། །ཡིད་ཀྱིས་དྲན་པ་ཙམ་ཡང་། །ཕྱི་མར་བཟང་མདོག་དཔལ་རིར།
།སྐྱེ་བར་ཐེ་ཚོམ་མིན་འདུག།
|
||
ཞབས་བྲོ་མཇུག་བསྡུ་ཞིནམ་ལས་
མཁན་སློབ་ཆོས་གསུམ་གསུང་གྲོས་གནང་ནི།
|
|||
གུ་རུ།
|
ང་བཅས་མཁན་སློབ་གཉིས་
ན་ལུ་འོང་དགོ་པའི་དོན་དག་ངོ་མ་འདི་ར་ བསམ་ཡས་གཙུག་ལག་ཁང་འདི་གི་དོན་ལུ་ཨིནམ་ལས་ ད་
གཙུག་ལག་ཁང་འདིནི་གྲུབ་སོང་ཡི། ད་ང་བཅས་གཉིས་ཡང་ རང་རང་སོ་སོའི་གཡུས་ཁ་ལུ་ལོག་འགྱོ་ནི་གི་བཀའ་ཅིག་གནང་བར་ཞུ།
|
||
རྒྱལཔོ་ཐུགས་སྐྱོ་བའི་ཐོག་ལས་སྤྱན་ཆ་བསིལ་ཏེ་ཞུ་ནི།
|
|||
རྒྱལ་པོ།
|
མཁན་སློབ་རྣམ་གཉིས་ཐུགས་རྗེ་གཟིགས།
སངས་རྒྱས་བསྟན་པའི་ཉིནམ་མ་ཤར་བའི་བོད་ཡུལ་མུན་པའི་གླིང་འདི་ནང་ ད་ལྟོ་ཕྱི་གི་རྟེན་གཙུག་ལག་ཁང་གྲུབ་སོང་རུང་།
གསུང་རྟེན་བཀའ་དང་བསྟན་བཅོས་འདི་ཚུ་བསྒྱུར་ནི་ལྷག་ཡོད། དེ་འབདཝ་ལས་ ང་རྒྱལ་པོ་ཁྲི་སྲོང་མ་ཤི་ཚུན་ཚོད་
མཁན་སློབ་རྣམ་གཉིས་ན་ལུ་བཞུགས་ཞིནམ་ལས་ མདོ་མཚན་ཉིད་ཐེག་པ་དང་། གསང་སྔགས་རྡོ་རྗེ་ཐེག་པའི་ཆོས་འཁོར་བསྐོར་ཏེ་བཞུགས་གནང་ཟེར་ཞུ་ནི་ཨིན་ལགས།
|
||
མཁན་པོ།
|
མངའ་བདག་རྒྱལཔ་གིས་ཐུགས་བཞེད་དེ་སྦེ་གནངམ་བཟུམ་ཅིག་འབད་བ་ཅིན་
དང་པ་ར་བློ་རིག་གསལ་བའི་ཨ་ལོ་དག་པ་ཅིག་བསྡུ་བསྐོང་འབད་ཞིནམ་ལས་ སྒྲ་དང་རིག་པ་ཚར་ཅིག་སྟོན་ཏེ་བལྟ་གེ
|
||
གུ་རུ།
|
ཨིན་པས།
དེ་གི་བར་ན་རྒྱལ་པོའི་ཁ་ཐུག་ལས་ཆོས་ཁྲིམས་སྒྲིང་སྒྲིང་འབད་བཙུགས་དགོཔ་འདི་ཁག་ཆེ་བས།
|
||
རྒྱལ་པོ།
|
ལགས་སོ་ལགས།
དེ་འདི་ག་དེ་མགྱོགས་མགྱོགས་ ང་གིས་ཕྱག་ཕྱིས་ཞུ་འོང་ལགས།
|
||
དེ་ལས་ཡོལ་ལི་བསྡམས་ནི།
|
|||
རྒྱབ་ཁའི་མཐོང་སྣང་།
|
བསམ་ཡས་དབུ་རྩེའི་འོག་ཐོག་ཡིན་པའི་ཚུལ་དུ་ཇོ་ཁང་གི་པར་བཞག་ནི།
|
|
ལས་རིམ།
|
མཁན་སློབ་ཆོས་གསུམ་ཁྲི་ཁར་བཞུགས།
