༡ བཟང་པོ་བས་ངན་པ་བྲིན་དུས། དྲང་པོ་བས་ཁྲེལ་མེད་རྒྱལ་དུས།
དྲིན་ཅན་ལས་གསར་གྲོགས་འདམ་དུས་།
སྟེང་དཔོན་གྱི་བཀའ་ཁྲིམས་འཕྱུག འོག་འབངས་ཀྱི་བྱ་སྤྱོད་འཕྱུག
བཟང་པོ་ལས་ཀྱང་སྐྱེ་བོ་ངན་པ་རྣམས་ཚོང་ཟོག་བྲིན་པ་ལྟར་སྐད་གྲགས་ཆེ་བའི་དུས་དང་།
མི་དྲང་པོ་ལས་ཀྱང་ངན་པ་རྒྱལ་ཁ་ཐོབ་པའི་དུས། དྲིན་ཅན་གྱི་མི་ལས་གྲོགས་གསར་འདམ་ཁ་རྒྱབ་པའི་དུས་དེར།
སྟེང་དུ་དཔོན་གྱི་བཀའ་ཁྲིམས་ལ་ནོར་འཁྲུལ་བྱུང་བ་དང་། འོག་མ་འབངས་རྣམས་ཀྱིས་བྱ་བ་དང་སྤྱོད་ལམ་རང་བཞིན་གྱིས་ནོར་ནས་འགྲོ་བ་ཡིན།
༢ ཁ་མི་མང་ཀ་མེད་རོགས་ཀྱིས་དྲི་ནན། ཝ་མི་བརྒྱལ་ཀ་མེད་འདྲེ་ཡིས་འའགྲམ་ལྕག
ཁྱི་མི་ཟུག་ཀ་མེད་རྐུན་མས་ནག་འབུར།
གཞན་གྱི་དྲི་བ་ནན་པོར་བཀོད་ཚེ་རང་ཡང་ཁ་མི་མང་ཐབས་མེད་ཡིན་པ་དང་།
འདྲེ་ཡིས་འགྲམ་ལྕགས་ཞུགས་དུས་ཝ་མོ་མི་བརྒྱལ་ཀ་མེད་ཡིན་ལ། རྐུན་མ་ནག་འབུར་འབུར་བྱས་ནས་འོང་དུས་སྒོ་ཁྱི་དེ་ཡང་སྐད་མི་རྒྱབ་ཀ་མེད་ཡིན་ནོ།།
༣ གོང་མ་བཀུར་ལུགས། འོག་མ་སྐྱོང་ལུགས།
མཉམ་པོར་འགྲོ་ལུགས་ཐམས་ཅད་རང་ཚོད་དང་མཐུན་པ་ཞིག་ལག་ཏུ་ལེན་དགོས།
ཡར་གོང་མར་གུས་ཞབས་བསྐྱེད་ཐངས། མར་འོག་མར་བྱམས་སྐྱོང་བྱ་ལུགས།
རང་མཉམ་རྣམས་དང་འགྲོ་ལུགས་སྡོད་ལུགས་སོགས་ཀྱང་ཡུལ་གང་ཡིན་དེའི་ཚོད་དང་མཐུན་པ་ཞིག་བྱ་དགོས།
༤ གང་གིས་མོས་པ་ཡིད་བྱེད་པ། དེ་ཡི་མདུན་ན་ཐུབ་པ་བཞུགས།
སྐྱེ་བོ་གང་གིས་མོས་ཤིང་དང་བའི་སྒོ་ནས་དད་པ་བསྐྱེད་པ་དེའི་མདུན་ན་ཐུབ་པ་བཅོམ་ལྡན་འདས་ཀྱང་བཞུགས་པ་ཡིན།
༥ གཞན་སྐྱོན་མ་ཡིན་རང་སྐྱོན་ཡིན། མེ་ལོང་ངོས་ལ་གཟུགས་ཤར་འདྲ།
