རྫོང་ཁའི་སྡེབ་སྦྱོར་རིག་པའི་ལས་འགུལ།

རྫོང་ཁའི་སྡེབ་སྦྱོར་རིག་པའི་ལས་འགུལ།

ཕུལ་མི་བདེ་ཆེན་དབང་མོ། དམར་རྟགས་ཡོད་མི་ཚུ་ནོར་བཅོས་འབད་འབདཝ་ཨིན།

ངོ་སྤྲོད།

ཀ་དག་རིག་པའི་གནས་ཀྱི་རྒྱ་མཚོ་དེ།།   ཁ་གཏིང་གཟབ་ལས་བརྩོན་པའི་རྩལ་མཁས་རུང་།།

ག་ར་ཤེས་པའི་ནམ་དུས་མེདཔ་ལས་བརྟེན།།   ང་ཡི་ལེགས་བཤདཔ་མཁས་པའི་ཐུགས་བསྐྱེད་ཀྱིས།།

ཅ་ཆས་ལེགས་ཉེས་དབྱེ་བ་ཕྱེ་དོ་བཟུམ།།   ཆ་ཤས་ཕྱེ་སྟེ་རིག་གནས་སློབ་སྦྱོང་འདི།།

ཇ་ཀུས་ཇའི་ ༼ཡི༽ ཚད་གཞི་བཟོ་བ་ལྟར།། ཉག་ཕྲ་ང་ཚོའི་བློ་མཚུངས་གནང་སྟེ་ཡོད།།

ཏ་ལེ་ཚི ༼ག༽ ་གི་རྣམ་པ་འཐོན་པ་ལུ།། ཐ་མལ་རང་ལུ་ཤེས་ཡོན་ཆུང་སོང་རུང་།།      

ད་རེས་སྙན་རྩོམ་ལས་འགུལ་འདི་ལུ་བརྟེན།། ནམ་ཡང་མཁོ་བའི་རིག་པ་ཐོབ་སྟེ་ཡོད།།

པ་ནེ་མེད་ཚེ་རྡོག་མ་མི་ཞིམ་པས།། ཕ་མ་མེད་ཚེ་བུ་གཞི་མི་སྐྱིད་པས།།       

བམ་ཚན་མེད་ན་ཆོས་ཚན་མ་གསལཝ་ལས།། མ་གསལཝ་མེདཔ་སྦེ་ཀ་རྟགས་བཀོད་དེ་ཡོད།།

ཙམ་པ་ཀ་ལྟར་གཞིབ་སྟེ་མེད་རུ་རང་།། ཚང་ཚིང་སྤུངས་པའི་ཚིག་གི་བར་ནང་ལས།།

ཛཱ་ཏི་འདྲ་བའི་སྙན་ཚིག་གཟིགས་པའི་ཚེ།། ཝ་ལེར་ཐུགས་ཀྱི་རླུང་ནད་སེལ་ཕྱིར་བཞེས།།

ཞག་གཅིག་ཞག་གཉིས་བསྣེམ་པའི་སྦང་ཆང་གིས།། ཟ་ཁམས་བཀག་པའི་གཞི་ལས་མེད་དོ་བཟུམ།།

འར་འུར་ངང་ལས་བྲིས་པའི་ལས་འགུལ་འདིར།། ཡར་ཡར་རིག་པ་འཕེལ་བའི་རྐྱེན་མེདཔ་འོང་།།

རང་སྐལ་ཨིན་ཚེ་རྡོ་ཡང་རྨུར་དོ་བཟུམ།། ལམ་སྟོན་བཟང་པོ་སེམས་ལུ་བཞག་སྟེ་གིས།།

ཤ་ཚའི་ཧིང་གིས་བྲིས་པའི་སྙན་རྩོམ་འདིས།། སང་ཕོད་ལོ་ངོ་བཞི་པར་ལྷོད་བཅུག་ཅིག།

ཧན་པའི་ཚིག་གིས་རྒྱན་ཏེ་མེད་རུ་རང་།། ཨམ་སྲུ་རང་གིས་འབད་བརྩོན་བསྐྱེད་དེ་གིས།།

ཧ་ལམ་ཚུལ་དང་མཐུནམ་ཅིག་བྲིས་མི་ལུ།། ཨ་ཙི་བྱམས་པའི་སྒོ་ལས་གཟིགས་གནང་ཞུ།།

·      སྤྱིར་གྱིས་ སྙན་རྩོམ་གྱི་ནང་གསེས་ལུ་ གཅད་ལྷུགས་སྤེལ་མ་འབད་ གསུམ་ཡོད་ས་ལས་ ས་འགུལ་འདི་ནང་ ཚིག་གཅད་ཀྱི་སྒོ་ལས་ སྙན་རྩོམ་གྱི་ཚིག་འབྲུའི་དབྱེ་བ་ སོ་སོར་ཡོད་མི་ཚུ་བཀོད་དེ་ཡོད།

·      འདི་ལུ་ཡང་ ཚིག་འབྲུ་དྲུག་མ། བདུན་མ། བརྒྱད་མ། དགུ་མ། བཅིུག་མ། བཅས་ཡོད་མི་ཚུ་ རེ་རེ་བཞིན་གསལ་ཞུ་འཕུལ་བ་ཅིན།

༡༽ ཚིག་འབྲུ་དྲུག་མ།  ༢་༢་༢

ལས་འཕྲོ་ཅན་གྱི་སྟག་ཤར།།ལ་མོའི་རྒྱབ་ལུ་ཐལ་ཚེ།།

ལས་ངན་སྨན་ཆུང་ང་རང་།།ལཱ་ལུ་ལག་རྩིས་མ་ཐེབས།།

མིག་གཞི་མཐུན་པའི་སྟག་ཤར།།མི་ཡི་དཀྲོགས་ཁ་མ་ཉན།།

མི་འདོད་སེམས་ཀྱི་སྡུག་བསྔལ།།མི་ཁ་དེ་ལས་འཐོན་འོང་།།

   