བློན་འབངས་འཛོམས་པའི་ཐོག་ལུ་ཆོས་ཁྲིམས་གསལ་བསྒྲགས་གནང་ནི།
|
|
རྒྱལ་པོ།
|
ད་རེས་བླ་ན་མཐོ་བའི་མཁན་སློབ་གཉིས་དང་།
བློན་འབངས་ག་ར་འཛོམས་པའི་སྦུག་ལུ་ བོད་ལྗོངས་ཆོས་ཀྱི་རྒྱལཔོ་ཁྲི་སྲོང་ལྡེའུ་བཙན་ང་གིས་
ཁྲིམས་ལུ་གསལ་བསྒྲགས་འབད་མི་དེ་ལུ་ རྒྱལ་བློན་འབངས་གསུམ་ཡོངས་ཀྱིས་ ཉིནམ་ད་རེས་ལས་འགོ་བཙུགས་ཏེ་ལག་ལེན་འཐབ་དགོ།
བོད་ཀྱི་རྒྱལ་པོའི་ཁྲིམས་འདི་ལུ་ ཆོས་ཁྲིམས། རྒྱལ་ཁྲིམས། ཐང་ཁྲིམས་ཟེར་དབྱེ་བ་གསུམ་སྦེ་ཕྱེ་ནི་དང་།
འདི་དང་བསྟུན་ཏེ་ལེགས་བྱས་འབད་མི་ལུ་ལེགས་སྐྱེས་ཕུལ་ནི། ཉེས་སྤྱོད་འབད་མི་དེ་ལུ་ཉེས་ཁྲིམས་ཆགས་ཡང་མེད་པར་བཀལ་ནི་ཨིན།
ལེགས་བྱས་ཟེར་མི་འདི་ཡང་དམ་པའི་ཆོས་ཨིནམ་ལས་ དེ་གི་དོན་ལུ་ རབ་བྱུང་གི་སྡེ་དང་། སྔགས་པའི་སྡེ་ཚན་གཉིས་བཙུགས་ཏེ་
དང་པ་ར་སངས་རྒྱས་བསྟན་པའི་རྨང་གཞི་ལྷོང་ནི་ཨིན།
|
|
མཁན་པོ།
|
དེ་ཚུ་གི་གྲལ་ཁ་ལས་
རྟེན་འབྲེལ་བཟུམ་ཅིག་སྦེ་ ད་རེས་དང་པ་ར་ བློ་རིག་གསལ་བའི་ཨ་ལོ་ཚུ་ལུ་ བརྡ་སྤྲོད་རིག་པ་ཚར་ཅིག་སྟོན་ཏེ་བལྟ་གེ།
|
|
རྒྱལ་པོ།
|
ཡ་
ཨ་ལོ་དེ་ཚུ་འཁྱིད་ཤོག་ཤིག
|
|
དེ་ལས་ཨ་ལོ་དག་པ་ཅིག་འོང་ཞིནམ་ལས་
མཁན་པོ་ལུ་ཕྱག་འཚལ་ཏེ་རྩ་བ་སྡོད་ནི། དེ་ལས་མཁན་པོ་གིས་ འོག་གི་ཚིག་དེ་ཚུ་རེ་རེ་སྦེ་རྗེས་ཟློས་འབད་བཅུག་ནི།
ཨིན་རུ་སློབ་མ་ཚུ་གིས་སྒྲ་མ་དྭགཔ་སྦེ་སླབ་ནི།
|
||
མཁན་པོ།
|
ན་མོ་བུདྡྷ་ཡ།
ན་མོ་དྷརྨ་ཡ། ན་མོ་སངྒྷ་ཡ།
|
|
ཟེར་བའི་བར་ན་ཡོལ་ལི་བསྡམས་ནི།
|
||
རྒྱབ་ཁའི་མཐོང་སྣང་།
|
སྒྲ་བསྒྱུར་གླིང་ཨིན་པའི་ཚུལ་སྦེ་
རྒྱབ་ཁར་འཇམ་དཔལ་དབྱངས་ཀྱི་སྐུ་པར་ཅིག་བཞག་ནི་དང་།
|
||
ལས་རིམ།
|
མདུན་ལུ་ལྕོགས་སྒྲོམ་དག་པ་ཅིག་གུར་དཔེ་རིང་ལེ་ཤ་བཀྲམ་སྟེ་བཞག་ཞིནམ་ལས།
མཁན་པོ་དང་ལོ་ཙ་བ་གཉིས་ཀྱིས་སྐད་བསྒྱུར་འབད་བའི་ཚུལ་སྟོན་ནི། དེ་ཡང་མཁན་པོ་གིས་