གཞན་ལ་སྐྱོན་དུ་མཐོང་བ་དེ་ནི་གཞན་སྐྱོན་མ་ཡིན་པར་རང་སྐྱོན་ཡིན་ཏེ།
དཔེར་ན་མེ་ལོང་ངོས་ལ་གཟུགས་བརྙན་ཤར་བ་དེ་ནི་རང་གི་གཟུགས་བརྙན་ཡིན་པ་ལྟ་བུའོ།
༦ གཞན་སྐྱོན་མ་བརྟག་རང་གི་སྐྱོན་ལ་བརྟག།
གཞན་མཚང་མ་འབྲུ་རང་གི་མཚང་ནས་བྲུས།
དུས་རྒྱུན་དུ་གཞན་སྐྱོན་འཚོལ་ནས་མ་བཞུགས་པར་རང་ལ་ཡང་སྐྱོན་ཡོད་མེད་བརྟག་དགོས།
དེ་བཞིན་གཞན་གྱི་སྐྱོན་བཤད་རྒྱབ་ནས་མ་བཞུགས་པར་རང་གི་སྐྱོན་ཡང་ངོས་ལེན་བྱས་བཤད་དགོས།
༧ ང་རྒྱལ་གྱི་སྒོང་བུ་ལ་ཡོན་ཏན་གྱི་ཆུ་མི་ཆགས།
སེམས་ལ་ང་རྒྱལ་གྱིས་ཁེངས་ནས་རྡོག་རྡོག་རིལ་རིལ་བྱས་ནས་བཞུགས་ན་དེ་ལ་ཆུ་དང་འདྲ་བའི་ཡོན་ཏན་གང་ཡང་མི་ཆགས།
༨ རྒྱུད་འཇམ་དུང་ངེ། སེམས་དྲང་ཤད་དེ།
ཁོག་ཡངས་ཁྲོལ་ལེ་བ།
རང་རྒྱུད་བལ་ལས་འཇམ་པ། སེམས་རྒྱུད་མདའ་ལས་འཕྲང་བ།
ཁོག་པ་རི་གཤོང་ལས་ཡང་བ་ཞིག་དགོས།
༩ ལག་པའི་ཐོག་ལ་གྲི་ངན་རྣོ། སྤྲང་པོའི་ཐོག་ལ་ཁྱི་ངན་བཙན།
ཉམས་ཆུང་ཐོག་ལ་མི་ངན་སྡང་།
ལག་པ་དང་ཐུག་ན་རང་མེད་པའི་གྲི་ངན་རྣམས་གང་བས་རྣོ་བ་དང་།
སྤྲང་པོ་དང་ཐུག་ན་ཁྱི་ངན་སྤྲང་ཁྱི་རྣམས་སྡང་བ་དང་། མི་ཉམ་ཆུང་གི་ཐོག་ལ་མི་ངན་རྣམས་ཀྱིས་སྡང་བ་ཡིན།
༡༠ མཐོ་འདོད་ན་དམན་ས་འཛིན་དགོས། རྒྱལ་འདོད་ན་ཕམ་ཁ་ལེན་དགོས།
མཐོན་པོའི་གོ་སར་འགྲོ་དགོས་ན་རང་ཉིད་དམན་ས་འཛིན་ནས་སྡོད་དགོས་པ་དང་།
རྒྱལ་ཁ་འཐོབ་དགོས་ན་སྐབས་རེ་ཕམ་ཁ་ལེན་དགོས།
༡༡ མཐོ་དགའ་ཅན་དང་། དམའ་སྡང་ཅན་དེ་བྱེད་མི་རུང་།
མཐོ་བ་གོང་མ་རྣམས་ལ་དགའ་ཚོར་ཆེ་མདོག་དང་།
དམའ་བ་རྣམས་ལ་སྡང་བའི་སེམས་ནམ་ཡང་བྱ་མི་རུང་།