སྟག་ཤར་ཁྱོད་ཀྱི་སེམས་འདི།།རྟག་པ་མེད་པའི་ཚེ་འདིར།།

བཏབ་པའི་ལོ་ཐོག་བཟུམ་སྦེ།།རྟག་བུ་ང་ལུ་བཞག་གནང་།།   

ཡིད་འོང་ངེ་གི་ལུས་སེམས།།ཡིད་གཉིས་ཐེ་ཚོམ་མེད་པར།།

ཡིད་འཕྲོག་སྟག་ཤར་ཁྱོད་ལུ།།ཡིད་ཆེས་སྒོ་ལས་གཏད་ཡོད།།

                   དགུང་དང་སྤྲིན་གྱི་མཚམས་ལུ།།གསེར་གྱི་ཆོས་རྟེན་བཞེངས་ནུག།

                   སེམས་ཀྱིས་བསྐོར་ན་མ་གཏོགས།།ལུས་ཀྱིས་བསྐོར་ས་མིན་འདུག།

༢  ཀ༽ཚིག་འབྲུ་བདུན་མ།  ༢་༡་༢་༢།

བསིལ་དྲོད་དང་ལྡན་པའི་འབྲུག་ཡུལ།།ཞིང་ཁམས་ལས་ཞན་དྲག་མེན་པས།།

རྒྱལ་ཁབ་ཀྱི་མངའ་བདག་མི་སེར།།མེས་པོ་དང་ལྷ་ཕྲུག་འདྲ་བས།།

                                      ༼གནམ་༽ རྣམ་བཀོད་ཀྱིས་བཀོད་པའི་བུ་ཁྱོད།།ལ་ལུང་གི་རྒྱབ་ལུ་འབད་རུང་།།

                                      ཞལ་འཛུམ་པའི་ཧ་ལོའི་མེ་ཏོག།རང་སེམས་ཀྱི་ལྡུམ་རང ༼རར་༽ ་ཤར་དོ།།

པད་གླིང་གི་གདུང་ལས་བྱོན་པའི།།དྲིན་ཅན་གྱི་མངའ་བདག་ཡབ་སྲས།།

དབང་ཕྱུག་གི་གསེར་ཁྲིའི་སྟེང་ལུ།།འགྱུར་མེད་ཀྱི༌ངང༌ལུ༌བཞུགས༌བཅུག།

༢  ཁ༽ཚིག༌འབྲུ༌བདུན༌མ། ༢་༢་༢་༡

ཁྱོད་ཞལ་བཅོ་ལྔའི་ཟླ་བ་དེ།།ན་ཚའི་ས་སྨུག་མ་སྤུབས་པར།།

རྟག་བུ་ཀུ་མུད་ང་དང་ཆ།།དགའ་སྤྲོའི་ངང་ལས་བཞུགས་གནང་མས།།

ཞལ་རས་ལེགས་ཚེ་མིག་ཁར་ཚུད།།སྐུ་གཟུགས་བྱ་ཚེ་སེམས་ཁར་འབབ།།

གསུང་སྐད་ཧན་ཚེ་རྣ་བར་འཛུལ།།སྟག་ཤར་ལྷ་དང་འདྲ་བ་ལོ།།

སྒྱུ་མའི་ནོར་ལ་ཆགས་པ་གཅིག།མཛེས་པའི་གཟུགས་ལ་ཞེན་པ་གཉིས།།

སྙན་པའི་སྒྲ་ལ་གཏད་པ་གསུམ།།འཁོར་བར་ཐིམ་པའི་རྒྱུ་ཡིན་ ༼ཨིན་༽ པས།།

མཚར་མཚར་ཁྱོད་ཞལ་པད་མ་ལུ།།ཧྲིག་ཧྲིག་མིག་གི་གསེར་སྦྱངམ་གཉིས།།

ཁྱིར་ཁྱིར་ང་ལུ་བལྟ་བའི་ཚེ།།འདར་འདར་ངའི་ ༼ཡི་༽ གཟུགས་རྩ་འདར།།

༢  ག༽ཚིག་འབྲུ་བདུན་མ། ༢་༢་༡་༢

ས་ཐག་རྒྱང་གི་བུ་ཁྱོད་ལུ།།དམ་ཚིག་ཡོད་ག་ང་མི་ཤེས།།

ནཱ་ལུ་སྡོད་མི་བུམོ་ང་ལས།།སེམས་ཀྱི་དམ་ཚིག་ཁྱོད་ལུ་ཡོད།། ༼སེམས་ཀྱི་དམ་ཚིག་དེ་ཡོད་གོ༽