ལེགས་སྦྱར་ཚིག་རྐང་གཉིས་རེ་གསུངས་ཞིནམ་ལས་ ལོ་ཙ་བ་གིས་བོད་སྐད་ཚིག་རྐང་གཉིས་རེ་སླབ་སྟེ་བྲིས་ནི།
|
||
མཁན་པོ།
|
བི་དྷཱུ་ཏ་ཀལྤ་ནཱ་ཇཱ་ལ
གམྦྷི་རོ་དཱར་མཱུརྟ་ཡེ། ན་མཿ ས་མནྟ་བྷ་དྲཱ་ཡེ ས་མནྟསྐརན་ཏྭིཥེ།།
|
||
ལོ་ཙ་བ།
|
རྟོག་པའི་དྲ་བ་རྣམ་བསལ་ཞིང་།
།ཟབ་ཅིང་རྒྱ་ཆེའི་སྐུ་མངའ་བ། །ཀུན་ཏུ་བཟང་པོའི་འོད་ཟེར་དག །ཀུན་ནས་འཕྲོ་ལ་ཕྱག་འཚལ་ལོ།།
|
||
སྐད་བསྒྱུར་མཛད་པའི་བར་ན་
རྒྱལཔོ་དང་སློབ་དཔོན་གཉིས་གཟིགས་བསྐོར་བྱོན་ཏེ་སྐད་བསྒྱུར་འབད་ས་གཟིགས་ནི་དང་། དེ་ལས་རྒྱལཔོ་གིས་གསུངས་ནི།
|
|||
རྒྱལ་པོ།
|
སྐུ་དྲིན་ཆེ་བའི་མཁན་སློབ་རྣམ་གཉིས་དང་
ལོ་ཙ་རྣམ་པ་ག་ར་ཉིན་མཚན་བརྟོལ་མེད་ཕྱག་ལཱ་གནང་སྟེ་བཞུགསཔ་ལས་ སྐུ་འོ་བརྒལ་བྱུང་བྱུངམ་འོང་།
ད་ ན་ལས་ཕར་ཟླ་ཕྱེད་ལྷགཔ་ཅིག་གི་རིང་ལུ་ བོད་ཀྱི་ལོ་གསར་ཨིནམ་ལས་ཐུགས་ལྷོད་ཡངས་ཀྱི་ངང་ལུ་
ངལ་གསོ་བཞུགས་གནང་ཟེར་ཞུ་ནི་ཨིན།
|
||
གུ་རུ།
|
མངའ་བདག་རྒྱལ་པོ་མཆོག༑
དུས་ཅི་རྒྱལ་པོ་ཁྱེད་རང་ལོ་ཀག་ན་ཚུད་དེ་ཡོདཔ་ལས་ ལོ་གསར་གྱི་སྐབས་ལུ་ ཉེན་ཁ་ཆེ་བའི་རྩེདམ་གི་རིགས་དང་
ལྷག་པར་དུ་རྟ་རྒྱུགས་ཀྱི་རྩེདམ་དེ་བཀག་གནང་པ་ཅིན་ལེགས་ཤོམ་འོང་།
|
||
རྒྱལ་པོ།
|
སློབ་དཔོན་རིན་པོ་ཆེ༑
རྟ་རྒྱུགས་ཀྱི་རྩེདམ་འདི་ བོད་ཀྱི་ཐུན་མོང་མ་ཡིན་པའི་རྩེདམ་ཅིག་ཨིནམ་ལས་ དེ་བཀག་པ་ཅིན་
བློན་འབངས་ཚུ་གིས་ཉན་མ་བཏུབ་པའི་ཁར་། དེ་ལས་ཁོང་ལུ་ལོ་གསར་གྱི་སྤྲོ་བ་ཡང་མི་འོང་ནི་བཟུམ་ཅིག་འདུག།
|
||
གུ་རུ།
|
དེ་འབད་ཨིན་པ་ཅིན།
རྒྱལཔོ་ཁྱོད་རང་ཟབ་ཟབ་མཛད་གནང་།
|
||
དེ་ལས་ཁོང་ཆ་ཁྱབ་བྱོན་ནི་དང་ཅིག་ཁར་ཡོལ་ལི་བསྡམས་ནི།
|
|||
རྒྱབ་ཁའི་མཐོང་སྣང་།
|
བསམ་ཡས་གཙུག་ལག་ཁང་གི་པར་བཞག་ནི།
|
|
ལས་རིམ།
|
བློ་འོད་བསད་དེ་ཕྱི་རུ་གི་རྣམ་པ་སྟོན།