༡༢ མཐུན་པ་ཡུན་དུ་འགྲིགས་པ་དཀོན། ཕྱུག་པོ་ཚེ་གཅིག་སྐྱིད་པ་དཀོན།
མཁས་པ་ཉེས་མ་མྱོང་བ་དཀོན།
གནས་སྐབས་མཐུན་པོར་གནས་ཀྱང་དུས་ཡུན་རིང་དུ་འགྲིགས་པ་དཀོན་ཞིང་།
ཕྱུག་པོ་ཡིན་ཀྱང་མི་ཚེ་གཅིག་སྐྱིད་པོའི་ངང་དུ་གནས་པ་དཀོན་པ་དང་། མཁས་པ་ཞིག་ཡིན་ཀྱང་ཉེས་སྐྱོན་རྩ་བ་ནས་མ་བྱུང་བ་དཀོན་པ་ཡིན།
༡༣ སྐྱིད་ཐེག་སྡུག་ཐེག། བཟང་ཤོང་ངན་ཤོང་།
སྐྱིད་པོ་བྱུང་ན་སྐྱིད་ཐེག་པར་བྱས་ནས་ལང་ཤོར་མི་འགྲོ་བ་དང་།
སྡུག་པོ་བྱུང་ན་ཡང་སྡུག་བསྔལ་ཐེག་པར་བྱས་ནས་སྐྱོ་གཏམ་མི་བཤད་པར་བྱ་དགོས་ཤིང་། བཟང་པོ་བྱུང་ན་ང་རྒྱལ་མི་བསྐྱེད་པ་དང་།
ངན་པ་བྱུང་ན་འུ་ཐུག་ཐབས་ཟད་ཀྱི་བྱ་བ་ལ་མི་འཇུག་པ་བྱ་དགོས།
༡༤ གཞན་སྐྱོན་འཚོལ་བའི་ཐུར་མ་རྣོ་རུང་།
རང་སྐྱོན་བལྟ་བའི་མེ་ལོང་ཡོད་པ་ཤིན་ཏུ་དཀོན།
གཞན་སྐྱོན་འཚོལ་བའི་ཐུར་མ་དང་འདྲ་བའི་རིག་པ་རྣོ་ན་ཡང་།
རང་སྐྱོན་བལྟ་བའི་མེ་ལོང་དང་འདྲ་བའི་དྲན་ཤེས་ལྡན་དགོས།
༡༥ མི་གནོང་ཅན་ཁྲོ། རྟ་རྒྱབ་ཆད་འཕག
མི་རང་ལ་སྐྱོན་ཡོད་ན་ཕྲལ་དུ་ཁོང་ཁྲོ་སྐྱེ་བ་ཡིན་ཏེ།
དཔེར་ན། རྟ་ལ་རྒྱབ་ཁུར་མེད་ན་འཕག་འཚག་རྒྱབ་པ་ལྟ་བུའོ།
༡༦ བསྟོད་ན་ཨ་སྔོན་གནམ་གྱི་དཀྱིལ་རེད།
སྨད་ན་དོག་མོ་སའི་གཏིང་རེད།
བསྟོད་གོང་ན་ཡོད་པ་དེ་ནམ་ཁའི་དཀྱིལ་དང་།
མར་སྨད་ན་ཡོད་པ་དེ་དོག་མོ་སའི་གཏིང་ཡིན་པ་ལྟར་གནས་ཚུལ་གང་ཡིན་མི་ཤེས་པ་གང་ཡང་མེད།
༡༧ ལར་རྒྱུས་མེད་མི་ལ་བསྟོད་ར་མ་སྔ། རྒྱུས་ཡོད་མི་ལ་དགའ་སྡུག་མ་སྔ།
སྤྱིར་སྟངས་ནས་རྒྱུས་མེད་ཀྱི་མི་ལ་ཕྲལ་དུ་བསྟོད་པ་རྒྱབ་རྒྱུ་མེད་པ་དང་།