མཐོ་བ་གངས་ཀྱི་ལ་རྩེ་ལུ།།ལ་དར་ཟུང་གཅིག་འཕྱར་ནུག་ལོ།།

དམའ་བ་གཡུས་བཟང་འདི་ཁ་ལུ།།ང་བཅས་གཉིས་ཀུ་འཆམ་ད་གེས།།

༼ཚིགས་བཅད་འདི་༢༢༢༡ཨིན་མས༽

རང་ལུ་ཕན་པ་ཡོདཔ་ཟེར་རུང་།།དམ་པའི་ལྷ་ཆོས་ལས་མིན་འདུག།

ད་ལྟོ་དུས་ཚོད་བཟངམོ་ཐོབ་ད།།འཕྲོ་བརླག་མ་གཏང་ངེ་ ༼ངའི་༽ ཆ་རོགས།།

༣  ཀ༽ཚིག༌འབྲུ༌བརྒྱད༌མ། ༡་༢་༢་༢་༡

ང་གཡུས་ཀྱི་སྨན་ཆུང་བུ་མོ་འདི།།ཕྱི་བལྟ་བའི་ངོ་རིས་མ་ལེགས་རུང་།།

ནང་སེམས་ཀྱི་དམ་ཚིག་གཙངམ་ལས་བརྟེན།།ཁྱོད་ང་དང་སྡོད་ན་མི་དྲག་ག།

མཐོཝ་དགུང་སྔོན་གཡུ་ཡི་ཕོ་བྲང་ནང་།།དགུང་ཁྲི་གདུགས་ཉི་མའི་བྱོན་ལུགས་དེ།།

དམའཝ་འབྲུག་ཡུལ་སྐྱིད་པའི་རྒྱལ་ཁབ་ཀྱི།།དཔོན་མངའ་བདག་བྱོནམ་ད་དབྱེ་བ་མེད།།

མར་ལྡུམ་ར་ནང་གི་ཧ་ལོ་དེ།།ཕྱི་བལྟ་བའི་ཁ་དོག་ལེགས་ཐངས་དང་།།

ནང་ཞིམ་པའི་སྦྲང་རྩི་ལྡན་ལུགས་གཉིས།།ལྕམ་རྗེ་བཙུན་པདྨ་མི་འདྲ་བས་ག?