སྒྲོན་མེ་དག་པ་ཅིག་ དང་ཕུག་རྒྱལ་ཁང་ནང་གི་ལུགས་སྲོལ་སྦེ་སྤར་ཏེ་བཞག་ཞིནམ་ལས་ རྒྱལཔོ་རྟ་རྒྱུགས་གནང་སྟེ་བྱོནམ་ད་
སྐུ་གཟུགས་ལུ་མདའ་འཕོག་སྟེ་ཆིབས་ཁ་ལས་བུལ་ནི། དེ་ལས་ཞབས་ཞུ་པ་ཚུ་གིས་རྒྱལཔོ་ཉལ་ཁྲི་གུར་བཞག་ཞིནམ་ལས་
ནམ་ནངས་པའི་ཚུལ་སྦེ་གློག་འོད་སྤར། རྒྱལཔོ་ཉལ་ཁྲི་གུར་གན་རྐྱལ་སྦེ་གཟིམ། རྒྱལ་སྲས་མུ་ཏིག་བཙན་པོ་དགུང་ལོ་བརྒྱད་པའི་རྣམ་པ་ཅན་ཅིག་
དབུ་ལུ་སྤྲོ་ཞུ་བཞེས་ཏེ་རྒྱལ་པོའི་སྐུ་མདུན་ལུ་སྤུས་མོ་བཙུགས་ཞིནམ་ལས་རྒྱལ་པོའི་ཕྱག་ལུ་བཟུང་།
བཙུན་མོ་དང་སྐུ་འཁོར་ཚུ་གིས་བསྐོར་ཏེ་མྱ་ངན་གྱི་རྣམ་པ་སྟོན་ཏེ་བཞུགས་པའི་བར་ན་བཤགས་ནི། དེ་ལས་སྐུ་འཁོར་ཚུ་བཤུམས་ཏེ་བཞུགས་པའི་བར་ན་ མཁན་སློབ་གཉིས་ཡང་དེ་ཁར་བྱོན་པའི་ཤུལ་ལུ།
བློན་ཆེན་གྱིས་ ཐུགས་གསོ་དྲན་སྐུལ་གནང་ནི།
|
|
བློན་པོ།
|
སངས་རྒྱས་བསྟན་པའི་ཕྱག་ལཱ་སྦོམ་ཅིག་ཤུལ་ལུ་བཞག་སྟེ།
མངའ་བདག་རྒྱལཔོ་སྐུ་ཚེ་མ་བརྟན་པར་བཤགས་སོང་ཡི། ཨིན་རུ་ ད་མེད་པར་འབག་ཤོག་དང་ ཤི་བ་ལོག་ཤོག་ཟེར་ས་མེད།
ད་ང་བཅས་ཆ་ཁྱབ་འགྱོད་པའི་གཡང་ལུ་ལྷུང་ཏེ་སྡོད་ནི་མེན་པར་ རྒྱལ་པོའི་ཐུགས་ཀྱི་དགོངས་པ་ཆ་ཚང་བསྒྲུག་ནི་དོན་ལུ་
བསྟན་པའི་ཕྱག་ལཱ་དེ་རྒྱུན་འཐུད་དེ་ར་ འབད་དགོཔ་འདི་ ག་ནི་བ་ཁག་ཆེ་བས། དེ་འབདཝ་ལས་
སྤྱིར་བོད་ཀྱི་ལུགས་སྲོལ་དང་། བྱེ་བྲག་ཏུ་ད་རེས་ཀྱི་དོན་ཆེན་འདི་སྒྲུབ་ནི། ལྷག་པར་དུ་རྒྱལ་སྲས་མུ་ཏིག་བཙན་པོ་སྐུ་ན་མ་སྨིནམ་ལས་བརྟེན་ཏེ།
མངའ་བདག་རྒྱལཔོ་བཤགས་པའི་ལོ་རྒྱུ་འདི་ ལོ་བཅུ་ཐམ་གསང་རྒྱ་འབད་དེ་བཞག་ནི་ཨིན་སྨྲ་རེ།
|
|
དེ་ལས་སྐུ་འཁོར་ཚུ་བཤུམས་ཏེ་སྡོད་པའི་བར་ན་ཡོལ་ལི་བསྡམས་ནི།
|
||
རྒྱབ་ཁའི་མཐོང་སྣང་།
|
བསམ་ཡས་ཇོ་ཁང་གི་པར་བཞག་ནི།
|
|
ལས་རིམ།
|
མདུན་ལུ་རྒྱལ་བློན་གྱི་བཞུགས་ཁྲི་རྒྱས་པར་བཤམས་ཞིནམ་ལས།