རྒྱུས་ཡོད་ཡིན་ན་ཡང་ཕྲལ་དུ་དགའ་སྐྱོའི་ཚོར་བ་གང་ཡིན་བཤད་རྒྱུ་མེད།
༡༨ སྐྱོན་མེད་ཡོན་ཏན་ལྡན་པའི་མི་དཀོན།
འཛེར་མེད་དྲང་པོར་སྐྱེས་པའི་ཤིང་དཀོན། རྣོ་མཉེན་ངར་དང་ལྡན་པའི་ལྕགས་དཀོན།
ཉེས་སྐྱོན་རྩ་བ་ནས་མེད་པར་ཡོན་ཏན་རྐྱང་རྐྱང་ལྡན་པའི་མི་ཞིག་དཀོན་ཏེ།
དཔེར་ན་འཛེར་པ་རྩ་བ་ནས་མེད་པའི་ཤིང་དཀོན་པ་དང་། ཁ་རྣོ་བ་དང་རྒྱུད་ངར་དང་ལྡན་པའི་ལྕགས་དཀོན་པ་བཞིན་ནོ།།
༡༩ མཁས་པའི་ཁོག གཡོན་ཅན་གྱི་སྒྱུ། བརྫུ་བག་ཅན་གྱི་གཤིས།
༢༠ དཔྱད་མཁས་ན་གང་རུང་གོམས་ཆ་སྐྱེ་བས་སྐྱིད།
བརྟག་ཤེས་ན་གང་ཐོས་ཆ་རྒྱུས་ལོན་པས་སྐྱིད།
༢༡ དགྲ་འདྲེ་གཉིས་དང་མ་འཕྲད་ན། རང་ཚུགས་ཅན་དེ་སུ་ཡང་ཡིན།
རྒྱུ་ཚེགས་གཉིས་དང་མ་འཕྲད་ན། ཁ་བཟང་བ་དེ་སུ་ཡང་ཡིན།འགྱོད་རྐྱེན་ངན་པ་མ་འཕྲད་ན། ཁ་མཁས་པ་དེ་སུ་ཡང་ཡིན།
སྐྱིད་སྡུག་ཐོག་ཏུ་མ་བབས་ན། །ཨ་མའི་སྒོ་ཁར་སུ་ཡང་བཟང།།
༢༢ ལར་དཔོན་མེད་ན་འབངས་མགོ་སུ་ཡིས་སྐྱོབ།
འབངས་མེད་ན་རྒྱལ་པོ་སུ་ལ་བྱེད། དཔོན་དྲང་ན་རྗེ་འབངས་སྐྱིད་ཅིང་བཙན། འབངས་རྒྱས་ན་རྒྱལ་པོའི་རྒྱན་ཆ་ཡིན།
དཔོན་བཟང་པོས་འབངས་ལ་ཁ་མགོན་མཛད། འབངས་བཟང་པོས་དཔོན་ལ་རྩིས་བཀུར་བྱེད།།
༢༣ ཤིང་གིས་ཤིང་བཏེགས་ན་ཀ་བ་དང་གདུང་མ།
མི་ཡིས་མི་བཏེགས་ན་དཔོན་པོ་གཡོག་པོ།
༢༤ བློ་དང་བྱ་བ་ཚོད་ཟིན་ན། དགྲ་བོ་བཙན་པོ་ལ་ཡ་ཐུབ་པ།
གཉེན་དང་དམན་པའི་ཚིག་ཐེག་པ། རྒྱུད་འཇམ་ཤིང་ཕྱི་ཐག་རིང་བ། རང་ཚུགས་ནམ་ཡང་མི་འཆོར་བ་ཞིག་དགོས།
ཕུ་ནུ་ནང་འཛིང་བྱུང་ན་ཁྲེལ་མེད་རྒྱལ། བཟའ་ཚང་ནང་འཛིན་བྱུང་ན་བུད་མེད་རྒྱལ།
No comments:
Post a Comment