བུཚུ་ཁྱོད་ཀྱིས་བརྒྱུད་འཕྲིན་ནང་ན་ལས།།གཏམ་ཧན་པའི་ཚིག་གི་མེ་ཏོག་འདི།།

ངེ་སེམས་ཀྱི་ལྡུམ་ར་ཁྲ་མའོའི་ནང་།།དུས་རྟག་བུ་ལོ་འདབ་རྒྱས་ཏེ་ཡོད།།

མར་ལྡུམ་རང་སྐྱེས་པའི་ལ་ཕུག་དེ།།རྩཝ་ཆེ་ཆུང་རང་གིས་མི་ཤེས་པས།།

ཁྱོད་ལེགས་པའི་སྟག་ཤར་གཞོན་པ་དེ།།ནང་བསམ་གཤིས་རང་གིས་མི་མཐོང་མས།།

ང་རྒྱང་ལས་འཁོར་བའི་གསེར་སྦྱངམ་འདི།།ནཱ་མེ་ཏོག་ཁྱོད་ཀྱི་རྩ་བ་ལུ།།

ང་གཤོག་སྒྲོ་ངལ་ངལ་འཕུར་རུ་རང་།།ཁྱོད་ང་ལུ་རྩ་ལས་བལྟ་མ་བཏུབ།།

ངེ་མི་ཚེ་མར་རེ་བཟུམ་འདི་ལུ།།རྐྱེན་རླུང་གིས་གཡབ་སྟེ་སྡོད་མ་སྟེར།།

ད་ཡུདཔ་ཐེངས་གཅིག་གི་མི་ཚེ་འདི།།དགའཝ་སྐྱིད་པའི་ངང་ལས་སྡོད་ད་གེས།།

༣  ཁ༽ཚིག་འབྲུ་བརྒྱད་མ། ༢་༢་༢་༢

ལྷ་མོ་ཁྱོད་ལུ་དངོས་གྲུབ་ཡོད་ན།།གསོལ་བ་བཏབ་མི་ལས་ཀྱིས་འཁོར་ཡོང་།།

སློབ་དཔོན་ཁྱོད་ལུ་ཡོན་ཏན་ཡོདཔ་ལས།།དད་པའི་སློབ་ཕྲུག་བརྟན་དུ་འཁོར་འོང་།།

སྟག་ཤར་ལུས་ཀྱི་ངོ་རིས་ལེགས་ཚེ།།སྨན་ཆུང་བུ་མོ་ཀུན་གྱི་རྒྱན་ཆ།།

ལུས་དང་རྣམ་ཤེས་སོ་སོར་བྱལ་རུང་།།ལེགས་པའི་འཛུམ་མདངས་སེམས་ལས་མ་བརྗེད།།

རང་གཟུགས་ཕ་མའི་འགན་ཁུར་ཕོག་ཚེ།།དྲིན་ཅན་ཕ་མའི་བཀའ་དྲིན་དྲན་དོ།།

རང་ལུ་གཅེས་པར་འཕང་པའི་ཕ་མ།།རང་སྲོག་ལས་ཀྱང་གཅེས་པར་འཛིན་དོ།།