གསེར་སྦྲེང་དང་བཅས་པའི་ཐོག་ལས་ རྒྱལ་སྲས་མུ་ཏིག་བཙན་པོ་བཙུན་མོ་གཉིས་དང་བཅས་པ་གདན་འདྲེན་ཞུ།
རང་རང་སོ་སོའི་ཁྲི་ཁར་བཞུགས་ཞིནམ་ལས་བློན་ཆེན་གྱིས་གསལ་བསྒྲགས་གནང་ནི།
|
|
བློན་ཆེན།
|
དགག་བྱ་དང་དགོས་པ་ལེ་ཤ་ཡོདཔ་ལས་བརྟེན་ཏེ་
ད་རེས་ཚུན་ཚོད་རྒྱལ་པོའི་སྲིད་དབང་འདི་ བློན་ཆེན་གྱིས་བཟུང་སྟེ་ཡོད་རུང་། ད་རྒྱལ་སྲས་མཆོག་ཡང་སྐུ་ན་སྨིན་ཏེ་
ཆབ་སྲིད་ཀྱི་ཐུགས་འགན་བཞེས་པའི་ལྕོགས་གྲུབ་ཅན་ཅིག་ལུ་གྱུར་ཏེ་ཡོདཔ་ལས་ ད་རེས་གཟའ་སྐར་དགེ་བའི་ཉིནམ་ལས་བཟུང་སྟེ་
ཆབ་སྲིད་ཀྱི་ཐུགས་འགན་དེ་ ལྷ་སྲས་མུ་ཏིག་བཙན་པོ་མཆོག་ལུ་ཕུལཝ་དང་ཅིག་ཁར་། ལྷ་སྲས་མཆོག་
བོད་ཆོས་ལྡན་རྒྱལ་པོའི་གསེར་ཁྲི་ལུ་མངའ་གསོལ་ཞུཝ་ཨིན།
|
|
དེ་ལས་གུ་རུ་རིན་པོ་ཆེ་གིས་གཙོ་བྱས་ཏེ་
རྒྱལ་སྲས་ལུ་ཁྲི་དར་འཕུལ་ཏེ་ ཡོལ་ལི་བསྡམས་ནི།
|
||
༼མཐོང་སྣང་གུ་པ།
༽
གུ་རུ་རིན་པོ་ཆེ་ལྷོ་ནུབ་སྲིན་པོའི་གཡུས་ཁར་ལོག་སྟེ་བྱོན་པའི་སྐོར།
རྒྱབ་ཁའི་མཐོང་སྣང་།
|
རྒྱབ་ཁར་བསམ་ཡས་གཙུག་ལག་ཁང་གི་པར་བཞག་ནི།
|
||
ལས་རིམ།
|
མདུན་ལུ་རྒྱལ་སྲས་དང་མཁན་སློབ་ཚུ་བཞུགས་ནི།
|
||
གུ་རུ།
|
རྒྱལ་བློན་ཚུ་གི་རྒྱབ་སྐྱོར་གྱི་འོག་ལུ་
ང་བཅས་མཁན་གཉིས་དང་ལོ་ཙ་བ་ཚུ་གིས་དཀའཝ་ཚད་མེདཔ་ཅིག་སྤྱད་པའི་ཐོག་ལས་ ཐོག་མར་བཀའ་དང་བསྟན་བཅོས་བསྒྱུར།
དེ་ལས་བཀའ་དང་བསྟན་བཅོས་དེ་ཚུ་གི་ བཤད་པ་དང་དབང་ལུང་འཁྲིད་གསུམ་ཡང་གནང་ཏེ་ཡོདཔ་ལས།
ད་ལྟོ་གི་གནས་སྐབས་ན་བལྟཝ་བཟུམ་ཅིག་འབད་བ་ཅིན།
བཤད་པ་དང་སྒྲུབ་པའི་སྡེ་གཉིས་ཀྱི་སྒོ་ལས་སངས་རྒྱས་ཀྱི་ལུང་དང་རྟོགས་པའི་བསྟན་པ་འདི་
གངས་ཅན་བོད་ཀྱི་ལྗོངས་འདི་ན་དར་ཁྱབ་སོང་སྟེ་ཡོད། དེ་འབདཝ་ལས་ མངའ་བདག་ཁྲི་སྲོང་ལྡེའུ་བཙན་གྱི་ཐུགས་ཀྱི་དགོངས་པ་བསྒྲུབས་ཚརཝ་དང་ཅིག་ཁར་