སྟག་ཤར་ཚོགས་པ་པདྨའི་ལྡུམ་རར།།ངོ་རིས་སྦྲང་རྩིའི་བཅུད་ལྡན་མང་བས།།

བློ་སྟོབས་ཆུང་བའི་རྐང་དྲུག་རང་ཉིད།།རེ་ཞིག་མགོ་འཐོམ་ངང་དུ་ལུས་སོང་།། ༼ངང་ལུ་ལུས་དོ།།༽

༣   ག༽ཚིག་འབྲུ་བརྒྱད་མ། ༢་༡་༢་༢་༡

སྐལ་ལྡན་གྱི་སློབ་དཔོན་མཁས་པ་ཚུ།།ཕྱི་ནང་གི་ཡོན་ཏན་མཁས་པའི་གུ།།

འཛུམ་མདངས་ཀྱི་ཞལ་རས་མཚར་བའི་ཁར།།བྱང་ཆུབ་ཀྱི་སེམས་དང་ལྡན་པས་ལོ།།

དེང་སང་གི་སློབ་ཕྲུག་ཕོ་མོ་ཚུ།།རང་དོན་གྱི་ཡོན་ཏན་མ་ལྷབ་པར།།

མི་མཁོ་བའི་བུམོ་དང་སྨྱོ་རྫས་ཚུ།།འཕྲལ་ཕུགས་ཀྱི་བདེ་བར་བསམ་མ་ད།། ༼རྟག་བུ་ར་འཐུང་སྟེ་སྡོདཔ་མས་ས།།༽

ཙན་དན་གྱི་སྡོང་པོ་རིང་རུ་རང་།།ས་ཆུ་ལུ་བརྟེན་ཏེ་སྦོམ་དགོ་པས།།

སྟག་ཤར་གྱི་ངོ་རིས་ལེགས་རུ་རང་།།བྱ་སྤྱོད་ལུ་བལྟ་སྟེ་གདམ་དགོ་པས།།

དཀར་གསལ་གྱི་ཟླ་བའི་འོད་ཟེར་གྱིས།།ཀུ་མུད་ཀྱི་མེ་ཏོག་ཤར་དོ་བཟུམ།།

སློབ་དཔོན་གྱི་མཁས་པའི་ཐབས་ཤེས་ཀྱིས།།ང་བཅས་ཀྱི་རིག་པ་འཕེལ་བ་ལེགས།།

༤༽ཚིག་འབྲུ་དགུ་མ། ༢་༢་༢་༢་༡

གདུང་བརྒྱུད་མི་འདྲ་པད་མ་གླིང་པའི་གདུང་།།དབང་ཕྱུག་བརྒྱུད་འཛིན་རྒྱལ་པོའི་སྲོག་ཤིང་ཨིན།།

འབྲུག་ཡུལ་ལྷ་མི་སྲིད་སྡེའི་སྐྱབས་མགོན་མཆོག།མི་དབང་འཇིགས་མེད་གེ་སར་འཁྲུངས་པ་ལེགས།།

ཡབ་ནི་མི་འདྲ་འཇིགས་མེད་སེང་གེ་མཆོག།ཕྱི་དགྲ་གནོན་པའི་དཔའ་བོའི་སེང་གེ་ཨིན།།

ནང་གི་འཁོར་འབངས་སྐྱོང་བའི་མངའ་བདག་ཨིན།།མི་དབང་འཇིགས་མེད་སེང་གེ་ལྷ་རྒྱལ་ལོ།།

ཡུམ་ནི་མི་འདྲ་ཆོས་རྗེ་འབྲུག་པའི་གདུང་།།རྒྱལ་ཡུམ་ཨ་ཞེ་ཚེ་རིང་དབྱངས་སྒྲོན་མཆོག།

རྒྱལ་བའི་ཡུམ་མཆོག་རྗེ་བཙུན་སྒྲོལ་མ་ཨིན།།མི་དབང་ཨ་ཞེ་རྒྱལ་ལོ་ལྷ་རྒྱལ་ལོ།།

རྒྱལ་བཙུན་མི་འདྲ་རྗེ་བཙུན་པདྨ་མཆོག།ཡེེས་མཁའ་འགྲོ་མི་ཡི་གཟུགས་ལུ་བྱོན།།

ཁ་བཞི་དཔལ་ལྡན་འབྲུག་པའི་ཡུམ་མཆོག་ཨིན།།མི་དབང་རྒྱལ་བཙུན་རྒྱལ་ལོ་ལྷ་རྒྱལ་ལོ།།

མངའ་བདག་མི་འདྲ་འཇིགས་མེ་གེ་སར་མཆོག།ཡབ་རྗེ་དམ་པའི་ཐུགས་དགོངས་གཏད་ས་ཨིན།།

འཁོར་འབངས་ཡོངས་ཀྱི་ཡིད་བཞིན་ནོར་བུ་ཨིན།།མི་དབང་འཇིགས་མེད་གེ་སར་ལྷ་རྒྱལ་ལོ།།

༥༽ཚིག་འབྲུ་བཅིུག་མ། ༢་༢་༢་༢་༡་༢

ལྷ་ཡུལ་ས་ལ་འཕོས་པ་ཁ་བཞི་ཡི་འབྲུག་ཡུལ།།མཐའ་འཁོར་གངས་རི་ར་བས་བསྐོར་བ་ཡི་དབུས་སུ།།

ཤིང་དང་མེ་ཏོག་སྣ་ཚོགས་རང་བཞིན་གྱིས་འཁྲུངས་པས།།སྐྱིད་ཉམས་ལྷ་ཡི་གྲོང་ལས་ཁྱད་དུ་རང་འཕགས་སོང་།།

ཆོས་རྗེ་དཔལ་ལྡན་འབྲུག་པའི་བསྟན་སྲིད་ཀྱི་རྩ་བ།།བཀའ་བརྒྱུད་བསྟན་པའི་ཀ་ཆེན་གྱེན་དུ་ངང་འདྲེན་པའི།།

ཆོས་སྡེ་རྫོང་གཞི་གཟི་བརྗིད་ཆེ་བ་ཡི་ཕོ་བྲང་།།ལྷ་ཡི་གཞལ་མེད་ཁང་བཟང་ས་སྟེང་དུ་ཕེབས་སོང་།།

ཆོས་ཕྱོགས་བསྟན་པའི་སྲོག་ཤིང་འཕགས་པ་ཡི་དགེ་འདུན།།སྐྱབས་རྗེ་མཁན་སློབ་རྣམས་ཀྱིས་དབུ་བཞུགས་ཀྱི་འཕགས་ཚོགས།།

ཉིན་མཚན་མེད་པར་སྐྱེ་འགྲོའི་འགྲོ་དོན་གྱི་ ༼དེ་༽ མཛད་པ།།གཡེང་བ་མེད་པའི་འཕྲིན་ལས་ཡ་མཚན་གྱི་གཞི་མ།།

དབང་ཕྱུག་བརྒྱུད་པར་འཛིན་པའི་མངའ་བདག་གི་ཡབ་སྲས།།མཁྱེན་རིག་འཇམ་དཔལ་དབྱངས་ཀྱི་རལ་གྲི་ལས་རྣོ་བ།།

ལྷག་བསམ་སྤྱན་རས་གཟིགས་ཀྱི་སྐུ་མདོག་ལས་དཀར་བ།།མི་དབང་ཡབ་སྲས་གཉིས་པོ་གཙུག་རྒྱན་དུ་བཞུགས་ཡོད།།