ངེད་ཀྱི་ལས་འགན་དེ་ཡང་དེམ་ཅིག་སྦེ་ཚརཝ་ཨིནམ་ལས་ ད་ང་ཡང་ལྷོ་ནུབ་སྲིན་པོའི་གཡུས་ཁ་ལུ་ལོག་སྟེ་འགྱོ་ནི་ཨིན།
ག་དེམ་ཅིག་སྦེ་ང་མ་འགྱོཝ་བཟུམ་ཅིག་འབད་བ་ཅིན་ སྲིན་པོ་མི་ཡུལ་ལུ་ཤོར་ཏེ་ མི་ཡུལ་སྟོངམ་བཟོ་ནི་གི་ཉེན་ཁ་ཡོད།
ད་རྒྱལ་སྲས་མཆོག་གི་ཁ་ཐུག་ལས་འབད་རུང་ མེན་ཟེར་གསུངས་ནི་མེདཔ་ཅིག་མཛད་གནང་།
|
||
རྒྱལ་སྲས་ཀྱིས་གསེར་དངུལ་ལ་སོགས་པའི་འབུལ་བ་སྦོམ་སྦེ་ཕུལ་ཞིནམ་ལས་སྤུས་མོ་བཙུགས།
གུ་རུའི་ན་བཟའ་ལུ་བཟུང་ཞིནམ་ལས་བཞུགས་དགོ་པའི་ཞུ་བ་ཕུལ་ནི།
|
|||
རྒྱལ་སྲས།
|
ཡབ་རྒྱལཔོ་སྐུ་ཚེ་མ་བརྟན་པར་དགུང་ལུ་གཤེགས་སོང་སྟེ་འབད་རུ་
ཡབ་ཁོ་རང་བཞུགསཔ་ལས་ལྷག་སྟེ་ ང་ལུ་བྱམས་པའི་ཕྱག་གིས་སྐྱོར། བརྩེ་བའི་སྤྱན་གྱིས་གཟིགས་ཏེ་བྱམས་སྐྱོང་མཛད་གནངམ་མ་ཚད།
ཆོས་སྲིད་ཀྱི་ལཱ་འགན་ག་ཅི་བཟུམ་ཅིག་ཐོན་ཏེ་འབད་རུང་ དེ་གི་དོན་ལུ་ག་ཅི་འབད་དགོཔ་ཨིན་ན་
ག་ར་མ་འོངས་མངོན་ཤེས་ཀྱིས་གཟིགས་ཞིནམ་ལས་གསུངས་ནི་དེ་གིས་ ད་ལྟོ་ཚུན་ཚོད་ཀྱི་བར་ན་དཀའ་ངལ་ག་ནི་ཡང་མ་བྱུང་མི་འདི་
གུ་རུ་རིན་པོ་ཆེ་ཁྱེད་ཀྱི་བཀའ་དྲིན་ཁོ་ན་ཨིན།
ད་ན་ལས་ཕར་
གུ་རུ་རིན་པོ་ཆེ་མ་བཞུགསཔ་བཟུམ་ཅིག་འབད་བ་ཅིན། ང་ལུ་ཆབ་སྲིད་ཀྱི་གྲོས་བསྟུན་འབད་ས།
སེམས་ཀྱི་དོགས་པ་འདྲི་ས་དང་། རེ་ལྟོས་བཅོལ་ས་ག་ཡང་མེདཔ་ལས་ དུས་བརྟན་ཀྱང་བོད་ལུ་བཞུགས་མ་ཚུགས་སྟེ་འབད་རུང་
ལོ་གཅིག་ཨིན་ཅིག་མེན་ཅིག་ར་བཞུགས་གནང་ཟེར་ཞུ་ནི་ཨིན།
|
||
འབུལ་བ་དེ་ཚུ་ལོག་སྟེ་གནང་།
རྒྱལ་སྲས་ཀྱི་དབུ་ལུ་གཞོང་ཞིནམ་ལས་གསུངས་ནི།
|
|||
གུ་རུ།
|
རྒྱལ་སྲས༑
ང་འགྱོ་སྟེ་འབད་རུང་ མགྱོགས་པར་ལོག་སྟེ་མཇལ་བའི་སྨོན་ལམ་ཡོད། ཁྱོད་ལུ་སྟབས་མ་བདེཝ་རེ་ཐོན་པ་ཅིན་
ང་ལུ་གསོལཝ་བཏབ་ཤིག་ ང་རང་མངོན་སུམ་དང་ ཡང་ཅིན་གཉིད་ལམ་ན་ཁྱོད་འཕྱད་པར་ཐོན་འོང་།
དེ་ལས་ཕྱི་ཁར་ཆབ་འབངས་མི་སེར་ལུ་བྱམས་སྐྱོང་གནང་། ནང་ན་ཏིང་ངེ་འཛིན་བསྒོམ་སྟེ་ཡིད་དམ་ལྷའི་བསྙེན་སྒྲུབ་གནང་ཞིནམ་ལས་ཆོས་ཀྱི་ཕུ་ཐག་ཆོདཔ་སྦེ་མཛད་གནང་།
དགུང་ལོ་བདུན་ཅུ་ལུ་བར་ཆད་ཅིག་ཡོདཔ་ལས་ རིམ་གྲོ་གང་དྲག་གནང་དགོཔ་ཁག་ཆེ།
|
||
རྒྱལ་སྲས།
|
གསོལཝ་མ་ཐོས་པར་བྱོན་ནི་ར་ཨིན་པ་ཅིན་
བོད་ཀྱི་འགྲོ་བ་མི་སེར་ཚུ་གིས་ ག་ཅི་འབད་དགོཔ་ཨིན་ན་དེ་གི་སྐོར་ལས་ཐ་མའི་སླབ་བྱ་ཅིག་གསུངས་གནང་།
དེ་ཡང་བོད་ཁ་བ་ཅན་གྱི་གཡུས་འདི་ན་ སྟོན་པ་ཤཱ་ཀྱ་ཐུབ་པནི་མ་བྱོན། བོད་ཀྱི་བླ་མའི་སྐལཝ་ཟེར་རུང་གུ་རུ་རིན་པོ་ཆེ་དང་།
ཆོས་སྐལ་ཟེར་རུང་འཕགས་པ་སྤྱན་རས་གཟིགས་ཨིནམ་ལས། དེ་དང་འབྲེལ་བ་ཡོད་པའི་སླབ་བྱ་ཅིག་གསུངས་སྟེ་བཀའ་དྲིན་བསྐྱང་གནང་ལགས།
|
||
གུ་རུ།
|
པད་འབྱུང་ང་ལུ་དད་པ་བསྐྱེད་མི་ཚུ་གིས་
སྡིག་པ་མི་དགེ་བའི་ལས་མ་བསགས། ཚེ་འདི་དང་ཕྱི་མ་གཉིས་ལུ་ཕན་པའི་རྒྱུ་ དཀར་པོ་དགེ་བའི་ལཱ་འབད།
མ་འོངས་པའི་དུས་ན་ མི་ག་གིས་པད་འབྱུང་ངའི་སྐུ་འདྲ་བཞེངས་རུང་ མི་དེ་སངས་རྒྱས་ཀྱི་སྐུ་འདྲ་བཞེངསམ་དང་ཁྱད་མེད།
དེ་ལུ་ག་གིས་དད་པ་བསྐྱེད་རུང་ ཡིད་ལ་བསམ་པའི་དོན་ཚུ་ཐོགས་པ་མེད་པར་འགྲུབ་ཚུགསཔ་མ་ཚད།
ཁ་ལས་བཛྲ་གུ་རུ་ག་གིས་བགྱང་སྟེ་འབད་རུང་ དེ་གིས་སྨོན་ལམ་ག་ཅི་བཟུམ་ཅིག་བཏབ་མི་དེ་
རང་བཞིན་ལྷུན་གྱིས་གྲུབ་སྟེ་འགྱོ་འོང་། དེ་འབདཝ་ལས་ ཉིན་མ་གི་དུས་ལུ་འཕགས་པ་ཐུགས་རྗེ་ཆེན་པོ་བསྒོམ།
ཕྱི་རུ་གི་དུས་ལུ་པདྨ་འབྱུང་གནས་ང་ཉིད་སྒོམས། ཁ་ལུ་བཛྲ་གུ་རུ་བགྱང་པ་ཅིན་དེ་གིས་ར་བཏུབ། ད་ང་འགྱོ་བའི་དུས་ལུ་འབབ་ཨིན་མས།
|
||
དེ་ལས་རྒྱལ་བློན་སྐུ་འཁོར་ཚུ་གིས་
ཕེབས་སྐྱེལ་ལུ་བྱོན་ཏེ་འཁྲབ་སྟེགས་ཀྱི་གདོང་ཁར་ལྷོདཔ་ད་ མཁའ་འགྲོ་ཡེ་ཤེས་མཚོ་རྒྱལ་གྱིས་རྔུའི་ཐོག་ལས་ཞུ་ནི།