ཕྱིའི་ ༼ཡི་༽ དགྲ་རྣམས་མེད་པར་དགའ་བ་ཡི་རྒྱལ་ས།།ནང་གི་རྗེ་འབངས་མཐུན་པ་སྐྱིད་པ་ཡི་འབྲུག་ཡུལ།།

གསང་བར་བྱང་ཆུབ་སེམས་དཔའི་ས་ཐོབ་ཀྱི་ཞིང་ཁམས།།དཔལ་ལྡན་འབྲུག་པའི་རྒྱལ་ཁབ་འཛམ་གླིང་གི་ལྷ་ཡུལ།། །།

མཇུག་བསྡུ།

ཕྱུག་ཕྱུག་ཐོས་བསམ་རིག་པས་རབ་ཕྱུག་པའི།།བཟང་བཟང་ཐུགས་གཤིས་བཟང་བའི་སློབ་མཆོག་གིས།།

མཐུན་མཐུན་ང་ཚོའི་བློ་མཐུན་ལས་འགུལ་འདིས།།ལྷག་ལྷག་སྔར་ལས་ལྷག་པའི་བློ་རིག་ཤར།།

བློ་དམན་རང་གི་ལྕོགས་གྲུབ་ཆུང་ན་ཡང་།།ཡང་ཅིག་ཐུགས་བསྐྱེད་བཟང་པོས་གཟིགས་པ་ན།།

ན་ལོན་རང་གི་བསམ་པའི་རེ་བ་འདི།།འདི་ནས་ནད་གྲོལ་ནད་པའི་སེམས་ལྟར་དགའ།།

ཕྲན་མོའི་ལས་འགུལ་ཁྲོན་པའི་རང་བཞིན་ལ།།སྐུ་མཆོག་རྒྱ་མཚོའི་ཉ་ཆེན་མཉེས་པའི་རྒྱུ།།

གསལ་ཞིང་དྭངས་པའི་ཆུ་མཛོད་མེད་ན་ཡང་།།བརྩེ་བའི་ཐུགས་ཀྱིས་ཧུབ་གཅིག་གསོལ་བར་ཞུ།།

སྙན་རྩོམ་རིག་པའི་རྒྱ་མཚོ་ཆེན་མོ་ལས།།རང་བློར་མཚམས་པའི་ཆུ་ཕུད་ལག་གང་པོས།།

མ་ཤེས་སྐོམ་པའི་སྡུག་པ་བསལ་ཡོད་པས།།སྐུ་ཉིད་མཆོག་ལ་བཀྲིན་ལེགས་སོ་ཞུ།།

སྙན་རྩོམ་རིག་པའི་གྲིབ་བསིལ་མེད་པའི་དུས།།རེ་ཞིག་ཚ་བས་གདུང་སྟེ་སྡུག་ན་ཡང་།།

གང་སྐུའི་རིག་པའི་གྲིབ་བསིལ་འོག་ཚུད་པས།།ཚ་བ་བསལ་མཛད་སྐུ་ཉིད་བཀྲིན་ཆེ།།

གསལ་གསལ་ཁྲིད་པའི་འགྲོ་སྟངས་གསལ་བའི་ངག།འཇམ་འཇམ་ཚིག་གི་རྣམ་པ་འཇམ་པོའི་གསུང་།།

དག་དག་རྣམ་དག་སློབ་སྟོན་གནང་མི་ལུ།།ཡང་ཡང་བཀྲིན་ཆེ་ཟེར་ཞུ་ནི་ལགས།། །།

ཕུལ་མི:    བདེ་ཆེན་དབང་མོ།

༼ཡང་ཡང་ཚིག་གི་མདའ་མོ་འཕངས་པ་ན། །ཚབ་ཚབ་འབད་དེ་རྩོམ་ཡང་ལྷག་མ་ཚུགས།།

ཤར་ཤར་བལྟ་སྟེ་མཇུག་ལུ་ལྷོད་པའི་ཚེ། །ལྷང་ལྷང་ཁྱོད་ཞལ་ང་ཡི་སེམས་ལ་ཤར།།༽