|
|||
མཚོ་རྒྱལ།
|
ང་རང་སྐྱེས་སའི་ཕ་ཡུལ་སྤངས་ཏེ་
གུ་རུ་རིན་པོ་ཆེའི་ཕྱག་ཕྱིས་ཞུ་སྟེ་སྡོད་རུང་ ད་གུ་རུ་རིན་པོ་བྱོན་པའི་ཤུལ་ལུ་ སེམས་ཀྱི་རྟེན་ས་ཅིག་
ག་ཡང་མིན་འདུག དེ་འབདཝ་ལས་གུ་རུ་རིན་པོ་ཆེ་བྱོན་མ་སོང་པར་ བོད་ཁམས་སྐྱོང་སྟེ་ར་བཞུགས་གནང་ལགས།
|
||
གུ་རུ།
|
ད་ལྟོ་བོད་ཀྱི་རྒྱལ་པོའི་ཆབ་སྲིད་དགུང་ལས་དར།
སངས་རྒྱས་ཀྱི་བསྟན་པ་ཡང་དར་ཞིང་རྒྱས། དེ་གིས་མ་ཚད་ཨོ་རྒྱན་ངའི་བརྒྱུད་འཛིན་ཡང་ལེ་ཤ་ཡོད།
ཁྱེད་ཇོ་མོ་དེ་ཚུ་ཡང་རང་དབང་ཐོབ་སྟེ་ཡོདཔ་ལས་ ང་སྡོད་དང་མ་སྡོད་ཁྱད་པར་ག་ནི་ཡང་མེད།
དེ་བ་འདི་སེམས་ཀྱི་རེ་ཐག་མ་ཆད་པར་ དུས་དང་རྣམ་པ་ཀུན་ཏུ་ང་ལུ་གསོལཝ་བཏབ། པད་འབྱུང་ངའི་ཐུགས་རྗེས་སྤྱན་གྱིས་གཟིགས་ཏེ་ར་སྡོད་འོང་།
|
||
དེམ་ཅིག་གི་བར་ན་
སྤྲིན་དང་སྨུག་པའི་བར་ལས་ དཔའ་བོ་སྡེ་བཞི་དང་ རྟ་མཆོག་གནགཔ་སྒ་ཆས་ཅན་ཅིག་རྟ་སྐད་ཚེར་ཏེ་གདོང་ཁ་ལུ་འོང་ནི།
|
|||
གུ་རུ།
|
ད་
ང་ སྐྱེལ་མིན་དགོ་ ང་བདེ་བ་ཆེན་པོའི་ཕོ་བྲང་ནང་འགྱོཝ་ཨིན། ཁྱེད་རྒྱལ་བློན་ཚུ་ལོག་སྟེ་མཇལ་བའི་སྨོན་ལམ་ཡོད།
ང་འགྲོ་ལྷོ་ནུབ་སྲིན་པོའི་ཡུལ་དུ་འགྲོ༔
གདོང་དམར་སྲིན་པོ་འདུལ་དུ་འགྲོ་ཙ་ན༔ སེམས་ཅན་ཐམས་ཅད་བདེ་ལ་བཀོད་དུ་འགྲོ༔ ང་འགྲོ་ཟངས་མདོག་དཔལ་རིའི་ཕོ་བྲང་འགྲོ༔
ཟངས་མདོག་དཔལ་རིའི་ཕོ་བྲང་འགྲོ་ཙ་ན༔ །སྲིན་པོ་ཐམས་ཅད་ཆོས་ལ་འཛུད་དུ་འགྲོ༔ རྗེས་འབངས་ཡུན་དུ་སྐུ་ཁམས་བདེ་བར་བཞུགས༔
།ཐུགས་རྗེ་རྒྱུན་ཆད་མེད་དོ་གསོལ་བ་ཐོབ༔
|
||
གོང་གི་མགུར་མ་འདི་སྐྱོ་ཉམས་དང་ལྡན་པའི་ཐོག་ལས་འགོ་བཙུགས་ཞིནམ་ལས།
གུ་རུ་ཆིབས་ཁར་ཞོན་ཏེ་བྱོན་ནི་དང་ རྒྱལ་བློན་རྣམས་ཕྱག་གཉིས་ཐལ་མོ་སྦྱར་སྤྱན་ཆབ་ཤོར།
གུ་རུ་བྱོན་སར་གཟིགས་ཏེ་མཇུག་བསྡུ་ནི་ཨིན།
|
|||
No comments:
Post a Comment